നാദാപുരം : ചെക്യാട് താനക്കോട്ടൂരിൽ ഭാര്യയെ വെട്ടിയും കുത്തിയും പരിക്കേൽപ്പിച്ച കേസിൽ ഭർത്താവ് അറസ്റ്റിൽ. മാവുള്ളതിൽ ഹാരിസ് ( 48) നെയാണ് വളയം എസ് എച്ച് ഒ ഇ.വി.ഫായിസ് അലി അറസ്റ്റ് ചെയ്തത്. ഹാരിസിൻ്റെ ഭാര്യ നസീറ (41 ) ക്കാണ് കുത്തേറ്റത്. തിങ്കളാഴ്ച്ച രാത്രി 9.45 ഓടെയാണ് സംഭവം. വീട്ടിൽ വച്ച് ഹാരിസും ഭാര്യ നസീറയും തമ്മിൽ വഴക്കുണ്ടാവുകയും പ്രകോപിതനായ ഹാരിസ് കത്തിയെടുത്ത് കുത്തുകയുമായിരുന്നു. വയറിനും കൈക്കും ഗുരുതര പരിക്കേറ്റ നസീറയെ പാറക്കടവ് സ്വകാര്യ ആശുപത്രിയിൽ പ്രാഥമിക ചികിസ നൽകിയ ശേഷം മലബാർ മെഡിക്കൽ കോളജിലേക്ക് മാറ്റുകയായിരുന്നു. 

വളയം പോലീസ് സ്ഥലത്തെത്തി ഹാരിസിനെ കസ്റ്റഡിയിലെടുക്കുകയും വധശ്രമം ഉൾപ്പെടെയുള്ള വകുപ്പുകൾ ചേർത്ത് കേസെടുത്ത് അറസ്റ്റ് ചെയ്യുകയുമായിരുന്നു. കോടതിയിൽ ഹാജരാക്കിയ പ്രതിയെ രണ്ടാഴ്ച്ചത്തേക്ക് റിമാൻ്റ ചെയ്തു. കുടുംബ പ്രശ്നമാണ് സംഭവത്തിന് പിന്നിലെന്ന് പോലീസ് പറഞ്ഞു.