വടകര: കഞ്ചാവ് കൈവശം വെച്ച കേസിൽ പ്രതിക്ക് കഠിന തടവും പിഴയും ശിക്ഷ. കോഴിക്കോട് ചെറൂപ്പ പോടഞ്ചേരി സാജിദിനെ(34)യാണ് വടകര എൻ ഡി പി എസ് കോടതി ജഡ്ജ് വി ജി ബിജു ശിക്ഷിച്ചത്. രണ്ടു വർഷം കഠിന തടവും ഇരുപതിനായിരം രൂപ പിഴയുമാണ് ശിക്ഷ. പിഴ അടച്ചില്ലെങ്കിൽ ഒരു മാസം കൂടി കഠിന തടവ് അനുഭവിക്കണം. 2018 സെപ്തംബർ രണ്ടിനാണ് കേസിനാസ്പദമായ സംഭവം. താമരശ്ശേരി ചുങ്കം വാട്ടർ സ്റ്റേഷന് മുൻവശം വെച്ച് ഒരു കിലോ 340 ഗ്രാം കഞ്ചാവുമായാണ് പ്രതിയെ താമരശ്ശേരി പോലീസ് അറസ്റ്റ് ചെയ്തത്. പ്രോസിക്യൂഷന് വേണ്ടി അഡ്വ.ഇ വി ലിജീഷ് ഹാജരായി.