നാദാപുരം : ലഹരി കേസുകളിലും മറ്റും പ്രതിയായതോടെ കാപ്പ ചുമത്തി നാട് കടത്തിയ പ്രതി എം ഡി എം എ ശേഖരവുമായി പോലീസ് പിടിയിലായി. പാറക്കടവ് ചെക്യാട് സ്വദേശി കുറ്റിയിൽ നംഷീദ്നെയാണ് വളയം പോലീസും, റൂറൽ എസ് പി യുടെ ഡാൻസാഫ് അംഗങ്ങളും ചേർന്ന് പിടികൂടിയത്.പ്രതിയിൽ നിന്ന് മേഖലയിൽ വിൽപ്പനക്കെത്തിച്ച 21.250 ഗ്രാം എം ഡി എം എ യും, 72 ഗ്രാം ഹൈബ്രിഡ് കഞ്ചാവും പിടികൂടി. ശരിരത്തിൽ ഒളിപ്പിച്ച് വെച്ച നിലയിലായിരുന്നു മയക്ക് മരുന്ന് ശേഖരം.

കെ.എൽ 60 സി 96 നമ്പർ വോക്സ് വാഗൺ കാറിൽ മയക്ക് മരുന്ന് കടത്തുന്നുണ്ടെന്ന രഹസ്യ വിവരത്തെ തുടർന്ന് ഡാൻസാഫ് അംഗങ്ങൾ കാറിനെ പിന്തുടരുകയും പാനൂർ - പാറക്കടവ് റോഡിൽ താനിയത്ത് മുക്കിൽ പ്രതി സഞ്ചരിച്ച കാറിന് മുന്നിൽ മറ്റൊരു കാർ നിർത്തി പിടികൂടുകയായിരുന്നു. വളയം, നാദാപുരം സ്‌റ്റേഷനുകളിൽ ലഹരി കേസിൽ പ്രതിയാണ് നംഷീദ്. 2024 നവംബർ വരെ ജില്ലയിൽ പ്രവേശനം നിഷേധിച്ച് ഉത്തരവ് ഇറക്കിയിരുന്നു. എന്നാൽ പ്രതി മേഖലയിൽ പല സ്ഥലങ്ങളിലും വരുന്നുണ്ടെന്ന വിവരത്തെ തുടർന്ന് ദിവസങ്ങളായി നിരീക്ഷണത്തിലായിരുന്നു. ഇതിന് പിന്നാലെയാണ് പിടിയിലായത്. വളയം എസ് ഐ എം.പി.വിഷ്ണു, ഡാൻസാഫ് എ എസ് ഐ മാരായ മനോജ് രാമത്ത്, വി.വി.ഷാജി, വി.സി.ബിനീഷ്, വള്ളിൽ സദാനന്ദൻ, ഇ.കെ.മുനീർ, കെ.ലതീഷ്, സി പി ഒ മാരായ ഇ.കെ.അഖിലേഷ്, ടി.കെ.ശോഭിത്ത് തുടങ്ങിയവർ പരിശോധനക്ക് നേതൃത്വം നൽകി.