കോഴിക്കോട്: മദ്യാസക്തിയിൽ സഹയാത്രികരുടെ ബാ​ഗുകൾ ട്രെയിനിൽ നിന്ന് പുറത്തേക്ക് വലിച്ചെറിഞ്ഞയാളെ യാത്രക്കാർ ചേർന്ന് ആർ.പി.എഫിന് കൈമാറി. ബുധനാഴ്ച കൊച്ചുവേളി സൂപ്പർ ഫാസ്റ്റ് എക്സ്പ്രസിലാണ് സംഭവം. കോഴിക്കോട്ട് നിന്നുള്ള ആറ് വിദ്യാർഥികളുടെ ബാ​ഗാണ് മദ്യപൻ ഓടിക്കൊണ്ടിരുന്ന ട്രെയിനിൽ നിന്നും വലിച്ചെറിഞ്ഞത്.

പത്തനംതിട്ടയിൽ നടക്കുന്ന പവർലിഫ്റ്റിംങ് ചാമ്പ്യൻഷിപ്പിൽ പങ്കെടുക്കാൻ പോവുകയായിരുന്നു വിദ്യാർഥികൾ. മത്സരിക്കാനുള്ള ഉപകരണങ്ങൾ അടങ്ങിയ ബാ​ഗുകൾ ഇവർ ട്രെയിനിന്റെ ശുചിമുറിക്ക് സമീപം വെച്ചിരുന്നു. കടലുണ്ടിക്ക് അടുത്ത് എത്തിയപ്പോളാണ് മദ്യപിച്ചെത്തിയ ഒരാൾ വന്ന് ബാ​ഗുകൾ എടുത്ത് പുറത്തേക്ക് എറിഞ്ഞത്. തുടർന്ന് മറ്റ് യാത്രക്കാർ ഇയാളെ തടഞ്ഞ് വെക്കുകയും തിരൂരിൽ വെച്ച് ആർ.പി.എഫിന് കൈമാറുകയുമായിരുന്നു. വലിച്ചെറിഞ്ഞ മൂന്ന് ബാ​ഗുകളും കണ്ടെത്തിയെങ്കിലും ചെളി നിറഞ്ഞ ചതുപ്പിൽ വീണതിനാൽ ബാ​ഗിലുണ്ടായിരുന്ന സാധനങ്ങളെല്ലാം ഉപയോ​ഗ ശൂന്യമായി.