കണ്ണിൽ ചെറിയ പൊടിയോ നിസാരമായ പരിക്കോ ഏറ്റാൽ പലപ്പോഴും ആളുകൾ അത് കാര്യമായി എടുക്കാറില്ല. എന്നാൽ ഇത്തരം പരിക്കുകൾ ചിലപ്പോൾ മാസങ്ങൾക്കുശേഷം പോലും ഗുരുതരമായ ആരോഗ്യപ്രശ്നങ്ങൾക്ക് കാരണമാകാം. റഷ്യയിലെ സൈബീരിയയിൽ 42കാരനായ ഒരാൾക്കുണ്ടായ അനുഭവം ഇതിന് ഉദാഹരണമാണ്. കണ്ണിൽ മരക്കൊമ്പ് തട്ടിയതിനെ തുടർന്ന് ചെറിയൊരു മരത്തൊലി കഷണം പുറത്തെടുത്തെങ്കിലും കണ്ണിനുള്ളിൽ കുടുങ്ങിയ വിത്ത് മുളച്ച് വേരുകൾ വളരുകയായിരുന്നു. നാല് മാസത്തോളം നീണ്ട തലവേദനയ്ക്കും കണ്ണിലെ വീക്കത്തിനും കാഴ്ചപ്രശ്നങ്ങൾക്കും പിന്നാലെയാണ് ഇക്കാര്യം കണ്ടെത്തിയത്.

സുഹൃത്തിനെ സന്ദർശിക്കാനും മീൻപിടിക്കാനും കാട്ടുപഴങ്ങൾ ശേഖരിക്കാനുമായി സൈബീരിയയിലെ അബിയിസ്കി ജില്ലയിലേക്ക് നടത്തിയ യാത്രയ്ക്കിടെയാണ് മാക്‌സിം സ്ലെപ്‌സോവിന് കണ്ണിന് പരിക്കേറ്റത്. യാത്രയ്ക്കിടെ മരക്കൊമ്പ് കണ്ണിൽ തട്ടുകയായിരുന്നു. വെള്ളം ഉപയോഗിച്ച് കണ്ണ് കഴുകിയപ്പോൾ ചെറിയൊരു മരത്തൊലി കഷണം പുറത്തുവന്നു. ഇതോടെ പ്രശ്നം അവസാനിച്ചെന്നാണ് അദ്ദേഹം കരുതിയത്. എന്നാൽ കണ്ണിനുള്ളിൽ ഒരു വിത്ത് അവശേഷിച്ച കാര്യം അറിഞ്ഞിരുന്നില്ല.

നാല് മാസത്തോളം നീണ്ട അസ്വസ്ഥതകൾ

തുടർന്നുള്ള മാസങ്ങളിൽ കടുത്ത തലവേദന, കണ്ണിലെ വീക്കം, കാഴ്ച മങ്ങൽ തുടങ്ങിയ പ്രശ്നങ്ങൾ അനുഭവപ്പെട്ടു. വിദൂരപ്രദേശത്ത് താമസിച്ചിരുന്നതിനാൽ വിദഗ്ധ ചികിത്സ തേടുന്നതും ബുദ്ധിമുട്ടായി. ഒടുവിൽ യാകുത്സ്കിലെ അടിയന്തര നേത്രചികിത്സാ കേന്ദ്രത്തിലെത്തിയപ്പോഴാണ് കണ്ണിനുള്ളിൽ കുടുങ്ങിയ വിത്ത് മുളച്ചുതുടങ്ങിയതായി കണ്ടെത്തിയത്.

വിത്തിന്റെ വേരുകൾ ഏകദേശം മൂന്ന് മില്ലിമീറ്ററോളം വളർന്ന് കണ്ണിന്റെ വെള്ളഭാഗത്തെ പൊതിയുന്ന നേർത്ത പാളിയായ കൺജങ്റ്റൈവയിലെ കോശങ്ങളിലേക്ക് തുളച്ചുകയറാൻ തുടങ്ങിയിരുന്നു. ശസ്ത്രക്രിയയിലൂടെ വിത്ത് നീക്കം ചെയ്തതോടെ മാക്‌സിമിന്റെ തലവേദനയ്ക്ക് ആശ്വാസം ലഭിച്ചതായാണ് റിപ്പോർട്ടുകൾ.

കണ്ണിലെ പരിക്കുകൾ അവഗണിക്കരുത്

കണ്ണിൽ എന്തെങ്കിലും വസ്തു തട്ടുകയോ കുടുങ്ങുകയോ ചെയ്താൽ സ്വയം പുറത്തെടുക്കാൻ ശ്രമിക്കുന്നത് അപകടകരമാണ്. തുടർച്ചയായ വേദന, ചുവപ്പ്, വീക്കം, കാഴ്ച മങ്ങൽ, കണ്ണിൽ എന്തോ കുടുങ്ങിയതുപോലുള്ള തോന്നൽ തുടങ്ങിയ ലക്ഷണങ്ങൾ ഉണ്ടായാൽ നേത്രരോഗവിദഗ്ധന്റെ സഹായം തേടണം. പ്രത്യേകിച്ച് കാഴ്ചയിൽ മാറ്റമുണ്ടാകുകയോ വേദനയും വീക്കവും തുടരുകയോ ചെയ്താൽ ചികിത്സ വൈകിക്കരുത്.

കണ്ണിനുള്ളിൽ കുടുങ്ങിയ വിത്ത് മുളച്ച് വേരുകൾ വളർന്ന അപൂർവ സംഭവം മാത്രമല്ല മാക്‌സിമിന്റെ അനുഭവം. കണ്ണിനേൽക്കുന്ന ചെറിയ പരിക്കുകൾ പോലും നിസാരമായി കാണരുതെന്ന മുന്നറിയിപ്പ് കൂടിയാണിത്.