തിരൂർ: കടിച്ച പാമ്പിനെ പിടിച്ച് കുപ്പിയിലാക്കി ആശുപത്രിയിലേക്ക് കൊണ്ടുവന്ന് യുവാവ്. മലപ്പുറം ആനപ്പടി സ്വദേശിയായ നാസിമാണ് തന്നെ കടിച്ച നീർക്കോലിയുമായി ആശുപത്രിയിൽ എത്തിയത്.

ചൊവ്വാഴ്ച വൈകീട്ടോടേയാണ് സംഭവം. വീട്ടിലേക്ക് വരുന്ന വഴിയിലാണ് നാസിമിന് പാമ്പിന്റെ കടിയേറ്റത്. ഉടൻ തന്നെ പാമ്പിനെ പിടികൂടുകയായിരുന്നു. തുടർന്ന് സുഹൃത്തുക്കളോടൊപ്പം പാമ്പുമായി തിരൂർ ജില്ലാ ആശുപത്രിയിൽ എത്തി.പാമ്പിനെ പരിശോധിച്ചപ്പോഴാണ് വിഷമില്ലാത്ത നീർക്കോലിയാണ് കടിച്ചത് എന്ന കാര്യം വ്യക്തമായത്. കാര്യമായ ആരോഗ്യ പ്രശ്നങ്ങൾ ഇല്ലാത്തതിനാൽ ആശുപത്രിയിൽ നിരീക്ഷണത്തിൽ വെച്ച ശേഷം വിട്ടയച്ചു.