തിരുവനന്തപുരം: മന്ത്രി കെ.എം. ഷാജി സ്വകാര്യ വ്യക്തിയുടെ ഉടമസ്ഥതയിലുള്ള റേഞ്ച് റോവർ വാഹനം ഔദ്യോഗിക ആവശ്യത്തിന് ഉപയോഗിച്ചതിനെതിരെ മോട്ടോർ വാഹന കമ്മിഷണർക്ക് പരാതി. സെപ്റ്റംബർ 23ന് നൽകിയ പരാതിയിൽ ഇതുവരെ നടപടി ഉണ്ടായിട്ടില്ലെന്നാണ് ആരോപണം. സർക്കാർ ബോർഡും ചിഹ്നങ്ങളും പതിച്ച സ്വകാര്യ ആഡംബര വാഹനം ഔദ്യോഗിക ആവശ്യത്തിന് ഉപയോഗിച്ചത് മോട്ടോർ വാഹന നിയമങ്ങളുടെ ലംഘനമാണെന്ന് പരാതിയിൽ ചൂണ്ടിക്കാട്ടുന്നു.
1988ലെ മോട്ടോർ വെഹിക്കിൾ ആക്ടിലെ 39, 40, 41, 43, 52, 66 വകുപ്പുകളും 1989ലെ മോട്ടോർ വെഹിക്കിൾ റൂൾസിലെ 92 എ വകുപ്പും ലംഘിച്ചതിന് നടപടി സ്വീകരിക്കണമെന്നാണ് ആവശ്യം. ദേശീയ ചിഹ്നങ്ങളും പേരും ദുരുപയോഗം ചെയ്തതുമായി ബന്ധപ്പെട്ട നിയമപ്രകാരവും നടപടിയെടുക്കണമെന്നും പരാതിയിൽ ആവശ്യപ്പെടുന്നു.
ഭാരതീയ ന്യായ സംഹിതയിലെ 204, 205 വകുപ്പുകൾ പ്രകാരവും കുറ്റം ചെയ്തതായി പരാതിയിൽ ആരോപിക്കുന്നുണ്ട്. പരിശോധന നടത്തി നിയമലംഘനം കണ്ടെത്തിയാൽ വാഹനം പിടിച്ചെടുക്കണമെന്നും പരാതിക്കാരൻ ആവശ്യപ്പെട്ടു. ഹൈക്കോടതി അഭിഭാഷകനായ അതുൽ ടോമാണ് പരാതി നൽകിയത്. പരാതിയുടെ പകർപ്പ് കണ്ണൂർ ഇരിട്ടി ജോയിന്റ് ആർ.ടി.ഒയ്ക്കും കൈമാറിയിട്ടുണ്ട്.

കെ.എം. ഷാജിയുടെ റേഞ്ച് റോവർ ഉപയോഗം; മോട്ടോർ വാഹന കമ്മിഷണർക്ക് പരാതി

തിരുവനന്തപുരം : പഞ്ചാബിലെ ലവ്‌ലി പ്രൊഫഷണൽ യൂണിവേഴ്സിറ്റിയിൽ ഉണ്ടായ സംഭവങ്ങൾ അതീവ ഗൗരവത്തോടെ കാണണമെന്ന് പ്രതിപക്ഷ നേതാവ് പിണറായി വിജയൻ. ഒരു പെൺകുട്ടിക്ക് നേരെ ലൈംഗിക അതിക്രമം നടന്നുവെന്ന ആരോപണത്തെ തുടർന്നാണ് വിദ്യാർഥികൾ പ്രതിഷേധവുമായി രംഗത്തെത്തിയത്. എന്നാൽ സർവകലാശാലാ സ്ഥാപകനും ചാൻസലറുമായ ബിജെപി എംപി അശോക് കുമാർ മിത്തലും മാനേജ്മെന്റും പൊലീസിനെയും സംഘപരിവാർ പ്രവർത്തകരെയും ഉപയോഗിച്ച് പ്രതിഷേധം അടിച്ചമർത്താനാണ് ശ്രമിച്ചതെന്ന് പിണറായി വിജയൻ ആരോപിച്ചു.
സംഭവത്തിൽ ശക്തമായ പ്രതിഷേധം ഉയർന്നുവരണമെന്നും സമഗ്രവും സുതാര്യവുമായ അന്വേഷണത്തിലൂടെ നീതി ഉറപ്പാക്കണമെന്നും അദ്ദേഹം ആവശ്യപ്പെട്ടു. വിദ്യാർഥികൾ ഉന്നയിക്കുന്ന വിവിധ വിഷയങ്ങളിലും മാനേജ്മെന്റിന്റെ പങ്ക് സംബന്ധിച്ചും വിട്ടുവീഴ്ചയില്ലാത്ത അന്വേഷണം നടത്തണം. സംഘർഷത്തെ തുടർന്ന് 10 ദിവസത്തേക്ക് ക്ലാസുകൾ നിർത്തിവച്ച സാഹചര്യത്തിൽ സർവകലാശാലയിലെ 1500-ലധികം മലയാളി വിദ്യാർഥികളുടെ സുരക്ഷയും യാത്രാസൗകര്യവും ഉറപ്പാക്കണമെന്നും അദ്ദേഹം ആവശ്യപ്പെട്ടു.
ജലന്ധറിൽ നിന്ന് ഡൽഹിയിലേക്കും തുടർന്ന് കേരളത്തിലേക്കും വിദ്യാർഥികൾക്ക് സുരക്ഷിതമായി യാത്ര ചെയ്യാൻ കേന്ദ്ര-സംസ്ഥാന സർക്കാരുകൾ അടിയന്തരമായി ഇടപെടണം. ടിക്കറ്റ് ക്ഷാമം ഉണ്ടാകാൻ സാധ്യതയുള്ളതിനാൽ റെയിൽവേയുമായി ബന്ധപ്പെട്ട് പ്രത്യേക ട്രെയിനുകളോ അധിക കോച്ചുകളോ അനുവദിക്കുന്നതിന് നടപടി സ്വീകരിക്കണമെന്നും പിണറായി വിജയൻ ആവശ്യപ്പെട്ടു. വിദ്യാർഥികളുടെയും രക്ഷിതാക്കളുടെയും ആശങ്കകൾ അടിയന്തരമായി പരിഹരിക്കണമെന്നും അദ്ദേഹം പറഞ്ഞു

ലവ്‌ലി സർവകലാശാലയിലെ സംഘർഷം; മലയാളി വിദ്യാർഥികളുടെ സുരക്ഷ ഉറപ്പാക്കണമെന്ന് പ്രതിപക്ഷ നേതാവ് പിണറായി വിജയൻ

തിരുവനന്തപുരം: വലിയ രാഷ്ട്രീയ വിവാദങ്ങൾക്ക് വഴിവെച്ച നിയമസഭാ കയ്യാങ്കളി കേസിൽ 11 വർഷത്തിന് ശേഷം വിചാരണ നടപടികൾക്ക് തുടക്കമാകുന്നു. നവംബർ മൂന്നിന് തിരുവനന്തപുരം ചീഫ് ജുഡീഷ്യൽ മജിസ്‌ട്രേറ്റ് കോടതിയിലാണ് വിചാരണ ആരംഭിക്കുക. പ്രതികൾ നടത്തിയ നിയമപോരാട്ടങ്ങൾക്കൊടുവിലാണ് കേസ് ഇപ്പോൾ വിചാരണ ഘട്ടത്തിലെത്തുന്നത്.
2015 മാർച്ച് 13നാണ് കേസിനാസ്പദമായ സംഭവം നടന്നത്. അന്നത്തെ ധനമന്ത്രി കെ.എം. മാണി ബജറ്റ് അവതരിപ്പിക്കുന്നതിനിടെ പ്രതിപക്ഷ എംഎൽഎമാർ പ്രതിഷേധിച്ചതാണ് കേസിനിടയാക്കിയത്. നിയമസഭയിലെ പൊതുമുതൽ നശിപ്പിച്ചെന്നാരോപിച്ചാണ് പൊലീസ് കേസ് രജിസ്റ്റർ ചെയ്തത്.
ആദ്യഘട്ടത്തിൽ രണ്ട് സാക്ഷികളെയാണ് വിസ്തരിക്കുക. അന്നത്തെ നിയമസഭാ സെക്രട്ടറിയായിരുന്ന ശാരംഗധരനും സഭയിലെ ദൃശ്യങ്ങൾ പകർത്തിയ ഡിവിആർ കോപ്പി ചെയ്ത എൻജിനീയറുമാണ് ആദ്യ സാക്ഷികൾ. കേസിലെ പ്രധാന പ്രതികളിൽ വി. ശിവൻകുട്ടി, ഇ.പി. ജയരാജൻ, കെ.ടി. ജലീൽ, കെ. അജിത്, കെ. കുഞ്ഞഹമ്മദ്, സി.കെ. സദാശിവൻ എന്നിവരുണ്ട്.
കേസിൽ അഡ്വ. കെ. സന്തോഷ് കുമാറിനെ സ്പെഷ്യൽ പബ്ലിക് പ്രോസിക്യൂട്ടറായി നിയമിച്ചിട്ടുണ്ട്. വിചാരണ നടപടികൾ ആരംഭിക്കുന്നതോടെ വർഷങ്ങളായി തുടരുന്ന കേസിൽ കോടതി നടപടികൾ നിർണായക ഘട്ടത്തിലേക്ക് കടക്കുകയാണ്.

11 വർഷത്തിന് ശേഷം നിയമസഭാ കയ്യാങ്കളി കേസ് വിചാരണയിലേക്ക്; ആദ്യഘട്ടത്തിൽ രണ്ട് സാക്ഷികൾ

ഡൽഹി: ഡൽഹിയിൽ സ്ത്രീകൾക്കും പെൺകുട്ടികൾക്കും നേരെയുള്ള ലൈംഗികാതിക്രമ സംഭവങ്ങൾ വർധിക്കുന്നതിൽ ആശങ്ക രേഖപ്പെടുത്തി സുപ്രീംകോടതി സ്വമേധയാ കേസെടുത്തു. ജസ്റ്റിസുമാരായ ജെ.ബി. പർദിവാല, കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് വിഷയം പരിഗണിച്ചത്. സ്ത്രീകളുടെ സുരക്ഷ ഉറപ്പാക്കുന്നതിൽ നിയമപാലന സംവിധാനത്തിന്റെയും ഭരണകൂടത്തിന്റെയും വീഴ്ചകളാണ് ഇത്തരം സംഭവങ്ങൾ ചൂണ്ടിക്കാട്ടുന്നതെന്ന് കോടതി നിരീക്ഷിച്ചു.
ആസ്ഥ കുഞ്ജ് പാർക്കിൽ 17 വയസുകാരി കൂട്ടബലാത്സംഗത്തിനിരയായ സംഭവം, സ്വരൂപ് നഗറിൽ പ്രായപൂർത്തിയാകാത്ത പെൺകുട്ടി കൂട്ടബലാത്സംഗത്തിനിരയായ സംഭവം, ഗ്രേറ്റർ നോയിഡയിൽ നിന്ന് ഡൽഹിയിലേക്ക് സർവീസ് നടത്തിയ ബസിനുള്ളിൽ പെൺകുട്ടി ലൈംഗികാതിക്രമത്തിനിരയായ സംഭവം തുടങ്ങിയവ കോടതി പരിഗണിച്ചു. പാർക്കുകൾ, ബസുകൾ, മെട്രോ സ്റ്റേഷനുകൾ ഉൾപ്പെടെയുള്ള പൊതുസ്ഥലങ്ങൾ ഉയർന്ന അപകടസാധ്യതയുള്ള മേഖലകളായി മാറാൻ അനുവദിക്കാനാകില്ലെന്നും കോടതി വ്യക്തമാക്കി.
ഗ്രേറ്റർ നോയിഡയിൽ നിന്ന് ഡൽഹിയിലെ കാശ്മീരി ഗേറ്റിലേക്ക് ഏകദേശം 47 കിലോമീറ്റർ സഞ്ചരിച്ച ബസിനുള്ളിൽ പ്രായപൂർത്തിയാകാത്ത പെൺകുട്ടി ലൈംഗികാതിക്രമത്തിനിരയായ സംഭവത്തിലും കോടതി ആശങ്ക രേഖപ്പെടുത്തി. ബസ് നിരവധി പൊലീസ് ചെക്ക്‌പോസ്റ്റുകൾ കടന്നുപോയിട്ടും പരിശോധനയ്ക്ക് വിധേയമായില്ലെന്ന റിപ്പോർട്ടും കോടതി ചൂണ്ടിക്കാട്ടി. സംഭവം 2012ലെ നിർഭയ കേസിന്റെ ഓർമപ്പെടുത്തലാണെന്നും നിയമപാലന സംവിധാനത്തിൽ കാര്യമായ പുരോഗതി ഉണ്ടായിട്ടുണ്ടോ എന്ന് പരിശോധിക്കേണ്ട സമയമാണെന്നും കോടതി നിരീക്ഷിച്ചു.
കുറ്റകൃത്യങ്ങൾക്ക് ശേഷം ജനപ്രതിനിധികളും അധികാരികളും അനുശോചനവും പ്രസ്താവനകളും നടത്തുന്നത് മാത്രം മതിയാകില്ലെന്നും കോടതി വ്യക്തമാക്കി. കുറ്റകൃത്യങ്ങൾ തടയാനും പൊതുക്രമസമാധാനം ഉറപ്പാക്കാനും ദുർബല വിഭാഗങ്ങളെ സംരക്ഷിക്കാനും ഫലപ്രദമായ നടപടികൾ സ്വീകരിക്കണമെന്നും കോടതി നിർദേശിച്ചു.

ഡൽഹിയിൽ സ്ത്രീകൾക്കും പെൺകുട്ടികൾക്കും നേരെ അതിക്രമം; സ്വമേധയാ കേസെടുത്ത് സുപ്രീംകോടതി

National

ന്യൂഡൽഹി : 2,000 രൂപയ്ക്ക് മുകളിലുള്ള യുപിഐ ഇടപാടുകൾക്ക് മർച്ചന്റ് ഡിസ്കൗണ്ട് റേറ്റ് (എംഡിആർ) ഏർപ്പെടുത്താനുള്ള കേന്ദ്ര തീരുമാനത്തിനെതിരായ ഹർജിയിൽ ഇടക്കാല സ്റ്റേ നൽകാതെ സുപ്രീംകോടതി. അതേസമയം, ചാർജ് ഏർപ്പെടുത്തുന്നതിനുള്ള നിയമപരവും ഭരണപരവുമായ അടിസ്ഥാനമെന്തെന്ന് കേന്ദ്രസർക്കാരിനോടും റിസർവ് ബാങ്കിനോടും എൻപിസിഐയോടും കോടതി വിശദീകരണം തേടി. നാല് ആഴ്ചയ്ക്കകം മറുപടി നൽകാനും നിർദേശിച്ചു.
എംഡിആർ നികുതിയോ ഫീസോ അല്ലെന്ന കേന്ദ്രത്തിന്റെ വാദത്തോട് പ്രതികരിച്ച ജസ്റ്റിസ് ജോയ്മല്യ ബാഗ്ചി, വ്യാപാരിക്ക് ലഭിക്കുന്ന തുകയിൽ നിന്ന് തുക ഈടാക്കുന്നതിനുള്ള നിയമപരവും ഭരണപരവുമായ അടിസ്ഥാനമെന്തെന്നും ഏത് സേവനത്തിനാണ് തുക ഈടാക്കുന്നതെന്നും ചോദിച്ചു.
2,000 രൂപയ്ക്ക് മുകളിലുള്ള പേയ്മെന്റുകൾക്ക് എംഡിആർ ഏർപ്പെടുത്താനാണ് കേന്ദ്രത്തിന്റെ പുതിയ നീക്കം. നിലവിലെ നിർദേശപ്രകാരം വ്യക്തിയിൽ നിന്ന് വ്യക്തിയിലേക്കുള്ള യുപിഐ ഇടപാടുകൾ തുകയെത്രയായാലും സൗജന്യമായി തുടരും. വ്യാപാരികൾക്കുള്ള 2,000 രൂപ വരെയുള്ള യുപിഐ പേയ്മെന്റുകളും ചെറുകിട വ്യാപാരികൾക്ക് ലഭിക്കുന്ന ചില ഇടപാടുകളും സീറോ എംഡിആർ പരിധിയിൽ തുടരും.2,000 രൂപയ്ക്ക് മുകളിലുള്ള വ്യാപാരി ഇടപാടുകൾക്ക് സാധാരണ 0.4 ശതമാനമാണ് എംഡിആർ. പുതിയ നിരക്ക് ഒക്ടോബർ 15 മുതൽ പ്രാബല്യത്തിൽ വരുമെന്ന് കേന്ദ്രം കോടതിയെ അറിയിച്ചു.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് ഹർജി പരിഗണിച്ചത്.

യുപിഐ ഇടപാടുകൾക്ക് എംഡിആർ; കേന്ദ്ര തീരുമാനത്തിൽ സുപ്രീംകോടതി സ്റ്റേ ഇല്ല

തിരുവനന്തപുരം : വിവാഹ വിപണിക്ക് നേരിയ ആശ്വാസമായി സംസ്ഥാനത്ത് സ്വർണവിലയിൽ വീണ്ടും ഇടിവ്. ഇന്ന് പവന് 1840 രൂപയാണ് കുറഞ്ഞത്. ഇതോടെ ഒരു പവൻ സ്വർണത്തിന്റെ വില 1,11,960 രൂപയിൽ നിന്ന് 1,10,120 രൂപയായി. തുടർച്ചയായ രണ്ടാം ദിവസമാണ് സ്വർണവില കുറയുന്നത്. ഗ്രാമിന് 230 രൂപ കുറഞ്ഞ് 13,765 രൂപയായി.
ആഗസ്ത് ഏഴിനാണ് അവസാനമായി സ്വർണവില 1,10,000 രൂപയ്ക്ക് താഴെയെത്തിയത്. സെപ്റ്റംബറിൽ രേഖപ്പെടുത്തിയ ഏറ്റവും കുറഞ്ഞ വിലയും ഇതുതന്നെയാണ്. 24 കാരറ്റ് സ്വർണത്തിന് പവന് 1,20,136 രൂപയും ഗ്രാമിന് 15,017 രൂപയുമാണ് വില. 18 കാരറ്റിന് പവന് 90,104 രൂപയും ഗ്രാമിന് 11,263 രൂപയുമാണ്.
അന്താരാഷ്ട്ര വിപണിയിലെ ചലനങ്ങളാണ് സംസ്ഥാനത്തെ സ്വർണവിലയിലും ഏറ്റക്കുറച്ചിലുകൾക്ക് പ്രധാന കാരണം. ഡോളർ-രൂപ വിനിമയ നിരക്ക്, ഇറക്കുമതി തീരുവ, ക്രൂഡ് ഓയിൽ വില, ആഭ്യന്തര ഓഹരി വിപണിയിലെ മാറ്റങ്ങൾ തുടങ്ങിയ ഘടകങ്ങളും സ്വർണവിലയെ സ്വാധീനിക്കും.
പ്രാദേശികമായി പ്രവർത്തിക്കുന്ന ഗോൾഡ് അസോസിയേഷനുകളാണ് സംസ്ഥാനത്ത് സ്വർണവില നിശ്ചയിക്കുന്നത്. എന്നാൽ ആഗോള വിപണിയിലെ ചെറിയ മാറ്റങ്ങൾ പോലും ആഭ്യന്തര സ്വർണവിലയിൽ പ്രതിഫലിക്കാറുണ്ട്.

സ്വർണവിലയിൽ വീണ്ടും ഇടിവ്; പവന് 1840 രൂപ കുറഞ്ഞു

അമ്പലപ്പുഴ: കള്ളക്കടൽ പ്രതിഭാസത്തെ തുടർന്ന് അപ്രതീക്ഷിതമായി കടൽ കയറിയതോടെ ആലപ്പുഴ ജില്ലയിലെ തീരപ്രദേശങ്ങളിൽ ആശങ്ക. ഇന്നലെ വൈകിട്ടോടെ പുറക്കാട് മേഖലയിൽ ശക്തമായ തിരമാലകളാണ് അനുഭവപ്പെട്ടത്. കടൽക്ഷോഭത്തിൽപ്പെട്ട മത്സ്യത്തൊഴിലാളികൾ വള്ളങ്ങൾ സുരക്ഷിതമായി കരയ്ക്കടുപ്പിച്ച് രക്ഷപ്പെട്ടു.
തോട്ടപ്പള്ളി, പുറക്കാട്, ആനന്ദേശ്വരം, പറവൂർ, ഗലീലിയ, തുമ്പോളി തുടങ്ങിയ തീരപ്രദേശങ്ങളിൽ നിന്ന് മത്സ്യബന്ധനത്തിന് പോയ വള്ളങ്ങളാണ് അപ്രതീക്ഷിതമായി ഉയർന്ന ശക്തമായ തിരമാലകളിൽപ്പെട്ടത്. കൂറ്റൻ തിരമാലകൾ ഉയരുന്നത് ശ്രദ്ധയിൽപ്പെട്ടതോടെ വള്ളങ്ങൾ ഉടൻ കരയ്ക്കടുപ്പിക്കുകയായിരുന്നുവെന്ന് മത്സ്യത്തൊഴിലാളികൾ പറഞ്ഞു.
കള്ളക്കടൽ പ്രതിഭാസം സംബന്ധിച്ച് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിരുന്നെങ്കിലും ഇത് അവഗണിച്ചാണ് ചിലർ മത്സ്യബന്ധനത്തിന് പോയതെന്നാണ് വിവരം.
അതേസമയം, മുന്നറിയിപ്പ് നിലനിന്നിട്ടും തോട്ടപ്പള്ളി തീരദേശ പൊലീസ് ആവശ്യമായ സുരക്ഷാ നടപടികൾ സ്വീകരിച്ചില്ലെന്ന് മത്സ്യത്തൊഴിലാളി സംഘടനകൾ ആരോപിച്ചു. തീരദേശ മേഖലയെക്കുറിച്ച് മതിയായ പരിചയമില്ലാത്ത ചില ഉദ്യോഗസ്ഥർ ചുമതലയേറ്റതോടെ കടലിൽ പോകുന്ന തൊഴിലാളികൾക്ക് അടിയന്തര സാഹചര്യങ്ങളിൽ ആവശ്യമായ സഹായം ലഭിക്കുന്നില്ലെന്നും സംഘടനകൾ പരാതിപ്പെട്ടു.

കള്ളക്കടൽ പ്രതിഭാസം; ആലപ്പുഴ തീരത്ത് കൂറ്റൻ തിരമാലകൾ, മത്സ്യത്തൊഴിലാളികൾ വള്ളങ്ങൾ കരയ്ക്കടുപ്പിച്ചു

കൊച്ചി: താരസംഘടനയായ ‘അമ്മ’യിലെ തർക്കങ്ങളുമായി ബന്ധപ്പെട്ട പരാതികളിൽ പരിഹാസവുമായി ഹൈക്കോടതി. സംഘടനയുമായി ബന്ധപ്പെട്ട കേസുകൾ പരിഗണിക്കാൻ പ്രത്യേക കോടതി തന്നെ വേണ്ടിവരുമല്ലോ എന്നായിരുന്നു കോടതിയുടെ ചോദ്യം. സാധാരണക്കാരുടെ നിരവധി പ്രശ്‌നങ്ങൾ പരിഗണിക്കാനുള്ളപ്പോഴാണ് ഇത്തരം വിഷയങ്ങൾ തീർക്കാൻ സമയം ചെലവഴിക്കേണ്ടിവരുന്നതെന്നും കോടതി നിരീക്ഷിച്ചു.
തനിക്കെതിരായ കേസ് റദ്ദാക്കണമെന്നാവശ്യപ്പെട്ട് നടി ലക്ഷ്മിപ്രിയ നൽകിയ ഹർജി പരിഗണിക്കവെയാണ് ഹൈക്കോടതിയുടെ പരാമർശം. ഹർജിയിൽ സർക്കാരിന് കോടതി നോട്ടീസ് അയച്ചു. മൂന്നാഴ്ചയ്ക്ക് ശേഷം കേസ് വീണ്ടും പരിഗണിക്കും. കോടതി നിർദേശപ്രകാരം പൊലീസ് രജിസ്റ്റർ ചെയ്ത എഫ്.ഐ.ആർ റദ്ദാക്കണമെന്നാണ് ലക്ഷ്മിപ്രിയയുടെ ആവശ്യം.
സാമൂഹികമാധ്യമത്തിലൂടെ അപമാനിച്ചെന്ന പരാതിയിൽ പാലാരിവട്ടം പൊലീസ് കഴിഞ്ഞ ദിവസമാണ് ലക്ഷ്മിപ്രിയക്കെതിരെ കേസെടുത്തത്.
നടി അൻസിബ നൽകിയ സ്വകാര്യ അന്യായത്തെ തുടർന്നായിരുന്നു കോടതി നടപടി. ലക്ഷ്മിപ്രിയ വ്യക്തിഹത്യ നടത്തിയെന്നും സ്ത്രീത്വത്തെ അപമാനിക്കുന്ന തരത്തിലുള്ള പരാമർശങ്ങൾ നടത്തിയെന്നും ആരോപിച്ചാണ് അൻസിബ പൊലീസിനെ സമീപിച്ചത്. പരാതിയിൽ പൊലീസ് കേസെടുക്കാതിരുന്നതിനെ തുടർന്ന് അൻസിബ മജിസ്‌ട്രേറ്റ് കോടതിയെയും പിന്നീട് ഹൈക്കോടതിയെയും സമീപിക്കുകയായിരുന്നു.
പരാതി വീണ്ടും പരിശോധിക്കാൻ ഹൈക്കോടതി കീഴ്‌ക്കോടതിക്ക് നിർദേശം നൽകി. താരസംഘടനയായ ‘അമ്മ’യിലെ തർക്കങ്ങൾക്കിടെയാണ് അൻസിബയും ലക്ഷ്മിപ്രിയയും തമ്മിലുള്ള പ്രശ്‌നം പുറത്തുവന്നത്.

‘അമ്മ’യിലെ തർക്കങ്ങൾ; പരാതികളിൽ ഹൈക്കോടതിയുടെ പരിഹാസ പരാമർശം

മുംബൈ: പെൺകുട്ടിയെ ശല്യം ചെയ്തെന്നാരോപിച്ച് മഹാരാഷ്ട്രയിലെ ധാരാശിവ് ജില്ലയിൽ 18കാരനായ കോളജ് വിദ്യാർഥിയെ ആക്രമിസംഘം തല്ലിക്കൊന്നു. സംഭവത്തിൽ മുൻ തുൽജാപൂർ മുനിസിപ്പൽ കൗൺസിൽ പ്രസിഡന്റും ബിജെപി നേതാവുമായ സന്തോഷ് ദേവിദാസ് കദം ഉൾപ്പെടെ രണ്ടുപേരെ പൊലീസ് അറസ്റ്റ് ചെയ്തു. തുൽജാഭവാനി മഹാവിദ്യാലയത്തിലെ ഒന്നാം വർഷ ബികോം വിദ്യാർഥിയായ സമീർ ജബ്ബാർ പട്ടേലാണ് കൊല്ലപ്പെട്ടത്. ആക്രമണത്തിൽ സമീറിന്റെ ബന്ധുവായ അർബാസ് അഫ്‌സർ സയ്യിദിനും ഗുരുതരമായി പരിക്കേറ്റു.
നവംബർ മൂന്നിനാണ് ക്രൂരമായ കൊലപാതകം നടന്നത്. നവംബർ പത്തിന് സമീറിന്റെ വിവാഹം നടക്കാനിരിക്കെയാണ് ദാരുണമായ സംഭവം. സന്തോഷ് കദത്തിന് പുറമെ സഞ്ജയ് വിലാസ് ജാദവിനെയും തുൽജാപൂർ പൊലീസ് അറസ്റ്റ് ചെയ്തു. ഇരുവരെയും കോടതി ഏഴ് ദിവസത്തേക്ക് പൊലീസ് കസ്റ്റഡിയിൽ വിട്ടു. കേസിൽ ഉൾപ്പെട്ട മറ്റ് പ്രതികൾക്കായി തിരച്ചിൽ തുടരുകയാണെന്ന് ധാരാശിവ് ജില്ലാ പൊലീസ് സൂപ്രണ്ട് റിതു ഖോക്കർ കല്യാൺ വ്യക്തമാക്കി.
നേരത്തെയും ഭീഷണിയുണ്ടായെന്ന് കുടുംബം
സന്തോഷ് കദത്തിന്റെ ഭാര്യാസഹോദരന്റെ മകളെ ശല്യം ചെയ്തെന്നാരോപിച്ച് മൂന്ന് മാസം മുമ്പും സമീറിനും കുടുംബത്തിനും നേരെ ഭീഷണിയുണ്ടായിരുന്നതായി മാതാവ് നൽകിയ പരാതിയിൽ പറയുന്നു. അന്ന് കദത്തിന്റെ വസതിയിലേക്ക് വിളിച്ചുവരുത്തി സമീറിനെ മർദിക്കുകയും മുന്നറിയിപ്പ് നൽകുകയും ചെയ്തിരുന്നു. ഇതേത്തുടർന്ന് സമീർ കോളജിൽ പോകുന്നത് നിർത്തി ബേക്കറിയിൽ ജോലി ചെയ്തുവരികയായിരുന്നു.
നവംബർ മൂന്നിന് പരീക്ഷ എഴുതി ഇറങ്ങിയ അമ്മാവനെ കൂട്ടിക്കൊണ്ടുവരാൻ പോയ സമീറിനെ സംഘം സന്തോഷ് കദത്തിന്റെ വീട്ടിലേക്ക് കൊണ്ടുപോയി. വിവരമറിഞ്ഞ് മാതാപിതാക്കൾ സ്ഥലത്തെത്തിയപ്പോൾ സമീറിനെ കദവും സംഘവും ചേർന്ന് ക്രൂരമായി മർദിക്കുന്നതാണ് കണ്ടത്. മകനെ രക്ഷിക്കാൻ ശ്രമിച്ച മാതാപിതാക്കളെ അസഭ്യം പറയുകയും ഭീഷണിപ്പെടുത്തുകയും ചെയ്ത സംഘം സമീറിനെ ബലമായി മറ്റൊരിടത്തേക്ക് കൊണ്ടുപോയി.
സമീറിന്റെ മാതാവിന്റെ ഫോൺ പിടിച്ചുവാങ്ങിയ സംഘത്തിലെ പ്രണവ് ദേവ്കത്തെ എന്നയാൾ കുടുംബത്തെ മണിക്കൂറുകളോളം തടഞ്ഞുവെച്ചതായും പരാതിയിലുണ്ട്.തുടർന്ന് ഭാരതീബുവ മഠത്തിന് സമീപത്തെ പാർക്കിങ് ഏരിയയിൽ ഉപേക്ഷിക്കപ്പെട്ട നിലയിലാണ് സമീറിനെ കണ്ടെത്തിയത്. മുളവടികളും ബെൽറ്റുകളും ഉപയോഗിച്ച് ക്രൂരമായി മർദനമേറ്റ നിലയിലായിരുന്നു സമീർ. തുൽജാപൂരിലെ സർക്കാർ ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചതായി ഡോക്ടർമാർ സ്ഥിരീകരിച്ചു.
ബന്ധുവിനെയും തട്ടിക്കൊണ്ടുപോയി മർദിച്ചു
തുൽജാപൂരിലെ ചായക്കടയിൽ ഇരിക്കുകയായിരുന്ന സമീറിന്റെ ബന്ധു അർബാസിനെയും മൂന്നംഗ സംഘം വാഹനത്തിൽ തട്ടിക്കൊണ്ടുപോയി കൃഷിയിടത്തിൽവെച്ച് മർദിക്കുകയായിരുന്നു. വടികളും ബെൽറ്റുകളും ഇരുമ്പുദണ്ഡുകളും ഉപയോഗിച്ച് രണ്ട് മണിക്കൂറോളം ക്രൂരമായി മർദിച്ചെന്നും പോക്കറ്റിലുണ്ടായിരുന്ന 10,000 രൂപ കവർന്നെന്നും അർബാസ് പറഞ്ഞു. പിന്നീട് സമീറിനെയും ഇതേ കൃഷിയിടത്തിലേക്ക് എത്തിച്ച് മർദിച്ചതായി അർബാസ് വ്യക്തമാക്കി.ഗുരുതര പരിക്കുകളോടെ വീട്ടിലെത്തിയ അർബാസാണ് സമീർ മഠത്തിന് സമീപം കിടക്കുന്ന വിവരം കുടുംബത്തെ അറിയിച്ചത്.
ശക്തമായ നടപടി വേണമെന്ന് എഐഎംഐഎം
സംഭവത്തിൽ ശക്തമായ നടപടി ആവശ്യപ്പെട്ട് എഐഎംഐഎം ജില്ലാ നേതൃത്വം രംഗത്തെത്തി. പാർട്ടി ജില്ലാ പ്രസിഡന്റ് ഷഹബാസ് ഖാസി, മുനിസിപ്പൽ പ്രതിനിധി അൻവർ മുജാവർ എന്നിവരുടെ നേതൃത്വത്തിൽ ജില്ലാ കലക്ടർക്ക് നിവേദനം നൽകി. കുടുംബത്തിന്റെ ഏക ആശ്രയമായിരുന്നു സമീറെന്നും പ്രതികൾക്കെതിരെ കർശന നടപടി സ്വീകരിക്കണമെന്നും എഐഎംഐഎം ആവശ്യപ്പെട്ടു.

പെൺകുട്ടിയെ ശല്യം ചെയ്‌തെന്നാരോപണം; 18കാരനായ കോളജ് വിദ്യാർഥിയെ തല്ലിക്കൊന്നു

ബംഗളൂരു: വിവാഹക്കാര്യം സംസാരിക്കാനെന്ന വ്യാജേന വെള്ളച്ചാട്ടത്തിനരികിലേക്ക് വിളിച്ചുവരുത്തി 23കാരിയെ കഴുത്തുഞെരിച്ച് കൊലപ്പെടുത്തി യുവാവ്. കർണാടകയിലെ ഗോകാക് വെള്ളച്ചാട്ടത്തിന് സമീപമാണ് സംഭവം.സംസാരത്തിനിടെ ഇരുവരും തമ്മിൽ വാക്കേറ്റമുണ്ടാവുകയും തർക്കത്തിനൊടുവിൽ യുവതിയെ കൊലപ്പെടുത്തുകയുമായിരുന്നു. പിന്നാലെ മൃതദേഹം വെള്ളച്ചാട്ടത്തിന് സമീപത്തെ മലഞ്ചെരുവിൽ ഉപേക്ഷിച്ചു. ബെളഗാവി ജില്ലാ സ്വദേശിയായ 29കാരൻ ബസപ്പ സത്തന്നവരാണ് 23കാരിയായ രക്ഷിതയെ കൊലപ്പെടുത്തിയത്.
രക്ഷിതയും ബസപ്പയും തമ്മിൽ നാല് വർഷമായി പ്രണയത്തിലായിരുന്നുവെന്നും യുവതിക്ക് വിവാഹവാഗ്ദാനം നൽകിയിരുന്നുവെന്നും പൊലീസ് പറഞ്ഞു. വാക്കുതർക്കത്തിനിടെ രക്ഷിതയുടെ ചെവിയിൽ ആഞ്ഞടിച്ച ബസപ്പ പിന്നീട് കഴുത്തുഞെരിച്ച് കൊലപ്പെടുത്തുകയായിരുന്നു.രക്ഷിത വീട്ടിൽ തിരിച്ചെത്താതിരുന്നതിനെ തുടർന്ന് കുടുംബാംഗങ്ങൾ പൊലീസിനെ വിവരമറിയിച്ചു. തുടർന്ന് നടത്തിയ അന്വേഷണത്തിലാണ് കൊലപാതകവിവരം പുറത്തുവന്നത്. പ്രതിയെ പൊലീസ് അറസ്റ്റ് ചെയ്ത് ജുഡീഷ്യൽ കസ്റ്റഡിയിൽ വിട്ടു.

വിവാഹക്കാര്യം സംസാരിക്കാനെന്ന് വിളിച്ചുവരുത്തി; 23കാരിയെ കഴുത്തുഞെരിച്ച് കൊലപ്പെടുത്തി

കൊച്ചി: വഴിയിൽ കിടന്ന കേബിളിൽ കാൽ കുരുങ്ങി വീണ് ഗുരുതര പരിക്കേറ്റ വീട്ടമ്മ മരിച്ചു. കളമശേരി സ്വദേശി പുഷ്‌പി സേവ്യർ (68) ആണ് മരിച്ചത്. അപകടത്തെത്തുടർന്ന് സ്വകാര്യ ആശുപത്രിയിൽ ചികിത്സയിൽ കഴിയുന്നതിനിടെ ഇന്നലെയാണ് മരിച്ചത്
.പുഷ്‌പിയുടെ ചികിത്സയ്‌ക്കായി 18 ലക്ഷം രൂപ ചെലവായെന്നും കേബിൾ ഉടമകളിൽ നിന്ന് യാതൊരു സഹായവും ലഭിച്ചില്ലെന്നും കുടുംബം ആരോപിച്ചു. സെപ്‌തംബർ എട്ടിന് രാവിലെ 11 മണിയോടെയായിരുന്നു അപകടം. നോർത്ത് കളമശേരിയിലെ പത്താം പീയൂസ് പള്ളിക്ക് സമീപമുള്ള സെമിത്തേരിയിൽ പോയി മടങ്ങുന്നതിനിടെയാണ് പുഷ്‌പിക്ക് അപകടമുണ്ടായത്. ഭർത്താവ് സേവ്യറും ഒപ്പമുണ്ടായിരുന്നു. സെമിത്തേരിയുടെ ഗേറ്റിന് മുന്നിൽ നിലത്ത് കുറുകേ കിടന്നിരുന്ന കേബിളിൽ കാൽ കുടുങ്ങി പുഷ്‌പി തലയിടിച്ച് വീഴുകയായിരുന്നു.ഗുരുതരമായി പരിക്കേറ്റ പുഷ്‌പിയുടെ തലയിൽ നിന്ന് വലിയ രീതിയിൽ രക്തസ്രാവമുണ്ടായി. ഉടൻതന്നെ എറണാകുളത്തെ സ്വകാര്യ ആശുപത്രിയിൽ എത്തിച്ചു.വിദഗ്ദ്ധ ചികിത്സ നൽകാൻ ഡോക്‌ടർ ഇല്ലാതിരുന്നതിനാൽ മറ്റൊരു ആശുപത്രിയിലേക്ക് മാറ്റുകയായിരുന്നു.&nbsp;

വഴിയിൽ കിടന്ന കേബിളിൽ കാൽ കുരുങ്ങി തലയിടിച്ച് വീണു; പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു

Kerala

കൊയിലാണ്ടി: ചേമഞ്ചേരി റെയിൽവേ സ്റ്റേഷനിലെ സ്റ്റേഷൻ ഓഫീസിന്റെ പൂട്ട് പൊളിച്ച് മോഷണം. ടിക്കറ്റ് വിൽപ്പനയിലൂടെ ലഭിച്ച പണവും ഔദ്യോഗിക ആവശ്യത്തിന് ഉപയോഗിക്കുന്ന മൊബൈൽ ഫോണുമാണ് മോഷണം പോയത്.
ഇന്നലെ രാത്രി എട്ടിനും ഇന്ന് രാവിലെ ആറിനും ഇടയിലാണ് മോഷണം നടന്നതെന്നാണ് പൊലീസിന്റെ നിഗമനം. രാത്രി എട്ടിന് ജീവനക്കാർ ഓഫീസ് പൂട്ടി മടങ്ങിയിരുന്നു. ഇന്ന് രാവിലെ ജോലിക്കെത്തിയപ്പോഴാണ് ഓഫീസിന്റെ വാതിൽ തകർത്ത നിലയിൽ കണ്ടെത്തിയത്.തുടർന്ന് നടത്തിയ പരിശോധനയിലാണ് മോഷണവിവരം പുറത്തറിഞ്ഞത്.പ്രദേശത്തെ സിസിടിവി ദൃശ്യങ്ങൾ പരിശോധിച്ച് അന്വേഷണം തുടരുകയാണ്

ചേമഞ്ചേരി റെയിൽവേ സ്റ്റേഷൻ ഓഫീസിൽ മോഷണം; പണവും മൊബൈൽ ഫോണും കവർന്നു

Koyilandy

വടകര: വെള്ളി (06.11.2026) വൈകുന്നേരം 6 മണിക്കൂo 7 നും ഇടയിൽ വടകര സി.എം ആശുപത്രിയിൽ ഡോക്ടറെ കണ്ട് മടങ്ങവേ വടകരയ്ക്കും കീഴൽമുക്കിനും ഇടയിൽ സ്വർണ്ണ മാല നഷ്ടമായി. കണ്ടുകിട്ടുന്നവർ 9495178345 ഈ നമ്പറിൽ ബന്ധപ്പെടാൻ താല്പര്യം.&nbsp;

സ്വർണമാല നഷ്ടമായി

പ്രതീകാത്മക ചിത്രം

Vadakara

വടകര : കാഫിർ സ്ക്രീൻഷോട്ട് കേസ് ഇഴഞ്ഞ് നീങ്ങുന്നു . സോഷ്യൽമീഡിയയിൽ സ്ക്രീൻ ഷോട്ട് ഷെയർ ചെയ്തവരുടെ വിവരങ്ങൾ ലഭിക്കാൻ വൈകുന്നതാണ് പ്രധാന പ്രതിസന്ധി . സ്ക്രീൻഷോട്ട് നിർമ്മിച്ചവരിലേക്ക് അന്വേഷണം എത്തുന്നില്ലെന്ന് യൂത്ത് കോൺഗ്രസ് ആരോപിക്കുന്നു.
കഴിഞ്ഞ ലോക്‌സഭ തെരഞ്ഞെടുപ്പിൽ വടകര മണ്ഡലത്തിലെ എൽഡിഎഫ് സ്ഥാനാർഥി കെ . കെ ശൈലജ ടീച്ചർ കാഫിറാണെന്ന സ്ക്രീൻ ഷോട്ട് നിർമിച്ച് പ്രചരിപ്പിച്ചു എന്നാണ് കേസ്. ഡിവൈഎഫ്ഐ നേതാക്കളായ റിബേഷ് രാമകൃഷ്ണൻ , ജിതിൻ ഭാസ്കർ അമൽ എന്നിവരാണ് ആദ്യഘട്ടത്തിൽ അറസ്റ്റിലായത് . പിന്നീട് സാമൂഹ്യമാധ്യമങ്ങളിൽ സ്ക്രീൻ ഷോട്ട് ഷെയർ ചെയ്ത അതുൽ, അതുൽ പ്രസാദ് , വഹാബ് എന്നിവരെയും അറസറ്റ് ചെയ്തു . നിലവിൽ അന്വേഷണം ഇഴഞ്ഞ് നീങ്ങുകയാണ് .മെറ്റയിൽ നിന്നും വിവരങ്ങൾ ലഭ്യമാകുന്നില്ലെന്നാണ് പൊലീസ് വിശദീകരണം . മെറ്റക്ക് അപേക്ഷ നൽകിയിട്ടുണ്ടങ്കിലും അനന്തമായി വൈകുകയാണ്.&nbsp;

വടകര കാഫിർ സ്ക്രീന്‍ഷോട്ട് കേസ്;മെറ്റയില്‍ നിന്ന് വിവരങ്ങള്‍ കിട്ടാന്‍ വൈകുന്നെന്ന് പൊലീസ്