നാദാപുരം റോഡ്: കാരക്കാട് എം. എൽ. പി സ്കൂളിന്റെ 120ാം വാർഷികാഘോഷത്തിന്റെ ഭാഗമായി നിർമ്മിച്ച പുനത്തിൽ കുഞ്ഞബ്ദുള്ള സ്മാരക ഓപ്പൺ ഹാൾ യു.എൽ.സി.സി ചെയർമാൻ രമേശർ പാലേരി ഉദ്ഘാടനം ചെയ്തു. ചടങ്ങിൽ പറമ്പത്ത് മനോജൻ സ്വഗതം പറഞ്ഞു. ഖാദർ ഹാജി അധ്യക്ഷത വഹിച്ചു. പുനത്തിൽ കുഞ്ഞബ്ദുള്ളയുടെ മകൾ നസീമ, മരുമകൻ ജലീൽ, സ്കൂൾ മാനേജർ അഹമ്മദ്, വാർഡ് മെബർ ബിന്ദു വള്ളിൽ, നിർമ്മാണകമ്മിറ്റി കൺവീനർ മനോജ് പി, പി.ടി.എ പ്രസിഡന്റ് ശ്രീജിത്ത് പി.പി എന്നിവർ സംസാരിച്ചു. പ്രധാനാധ്യാപിക ഷീന നന്ദി പറഞ്ഞു.

പുനത്തിൽ കുഞ്ഞബ്ദുള്ള സ്മാരക ഓപ്പൺ ഹാൾ  ഉദ്ഘാടനം ചെയ്തു

Vadakara

വിശാഖപട്ടണം: രണ്ടാം ടെസ്റ്റിലെ ഡബിൾ‌ സെഞ്ചറിക്കു പിന്നാലെ അപൂര്‍വ നേട്ടം സ്വന്തമാക്കി ഇന്ത്യൻ യുവ ബാറ്റർ യശസ്വി ജയ്സ്വാൾ. ഇന്ത്യയ്ക്കായി ടെസ്റ്റിൽ ഡബിൾ സെഞ്ചറി തികയ്ക്കുന്ന പ്രായം കുറഞ്ഞ മൂന്നാമത്തെ താരമാണ് യശസ്വി. ഇംഗ്ലണ്ടിനെതിരായ വിശാഖപട്ടണം ടെസ്റ്റിൽ ഡബിൾ സെഞ്ചറി തികയ്ക്കുമ്പോൾ യശസ്വി ജയ്സ്വാളിന് 22 വയസ്സാണു പ്രായം. മുൻ ഇന്ത്യൻ താരങ്ങളായ വിനോദ് കാംബ്ലിയും സുനിൽ ഗാവസ്കറുമാണ് മുൻപ് ചെറുപ്രായത്തിൽ ഡബിൾ സെഞ്ചറിയിലെത്തിയ താരങ്ങൾ. വിനോദ് കാംബ്ലിക്ക് 21 വയസ്സും 32 ദിവസവും ഗാവസ്കറിന് 21 വയസ്സും 277 ദിവസവുമായിരുന്നു ഡബിൾ സെഞ്ചറി നേടുമ്പോഴത്തെ പ്രായം.
രാജ്യാന്തര തലത്തിൽ പാക്കിസ്ഥാന്റെ ജാവേദ് മിയാന്‍ദാദാണ് ഈ പട്ടികയിൽ മുന്നിലുള്ളത്. ‍ഡബിൾ സെഞ്ചറി നേടുമ്പോൾ മിയാൻദാദിന് പ്രായം 19 വയസ്സും 140 ദിവസവുമായിരുന്നു. നിലവിലെ ലോക ടെസ്റ്റ് ചാംപ്യൻഷിപ്പിൽ (2023–25) ഒരു ഇന്നിങ്സിൽ കൂടുതൽ റൺസ് നേടിയ താരമെന്ന റെക്കോർഡിലും ജയ്സ്വാൾ മുന്നിലുണ്ട്. രണ്ടാം ടെസ്റ്റിന്റെ ആദ്യ ദിവസം 179 റൺസുമായി പുറത്താകാതെ നിന്ന ജയ്സ്വാൾ രണ്ടാം ദിവസം ഡബിൾ സെഞ്ചറിയിലെത്തുകയായിരുന്നു.
277 പന്തുകളില്‍നിന്നാണ് യശസ്വി ഡബിൾ സെഞ്ചറി തികച്ചത്. 290 പന്തുകളിൽനിന്ന് 209 റൺസെടുത്ത് താരം പുറത്തായി. ജയ്സ്വാളിന്റെ കരിയറിലെ ഏറ്റവും മികച്ച പ്രകടനമാണിത്. ലോക ടെസ്റ്റ് ചാംപ്യൻഷിപ്പിൽ വിരാട് കോലി, മയാങ്ക് അഗർവാൾ, രോഹിത് ശർമ എന്നിവർക്കു ശേഷം ഡബിൾ സെഞ്ചറി തികയ്ക്കുന്ന നാലാമത്തെ താരമാണു യശസ്വി. 22 വയസ്സുകാരനായ താരം നേരത്തേ രഞ്ജി ട്രോഫി, ദുലീപ് ട്രോഫി, ഇറാനി കപ്പ് എന്നിവയിലും ഡബിൾ സെഞ്ചറി അടിച്ചിട്ടുണ്ട്.
ഏഴു സിക്സുകളാണ് ആദ്യ ഇന്നിങ്സിൽ താരം ബൗണ്ടറി കടത്തിയത്. ഉത്തർപ്രദേശിലെ ബദോഹി സ്വദേശിയായ യശസ്വി ആഭ്യന്തര ക്രിക്കറ്റിൽ മുംബൈയുടെ താരമാണ്. ഇംഗ്ലണ്ടിനെതിരായ ആദ്യ ടെസ്റ്റിൽ 80, 15 റൺസുകളാണ് രണ്ട് ഇന്നിങ്സുകളിലുമായി ജയ്സ്വാൾ നേടിയത്. കഴിഞ്ഞ വർഷം വെസ്റ്റിൻഡീസിനെതിരെ ടെസ്റ്റിൽ അരങ്ങേറ്റ മത്സരം കളിച്ച ജയ്സ്വാൾ ആദ്യ ഇന്നിങ്സിൽ തന്നെ സെഞ്ചറി തികച്ചിരുന്നു. 387 പന്തുകളിൽനിന്ന് 171 റണ്‍സാണു താരം താരം അടിച്ചെടുത്തത്. ഐപിഎല്ലിൽ രാജസ്ഥാൻ റോയൽസിന്റെ താരമാണ്.

22–ാം വയസ്സിൽ ടെസ്റ്റിൽ ഡബിൾ സെഞ്ചറി; അപൂർവ നേട്ടം സ്വന്തമാക്കി യശസ്വി ജയ്സ്വാൾ

അഴിയൂർ: മാഹി റെയിൽവേ സ്റ്റേഷൻ പരിസരത്ത് റോഡിൽ വച്ച് 18.6 ലിറ്റർ മാഹി വിദേശമദ്യവുമായി ഒരാളെ എക്‌സൈസ് സംഘം പിടികൂടി. തിരൂരങ്ങാടി മണ്ടകത്തിങ്കൽ വീട്ടിൽ ഹരികുമാർ (47) ആണ് പിടിയിലായത്. സര്‍ക്കിള്‍ ഓഫീസിലെ അസിസ്റ്റന്റ് എക്സൈസ് ഇൻസ്പെക്ടർ (ഗ്രേഡ്) രാമചന്ദ്രൻ പി പിയും പാർട്ടിയും ചേർന്നാണ് ഇയാളെ പിടികൂടിയത്. സിവിൽ എക്സൈസ് ഓഫീസർമാരായ ജിജു കെ എൻ, ഷിജിൻ എ പി എന്നിവർ സംഘത്തിലുണ്ടായിരുന്നു.

മാഹി വിദേശമദ്യവുമായി ഒരാൾ പിടിയിൽ

Mahe

സ്‌ട്രെസ് യൂറിനറി ഇന്‍കണ്ടിനെന്‍സ് (എസ്യുഐ) എന്നത് പല സ്ത്രീകളെയും ബാധിക്കുന്ന ഒരു സാധാരണവും എന്നാല്‍ പലപ്പോഴും അവഗണിക്കപ്പെടുന്നതുമായ അവസ്ഥയാണ്, മൂത്രസഞ്ചിയില്‍ സമ്മര്‍ദ്ദം ചെലുത്തുന്ന സാഹചര്യങ്ങളില്‍ മൂത്രം സ്വമേധയാ ചോരുന്ന അവസ്ഥയാണിത്. ചിരി, ചുമ, തുമ്മല്‍, അല്ലെങ്കില്‍ ലിഫ്റ്റിംഗ് പോലുള്ള ശാരീരിക പ്രവര്‍ത്തനങ്ങള്‍ മൂലവും മൂത്രം ഇറ്റുന്ന അവസ്ഥയുണ്ടായേക്കാം. എസ് യു ഐ എന്നത് കേവലം ഒരു ശാരീരിക അസൗകര്യം എന്നതിലുപരി നാണക്കേടിലേക്കും സാമൂഹിക പിന്‍വലിയലിലേക്കും നയിക്കുന്ന സാഹചര്യങ്ങള്‍ കൊണ്ട് ഇത് ഒരു സ്ത്രീയുടെ ജീവിത നിലവാരത്തെ തന്നെ സാരമായി ബാധിക്കുന്ന ഒന്നാണ്.
കാരണങ്ങള്‍
പ്രാഥമികമായി മൂത്രസഞ്ചിയെയും മൂത്രനാളിയെയും സപ്പോര്‍ട്ട് ചെയ്യുന്ന ദുര്‍ബലമായ പെല്‍വിക് ഫ്‌ളോര്‍ പേശികളില്‍ നിന്നാണ് ഉണ്ടാകുന്നത്. ഗര്‍ഭധാരണം, പ്രസവം, ആര്‍ത്തവവിരാമ സമയത്തുണ്ടാകുന്ന ഹോര്‍മോണ്‍ വ്യതിയാനങ്ങള്‍, അമിതവണ്ണം തുടങ്ങിയ ഘടകങ്ങള്‍ ഈ പേശികളെ ദുര്‍ബലപ്പെടുത്തുന്നതിന് കാരണമാകും, ഇത് മൂത്രം ചോര്‍ച്ചയിലേക്ക് നയിക്കുന്നു. ജനിതകമായ കാരണങ്ങളും വാര്‍ധക്യവും എസ്യുഐ ഡവലപ് ചെയ്യുന്നതില്‍ ഒരു പങ്കു വഹിക്കുന്നു.
രോഗലക്ഷണങ്ങള്‍
എസ് യു ഐയുടെ ഏറ്റവും സാധാരണമായ ലക്ഷണം വയറ്റില്‍ സമ്മര്‍ദ്ദം ഉണ്ടാകുമ്പോള്‍ മൂത്രം പുറത്തുപോകുന്നതാണ്. ഒരു മുന്നറിയിപ്പുമില്ലാതെ സ്ത്രീകള്‍ക്ക് പെട്ടെന്ന് മൂത്രമൊഴിക്കാന്‍ തോന്നുകയോ ചോര്‍ച്ചയോ അനുഭവപ്പെടാം. മറ്റ് തരത്തിലുള്ള മൂത്രാശയ രോഗങ്ങളില്‍ നിന്ന് സ്‌ട്രെസ് യൂറിനറി ഇന്‍കോണ്ടിനെന്‍സിനെ വേര്‍തിരിച്ചറിയുമ്പോഴാണ് ഏറ്റവും ഫലപ്രദമായ ചികിത്സ ആസൂത്രണം ചെയ്യാന്‍ കഴിയുക.
ശസ്ത്രക്രിയേതര മാര്‍ഗ്ഗങ്ങള്‍
എസ്യുഐ ചികിത്സയിലെ സമീപകാല പുരോഗതികള്‍ ശസ്ത്രക്രിയേതര ഇടപെടലുകള്‍ക്ക് പ്രാധാന്യം കല്‍പിക്കുന്നുണ്ട്. പലപ്പോഴും 'കെഗല്‍ -Kegel- വ്യായാമങ്ങള്‍' - എന്ന് വിളിക്കപ്പെടുന്ന പെല്‍വിക് ഫ്‌ളോര്‍ വ്യായാമങ്ങള്‍ പെല്‍വിക് പേശികളെ ശക്തിപ്പെടുത്തുന്നതില്‍ നിര്‍ണ്ണായക പങ്കുവഹിക്കുന്നു. ഈ വ്യായാമങ്ങള്‍ ദൈനംദിന ദിനചര്യകളില്‍ എളുപ്പത്തില്‍ ഉള്‍പ്പെടുത്താന്‍ കഴിയും. ശരീരഭാരം നിയന്ത്രിക്കുന്നതു പോലെ ജീവിതശൈലീ പരിഷ്‌ക്കരണങ്ങളും എസ്യുഐയുടെ തീവ്രത കുറയ്ക്കാൻ സഹായകമാകും. കാപ്പി പോലുള്ളവയില്‍ നിന്നുള്ള കഫീന്‍ പരമാവധി ഒഴിവാക്കുകയും ആരോഗ്യകരമായ പാനീയങ്ങള്‍ മാത്രം കഴിക്കുകയും ചെയ്യുന്നതും നല്ലതാണ്. അധിക പിന്തുണ ആവശ്യമുള്ളവര്‍ക്കായി, ബള്‍ക്കിംഗ് ഏജന്റുകള്‍ പോലെയുള്ള ഏറ്റവും പുതിയ മിനിമലി ഇന്‍വേസിവ് നടപടിക്രമങ്ങള്‍ ഉയര്‍ന്നുവന്നിട്ടുണ്ട്. മൂത്രനാളിക്ക് ചുറ്റും സ്ഥാപിച്ചിരിക്കുന്ന ഈ കുത്തിവയ്പ്പ് ജെല്ലുകള്‍ അല്ലെങ്കില്‍ ഇംപ്ലാന്റുകള്‍ ചെറിയ വെഡ്ജുകള്‍ പോലെ പ്രവര്‍ത്തിക്കുന്നു, ഇത് കൂടുതല്‍ ദൃഢമായി അടയ്ക്കാനും മൂത്ര ചോര്‍ച്ച തടയാനും സഹായിക്കുന്നു.
നൂതന ചികിത്സാ സാധ്യകള്‍
സ്‌പെഷ്യലൈസ്ഡ് തെറാപ്പിസ്റ്റിന്റെ മേല്‍നോട്ടത്തിലുള്ള പെല്‍വിക് ഫ്‌ളോര്‍ ഫിസിക്കല്‍ തെറാപ്പി പെല്‍വിക് പേശികളെ വ്യായാമങ്ങളിലൂടെ ശക്തിപ്പെടുത്തുന്നു. ഇത് ശരിയായ സാങ്കേതികത ഉറപ്പാക്കുകയും വ്യായാമങ്ങളുടെ ഫലപ്രാപ്തി വര്‍ധിപ്പിക്കുകയും ചെയ്യുന്നു. മൂത്രനാളിയെ സപ്പോര്‍ട്ട് ചെയ്യുന്നതിനും മൂത്രം ചോരുന്നത് കുറയ്ക്കുന്നതിനുമായി രൂപകല്‍പ്പന ചെയ്ത മെഡിക്കല്‍ ഉപകരണങ്ങളുടെ ഉപയോഗമാണ് മറ്റൊന്ന്. ഈ ഉപകരണങ്ങള്‍ ശസ്ത്രക്രിയയെ ആശ്രയിക്കാതെ എസ് യു ഐ നിയന്ത്രിക്കാന്‍ സഹായിക്കുന്നു. ഉപയോഗിക്കാന്‍ സൗകര്യപ്രദമാണെന്നതും ഇവയുടെ സ്വീകാര്യത വര്‍ധിപ്പിക്കുന്നുണ്ട്.
ശസ്ത്രക്രിയാ സാധ്യതകള്‍
ശസ്ത്രക്രിയേതര മാര്‍​ഗങ്ങള്‍ ഫലപ്രദമാകാതെ വരുന്ന സന്ദര്‍ഭങ്ങളില്‍ ശസ്ത്രക്രിയകള്‍ സാധ്യമാണ്. സമീപകാലത്ത് മിനിമലി ഇന്‍വേസീവ് ആയ ശസ്ത്രക്രിയാ സങ്കേതങ്ങള്‍ ഉപയോഗിക്കുന്നതുകൊണ്ട് മുറിവുകള്‍ ചെറുതാവുകയും ഫലപ്രാപ്തി വര്‍ധിക്കുകയും ചെയ്തിട്ടുണ്ട്. മിഡ്-യൂറിത്രല്‍ സ്ലിംഗുകള്‍, യൂറിത്രല്‍ ബള്‍ക്കിംഗ് ഏജന്റുകള്‍ എന്നിവ പോലുള്ള നടപടിക്രമങ്ങള്‍, റിക്കവറി സമയം കുറയ്ക്കുകയും സങ്കീര്‍ണതകള്‍ കുറയ്ക്കുകയും ചെയ്യുന്നു. സ്ലിംഗ് സര്‍ജറി പോലുള്ള നടപടിക്രമങ്ങള്‍ പല സ്ത്രീകള്‍ക്കും ദീര്‍ഘകാല വിജയം വാഗ്ദാനം ചെയ്യുന്നു. റോബോട്ടിക് അസിസ്റ്റഡ് സര്‍ജറി പോലുള്ള പുതിയ സാങ്കേതിക വിദ്യകള്‍ മുറിവുകളും വീണ്ടെടുക്കല്‍ സമയവും കുറയ്ക്കുന്നു. മൂത്രാശയ പ്രവര്‍ത്തനത്തെ നിയന്ത്രിക്കാന്‍ വൈദ്യുത ഉത്തേജനം ഉപയോഗിക്കുന്ന ന്യൂറോമോഡുലേഷന്‍ തെറാപ്പി, സ്റ്റെം സെല്‍ തെറാപ്പി എന്നിവ എസ്യുഐ ചികിത്സയില്‍ പുതിയ സാധ്യതകള്‍ തുറന്നിടുന്നു.
ശ്രദ്ധിക്കാവുന്ന ചില കാര്യങ്ങള്‍
ആരോഗ്യകരമായ ഭാരം നിലനിര്‍ത്തുക: അമിതഭാരം മൂത്രസഞ്ചിയിലും പെല്‍വിക് ഫ്‌ളോര്‍ പേശികളിലും അധിക സമ്മര്‍ദ്ദം ചെലുത്തുന്നു.
ജലാംശം നിലനിര്‍ത്തുക: നിര്‍ജ്ജലീകരണം മൂത്രാശയത്തെ പ്രയാസപ്പെടുത്തുകയും രോഗലക്ഷണങ്ങള്‍ വഷളാക്കുകയും ചെയ്യും.
മൂത്രാശയത്തെ പ്രകോപിപ്പിക്കുന്നവ പരിമിതപ്പെടുത്തുക: കഫീന്‍, ആല്‍ക്കഹോള്‍ തുടങ്ങിയ ചില ഭക്ഷണപാനീയങ്ങള്‍ എസ്യുഐയെ കൂടുതല്‍ വഷളാക്കും.
മുന്‍കൂട്ടി ആസൂത്രണം ചെയ്യുക: പുറത്ത് പോകുമ്പോള്‍, ബാത്ത്‌റൂമില്‍ പോകാനും മറ്റുമുള്ള സൗകര്യങ്ങള്‍ മുന്‍കൂട്ടി ആസൂത്രണം ചെയ്യുക.
സ്‌ട്രെസ് യൂറിനറി ഇന്‍കോണ്ടിനെന്‍സ് എല്ലാ പ്രായത്തിലുമുള്ള സ്ത്രീകളെ ബാധിക്കുന്ന ഒരു സാധാരണ അവസ്ഥയാണ്, ഇത് അവരുടെ ദൈനംദിന ജീവിതത്തെയും വൈകാരിക ക്ഷേമത്തെയും ബാധിക്കുന്നു. എസ് യു ഐ ലക്ഷണങ്ങള്‍ അനുഭവിക്കുന്ന സ്ത്രീകള്‍ പ്രൊഫഷണല്‍ മാര്‍ഗ്ഗനിര്‍ദ്ദേശം തേടല്‍ നിര്‍ബന്ധമാണ്. ലജ്ജ മൂലം രഹസ്യമായി കൊണ്ടുനടക്കുന്നതിനു പകരം ആദ്യകാല രോഗനിര്‍ണയവും ഇടപെടലും മികച്ച ഫലങ്ങള്‍ നേടുന്നതിന് നിര്‍ണായകമാണെന്ന് ഓര്‍മ്മിക്കുക.
&nbsp;

ചിരിക്കുമ്പോഴും തുമ്മുമ്പോഴുമൊക്കെ മൂത്രം പോകുന്ന അവസ്ഥ; ചികിത്സ തേടാൻ മടിക്കരുത്

Health

കൊയിലാണ്ടി: കാറും ബൈക്കും കൂട്ടിയിടിച്ചു യുവാവ് മരിച്ചു. ചേലിയയിലെ പുനത്തിൽ മീത്തൽ പരേതനായ പ്രസൂൺകുമാറിന്റെ മകൻ കാളിദാസ് (ഷാനു 18) ആണ് മരിച്ചത്. ശനിയാഴ്ച പുലർച്ചെ പൂക്കാട് പെട്രോൾ പമ്പിന് മുൻപിലായിരുന്നു അപകടം. കോഴിക്കോട് സ്വകാര്യ വിദ്യാഭാസ സ്ഥാപനത്തിൽ ഏവിയേഷൻ കോഴ്സ് വിദ്യാർഥിയായിരുന്നു. ഏഴു വർഷം മുമ്പ് മൈസൂരുവിൽ വച്ചുണ്ടായ വാഹനാപകടത്തിലാണ് അച്ഛൻ പ്രസൂൺകുമാർ മരിച്ചത്. അമ്മ: ഷേർലി.

കൊയിലാണ്ടിയിൽ കാറും ബൈക്കും കൂട്ടിയിടിച്ച് യുവാവ് മരിച്ചു

Koyilandy

ബെംഗളൂരു: കേന്ദ്ര സർക്കാറിന്റെ അവഗണനക്കെതിരെ സമരവുമായി കർണാടകയും. ബുധനാഴ്ച ഡൽഹിയിൽ നടക്കുന്ന സമരത്തിൽ മുഖ്യമന്ത്രി സിദ്ധരാമയ്യയും മന്ത്രിമാരും എംപിമാരും പങ്കെടുക്കും. ബിജെപിയിൽ നിന്ന് അധികാരം പിടിച്ചെടുത്ത ശേഷം സംസ്ഥാനത്തെ കേന്ദ്രം അവഗണിക്കുന്നുവെന്നാണ് കോൺഗ്രസിന്റെ പരാതി. കൂടുതൽ നികുതി വിഹിതം നൽകിയിട്ടും ന്യായമായ വിഹിതം കേന്ദ്രം തരുന്നില്ലെന്നും വരൾച്ച ബാധിത ജില്ലകൾക്ക് വേണ്ട സഹായം കേന്ദ്രം നൽകിയില്ലെന്നും സംസ്ഥാന സർക്കാർ ആരോപിക്കുന്നു.
മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡികെ ശിവകുമാർ, എംഎൽഎമാർ, എംഎൽസിമാർ എന്നിവർ പ്രതിഷേധത്തിൽ പങ്കെടുക്കും. കോൺഗ്രസിന്റെ മുതിർന്ന നേതാക്കളും ഡൽഹിയിലെ സമരത്തിന്റെ ഭാഗമാകും. സംസ്ഥാനത്തെ 28 എംപിമാരിൽ 27 പേരും ബിജെപിയിൽ നിന്നുള്ളവരാണെങ്കിലും അവർ സംസ്ഥാനത്തിന് വേണ്ടി ഇടപെടുന്നില്ലെന്ന് ഡി കെ ശിവകുമാർ ആരോപിച്ചു. കഴിഞ്ഞ അഞ്ച് വർഷത്തിനിടെ സംസ്ഥാനത്തിന് കിട്ടേണ്ട പണത്തിൽ 62,000 കോടി രൂപയുടെ കുറവുണ്ടായെന്നും ഡി.കെ പറഞ്ഞു. കേന്ദ്ര അവഗണനയ്‌ക്കെതിരെ എൽഡിഎഫിന്റെ പ്രതിഷേധം വ്യാഴാഴ്ച നടക്കാനിരിക്കെയാണ് കർണാടക സർക്കാരും സമരവുമായി രംഗത്തെത്തുന്നത്.

കേന്ദ്ര അവഗണനക്കെതിരെ സമരത്തിന് കർണാടകയും

National

ഡൽഹി: പഞ്ചാബ് ഗവർണർ ബൻവാരിലാൽ പുരോഹിത് രാജിവെച്ചു. വ്യക്തിപരമായ കാരണങ്ങൾ കൊണ്ടാണ് രാജിയെന്ന് രാഷ്ട്പതിക്ക് അയച്ച കത്തിൽ വ്യക്തമാക്കി. ചണ്ഡീഗഡിന്റെ അഡ്മിനിസ്ട്രേറ്റർ കൂടിയായിരുന്നു. നിയമസഭ പാസാക്കിയ ബില്ലുകളിൽ തീരുമാനം വൈകിപ്പിച്ചത്തിൽ ഗവർണർക്കെതിരെ സുപ്രീംകോടതി രൂക്ഷ വിമർശനം ഉന്നയിച്ചിരുന്നു.
ബില്ലുകളിൽ ഗവർണർ തീരുമാനം എടുക്കുന്നത് നീണ്ടതോടെ പഞ്ചാബ് സർക്കാർ സുപ്രീംകോടതിയെ സമീപിച്ചിരുന്നു. ബിൽ തീരുമാനമെടുക്കാതെ അനന്തമായി തടഞ്ഞുവെക്കാനാവില്ലെന്നും നിയമസഭയുടെ നിയമനിർമാണ അധികാരങ്ങളെ അട്ടിമറിക്കാൻ ഗവർണർക്ക് സാധിക്കില്ലെന്നുമുള്ള നിർണായക ഉത്തരവും സുപ്രീംകോടതിയിൽ നിന്ന് സർക്കാർ സമ്പാദിച്ചിരുന്നു.
ബില്ലുകൾ മുന്നിലെത്തുമ്പോൾ അതിന് അനുമതി നൽകുകയോ അനുമതി നൽകാതെ തിരിച്ചയക്കുകയോ പ്രസിഡന്റി​ന്റെ അഭിപ്രായം തേടുകയോ ചെയ്യാം. തീരുമാനമെടുക്കുന്നത് അനന്തമായി നീട്ടാനാവില്ലെന്നായിരുന്നു സുപ്രീംകോടതി പറഞ്ഞത്. കേരള, തമിഴ്നാട് ഗവർണർമാർക്കെതിരെ സംസ്ഥാന സർക്കാറുകൾ കോടതിയിലെത്തിയപ്പോഴും പഞ്ചാബ് കേസിലെ ഈ വിധിയാണ് കോടതി പരാമർശിച്ചത്. തുടർന്ന്, കേരള ഗവർണർ ആരിഫ് മുഹമ്മദ് ഖാൻ ഒരു ബില്ലിൽ ഒപ്പിടുകയും ഏഴ് ബില്ലുകൾ രാഷ്ട്രപതിക്ക് അയക്കുകയും ചെയ്തിരുന്നു. ഇതിന് പിന്നാലെ തമിഴ്നാട് ഗവർണർ ആർ.എൻ. രവിയും ബില്ലുകൾ രാഷ്ട്രപതിക്ക് അയച്ചിരുന്നു.

പഞ്ചാബ് ഗവർണർ രാജിവെച്ചു

കണ്ണൂർ: ബൈക്ക് നിയന്ത്രണം വിട്ട് മതിലിൽ ഇടിച്ചുണ്ടായ അപകടത്തിൽ യുവാവ് മരിച്ചു. മാട്ടൂൽ കക്കാടൻചാലിൽ എബിൻ ജോൺ (24) ആണ് മരിച്ചത്. ഇയാളോടൊപ്പം സഞ്ചരിച്ചിരുന്ന സുഹൃത്ത് ആകാശിനെ ഗുരുതര പരിക്കുകളോടെ പരിയാരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ശനിയാഴ്ച പുലർച്ചെ രണ്ടുമണിക്ക് പുതിയങ്ങാടിയിലായിരുന്നു അപകടം.&nbsp;

ബൈക്ക് നിയന്ത്രണം വിട്ട് മതിലിൽ ഇടിച്ച് യുവാവ് മരിച്ചു

Kannur

വടകര: നഗരസഭ 2023-24 വാർഷിക പദ്ധതിയിൽ ഉൾപ്പെടുത്തി നിർമ്മിച്ച പഴങ്കാവ് നാലാം വാർഡിലെ പിലാക്കണ്ടി മുക്ക് - മുനിസിപ്പാൽ കിണർ റോഡ് നാടിന് സമർപ്പിച്ചു. ചെയർപേഴ്സൺ കെ.പി. ബിന്ദു ഉദ്ഘാടനം നിർവഹിച്ചു. ചടങ്ങിൽ ടി.കെ. പ്രഭാകരൻ സ്വാഗതം പറഞ്ഞു. വാർഡ് കൗൺസിലർ പി.പി. ബാലകൃഷ്ണൻ അദ്ധ്യക്ഷത വഹിച്ചു. രാജൻ കെ.വി., സരോജിനി. കെ എന്നിവർ ആശംസകൾ നേർന്നു. ചന്ദ്രൻ കെ. പി. നന്ദി പറഞ്ഞു.

റോഡ് ഉദ്ഘാടനം ചെയ്തു

തൃശൂർ: വീട്ടിൽ അതിക്രമിച്ച് കയറി ബാലികയെ പലതവണ ബലാത്സംഗം ചെയ്യുകയും കത്തികാണിച്ച് ഭീഷണിപ്പെടുത്തുകയും ചെയ്ത കേസിലെ പ്രതികൾക്ക് ഇരട്ട ജീവപര്യന്തം. ചാവക്കാട് എടക്കഴിയൂർ വില്ലജ് നാലാംകല്ല് ദേശത്തു കല്ലുവളപ്പിൽ വീട്ടിൽ അലി (50), കൂട്ടാളി എടക്കഴിയൂർ സ്വദേശി സുബൈദ എന്നിവരെയാണ് ചാവക്കാട് ഫാസ്റ്റ് ട്രാക്ക് സ്പെഷൽ കോടതി ജഡ്ജി അന്യാസ് തയ്യിൽ കുറ്റക്കാരാണെന്ന് കണ്ടെത്തി ശിക്ഷ വിധിച്ചത്. ഇരട്ട ജീവപര്യന്തം കൂടാതെ ഒന്നാം പ്രതിക്ക് 36 വർഷം കഠിനതടവും 4,80,000 രൂപ പിഴയും വിധിച്ചിട്ടുണ്ട്. പിഴ അടയ്ക്കാത്ത പക്ഷം 3 വർഷവും 4 മാസവും അധിക തടവ് അനുഭവിക്കണം. രണ്ടാം പ്രതിക്ക് ഇരട്ട ജീവപര്യന്തം കൂടാതെ 22 വർഷം തടവും 2,35,000 രൂപ പിഴയും വിധിച്ചു. പിഴ അടക്കാത്ത പക്ഷം രണ്ടര വർഷം കൂടി തടവ് അനുഭവിക്കണം.
2019 ജനുവരി 14നും അതിനു മുമ്പുമുള്ള ദിവസങ്ങളിലാണ് കേസിനാസ്പദമായ സംഭവം നടന്നത്. പിഴ സംഖ്യ അതിജീവിതക്കു നൽകാനും കോടതി വിധിച്ചു. ചാവക്കാട് പൊലീസ് സബ് ഇൻസ്‌പെക്ടർമാരായ ജയപ്രദീപ് കെ.ജി, അനന്തകൃഷ്ണൻ, ഇൻസ്പെക്ടർമാരായ ഗോപകുമാർ, ഗോപകുമാർ ജി തുടങ്ങിയവരാണ് അന്വേഷണം പൂർത്തിയാക്കി കുറ്റപ്പത്രം സമർപ്പിച്ചത്. പ്രോസിക്യൂഷന് വേണ്ടി 23 സാക്ഷികളെ വിസ്തരിക്കുകയും 31 രേഖകളും മുതലുകളും ശാസ്ത്രീയ തെളിവുകളും ഹാജരാക്കുകയും ചെയ്തു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ സിജു മുട്ടത്ത്, നിഷ സി എന്നിവർ ഹാജരായി. സി.പി.ഒമാരായ റോബിൻസൺ, പ്രസീത, സിന്ധു എന്നിവർ പ്രോസീക്യൂഷനെ സഹായിച്ചു.

വീട്ടിൽ അതിക്രമിച്ച് കയറി ബാലികയെ ബലാത്സംഗം ചെയ്ത പ്രതിക്കും സഹായിക്കും ഇരട്ട ജീവപര്യന്തം

Kerala

ഖത്തർ: ലോകോത്തര സേവനങ്ങൾ, ആധുനിക അടിസ്ഥാന സൗകര്യങ്ങൾ, ആരോഗ്യമേഖലയിലെ നിക്ഷേപം എന്നിവ പ്രകടമാക്കിക്കൊണ്ട് നംബിയോയുടെ വ്യത്യസ്ത സൂചികകളിൽ മുൻനിര രാജ്യങ്ങളുടെ പട്ടികയിൽ ഖത്തർ ഇടം നേടി. 72.7 പോയിൻ്റ് നേടി തുടർച്ചയായ നാലാം വർഷവും നംബിയോ ഹെൽത്ത്‌കെയർ ഇൻഡക്‌സ് 2024 ലെ മികച്ച 20 രാജ്യങ്ങളിൽ ഖത്തർ ഇടം നേടുകയായിരുന്നു. സർവേയിൽ ഉൾപ്പെട്ട 94 രാജ്യങ്ങളുടെ പട്ടികയിൽ തായ്‌വാനാണ് ഒന്നാമത്.
നംബിയോയുടെ വാർഷിക റാങ്കിംഗ് പഠനത്തിൽ ഉൾപ്പെടുത്തിയിട്ടുള്ള രാജ്യങ്ങളിൽ ഉടനീളം “മൊത്തത്തിലുള്ള ആരോഗ്യ സംരക്ഷണത്തിൻ്റെ ഒരു ഏകദേശ കണക്ക്” വാഗ്ദാനം ചെയ്യുന്നു. നംബിയോയുടെ 2024-ലെ ‘ഹെൽത്ത് കെയർ ഇൻഡെക്‌സ് ബൈ സിറ്റി’യിൽ 72.7 സ്‌കോർ ചെയ്യുകയും പ്രാദേശിക നഗരങ്ങളിൽ ഒന്നാം സ്ഥാനം നേടുകയും ചെയ്തു. പട്ടികയിലെ 217 നഗരങ്ങളിൽ ഒന്നാം സ്ഥാനത്താണ് തായ്പേയ്. ദക്ഷിണ കൊറിയ, ജപ്പാൻ, നെതർലാൻഡ്‌സ്, ഫ്രാൻസ്, ഡെൻമാർക്ക്, സ്പെയിൻ, ഫിൻലാൻഡ്, ഓസ്ട്രിയ, നോർവേ, യുണൈറ്റഡ് കിംഗ്ഡം എന്നിവയാണ് ആദ്യ 20-ലെ മറ്റ് രാജ്യങ്ങൾ.
2021 മുതൽ, രാജ്യം അനുസരിച്ച് നംബിയോ ഹെൽത്ത് കെയർ സൂചികയിലെ മികച്ച 20 രാജ്യങ്ങളിൽ ഖത്തർ സ്ഥാനം പിടിച്ചിട്ടുണ്ട്. വികസിതവും അഭിവൃദ്ധി പ്രാപിക്കുന്നതുമായ മെഡിക്കൽ സാങ്കേതികവിദ്യ ഉപയോഗിച്ച്, ഖത്തർ അതിൻ്റെ ആരോഗ്യ സംരക്ഷണം തുടർച്ചയായി മെച്ചപ്പെടുത്തുന്നു, ഇത് രാജ്യത്തെ കഴിവുള്ള തൊഴിലാളികളെ ശക്തിപ്പെടുത്തുന്നു. യുകെ ആസ്ഥാനമായുള്ള ബ്രാൻഡ് മൂല്യനിർണയ കൺസൾട്ടൻസിയായ ബ്രാൻഡ് ഫിനാൻസ് നടത്തിയ പുതിയ പഠനമനുസരിച്ച്, 2023ൽ ഖത്തറിലെ അഞ്ച് ആശുപത്രികൾ ലോകത്തിലെ മികച്ച 250 അക്കാദമിക് മെഡിക്കൽ സെൻ്ററുകളിൽ ഇടംനേടിയിരുന്നു. 2022-ൽ, 2022-ലെ ഹെൽത്ത് കെയർ ഇൻഡക്സിൽ ഖത്തർ അറബ് ലോകത്ത് ഒന്നാം സ്ഥാനത്തും ലോകമെമ്പാടും 18-ാം സ്ഥാനത്തും എത്തി.
രാജ്യത്തിൻ്റെ സാമ്പത്തിക വൈവിധ്യവൽക്കരണ തന്ത്രത്തിൽ മെഡിക്കൽ ടൂറിസം നിർണായക പങ്ക് വഹിക്കുമെന്ന് പ്രതീക്ഷിക്കുന്ന സാഹചര്യത്തിൽ ഖത്തറിൻ്റെ ആരോഗ്യ മേഖല കൂടുതൽ പ്രാധാന്യമർഹിക്കുന്നതാണ്. തൽഫലമായി, ആരോഗ്യ സംരക്ഷണ വ്യവസായം അഭൂതപൂർവമായ വളർച്ചയ്ക്ക് സാക്ഷ്യം വഹിച്ചു, 2024 ഓടെ $12 ബില്യൺ മൂല്യം കൈവരിക്കുമെന്ന് പ്രതീക്ഷിക്കുന്നു.

ആഗോളതലത്തിൽ ആദ്യ ഇരുപതിൽ ഖത്തറിൻ്റെ ഹെൽത്ത്‌ കെയർ സിസ്റ്റവും

Gulf

ഖത്തറും ഇന്ത്യയും തമ്മിൽ സൗഹൃദപരവും ദൃഢവുമായ ഉഭയകക്ഷി ബന്ധമുണ്ടെന്നും ഇരുരാജ്യങ്ങളും തമ്മിൽ വിവിധ മേഖലകളിലുള്ള സഹകരണം വളർന്നു വരികയാണെന്നും ഖത്തറിലെ ഇന്ത്യൻ അംബാസഡർ വിപുൽ പറഞ്ഞു. ഇരു രാജ്യങ്ങളും തമ്മിലുള്ള വിനോദസഞ്ചാരം വർദ്ധിപ്പിക്കേണ്ടതിൻ്റെ പ്രാധാന്യം അംബാസഡർ ചൂണ്ടിക്കാട്ടി. ഇത് ജനങ്ങൾ തമ്മിലുള്ള ബന്ധം ശക്തിപ്പെടുത്തുന്നതിന് സംഭാവന നൽകും. ഇന്ത്യയും ഖത്തറും 200-ലധികം പ്രതിവാര വിമാനങ്ങൾ വഴി ബന്ധിപ്പിച്ചിട്ടുണ്ടെന്നും ഇത് ഇരു രാജ്യങ്ങൾക്കുമിടയിൽ വലിയ ടൂറിസം കൈമാറ്റം സാധ്യമാക്കുമെന്നും അദ്ദേഹം പറഞ്ഞു.
ഇന്ത്യൻ ബിസിനസ് ആൻഡ് പ്രഫഷണൽസ് കൗൺസിലുമായി സഹകരിച്ച് ഇന്ത്യൻ എംബസി സംഘടിപ്പിച്ച ഇന്ത്യൻ ദേശീയ ടൂറിസം ദിന പരിപാടിയെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അംബാസഡർ വിപുൽ.
“ഞങ്ങൾക്ക് എല്ലാ അടിസ്ഥാനകാര്യങ്ങളും നിലവിലുണ്ടെന്ന് ഞാൻ കരുതുന്നു. പക്ഷേ ഇപ്പോഴും ഖത്തറിൽ നിന്നുള്ള ആളുകളെ നമ്മൾക്ക് സാധ്യമാവുന്ന എണ്ണത്തിൽ ഇന്ത്യ സന്ദർശികുന്നതിലേക്ക് നയിക്കാൻ കഴിയുന്നുണ്ടെന്നു ഞാൻ കരുതുന്നില്ല. ഖത്തറിൽ നിന്ന് ഇന്ത്യയിലേക്ക് ഓരോ ആഴ്‌ചയും ഏകദേശം 210 വിമാനങ്ങൾ ഞങ്ങൾക്കുണ്ട്, അത് നല്ലൊരു സംഖ്യയാണ്.”
വിനോദസഞ്ചാര മേഖലയിൽ വൻ മുന്നേറ്റം കൈവരിച്ച ഇന്ത്യ, ലോകത്ത് ഏറ്റവും കൂടുതൽ ആളുകൾ സന്ദർശിക്കുന്ന രാജ്യങ്ങളുടെ ആഗോള റാങ്കിംഗിൽ 22-ാം സ്ഥാനത്താണ്. നിലവിൽ പ്രതിവർഷം 10 ദശലക്ഷം വിദേശ വിനോദ സഞ്ചാരികൾ ഇന്ത്യ സന്ദർശിക്കുന്നു. ചില കണക്കുകൾ പ്രകാരം 2028 ഓടെ ഈ കണക്ക് 30 ദശലക്ഷമായി ഉയരും. “വിദേശ വിനോദസഞ്ചാരികളെ ആകർഷിക്കുന്ന കാര്യത്തിൽ, ഞങ്ങളുടെ ലക്ഷ്യം 2028-ഓടെ ഏകദേശം 30 ദശലക്ഷവും 2047-ഓടെ 100 ദശലക്ഷവുമാണ്. ഇന്ത്യയിലെ സാമ്പത്തിക വളർച്ചയും വിനോദസഞ്ചാരികൾക്ക് ലഭ്യമായ ഓപ്ഷനുകളും കൊണ്ട്, ഇത് കൂടുതൽ വേഗത്തിൽ സംഭവിക്കുമെന്ന് ഞാൻ കരുതുന്നു,” അംബാസഡർ വിപുൽ പറഞ്ഞു.
ടൂറിസം മേഖല 2030-ഓടെ ജിഡിപിയിലേക്ക് ഏകദേശം 250 ബില്യൺ ഡോളർ സംഭാവന ചെയ്യുമെന്ന് പ്രതീക്ഷിക്കുന്നു. ഇത് 137 ദശലക്ഷം വ്യക്തികൾക്ക് തൊഴിലവസരം സൃഷ്ടിക്കുമെന്നും ടൂറിസം മേഖലയെ ഏറ്റവും കൂടുതൽ തൊഴിൽ നൽകുന്ന വ്യവസായമാക്കി മാറ്റുമെന്നും അനുമാനിക്കപ്പെടുന്നു. ഇന്ത്യയും ഖത്തറും ആസ്വദിക്കുന്ന ഊഷ്മളമായ ബന്ധത്തെക്കുറിച്ച് മുഖ്യാതിഥിയും QChem &amp; QAFAC മുൻ സിഇഒയുമായ നാസർ ജെഹാം അൽ കുവാരി തൻ്റെ ചിന്തകൾ പങ്കുവെച്ചു. വിനോദസഞ്ചാരം ഇരുരാജ്യങ്ങളും തമ്മിലുള്ള സുപ്രധാന പാലമാണെന്നും ഹിമാലയം മുതൽ ഇന്ത്യൻ മഹാസമുദ്രത്തിൻ്റെ തീരം വരെ ഇന്ത്യയെ വളരെക്കാലമായി ആകർഷിച്ചിട്ടുണ്ടെന്നും അദ്ദേഹം പറഞ്ഞു. ഇന്ത്യയെ പ്രകൃതി വിസ്മയങ്ങളുടെ സ്ഥലമായി പരാമർശിച്ച അദ്ദേഹം ഇരുരാജ്യങ്ങളും തമ്മിലുള്ള മികച്ച വ്യോമഗതാഗതത്തെ പ്രശംസിക്കുകയും ചെയ്തു.
ഇന്ത്യയിലെ വിനോദസഞ്ചാരത്തിൻ്റെ വിവിധ വശങ്ങളും സാധ്യതകളും എന്ന വിഷയത്തിൽ നടന്ന ഒരു പാനൽ ചർച്ചയിൽ ഐബിപിസി പ്രസിഡൻ്റ് ജാഫർ ഉസ് സാദിക്കിൻ്റെ സമാപന പ്രസ്താവനയോടെയാണ് പരിപാടി അവസാനിച്ചത്.

ഖത്തറിൽ നിന്ന് ടൂറിസ്റ്റുകൾ ഇന്ത്യയിൽ എത്തണം; ആശയങ്ങൾ പങ്കുവെച്ച് അംബാസിഡർ

കോഴിക്കോട്: ഖത്തറിലുണ്ടായ വാഹനാപകടത്തിൽ കോഴിക്കോട് പുതിയങ്ങാടി സ്വദേശിനി മരിച്ചു. പരേതനായ കെ കുഞ്ഞായിൻ കോയയുടെ ഭാര്യ പൊന്മാടത്ത് സുഹറ (67) യാണ് മരിച്ചത്. പരേതനായ സക്കാത്ത് വീട് അബൂബക്കർ കോയയുടെയും പൊന്മാടത്ത് ബീവിയുടെയും മകളാണ്.
മക്കൾ: കെ സീന (ഹിമായത്ത് സ്കൂൾ അദ്ധ്യാപിക), കെ ഷമീർ, കെ സുനിത (കോഴിക്കോട് കോർപ്പറേഷൻ), കെ ശബ്നം അബ്ദുൽ അസീസ് (അധ്യാപിക ഭവൻസ് പബ്ലിക് സ്കൂൾ, ദോഹ). മരുമക്കൾ: വലിയകത്ത് യാസിദ് മുഹമ്മദ് (കള്ളിയത്ത് ടി എം ടി), പാറ്റയിൽ സലിം (കാരന്തൂർ മർക്കസ് ഹയർ സെക്കണ്ടറി സ്കൂൾ), തൃശ്ശൂർ മാറാത്ത് അബ്ദുൽ അസീസ് (ഖത്തർ).&nbsp;

ഖത്തറിൽ വാഹനാപകടം; കോഴിക്കോട് സ്വദേശിനി മരിച്ചു

വടകര: താലൂക്ക് ഓഫീസ് തീവെപ്പ് കേസിൽ പ്രതിയായ യുവാവിനെ വെറുതെ വിട്ടു. ഹൈദരാബാദ് സ്വദേശി നാരായൺ സതീഷിനെയാണ് വടകര ജില്ല അസിസ്റ്റന്റ് സെഷൻസ് കോടതി ജഡ്ജി ജോജി തോമസ് കുറ്റക്കാരനല്ലെന്നുകണ്ട് വെറുതേവിട്ടത്. വടകര ഡി.ഇ.ഒ ഓഫീസ്, എൽ.എ എൻ.എച്ച് ഓഫീസ്, എടോടിയിലെ സ്വകാര്യ കെട്ടിടം എന്നിവിടങ്ങളിലെ തീവെപ്പ് കേസിലും ഇയാളെ വെറുതേവിട്ടു. കേസ് തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് കോടതി വിലയിരുത്തി. സി.സി.ടി.വി. ദൃശ്യം ഹാജരാക്കിയെങ്കിലും ഇതിൽ ആളെ വ്യക്തമാകുന്നില്ലെന്നായിരുന്നു പരിശോധനാ ഫലം. ഇത് കേസിൽ നിർണായകമായി.
2021 ഡിസംബർ 17-നാണ് താലൂക്ക് ഓഫീസ് തീപിടിച്ച് നശിച്ചത്. ആയിരക്കണക്കിന് രേഖകളും കമ്പ്യൂട്ടറുകളും ഫർണിച്ചറും കെട്ടിടവും കത്തിനശിച്ചു. നാരായണ സതീഷ് താലൂക്ക് ഓഫീസ് വരാന്തയിൽ കടലാസുകൾ കൂട്ടിയിട്ട് കത്തിച്ചപ്പോൾ തീ പടർന്നെന്നാണ് കേസ്. പ്രതിക്കുവേണ്ടി ലീഗൽ സർവീസ് കമ്മിറ്റി നിയോഗിച്ച പി.വി. സത്യപ്രസാദാണ് ഹാജരായത്. തീവയ്പ്പ് ഉണ്ടായ സ്ഥലത്ത് സിസിടിവിയോ സുരക്ഷാ ഉദ്യോഗസ്ഥനോ ഉണ്ടായിരുന്നില്ല. തീപിടിത്തത്തിൽ മൂന്ന് കോടി രൂപയുടെ നഷ്ടമുണ്ടായെന്നാണ് കണക്ക്.

വടകര താലൂക്ക് ഓഫീസ് തീവെപ്പ് കേസ്; പ്രതിയായ യുവാവിനെ വെറുതേവിട്ടു

ന്യൂഡൽഹി: സെർവിക്കൽ കാൻസർ ചർച്ചയാകാനാണ് മന:പൂർവം മരണ വാർത്ത സൃഷ്ടിച്ചതെന്ന് നടി പൂനം പാണ്ഡെ. കഴിഞ്ഞ ദിവസം സെര്‍വിക്കല്‍ കാന്‍സര്‍ ബാധിച്ചതിനെ തുടര്‍ന്ന് പൂനം പാണ്ഡെ മരിച്ചുവെന്ന് അവരുടെ ഔദ്യോഗിക ഇന്‍സ്റ്റാഗ്രാം അക്കൗണ്ടില്‍ പോസ്റ്റ് ചെയ്തിരുന്നു. സെർവിക്കൽ കാന്‍സറിനെ പറ്റി സമൂഹത്തിൽ അവബോധം നല്‍കാനാണ് വ്യാജ മരണവാര്‍ത്ത സൃഷ്ടിച്ചതെന്ന് പൂനം പാണ്ഡെ ഇന്ന് ഇന്‍സ്റ്റാഗ്രാമില്‍ പോസ്റ്റ് ചെയ്ത വീഡിയോയില്‍ പറഞ്ഞു.
'എല്ലാവര്‍ക്കും നമസ്‌കാരം, ഞാന്‍ ഉണ്ടാക്കിയ ഒച്ചപ്പാടിന് മാപ്പ്. ഞാന്‍ കാരണം വേദനിച്ച എല്ലാവര്‍ക്കും മാപ്പ്. സെര്‍വിക്കല്‍ കാന്‍സറിനെക്കുറിച്ചുള്ള ചര്‍ച്ചകള്‍ സൃഷ്ടിക്കുക എന്നതായിരുന്നു എന്റെ ലക്ഷ്യം. എന്റെ മരണത്തെക്കുറിച്ചുള്ള പോസ്റ്റ് വ്യാജവാര്‍ത്തയായിരുന്നു അതുകൊണ്ട് ഈ രോഗത്തെക്കുറിച്ച് വലിയ ചര്‍ച്ചകള്‍ നടന്നു. ഈ രോഗം മനുഷ്യനെ പതുക്കെ കാര്‍ന്നു തിന്നുന്നതാണ്. ധാരാളം സ്ത്രീകളുടെ ജീവൻ ഈ രോഗം കവര്‍ന്നിട്ടുണ്ട്. സെര്‍വിക്കല്‍ കാന്‍സറും തടയാം. എച്ച്.പി.വി വാക്‌സിനെടുക്കുക. കൃത്യമായി മെഡിക്കല്‍ പരിശോധന നടത്തുക. സെര്‍വിക്കല്‍ കാന്‍സറിനെക്കുറിച്ച് നമുക്ക് അവബോധം സൃഷ്ടിക്കാം. എല്ലാവരും ഈ ദൗത്യത്തില്‍ പങ്കാളികളാകണം’- പൂനം പറഞ്ഞു.
വൈറലാകാൻ നടത്തിയ വ്യാജ മരണവാർത്തക്കെതിരെ നടപടിയെടുക്കണമെന്നാണ് നെറ്റിസൺസ് ഉന്നയിക്കുന്നത്. എക്കാലത്തെയും മോശമായ പബ്ലിസിറ്റി സ്റ്റണ്ട് എന്നായിരുന്നു വ്യാജ മരണവാർത്തക്കെതിരെ ഒരാൾ പ്രതികരിച്ചത്. എന്തിന് വേണ്ടിയാണെങ്കിലും തിരഞ്ഞെടുത്ത മാർഗ്ഗം ഏറ്റവും പരിഹാസ്യമാണെന്നാണ് മറ്റൊരാൾ കുറിച്ചത്.

ഇല്ല, മരിച്ചിട്ടില്ല; ഇന്‍സ്റ്റാഗ്രാമില്‍ വീഡിയോയുമായി നടി പൂനം പാണ്ഡെ

കൊയിലാണ്ടി: കാപ്പാട് ബീച്ചിന് വീണ്ടും എഫ്ഇഇ (ഫൗണ്ടേഷൻ ഫോർ എൻവയോൺമെന്റൽ എഡ്യുക്കേഷൻ) ഡെന്മാർക്കിന്റെ ബ്ലൂഫ്ലാഗ് സർട്ടിഫിക്കേഷൻ. സംസ്ഥാനത്ത് ബ്ലൂഫ്ലാഗ് സർട്ടിഫിക്കേഷൻ ലഭിക്കുന്ന ആദ്യ ബീച്ചാണിത്‌. 2020ലാണ് രാജ്യത്തെ മറ്റു ഏഴ്‌ ബീച്ചുകൾക്കൊപ്പം കാപ്പാടിന് ആദ്യമായി ബ്ലൂഫ്ലാഗ് പദവി ലഭിച്ചത്. പരിസ്ഥിതി സൗഹൃദ സമീപനം, സൗരോർജത്തിന്റെ വിനിയോഗം, കാര്യക്ഷമമായ മാലിന്യ സംസ്കരണ രീതികൾ, പ്രാദേശിക ജൈവവൈവിധ്യ സംരക്ഷണം തുടങ്ങിയവ കണക്കിലെടുത്താണ്‌ കാപ്പാടിന്‌ ഇത്തവണയും ബ്ലൂഫ്ലാഗ് ലഭിച്ചത്.
കഴിഞ്ഞ തവണ ഗുജറാത്തിലെ ശിവരാജ്പൂർ, ദിയുവിലെ ഗോഗ്ല, കർണാടകത്തിലെ കാസർകോട്, പടുബിദ്രി, ആന്ധ്രാപ്രദേശിലെ റുഷിക്കൊണ്ട, ഒഡീഷയിലെ ഗോൾഡൻ, ആൻഡമാൻ നിക്കോബാർ ദ്വീപുകളിലെ രാധാനഗർ എന്നീ ബീച്ചുകൾക്കൊപ്പമാണ് കാപ്പാടിന് സർട്ടിഫിക്കേഷൻ ലഭിച്ചത്. ‘ലോകത്തിലെ ഏറ്റവും വൃത്തിയുള്ള കടൽത്തീരങ്ങളിലൊന്ന്’ എന്ന കാപ്പാടിന്റെ പദവിയെയാണ് അംഗീകാരം സൂചിപ്പിക്കുന്നത്.
എഫ്‌ഇഇയും ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചറും ചേർന്നാണ് ലോകത്തിലെ പ്രധാന കടൽത്തീരങ്ങളെ പരിശോധിച്ച് പദവി നൽകുന്നത്. വൃത്തിയുള്ള മണൽ, കുളിക്കുന്ന വെള്ളത്തിന്റെ ഗുണനിലവാരം, പരിസ്ഥിതി മാനേജ്മെന്റ്‌ തുടങ്ങി 33 കർശനമായ മാനദണ്ഡങ്ങൾ പരിശോധിച്ചാണ്‌ പദവി നൽകുന്നത്. അംഗീകാരത്തിന്റെ ഭാഗമായി ഒട്ടേറെ വികസന പ്രവർത്തനങ്ങൾ കഴിഞ്ഞ തവണ നടത്തിയിട്ടുണ്ട്. ജില്ലാ ടൂറിസം പ്രൊമോഷൻ കൗൺസിലാണ് തീരം നിയന്ത്രിക്കുന്നത്. ഈ പദവി ലഭിച്ച തീരങ്ങൾ തേടി ലോകത്തിന്റെ വിവിധ രാജ്യങ്ങളിലെ വിനോദസഞ്ചാരികൾ എത്തിച്ചേരാറുണ്ടെന്നത് വിനോദ സഞ്ചാര മേഖലയിൽ കാപ്പാടിന്റെ സ്ഥാനം വീണ്ടുമുയരാൻ കാരണമാകും.

കാപ്പാട് ബീച്ചിന് വീണ്ടും ബ്ലൂഫ്ലാഗ്‌ സർട്ടിഫിക്കേഷൻ

Kozhikode

ബെംഗളൂരു: തന്നെ നന്നായിനോക്കുന്നില്ലെന്നും മതിയായ ഭക്ഷണം നല്‍കുന്നില്ലെന്നും ആരോപിച്ച് അമ്മയെ ഇരുമ്പുവടികൊണ്ടടിച്ചുകൊന്ന് മകന്‍. ബെംഗളൂരു കെ.ആര്‍. പുരയിലാണ് സംഭവം. കോലാര്‍ ജില്ലയിലെ മുള്‍ബാഗല്‍ സ്വദേശിനിയായ നേത്ര (40) ആണ് കൊല്ലപ്പെട്ടത്. കൊലപാതകത്തിനുശേഷം 17-കാരനായ മകന്‍ പോലീസ് സ്റ്റേഷനിലെത്തി കീഴടങ്ങി. മുള്‍ബാഗലിലെ സ്വകാര്യകോളേജിലെ രണ്ടാംവര്‍ഷ ഡിപ്ലോമ വിദ്യാര്‍ഥിയാണിയാള്‍.
വെള്ളിയാഴ്ച രാവിലെ 7.30-ഓടെ കോളേജിലേക്ക് പോകാനിറങ്ങുന്നതിനിടെ മകനും നേത്രയും തമ്മില്‍ വഴക്കുണ്ടായി. ഇതിനിടെയാണ് സമീപത്തുണ്ടായിരുന്ന ഇരുമ്പുവടിയെടുത്ത് മകന്‍ നേത്രയുടെ തലയ്ക്കടിച്ചത്. അമ്മ മരിച്ചെന്ന് ഉറപ്പായതോടെ മകന്‍ കെ.ആര്‍. പുരം പോലീസ് സ്റ്റേഷനിലെത്തുകയായിരുന്നു. തനിക്ക് വീട്ടില്‍ ഒരു പരിഗണനയും ലഭിക്കാത്തതില്‍ അമ്മയോട് ദേഷ്യമുണ്ടായിരുന്നതായാണ് ഇയാള്‍ പോലീസിന് നല്‍കിയ മൊഴി.
അമ്മ നന്നായി നോക്കിയിരുന്നില്ലെന്നും ഭക്ഷണംപോലും നല്‍കിയിരുന്നില്ലെന്നും ഇയാള്‍ പോലീസിനോട് പറഞ്ഞു. എന്നാല്‍ കൊലപാതകത്തിന് മറ്റെന്തെങ്കിലും കാരണമുണ്ടോയെന്ന് പോലീസ് പരിശോധിച്ചുവരുകയാണ്.

'നന്നായി നോക്കുന്നില്ല, ഭക്ഷണം തരുന്നില്ല'; അമ്മയെ 17-കാരനായ മകൻ തലയ്ക്കടിച്ച് കൊന്നു

ന്യൂഡൽഹി: മുതിർന്ന ബി.ജെ.പി നേതാവും മുൻ ഉപപ്രധാനമന്ത്രിയുമായിരുന്ന എൽ.കെ. അദ്വാനിക്ക് ഭാരത രത്ന. പ്രധാനമന്ത്രി നരേന്ദ്രമോദിയാണ് എക്സ് പോസ്റ്റ് വഴി പുരസ്കാര വിവരം അറിയിച്ചത്. ബഹുമതി ലഭിച്ചതിൽ പ്രധാനമന്ത്രി അദ്വാനിയെ വിളിച്ച് അഭിനന്ദിക്കുകയും ചെയ്തു.
''എൽ.കെ. അദ്വാനി ജിക്ക് ഭാരത രത്ന നൽകുമെന്ന കാര്യം പങ്കുവെക്കുന്നതിൽ അതിയായ സന്തോഷമുണ്ട്. അദ്ദേഹത്തോട് സംസാരിക്കുകയും ഈ ബഹുമതി ലഭിച്ചതിൽ അഭിനന്ദിക്കുകയും ചെയ്തു. നമ്മുടെ കാലത്തെ ഏറ്റവും ആദരണീയനായ രാഷ്ട്രതന്ത്രജ്ഞരിൽ ഒരാളാണ്, ഇന്ത്യയുടെ വികസനത്തിന് അദ്ദേഹം നൽകിയ സംഭാവനകൾ സ്മരണീയമാണ്. താഴേത്തട്ടിൽ പ്രവർത്തിച്ച് തുടങ്ങി ഉപപ്രധാനമന്ത്രിയായി രാജ്യത്തെ സേവിക്കുന്നത് വരെയുള്ള ജീവിതമാണ് അദ്ദേഹത്തിന്റേത്. അദ്ദേഹത്തിന്റെ പാർലമെൻ്ററി ഇടപെടലുകൾ എല്ലായ്പ്പോഴും മാതൃകാപരവും സമ്പന്നമായ ഉൾക്കാഴ്ചകൾ നിറഞ്ഞതുമായിരുന്നു ​''- പ്രധാനമന്ത്രി കുറിച്ചു.
അയോധ്യ പ്രാണ പ്രതിഷ്ഠ ചടങ്ങിൽ അദ്വാനിയുടെ അസാന്നിധ്യം ശ്രദ്ധിക്കപ്പെട്ടിരുന്നു. തർക്കഭൂമിയിൽ അയോധ്യ ക്ഷേത്രത്തിനായി രഥയാത്ര നടത്തിയ വ്യക്തിയെ ​ചടങ്ങിലേക്ക് ക്ഷണിക്കാത്തത് വിവാദമായിരുന്നു. അയോധ്യയിൽ കൊടുംതണുപ്പായതിനാലാണ് പ​ങ്കെടുക്കാതിരുന്നതെന്നാണ് അദ്വാനിയുടെ അസാന്നിധ്യത്തിന് ദേശീയമാധ്യമങ്ങൾ നൽകിയ വിശദീകരണം. പ്രായമേറെയായെന്നും അനാരോഗ്യമുണ്ടെന്നും കാരണമായി പറയുന്നു.

മുതിർന്ന നേതാവ് എൽ.കെ. അദ്വാനിക്ക് ഭാരത രത്ന

വടകര: കേരളം ഭരിക്കുന്നത് സമസ്ത മേഖലയിലും പരാജയപ്പെട്ട സർക്കാർ ആണെന്നും, ഇത് പോലെ ആരോപണം നേരിടേണ്ടി വന്ന മുഖ്യമന്ത്രിയും കുടുംബവും കേരള ചരിത്രത്തിൽ ഉണ്ടായിട്ടില്ലെന്നും കെപിസിസി മെമ്പർ വി. എം ചന്ദ്രൻ അഭിപ്രായപ്പെട്ടു.&nbsp;

ഫെബ്രുവരി പതിനൊന്നിന് വടകരയിൽ എത്തിച്ചേരുന്ന കെപിസിസി പ്രസിഡന്റും പ്രതിപക്ഷ നേതാവും നയിക്കുന്ന സമരാഗ്നി പ്രതിഷേധ യാത്രയുടെ വിജയത്തിനായി ചോറോട് മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ സംഘടിപ്പിച്ച പ്രവർത്തക കൺവെൻഷൻ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മണ്ഡലം പ്രസിഡന്റ്‌ അഡ്വ പി. ടി. കെ നജ്മൽ അധ്യക്ഷത വഹിച്ചു.
യു ഡി എഫ് ചെയർമാൻ കോട്ടയിൽ രാധാകൃഷ്ണൻ, ഡിസിസി ജനറൽ സെക്രട്ടറിമാരായ കാവിൽ രാധാകൃഷ്ണൻ, കെ. പി കരുണൻ, സീനിയർ നേതാവ് കൂടാളി അശോകൻ, രാജേഷ് ചോറോട്, ഭാസ്കരൻ, ഷാജി ഐ, മഠത്തിൽ പുഷ്പ, ഗോപാലകൃഷ്ണൻ, സുകുമാരൻ, കെ. കെ റിനീഷ്, എൻ. കെ പ്രകാശൻ, ബാലഗോപാൽ, കെ. എം ദാസ്, കെ. ജി രാഗേഷ്, ഗോപാല കൃഷ്ണൻ. കെ , രജിത്ത് മലോൽ തുടങ്ങിയവർ സംസാരിച്ചു. യാത്രയുടെ വിജയത്തിനായി വിപുലമായ സ്വാഗത സംഘം രൂപീകരിച്ചു. ചെയർമാൻ : കൂടാളി അശോകൻ, കൺവീനർ :അഡ്വ. പി. ടി. കെ നജ്മൽ, ട്രഷറർ : ശിവൻ മഠത്തിൽ.

കേരളം ഭരിക്കുന്നത് സമസ്ത മേഖലയിലും പരാജയപ്പെട്ട സർക്കാർ; വി. എം ചന്ദ്രൻ

തൃശ്ശൂര്‍: പള്ളിപ്പെരുന്നാളിന്റെ അമ്പാഘോഷത്തിനിടെ പടക്കംവീണ് ബൈക്ക് പൊട്ടിത്തെറിച്ച് പൊള്ളലേറ്റ യുവാവ് മരിച്ചു. പരിയാരം മൂലെക്കുടിയില്‍ ദിവാകരന്റെ മകന്‍ ശ്രീകാന്ത് (24) ആണ് മരിച്ചത്. 70 ശതമാനത്തിലേറെ പൊള്ളലേറ്റ് കോട്ടയം മെഡിക്കല്‍ കോളേജില്‍ ചികിത്സയിലായിരുന്നു ശ്രീകാന്ത്. ജനുവരി 27-ന് വൈകീട്ട് 5.45 ഓടെ ആയിരുന്നു അപകടം. പരിയാരം സെയ്ന്റ് ജോര്‍ജസ് പള്ളിയിലെ അമ്പ് ആഘോഷത്തിന്റെ ഭാഗമായി അങ്ങാടി കപ്പേളക്ക് മുന്‍വശത്തുവെച്ച് പടക്കം പൊട്ടിച്ചപ്പോഴായിരുന്നു അപകടം. പടക്കം തെറിച്ചുവീണ് ബൈക്കിന്റെ പെട്രോള്‍ ടാങ്ക് പൊട്ടിത്തെറിക്കുകയായിരുന്നു. ഈ സമയം ശ്രീകാന്ത് ബൈക്കിലിരിക്കുന്നുണ്ടായിരുന്നു.&nbsp;
അടിയന്തര ശസ്ത്രക്രിയക്ക് വിധേയമാകാനിക്കെ ശനിയാഴ്ച രാവിലെ 8.30-ഓടെയായിരുന്നു മരണം. പെരുന്നാളാഘോഷത്തിന് ഇറച്ചിവാങ്ങാന്‍ സുഹൃത്തിനൊപ്പം എത്തിയതായിരുന്നു. സുഹൃത്ത് കടയില്‍ കയറിയ സമയത്തായിരുന്നു അപകടം. വെല്‍ഡിങ് തൊഴിലാളിയാണ്.

പടക്കം തെറിച്ച് വീണ് ബൈക്കിന്റെ പെട്രോള്‍ ടാങ്ക് പൊട്ടിത്തെറിച്ചു; പൊള്ളലേറ്റ യുവാവ് മരിച്ചു

അഴിയൂർ: കേരളത്തെ തകർക്കരുത്, കേന്ദ്ര അവഗണനയ്ക്കും നീതികേടിനുമെതിരെ ഫെബ്രുവരി 8 ന് മുഖ്യമന്ത്രിയുടെ നേതൃത്വത്തിൽ മന്ത്രിമാരും ജനപ്രതിനിധികളും ഡൽഹി ജന്തർ മന്തറിൽ നടത്തുന്ന പ്രതിഷേധ സമരത്തിന്റെ ഭാഗമായി അതേ ദിവസം എൽ ഡി എഫ് അഴിയൂർ പഞ്ചായത്ത് കമ്മറ്റിയുടെ നേതൃത്വത്തിൽ കുഞ്ഞിപ്പള്ളി ടൗണിൽ വൈകുന്നേരം 4 മണി മുതൽ 6 മണി വരെ നടക്കുന്ന ബഹുജന സദസ്സ് വിജയിപ്പിക്കുന്നതിന് വേണ്ടി എൽ ഡി എഫ് 10 , 11 നമ്പർ ബൂത്ത് ഭാരവാഹികളുടെ യോഗം അഴിയൂർ പാലിയേറ്റീവ് സെന്റെറിൽ ചേർന്നു. ദിനേശൻ കരുവയലിന്റെ അദ്ധ്യക്ഷതയിൽ മുബാസ് കല്ലേരി യോഗം ഉദ്ഘാടനം ചെയ്തു. രാജൻ എം പി, പ്രമോദ് കെ പി എന്നിവർ സംസാരിച്ചു. അനിൽകുമാർ സ്വാഗതവും കരുണൻ എം പി നന്ദിയും പറഞ്ഞു.

എൽ ഡി എഫ് ബഹുജന സദസ്സ് വിജയിപ്പിക്കും

Inshort

തൃശ്ശൂർ: കരുവന്നൂര്‍ പാലത്തില്‍ നിന്ന് പുഴയിലേക്ക് ചാടിയ യുവഡോക്ടർ മരിച്ചു. തൃശ്ശൂര്‍ അശ്വനി ആശുപത്രിക്ക് സമീപം സ്വകാര്യ ഫ്ളാറ്റില്‍ താമസിക്കുന്ന കരോട്ട് വീട്ടില്‍ വര്‍ഗ്ഗീസിന്റെ മകള്‍ ഡോ. ട്രേസി വര്‍ഗ്ഗീസ് (26) ആണ് മരിച്ചത്. ആയൂര്‍വേദ ഡോക്ടറാണ്.

വെള്ളിയാഴ്ച ഉച്ചക്ക് പന്ത്രണ്ടരയോടെയാണ് ട്രെയ്‌സി പുഴയിലേക്ക് ചാടിയത്. ചെറിയപാലം ഭാഗത്തുനിന്ന് നടന്നുവന്ന യുവതി, വലിയപാലത്തിന്റെ നടുവിലെത്തി ചെരിപ്പൂരിയിട്ടശേഷം കൈവരിയുടെ മുകളിലൂടെ പുഴയിലേയ്ക്ക് ചാടുകയായിരുന്നെന്ന് ദൃക്സാക്ഷികള്‍ പറഞ്ഞു.

സംഭവമറിഞ്ഞ് ഇരിങ്ങാലക്കുട- ചേര്‍പ്പ് പോലീസ് സ്ഥലത്തെത്തി. അഗ്നിരക്ഷാസേന തിരച്ചില്‍ നടത്തിയെങ്കിലും കണ്ടെത്താനായില്ല. തുടര്‍ന്ന് തൃശ്ശൂരില്‍ നിന്ന് സ്‌കൂബ ടീം എത്തി തിരച്ചില്‍ തുടരുന്നതിനിടയിൽ മൂന്നു മണിയോടെ പള്ളിക്കടവിന് സമീപത്തുനിന്നാണ് മൃതദേഹം കണ്ടെത്തിയത്.

പുഴയിൽ ചാടിയ യുവതിയുടെ മൃതദേഹം കണ്ടെത്തി

കല്‍പ്പറ്റ: വെള്ളിയാഴ്ച മാനന്തവാടിയില്‍ മയക്കുവെടിവെച്ച് പിടികൂടിയ തണ്ണീര്‍ കൊമ്പന്‍ ചരിഞ്ഞു. കര്‍ണാടക വനംവകുപ്പിന് കൈമാറിയ ശേഷമാണ് പുലർച്ചെയോടെ ആന ചരിഞ്ഞത്. വെള്ളിയാഴ്ച പകൽ മുഴുവൻ മാനന്തവാടിയെ ആശങ്കയിലാഴ്ത്തിയ തണ്ണീർകൊമ്പനെ രാത്രിയോടെ മയക്കുവെടിവെച്ച് പിടികൂടി ബന്ദിപ്പുരിലേക്ക് മാറ്റുകയായിരുന്നു. ആന ചരിയാനുണ്ടായ കാരണം സംബന്ധിച്ച് വ്യക്തതയുണ്ടായിട്ടില്ല.
പതിനേഴര മണിക്കൂര്‍ നീണ്ട ദൗത്യത്തിനുശേഷമാണ് വെള്ളിയാഴ്ച തണ്ണീര്‍ കൊമ്പനെ പിടികൂടിയത്. എലിഫന്റ് ആംബുലന്‍സില്‍ രാമപുരയിലെത്തിച്ച ശേഷം ആനയെ പരിശോധനയ്ക്ക് വിധേയമാക്കിയിരുന്നു. ആരോഗ്യനില പരിശോധിച്ച ശേഷം ആനയെ ബന്ദിപ്പൂര്‍ വനത്തിലേക്ക് തുറന്നുവിടാനായിരുന്നു തീരുമാനം.

പോസ്റ്റ്‌മോര്‍ട്ടം റിപ്പോര്‍ട്ട് ലഭിച്ചശേഷം മാത്രമേ ആനയുടെ മരണകാരണം സംബന്ധിച്ച് വ്യക്തതയുണ്ടാകൂ എന്ന് വനംവകുപ്പ് മന്ത്രി എ.കെ. ശശീന്ദ്രന്‍ മാധ്യമങ്ങളോട് പ്രതികരിച്ചു. തണ്ണീര്‍ കൊമ്പനെ പിടികൂടാനുള്ള ദൗത്യത്തിലെ എല്ലാകാര്യങ്ങളും സുതാര്യമായിരുന്നു, തുടര്‍നടപടികളും അതുപോലെ സുതാര്യമായിരിക്കണമെന്ന് നിര്‍ദേശം നല്‍കിയിട്ടുണ്ട്.

ആനയെ പിടികൂടുന്ന നടപടിയില്‍ എന്തെങ്കിലും വീഴ്ച വന്നിട്ടുണ്ടോയെന്ന കാര്യം പരിശോധിക്കാന്‍ അഞ്ചംഗ വിദഗ്ധസമിതിയെ നിയോഗിക്കാന്‍ സര്‍ക്കാര്‍ തീരുമാനിച്ചിട്ടുണ്ട്. വിജിലന്‍സ്, വെറ്റേറിനറി, എന്‍ജിനീയറിങ്, ലീഗല്‍, ഫ്‌ളൈയിങ് സ്‌ക്വാഡ് എന്നീ വിഭാഗങ്ങളുടെ പ്രതിനിധികള്‍ സമിതിയില്‍ ഉണ്ടായിരിക്കും. കര്‍ണാടകയില്‍നിന്നുള്ള വിദഗ്ധര്‍ക്കൊപ്പം കേരളത്തിന്റെ പ്രതിനിധിയെകൂടി പങ്കെടുപ്പിച്ചുകൊണ്ടുള്ള അന്വേഷണത്തിന് കര്‍ണാടക തയ്യാറായിട്ടുണ്ട്. ഇരുസംസ്ഥാനങ്ങളും സംയുക്തമായാണ് എല്ലാ കാര്യങ്ങളും ചെയ്യുക. മുഖ്യമന്ത്രിയുമായി ആലോചിച്ച് കൂടുതല്‍ കാര്യങ്ങളില്‍ തീരുമാനമെടുക്കുമെന്നും മന്ത്രി വ്യക്തമാക്കി.

വെള്ളിയാഴ്ച പുലര്‍ച്ചെ മൂന്നുമണിയോടെയാണ് മാനന്തവാടി നഗരത്തില്‍നിന്ന് മൂന്ന് കിലോമീറ്റര്‍ മാത്രം അകലെയുള്ള കണിയാരത്തും പായോടും ഒറ്റയാനെത്തിയത്. എന്നാല്‍, ആന പ്രകോപനം സൃഷ്ടിക്കുകയോ നാശനഷ്ടങ്ങള്‍ വരുത്തുകയോ ചെയ്തിരുന്നില്ല. ജനങ്ങൾ ആശങ്കയിലായതോടെ ആനയെ പടക്കംപൊട്ടിച്ചും മറ്റും വനമേഖലയിലേക്ക് തിരികെ അയയ്ക്കാൻ പോലീസും വനംവകുപ്പും ചേർന്ന് ശ്രമിച്ചെങ്കിലും വിജയിച്ചില്ല. തുടർന്നാണ് മയക്കുവെടിവെച്ച് പിടികൂടാൻ തീരുമാനിച്ചത്.

മണിക്കൂറുകൾ നീണ്ട പരിശ്രമത്തിനൊടുവിലാണ് വൈകുന്നേരം അഞ്ചരയോടെ ആനയ്ക്ക് മയക്കുവെടി വെക്കാനായത്. തുടർന്ന് കുങ്കിയാനകളുടെ സഹായത്തോടെ രാത്രി പത്തരയോടെ വാഹനത്തിൽ കയറ്റി കർണാടകത്തിലേക്ക് കൊണ്ടുപോയി. തുടർന്ന് കർണാടക അധികൃതർക്ക് കൈമാറി. ആനയെ വൈദ്യപരിശോധനകൾക്ക് വിധേയമാക്കിയശേഷം ബന്ദിപ്പുർ വനമേഖലയിൽ തുറന്നുവിടാനായിരുന്നു തീരുമാനം. എന്നാൽ കർണാടക അധികൃതരുടെ കൈവശം എത്തിയശേഷം ആന ചരിയുകയായിരുന്നെന്നാണ് വിവരം.

കര്‍ണാടകയില്‍നിന്ന് രണ്ടാഴ്ച മുമ്പ് പിടികൂടി ബന്ദിപ്പൂര്‍ വനാതിര്‍ത്തിയായ മുലഹൊള്ളയില്‍ തുറന്നുവിട്ട ആനയാണ് തണ്ണീർകൊമ്പൻ. 'ഓപ്പറേഷന്‍ ജംബോ' എന്ന ദൗത്യത്തിലൂടെ കര്‍ണാടക വനംവകുപ്പ് ഹാസനിലെ സഹാറ എസ്റ്റേറ്റില്‍ നിന്ന് പിടികൂടിയ ആനയായിരുന്നു ഇത്. മൈസൂരുവിലെ വനംവകുപ്പ് ഓഫീസ് റേഡിയോ കോളറിലൂടെ ആനയെ നിരീക്ഷിച്ചുവരികയായിരുന്നു.

ആനയെ ജനുവരി 16-നാണ് കര്‍ണാടക വനംവകുപ്പ് പിടികൂടിയത്. പ്രദേശത്ത് ഭീതി വിതയ്ക്കുകയും കൃഷി നശിപ്പിക്കുകയും ചെയ്തതോടെയാണ് ആനയെ പിടികൂടാനുള്ള ദൗത്യത്തിലേക്ക് വനംവകുപ്പ് കടന്നത്. സ്ഥിരമായി കാപ്പിത്തോട്ടങ്ങളില്‍ കറങ്ങിനടക്കുന്ന ശല്യക്കാരായിരുന്നു ഈ ആന എന്നാണ് വിവരം. എന്നാൽ മനുഷ്യരെ ഉപദ്രവിക്കുകയോ ജീവനഹാനി വരുത്തുകയോ ചെയ്തതായി റിപ്പോർട്ട് ചെയ്യപ്പെട്ടിട്ടില്ല.

മാനന്തവാടിയില്‍ മയക്കുവെടിവെച്ച് പിടികൂടിയ തണ്ണീര്‍കൊമ്പന്‍ ചരിഞ്ഞു

അഴിയൂർ: ഹൈദരാബാദ് -ബാംഗ്ലൂർ ഹൈവേയിൽ ഉണ്ടായ ബൈക്കപകടത്തിൽ യുവാവ് മരിച്ചു. അഴിയൂർ കരിവയിൽ റോഡ് റെയിൽവേ സ്റ്റേഷന് സമീപം ദിവാഘറിൽ താമസിക്കുന്ന അശോകൻ കരുവൻതുരുത്തി (ഉണ്ണി) ശ്രീജ പട്ടാണിപ്പറമ്പത്ത് ദമ്പതികളുടെ മകൻ അക്ഷയ് (30) ആണ് മരിച്ചത്. ബുധനാഴ്ച രാത്രി 10.30നായിരുന്നു അപകടം. ഭാര്യ വിഷ്ണുപ്രിയ (നിംഹാൻസ് ബാംഗ്ലൂർ). മകൻ; തന്മയ്. സഹോദരി; ഹൃദ്യ (നഴ്സിംഗ് വിദ്യാർഥിനി).&nbsp;

ബാംഗ്ലൂരിൽ ബൈക്കപകടം; അഴിയൂർ സ്വദേശി മരിച്ചു

പയ്യോളി : പയ്യോളിയിൽ നവവധു ഭർതൃവീട്ടിൽ തൂങ്ങിമരിച്ച നിലയിൽ. ചേലിയ സ്വദേശി ആർദ്ര ബാലകൃഷ്ണനാണ് മരിച്ചത് (25). വെള്ളിയാഴ്ച രാത്രിയാണ് ആർദ്രയെ വീടിന് മുകളിലെ നിലയിൽ തൂങ്ങി മരിച്ച നിലയിൽ കണ്ടെത്തിയത്.
കുളിക്കാൻ പോയ ആർദ്രയെ ഏറെ നേരം കഴിഞ്ഞും കാണാതായപ്പോൾ മുകൾ നിലയിലെ മുറിയിൽ എത്തി പരിശോധിച്ചപ്പോഴാണ് മൃതദേഹം കണ്ടെത്തിയത്. ഫെബ്രുവരി രണ്ടിനായിരുന്നു ആർദ്രയും ഷാനും തമ്മിൽ ഉള്ള വിവാഹം.എന്തെങ്കിലും പ്രശ്നം ഉണ്ടായിരുന്നതായി അറിയില്ലെന്ന് ആർദ്രയുടെ ബന്ധുക്കൾ പറഞ്ഞു. 
 &nbsp;

പയ്യോളിയിൽ നവവധു ഭർതൃവീട്ടിൽ തൂങ്ങിമരിച്ച നിലയിൽ

കോഴിക്കോട്: കോഴിക്കോട് ലോ കോളേജിലെ മൂന്നാം സെമസ്റ്റര്‍ വിദ്യാര്‍ഥിയും തൃശൂര്‍ പാവറട്ടി സ്വദേശിയുമായ മൗസ മെഹ്‌റിസിന്റെ (20) ആത്മഹത്യയില്‍ ആണ്‍സുഹൃത്തിനായി അന്വേഷണം ഊര്‍ജ്ജിതമാക്കി പോലീസ്. സുഹൃത്ത് മൗസയെ കെണിയില്‍പെടുത്തുകയായിരുന്നുവെന്ന് സംശയിക്കുന്നതായും യുവാവുമായി സൗഹൃദം ആരംഭിച്ച ശേഷം മറ്റുള്ളവരുമായുള്ള അടുപ്പം മൗസ കുറച്ചതായും മൗസയുടെ സുഹൃത്തുക്കള്‍ ഉള്‍പ്പടെ പോലീസില്‍ മൊഴി നല്‍കിയിട്ടുണ്ട്. മൗസയുടെ ഫോണ്‍ മരിക്കുന്നതിന്റെ തലേദിവസം ഈ യുവാവ് കൈക്കലാക്കിയതായും സംശയമുണ്ട്.
ലോ കോളേജിന് സമീപത്തെ കടയില്‍ പാര്‍ട്ട് ടൈമായി ജോലി ചെയ്തിരുന്ന സമയത്താണ് മൗസ കോവൂര്‍ സ്വദേശിയായ യുവാവിനെ പരിചയപ്പെട്ടതെന്നാണ് വിവരം. വിവാഹിതനായ ഇയാള്‍ ഇക്കാര്യം മറച്ചുവെച്ചാണ് മൗസയുമായി അടുപ്പം സ്ഥാപിച്ചത്. ഇയാളുമായി പരിചയത്തിലായതോടെ മൗസ ജോലി ഉപേക്ഷിച്ചു.മരിച്ചതിന്റെ തലേദിവസം ഇയാള്‍ മൗസയുടെ വീട്ടില്‍ വിളിച്ചതായും വിവാഹിതനും കുട്ടികളുടെ പിതാവാണെന്ന് അറിയിച്ചതായും സൂചനകളുണ്ട്. ഇതിന് ശേഷം മൗസ മറ്റൊരു ഫോണില്‍ നിന്നും അച്ഛനെ വിളിച്ച് ഫോണ്‍ തകരാറിലാണെന്ന് പറയുകയും ഫോണ്‍ നന്നാക്കിയ ശേഷം തിരിച്ചു വിളിക്കാം എന്ന് അറിയിക്കുകയും ചെയ്തിരുന്നു. സുഹൃത്ത് വിവാഹിതനും കുട്ടികളുടെ പിതാവും ആണെന്ന് മനസ്സിലാക്കിയതാണ് ആത്മഹത്യയിലേക്ക് നയിക്കാന്‍ കാരണമെന്നാണ് പോലീസിന്റെ നിഗമനം.ഇയാളെ കണ്ടെത്താനുള്ള ശ്രമത്തിലാണ് പോലീസ്.

കോഴിക്കോട് ലോ കോളേജ് വിദ്യാര്‍ഥിനിയുടെ മരണം; ആണ്‍സുഹൃത്തിനായി അന്വേഷണം ഊര്‍ജ്ജിതമാക്കി പോലീസ്

തിരുവനന്തപുരം: കൂട്ടക്കൊലയ്ക്കു കാരണം മൂന്നുപേരോടുള്ള അമിതസ്‌നേഹവും മറ്റു മൂന്നുപേരോടുള്ള അടങ്ങാത്ത പകയുമെന്ന് അഫാന്റെ മൊഴി.
കടം കാരണം ജീവിക്കാനാവാതെ വന്നതോടെയാണ് മാതാവിനെയും സഹോദരനെയും പെൺസുഹൃത്തിനെയും കൊലപ്പെടുത്തി ജീവനൊടുക്കാൻ തീരുമാനിച്ചത്. കടുത്ത പ്രതിസന്ധിയിലും ആഭരണമോ പണമോ നൽകി സഹായിച്ചില്ലെന്നതായിരുന്നു മുത്തശ്ശി സൽമാ ബീവി, പിതൃസഹോദരൻ ലത്തീഫ്, ലത്തീഫിന്റെ ഭാര്യ ഷാഹിദ എന്നിവരോടുള്ള പകയ്ക്കു കാരണം.

പണം കടംവാങ്ങി ധൂർത്തടിക്കുന്നുവെന്ന പേരിൽ ലത്തീഫ് വഴക്ക് പറയുകയും ഉപദേശിക്കുകയും ചെയ്തു. ഒന്നരലക്ഷം രൂപ ലത്തീഫ് മുൻപ്‌ നൽകിയിരുന്നു. കൂടുതൽ പണം ചോദിച്ചെങ്കിലും നൽകിയില്ല.ഇതൊക്കെയാണ് ലത്തീഫിനോട് വിരോധമുണ്ടാകാൻ കാരണം.
കടക്കാരുടെ ശല്യം രൂക്ഷമായതോടെ എന്തു ചെയ്യണമെന്നറിയാത്ത നിലയിലായിരുന്നു. മാതാവിന്റെ ചികിത്സയ്ക്കുപോലും പണമില്ല. മാതാവിനെയും അനുജനെയും ഒറ്റയ്ക്കാക്കാനുള്ള മനസ്സുവന്നില്ല. താൻ ഇല്ലാതെ ഫർസാനയും ജീവിക്കേണ്ട എന്നതായിരുന്നു പെൺസുഹൃത്തിനെ കൊലപ്പെടുത്താനുള്ള കാരണം. ഫർസാന അനാഥയാവുമെന്നായിരുന്നു അഫാന്റെ വാദം.

ആദ്യം മാതാവിനെ, അവസാനം അനുജനെ
തിരുവനന്തപുരം : ആദ്യം കൊലപ്പെടുത്താൻ ശ്രമിച്ചത് മാതാവ് ഷെമിയെയാണെന്ന് അഫാൻ. തിങ്കളാഴ്ച രാവിലെ 11ഓടെ കഴുത്തിൽ ഷാൾ ചുറ്റി ശ്വാസംമുട്ടിച്ച് ഷെമിയെ കൊലപ്പെടുത്താൻ ശ്രമിച്ചു. മരിച്ചെന്നുകരുതി മുറി പൂട്ടിയശേഷമാണ് ബാക്കി കൊലപാതകങ്ങൾക്കുള്ള ഒരുക്കങ്ങൾ നടത്തിയത്.
വെഞ്ഞാറമൂട്ടിലെ സ്വകാര്യ പണമിടപാട് സ്ഥാപനത്തിലെത്തി. പണയത്തിനു സ്വർണം കൊണ്ടുവരാമെന്നു പറഞ്ഞ് 1400 രൂപ കടം വാങ്ങി. തുടർന്ന് ബാഗ്, ചുറ്റിക, എലിവിഷം എന്നിവ മൂന്നുകടകളിൽനിന്നു വാങ്ങി. ഇത് പോലീസ് പരിശോധിച്ച് സ്ഥിരീകരിച്ചിട്ടുണ്ട്.
തിരിച്ച്‌ വീട്ടിലെത്തിയപ്പോഴാണ് മാതാവ് മരിച്ചിട്ടില്ലെന്നു കണ്ടത്. തുടർന്ന് ചുറ്റിക ഉപയോഗിച്ച് മുഖത്തും തലയിലും അടിച്ചുവീഴ്ത്തി. തുടർന്നാണ് പാങ്ങോട്ടുള്ള മുത്തശ്ശി സൽമാ ബീവിയുടെ വീട്ടിലെത്തിയത്. അവരെ തലയ്‌ക്കടിച്ചുവീഴ്ത്തി മാല പൊട്ടിച്ചെടുത്തു. തിരിച്ച് വെഞ്ഞാറമൂട്ടിലെ പണമിടപാട് സ്ഥാപനത്തിലെത്തി 74,000 രൂപയ്ക്ക് പണയം െവച്ചു. ഇതിൽനിന്ന് 40,000 രൂപ കടം വാങ്ങിയ ആൾക്ക് അയച്ചു.
ഇതിനുശേഷമാണ് പിതൃസഹോദരൻ ലത്തീഫിന്റെ വീട്ടിലെത്തി ലത്തീഫിനെയും ഭാര്യ ഷാഹിദയെയും കൊലപ്പെടുത്തിയത്. തുടർന്ന് വെഞ്ഞാറമൂട്ടിലെ ബാറിലെത്തി മദ്യപിച്ചു. ഇവിടെനിന്നു മദ്യവും വാങ്ങിയാണ് വീട്ടിലേക്കുപോയത്. ഈ സമയത്താണ് പെൺസുഹൃത്തായ ഫർസാനയെ സ്വന്തം വീട്ടിലേക്കു വിളിച്ചുവരുത്തിയത്. മദ്യലഹരിയിലാണ് പെൺസുഹൃത്തിനെ കൊലപ്പെടുത്തിയത്. ഈ സമയത്ത് വീട്ടിലേക്കുവന്ന അനുജനെ ഒഴിവാക്കാനാണ് കുഴിമന്തി വാങ്ങാനായി ഓട്ടോയിൽ പറഞ്ഞുവിട്ടത്.
ഫർസാനയെ കൊലപ്പെടുത്തിയശേഷം താൻ വിഷം കഴിച്ചതായാണ് അഫാന്റെ മൊഴി. ആഹാരം വാങ്ങി തിരിച്ചെത്തിയ അഫ്‌സാനെ കൊലപ്പെടുത്തി. വീണ്ടും മദ്യപിച്ചശേഷമാണ് ഓട്ടോ വിളിച്ച് വെഞ്ഞാറമൂട് സ്‌റ്റേഷനിലെത്തിയതെന്നും മൊഴിയിൽ പറയുന്നു.

കൂട്ടക്കൊലയ്ക്കു കാരണം മൂന്നുപേരോടുള്ള അമിതസ്‌നേഹവും മൂന്നുപേരോടുള്ള  അടങ്ങാത്ത പകയുമെന്ന് മൊഴി

നാദാപുരം: നാദാപുരത്ത് എംഡിഎംഎയുമായി യുവാവ് പിടിയില്‍. കുന്നുമ്മല്‍ സ്വദേശി റംഷീദാണ് എക്സൈസിന്‍റെ പിടിയിലായത്. സൈബര്‍ സെല്ലിന്‍റെ സഹായത്തോടെ നാദാപുരം റെയ്ഞ്ച് എക്‌സൈസ് ഇന്‍സ്‌പെക്ടര്‍ അനിമോന്‍ ആന്‍റണിയും സംഘവും ചേര്‍ന്നാണ് റംഷീദിനെ പിടികൂടിയത്.
ഇന്നലെ വൈകീട്ട് ആറോടെ പൂവുള്ളതില്‍മുക്ക്-കുനിയില്‍ സ്‌കൂള്‍ റോഡില്‍ വെച്ച് സംശയാസ്പദമായ സാഹചര്യത്തില്‍ എത്തിയ ഇയാളെ പരിശോധിച്ചപ്പോഴാണ് എംഡിഎംഎ ലഭിച്ചത്. 8.4 ഗ്രാം എംഡിഎംഎ പ്രതിയില്‍ നിന്ന് കണ്ടെത്തിയതായി ഉദ്യോഗസ്ഥര്‍ അറിയിച്ചു. അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ ഗ്രേഡ് സിപി ചന്ദ്രന്‍, എക്‌സൈസ് ഓഫീസര്‍മാരായ ദീപുലാല്‍, ഷിജിന്‍, രജിലേഷ്, വിജേഷ്, അശ്വിന്‍, ബബിത, സൂര്യ, ഡ്രൈവര്‍ ബബിന്‍ എന്നിവരുള്‍പ്പെട്ട സംഘമാണ് റംഷീദിനെ പിടികൂടിയത്.

കക്കട്ടിനടുത്ത് വട്ടോളിയിൽ എംഡിഎംഎയുമായി യുവാവ് പിടിയില്‍

Nadapuram

കോഴിക്കോട്: ശനിയാഴ്ച രാത്രി ജോലിക്കിടെ ലൈന്‍മാന്‍ അപകടത്തില്‍പ്പെട്ട് മരിച്ചത് ആഡംബരബൈക്കുകളുടെ റേസിങ്ങിനിടെയെന്ന് പോലീസ് കണ്ടെത്തി. കേസുമായി ബന്ധപ്പെട്ട ബൈക്ക് റേസിങ് നടത്തിയ ആറ് യുവാക്കളെ പോലീസ് കസ്റ്റഡിയിലെടുത്തു. ഇതില്‍ രണ്ടാളുടെപേരില്‍ കേസെടുത്തു. കൊയിലാണ്ടി സ്വദേശികളായ അഭിനവ്, സുദേവ് എന്നിവരെയാണ് മെഡിക്കല്‍ കോളേജ് എസ്.ഐ. വി.ആര്‍. അരുണ്‍ അറസ്റ്റുചെയ്തത്. ബൈക്കുകള്‍ പോലീസ് കസ്റ്റഡിയിലെടുത്തു.
രാത്രി ഒന്‍പതുമണിയോടെയാണ് ആറുപേര്‍ ആറ് ആഡംബരബൈക്കുകളിലായി മിനി ബൈപ്പാസ് റോഡിലേക്കെത്തിയത്. ക്യാമറകള്‍ പരിശോധിച്ച പോലീസ് ഇവര്‍ സരോവരത്തിന് സമീപത്തെ പെട്രോള്‍ പമ്പില്‍ നിര്‍ത്തി വീഡിയോകള്‍ ചിത്രീകരിക്കുന്നത് കണ്ടെത്തിയിട്ടുണ്ട്. ശേഷം മാങ്കാവിലെ മാളിലേക്കെത്തി അകത്തേക്ക് പ്രവേശിക്കാതെ അവിടെവെച്ചും വീഡിയോ ചിത്രീകരണം നടത്തി.
മാളില്‍നിന്ന് പുറത്തേക്കിറങ്ങി മിംസ് ആശുപത്രിയുടെ ഭാഗത്തേക്ക് പോകുന്നതിനിടെയാണ് മാങ്കാവ് വൈദ്യുതി ബോര്‍ഡ് സെക്ഷന്‍ ഓഫീസിലെ ലൈന്‍മാനായ മഞ്ജുനാഥും (45) സഹപ്രവര്‍ത്തകനായ ദേവദാസനും സഞ്ചരിച്ച സ്‌കൂട്ടറില്‍ പിന്നിലൂടെവന്നിടിക്കുന്നത്. മഞ്ജുനാഥ് പിന്‍സീറ്റ് യാത്രക്കാരനായിരുന്നു. അപകടത്തെ തുടര്‍ന്ന് സ്ഥലത്തുനിന്ന് മുങ്ങിയ യുവാക്കളെ ഒട്ടേറെ ക്യാമറകള്‍ പരിശോധിച്ച് തെളിവുകള്‍ ശേഖരിച്ചാണ് മെഡിക്കല്‍ കോളേജ് പോലീസ് പിടികൂടിയത്. ബൈക്കിടിച്ച് മഞ്ജുനാഥിന്റെ നട്ടെല്ല് തകര്‍ന്നതും രക്തക്കുഴല്‍ മുറിഞ്ഞ് ആന്തരികരക്തസ്രാവമുണ്ടായതുമാണ് മരണകാരണമായതെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്.
മിംസ് ആശുപത്രിക്ക് സമീപമുള്ള മണല്‍ത്താഴം വൈദ്യുത ട്രാന്‍സ്‌ഫോര്‍മറിന്റെ ഫ്യൂസ് പോയതിനെത്തുടര്‍ന്ന് സമീപപ്രദേശങ്ങളിലെ വൈദ്യുതിവിതരണം നിലച്ചിരുന്നു. ഇത് അറ്റകുറ്റപ്പണി നടത്താന്‍ പോകുന്നതിനിടെയാണ് അപകടമുണ്ടായതെന്ന് മാങ്കാവ് സെക്ഷന്‍ അസി. എന്‍ജിനിയര്‍ യഥുനാഥ് പറഞ്ഞു.&nbsp;&nbsp;

സ്‌കൂട്ടറില്‍ സഞ്ചരിച്ച ലൈന്‍മാന്‍ മരിച്ചത് ആഡംബര ബൈക്കുകളുടെ റേസിങ്ങിനിടെ; കൊയിലാണ്ടി സ്വദേശികൾ പിടിയിൽ

വടകര: ബൈക്കിൽ കടത്തുകയായിരുന്ന കഞ്ചാവുമായി പിടിയിലായ പ്രതിക്ക് കഠിന തടവും പിഴയും ശിക്ഷ . കോഴിക്കോട് പന്നിയങ്കര ചക്കുംകടവ് എരഞ്ഞിക്കൽ പറമ്പ് വഴി പോക്ക് പറമ്പിൽ റജീസിനെ(42)യാണ് വടകര എൻ ഡി പി എസ് കോടതി ജഡ്ജ് വി ജി ബിജു ശിക്ഷിച്ചത്. മൂന്ന് വർഷം കഠിന തടവും ഇരുപതിനായിരം രൂപ പിഴയുമാണ് ശിക്ഷ.&nbsp;
പിഴ അടച്ചില്ലെങ്കിൽ ഒരു മാസം കൂടി കഠിന തടവ് അനുഭവിക്കണം. 2018 സെപ്തംബർ 14 നാണ് കേസിനാസ്പതമായ സംഭവം. കുന്ദമംഗലം-താമരശ്ശേരി റോഡിൽ സിന്ധു തിയേറ്ററിനു മുൻവശം വെച്ച് നാലു കിലോ 200 ഗ്രാം കഞ്ചാവ് കെ എൽ 11 വൈ -533 ഹീറോ ഹോണ്ട ബൈക്കിൽ കടത്തുമ്പോഴാണ് പ്രതിയെ കുന്ദമംഗലം എക്സ് സൈസ് അറസ്റ്റ് ചെയ്തത്. പ്രോസിക്യൂഷന് വേണ്ടി ഇ വി ലിജീഷ് ഹാജരായി.&nbsp;

ബൈക്കിൽ കടത്തുകയായിരുന്ന കഞ്ചാവുമായി പിടിയിലായ പ്രതിക്ക് കഠിന തടവും പിഴയും

വില്യാപ്പള്ളി: കല്ലേരിയില്‍ ഓടി കൊണ്ടിരുന്ന ലോറി കത്തി നശിച്ചു. ഡ്രൈവര്‍ രക്ഷപ്പെട്ടു. കല്ലേരി വൈദ്യര്‍ പീടികയ്ക്ക്സമീപം ഇന്ന് രാത്രിയാണ് സംഭവം. പട്ടാമ്പിക്ക് ആക്രി സാധനങ്ങള്‍ കൊണ്ടു പോകുകയായിരുന്ന ലോറിക്കാണ് തീ പിടിച്ചത്. ലോറിയും സാധനങ്ങളും പൂര്‍ണമായി കത്തി നശിച്ചു.&nbsp;
വൈദ്യുതി ലൈനില്‍ ആക്രി സാധനങ്ങള്‍ തട്ടിയാണ് തീ പിടിത്തമെന്നാണ് സംശയിക്കുന്നത്. പാലക്കാട് കോങ്ങോട് ചെറായി സ്വദേശിയാണ് വാഹനത്തിന്റ ഡ്രൈവര്‍. ഇയാള്‍ വാഹനത്തില്‍ നിന്ന് ഇറങ്ങിഓടിയതിനാല്‍ തലനാരിഴയ്ക്ക് രക്ഷപ്പെട്ടു.നാദാപുരത്ത് നിന്ന് ഫയര്‍ഫോഴ്‌സ് എത്തിയാണ് തീയണച്ചത്. ലോറിക്ക് തീ പിടിച്ചതോടെ കുനിങ്ങാട്-വില്യാപ്പള്ളി-വടകര റൂട്ടില്‍ ഗതാഗതം തടസ്സപ്പെട്ടു. അഗ്‌നി രക്ഷാ നിലയം ഓഫീസര്‍ വരുണിന്റെ നേതൃത്വത്തിലുള്ള സംഘം സ്ഥലത്തെത്തി മേല്‍ നടപടികള്‍ സ്വീകരിച്ചു.

കല്ലേരിയിൽ ഓടികൊണ്ടിരുന്ന ലോറിക്ക് തീ പിടിച്ചു; ഡ്രൈവർ പരിക്കേൽക്കാതെ രക്ഷപ്പെട്ടു

വടകര : വില്യാപ്പള്ളിയിൽ വീടിന് തീപിടിച്ച് വയോധിക മരിച്ചു.ഇന്ന് രാത്രി ഏഴുമണിയോടെയാണ് വീടിന് തീപിടിച്ചത്. വില്യാപ്പള്ളി സ്വദേശിനി നാരായണി ആണ് മരിച്ചത്. നാരായണി വീട്ടിൽ തനിച്ചായിരുന്നു. വീട്ടിൽ നിന്ന് തീ ആളിപടരുന്നത് കണ്ടാണ് സമീപവാസികള്‍ വിവരം അറിഞ്ഞത്.&nbsp;
തീ അണച്ചെങ്കിലും നാരായണിയെ രക്ഷിക്കാനായില്ല. വീടിന് എങ്ങനെയാണ് തീപിടിച്ചതെന്ന് വ്യക്തമല്ല. സ്ഥലത്ത് പൊലീസും ജനപ്രതിനിധികളുമടക്കം എത്തിയിട്ടുണ്ട്.&nbsp;

വില്യാപ്പള്ളിയിൽ വീടിന് തീപിടിച്ച് വയോധികയ്ക്ക് ദാരുണാന്ത്യം

Search Results for: 25.02.2025