തിരുവനന്തപുരം: മന്ത്രി കെ.എം. ഷാജി സ്വകാര്യ വ്യക്തിയുടെ ഉടമസ്ഥതയിലുള്ള റേഞ്ച് റോവർ വാഹനം ഔദ്യോഗിക ആവശ്യത്തിന് ഉപയോഗിച്ചതിനെതിരെ മോട്ടോർ വാഹന കമ്മിഷണർക്ക് പരാതി. സെപ്റ്റംബർ 23ന് നൽകിയ പരാതിയിൽ ഇതുവരെ നടപടി ഉണ്ടായിട്ടില്ലെന്നാണ് ആരോപണം. സർക്കാർ ബോർഡും ചിഹ്നങ്ങളും പതിച്ച സ്വകാര്യ ആഡംബര വാഹനം ഔദ്യോഗിക ആവശ്യത്തിന് ഉപയോഗിച്ചത് മോട്ടോർ വാഹന നിയമങ്ങളുടെ ലംഘനമാണെന്ന് പരാതിയിൽ ചൂണ്ടിക്കാട്ടുന്നു.
1988ലെ മോട്ടോർ വെഹിക്കിൾ ആക്ടിലെ 39, 40, 41, 43, 52, 66 വകുപ്പുകളും 1989ലെ മോട്ടോർ വെഹിക്കിൾ റൂൾസിലെ 92 എ വകുപ്പും ലംഘിച്ചതിന് നടപടി സ്വീകരിക്കണമെന്നാണ് ആവശ്യം. ദേശീയ ചിഹ്നങ്ങളും പേരും ദുരുപയോഗം ചെയ്തതുമായി ബന്ധപ്പെട്ട നിയമപ്രകാരവും നടപടിയെടുക്കണമെന്നും പരാതിയിൽ ആവശ്യപ്പെടുന്നു.
ഭാരതീയ ന്യായ സംഹിതയിലെ 204, 205 വകുപ്പുകൾ പ്രകാരവും കുറ്റം ചെയ്തതായി പരാതിയിൽ ആരോപിക്കുന്നുണ്ട്. പരിശോധന നടത്തി നിയമലംഘനം കണ്ടെത്തിയാൽ വാഹനം പിടിച്ചെടുക്കണമെന്നും പരാതിക്കാരൻ ആവശ്യപ്പെട്ടു. ഹൈക്കോടതി അഭിഭാഷകനായ അതുൽ ടോമാണ് പരാതി നൽകിയത്. പരാതിയുടെ പകർപ്പ് കണ്ണൂർ ഇരിട്ടി ജോയിന്റ് ആർ.ടി.ഒയ്ക്കും കൈമാറിയിട്ടുണ്ട്.

കെ.എം. ഷാജിയുടെ റേഞ്ച് റോവർ ഉപയോഗം; മോട്ടോർ വാഹന കമ്മിഷണർക്ക് പരാതി

തിരുവനന്തപുരം : പഞ്ചാബിലെ ലവ്‌ലി പ്രൊഫഷണൽ യൂണിവേഴ്സിറ്റിയിൽ ഉണ്ടായ സംഭവങ്ങൾ അതീവ ഗൗരവത്തോടെ കാണണമെന്ന് പ്രതിപക്ഷ നേതാവ് പിണറായി വിജയൻ. ഒരു പെൺകുട്ടിക്ക് നേരെ ലൈംഗിക അതിക്രമം നടന്നുവെന്ന ആരോപണത്തെ തുടർന്നാണ് വിദ്യാർഥികൾ പ്രതിഷേധവുമായി രംഗത്തെത്തിയത്. എന്നാൽ സർവകലാശാലാ സ്ഥാപകനും ചാൻസലറുമായ ബിജെപി എംപി അശോക് കുമാർ മിത്തലും മാനേജ്മെന്റും പൊലീസിനെയും സംഘപരിവാർ പ്രവർത്തകരെയും ഉപയോഗിച്ച് പ്രതിഷേധം അടിച്ചമർത്താനാണ് ശ്രമിച്ചതെന്ന് പിണറായി വിജയൻ ആരോപിച്ചു.
സംഭവത്തിൽ ശക്തമായ പ്രതിഷേധം ഉയർന്നുവരണമെന്നും സമഗ്രവും സുതാര്യവുമായ അന്വേഷണത്തിലൂടെ നീതി ഉറപ്പാക്കണമെന്നും അദ്ദേഹം ആവശ്യപ്പെട്ടു. വിദ്യാർഥികൾ ഉന്നയിക്കുന്ന വിവിധ വിഷയങ്ങളിലും മാനേജ്മെന്റിന്റെ പങ്ക് സംബന്ധിച്ചും വിട്ടുവീഴ്ചയില്ലാത്ത അന്വേഷണം നടത്തണം. സംഘർഷത്തെ തുടർന്ന് 10 ദിവസത്തേക്ക് ക്ലാസുകൾ നിർത്തിവച്ച സാഹചര്യത്തിൽ സർവകലാശാലയിലെ 1500-ലധികം മലയാളി വിദ്യാർഥികളുടെ സുരക്ഷയും യാത്രാസൗകര്യവും ഉറപ്പാക്കണമെന്നും അദ്ദേഹം ആവശ്യപ്പെട്ടു.
ജലന്ധറിൽ നിന്ന് ഡൽഹിയിലേക്കും തുടർന്ന് കേരളത്തിലേക്കും വിദ്യാർഥികൾക്ക് സുരക്ഷിതമായി യാത്ര ചെയ്യാൻ കേന്ദ്ര-സംസ്ഥാന സർക്കാരുകൾ അടിയന്തരമായി ഇടപെടണം. ടിക്കറ്റ് ക്ഷാമം ഉണ്ടാകാൻ സാധ്യതയുള്ളതിനാൽ റെയിൽവേയുമായി ബന്ധപ്പെട്ട് പ്രത്യേക ട്രെയിനുകളോ അധിക കോച്ചുകളോ അനുവദിക്കുന്നതിന് നടപടി സ്വീകരിക്കണമെന്നും പിണറായി വിജയൻ ആവശ്യപ്പെട്ടു. വിദ്യാർഥികളുടെയും രക്ഷിതാക്കളുടെയും ആശങ്കകൾ അടിയന്തരമായി പരിഹരിക്കണമെന്നും അദ്ദേഹം പറഞ്ഞു

ലവ്‌ലി സർവകലാശാലയിലെ സംഘർഷം; മലയാളി വിദ്യാർഥികളുടെ സുരക്ഷ ഉറപ്പാക്കണമെന്ന് പ്രതിപക്ഷ നേതാവ് പിണറായി വിജയൻ

തിരുവനന്തപുരം: വലിയ രാഷ്ട്രീയ വിവാദങ്ങൾക്ക് വഴിവെച്ച നിയമസഭാ കയ്യാങ്കളി കേസിൽ 11 വർഷത്തിന് ശേഷം വിചാരണ നടപടികൾക്ക് തുടക്കമാകുന്നു. നവംബർ മൂന്നിന് തിരുവനന്തപുരം ചീഫ് ജുഡീഷ്യൽ മജിസ്‌ട്രേറ്റ് കോടതിയിലാണ് വിചാരണ ആരംഭിക്കുക. പ്രതികൾ നടത്തിയ നിയമപോരാട്ടങ്ങൾക്കൊടുവിലാണ് കേസ് ഇപ്പോൾ വിചാരണ ഘട്ടത്തിലെത്തുന്നത്.
2015 മാർച്ച് 13നാണ് കേസിനാസ്പദമായ സംഭവം നടന്നത്. അന്നത്തെ ധനമന്ത്രി കെ.എം. മാണി ബജറ്റ് അവതരിപ്പിക്കുന്നതിനിടെ പ്രതിപക്ഷ എംഎൽഎമാർ പ്രതിഷേധിച്ചതാണ് കേസിനിടയാക്കിയത്. നിയമസഭയിലെ പൊതുമുതൽ നശിപ്പിച്ചെന്നാരോപിച്ചാണ് പൊലീസ് കേസ് രജിസ്റ്റർ ചെയ്തത്.
ആദ്യഘട്ടത്തിൽ രണ്ട് സാക്ഷികളെയാണ് വിസ്തരിക്കുക. അന്നത്തെ നിയമസഭാ സെക്രട്ടറിയായിരുന്ന ശാരംഗധരനും സഭയിലെ ദൃശ്യങ്ങൾ പകർത്തിയ ഡിവിആർ കോപ്പി ചെയ്ത എൻജിനീയറുമാണ് ആദ്യ സാക്ഷികൾ. കേസിലെ പ്രധാന പ്രതികളിൽ വി. ശിവൻകുട്ടി, ഇ.പി. ജയരാജൻ, കെ.ടി. ജലീൽ, കെ. അജിത്, കെ. കുഞ്ഞഹമ്മദ്, സി.കെ. സദാശിവൻ എന്നിവരുണ്ട്.
കേസിൽ അഡ്വ. കെ. സന്തോഷ് കുമാറിനെ സ്പെഷ്യൽ പബ്ലിക് പ്രോസിക്യൂട്ടറായി നിയമിച്ചിട്ടുണ്ട്. വിചാരണ നടപടികൾ ആരംഭിക്കുന്നതോടെ വർഷങ്ങളായി തുടരുന്ന കേസിൽ കോടതി നടപടികൾ നിർണായക ഘട്ടത്തിലേക്ക് കടക്കുകയാണ്.

11 വർഷത്തിന് ശേഷം നിയമസഭാ കയ്യാങ്കളി കേസ് വിചാരണയിലേക്ക്; ആദ്യഘട്ടത്തിൽ രണ്ട് സാക്ഷികൾ

ഡൽഹി: ഡൽഹിയിൽ സ്ത്രീകൾക്കും പെൺകുട്ടികൾക്കും നേരെയുള്ള ലൈംഗികാതിക്രമ സംഭവങ്ങൾ വർധിക്കുന്നതിൽ ആശങ്ക രേഖപ്പെടുത്തി സുപ്രീംകോടതി സ്വമേധയാ കേസെടുത്തു. ജസ്റ്റിസുമാരായ ജെ.ബി. പർദിവാല, കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് വിഷയം പരിഗണിച്ചത്. സ്ത്രീകളുടെ സുരക്ഷ ഉറപ്പാക്കുന്നതിൽ നിയമപാലന സംവിധാനത്തിന്റെയും ഭരണകൂടത്തിന്റെയും വീഴ്ചകളാണ് ഇത്തരം സംഭവങ്ങൾ ചൂണ്ടിക്കാട്ടുന്നതെന്ന് കോടതി നിരീക്ഷിച്ചു.
ആസ്ഥ കുഞ്ജ് പാർക്കിൽ 17 വയസുകാരി കൂട്ടബലാത്സംഗത്തിനിരയായ സംഭവം, സ്വരൂപ് നഗറിൽ പ്രായപൂർത്തിയാകാത്ത പെൺകുട്ടി കൂട്ടബലാത്സംഗത്തിനിരയായ സംഭവം, ഗ്രേറ്റർ നോയിഡയിൽ നിന്ന് ഡൽഹിയിലേക്ക് സർവീസ് നടത്തിയ ബസിനുള്ളിൽ പെൺകുട്ടി ലൈംഗികാതിക്രമത്തിനിരയായ സംഭവം തുടങ്ങിയവ കോടതി പരിഗണിച്ചു. പാർക്കുകൾ, ബസുകൾ, മെട്രോ സ്റ്റേഷനുകൾ ഉൾപ്പെടെയുള്ള പൊതുസ്ഥലങ്ങൾ ഉയർന്ന അപകടസാധ്യതയുള്ള മേഖലകളായി മാറാൻ അനുവദിക്കാനാകില്ലെന്നും കോടതി വ്യക്തമാക്കി.
ഗ്രേറ്റർ നോയിഡയിൽ നിന്ന് ഡൽഹിയിലെ കാശ്മീരി ഗേറ്റിലേക്ക് ഏകദേശം 47 കിലോമീറ്റർ സഞ്ചരിച്ച ബസിനുള്ളിൽ പ്രായപൂർത്തിയാകാത്ത പെൺകുട്ടി ലൈംഗികാതിക്രമത്തിനിരയായ സംഭവത്തിലും കോടതി ആശങ്ക രേഖപ്പെടുത്തി. ബസ് നിരവധി പൊലീസ് ചെക്ക്‌പോസ്റ്റുകൾ കടന്നുപോയിട്ടും പരിശോധനയ്ക്ക് വിധേയമായില്ലെന്ന റിപ്പോർട്ടും കോടതി ചൂണ്ടിക്കാട്ടി. സംഭവം 2012ലെ നിർഭയ കേസിന്റെ ഓർമപ്പെടുത്തലാണെന്നും നിയമപാലന സംവിധാനത്തിൽ കാര്യമായ പുരോഗതി ഉണ്ടായിട്ടുണ്ടോ എന്ന് പരിശോധിക്കേണ്ട സമയമാണെന്നും കോടതി നിരീക്ഷിച്ചു.
കുറ്റകൃത്യങ്ങൾക്ക് ശേഷം ജനപ്രതിനിധികളും അധികാരികളും അനുശോചനവും പ്രസ്താവനകളും നടത്തുന്നത് മാത്രം മതിയാകില്ലെന്നും കോടതി വ്യക്തമാക്കി. കുറ്റകൃത്യങ്ങൾ തടയാനും പൊതുക്രമസമാധാനം ഉറപ്പാക്കാനും ദുർബല വിഭാഗങ്ങളെ സംരക്ഷിക്കാനും ഫലപ്രദമായ നടപടികൾ സ്വീകരിക്കണമെന്നും കോടതി നിർദേശിച്ചു.

ഡൽഹിയിൽ സ്ത്രീകൾക്കും പെൺകുട്ടികൾക്കും നേരെ അതിക്രമം; സ്വമേധയാ കേസെടുത്ത് സുപ്രീംകോടതി

National

ന്യൂഡൽഹി : 2,000 രൂപയ്ക്ക് മുകളിലുള്ള യുപിഐ ഇടപാടുകൾക്ക് മർച്ചന്റ് ഡിസ്കൗണ്ട് റേറ്റ് (എംഡിആർ) ഏർപ്പെടുത്താനുള്ള കേന്ദ്ര തീരുമാനത്തിനെതിരായ ഹർജിയിൽ ഇടക്കാല സ്റ്റേ നൽകാതെ സുപ്രീംകോടതി. അതേസമയം, ചാർജ് ഏർപ്പെടുത്തുന്നതിനുള്ള നിയമപരവും ഭരണപരവുമായ അടിസ്ഥാനമെന്തെന്ന് കേന്ദ്രസർക്കാരിനോടും റിസർവ് ബാങ്കിനോടും എൻപിസിഐയോടും കോടതി വിശദീകരണം തേടി. നാല് ആഴ്ചയ്ക്കകം മറുപടി നൽകാനും നിർദേശിച്ചു.
എംഡിആർ നികുതിയോ ഫീസോ അല്ലെന്ന കേന്ദ്രത്തിന്റെ വാദത്തോട് പ്രതികരിച്ച ജസ്റ്റിസ് ജോയ്മല്യ ബാഗ്ചി, വ്യാപാരിക്ക് ലഭിക്കുന്ന തുകയിൽ നിന്ന് തുക ഈടാക്കുന്നതിനുള്ള നിയമപരവും ഭരണപരവുമായ അടിസ്ഥാനമെന്തെന്നും ഏത് സേവനത്തിനാണ് തുക ഈടാക്കുന്നതെന്നും ചോദിച്ചു.
2,000 രൂപയ്ക്ക് മുകളിലുള്ള പേയ്മെന്റുകൾക്ക് എംഡിആർ ഏർപ്പെടുത്താനാണ് കേന്ദ്രത്തിന്റെ പുതിയ നീക്കം. നിലവിലെ നിർദേശപ്രകാരം വ്യക്തിയിൽ നിന്ന് വ്യക്തിയിലേക്കുള്ള യുപിഐ ഇടപാടുകൾ തുകയെത്രയായാലും സൗജന്യമായി തുടരും. വ്യാപാരികൾക്കുള്ള 2,000 രൂപ വരെയുള്ള യുപിഐ പേയ്മെന്റുകളും ചെറുകിട വ്യാപാരികൾക്ക് ലഭിക്കുന്ന ചില ഇടപാടുകളും സീറോ എംഡിആർ പരിധിയിൽ തുടരും.2,000 രൂപയ്ക്ക് മുകളിലുള്ള വ്യാപാരി ഇടപാടുകൾക്ക് സാധാരണ 0.4 ശതമാനമാണ് എംഡിആർ. പുതിയ നിരക്ക് ഒക്ടോബർ 15 മുതൽ പ്രാബല്യത്തിൽ വരുമെന്ന് കേന്ദ്രം കോടതിയെ അറിയിച്ചു.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് ഹർജി പരിഗണിച്ചത്.

യുപിഐ ഇടപാടുകൾക്ക് എംഡിആർ; കേന്ദ്ര തീരുമാനത്തിൽ സുപ്രീംകോടതി സ്റ്റേ ഇല്ല

തിരുവനന്തപുരം : വിവാഹ വിപണിക്ക് നേരിയ ആശ്വാസമായി സംസ്ഥാനത്ത് സ്വർണവിലയിൽ വീണ്ടും ഇടിവ്. ഇന്ന് പവന് 1840 രൂപയാണ് കുറഞ്ഞത്. ഇതോടെ ഒരു പവൻ സ്വർണത്തിന്റെ വില 1,11,960 രൂപയിൽ നിന്ന് 1,10,120 രൂപയായി. തുടർച്ചയായ രണ്ടാം ദിവസമാണ് സ്വർണവില കുറയുന്നത്. ഗ്രാമിന് 230 രൂപ കുറഞ്ഞ് 13,765 രൂപയായി.
ആഗസ്ത് ഏഴിനാണ് അവസാനമായി സ്വർണവില 1,10,000 രൂപയ്ക്ക് താഴെയെത്തിയത്. സെപ്റ്റംബറിൽ രേഖപ്പെടുത്തിയ ഏറ്റവും കുറഞ്ഞ വിലയും ഇതുതന്നെയാണ്. 24 കാരറ്റ് സ്വർണത്തിന് പവന് 1,20,136 രൂപയും ഗ്രാമിന് 15,017 രൂപയുമാണ് വില. 18 കാരറ്റിന് പവന് 90,104 രൂപയും ഗ്രാമിന് 11,263 രൂപയുമാണ്.
അന്താരാഷ്ട്ര വിപണിയിലെ ചലനങ്ങളാണ് സംസ്ഥാനത്തെ സ്വർണവിലയിലും ഏറ്റക്കുറച്ചിലുകൾക്ക് പ്രധാന കാരണം. ഡോളർ-രൂപ വിനിമയ നിരക്ക്, ഇറക്കുമതി തീരുവ, ക്രൂഡ് ഓയിൽ വില, ആഭ്യന്തര ഓഹരി വിപണിയിലെ മാറ്റങ്ങൾ തുടങ്ങിയ ഘടകങ്ങളും സ്വർണവിലയെ സ്വാധീനിക്കും.
പ്രാദേശികമായി പ്രവർത്തിക്കുന്ന ഗോൾഡ് അസോസിയേഷനുകളാണ് സംസ്ഥാനത്ത് സ്വർണവില നിശ്ചയിക്കുന്നത്. എന്നാൽ ആഗോള വിപണിയിലെ ചെറിയ മാറ്റങ്ങൾ പോലും ആഭ്യന്തര സ്വർണവിലയിൽ പ്രതിഫലിക്കാറുണ്ട്.

സ്വർണവിലയിൽ വീണ്ടും ഇടിവ്; പവന് 1840 രൂപ കുറഞ്ഞു

അമ്പലപ്പുഴ: കള്ളക്കടൽ പ്രതിഭാസത്തെ തുടർന്ന് അപ്രതീക്ഷിതമായി കടൽ കയറിയതോടെ ആലപ്പുഴ ജില്ലയിലെ തീരപ്രദേശങ്ങളിൽ ആശങ്ക. ഇന്നലെ വൈകിട്ടോടെ പുറക്കാട് മേഖലയിൽ ശക്തമായ തിരമാലകളാണ് അനുഭവപ്പെട്ടത്. കടൽക്ഷോഭത്തിൽപ്പെട്ട മത്സ്യത്തൊഴിലാളികൾ വള്ളങ്ങൾ സുരക്ഷിതമായി കരയ്ക്കടുപ്പിച്ച് രക്ഷപ്പെട്ടു.
തോട്ടപ്പള്ളി, പുറക്കാട്, ആനന്ദേശ്വരം, പറവൂർ, ഗലീലിയ, തുമ്പോളി തുടങ്ങിയ തീരപ്രദേശങ്ങളിൽ നിന്ന് മത്സ്യബന്ധനത്തിന് പോയ വള്ളങ്ങളാണ് അപ്രതീക്ഷിതമായി ഉയർന്ന ശക്തമായ തിരമാലകളിൽപ്പെട്ടത്. കൂറ്റൻ തിരമാലകൾ ഉയരുന്നത് ശ്രദ്ധയിൽപ്പെട്ടതോടെ വള്ളങ്ങൾ ഉടൻ കരയ്ക്കടുപ്പിക്കുകയായിരുന്നുവെന്ന് മത്സ്യത്തൊഴിലാളികൾ പറഞ്ഞു.
കള്ളക്കടൽ പ്രതിഭാസം സംബന്ധിച്ച് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിരുന്നെങ്കിലും ഇത് അവഗണിച്ചാണ് ചിലർ മത്സ്യബന്ധനത്തിന് പോയതെന്നാണ് വിവരം.
അതേസമയം, മുന്നറിയിപ്പ് നിലനിന്നിട്ടും തോട്ടപ്പള്ളി തീരദേശ പൊലീസ് ആവശ്യമായ സുരക്ഷാ നടപടികൾ സ്വീകരിച്ചില്ലെന്ന് മത്സ്യത്തൊഴിലാളി സംഘടനകൾ ആരോപിച്ചു. തീരദേശ മേഖലയെക്കുറിച്ച് മതിയായ പരിചയമില്ലാത്ത ചില ഉദ്യോഗസ്ഥർ ചുമതലയേറ്റതോടെ കടലിൽ പോകുന്ന തൊഴിലാളികൾക്ക് അടിയന്തര സാഹചര്യങ്ങളിൽ ആവശ്യമായ സഹായം ലഭിക്കുന്നില്ലെന്നും സംഘടനകൾ പരാതിപ്പെട്ടു.

കള്ളക്കടൽ പ്രതിഭാസം; ആലപ്പുഴ തീരത്ത് കൂറ്റൻ തിരമാലകൾ, മത്സ്യത്തൊഴിലാളികൾ വള്ളങ്ങൾ കരയ്ക്കടുപ്പിച്ചു

കൊച്ചി: താരസംഘടനയായ ‘അമ്മ’യിലെ തർക്കങ്ങളുമായി ബന്ധപ്പെട്ട പരാതികളിൽ പരിഹാസവുമായി ഹൈക്കോടതി. സംഘടനയുമായി ബന്ധപ്പെട്ട കേസുകൾ പരിഗണിക്കാൻ പ്രത്യേക കോടതി തന്നെ വേണ്ടിവരുമല്ലോ എന്നായിരുന്നു കോടതിയുടെ ചോദ്യം. സാധാരണക്കാരുടെ നിരവധി പ്രശ്‌നങ്ങൾ പരിഗണിക്കാനുള്ളപ്പോഴാണ് ഇത്തരം വിഷയങ്ങൾ തീർക്കാൻ സമയം ചെലവഴിക്കേണ്ടിവരുന്നതെന്നും കോടതി നിരീക്ഷിച്ചു.
തനിക്കെതിരായ കേസ് റദ്ദാക്കണമെന്നാവശ്യപ്പെട്ട് നടി ലക്ഷ്മിപ്രിയ നൽകിയ ഹർജി പരിഗണിക്കവെയാണ് ഹൈക്കോടതിയുടെ പരാമർശം. ഹർജിയിൽ സർക്കാരിന് കോടതി നോട്ടീസ് അയച്ചു. മൂന്നാഴ്ചയ്ക്ക് ശേഷം കേസ് വീണ്ടും പരിഗണിക്കും. കോടതി നിർദേശപ്രകാരം പൊലീസ് രജിസ്റ്റർ ചെയ്ത എഫ്.ഐ.ആർ റദ്ദാക്കണമെന്നാണ് ലക്ഷ്മിപ്രിയയുടെ ആവശ്യം.
സാമൂഹികമാധ്യമത്തിലൂടെ അപമാനിച്ചെന്ന പരാതിയിൽ പാലാരിവട്ടം പൊലീസ് കഴിഞ്ഞ ദിവസമാണ് ലക്ഷ്മിപ്രിയക്കെതിരെ കേസെടുത്തത്.
നടി അൻസിബ നൽകിയ സ്വകാര്യ അന്യായത്തെ തുടർന്നായിരുന്നു കോടതി നടപടി. ലക്ഷ്മിപ്രിയ വ്യക്തിഹത്യ നടത്തിയെന്നും സ്ത്രീത്വത്തെ അപമാനിക്കുന്ന തരത്തിലുള്ള പരാമർശങ്ങൾ നടത്തിയെന്നും ആരോപിച്ചാണ് അൻസിബ പൊലീസിനെ സമീപിച്ചത്. പരാതിയിൽ പൊലീസ് കേസെടുക്കാതിരുന്നതിനെ തുടർന്ന് അൻസിബ മജിസ്‌ട്രേറ്റ് കോടതിയെയും പിന്നീട് ഹൈക്കോടതിയെയും സമീപിക്കുകയായിരുന്നു.
പരാതി വീണ്ടും പരിശോധിക്കാൻ ഹൈക്കോടതി കീഴ്‌ക്കോടതിക്ക് നിർദേശം നൽകി. താരസംഘടനയായ ‘അമ്മ’യിലെ തർക്കങ്ങൾക്കിടെയാണ് അൻസിബയും ലക്ഷ്മിപ്രിയയും തമ്മിലുള്ള പ്രശ്‌നം പുറത്തുവന്നത്.

‘അമ്മ’യിലെ തർക്കങ്ങൾ; പരാതികളിൽ ഹൈക്കോടതിയുടെ പരിഹാസ പരാമർശം

കോഴിക്കോട്: വിനോദയാത്രയ്ക്ക് പോയ വിദ്യാർഥിനികളെ പീഡിപ്പിച്ച കേസിൽ അധ്യാപകൻ അറസ്റ്റിൽ. കുറ്റ്യാടി വേളം സ്വദേശി സലിത് (46) ആണ് അറസ്റ്റിലായത്. കോഴിക്കോട് വെങ്ങളത്ത് വെച്ച് എലത്തൂർ പൊലീസാണ് ഇയാളെ അറസ്റ്റ് ചെയ്തത്.
എലത്തൂർ പൊലീസ് സ്റ്റേഷനിൽ ഇയാൾക്കെതിരെ എട്ട് പോക്സോ കേസുകൾ രജിസ്റ്റർ ചെയ്തിട്ടുണ്ട്. സ്‌കൂളിൽനിന്ന് കൊടൈക്കനാലിലേക്ക് വിനോദയാത്ര പോയതിനിടെ എട്ട് വിദ്യാർഥിനികളെ പീഡിപ്പിച്ചെന്നാണ് കേസ്.

വിനോദയാത്രയ്ക്കിടെ വിദ്യാർഥിനികളെ പീഡിപ്പിച്ച അധ്യാപകൻ അറസ്റ്റിൽ; എട്ട് പോക്സോ കേസുകൾ

Kozhikode

തിരുവനന്തപുരം: സ്കൂളിലേക്ക് അനുജനൊപ്പം പോകുകയായിരുന്ന പതിനാലുകാരിയെ അച്ഛന്റെ സുഹൃത്താണെന്ന് വ്യാജമായി പരിചയപ്പെടുത്തി തട്ടിക്കൊണ്ടുപോയി പീഡിപ്പിച്ച കേസിൽ പ്രതിക്ക് 13 വർഷം കഠിനതടവും 40,000 രൂപ പിഴയും ശിക്ഷ. പന്തളം സ്വദേശി സദ്ദാം ഹുസൈൻ (കിച്ചാമണി, 35)നെയാണ് അതിവേഗ പ്രത്യേക കോടതി ജഡ്ജി അഞ്ജു മീര ബിർള ശിക്ഷിച്ചത്. പിഴ അടച്ചില്ലെങ്കിൽ മൂന്ന് വർഷവും ഒമ്പത് മാസവും അധികം ശിക്ഷ അനുഭവിക്കണം. പിഴത്തുകയും ലീഗൽ സർവീസ് അതോറിറ്റി നൽകുന്ന നഷ്ടപരിഹാരവും അതിജീവിതയ്ക്ക് നൽകണമെന്നും കോടതി വിധിയിൽ പറയുന്നു.
2025 ജനുവരി 24നാണ് കേസിനാസ്പദമായ സംഭവം നടന്നത്. രാവിലെ 7.45ഓടെ സ്കൂളിലേക്ക് നടന്നു പോകുകയായിരുന്ന അതിജീവിതയുടെയും അനുജന്റെയും അടുത്തേക്ക് ബൈക്കിലെത്തിയ പ്രതി, കുട്ടികളുടെ അച്ഛന്റെ സുഹൃത്താണെന്ന് പരിചയപ്പെടുത്തി. സ്കൂളിൽ കൊണ്ടുവിടാമെന്ന് പറഞ്ഞ് ഇരുവരെയും ബൈക്കിൽ കയറ്റി കൊണ്ടുപോയി. അനുജനെ പകുതിവഴിയിൽ ഇറക്കിയശേഷം ചോക്ലേറ്റ് വാങ്ങിത്തരാമെന്ന് പറഞ്ഞ് പെൺകുട്ടിയെ കടയിലെത്തിച്ചു.
ചോക്ലേറ്റ് വാങ്ങിയ ശേഷം കുട്ടിയെ തിരികെ കൊണ്ടുപോകുന്നതിനിടെ ഒരിടവഴിയിൽ ബൈക്ക് നിർത്തി ലൈംഗികാതിക്രമം നടത്തുകയായിരുന്നു. വിവരം പുറത്തുപറഞ്ഞാൽ കൊലപ്പെടുത്തുമെന്ന് ഭീഷണിപ്പെടുത്തുകയും ചെയ്തു.
തുടർന്ന് തിരിച്ചെത്തി അനുജനെയും ബൈക്കിൽ കയറ്റി ഇരുവരെയും സ്കൂളിൽ എത്തിച്ചു. വീട്ടുകാരുടെ സമ്മതമില്ലാതെ മറ്റൊരാളുടെ ബൈക്കിൽ കയറിയതിന് വീട്ടുകാർ വഴക്കുപറയുമെന്ന ഭയവും പ്രതിയുടെ ഭീഷണിയും കാരണം കുട്ടി സംഭവം ആദ്യം പുറത്തുപറഞ്ഞില്ല. കുട്ടിയുടെ മനോനിലയിൽ മാറ്റം ശ്രദ്ധിച്ച കൂട്ടുകാരി വിവരം തിരക്കിയപ്പോഴാണ് കുട്ടി സംഭവം പറഞ്ഞത്. തുടർന്ന് കൂട്ടുകാരി സ്കൂളിൽ വിവരം അറിയിച്ചതോടെയാണ് സംഭവം പുറത്തറിയുന്നത്.
സമാനമായ മറ്റൊരു കേസിലും പ്രതിക്കെതിരെ ഇതേ കോടതിയിൽ വിചാരണ നടക്കുന്നുണ്ട്. 12കാരിയെ അശ്ലീല ചിത്രങ്ങൾ കാണിച്ച് പീഡിപ്പിച്ച കേസിൽ കരുനാഗപ്പള്ളി കോടതി പ്രതിയെ നേരത്തെ ശിക്ഷിച്ചിരുന്നു. ഇതിന്റെ വിധിപ്പകർപ്പും പ്രോസിക്യൂഷൻ കോടതിയിൽ ഹാജരാക്കി.
പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ അഡ്വ. ആർ.എസ്. വിജയ് മോഹൻ, അഭിഭാഷകരായ വി.സി. ബിന്ദു, പി. സുരഭി എന്നിവർ ഹാജരായി. തുമ്പ പൊലീസ് ഇൻസ്‌പെക്ടർ ആർ. ബിനു, സബ് ഇൻസ്‌പെക്ടർ ആർ. ബിജു എന്നിവരാണ് കേസ് അന്വേഷിച്ചത്. പ്രോസിക്യൂഷൻ 31 സാക്ഷികളെ വിസ്തരിക്കുകയും 41 രേഖകളും എട്ട് തൊണ്ടിമുതലുകളും ഹാജരാക്കുകയും ചെയ്തു.

അച്ഛന്റെ സുഹൃത്താണെന്ന് തെറ്റിദ്ധരിപ്പിച്ച് 14കാരിയെ പീഡിപ്പിച്ചു; പ്രതിക്ക് 13 വർഷം കഠിനതടവ്

കൊച്ചി: എറണാകുളം പെരുമ്പാവൂരിൽ പോക്‌സോ കേസിൽ ജാമ്യത്തിലിറങ്ങിയ പ്രതി അതിജീവിതയെ ആക്രമിച്ചു. അറക്കപ്പടി പെരുമാനി സ്വദേശി മുഹമ്മദ് അദ്‌നാനാണ് ആക്രമണം നടത്തിയത്. കത്തികൊണ്ടുള്ള ആക്രമണത്തിൽ പെൺകുട്ടിയുടെ രണ്ട് കൈകൾക്കും മുറിവേറ്റു. ആക്രമണം തടയാൻ ശ്രമിച്ചവരെയും പ്രതി ആക്രമിച്ചു.
ഇന്നലെ ഉച്ചയ്ക്ക് രണ്ടരയോടെയായിരുന്നു സംഭവം. പെൺകുട്ടിയെ വലിച്ചിഴച്ച് വീടിന്റെ മുറ്റത്തെത്തിച്ച പ്രതി കഴുത്തിൽ കത്തിവെച്ച് കൊല്ലാൻ ശ്രമിക്കുകയായിരുന്നു. പെൺകുട്ടി തടയാൻ ശ്രമിക്കുന്നതിനിടെയാണ് കൈകൾക്ക് മുറിവേറ്റത്. നാട്ടുകാർ ഇടപെട്ടതോടെയാണ് വലിയ അപകടം ഒഴിവായത്.
സംഭവത്തിന് പിന്നാലെ പ്രതി സ്ഥലത്തുനിന്ന് ഓടി രക്ഷപ്പെടാൻ ശ്രമിച്ചെങ്കിലും നാട്ടുകാരും പൊലീസും ചേർന്ന് പിടികൂടുകയായിരുന്നു.കഴിഞ്ഞ ഓഗസ്റ്റ് മാസത്തിൽ പെൺകുട്ടിയോട് മോശമായി പെരുമാറിയതിനെ തുടർന്നാണ് ഇയാൾക്കെതിരെ പോക്‌സോ കേസ് രജിസ്റ്റർ ചെയ്തത്. റിമാൻഡിലായിരുന്ന ഇയാൾ ജാമ്യത്തിലിറങ്ങിയതിന് പിന്നാലെയാണ് അതിജീവിതയെ ആക്രമിച്ചത്.

പോക്‌സോ കേസിൽ ജാമ്യത്തിലിറങ്ങി; അതിജീവിതയെ കത്തിക്കൊണ്ട് ആക്രമിച്ച പ്രതി പിടിയിൽ

&nbsp;ഗാന്ധിനഗർ: ഗുജറാത്തിൽ അമിതവേഗത്തിലെത്തിയ കാർ നടപ്പാതയിലേക്ക് പാഞ്ഞുകയറി അമ്മയ്ക്കും മകനും ദാരുണാന്ത്യം. അപകടത്തിൽ മറ്റ് രണ്ടുപേർക്ക് ഗുരുതരമായി പരിക്കേറ്റു.അഹമ്മദാബാദിലെ നികോൽ മേഖലയിലെ ദേവസഹായ സ്കൂളിന് സമീപമാണ് സംഭവം. നടപ്പാതയിലിരുന്ന് സോഫാ കവറുകൾ വിൽക്കുകയായിരുന്ന പൂനംബെൻ നഗ്‌വാദിയയും മകൻ സാഗറും (15) ആണ് തൽക്ഷണം മരിച്ചത്. പൂനത്തിന്റെ പക്കൽനിന്ന് സോഫാ കവറുകൾ വാങ്ങാനെത്തിയ ദമ്പതികൾക്കാണ് കാർ ഇടിച്ച് ഗുരുതരമായി പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചു.
കാറോടിച്ചിരുന്ന വിരാൽഭായി സവ്ജിഭായി ചൗധരി (36)യെ പൊലീസ് അറസ്റ്റ് ചെയ്തു. വാഹനത്തിനുള്ളിൽ നടത്തിയ പരിശോധനയിൽ തുറക്കാത്ത ആറ് ബിയർ കാനുകൾ കണ്ടെത്തി. സംഭവസമയത്ത് ഇയാൾ മദ്യലഹരിയിലായിരുന്നുവെന്നാണ് പൊലീസ് പറയുന്നത്.
ബിഎൻഎസിലെ വിവിധ വകുപ്പുകൾക്ക് പുറമേ മദ്യനിരോധന നിയമപ്രകാരവും ചൗധരിക്കെതിരെ കേസെടുത്തു. മദ്യനിരോധനം നിലവിലുള്ള സംസ്ഥാനമാണ് ഗുജറാത്ത്.

അമിതവേഗത്തിലെത്തിയ കാർ നടപ്പാതയിലേക്ക് പാഞ്ഞുകയറി; അമ്മയ്ക്കും മകനും ദാരുണാന്ത്യം

വടകര : മണിയൂർ പോക്സോ കേസിലെ പ്രതിയുടെ ജാമ്യം റദ്ദാക്കി ഹൈക്കോടതി.ബാങ്ക് റോഡ് ചങ്ങരോത്ത് റഫീഖിന്റെ ജാമ്യമാണ് ഹൈക്കോടതി റദ്ദാക്കിയത്. ജാമ്യം റദ്ദാക്കിയ കീഴ്ക്കോടതി ഉത്തരവിനെതിരെ പ്രതി സമർപ്പിച്ച അപ്പീൽ തള്ളിയാണ് ഉത്തരവ് പുറപ്പെടുവിച്ചത്. ജാമ്യം റദ്ദാക്കപ്പെട്ടതിനെ തുടർന്ന്, പൊലീസ് പ്രതിയെ കസ്റ്റഡിയിലെടുത്തു.
നേരത്തേ, കൊയിലാണ്ടി ഫാസ്റ്റ് ട്രാക്ക് കോടതി പ്രതിയുടെ ജാമ്യം റദ്ദാക്കിയിരുന്നു. വിധി പ്രസ്താവം വന്നതോടെ ദിവസം ദേഹാസ്വാസ്ഥ്യം പ്രകടിപ്പിച്ച ഇയാളെ കോഴിക്കോട്ടെ സ്വകാര്യ ആശുപത്രിയിൽ പ്രവേശിപ്പിച്ചിരുന്നെങ്കിലും പിന്നീട് അവിടെനിന്നും മുങ്ങുകയായിരുന്നു.&nbsp;
പ്രതിയെ പിടികൂടുന്നതിൽ പൊലീസിന്റെ ഭാഗത്തുനിന്ന് വീഴ്‌ചയുണ്ടായെന്ന് ആരോപിച്ച് ആക്ഷൻ കമ്മിറ്റിയുടെ നേതൃത്വത്തിൽ പയ്യോളി പൊലീസ് സ്റ്റേഷന് മുന്നിൽ ശക്തമായ പ്രതിഷേധങ്ങൾ അരങ്ങേറിയിരുന്നു. ഇതിനിടയിലാണ് ഹൈക്കോടതിയുടെ പുതിയ ഉത്തരവിന്റെ അടിസ്ഥാനത്തിൽ പ്രതിയെ കസ്റ്റഡിയിലെടുത്തത്. ചെങ്ങോട്ടുകാവിൽ നിന്നുമാണ് ഇയാളെ കസ്റ്റഡിയിലെടുത്തത്. നിലവിൽ വൈദ്യ പരിശോധനയ്ക്കായി കൊയിലാണ്ടി താലൂക്ക് ഗവ. ആശുപത്രിയിലെത്തിച്ചിട്ടുണ്ട്.

മണിയൂർ പോക്സോ കേസ്: പ്രതിയുടെ ജാമ്യം റദ്ദാക്കി,പോലീസ് കസ്റ്റഡിയിലെടുത്തു

Vadakara

കോഴിക്കോട്: യുവാവിനെ കാപ്പ പ്രകാരം അറസ്റ്റ് ചെയ്തു. സാമൂഹിക വിരുദ്ധ പ്രവർത്തനങ്ങൾ (തടയൽ) നിയമപ്രകാരം (കാപ്പ) കോഴിക്കോട് ജില്ലാ കളക്ടർ പുറപ്പെടുവിച്ച കരുതൽ തടങ്കൽ ഉത്തരവിന്റെ അടിസ്ഥാനത്തിൽ കൊടുവള്ളി എളേറ്റിൽ വട്ടോളി കരിമ്പാപൊയിൽ ഫായിസ് മുഹമ്മദ് കെ.പി. (29) നെയാണ് അറസ്റ്റ് ചെയ്തത്. വിയ്യൂർ ഹൈ സെക്യൂരിറ്റി ജയിലിൽ വെച്ച് കൊടുവള്ളി പോലീസ് സ്റ്റേഷൻ എസ്.എച്ച്.ഒ. ഇയാളുടെ അറസ്റ്റ് രേഖപ്പെടുത്തുകയായിരുന്നു. തുടർന്ന് കരുതൽ തടങ്കലിൽ പാർപ്പിക്കുന്നതിനായി കണ്ണൂർ സെൻട്രൽ ജയിലിലേക്ക് മാറ്റി.

കാപ്പ പ്രകാരം യുവാവിനെ അറസ്റ്റ് ചെയ്തു