തിരുവനന്തപുരം: സംസ്ഥാന സിവിൽ സപ്ലൈസ്‌ കോർപറേഷൻ കർഷകരിൽനിന്ന്‌ സംഭരിച്ച നെല്ലിന്റെ സബ്‌സിഡിയായി 175 കോടി രൂപ അനുവദിച്ചതായി ധനകാര്യ മന്ത്രി കെ.എൻ ബാലഗോപാൽ അറിയിച്ചു. നെല്ല്‌ സംഭരണത്തിനുള്ള കേന്ദ്ര സർക്കാരിന്റെ താങ്ങുവില സഹായ കുടിശിക അനുവദിക്കാത്ത സാഹചര്യത്തിലാണ് സംസ്ഥാനം അടിയന്തിരമായി തുക ലഭ്യമാക്കിയത്‌.
കേന്ദ്രത്തിന്റെ താങ്ങുവില സഹായത്തിൽ 900 കോടി രൂപ കുടിശികയാണ്‌. 2017 മുതലുള്ള കുടിശിക തുകയാണിത്‌. കേന്ദ്ര സർക്കാർ വിഹിതത്തിന്‌ കാത്തുനിൽക്കാതെ, നെല്ല്‌ സംഭരിക്കുമ്പോൾതന്നെ കർഷകർക്ക് വില നൽകുന്നതാണ്‌ കേരളത്തിലെ രീതി. മറ്റ്‌ സംസ്ഥാനങ്ങളിൽ കേന്ദ്ര സർക്കാർ താങ്ങുവില നൽകുമ്പോൾ മാത്രമാണ്‌ കർഷകന്‌ നെൽവില ലഭിക്കുന്നത്‌.കേരളത്തിൽ പി.ആർ.എസ്‌ വായ്‌പ പദ്ധതിയിൽ കർഷകന്‌ നെൽ വില ബാങ്കിൽനിന്ന്‌ ലഭിക്കും.&nbsp;

നെല്ല്‌ സംഭരണത്തിനായി സപ്ലൈക്കോക്ക്‌ 175 കോടി രൂപ അനുവദിച്ചു

ലൈംഗികത ഉപേക്ഷിച്ചാൽ ആരോഗ്യവും കുറയും.ആരോഗ്യകരമായ ഒരു ബന്ധത്തിൽ ലൈംഗികത പ്രധാനമാണ്. ലൈംഗികത ഒരാളുടെ ആരോഗ്യം മെച്ചപ്പെടുത്തും.എന്തുകൊണ്ടാണ്, എങ്ങനെയെല്ലാമാണ് ലൈംഗികത ആരോഗ്യമേകുന്നത് എന്നറിയാം.
∙ സമ്മർദം അകറ്റുന്നു
നമ്മൾ സമ്മർദത്തിലായിരിക്കുമ്പോൾ ലൈംഗികതയെക്കുറിച്ച് ചിന്തിക്കുകയേയില്ല. എന്നാൽ ഏറ്റവും നല്ല സ്ട്രെസ് റിലീവർ ലൈംഗികത ആണെന്നറിയുമോ? ലൈംഗികബന്ധത്തിലേർപ്പെടുമ്പോൾ എല്ലാ ‘ഫീൽ ഗുഡ് കെമിക്കൽസും’ തലച്ചോറിലെത്തുന്നു. ഇതേ സമയം സ്ട്രെസ് ഹോർമോണായ കോർട്ടിസോളിന്റെ അളവ് കുറയുന്നു. ലൈംഗികതയുടെ സമയത്ത് രതിമൂർച്ഛയ്ക്കു ശേഷം ഡോപാമിൻ, എൻഡോർഫിൻ, ഓക്സിടോസിൻ തുടങ്ങിയ ഹോർമോണുകൾ എല്ലാം റിലീസ് ചെയ്യപ്പെടുന്നു. ഡോപാമിൻ തലച്ചോറിനെ ഉണർവുള്ളതാക്കുന്നു. എൻഡോർഫിൻ സമ്മർദവും വേദനയും അകറ്റുന്നു.
∙ മനോനില മെച്ചപ്പെടുത്തുന്നു
30,000 അമേരിക്കക്കാരായ സ്ത്രീ പുരുഷന്മാരിൽ നടത്തിയ ഒരു പഠനത്തിൽ ആഴ്ചയിൽ ഒരിക്കലെങ്കിലും ലൈംഗികബന്ധത്തിൽ ഏർപ്പെടുന്നവർ സന്തുഷ്ടരായിരിക്കുമെന്നു കണ്ടു.
ലൈംഗികതയുടെ സമയത്തുണ്ടാകുന്ന ഓക്സിടോസിൻ എന്ന ഹോർമോൺ ആണ് സൗഖ്യവും സന്തോഷവും ഏകുന്നത്. ശാരീരിക ബന്ധത്തിൽ ഏർപ്പെട്ടില്ലെങ്കിൽ കൂടി കൈ ചേർത്തു പിടിക്കുക, കെട്ടിപ്പിടിക്കുക, ചുംബിക്കുക ഇവയെല്ലാം തന്നെ സന്തോഷമേകുമെന്ന് മുതിർന്ന വ്യക്തികളിൽ നടത്തിയ പഠനങ്ങളിലും തെളിഞ്ഞിട്ടുണ്ട്. ദമ്പതികൾക്കിടയിലെ ലൈംഗികത മാനസികാരോഗ്യമേകും.
∙ രോഗപ്രതിരോധ ശക്തി മെച്ചപ്പെടുത്തും
പതിവായ ലൈംഗികത രോഗങ്ങളെ അകറ്റും. ഇമ്മ്യൂണോഗ്ലോബുലിന്റെ അളവ് കൂടാൻ ലൈംഗികത സഹായിക്കും. ഇത് രോഗപ്രതിരോധ ശക്തി മെച്ചപ്പെടുത്തും.
ഹൃദയാരോഗ്യമേകുന്നു
ആഴ്ചയിൽ രണ്ടു തവണ എങ്കിലും ലൈംഗികബന്ധത്തിലേർപ്പെടുന്നവർക്ക് മാസത്തിൽ ഒരു തവണ ലൈംഗികതയിൽ ഏർപ്പെടുന്നവരെക്കാൾ ഹൃദ്രോഗം വരാനുള്ള സാധ്യത 45 ശതമാനം കുറവാണെന്ന് ന്യൂ ഇംഗ്ലണ്ട് റിസേർച്ച് ഇൻസ്റ്റിറ്റ്യൂട്ടിന്റെ പഠനത്തിൽ പറയുന്നു. 1987 ൽ തുടങ്ങി 17 വർഷം നീണ്ട ഈ പഠനം 40 മുതൽ 70 വയസ്സുവരെ പ്രായമുള്ള ആയിരം പുരുഷന്മാരിലാണ് നടത്തിയത്.സ്ത്രീകൾക്കും ലൈംഗികത ഹൃദയാരോഗ്യം നൽകും. കൂടാതെ രക്താതിമർദം വരാനുള്ള സാധ്യതയും കുറയും.
∙ അടുപ്പം കൂട്ടുന്നു
ജീവിതത്തിൽ സ്നേഹം എത്ര വേണമോ പങ്കാളിയുമൊത്ത് അത്രയും ലൈംഗികബന്ധവും ആകാം. ലൈംഗികത പങ്കാളിയുമായുള്ള അടുപ്പം കൂട്ടുന്നു. ലൈംഗികബന്ധത്തിനു ശേഷം പങ്കാളിയോടു തോന്നുന്ന അടുപ്പം ആഴ്ചകളോളം നിലനിൽക്കും. ലൈംഗികബന്ധത്തിലേർപ്പെട്ടില്ലെങ്കിലും പരസ്പരമുള്ള സ്നേഹ പ്രകടനങ്ങൾ, ബന്ധം ഊഷ്മളമാക്കും.
∙ ലൈംഗികത എന്ന വ്യായാമം
അരമണിക്കൂർ ലൈംഗികതയ്ക്കായി ചെലവിടുന്നത് ഒരു പരിധി വരെ വ്യായാമം തന്നെയാണ്. അരമണിക്കൂർ ലൈംഗികബന്ധം 85 കാലറി കത്തിച്ചു കളയുമെന്നാണ് പഠനങ്ങൾ പറയുന്നത്. മണിക്കൂറിൽ 4.5 കിലോ മീറ്റർ നടക്കുന്നതിനും 8 കി. മീറ്റർ ജോഗിങ് ചെയ്യുന്നതിനും തുല്യമാണത്രേ ലൈംഗികബന്ധം.

ലൈംഗികതയിലൂടെ ലഭിക്കുന്ന ആരോഗ്യ ഗുണങ്ങൾ അറിയാം

Health

കൊല്‍ക്കത്ത: ഒരുവര്‍ഷത്തോളം നീണ്ട ഇടവേളയ്ക്കുശേഷം പേസ് ബൗളര്‍ മുഹമ്മദ് ഷമി മത്സരക്രിക്കറ്റിലേക്ക് തിരിച്ചെത്തുന്നു. ബുധനാഴ്ച തുടങ്ങുന്ന രഞ്ജി ട്രോഫി ക്രിക്കറ്റില്‍ മധ്യപ്രദേശിനെതിരേ ബംഗാള്‍ ടീമിനുവേണ്ടി ഷമി കളിക്കുമെന്നാണ് റിപ്പോര്‍ട്ട്. ഇന്ദോറിലാണ് മത്സരം.
കഴിഞ്ഞവര്‍ഷം ഇന്ത്യയില്‍നടന്ന ഏകദിന ക്രിക്കറ്റ് ലോകകപ്പിലാണ് ഷമി ഒടുവില്‍ ഇന്ത്യക്കുവേണ്ടി കളിച്ചത്. ലോകകപ്പില്‍ കൂടുതല്‍ വിക്കറ്റ് നേടിയത് ഷമിയായിരുന്നു. നവംബര്‍ 19-നുനടന്ന ഫൈനലിനിടെ പരിക്കേറ്റ ഷമി ഏറെക്കാലം ചികിത്സയിലായിരുന്നു. ദേശീയ ക്രിക്കറ്റ് അക്കാദമിയില്‍ പരിശീലനം നടത്തി ഫിറ്റ്‌നസ് വീണ്ടെടുത്ത ശേഷമാണ് 34-കാരന്‍ മത്സരങ്ങളിലേക്ക് തിരിച്ചെത്തുന്നത്.&nbsp;

ഒരുവര്‍ഷത്തോളം നീണ്ട ഇടവേളയ്ക്ക് വിരാമം;ഷമി തിരിച്ചെത്തുന്നു

കണ്ണൂർ: ഇ.പി ജയരാജനുമായി ബന്ധപ്പെട്ടുണ്ടായ ആത്മകഥാ വിവാദത്തിൽ പ്രതികരിച്ച് സി.പി.എം സംസ്ഥാന സെക്രട്ടറി എം.വി ​ഗോവിന്ദൻ. ജയരാജന്‍ പറയുന്നത് വിശ്വസിക്കുക എന്നതാണ് പാര്‍ട്ടിക്ക് ചെയ്യാന്‍ കഴിയുന്നത്. ഈ വിവാദം ഉപതിരഞ്ഞെടുപ്പിനെ ബാധിക്കില്ലെന്നും അദ്ദേഹം മാധ്യമങ്ങളോട് പറഞ്ഞു.
"ജയരാജന്‍ പറഞ്ഞ കാര്യം ഞാന്‍ കണ്ടതാണ്. വളരെ പ്രകോപിതനായാണ് അദ്ദേഹം ഇക്കാര്യത്തോട് പ്രതികരിച്ചത്. തെറ്റായ പ്രചരണമാണ് നടക്കുന്നതെന്ന് അദ്ദേഹം വ്യക്തമാക്കിയതാണ്. രാഷ്ട്രീയ ഗൂഢാലോചനയുണ്ടെന്ന് ജയരാജന്‍ പറഞ്ഞെങ്കില്‍ അത് അദ്ദേഹം പരിശോധിച്ചോട്ടെ.
വിഷയത്തിൽ പാര്‍ട്ടിക്ക് കൃത്യമായ ധാരണയുണ്ട്. പുസ്തകം എഴുതിയിട്ടില്ലെന്ന് ജയരാജന്‍ പറഞ്ഞ് കഴിഞ്ഞാല്‍ പിന്നെ എന്ത് ചോദ്യമാണുള്ളത്. പാര്‍ട്ടി ഒറ്റക്കെട്ടായി മുന്നോട്ട് പോകുകയാണ്. ഇങ്ങനെയാരു വാര്‍ത്ത സൃഷ്ടിച്ച് പാര്‍ട്ടിക്കുമേല്‍ കെട്ടിവയ്ക്കാനുള്ള ശ്രമമാണ് മാധ്യമങ്ങള്‍ നടത്തിയത്", എം.വി ഗോവിന്ദൻ പറഞ്ഞു.

രാഷ്ട്രീയ ഗൂഢാലോചനയുണ്ടോ എന്ന് ഇപിക്ക് പരിശോധിക്കാം, വിവാദം ഉപതിരഞ്ഞെടുപ്പിനെ ബാധിക്കില്ല- ​ഗോവിന്ദൻ

മാനന്തവാടി: ദ്വാരകയിൽ കുറ്റിയാട്ടുകുന്നിൽ ഉപയോഗശൂന്യമായ ക്വാറിയുടെ വെള്ളക്കെട്ടിൽ യുവാവ് മുങ്ങി മരിച്ചു. കുറ്റിയാട്ടുകുന്ന് ചെല്ലാട്ടുകുന്ന് പരേതനായ ഉത്തമന്റെയും മാധവിയുടെയും മകൻ രാജേഷ് (33) ആണ് മരിച്ചത്. കഴിഞ്ഞ രാത്രി എട്ടു മണിയോടെയാണ് സംഭവം. രാജേഷിന്റെ ഭാര്യ സന്ധ്യയും വെള്ളക്കെട്ടിൽ അകപ്പെട്ടെങ്കിലും നാട്ടുകാർ രക്ഷപ്പെടുത്തി. ഇരുവരും വെള്ളക്കെട്ടിലേക്ക് ചാടുകയായിരുന്നുവെന്നാണ് വിവരം.
തുടർന്ന് മാനന്തവാടി അഗ്നിരക്ഷാസേനയെത്തി നടത്തിയ തിരച്ചിലിലാണ് രാജേഷിനെ പുറത്തെടുത്തത്. ഉടനെ മാനന്തവാടി മെഡിക്കൽ കോളജിലേക്ക് കൊണ്ടുപോയെങ്കിലും രക്ഷിക്കാനായില്ല. കെല്ലൂരിൽ ഇൻഡസ്ട്രി നടത്തിവരികയായിരുന്നു രാജേഷ്. ആദിയെന്ന മകളും ആറു മാസം പ്രായമുള്ള കുട്ടിയുമാണ് രാജേഷിനുള്ളത്.&nbsp;

ക്വാറിയിലെ വെള്ളക്കെട്ടിൽ ചാടി ദമ്പതികളുടെ ആത്മഹത്യാ ശ്രമം; യുവാവ് മരിച്ചു

Kerala

മണിയൂർ: വോയ്‌സ് ഓഫ് കുന്നത്തുകരയുടെ ദശവാർഷികാഘോഷത്തിന്റെ ഭാഗമായി കലണ്ടർ പ്രകാശനം ചെയ്തു. ആദ്യകോപ്പി സ്വാഗത സംഘം ചെയർമാൻ മൂഴിക്കൽ റസാഖ്ൽ നിന്ന് തലപൊയിൽ മൂസ ഹാജി ഏറ്റുവാങ്ങി. ചടങ്ങിൽ എണ്ണക്കണ്ടി ഹുസ്സൈൻ, വി എൻ ടി നാസർ , ജബ്ബാർ , കുറുങ്ങോട്ട് അമ്മദ്, കാരാളത്ത് അഹ്‌മദ്‌ , ജുനൈദ് മർവ , ആബിദ് , അമ്മദ് ദോഹ മഹൽ , ലത്തീഫ് സൈമൻസ്‌ , നസീദ് ടി കെ , അഫ്സൽ എം എം , അഷ്‌റഫ്, നൗഫൽ , മുസ്തഫ ,നവാസ് ,നിസാർ , ഇഖ്ബാൽ എന്നിവർ ആശംസകൾ നേർന്നു.

കലണ്ടർ പ്രകാശനം ചെയ്തു

Vadakara

തിരുവനന്തപുരം: നാല് വർഷ ബിരുദ കോഴ്സുകൾ മറയാക്കി ഫീസ് നിരക്കുകൾ കുത്തനെ കൂട്ടിയ കേരള- കാലിക്കറ്റ് സർവകലാശകളുടെ തീരുമാനത്തിൽ പ്രതിഷേധം ശക്തമാക്കി കെ.എസ്.യു. സമരപരിപാടികളുടെ ഭാഗമായി നാളെ (വ്യാഴം ) കേരള, കാലിക്കറ്റ് സർവകലാശാലകളുടെ കീഴിലുള്ള കോളജുകളിൽ പഠിപ്പുമുഠക്കൽ സമരം നടത്തുമെന്ന് കെ.എസ്.യു സംസ്ഥാന പ്രസിഡൻറ് അലോഷ്യസ് സേവ്യർ പറഞ്ഞു.
നാല് വർഷ ബിരുദ കോഴ്സുകൾ നിലവിൽ വരുമ്പോൾ ഫീസ് വർധന ഉണ്ടാവില്ലന്ന സർക്കാർ വാദം നിലനിൽക്കെയാണ് സർവകലാശാലകളുടെ ഇരുട്ടടി ഉണ്ടായിരിക്കുന്നത്. മൂന്നും, നാലും ഇരട്ടിയായാണ് ഫീസ് വർധന ഉണ്ടായിരിക്കുന്നത്. യൂനിവേഴ്സിറ്റി സർക്കാർ കൂട്ടുകച്ചവടമാണ് ഉണ്ടായിരിക്കുന്നത്,യൂനിവേഴ്സിറ്റി ഫിനാൻസ് കമ്മിറ്റിയുടെ ഉത്തരവ് വിദ്യാർഥികളോടുള്ള വെല്ലുവിളിയാണ്.ഉന്നത വിദ്യാഭ്യാസ മന്ത്രി അടിയന്തിരമായി ഇടപെടണമെന്നും കെ.എസ്.യു സംസ്ഥാന പ്രസിഡൻറ് ആവശ്യപ്പെട്ടു.

കേരള- കാലിക്കറ്റ് സർവകലാശാല കാമ്പസുകളിൽ വ്യാഴാഴ്ച കെ.എസ്.യു പഠിപ്പുമുടക്ക്

വടകര: ചോമ്പാലയിൽ നിന്ന് കഴിഞ്ഞദിവസം മത്സ്യ ബന്ധനത്തിന്പോയ ഫൈബർ വള്ളം മറിഞ്ഞ് അപകടത്തിൽപെട്ടവർക്ക് സർക്കാർ നഷ്ടപരിഹാരം നൽകണമെന്ന് എസ്ഡിപിഐ വടകര മണ്ഡലം പ്രസിഡണ്ട് ഷംസീർ ചോമ്പാല ആവശ്യപ്പെട്ടു. വലിയ ചൈനാ ബോട്ട്കാരുടെ അശ്രദ്ധ കാരണമാണ് ഫൈബർ വള്ളം അപകടത്തിൽപ്പെട്ടത്. മുട്ടുങ്ങൽ പടിഞ്ഞാറെ വളപ്പിൽ മൂസയുടെ ഉടമസ്ഥതയിലുള്ള ഫൈബർ വള്ളമാണ് മറിഞ്ഞത്. പൂർണ്ണമായും ഫൈബർ വള്ളവും വലയും എൻജിനും അടക്കം ആഴക്കടലിൽ താഴ്ന്നു പോയത് കാരണം വൻ സാമ്പത്തിക നഷ്ടമാണ് സംഭവിച്ചിരിക്കുന്നത്.
കടവും ലോണും എടുത്ത് ഉപജീവനമാർഗ്ഗം കണ്ടെത്തുന്ന മത്സ്യത്തൊഴിലാളികൾക്ക് ഇത്തരം പ്രതിസന്ധികൾ ഉണ്ടാകുമ്പോൾ സർക്കാരിന്റെ സഹായം ലഭിക്കേണ്ടതുണ്ട്. ഇപ്പോൾ ഉണ്ടായിരിക്കുന്ന അപകടത്തിൽ അഞ്ചു ലക്ഷം രൂപയോളം നഷ്ട്ടം സംഭവിച്ചിട്ടുണ്ട്. ഉപ ജീവന മാർഗം നഷ്ട്ടപ്പെട്ടവർക്ക് ഉടൻ സർക്കാർ നഷ്ട്ട പരിഹാരം നൽകണമെന്ന് അദ്ദേഹം ആവശ്യപ്പെട്ടു. ചോറോട് പഞ്ചായത്ത്‌ പ്രസിഡന്റ്‌ ജലീൽ ഇകെ, കക്കാട്ട് പള്ളി ബ്രാഞ്ച് സെക്രട്ടറി റിയാസ് എന്നിവർ അപകടത്തിൽപ്പെട്ടവരുടെ വീടുകൾ സന്ദർശിച്ചു.

ഫൈബർ വള്ളം മറിഞ്ഞ് അപകടത്തിൽപ്പെട്ട മത്സ്യത്തൊഴിലാളികൾക്ക് നഷ്ടപരിഹാരം നൽകണം; എസ് ഡി പി ഐ

തിരുവനന്തപുരം: വാഹനം മറ്റൊരാൾക്ക് വിൽക്കുമ്പോൾ ആർ സി ഉടമസ്ഥാവകാശം മാറ്റാൻ അപേക്ഷ തയ്യാറാക്കി 14 ദിവസത്തിനകം ആർ ടി ഓഫീസിൽ സമർപ്പിക്കണമെന്ന്‌ മോട്ടോർ വാഹന വകുപ്പ്‌. അടുത്ത ബന്ധുക്കൾക്കും കൂട്ടുകാർക്കും വാഹനം വിൽക്കുമ്പോൾ പേപ്പറിലോ മുദ്രപ്പത്രത്തിലോ ഒപ്പിട്ടുവാങ്ങിയതുകൊണ്ട്‌ കാര്യമില്ല. വാഹനം വാങ്ങുന്ന വ്യക്തിക്ക് ഒടിപി ലഭിച്ച്‌ പണമടച്ചാൽ വാഹനത്തിന്റെ ഉത്തരവാദിത്വം ആ വ്യക്തിക്കാണ്. നിർമിച്ച്‌ 15 വർഷം കഴിഞ്ഞ വാഹനമാണെങ്കിൽ, വാങ്ങുന്ന വ്യക്തിയുടെ പേരിൽ 200 രൂപയുടെ സ്റ്റാമ്പ് പേപ്പറിൽ സത്യവാങ്മൂലം അപ്‌ലോഡ് ചെയ്യണം.
നിലവിൽ ആർസി ബുക്ക്‌ മോട്ടോർ വാഹനവകുപ്പ്‌ പ്രിന്റ്‌ ചെയ്യുന്നില്ല. ഡിജിറ്റൽ കാർഡുകളാണ്‌. അത്‌ ഡൗൺലോഡ്‌ ചെയ്ത്‌ അപേക്ഷയ്‌ക്കൊപ്പം അപ്പ്‌ലോഡ്‌ ചെയ്താൽ മതി. മോട്ടോർ വാഹനവകുപ്പിൽ രജിസ്റ്റർ ചെയ്ത സെക്കൻഡ്‌ ഹാൻഡ്‌ ഡീലർമാർക്ക്‌ വാഹനം വിറ്റാൽ ഉടമസ്ഥാവകാശം മാറ്റേണ്ട ഉത്തരവാദിത്വം അവർക്കാണ്‌.
എങ്ങനെ ആർസി  ഉടമസ്ഥാവകാശം മാറ്റാം 
വാഹനത്തിന്റെ ഉടമസ്ഥാവകാശം മാറ്റാനുള്ള അപേക്ഷ പരിവാഹൻ സൈറ്റ് (www. parivahan.gov.in) വഴിയാണ്‌ നൽകേണ്ടത്‌. മൊബൈൽ നമ്പർ ആധാറുമായി ബന്ധിപ്പിച്ചിട്ടുണ്ടെങ്കിൽ ആധാർ വഴി അപേക്ഷിക്കാം. രേഖകൾ ഓൺലൈൻവഴി സമർപ്പിച്ചാൽ മതി. ഓഫീസിൽ രേഖ ഹാജരാക്കേണ്ടതില്ല. ഓൺലൈൻവഴിയാണ്‌ പണം അടച്ച്‌ ഒറിജിനൽ രേഖ ആർടി ഓഫീസിൽ സമർപ്പിക്കണം.

പഴയ വാഹനം കൈമാറ്റം ചെയ്യുന്നവരുടെ ശ്രദ്ധയ്ക്ക്; 14 ദിവസത്തിനകം ആർസി മാറ്റണം

തിക്കോടി : ടൗണിൽ അടിപ്പാത അനുവദിക്കണം എന്നാവശ്യപ്പെട്ട് കർമസമിതി രണ്ടു വർഷത്തിലേറെയായി നടത്തുന്ന സമരത്തിൽ അനുകൂലമായ തീരുമാനം ഉണ്ടാകാത്ത സാഹചര്യത്തിൽ നവംബർ 25 മുതൽ മരണംവരെ അനിശ്ചിതകാല നിരാഹാരസമരം പ്രഖ്യാപിച്ചു. പ്രചാരണത്തിനായി സംഘടിപ്പിച്ച പദയാത്രയിൽ സ്ത്രീകളും കുട്ടികളുമടക്കം ഒട്ടേറെയാളുകൾ പങ്കെടുത്തു. എൻ.പി. മുഹമ്മദ് ഹാജി ഉദ്ഘാടനംചെയ്തു. സന്തോഷ് തിക്കോടി, കെ.പി. ഷക്കീല, പി.വി. റംല, ജയചന്ദ്രൻ തെക്കേകുറ്റി, ബിജു കളത്തിൽ, വി.കെ. റിനീഷ്, കെ.പി. നാരായണൻ, ഷാഹിദ കൊന്നശ്ശേരിക്കുനി, ശ്രീധരൻ ചെമ്പുഞ്ചില, പി.കെ. ശശികുമാർ എന്നിവർ നേതൃത്വംനൽകി.
തിക്കോടി, മൂടാടി ഗ്രാമപ്പഞ്ചായത്തുകളിലെവിവിധ വാർഡുകളിലൂടെ നടത്തിയ പദയാത്രയ്ക്ക് പാറക്കുളം, പുതിയകുളങ്ങര, ആമ്പിച്ചിക്കുളം, മുതിരക്കാൽമുക്ക്, കോടിക്കൽ ബീച്ച്, പുതിയവളപ്പ്, മലോൽമുക്ക് എന്നീ കേന്ദ്രങ്ങളിൽ സ്വീകരണം നൽകി. നിരാഹാരസമര വൊളന്റിയർമാരായ ആർ. വിശ്വൻ, വി.കെ. അബ്ദുൾ മജീദ്, കെ.വി. സുരേഷ് കുമാർ എന്നിവരെ വിവിധകേന്ദ്രങ്ങളിൽ ഹാരാർപ്പണം ചെയ്തു.വൈകീട്ട് തിക്കോടി ടൗണിൽ നടന്നസമാപന സമ്മേളനം ഗ്രാമപ്പഞ്ചായത്ത് പ്രസിഡണ്ട് ജമീല സമദ് ഉദ്ഘാടനംചെയ്തു. കർമസമിതി ചെയർമാൻ വി.കെ. അബ്ദുൾ മജീദ് അധ്യക്ഷനായി. എൻ.എം.ടി. അബ്ദുള്ളക്കുട്ടി, ഭാസ്കരൻ തിക്കോടി എന്നിവർ സംസാരിച്ചു.

തിക്കോടി അടിപ്പാത; മരണംവരെ നിരാഹാര സമരത്തിന് കർമസമിതി

Koyilandy

റിയാദ്: സൗദി ജയിലിൽ കഴിയുന്ന കോഴിക്കോട് സ്വദേശി അബ്ദുൾ റഹീമിനെ മാതാവ് സന്ദർശിച്ചു. റിയാദ് അൽ ഇസ്ക്കാൻ ജയിലിൽ വച്ചായിരുന്നു കൂടിക്കാഴ്ച. ഉംറ നിർവഹിച്ച ശേഷമാണ് മാതാവ് ഫാത്തിമ റിയാദിലെ ജയിലിലെത്തിയത്. 18 വർഷത്തിന് ശേഷമാണ് ഇരുവരും തമ്മിൽ കാണുന്നത്.
ഫറോക്ക് കോടമ്പുഴ സ്വദേശി മച്ചിലകത്ത് അബ്ദുൾ റഹീമാണ് സൗദിയിൽ വധശിക്ഷയ്ക്കു വിധിക്കപ്പെട്ട് 18 വർഷമായി ജയിലിൽ കഴിയുന്നത്. തന്റെ സ്‌പോൺസറായ അറബിയുടെ ചലനശേഷിയില്ലാത്ത, പതിനഞ്ചുകാരനായ മകൻ അനസിനെ ശുശ്രൂഷിക്കലായിരുന്നു റഹീമിന്റെ ജോലി. കഴുത്തിൽ ഘടിപ്പിച്ച ഉപകരണത്തിലൂടെയാണ് അനസ് ഭക്ഷണവും വെള്ളവും കഴിച്ചിരുന്നത്.2006-ൽ ഒരു യാത്രയ്ക്കിടയിലുണ്ടായ കശപിശയിൽ അബദ്ധത്തിൽ റഹീമിന്റെ കൈ കഴുത്തിലെ ഉപകരണത്തിൽ തട്ടി അനസ് മരിച്ചു. കൊലപാതകക്കുറ്റം ചുമത്തി റഹീമിനെ ജയിലിലടച്ചു.മരിച്ച കുട്ടിയുടെ കുടുംബം ആവശ്യപ്പെട്ട 34 കോടിയോളം രൂപയ്ക്ക് തുല്യമായ സംഖ്യ ഇതിനകം മോചനദ്രവ്യമായി നൽകിയിട്ടുണ്ട്. ജൂലായ് രണ്ടിന് അബ്ദുൽ റഹീമിന്റെ വധശിക്ഷ കോടതി റദ്ദാക്കിയിരുന്നു.

സൗദി ജയിലിൽ കഴിയുന്ന അബ്ദുൾ റഹീമിനെ മാതാവ് സന്ദർശിച്ചു

Gulf

പാലക്കാട്‌: സുരേഷ്‌ ഗോപി ബി.ജെ.പി.യിലെ മിതവാദിയാണെന്ന്‌ മന്ത്രി മുഹമ്മദ്‌ റിയാസ്‌. ബി.ജെ.പി. ഭരിക്കുന്ന സംസ്ഥാനങ്ങളിൽ അവർക്കെതിരേ വാർത്ത കൊടുത്താൽ മാധ്യമപ്രവർത്തകരുടെ കഴുത്തിനുമുകളിൽ തല കാണില്ല. വാർത്തയെഴുതിയാൽ കൈയിൽ വിരലുണ്ടാകില്ല. സ്വതന്ത്രമാധ്യമപ്രവർത്തനം കേരളത്തിലല്ലാതെ രാജ്യത്ത്‌ മറ്റേത്‌ സംസ്ഥാനത്താണുള്ളതെന്നും മന്ത്രി ചോദിച്ചു.
സീ പ്ലെയിൻ പദ്ധതിയിൽ രണ്ടഭിപ്രായമില്ലെന്നു മന്ത്രി പറഞ്ഞു. അണക്കെട്ടുകളിൽ പദ്ധതി നടപ്പാക്കുന്നതിൽ ആരും എതിർപ്പ്‌ പറഞ്ഞിട്ടില്ല. വിമാനത്താവളങ്ങളും അണക്കെട്ടുകളും ബന്ധപ്പെടുത്തിയാണ്‌ ഇപ്പോൾ പദ്ധതി ആലോചിക്കുന്നത്‌. കായലിൽ പദ്ധതി നടപ്പാക്കുന്നതിനുമുൻപ്‌ ബന്ധപ്പെട്ട എല്ലാ തൊഴിലാളി യൂണിയൻ നേതാക്കളുമായും ചർച്ച നടത്തും. അക്കാര്യത്തിൽ തൊഴിലാളിസംഘടനാ നേതാക്കളുടെ ആശങ്കകൾ നൂറുശതമാനം ശരിയാണ്‌. അതിൽ അഭിപ്രായവ്യത്യാസമില്ലെന്നും മന്ത്രി പറഞ്ഞു.

സുരേഷ്‌ ഗോപി ബി.ജെ.പി.യിലെ മിതവാദിയെന്ന് മന്ത്രി റിയാസ്‌

ന്യൂഡല്‍ഹി: കനത്ത പുകമഞ്ഞ് മൂടിയതോടെ രാജ്യ തലസ്ഥാനത്തെ വായുനിലവാരം അതിഗുരുതരാവസ്ഥയിലേക്ക് കടന്നു . ഡല്‍ഹിയിലും നോയിഡ, ഗാസിയാബാദ്, ഗുരുഗ്രാം, ഫരീദാബാദ് എന്നിവയുടെ പരിസര പ്രദേശങ്ങളിലുമാണ് കനത്ത പുകമഞ്ഞ് രൂപപ്പെട്ടത്. ഇതോടെ വിമാനങ്ങള്‍ വഴിതിരിച്ചുവിട്ടു.
പ്രതികൂല കാലാവസ്ഥയെ തുടര്‍ന്ന് രാവിലെ ഏഴ് മണി മുതല്‍ ആറ് വിമാനങ്ങള്‍ ജയ്പുരിലേക്കും ഒന്ന് ലഖ്നൗവിലേക്കും ഉള്‍പ്പെടെ 10 വിമാനങ്ങളാണ് വഴിതിരിച്ചുവിട്ടത്. രാവിലെ 8.30-ന് ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ ദൂരക്കാഴ്ചയും മോശമായതോടെയാണ് തീരുമാനം. വായു നിലവാരം മോശമായതിനെ തുടര്‍ന്ന് ബുധനാഴ്ച രാവിലെ 5.30-ഓടെ തന്നെ കനത്ത മഞ്ഞ് രൂപപ്പെട്ടു തുടങ്ങിയിരുന്നു.മൂടല്‍ മഞ്ഞ് മൂന്നു ദിവസത്തേക്കെങ്കിലും തുടര്‍ന്നേക്കുമെന്നാണ് കാലാവസ്ഥാ വകുപ്പിന്റെ അറിയിപ്പ്.&nbsp;

ഡല്‍ഹിയിൽ കനത്ത പുകമഞ്ഞ് ;വിമാനങ്ങള്‍ വഴിതിരിച്ചുവിട്ടു

National

പാലക്കാട്: മുന്‍ എല്‍.ഡി.എഫ് കണ്‍വീനര്‍ ഇ.പി. ജയരാജന്റെ ആത്മകഥയിലേതെന്ന പേരില്‍ പുറത്തുവന്ന ഭാഗങ്ങളുമായി ബന്ധപ്പെട്ട വിവാദങ്ങള്‍ക്കിടെ പ്രതികരണവുമായി പാലക്കാട് എല്‍ഡിഎഫ് സ്ഥാനാര്‍ഥി ഡോ. പി സരിന്‍. ഇപിയുടെ ആത്മകഥയില്‍ സരിനെതിരേ വിമര്‍ശനമുള്ളതായി റിപ്പോര്‍ട്ടുണ്ടായിരുന്നു.&nbsp;
അങ്ങനെ ഒരു പുസ്തകമുണ്ടെങ്കില്‍ അത് വായനക്കാരുടെ കൈയിലേക്കെത്തിയ ശേഷം വിഷയം ചര്‍ച്ച ചെയ്യാമെന്നും താന്‍ ഇവിടെയൊക്കെ തന്നെയുണ്ടാകുമെന്നും മറുപടി പറയാതെ പോകില്ലെന്നും സരിന്‍ പ്രതികരിച്ചു.പുസ്തകമിറങ്ങി അതില്‍ ഈ പറയുന്നതുപോലെ വ്യക്തിപരമായ ഒരു പരാമര്‍ശമുണ്ടെങ്കില്‍ അപ്പോള്‍ അതിന് മറുപടി പറയാമെന്നും അദ്ദേഹം കൂട്ടിച്ചേര്‍ത്തു. ''പുസ്തകത്തിലെ ഭാഗങ്ങള്‍ എന്ന പേരില്‍ പുറത്തുവന്ന പരാമര്‍ശങ്ങള്‍ അദ്ദേഹം തന്നെ നിഷേധിച്ചതായാണ് അറിയാന്‍ കഴിയുന്നത്. പരാമര്‍ശങ്ങള്‍ ഒരുപക്ഷേ വളച്ചൊടിച്ചതായിരിക്കാം. പുസ്തകം പുറത്ത് വന്നാലേ കാര്യങ്ങള്‍ വ്യക്തമാകൂ,' സരിന്‍ പറഞ്ഞു.

പുസ്തകം പുറത്ത് വന്നാലേ കാര്യങ്ങള്‍ വ്യക്തമാകൂ ; ഇ.പിയുടെ ആത്മകഥയെ പറ്റി കൂടുതൽ പ്രതികരിക്കാനില്ലെന്ന് സരിൻ

മേപ്പയൂർ: ഗ്രാമ പഞ്ചായത്ത് 2024 -25 വാർഷിക പദ്ധതിയിൽ ഉൾപ്പെടുത്തി ഭിന്നശേഷിക്കാർക്കും വയോജനങ്ങൾക്കും സഹായ ഉപകരണങ്ങൾ നൽകുന്നതിന്റെ മെഡിക്കൽ ക്യാമ്പ് നടത്തി.
ടി.കെ കൺ വൻഷൻ സെന്ററിൽ നടന്ന പരിപാടി ഗ്രാമ പഞ്ചായത്തംഗം കെ.എം. പ്രസീതയുടെ അധ്യക്ഷതയിൽ ക്ഷേമകാര്യ സ്റ്റാൻന്റിംഗ് കമ്മറ്റി ചെയർ പെഴ്സൺ വി.പി.രമ ഉത്ഘാടനം ചെയ്തു. വാർഡ് മെമ്പർ വി.പി. ബിജു സ്വാഗതം പറഞ്ഞ യോഗത്തിൽ മെമ്പർമാരായ പി.പ്രകാശൻ , ദീപ കോളോത്ത്, മിനി അശോകൻ, റാബിയ എടത്തിക്കണ്ടി, ഡോക്ടർമാരായ റഷീദ്, അഷ്റഫ് പഞ്ചായത്ത് ക്ലർക്ക് സിന്ധു എന്നിവർ ആശംസ നേർന്നു. അങ്കണവാടി വർക്കർ കെ.ഉഷ നന്ദി പറഞ്ഞു.

മെഡിക്കൽ ക്യാമ്പ് നടത്തി

Perambra

മാഹി: റെയിൽവെ സ്റ്റേഷനിൽ നിന്ന് കക്കടവിലേക്കുള്ള റോഡിലെ കലുങ്ക് തകർന്ന് കിടക്കുന്നതിനാൽ ഇത് വഴി വാഹന ഗതാഗതം നിലച്ചു. നിരവധി ആളുകൾ മാഹി റെയിൽവെ സ്റ്റേഷനിലെത്താൻ ആശ്രയിക്കുന്ന വഴിയാണിത്. ചൊക്ളി, ന്യൂ മാഹി, പള്ളൂർ, പെരിങ്ങത്തൂർ ഭാഗങ്ങളിലുള്ളവർ ദേശീയ പാതയിലൂടെ കടന്ന് വന്ന് റെയിൽവേ സ്റ്റേഷൻ്റെ കിഴക്ക് ഭാഗത്ത് വാഹനങ്ങൾ പാർക്ക് ചെയ്താണ് ട്രെയിൻ യാത്ര നടത്താറ്.
വലിയ കലുങ്ക് പൊട്ടിത്തകർന്ന് ഇരുചക്രവാഹനങ്ങളൊഴികെ മറ്റ് വാഹനങ്ങൾക്കൊന്നും കടന്ന് പോകാനാവാത്ത അവസ്ഥയാണ്. കലുങ്ക് തകർന്ന് ദിവസങ്ങളേറെ കഴിഞ്ഞിട്ടും പ്രശ്ന പരിഹാരത്തിന് ബന്ധപ്പെട്ട അധികൃതർ തയ്യാറാവുന്നില്ലെന്നാണ് നാട്ടുകാരുടെ പരാതി.

കലുങ്ക് തകർന്നത് യാത്രക്കാർക്ക് ദുരിതം

കൊച്ചി: മലപ്പുറം മുൻ എസ്.പി, ഡിവൈ.എസ്.പി അടക്കമുള്ള പോലീസ് ഉദ്യോ​ഗസ്ഥർ പീഡിപ്പിച്ചെന്ന വീട്ടമ്മയുടെ പരാതിയിൽ പൊലീസ് ഉദ്യോഗസ്ഥർക്കെതിരേ കേസെടുക്കാനുള്ള ഹൈക്കോടതി സിം​ഗിൾ ബെഞ്ച് ഉത്തരവ് ഹൈക്കോടതി ഡിവിഷൻ ബെഞ്ച് റദ്ദാക്കി. നേരത്തെ സിംഗിൾ ബെഞ്ച് നിർദേശ പ്രകാരം പൊന്നാനി മ‍ജിസ്ട്രേറ്റ് കോടതി പൊലീസുകാർക്കെതിരേ കേസെടുക്കാൻ ഉത്തരവിട്ടിരുന്നു. ഈ ഉത്തരവാണ് ഡിവിഷൻ ബെഞ്ച് റദ്ദാക്കിയത്.
എസ്.പി സുജിത് ഉൾപ്പെടെയുള്ളവർക്കെതിരേ കേസെടുക്കണമെന്നായിരുന്നു നേരത്തെ സിംഗിൾ ബെഞ്ച് നിർദേശം. എന്നാൽ ചീഫ് ജസ്റ്റിസ് നിതിൻ മധുകർ ജംദാർ ഉൾപ്പെട്ട ഡിവിഷൻ ബെഞ്ചിന്റേതാണ് കേസ് റദ്ദാക്കാനുള്ള ഉത്തരവ്.മലപ്പുറം മുന്‍ പോലീസ് മേധാവി സുജിത്ദാസ്, തിരൂര്‍ മുന്‍ ഡിവൈ.എസ്.പി. വി.വി ബെന്നി, പൊന്നാനി ഇന്‍സ്പെക്ടറായിരുന്ന വിനോദ് വലിയാറ്റൂര്‍ എന്നിവരുടെ പേരിലായിരുന്നു പൊന്നാനി സ്വദേശിയായ സ്ത്രീ പീഡന ആരോപണം ഉന്നയിച്ചത്. ഇതിനെതിരെയാണ് ആരോപണവിധേയനായ സർക്കിൾ ഇൻസ്പെകടർ വിനോദ് ഹൈക്കോടതി ഡിവിഷൻ ബെഞ്ചിനെ സമീപിച്ചത്. ഈ ഹർജിയിലാണ് കോടതി വിധി.

പോലീസിലെ ഉന്നത ഉദ്യോ​ഗസ്ഥർ പീഡിപ്പിച്ചെന്ന വീട്ടമ്മയുടെ പരാതി; കേസ് റദ്ദാക്കി ഹൈക്കോടതി

കോട്ടയം: ഇ.പി. ജയരാജൻ എഴുതിയതെന്ന് ഡി.സി ബുക്സ് അവകാശപ്പെട്ട കട്ടൻ ചായയും പരിപ്പുവടയും എന്ന പുസ്തകത്തിന്റെ പ്രസാധനം നീട്ടിവെച്ചതായി പ്രസാധകർ. നിർമിതിയിലുള്ള സാങ്കേതിക പ്രശ്നം മൂലമാണ് തീരുമാനമെന്നാണ് വിശദീകരണം. ഉള്ളടക്കത്തെ സംബന്ധിച്ച കാര്യങ്ങൾ പുസ്തകം പ്രസിദ്ധപ്പെടുത്തുമ്പോൾ വ്യക്തമാകുന്നതാണെന്നും ഡി.സി ബുക്സ് ഫെയ്സ്ബുക്കിൽ കുറിച്ചു.
ബുധനാഴ്ച രാവിലെയാണ് ഇടതുമുന്നണിയെ വെട്ടിലാക്കി ഇ.പി.യുടെ ആത്മകഥാ വിവാദം ചൂടുപിടിക്കുന്നത്. പാർട്ടി തന്നെ കേൾക്കാൻ തയ്യാറായില്ലെന്നും രണ്ടാം പിണറായി സർക്കാർ ദുർബലമാണെന്നും ആത്മകഥയിൽ പറയുന്നതായി റിപ്പോർട്ടുകൾ പുറത്തുവന്നു.&nbsp;

ഇ.പിയുടെ പുസ്തക പ്രകാശനം നീട്ടിവെച്ച് ഡി.സി ബുക്സ്, സാങ്കേതിക പ്രശ്നമെന്ന് വിശദീകരണം

അഴിയൂർ: അഞ്ചാം പീടികയ്ക്ക് സമീപം എലിഫെന്റ് റോഡിൽ സഫിയാസിൽ എൻ.പി.ശംസുദ്ദീൻ (57) മസ്ക്കത്തിൽ നിര്യാതനായി. കഴിഞ്ഞ വെള്ളിയാഴ്ച ലീവ് കഴിഞ്ഞ് മസ്ക്കത്തിലേക്ക് തിരിച്ച് പോയതായിരുന്നു. രാവിലെയോടെ താമസ സ്ഥലത്ത് വച്ചായിരുന്നു മരണം. സലാല - തലശ്ശേരി അസോസിയേഷൻ പ്രസിഡണ്ടായിരുന്നു. പിതാവ്:പരേതനായ അഹമ്മദ്. മാതാവ്: സഫിയ. ഭാര്യ: സഫിയത്ത്. മക്കൾ: ഫാത്തിമ ഷിഫ , ഷദാ സാദിയ, സഹ്‌റദീന. മരുമകൻ: സഹൽ. സഹോദരങ്ങൾ: ഇക്ബാൽ, ഹസ്സൻ , മുഹമ്മദലി, ശരീഫ്, ജംഷീർ, ഷാനിദ് , ജാവിദ് , അഫീദ , ജുബൈരിയ, ജസീല, ജമീല.

അഴിയൂർ സ്വദേശി മസ്ക്കത്തിൽ നിര്യാതനായി

നാദാപുരം: ഭിന്നതകള്‍ക്കെതിരെയുള്ള ചെറുത്ത് നില്‍പ്പിന് കലാമേളകള്‍ ഉപകരിക്കുെമന്ന് മന്ത്രി എ കെ ശശീന്ദ്രന്‍. നാദാപുരം ഉപജില്ല കലോത്സവം കല്ലാച്ചി ഗവ ഹയര്‍സെക്കന്ററി സ്‌കൂളില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കലോത്സവ ഉദ്ഘാടനത്തിന് മുന്നോടിയായി സാംസ്‌കാരിക ഘോഷയാത്ര നടത്തി. വര്‍ണ്ണ വൈവിധ്യങ്ങളുടേയും വാദ്യമേളങ്ങളുടേയും കലാവിഭവങ്ങളുടേയും അകമ്പടിയില്‍ നടന്ന ഘോഷയാത്ര കല്ലാച്ചിയെ ആഘോഷ തിമര്‍പ്പിലാക്കി. ഘോഷയാത്രയില്‍ അവതരിപ്പിച്ച കളരി പയറ്റ് പഴയ കടത്താനാടിനെ അനുസ്മരിപ്പിച്ചു. നാദാപുരം ഗ്രാമ പഞ്ചായത്ത് പ്രസിഡന്റ് വി.വി മുഹമ്മദലി അധ്യക്ഷത വഹിച്ചു.&nbsp;
എം.ഇ.ഒ രാജീവന്‍ പുതിയേടത്ത് വിശദീകരണം നത്തി. ബ്ലോക്ക് പഞ്ചായത്ത് പ്രസിഡന്റ് കെ.പി വനജ, ഗ്രാമ പഞ്ചായത്ത് പ്രസിഡന്റമാരായ പി സുരയ്യ (വാണിമേല്‍), കെ.പി പ്രദീഷ് (വളയം), എന്‍ പത്മിനി (എടച്ചേരി), ജില്ലാ പഞ്ചായത്ത് മെമ്പര്‍ സി.വി.എം നജ്മ, ബ്ലോക്ക് പഞ്ചായത്ത് ക്ഷേമ കാര്യ സ്റ്റാന്റിങ്ങ് കമ്മറ്റി ചെയര്‍മാന്‍ രജീന്ദ്രന്‍ കപ്പള്ളി, ഗ്രാമ പഞ്ചായത്ത് വികസന സ്റ്റാന്റിങ്ങ് കമ്മറ്റി ചെയര്‍മാന്‍മാരായ സി.കെ നാസര്‍, എം.സി സുബൈര്‍, മെമ്പര്‍ എ ദിലീപ്കുമാര്‍, വിവിധ പാര്‍ട്ടി നേതാക്കളായ വി.പി കുഞ്ഞികൃഷ്ണന്‍, എം.പി സൂപ്പി, മോഹനന്‍ പാറക്കടവ്, എം.ടി ബാലന്‍, കെ.ടി.കെ ചന്ദ്രന്‍, കരിമ്പില്‍ ദിവാകരന്‍, കരിമ്പില്‍ വസന്ത, വത്സരാജ് മണലാട്ട്, കോടോത്ത് അന്ത്രു, ടി സജീവന്‍ (ബി.പി.സിതൂണേരി), പി.കെ സജില, എം.എ ലത്തീഫ്, പി രഞ്ജിത്ത്കുമാര്‍, കെ.വി കുഞ്ഞമ്മദ്, കെ.കെ നവാസ്, വി.ടി ലിഗേഷ്, സി.കെ അബ്ദുല്‍ഗഫൂര്‍, എ റഹീം, കെ.കെ ഉസ്മാന്‍ എന്നിവര്‍ പ്രസംഗിച്ചു.

ഭിന്നതകള്‍ക്കെതിരെയുള്ള ചെറുത്ത് നില്‍പ്പാണ് കലാമേള; മന്ത്രി എ കെ ശശീന്ദ്രന്‍

Nadapuram

തിരുവനന്തപുരം: ഏത് പനിയും പകര്‍ച്ചപ്പനിയാകാന്‍ സാധ്യതയുള്ളതിനാല്‍ പനിക്ക് സ്വയം ചികിത്സ തേടരുതെന്ന് മന്ത്രി വീണ ജോര്‍ജ്. സംസ്ഥാനത്ത് ഇടവിട്ടുള്ള മഴ തുടരുന്ന സാഹചര്യത്തില്‍ ഡെങ്കിപ്പനി, എലിപ്പനി എന്നിവയ്‌ക്കെതിരെ ജാഗ്രത പാലിക്കണം. പ്രാരംഭ ഘട്ടത്തില്‍ ചികിത്സിക്കാത്തത് കൊണ്ടാണ് എലിപ്പനി മരണങ്ങള്‍ പലപ്പോഴും ഉണ്ടാകുന്നത്.
എലിപ്പനി സാധ്യതയുള്ളവര്‍ക്ക് പ്രോട്ടോകോള്‍ അനുസരിച്ചുള്ള ചികിത്സ സര്‍ക്കാര്‍, സ്വകാര്യ ആശുപത്രികള്‍ ഉറപ്പാക്കണം. മലിന ജലത്തിലിറങ്ങിയവരില്‍ ഡോക്‌സിസൈക്ലിന്‍ കഴിക്കാത്തവരില്‍ മരണനിരക്ക് കൂടുതലാണെന്നാണ് കണക്കുകള്‍ സൂചിപ്പിക്കുന്നത്. അതിനാല്‍ മലിന ജലത്തിലിറങ്ങിയവര്‍ നിര്‍ബന്ധമായും ആരോഗ്യ പ്രവര്‍ത്തകരുടെ നിര്‍ദേശാനുസരണം എലിപ്പനി പ്രതിരോധ ഗുളിക കഴിക്കണം.
കൈകാലുകളില്‍ മുറിവുകളുള്ളവര്‍ മലിനജലവുമായി സമ്പര്‍ക്കം വരാതെ നോക്കുകയോ, വ്യക്തിഗത സുരക്ഷാ മാര്‍ഗങ്ങള്‍ സ്വീകരിക്കുകയോ ചെയ്യണം. കൊതുകിന്റെ ഉറവിട നശീകരണം പ്രത്യേകം ശ്രദ്ധിക്കാനും മന്ത്രി നിര്‍ദേശം നല്‍കി.
സ്റ്റേറ്റ് ലെവല്‍ റാപ്പിഡ് റെസ്‌പോണ്‍സ് ടീം (ആര്‍ആര്‍ടി) യോഗം ചേര്‍ന്ന് സംസ്ഥാനത്തെ പൊതു സാഹചര്യം വിലയിരുത്തി. എലിപ്പനി, ഡെങ്കിപ്പനി തുടങ്ങിയ പകര്‍ച്ചവ്യാധികള്‍ കൊണ്ടുള്ള മരണങ്ങള്‍ തദ്ദേശ സ്ഥാപന തലത്തില്‍ അടുത്ത രണ്ടാഴ്ച വിലയിരുത്താന്‍ മന്ത്രി നിര്‍ദേശം നല്‍കി. പബ്ലിക് ഹെല്‍ത്ത് ആക്ടിന്റെ അടിസ്ഥാനത്തില്‍ പ്രാദേശികമായി അത് ചര്‍ച്ച ചെയ്ത് വിലയിരുത്തി തുടര്‍ നടപടി സ്വീകരിക്കണം. ഗവേഷണ അടിസ്ഥാനത്തില്‍ പഠനം നടത്താനായി ഒരു കമ്മിറ്റി രൂപീകരിക്കും

പനി ശ്രദ്ധിക്കണം, സ്വയം ചികിത്സ തേടരുതെന്ന് മന്ത്രി വീണാ ജോർജ്

കൽപറ്റ: വയനാട്ടിലെ യു.ഡി.എഫ് സ്ഥാനാർഥി പ്രിയങ്ക ഗാന്ധിക്കെതിരെ തെരഞ്ഞെടുപ്പ് കമീഷന് പരാതി നൽകി എൽ.ഡി.എഫ്. ആരാധനാലയവും മത ചിഹ്നങ്ങളും തെരഞ്ഞെടുപ്പ് പ്രചാരണത്തിന് ഉപയോഗിച്ചെന്നാരോപിച്ചാണ് എൽ.ഡി.എഫ് വയനാട് പാർലമെന്റ് മണ്ഡലം കമ്മിറ്റി പരാതി നൽകിയത്. തെരഞ്ഞെടുപ്പ് ചട്ടങ്ങളും നിയമങ്ങളും ലംഘിച്ചാണ് കോൺഗ്രസിന്റെ പ്രചാരണമെന്ന് പരാതിയിൽ പറയുന്നു.
പ്രിയങ്ക ഗാന്ധി പള്ളിക്കുന്ന് ദേവാലയത്തിലെത്തി വൈദികരുടെയും വിശ്വാസികളുടെയും സാന്നിധ്യത്തിൽ പ്രാർഥന നടത്തിയതാണ് പരാതിയിൽ ചൂണ്ടിക്കാട്ടുന്നത്. ഇതിന്റെ വിഡിയോയും ചിത്രങ്ങളും തെരഞ്ഞെടുപ്പ് പ്രചാരണത്തിനായി ഉപയോഗിച്ചെന്നാണ് ആരോപണം. ആരാധനാലത്തിനുള്ളിൽ വിശ്വാസികളോട് വോട്ട് അഭ്യർഥിച്ചതായും ജനപ്രാതിനിധ്യ നിയമത്തിന്റെ നഗ്‌നമായ ലംഘനമാണ് യു.ഡി.എഫ് സ്ഥാനാർഥി നടത്തിയതെന്നും പരാതിയിൽ പറയുന്നു.

ആരാധനാലയവും മത ചിഹ്നങ്ങളും തെരഞ്ഞെടുപ്പ് പ്രചാരണത്തിന് ഉപയോഗിച്ചു;പ്രിയങ്ക ഗാന്ധിക്കെതിരെ പരാതി നൽകി എൽ.ഡി.എഫ്

കണ്ണൂർ: സി.പി.എം നേതാവും കണ്ണൂർ ജില്ലാ പഞ്ചായത്ത് മുൻ പ്രസിഡന്‍റുമായ പി.പി ദിവ്യയുടെ ഭർത്താവ് അജിത്തിന്‍റെ പരാതിയിൽ അപകീർത്തി കേസ്.രാജൻ ജോസഫ് എന്ന ആൾക്കെതിരെ കണ്ണപ്പുരം പൊലീസ് ആണ് കേസ് രജിസ്റ്റർ ചെയ്തത്. അപകീർത്തിപ്പെടുത്താനും സ്പർധ വളർത്താനും ശ്രമിച്ചെന്നാണ് എഫ്.ഐ.ആറിൽ പറയുന്നത്.
പത്ത് ദിവസം മുമ്പാണ് സമൂഹമാധ്യമങ്ങളിലൂടെ അപകീർത്തിപ്പെടുത്തുന്നുവെന്ന് ചൂണ്ടിക്കാട്ടി പി.പി ദിവ്യയുടെ ഭർത്താവ് പൊലീസിൽ പരാതി നൽകിയത്. യൂട്യൂബ് വിഡിയോയിലൂടെ ദിവ്യയെയും കുടുംബത്തെയും അപമാനിച്ചെന്നാണ് കേസ്.
വിഡിയോ സംബന്ധിച്ച് യൂട്യൂബിനോട് പൊലീസ് വിശദീകരണം തേടിയിട്ടുണ്ട്. യൂട്യൂബിന്‍റെ വിശദീകരണം ലഭിച്ച ശേഷമെ പരാതി ഉറപ്പിക്കാൻ സാധിക്കൂവെന്ന് പൊലീസ് അറിയിച്ചു.അതേസമയം, വ്യാജ വാർത്തകൾ പ്രചരിപ്പിക്കുന്നവർക്കെതിരെ നിയമ നടപടി സ്വീകരിക്കുമെന്ന് പി.പി ദിവ്യ \ഫേസ്ബുക്ക് പോസ്റ്റിലൂടെ വ്യക്തമാക്കിയിരുന്നു. തന്നെയും കുടുംബത്തെയും മുഖ്യധാര മാധ്യമങ്ങളിലും സമൂഹ മാധ്യമങ്ങളിലൂടെയും അപമാനിക്കുന്നതിനായി വസ്തുതാവിരുദ്ധമായ വ്യാജവാർത്തകൾ കെട്ടിച്ചമച്ചവർക്കും പ്രചരിപ്പിച്ചവർക്കെതിരെയും നിയമനടപടി സ്വീകരിക്കുമെന്നാണ് ദിവ്യ ഫേസ്ബുക്കിൽ കുറിച്ചത്.

അപകീർത്തി: പി.പി ദിവ്യയുടെ ഭർത്താവിന്‍റെ പരാതിയിൽ കേസെടുത്തു

കണ്ണൂർ: നൂഞ്ഞേരി മുണ്ടേരിക്കടവ് പാലത്തിന് സമീപം ബൈക്കും പിക്കപ്പും തമ്മിൽ കൂട്ടിയിടിച്ച് രണ്ട് യുവാക്കൾക്ക് ദാരുണാന്ത്യം. കണ്ണൂരിലെ ലുലു ഗോള്‍ഡ് ജീവനക്കാരന്‍ കയ്യങ്കോട് കല്ലുവളപ്പില്‍ ഹാരിസന്റെയും എം.പി. നസീമയുടെയും മകന്‍ അജാസ് (22), കണ്ണാടിപ്പറമ്പിലെ ഡ്രൈവറായ സുരേശന്റെയും ശ്യാമളയുടെയും മകന്‍ വെല്‍ഡിങ് തൊഴിലാളിയായ കാരയാപ്പിലെ വിഷ്ണു (22) എന്നിവരാണ് മരിച്ചത്.
ചൊവ്വാഴ്ച വൈകീട്ട് അഞ്ചോടെയാണ് സംഭവം. മുണ്ടേരി ഭാഗത്തേക്ക് പോവുകയായിരുന്ന പിക് അപ് വാനും കണ്ണാടിപ്പറമ്പ് ഭാഗത്തേക്ക് വരികയായിരുന്ന ബൈക്കും തമ്മിലാണ് കൂട്ടിയിടിച്ചത്. ഇവരെ ഉടന്‍ കണ്ണൂര്‍ എ.കെ.ജി ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. വിഷ്ണുവിന്റെ സഹോദരന്‍: അര്‍ജുന്‍. അജാസിന്റെ സഹോദരന്‍ അനസ്.

കണ്ണൂരിൽ ബൈക്കും പിക്കപ്പും കൂട്ടിയിടിച്ച് അപകടം; രണ്ട് യുവാക്കൾക്ക് ദാരുണാന്ത്യം

തിരൂർ: ചായയിൽ കടുപ്പം കൂട്ടാൻ ഉപയോഗിക്കുന്ന സിന്തറ്റിക് നിറം ചേർത്ത ചായപ്പൊടി പിടികൂടി ഭക്ഷ്യസുരക്ഷ വകുപ്പ്. തിരൂർ നഗരസഭയിലെ കാഞ്ഞിരക്കുണ്ടിലുള്ള വീട്ടിൽനിന്നാണ് മായം ചേർത്ത 70 കിലോ ചായപ്പൊടി പിടികൂടിയത്.
തിരൂരിലെ വിവിധ തട്ടുകടകളിൽ വിതരണം ചെയ്യാനെത്തിച്ചതാണെന്നാണ് പ്രാഥമിക വിവരം. ഓപറേഷൻ തട്ടുകട എന്ന പേരിൽ ഭക്ഷ്യസുരക്ഷ വകുപ്പ് നടത്തിയ പരിശോധനയിൽ രണ്ടു കടകളിൽനിന്ന് ഇത്തരം ചായപ്പൊടി കണ്ടെത്തുകയായിരുന്നു. മലപ്പുറം മൊബൈൽ ടെസ്റ്റിങ് ലാബിന്റെ സഹായത്തോടെ പരിശോധിച്ചതിൽ മായം ചേർത്തിട്ടുണ്ടെന്ന് മനസ്സിലാക്കിയതിനെ തുടർന്ന് ഇവരിൽനിന്ന് വിതരണക്കാരെ കണ്ടെത്തുകയും ഭക്ഷ്യസുരക്ഷ ഓഫിസർ എം.എൻ. ഷംസിയയുടെ നേതൃത്വത്തിലുള്ള സംഘം കാഞ്ഞിരക്കുണ്ടിലെത്തി ചായപ്പൊടി കണ്ടെടുക്കുകയുമായിരുന്നു.

തിരൂരിലെ വീട്ടിൽ നിന്ന് 70 കിലോ മായംചേർത്ത ചായപ്പൊടി പിടികൂടി

മണ്ണാർക്കാട് (പാലക്കാട്): തെങ്കര മെഴുകുംപാറയിൽ കാട്ടാനയേയും കുട്ടിയാനയേയും ചരിഞ്ഞനിലയിൽ കണ്ടെത്തി. മെഴുകുംപാറ മിച്ചഭൂമി ഉന്നതിക്ക് സമീപം വനത്തോട് ചേർന്ന ചോലയ്ക്ക് അടുത്തായാണ് ജഡം കണ്ടെത്തിയത്.
ചോലയ്ക്ക് മുകളിലെ പാറക്കെട്ടുകളിൽ കുടുങ്ങിയ നിലയിലാണ് ജഡമുണ്ടായിരുന്നത്. പാറക്കെട്ടിൽ കുടുങ്ങിയ കുട്ടിയാനയെ രക്ഷിക്കാനുള്ള ശ്രമത്തിലാകും തള്ളയാനയും അപകടത്തിൽപെട്ടതെന്നാണ് നിഗമനം.ജഡത്തിന് ദിവസങ്ങൾ പഴക്കമുണ്ട്. ചോലയിലെ വെള്ളത്തിന് ദുർഗന്ധം വമിച്ചതിനെ തുടർന്ന് ഉന്നതിയിലുള്ളവർ ചൊവ്വാഴ്ച രാവിലെ പ്രദേശത്ത് തിരച്ചിൽ നടത്തിയപ്പോഴാണ് ആനകളെ ചരിഞ്ഞനിലയിൽ കണ്ടെത്തിയത്. ഉടൻ അവർ വാർഡംഗത്തെ അറിയിക്കുകയായിരുന്നു.

മെഴുകുംപാറയിൽ പിടിയാനയും കുട്ടിയാനയും ചരിഞ്ഞ നിലയിൽ

തിരുവനന്തപുരം: തന്റെ ആത്മകഥയിലേതെന്ന് കാട്ടി മാധ്യമങ്ങൾ പ്രസിദ്ധീകരിക്കുന്ന കാര്യങ്ങൾ വ്യാജമെന്ന് സിപിഐ എം നേതാവ് ഇ പി ജയരാജൻ. കട്ടൻചായയും പരിപ്പുവടയും ഒരു കമ്യൂണിസ്റ്റിന്റെ ജീവിതം എന്ന പേരിൽ ഡി സി ബുക്സ് പ്രസിദ്ധീകരിക്കുന്ന ആത്മകഥയിലേതെന്നു കാട്ടി പുറത്തിറക്കിയിട്ടുള്ള ഭാ​ഗങ്ങൾ കെട്ടിച്ചമച്ചതാണ്. തന്റെ പുസ്തകം പൂർത്തിയായിട്ടില്ല. തലക്കെട്ട് പോലും ആലോചിച്ചിട്ടില്ല. ഒറ്റപ്പേജു പോലും പ്രസിദ്ധീകരിക്കാനായി ആരെയും ചുമതലപ്പെടുത്തിയിട്ടില്ല. ഡി സി ബുക്സുമായി ഒരു കരാറുമില്ല.&nbsp;&nbsp;
മാതൃഭൂമിയും ഡിസി ബുക്സും ആത്മകഥ പ്രസിദ്ധീകരിക്കുന്നതിനായി സമീപിച്ചിരുന്നു. ആലോചിച്ച് പറയാമെന്നു മാത്രമായിരുന്നു മറുപടി നൽകിയത്. താൻ പറയാത്ത കാര്യങ്ങളാണ് ഇപ്പോൾ മാധ്യമങ്ങളിൽ വരുന്നത്. കട്ടൻചായയും പരിപ്പുവടയും എന്ന പേരിൽ താൻ ഒരു പുസ്തകം പ്രസിദ്ധീകരിക്കുമോ? തന്നെയും പാർടിയെയും നശിപ്പിക്കാനുള്ള നീക്കമാണ് ഇത്. പൂർണമായും ആസൂത്രിതമായ പദ്ധതിയാണ്. തെരഞ്ഞെടുപ്പു ദിവസം തന്നെ താൻ പാർടിക്ക് എതിരെന്നു ജനങ്ങളെ തെറ്റിദ്ധരിപ്പിക്കും വിധം വാർത്ത നൽകിയവർക്കെതിരെ നിയമ നടപടി സ്വീകരിക്കുമെന്നും ഇ പി പറഞ്ഞു.
തെരഞ്ഞെടുപ്പ് ആരംഭിക്കുന്നതിന് തൊട്ടു മുൻപായിരുന്നു മാധ്യമങ്ങൾ ഇ പി ജയരാജന്റെ ആത്മകഥയിലെ ഭാഗങ്ങൾ എന്ന് അവകാശപ്പെട്ട് വാർത്ത പ്രസിദ്ധീകരിച്ചത്. ഇ പി ജയരാജൻ പാർടിക്കെതിരെ കടുത്ത വിമർശനങ്ങൾ ഉന്നയിക്കുന്നു എന്നായിരുന്നു അവകാശവാദം.

ആത്മകഥ  പ്രസിദ്ധീകരിക്കാൻ ആരെയും ഏൽപ്പിച്ചിട്ടില്ല; മാധ്യമങ്ങൾ പ്രചരിപ്പിക്കുന്ന വാർത്ത വ്യാജമെന്ന് ഇ പി ജയരാജൻ

കൽപ്പറ്റ: വയനാട് ലോക്‌സഭാ മണ്ഡലത്തിലും ചേലക്കര നിയമസഭാ മണ്ഡലത്തിലും വോട്ടെടുപ്പ് ആരംഭിച്ചു. ബുധനാഴ്ച രാവിലെ ഏഴിന് ആരംഭിച്ച പോളിങ് വൈകിട്ട് ആറിന് അവസാനിക്കും.ഝാർഖണ്ഡ്‌ നിയമസഭയിലേക്കുള്ള ആദ്യഘട്ട തിരഞ്ഞെടുപ്പും പത്തു സംസ്ഥാനങ്ങളിലായി 31 നിയമസഭാ സീറ്റുകളിലേക്കുള്ള ഉപതിരഞ്ഞെടുപ്പും ബുധനാഴ്ച നടക്കും. ഈ ഉപതിരഞ്ഞെടുപ്പുകൾ സർക്കാരുകളെ ബാധിക്കില്ലെങ്കിലും ഈയിടെ നടന്ന ഹരിയാണ നിയമസഭാ തിരഞ്ഞെടുപ്പിൽ തിരിച്ചടി നേരിട്ട കോൺഗ്രസിനും ഇന്ത്യസഖ്യത്തിനും വലിയ പരീക്ഷണംതന്നെയാണ്. 23-നാണ് വോട്ടെണ്ണൽ.
16 സ്ഥാനാർഥികളാണ് വയനാട് ലോക്‌സഭാ ഉപതിരഞ്ഞെടുപ്പിൽ ജനവിധി തേടുന്നത്. ഏഴുമണ്ഡലങ്ങളിലായി 14,71,742 വോട്ടർമാരാണുള്ളത്. എല്ലാ ഒരുക്കങ്ങളും പൂർത്തിയായതായി കളക്ടർ ഡി.ആർ. മേഘശ്രീ അറിയിച്ചു.ചേലക്കര നിയോജകമണ്ഡലത്തിൽ ആകെ ആറ് സ്ഥാനാർഥികളാണുള്ളത്. ഉപതിരഞ്ഞെടുപ്പ് ബാലറ്റിൽ ഒന്നു മുതൽ മൂന്നു വരെയാണ് മുന്നണി സ്ഥാനാർഥികൾ.&nbsp;

ചേലക്കരയിലും വയനാട്ടിലും വോട്ടെടുപ്പ് ആരംഭിച്ചു ;പ്രതീക്ഷയോടെ മുന്നണികൾ

കണ്ണൂര്‍: പോളിങ് ദിനത്തിൽ ഇടതുമുന്നണിയെ വെട്ടിലാക്കി മുൻ എൽ.ഡി.എഫ് കൺവീനർ ഇ.പി. ജയരാജന്റെ ആത്മകഥാ വിവാദം. പാർട്ടി തന്നെ കേൾക്കാൻ തയ്യാറായില്ലെന്നും രണ്ടാം പിണറായി സർക്കാർ ദുർബലമാണെന്നും ആത്മകഥയിൽ പറയുന്നതായാണ് റിപ്പോർട്ട്. കട്ടന്‍ചായയും പരിപ്പുവടയും; ഒരു കമ്യൂണിസ്റ്റിന്റെ ജീവിതം എന്ന പുസ്തകത്തിലാണ് വിമര്‍ശനം.
പാലക്കാട്ടെ ഇടതുമുന്നണി സ്ഥാനാർഥി സരിനെതിരെയും വിമര്‍ശനമുള്ളതായാണ് റിപ്പോര്‍ട്ട്‌. 'സ്വതന്ത്രർ വയ്യാവേലികളാണ്. അദ്ദേഹത്തിന്റെ സ്ഥാനാര്‍ഥിഥ്വം ശരിയോ തെറ്റോ എന്ന് കാലം തെളിയിക്കും. പി.വി അന്‍വറിന്റെ വിഷയം ചൂണ്ടിക്കാട്ടിയാണ് വിമര്‍ശനം.
കണ്ണൂരിൽ 100 കണക്കിന് ആളുകളെ കൊന്ന് തള്ളിയിട്ടും കലിയടങ്ങാത്ത ക്രിമിനൽ സംഘത്തിന്റെ നേതാവാണ് കെ. സുധാകരൻ എന്നാണ് കെ.പി.സി.സി അധ്യക്ഷനെക്കുറിച്ച് പുസ്തകത്തിൽ പറയുന്നത് എന്നാണ് ആരോപണം. രണ്ടാം പിണറായി സർക്കാർ ദുർബലമാണെന്നും വിമർശനമുണ്ട്. എൽ.ഡി.എഫ് കൺവീനർ സ്ഥാനത്ത് നിന്ന് നീക്കിയപ്പോൾ പാർട്ടി തന്നെ കേട്ടില്ല. ഇക്കാര്യം പിന്നീടാണ് അറിഞ്ഞതെന്നും ഇ.പി പറയുന്നു.

പോളിങ് ദിനത്തിൽ ഇടതുമുന്നണിയെ വെട്ടിലാക്കി ഇപി ജയരാജന്റെ ആത്മകഥ ;സർക്കാരിനെതിരെ രൂക്ഷ വിമർശനം

കൊച്ചി: പറവൂരിൽ വെച്ച് മുഖ്യമന്ത്രിയെ കരിങ്കൊടി കാണിച്ച കേസ് ഹൈക്കോടതി റദ്ദാക്കി. കരിങ്കൊടി കാണിച്ചാൽ അപമാനിക്കലാകില്ലെന്നു പറഞ്ഞ കോടതി ഉദ്യോ​ഗസ്ഥരുടെ ജോലി തടസ്സപ്പെടുത്തിയെന്ന കേസും റദ്ദാക്കി.
നിസ്സാര കാര്യങ്ങൾക്ക് കേസെടുക്കുന്ന പ്രവണത വർധിച്ചുവരുന്നതായി കോടതി നിരീക്ഷിച്ചു. പ്രതിഷേധങ്ങൾക്കിടെ ചെറിയ രീതിയിലുള്ള ബലപ്രയോ​ഗം സ്വാഭാവികമാണ്. ചെറിയ വിഷയങ്ങളിലെ നിയമനടപടികൾ ഒഴിവാക്കണമെന്നും കോടതി വ്യക്തമാക്കി.2017-ലാണ് സംഭവം. പറവൂരിൽ മുഖ്യമന്ത്രിക്കെതിരേ കോൺഗ്രസ് പ്രവർത്തകർ കരിങ്കൊടി കാണിച്ചു നടത്തിയ പ്രതിഷേധത്തിലാണ് പോലീസ് കേസെടുത്തത്. ഉദ്യോ​ഗസ്ഥരുടെ ജോലി തടസ്സപ്പെടുത്തിയെന്ന കുറ്റവും ഇവർക്കെതിരേ ചുമത്തിയിരുന്നു. ഈ കേസ് റദ്ദാക്കണമെന്ന് ആവശ്യപ്പെട്ടാണ് പ്രവർത്തകർ ഹൈക്കോടതിയെ സമീപിച്ചത്

മുഖ്യമന്ത്രിയെ കരിങ്കൊടി കാണിച്ച കേസ് ഹൈക്കോടതി റദ്ദാക്കി

മലപ്പുറം: ഭരണഘടനാവിരുദ്ധ പരാമര്‍ശവുമായി ബന്ധപ്പെട്ട കേസില്‍ ഹൈക്കോടതി പുനരന്വേഷണത്തിന് ഉത്തരവിട്ട സാഹചര്യത്തില്‍ അന്വേഷണം നടക്കുമ്പോള്‍ സജി ചെറിയാന്‍ മന്ത്രിയായിരിക്കുന്നത് ശരിയല്ലെന്ന് മുസ്‌ലിം ലീഗ് ദേശീയ സെക്രട്ടറി പി.കെ കുഞ്ഞാലിക്കുട്ടി.
മുമ്പ് അന്വേഷണം നടക്കുമ്പോള്‍ മന്ത്രിയായിരിക്കുന്നത് ശരിയല്ലെന്ന് പറഞ്ഞാണ് അദ്ദേഹം കഴിഞ്ഞ തവണ രാജിവെച്ചത്. സമാന സാഹചര്യമാണ് ഇപ്പോഴുള്ളത്. സാങ്കേതികമായി, അന്വേഷണം നടക്കുന്ന ഘട്ടത്തില്‍ അദ്ദേഹം മന്ത്രിയായിരിക്കാന്‍ പാടില്ല. സംസ്ഥാനത്തെ പോലീസ് കേസ് അന്വേഷിക്കുമ്പോള്‍, ആ അന്വേഷണം ഫലപ്രദമായി നടക്കണമെങ്കില്‍ അദ്ദേഹം മന്ത്രിസ്ഥാനത്തു നിന്ന് മാറി നില്‍ക്കുക എന്നതാണ് കീഴ്‌വഴക്കം. അതുകൊണ്ടുതന്നെ അദ്ദേഹം രാജിവെയ്ക്കുന്നതാകും ഉത്തമമെന്നും കുഞ്ഞാലിക്കുട്ടി പറഞ്ഞു.

സജി ചെറിയാന്‍ മന്ത്രിയായി തുടരുന്നത് ശരിയല്ല; രാജിവെക്കുന്നതാണ് ഉചിതമെന്ന് കുഞ്ഞാലിക്കുട്ടി

തിരുവനന്തപുരം: ഹൈക്കോടതിയുടെ ഉത്തരവ് പരിശോധിച്ച് നിയമപരമായ നടപടികളുമായി മുന്നോട്ടുപോകുമെന്ന് മന്ത്രി സജി ചെറിയാൻ. ധാർമികപരമായ ഒരു പ്രശ്നവുമില്ല. പോലീസ് അന്വേഷിച്ചു. കീഴ്‌ക്കോടതി ആ റിപ്പോർട്ടിനെ സാധൂകരിക്കുന്ന തീരുമാനമെടുത്തു. അതിന് ശേഷമാണ് സിബിഐ അന്വേഷണം ആവശ്യപ്പെട്ട് ഒരാൾ ഹൈക്കോടതിയെ സമീപിച്ചത്.
അന്വേഷണത്തെ സംബന്ധിച്ചാണ് കോടതി പറഞ്ഞിട്ടുള്ളത്. കോടതി അന്വേഷിക്കാൻ പറഞ്ഞിട്ടുള്ള ഭാ​ഗമേതാണോ അതിന്റെ അടിസ്ഥാനത്തിൽ അന്വേഷിക്കട്ടേ. മുമ്പ് ധാർമികതയുടെ പേരിൽ രാജിവെച്ചു. ആ ധാർമികതയുടെ ഉത്തരവാദിത്വം കഴിഞ്ഞു. അതിന് ശേഷം കോടതി വിധിയുടെ അടിസ്ഥാനത്തിൽ മന്ത്രിയായി വീണ്ടും സത്യപ്രതിജ്ഞ ചെയ്തു. താനിപ്പോഴും തന്റെ ജോലി ചെയ്തുകൊണ്ടിരിക്കുകയാണ്.
തന്റെ പ്രസം​ഗത്തിലെ പരാമർശങ്ങളെ കുറിച്ചുള്ള കണ്ടെത്തലുകളിലേക്ക് ഹൈക്കോടതി കടന്നിട്ടില്ല. ഒരു കോടതി പറഞ്ഞു ശരി. അടുത്ത കോടതി പറഞ്ഞു തെറ്റ്. ഇതിന്റെ മുകളിൽ കോടതി ഉണ്ട്. നിയമപരമായ കാര്യങ്ങൾ പരിശോധിച്ചതിന് ശേഷം മാത്രമേ ഒരു അഭിപ്രായം പറയാൻ സാധിക്കുകയുള്ളൂവെന്നും മന്ത്രി പറഞ്ഞു.

നിയമപരമായ നടപടികളുമായി മുന്നോട്ടുപോകും;രാജി വെക്കില്ലെന്ന് സജി ചെറിയാൻ

പെര്‍ത്ത്: ഓസ്‌ട്രേലിയയില്‍ ക്രിക്കറ്റ് മത്സരത്തിനിടെ മുഖത്ത് പന്തിടിച്ചതിനെത്തുടര്‍ന്ന് അംപയര്‍ക്ക് ഗുരുതര പരിക്ക്. പെര്‍ത്തില്‍ നടന്ന ആഭ്യന്തര മത്സരത്തിനിടെയാണ് സംഭവം. ടോണി ഡെ നൊബ്രെഗ എന്ന് പേരുള്ള അംപയര്‍ക്കാണ് പരിക്കേറ്റത്. മുഖത്ത് ഗുരുതര പരിക്കേറ്റ ഇദ്ദേഹത്തെ ആശുപത്രിയില്‍ പ്രവേശിപ്പിച്ചു. ബാറ്ററുടെ സ്‌ട്രെയ്റ്റ് ഡ്രൈവ് നൊബ്രെഗയുടെ മുഖത്ത് വന്നിടിക്കുകയായിരുന്നു.
ഓസ്‌ട്രേലിയന്‍ ആഭ്യന്തര മത്സരത്തില്‍ നോര്‍ത്ത് പെര്‍ത്തും വെംബ്ലി ഡിസ്ട്രിക്ട്‌സും തമ്മിലുള്ള മത്സരം നിയന്ത്രിച്ചുകൊണ്ടിരിക്കേയാണ് സംഭവം. മുഖത്തെ എല്ലുകള്‍ക്ക് പൊട്ടലില്ലെങ്കിലും ശസ്ത്രക്രിയയ്ക്ക് വിധേയനാക്കേണ്ടി വന്നേക്കാം എന്നാണ് റിപ്പോര്‍ട്ടുകള്‍. മുഖത്തിന്റെ ഒരു ഭാഗത്തിനും കണ്‍പോളകള്‍ക്കും പരിക്കേറ്റിട്ടുണ്ട്.

ക്രിക്കറ്റ് മത്സരത്തിനിടെ സ്‌ട്രെയ്റ്റ് ഡ്രൈവില്‍ പന്ത് മുഖത്തിടിച്ചു; അംപയര്‍ക്ക് ഗുരുതര പരിക്ക്

കൊച്ചി: ഭരണഘടന വിരുദ്ധ പരാമർശത്തിൽ മന്ത്രി സജി ചെറിയാന് തിരിച്ചടി. സജി ചെറിയാനെതിരേ കുറ്റം നിലനിൽക്കില്ലെന്ന പോലീസ് റിപ്പോർട്ടും ഈ റിപ്പോർട്ട് അം​ഗീകരിച്ച മജിസ്ട്രേറ്റ് റിപ്പോർട്ടും ഹൈക്കോടതി തള്ളി. കേസിൽ പുനരന്വേഷണത്തിനും ഹൈക്കോടതി ഉത്തരവിട്ടു. സംസ്ഥാന പോലീസ് മേധാവി ക്രൈംബ്രാഞ്ചിലെ വിശ്വാസ്യതയുള്ള ഉദ്യോ​ഗസ്ഥനെക്കൊണ്ട് അന്വേഷിപ്പിക്കണമെന്നും കോടതി വ്യക്തമാക്കി. കേസിന്റെ അന്വേഷണവുമായി ബന്ധപ്പെട്ട് വലിയ പാളിച്ചകളാണ് സംഭവിച്ചിട്ടുള്ളത്. കൃത്യമായ മൊഴി രേഖപ്പെടുത്തുകയോ വേണ്ടുന്ന തെളിവുകൾ ശേഖരിക്കുകയോ ചെയ്തില്ല. വേദിയിൽ ഉണ്ടായിരുന്നവരുടെ മൊഴികൾ മാത്രമാണ് അന്വേഷണ ഉദ്യോ​ഗസ്ഥൻ രേഖപ്പെടുത്തിയിട്ടുള്ളതെന്നും കോടതി ചൂണ്ടികാട്ടി.
ഡിജിപിയുടെ നേതൃത്വത്തിലായിരിക്കണം അന്വേഷണമെന്നും കോടതി നിർദേശിച്ചിട്ടുണ്ട്. ജസ്‌റ്റിസ് ബെച്ചു കുര്യൻ തോമസിന്റെ ബെഞ്ചാണ് കേസ് പരിഗണിച്ചത്.കേസിൽ ക്ലീൻചിറ്റ് നൽകിയ പൊലീസ് റിപ്പോർട്ട് പരിഗണിച്ച് സജി ചെറിയാനെ മജിസ്‌ട്രേറ്റ് കോടതി കുറ്റവിമുക്തനാക്കിയിരുന്നു. ഇതിനെ ചോദ്യം ചെയ്തും സി.ബി.ഐ അന്വേഷണമാവശ്യപ്പെട്ടും അഡ്വ. എം. ബൈജു നോയലാണ് ഹൈക്കോടതിയെ സമീപിച്ചത്.&nbsp;
നാഷണൽ ഓണർ ആക്ടിന്റെ 2003ലെ ഭേദഗതി പ്രകാരം, പ്രസംഗത്തിലെ ചില വാചകങ്ങൾ ഭരണഘടനയോടുള്ള അനാദരമായി കരുതാമെന്ന് കോടതി നേരത്തെ തന്നെ ചൂണ്ടിക്കാട്ടിയിരുന്നു.''ഇന്ത്യയിൽ ഏറ്റവുമധികം ജനങ്ങളെ കൊള്ളയടിക്കാൻ പറ്റിയ ഭരണഘടനയാണ് എഴുതിവച്ചിരിക്കുന്നത്. ജനാധിപത്യം, മതേതരത്വം, കുന്തവും കുടച്ചക്രവുമൊക്കെ അതിന്റെ മൂലയിലുണ്ട്'' എന്നീ പ്രയോഗങ്ങളാണ് സജി ചെറിയാൻ നടത്തിയത്. മന്ത്രിയുടെ ശബ്ദപരിശോധന നടത്താതെയും ചില സാക്ഷിമൊഴികൾ തള്ളിയുമാണ് പൊലീസ് നിഗമനമെന്ന് ഹർജിക്കാരൻ ആരോപണം കോടതി ശരിവച്ചു. ഹർജി നിലനിൽക്കുന്നതല്ലെന്നും ആരോപണങ്ങൾ ശരിയല്ലെന്നായിരുന്നു സർക്കാർ വാദം.2022 ജൂലായ് മൂന്നിന് സി.പി.എം മല്ലപ്പള്ളി ഏരിയാ കമ്മിറ്റിയുടെ പരിപാടിയിൽ സജി ചെറിയാൻ നടത്തിയ പ്രസംഗമാണ് കേസായത്. തുടർന്ന് അദ്ദേഹം രാജിവച്ചെങ്കിലും വിചാരണക്കോടതി കുറ്റവിമുക്തനാക്കിയതോടെ മന്ത്രി സ്ഥാനത്ത് തിരിച്ചെത്തി.

ഭരണഘടന വിരുദ്ധ പരാമർശം; മന്ത്രി സജി ചെറിയാന് തിരിച്ചടി, പുനരന്വേഷണത്തിന് ഹൈക്കോടതി ഉത്തരവ്

Search Results for: 13.11.2024