തിരുവനന്തപുരം: വാഹനങ്ങളില്‍ കര്‍ശന പരിശോധന നടത്തും. അതിനാൽ യാത്രക്കാര്‍ രേഖകള്‍ കരുതണമെന്ന് മോണിറ്ററിങ് വിങ് നോഡല്‍ ഓഫീസറായ ഫിനാന്‍സ് ഓഫീസര്‍ അറിയിച്ചു. ലോകസഭാ തിരഞ്ഞെടുപ്പില്‍ എതെങ്കിലും പ്രത്യേക സ്ഥാനാര്‍ഥിക്ക് അനുകൂലമായി വോട്ട് ചെയ്യുന്നതിന് വോട്ടര്‍മാര്‍ക്ക് പണമോ, പാരിതോഷികമോ, മദ്യമോ, മറ്റ് സാധന സാമഗ്രികളോ വിതരണം ചെയ്യുന്നത് 1951 ലെ ജന പ്രാതിനിധ്യ നിയമം വകുപ്പ് 123, ഇന്ത്യന്‍ ശിക്ഷ നിയമങ്ങള്‍ അനുസരിച്ച് ശിക്ഷാര്‍ഹമായ കുറ്റമാണ്.
പോളിങ് കഴിയുന്നത് വരെ വാഹനങ്ങളില്‍ കൊണ്ടുപോകുന്ന പണം, മദ്യം, ആയുധങ്ങള്‍, ആഭരണങ്ങള്‍, സമ്മാനങ്ങള്‍ പോലുള്ള സാമഗ്രികള്‍ എന്നിവ സംബന്ധിച്ച് കര്‍ശനമായ പരിശോധന നടത്തും. ഇതിനായി ജില്ലയില്‍ ഫ്‌ളയിംഗ് സ്‌ക്വാഡ്, സ്റ്റാറ്റിക് സര്‍വേലന്‍സ് ടീമുകളെ വിന്യസിച്ചിട്ടുണ്ട്. 50,000 രൂപയില്‍ കൂടുതല്‍ ഉള്ള പണം, മൊത്തമായി കൊണ്ടു പോകുന്ന വസ്ത്രങ്ങള്‍, ആഭരണങ്ങള്‍, മറ്റ് സാമഗ്രികള്‍ സംബന്ധിച്ച് മതിയായ രേഖകള്‍ എല്ലാ യാത്രക്കാരും കൈവശം കരുതണമെന്നും പൊതുജനങ്ങള്‍ പരിശോധനയില്‍ ജില്ലാ ഭരണകൂടവുമായി സഹകരിക്കണമെന്നും എക്‌സ്റ്റെന്‍ഡിച്ചര്‍ മോണിറ്ററിങ് വിങ് നോഡല്‍ ഓഫീസറായ ഫിനാന്‍സ് ഓഫീസര്‍ അറിയിച്ചു.

തിരഞ്ഞെടുപ്പ്: വാഹനങ്ങളില്‍ പരിശോധന കർശനമാക്കും, യാത്രക്കാര്‍ രേഖകള്‍ കരുതണം

Kerala

കൊച്ചി: ലോക്‌സഭാ തിരഞ്ഞെടുപ്പിന്റെ ഭാഗമായി ഇലക്ഷന്‍ കമീഷന്റെ ഉത്തരവനുസരിച്ച് ജില്ലാ ഭരണ കേന്ദ്രത്തില്‍ രൂപീകരിച്ചിട്ടുള്ള സ്‌ക്രീനിങ് കമ്മിറ്റിയുടെ അനുമതിയോടെയല്ലാതെ കൈവശം സൂക്ഷിച്ചിട്ടുള്ള ആയുധങ്ങള്‍ എല്ലാ ആയുധ ലൈസന്‍സികളും ബന്ധപ്പെട്ട പൊലീസ് സ്റ്റേഷനുകളില്‍ അടിയന്തരമായി സറണ്ടര്‍ ചെയ്യണമെന്ന് എറണാകുളം കലക്ടര്‍ അറിയിച്ചു. ഇക്കാര്യത്തില്‍ വീഴ്ച്ച വരുത്തുന്ന പക്ഷം ആയുധനിയമവും ചട്ടങ്ങളും, ഇന്ത്യന്‍ ശിക്ഷാനിയമം സെക്ഷന്‍ 188 എന്നിവ പ്രകാരമുള്ള നിയമ നടപടികള്‍ സ്വീകരിക്കും.
മാര്‍ച്ച് 20 ന് കലക്ടറേറ്റില്‍ കൂടിയ സ്‌ക്രീനിങ് കമ്മിറ്റി മുന്‍പാകെ ലഭിച്ച 29 അപേക്ഷകളില്‍ 26 എണ്ണം അനുവദിക്കാനും മൂന്ന് എണ്ണം നിരസിക്കുവാനും തീരുമാനിച്ചു .അടുത്ത സ്‌ക്രീനിങ് കമ്മിറ്റി മാര്‍ച്ച് 27 ന് ഉച്ച കഴിഞ്ഞ് 2.30 ന് ജില്ലാ മജിസ്‌ട്രേറ്റിന്റെ ചേംബറില്‍ ചേരും.
ആയുധം കൈവശം വെക്കുന്നതിന് അനുമതി ആവശ്യമുള്ളവര്‍ അപേക്ഷയും ആയുധ ലൈസന്‍സിന്റെ പകര്‍പ്പും അപേക്ഷപ്രകാരമുള്ള മറ്റു രേഖകളും മാര്‍ച്ച് 27 നകം കലക്ടര്‍ മുന്‍പാകെ സമര്‍പ്പിക്കണം.

ലോക്‌സഭാ തിരഞ്ഞെടുപ്പ്: ആയുധങ്ങള്‍ അടിയന്തരമായി സറണ്ടര്‍ ചെയ്യണം

എറണാകുളം: കോതമംഗലം കള്ളാട് വീട്ടമ്മയെ തലക്കടിയേറ്റ് കൊല്ലപ്പെട്ട നിലയിൽ കണ്ടെത്തി. ചെങ്ങമനാട്ട് ഏലിയാസിൻ്റ ഭാര്യ സാറാമ്മ(72)യാണ് കൊല്ലപ്പെട്ടത്. മോഷണത്തിനിടെ നടന്ന കൊലപാതകമാണെന്നാണ് പ്രാഥമിക നിഗമനം.
തിങ്കളാഴ്ച ഉച്ചയ്ക്ക് 1.30-നും 3.30-നും ഇടയിലാണ് കൃത്യം നടന്നത് എന്നാണ് കരുതുന്നത്. സംഭവസമയം സാറാമ്മ വീട്ടിൽ തനിച്ചായിരുന്നു. ജോലി കഴിഞ്ഞ് മൂന്നരയോടെ വീട്ടിൽ തിരിച്ചെത്തിയ മരുമകളാണ് സാറാമ്മയെ വീടിനകത്ത് മരിച്ച നിലയിൽ ആദ്യം കണ്ടത്.
ഇരുമ്പുപോലുള്ള കനമുള്ള വസ്തുകൊണ്ട് തലയ്ക്കടിയേറ്റ് നിലത്തുവീണ നിലയിലായിരുന്നു മൃതദേഹം. തെളിവ് നശിപ്പിക്കാൻ മൃതദേഹത്തിനു ചുറ്റും മഞ്ഞൾപ്പൊടി വിതറിയിട്ടുണ്ട്. സാറാമ്മ ധരിച്ചിരുന്ന സ്വർണാഭരണങ്ങൾ നഷ്ടപ്പെട്ടിട്ടുണ്ടെന്നാണ് വിവരം. കോതമംഗലം പോലീസ് സ്ഥലത്തെത്തി നടപടികൾ സ്വീകരിച്ചു. ഫോറൻസിക് വിദഗ്ധരും ഡോഗ് സ്ക്വാഡും പരിശോധന നടത്തും.പ്രദേശത്ത് ഈ രീതിയിലുള്ള സംഭവങ്ങൾ മുമ്പ് ഉണ്ടായിട്ടില്ലെന്നും കൃത്യമായ അ‌ന്വേഷണം ഉറപ്പാക്കുമെന്നും സ്ഥലത്തെത്തിയ ആന്റണി ജോൺ എം.എൽ.എ. പറഞ്ഞു.

കോതമംഗലത്ത് വീട്ടമ്മയെ തലയ്ക്കടിച്ച് കൊലപ്പെടുത്തി

തിരുവനന്തപുരം: ലോക്‌സഭാ തെരഞ്ഞെടുപ്പ് പ്രചാരണ യോഗങ്ങളിൽ നിന്ന് മുഖ്യമന്ത്രി പിണറായി വിജയനെ വിലക്കണമെന്ന് ആവശ്യപ്പെട്ട് കേന്ദ്ര തെരഞ്ഞെടുപ്പ് കമ്മീഷന് ബി.ജെ.പി പരാതി നൽകി. മലപ്പുറത്ത് ഇടതുമുന്നണി സംഘടിപ്പിച്ച ഭരണഘടനാ സംരക്ഷണ റാലിയിലെ മുഖ്യമന്ത്രിയുടെ പ്രസംഗത്തിനെതിരെയാണ് ബി.ജെ.പി സംസ്ഥാന എക്സിക്യൂട്ടീവ് അംഗം കെ.കെ. സുരേന്ദ്രൻ പരാതി നൽകിയത്. മുസ്ലിം സമുദായത്തിനിടയിൽ ഭയവും വെറുപ്പും വളർത്തുക എന്ന ലക്ഷ്യത്തോടെ മുഖ്യമന്ത്രി പിണറായി വിജയൻ പ്രസംഗിച്ചതായി പരാതിയിൽ ആരോപിക്കുന്നു.
നിയമത്തി​െൻറ ബലത്തിൽ മുസ്ലിങ്ങൾക്ക് ഇന്ത്യയിൽ ജീവിക്കാൻ കഴിയില്ലെന്നാണ് മുഖ്യമന്ത്രി പറഞ്ഞതെന്നും ഹിന്ദു മുസ്ലിം വിഭജനം സൃഷ്ടിച്ച് വിദ്വേഷം വളർത്താനാണ് മുഖ്യമന്ത്രി ശ്രമിച്ചതെന്നും പരാതിയിൽ പറയുന്നു. ഈ സാഹചര്യത്തിലാണ് തെരഞ്ഞെടുപ്പ് പ്രചാരണ യോഗങ്ങളിൽ പ​ങ്കെടുക്കുന്നത് വിലക്കണമെന്ന് ബി.ജെ.പി ആവശ്യ​പ്പെടുന്നത്.

മുഖ്യമന്ത്രിയെ ലോക്‌സഭാ തെരഞ്ഞെടുപ്പ് പ്രചാരണ യോഗങ്ങളിൽ നിന്ന് വിലക്കണം; തെരഞ്ഞെടുപ്പ് കമ്മീഷന് പരാതിയുമായി ബി ജെ പി

എറണാകുളം: വയനാട് എം.പിയും കോണ്‍ഗ്രസ് നേതാവുമായ രാഹുല്‍ഗാന്ധിക്കെതിരെ പരിഹാസവുമായി ബി.ജെ.പി. സംസ്ഥാന അധ്യക്ഷനും വയനാട്ടിലെ സ്ഥാനാര്‍ഥിയുമായ കെ. സുരേന്ദ്രന്‍. മണ്ഡലത്തില്‍ രാഹുല്‍ഗാന്ധി വന്നതിനേക്കാള്‍ കൂടുതല്‍ ആനകള്‍ വന്നുവെന്ന് സുരേന്ദ്രന്‍ പറഞ്ഞു. കഴിഞ്ഞ അഞ്ചുവര്‍ഷത്തിനിടെ ആറോ ഏഴോ തവണയാണ് രാഹുല്‍ഗാന്ധി വയനാട്ടില്‍ വന്നതെന്നും അദ്ദേഹംവിമര്‍ശിച്ചു. എറണാകുളത്ത് എന്‍.ഡി.എ. സ്ഥാനാര്‍ഥി കെ.എസ്. രാധാകൃഷ്ണന്റെ തിരഞ്ഞെടുപ്പ് കമ്മിറ്റി ഓഫീസ് ഉദ്ഘാടനം ചെയ്യുകയായിരുന്നു അദ്ദേഹം.
'വരുന്നു, രണ്ട് പൊറോട്ട കഴിക്കുന്നു, ഇന്‍സ്റ്റഗ്രാമില്‍ ഒരു വീഡിയോ ഇടുന്നു, തിരിച്ചുപോകുന്നു. പിന്നെ എങ്ങോട്ടാണ് പോവുന്നതെന്ന് അറിയില്ല', സുരേന്ദ്രന്‍ പരിഹസിച്ചു. 'വയനാട്ടിലെ ജനസംഖ്യയില്‍ 20% വനവാസികളാണ്. രാഹുല്‍ഗാന്ധി അവര്‍ക്കുവേണ്ടി എന്തുചെയ്തു? നിങ്ങള്‍ കഴിഞ്ഞ അഞ്ചുകൊല്ലം വയനാട്ടില്‍ എന്താണ് ചെയ്തതെന്ന് രാഹുല്‍ഗാന്ധിയോടും കോണ്‍ഗ്രസിനോടും വളരെ വിനയത്തോടെ ചോദിക്കാന്‍ ആഗ്രഹിക്കുകയാണ്', അദ്ദേഹം പറഞ്ഞു.
വയനാടിനെപ്പോലെ ഇത്രയും വികസന പ്രതിസന്ധിയുള്ള സ്ഥലം വേറെയില്ല. രാഹുല്‍ഗാന്ധി വന്നതിനേക്കാളും ആന വയനാട്ടില്‍ വന്നുവെന്നാണ് അവിടെ തമാശയായി ആളുകള്‍ പറയുന്നത്. എന്തിനാണ് ഇങ്ങനെയൊരു എം.പി. ടൂറിസ്റ്റ് വിസയിലൊരു എം.പിയെ ആവശ്യമുണ്ടോ? വയനാടിന് എന്തു പദ്ധതിയാണ് രാഹുല്‍ഗാന്ധി കൊണ്ടുവന്നതെന്നും സുരേന്ദ്രന്‍ ചോദിച്ചു.

വയനാട്ടിൽ ഇതിൽ കൂടുതൽ ആനകള്‍ വന്നു; വരുന്നു രണ്ട് പൊറോട്ട കഴിക്കുന്നു പോകുന്നു; രാഹുലിനെതിരേ സുരേന്ദ്രൻ

തിരുവനന്തപുരം∙ എസ്എസ്എൽസി പരീക്ഷ അവസാനിച്ചു. ഏപ്രിൽ 3ന് മൂല്യനിർണയം ആരംഭിക്കും. 70 ക്യാംപുകളിലായി പതിനായിരത്തോളം അധ്യാപകർ പങ്കെടുക്കും. കേരളം, ലക്ഷദ്വീപ്, ഗൾഫ് മേഖലകളിലെ 2,971 പരീക്ഷാ കേന്ദ്രങ്ങളിലായി 4,27,105 വിദ്യാർത്ഥികളാണ് ഈ വർഷം എസ്എസ്എൽസി പരീക്ഷ എഴുതിയത്. കേരളത്തിൽ 2955, ഗൾഫ് മേഖലയിൽ 7, ലക്ഷദ്വീപിൽ 9 പരീക്ഷാ കേന്ദ്രങ്ങളുണ്ടായിരുന്നു.
റഗുലർ വിഭാഗത്തിൽ 4,27,105 വിദ്യാർഥികളും പ്രൈവറ്റ് വിഭാഗത്തിൽ 118 പേരും പരീക്ഷയെഴുതി. മലയാളം മീഡിയത്തിൽ 1,67,772 വിദ്യാർഥികളും ഇംഗ്ലീഷ് മീഡിയത്തിൽ 2,56,135 വിദ്യാർത്ഥികളും പരീക്ഷ എഴുതി. ഗൾഫ് മേഖലയിൽ 536 വിദ്യാർഥികളും ലക്ഷദ്വീപിൽ 285 വിദ്യാർഥികളും പരീക്ഷയെഴുതി. ഏറ്റവും കൂടുതൽ വിദ്യാർഥികൾ പരീക്ഷ എഴുതിയ കേന്ദ്രം തിരൂരങ്ങാടി പികെഎംഎംഎച്ച്എസ് എടരിക്കോടാണ്. 2085 വിദ്യാർഥികളാണ് ഇവിടെ പരീക്ഷ എഴുതിയത്.
ഏറ്റവും കുറവ് വിദ്യാർഥികൾ പരീക്ഷ എഴുതിയത് മൂവാറ്റുപുഴ എൻഎസ്എസ്എച്ച്എസ്, തിരുവല്ല ഗവൺമെന്റ് എച്ച്എസ് കുട്ടൂർ, ഹസ്സൻ ഹാജി ഫൗണ്ടേഷൻ ഇന്റർനാഷണൽ എച്ച്എസ്, എടനാട് എൻഎസ്എസ് എച്ച്എസ് എന്നീ സ്‌കൂളുകളിലാണ്. ഇവിടെ ഓരോ വിദ്യാർഥി വീതമാണ് പരീക്ഷ എഴുതിയത്. ഹയർ സെക്കൻഡറി മൂല്യനിർണയം ഏപ്രിൽ 3ന് ആരംഭിക്കും. 77 ക്യാംപുകളിലായി ഇരുപത്തി അയായിരത്തോളം അധ്യാപകർ പങ്കെടുക്കും. വൊക്കേഷണൽ ഹയർ സെക്കൻഡറി മൂല്യനിർണയ ക്യാംപുകളും ഏപ്രിൽ 3ന് ആരംഭിക്കും. 8 ക്യാംപുകളിലായി 2200 അധ്യാപകർ പങ്കെടുക്കും. തിരഞ്ഞെടുപ്പ് നടപടി ക്രമങ്ങളെ ബാധിക്കാത്ത രീതിയിലായിരിക്കും മൂല്യനിർണയ ക്യാംപുകളുടെ പ്രവർത്തനം. മാർച്ച് 31 ഈസ്റ്റർ ദിനത്തിൽ മൂല്യനിർണയ ക്യാംപുകൾ ഉണ്ടാകില്ല.
&nbsp;

എസ്എസ്എൽസി പരീക്ഷ അവസാനിച്ചു; മൂല്യനിർണയം ഏപ്രിൽ 3ന് തുടങ്ങും

വേനൽക്കാലമാണ്..സഹിക്കാൻ വയ്യാത്ത ചൂടും..ശരീരത്തിൽ നിന്ന് അളവിലേറെ ജലാംശം നഷ്ടപ്പെട്ടുകൊണ്ടിരിക്കുന്ന സമയം.. ആവശ്യത്തിന് ജലാംശം ശരീരത്തിലുണ്ടായില്ലെങ്കിൽ അത് പലരോഗങ്ങൾക്കും വഴിവെക്കും. വേനൽക്കാലത്ത് ധാരാളം പഴങ്ങളും പച്ചക്കറികളും ഭക്ഷണത്തിൽ ഉൾപ്പെടുത്തണം. അവയിൽ നിർബന്ധമായും ഉണ്ടായിരിക്കേണ്ട ഒന്നാണ് കക്കരി അഥവാ കുക്കുമ്പർ. 90 ശതമാനം ജലാംശം അടങ്ങിയിരിക്കുന്ന കക്കരി പോഷകങ്ങളുടെയും ആന്റിഓക്സിഡന്റുകളുടെയും മികച്ച ഉറവിടം കൂടിയാണ്..കക്കരി ജ്യൂസായോ,സാലഡ് രൂപത്തിലോ കഴിക്കാം.
ജലാംശം നിലനിർത്തും
കക്കരിയുടെ ഏറ്റവും എടുത്തുപറയേണ്ട പ്രത്യേക ജലാംശം നിലനിർത്തും എന്നത് തന്നെയാണ്. വേനൽക്കാലത്ത് ശരീരത്തിൽ ജലാംശം നിലനിർത്താൻ കക്കരി ജ്യൂസ് കുടിക്കുന്നത് മൂലം സാധിക്കും.
ആരോഗ്യകരമായ ചർമ്മത്തിന്
കക്കരി കഴിക്കുന്നത് ചർത്തിന്റെ ആരോഗ്യത്തിനും മികച്ചതാണ്. ആരോഗ്യകരമായ ചർമ്മത്തിന് ജലാംശം അത്യാവശ്യമാണ്. ഇത് കക്കരിയിലൂടെ ലഭിക്കും. കൂടാതെ ചർമ്മത്തിന് ഇലാസ്റ്റിസിറ്റി നൽകുകയും ചെയ്യും. ചർമ്മിന് പ്രായക്കൂടുതൽ തോന്നുന്നത് പിടിച്ചുനിർത്താനും സാധിക്കും.
ദഹനത്തിന്
കക്കരിയിൽ ധാരാളം നാരുകൾ അടങ്ങിയിട്ടുണ്ട്, ഇത് ദഹന ആരോഗ്യത്തിന് അത്യന്താപേക്ഷിതമാണ്. ഭക്ഷണത്തിൽ കക്കരി ഉൾപ്പെടുത്തുന്നത് മലബന്ധം തടയുകയും ചെയ്യുന്നു.നെഞ്ചെരിച്ചിൽ,ഗ്യാസ്ട്രബിൾ,അസിഡിറ്റി തുടങ്ങിയ പ്രശ്‌നങ്ങൾ പരിഹരിക്കാനും സഹായിക്കും.
ആന്റിഓക്സിഡന്റ് ഗുണങ്ങൾ
ശരീരത്തിലെ ഹാനികരമായ ഫ്രീ റാഡിക്കലുകളെ നിർവീര്യമാക്കാൻ സഹായിക്കുന്ന ബീറ്റാ കരോട്ടിൻ, ഫ്‌ലേവനോയ്ഡുകൾ തുടങ്ങിയ ആന്റിഓക്സിഡന്റുകൾ കക്കരിയിൽ അടങ്ങിയിട്ടുണ്ട്. ആൻറി ഓക്‌സിഡൻറുകൾ അടങ്ങിയ ഭക്ഷണങ്ങൾ കഴിക്കുന്നത് കോശങ്ങളെ കേടുപാടുകളിൽ നിന്ന് സംരക്ഷിക്കും. വിട്ടുമാറാത്ത രോഗങ്ങളുടെ സാധ്യത കുറയ്ക്കുകയും ചെയ്യും.
ഭാര നിയന്ത്രണത്തിന്
ശരീര ഭാരം കുറക്കാൻ ശ്രമിക്കുന്നവർ കക്കരിക്ക ഭക്ഷണത്തിൽ ഉൾപ്പെടുന്നത് നല്ലതാണ്. 90 ശതമാനത്തിലധികം വെള്ളം അടങ്ങിയിരിക്കുന്നതിന് പുറമെ കക്കരിയിൽ കലോറി വളരെ കുറവാണ്. കൂടാതെ കക്കരി വിറ്റാമിൻ കെ, വിറ്റാമിൻ സി, പൊട്ടാസ്യം, മഗ്‌നീഷ്യം എന്നിവയുടെ മികച്ച ഉറവിടമാണ്.

കക്കരി കഴിച്ചാൽ ഒന്നല്ല, പലതുണ്ട് ഗുണങ്ങൾ

Health

ന്യൂഡല്‍ഹി: യു.കെയിലുണ്ടായ വാഹനാപകടത്തില്‍ ഇന്ത്യന്‍ ഗവേഷകവിദ്യാര്‍ഥിനിയ്ക്ക് ദാരുണാന്ത്യം. ലണ്ടന്‍ സ്‌കൂള്‍ ഓഫ് ഇക്കണോമിക്‌സില്‍ പിഎച്ച്ഡി വിദ്യാർഥി ചൈസ്ത കൊച്ചാർ (33) ആണ് അപകടത്തില്‍ മരിച്ചത്. ലണ്ടനിലെ വസതിയിലേക്ക് സൈക്കിളില്‍ മടങ്ങുകയായിരുന്ന ചൈസ്ത ട്രക്ക് തട്ടിയാണ് മരിച്ചത്. കഴിഞ്ഞയാഴ്ചയായിരുന്നു അപകടം. നേരത്തെ നിതി ആയോഗില്‍ ഉദ്യോഗസ്ഥയായിരുന്ന ചൈസ്തയുടെ മരണവിവരം നിതി ആയോഗ് മുന്‍ സി.ഇ.ഒ. അമിതാഭ് കാന്ത് ആണ് എക്‌സ് പ്ലാറ്റ്‌ഫോമിലൂടെ പങ്കുവെച്ചത്.
"ചൈസ്ത കൊച്ചാര്‍ നിതി ആയോഗിലെ ലൈഫ് പദ്ധതിയുടെ നഡ്ജ് യൂണിറ്റില്‍ എനിക്കൊപ്പം പ്രവര്‍ത്തിച്ചിരുന്നു. ലണ്ടന്‍ സ്കൂള്‍ ഓഫ് ഇക്കണോമിക്‌സില്‍ ബിഹേവിയറല്‍ സയന്‍സില്‍ ഗവേഷണം നടത്തിവരികയായിരുന്നു. ലണ്ടനില്‍ സൈക്കിള്‍സവാരിക്കിടെയുണ്ടായ വാഹനാപകടത്തില്‍ അന്തരിച്ചു. അതിസമര്‍ഥയും ധൈര്യവതിയും ഊര്‍ജസ്വലയുമായിരുന്നു ചൈസ്ത. വളരെ നേരത്തേ യാത്രയായി. അവളുടെ ആത്മാവിന് നിത്യശാന്തി നേരുന്നു", അമിതാഭ് കാന്ത് കുറിച്ചു.
മാര്‍ച്ച് 19-ന് മാലിന്യം കൊണ്ടുപോകുന്ന ട്രക്കിടിച്ചായിരുന്നു ചൈസ്തയുടെ അന്ത്യം. അപകടസമയത്ത് ഭര്‍ത്താവ് പ്രശാന്ത്, ചൈസ്തയുടെ തൊട്ടുമുന്നിലായി സഞ്ചരിക്കുന്നുണ്ടായിരുന്നു. അപടകമുണ്ടായ ഉടനേതന്നെ പ്രശാന്ത് അരികിലെത്തിയെങ്കിലും ചൈസ്ത തല്‍ക്ഷണം മരിച്ചിരുന്നു. ചൈസ്തയുടെ ഭൗതികശരീരം ഏറ്റുവാങ്ങാനെത്തിയ വിരമിച്ച ലെഫ്റ്റനന്റ് ജനറല്‍ കൂടിയായ പിതാവ് എസ്. പി. കൊച്ചാര്‍ ലിങ്ഡ്ഇന്നിലൂടെ ചൈസ്തയുടെ ഓര്‍മകള്‍ പങ്കുവെച്ചു.
ഹരിയാണയിലെ ഗുരുഗ്രാമില്‍ താമസിച്ചിരുന്ന ചൈസ്ത കഴിഞ്ഞ കൊല്ലം സെപ്റ്റംബറിലാണ് ഗവേഷണത്തിനായി ലണ്ടനിലേക്ക് പോയത്. ഡല്‍ഹി സര്‍വകാലാശാല, അശോക സര്‍വകലാശാല, പെന്‍സില്‍വാനിയ-ഷിക്കാഗോ സര്‍വകലാശാലകളിലായിരുന്നു ചൈസ്തയുടെ പഠനം.

ലണ്ടനില്‍ വാഹനാപകടം; ഇന്ത്യന്‍ ഗവേഷകവിദ്യാര്‍ഥി മരിച്ചു

വടകര: ദേശീയ ശാസ്ത്രദിനാചരണത്തിന്റെ ഭാഗമായി ഇന്ത്യന്‍ ഫോട്ടോബയോളജി സൊസൈറ്റി കൊല്‍ക്കത്തയില്‍ സംഘടിപ്പിച്ച യങ് സയന്റിസ്റ്റ് കോണ്‍ക്ലേവില്‍ ജെയിംസ് പെര്‍കിന്‍സണ്‍ ആന്‍ഡ് സുഖ്ദേവ് റോയ് മഹാപത്ര സ്മാരക യുവശാസ്ത്രജ്ഞപുരസ്‌കാരം നേടിയ വി.ടി.കെ. ശ്രദ്ധ (ഐസര്‍, ഭോപാല്‍). വടകര പഴങ്കാവിലെ പള്ളിയില്‍ ശശിയുടെയും ബിന്ദുവിന്റെയും മകളാണ്.

വി.ടി.കെ. ശ്രദ്ധയ്ക്ക് നേട്ടം

Vadakara

പതിയാരക്കര: ചാവോടിയിൽ പാർവതി ഭവൻ വസന്തകുമാരി (87) അന്തരിച്ചു. അച്ഛൻ: പരേതനായ കണാരൻ പണിക്കർ. അമ്മ: പരേതയായ ചിരുതയി. സഹോദരങ്ങൾ: രാധാകൃഷ്ണ പണിക്കർ, പരേതരായ സരസ, വേണുഗോപാലൻ, ചന്ദ്രവദനൻ. സഞ്ചയനം വ്യാഴാഴ്ച.

പതിയാരക്കര ചാവോടിയിൽ വസന്തകുമാരി അന്തരിച്ചു

Obituary

തിരുവനന്തപുരം: കറുപ്പ് നിറമുള്ളവർ മോഹിനിയാട്ട മത്സരത്തിൽ പങ്കെടുക്കരുതെന്ന പരാമർശം നടത്തിയതിന് പിന്നാലെ ക്രൂരമായ സൈബർ ആക്രമണമാണ് നേരിടുന്നതെന്ന് കലാമണ്ഡലം സത്യഭാമ. കുടുംബത്തെ വരെ വലിച്ചിഴച്ച് അധിക്ഷേപം തുടരുകയാണെന്നും ആരെയും വേദനിപ്പിക്കാൻ ഉദ്ദേശിച്ചിട്ടില്ലെന്നും സത്യഭാമ സോഷ്യൽ മീഡിയയിൽ പങ്കുവച്ച കുറിപ്പിൽ പറഞ്ഞു.
താൻ ചില യൂട്യൂബ് ചാനലുകളോട് പറഞ്ഞ കാര്യത്തെ മാദ്ധ്യമങ്ങൾ വളച്ചൊടിച്ചെന്നും പിന്നാലെ വലിയ രീതിയിലുള്ള സൈബർ അധിക്ഷേപം നേരിടുന്നു എന്നുമാണ് സത്യഭാമ ആരോപിക്കുന്നത്. തന്റെ കുടുംബത്തെയും സ്വകാര്യതയെയും വലിച്ചിഴച്ച് കൊണ്ട് അപമാനിക്കാൻ ശ്രമിക്കുകയാണെന്നും തന്റെ അഭിമുഖം ആരെയും വേദനിപ്പിക്കാൻ ഉദ്ദേശിച്ചിട്ടല്ലെന്നും സത്യഭാമ കൂട്ടിച്ചേർത്തു. ഇതാദ്യമയാണ് സത്യഭാമ തന്റെ പരാമർശത്തിൽ ഖേദം പ്രകടിപ്പിക്കുന്ന രീതിയിൽ പ്രതികരിക്കുന്നത്. നേരത്തെ മാദ്ധ്യമങ്ങൾ പ്രതികരണം തേടിയപ്പോഴും സത്യഭാമ പരാമർശത്തിൽ ഉറച്ചുനിന്നിരുന്നു.
സംഭവം വിവാദമായതോടെ കാലാസാംസ്‌കാരിക പ്രവർത്തകരും വിവിധ രാഷ്ട്രീയ പാർട്ടികളും രംഗത്തെത്തിയിരുന്നു. 'മോഹിനിയായിരിക്കണം എപ്പോഴും മോഹിനിയാട്ടം കളിക്കേണ്ടത്. ഇയാളെ കണ്ട് കഴിഞ്ഞാൽ കാക്കയുടെ നിറം. എല്ലാം കൊണ്ടും കാല് ഇങ്ങനെ അകത്തിവച്ച് കളിക്കുന്ന കലാരൂപമാണ് മോഹിനിയാട്ടം. ഒരു പുരുഷൻ ഇങ്ങനെ കാല് കവച്ചുവച്ച് മോഹിനിയാട്ടം കളിക്കുകയെന്നുപറഞ്ഞാൽ ഇതുപോലെയൊരു അരോചകത്വം വേറെയില്ല. ആൺപിള്ളേർക്ക് മോഹിനിയാട്ടം ചേരുകയാണെങ്കിൽ തന്നെ അവർക്ക് അതുപോലെ സൗന്ദര്യം വേണം. ആൺപിള്ളേരിൽ നല്ല സൗന്ദര്യമുള്ളവർ ഇല്ലേ? ഇവനെ കണ്ടാൽ ദൈവം പോലും, പെറ്റ തള്ള പോലും സഹിക്കില്ല'- ഇങ്ങനെയായിരുന്നു സത്യഭാമയുടെ പരാമർശം.

'ക്രൂരമായ സൈബർ അധിക്ഷേപം നേരിടുന്നു'; പരാതിയുമായി സത്യഭാമ

തിരുവനന്തപുരം: വോട്ട് അഭ്യര്‍ഥിച്ചുകൊണ്ട് സ്ഥാപിച്ച ബോര്‍ഡില്‍ വിഗ്രഹത്തിന്റെ ചിത്രം ഉള്‍പ്പെടുത്തിയതിനെതിരെ പരാതി. ആറ്റിങ്ങല്‍ മണ്ഡലത്തിലെ എന്‍.ഡി.എ. സ്ഥാനാര്‍ഥി വി. മുരളീധരനെതിരെയാണ് തിരഞ്ഞെടുപ്പ് കമ്മിഷന് എല്‍.ഡി.എഫ്. പരാതി നല്‍കിയത്.
ആറ്റിങ്ങല്‍ മണ്ഡലത്തിലെ വര്‍ക്കലയിലാണ് വിവാദമായ ബോര്‍ഡ് സ്ഥാപിച്ചത്. പ്രധാനമന്ത്രിയുടേയും വി. മുരളീധരന്റേയും ചിത്രത്തിനൊപ്പമാണ് വിഗ്രഹത്തിന്റെ ചിത്രവും ഉള്‍പ്പെടുത്തിയത്. തിരഞ്ഞെടുപ്പ് പ്രചരണത്തിനായി വിഗ്രഹത്തിന്റെ ചിത്രം ഉപയോഗിച്ചു എന്നാണ് എല്‍.ഡി.എഫിന്റെ ആരോപണം. ഇത് ഗുരുതരമായ ചട്ടലംഘനമാണെന്ന് ചൂണ്ടിക്കാട്ടിയാണ് തിരഞ്ഞെടുപ്പ് കമ്മീഷന് പരാതി നല്‍കിയത്.
തിരഞ്ഞെടുപ്പ് പ്രചാരണത്തിന് മതചിഹ്നങ്ങള്‍ ഉപയോഗിക്കുന്നത് പെരുമാറ്റച്ചട്ടത്തിന്റെ ലംഘനമാണ്. ഇക്കാര്യം സംബന്ധിച്ച് രാഷ്ട്രീയ പാര്‍ട്ടികള്‍ക്ക് നേരത്തേ കേന്ദ്ര തിരഞ്ഞെടുപ്പ് കമ്മിഷന്‍ മുന്നറിയിപ്പ് നല്‍കിയിരുന്നു.

വോട്ട് അഭ്യര്‍ഥിച്ചുകൊണ്ടുള്ള ബോര്‍ഡില്‍ വിഗ്രഹത്തിന്റെ ചിത്രം; വി. മുരളീധരനെതിരെ തിരഞ്ഞെടുപ്പ് കമ്മിഷന് പരാതി

പത്തനംതിട്ട: സി.പി.ഐ. പത്തനംതിട്ട ജില്ലാ കൗണ്‍സില്‍ അംഗം അബ്ദുള്‍ ഷുക്കൂര്‍ കോണ്‍ഗ്രസില്‍ ചേര്‍ന്നു. സി.പി.ഐ. നേതൃത്വവുമായുള്ള അഭിപ്രായ വ്യത്യാസത്തെ തുടര്‍ന്നാണ് അദ്ദേഹം പാര്‍ട്ടി വിട്ടത്.
&nbsp;കുറച്ചുനാളായി പാര്‍ട്ടി നേതൃത്വവുമായി ഭിന്നതയിലായിരുന്നു അബ്ദുള്‍ ഷുക്കൂര്‍. പത്തനംതിട്ട മണ്ഡലം സെക്രട്ടറി കൂടിയാണ് അദ്ദേഹം. അതേസമയം, ഷുക്കൂറിനെതിരേ നടപടി എടുക്കാനിരുന്ന ഘട്ടത്തിലാണ് അദ്ദേഹം പാര്‍ട്ടി വിട്ടതെന്നാണ് നേതൃത്വം പറയുന്നത്. ഡി.സി.സി. ഓഫീസില്‍ നടന്ന ചടങ്ങില്‍ പത്തനംതിട്ട ഡി.സി.സി. പ്രസിഡന്റ് സതീഷ് കൊച്ചുപറമ്പില്‍ ഷുക്കൂറിന് കോണ്‍ഗ്രസ് അംഗത്വം നല്‍കി.

സി.പി.ഐ. ജില്ലാ കൗണ്‍സില്‍ അംഗം കോണ്‍ഗ്രസില്‍ ചേര്‍ന്നു

ന്യൂഡല്‍ഹി: നാലുവര്‍ഷത്തെ ഇടവേളയ്ക്കുശേഷം ജവഹര്‍ലാല്‍ നെഹ്റു സര്‍വകലാശാലയില്‍ നടന്ന വിദ്യാര്‍ഥി യൂണിയന്‍ തിരഞ്ഞെടുപ്പില്‍ ഇടതുപക്ഷത്തിന് വിജയം. പ്രസിഡന്റ്, വൈസ് പ്രസിഡന്റ്, ജോയിന്റ് സെക്രട്ടറി, ജനറല്‍ സെക്രട്ടറി എന്നീ നാലു സ്ഥാനങ്ങളിലും എബിവിപി സ്ഥാനാര്‍ഥികളെ ഇടതുസ്ഥാനാര്‍ഥികള്‍ പരാജയപ്പെടുത്തി. പ്രസിഡന്റായി ഇടതുസ്ഥാനാര്‍ഥി ധനഞ്ജയ്‌യെ തിരഞ്ഞെടുത്തു. 922 വോട്ടുകള്‍ക്കാണ് ധനഞ്ജയ് എബിവിപിയുടെ ഉമേഷ് ചന്ദ്ര അജ്മീറയെ പരാജയപ്പെടുത്തിയത്. ധനഞ്ജയ്ക്ക് 2598 വോട്ടുകള്‍ ലഭിച്ചപ്പോള്‍ എബിവിപി സ്ഥാനാര്‍ഥിക്ക് 1676 വോട്ടെ ലഭിച്ചുള്ളൂ.
ജനറല്‍ സെക്രട്ടറിയായി പ്രിയാന്‍ഷി ആര്യയെ തിരഞ്ഞെടുത്തു. 2887 വോട്ടുകളാണ് പ്രിയാന്‍ഷി ആര്യ നേടിയത്. ഇടതുപക്ഷത്തിന്റെ പിന്തുണയോടെയാണ് ആര്യ ബിഎപിഎസ്എ സ്ഥാനാര്‍ഥിയായി മത്സരിച്ചത്. എബിവിപിയുടെ അര്‍ജുന്‍ ആനന്ദിന് 1961 വോട്ടുകള്‍ ലഭിച്ചു. 2574 വോട്ടുകളോടെ ഇടത് സ്ഥാനാര്‍ഥി എം.ഒ.സാജിദ് ജോയന്റ് സെക്രട്ടറിയായി തിരഞ്ഞെടുക്കപ്പെട്ടു. എതിര്‍സ്ഥാനാര്‍ഥി എബിവിപിയുടെ ഗോവിന്ദ് ദാന്‍ഗിക്ക് 2066 വോട്ടാണ് ലഭിച്ചത്. വൈസ്. പ്രസിഡന്റായി അവിജിത് ഘോഷ് തിരഞ്ഞെടുക്കപ്പെട്ടു. അവിജിതിന് 2409 വോട്ടുകള്‍ ലഭിച്ചപ്പോള്‍ എബിവിപിയുടെ ദീപിക ശര്‍മയ്ക്ക് 1482 വോട്ടുകളാണ് കിട്ടിയത്.
സ്‌കൂള്‍ ഓഫ് സോഷ്യല്‍ സയന്‍സിലെ കൗണ്‍സിലര്‍ സ്ഥാനാര്‍ഥി എസ്.എഫ്.ഐ. പാനലില്‍ മത്സരിച്ച തൃശ്ശൂര്‍ ഇരിങ്ങാലക്കുട സ്വദേശിനി ഗോപിക ബാബുവും വിജയിച്ചിട്ടുണ്ട്. ഇടത് വിദ്യാര്‍ഥി സംഘടനകളായ ഐസ, എസ്.എഫ്.ഐ., എ.ഐ.എസ്.എഫ്., ഡി.എസ്.എഫ്. എന്നിവ സഖ്യത്തിലാണ് മത്സരിച്ചത്. ബാലറ്റിലൂടെ നടന്ന വോട്ടെടുപ്പില്‍ 73 ശതമാനം വോട്ട് രേഖപ്പെടുത്തിയിരുന്നു. ആറായിരത്തോളം പേരാണ് വോട്ടുചെയ്തത്. എ.ബി.വി.പി., എന്‍.എസ്.യു.ഐ., ആര്‍.ജെ.ഡി.യുടെ വിദ്യാര്‍ഥിവിഭാഗമായ ഛാത്ര രാഷ്ട്രീയ ജനതാദള്‍, ബാപ്‌സ, ഫ്രറ്റേണിറ്റി മൂവ്‌മെന്റ് എന്നീ സംഘടനകളും മത്സരരംഗത്ത് ഉണ്ടായിരുന്നു.

ചുവന്ന് ജെഎന്‍യു; തിരഞ്ഞെടുപ്പിൽ എബിവിപിയെ പരാജയപ്പെടുത്തി ഇടതുപക്ഷത്തിന് വിജയം

National

മീററ്റ്: മൊബൈല്‍ ചാര്‍ജര്‍ പൊട്ടിത്തെറിച്ചുണ്ടായ തീപിടിത്തത്തില്‍ നാല് സഹോദരങ്ങള്‍ വെന്തുമരിച്ചു. കുട്ടികളെ രക്ഷിക്കാന്‍ ശ്രമിക്കുന്നതിനിടെ മാതാപിതാക്കള്‍ക്ക് ഗുരുതരമായി പരിക്കേറ്റു. ഉത്തര്‍പ്രദേശിലെ മീററ്റില്‍ ശനിയാഴ്ച രാത്രിയോടെയാണ് അപകടമുണ്ടായത്. സരിക (12), നിഹാരിക (8), ഗോലു (6), കാലു (5) എന്നിവരാണ് മരിച്ചത്. കുട്ടികളുടെ അമ്മ ബബിത (35) ന്യൂഡല്‍ഹിയിലെ എയിംസ് ആശുപത്രിയില്‍ അത്യാസന്നവിഭാഗത്തില്‍ ചികിത്സയിലാണ്.
കുട്ടികളുടെ അച്ഛന്‍ ജോണി (39) അപകടനില തരണംചെയ്തെങ്കിലും മാരകമായി പൊള്ളലേറ്റിട്ടുള്ളതായി പോലീസ് അറിയിച്ചു. മുറിയില്‍ മൊബൈല്‍ ചാര്‍ജ് ചെയ്യാന്‍ കുത്തിയിട്ടിരുന്ന പ്ലക്ക്‌ബോര്‍ഡില്‍നിന്ന് ഷോര്‍ട്ട്‌സര്‍ക്യൂട്ട് ഉണ്ടാവുകയും ചാര്‍ജര്‍ പൊട്ടിത്തെറിക്കുകയുമായിരുന്നെന്നാണ് ജോണി പോലീസിന് നൽകിയ മൊഴി.
മീററ്റിലെ പല്ലവപുരം ഏരിയയിലെ ജനതാ കോളനിയിലാണ് ജോണിയും കുടുംബവും താമസിച്ചിരുന്നത്. അപകടസമയം ബബിതയും ജോണിയും അടുക്കളയില്‍ ഭക്ഷണം പാകംചെയ്യുകയായിരുന്നു. പെട്ടെന്നാണ് അകത്തെ മുറിയില്‍നിന്ന് പൊട്ടിത്തെറിയുടെ ശബ്ദം കേട്ടത്. ഇരുവരും ഓടി എത്തുമ്പോഴേക്കും മുറിയില്‍ മുഴുവന്‍ തീയും പുകയും നിറഞ്ഞിരുന്നു.
മുറിക്കകത്തേക്ക് കടക്കാന്‍ കഴിയുന്നുണ്ടായിരുന്നില്ല. മൊബൈല്‍ ചാര്‍ജ് ചെയ്യുന്നതിനായി കട്ടിലിലാണ് വെച്ചിരുന്നത്. ബെഡിലേക്ക് പടര്‍ന്ന തീയില്‍നിന്ന് കുട്ടികള്‍ക്ക് വലിയരീതിയില്‍ പൊള്ളലേറ്റു. എല്ലാവരെയും ഉടന്‍ ആശുപത്രിയില്‍ എത്തിച്ചെങ്കിലും രണ്ടുകുട്ടികള്‍ വൈകാതെ മരിച്ചു. മറ്റുരണ്ട് കുട്ടികള്‍ ഞായറാഴ്ച രാവിലെയാണ് മരണത്തിന് കീഴടങ്ങിയത്. ആശുപത്രിയില്‍ വെന്റിലേറ്ററില്‍ കഴിയുന്ന ബബിതയ്ക്ക് ശരീരത്തില്‍ 60 ശതമാനത്തോളം പൊള്ളലേറ്റിട്ടുള്ളതായും പോലീസ് പറഞ്ഞു.

മൊബൈല്‍ ചാര്‍ജര്‍ പൊട്ടിത്തെറിച്ച് തീപിടിച്ചു; നാല് കുട്ടികൾ വെന്തുമരിച്ചു

കൊല്ലം: ചവറ കൊറ്റംകുളങ്ങര ക്ഷേത്രത്തിലെ ചമയവിളക്ക് ഉത്സവത്തിനോട് അനുബന്ധിച്ച കെട്ടുകാഴ്ചക്കിടെ തിക്കിലും തിരക്കിലുംപെട്ട് അഞ്ചുവയസുകാരിക്ക് ദാരുണാന്ത്യം. ചവറ വടക്കുംഭാഗം പാറശേരി തെക്കതില്‍ വീട്ടില്‍ രമേശന്റെയും ജിജിയുടെയും മകള്‍ ക്ഷേത്രയാണ് മരിച്ചത്.
രാത്രി 12 മണിയോടെയാണ് അപകടം നടന്നതെന്ന് പറയുന്നു. കടത്താറ്റുവയലില്‍ നടന്ന കെട്ടുകാഴ്ചയ്ക്കിടെയുണ്ടായ തിരക്കില്‍ അച്ഛന്റെ കൈയിലിരുന്ന കുഞ്ഞ് താഴേക്ക് വീഴുകയും വണ്ടിക്കുതിരയുടെ ചക്രം കയറിയിറങ്ങിയെന്നുമാണ് പ്രാഥമിക നിഗമനം. കുഞ്ഞിനെ ഉടന്‍ തന്നെ കരുനാഗപ്പള്ളി താലൂക്ക് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

കൊറ്റംകുളങ്ങര കെട്ടുകാഴ്ചയ്ക്കിടെ തിരക്കിൽപെട്ട് അഞ്ചുവയസുകാരി മരിച്ചു

അഴിയൂർ: യു.ഡി.എഫ്- ആർ എം പി ഐ മുന്നണി സ്ഥാനാർത്ഥി ഷാഫി പറമ്പിലിന്റെ അഴിയൂർ പഞ്ചായത്ത് കമ്മിറ്റി ഓഫീസ് അണ്ടി കമ്പനിയുടെ സമീപം മുസ്ലീം ലീഗ് സംസ്ഥാന സെക്രട്ടറി പാറക്കൽ അബ്ദുള്ള ഉദ്ഘാടനം ചെയ്തു. യു.ഡി.എഫ് പഞ്ചായത്ത് ചെയർമാൻ കെ. അൻവർ ഹാജി അദ്ധ്യക്ഷം വഹിച്ചു. കോട്ടയിൽ രാധാകൃഷ്ണൻ , ടി.സി.രാമചന്ദ്രൻ , ഒ.കെ.കുഞ്ഞബ്ദുള്ള, പി .ബാബുരാജ്, യു.എ.റഹീം, ആയിഷ ഉമ്മർ , പ്രദീപ് ചോമ്പാല, മോനാച്ചി ഭാസ്ക്കരൻ, പി.പി. ഇസ്മായിൽ എന്നിവർ സംസാരിച്ചു.

തെരഞ്ഞെടുപ്പ് കമ്മിറ്റി ഓഫീസ് ഉദ്ഘാടനം ചെയ്തു

അഴിയൂർ: വടകര മണ്ഡലം യു ഡി എഫ് സ്ഥാനാർത്ഥി ഷാഫി പറമ്പിലിൻ്റെ ന്യൂ മാഹി പഞ്ചായത്ത്‌ തെരഞ്ഞെടുപ്പ് കൺവെൻഷൻ കെ പി സി സി മെമ്പർ രാജീവ്‌ ഇളയവൂർ ഉദ്ഘാടനം ചെയ്തു. അസ്‌ലം ടി എച്ച് അധ്യക്ഷത വഹിച്ചു. കണ്ണൂർ ജില്ലാ മുസ്‌ലിം ലീഗ് വൈസ് പ്രസിഡന്റ്‌ അഡ്വ: കെ ലത്തീഫ് മുഖ്യ പ്രഭാഷണം നടത്തി. എ കെ അബൂട്ടി ഹാജി, അഡ്വ ഷുഹൈബ്, പി സി റിസാൽ, കെ സുലൈമാൻ, സി ജി അരുൺ, എൻ കെ സജീഷ്, അനീഷ് ബാബു എന്നിവർ സംസാരിച്ചു. എൻ കെ പ്രേമൻ സ്വാഗതവും രാജേന്ദ്രൻ നന്ദിയും പറഞ്ഞു.

തെരഞ്ഞെടുപ്പ് കൺവെൻഷൻ നടത്തി

Mahe

വടകര : മോദി സർക്കാർ രാജ്യത്ത് ഇലക്ട്രൽ ബോണ്ട്‌ വഴി അന്വേഷണ ഏജൻസികളെ ഉപയോഗിച്ച് കൊണ്ട് നടത്തിയ കോടി കണക്കിന് രൂപയുടെ അഴിമതി മൂടിവെക്കാൻ അതേ അന്വേഷണ ഏജൻസികളെ ഉപയോഗിച്ച് തന്നെ പ്രതിപക്ഷ കക്ഷികളെ വേട്ടയാടുകയാണെന്ന് ആർ ജെ ഡി സംസ്ഥാന ജനറൽ സെക്രട്ടറി മനയത്ത് ചന്ദ്രൻ പറഞ്ഞു. ഇതിനെതിരെ രാജ്യത്ത് ജനാധിപത്യം നിലനിൽക്കാൻ ആഗ്രഹിക്കുന്ന മുഴുവൻ ആളുകളും രംഗത്ത് വരണമെന്ന് അദ്ദേഹം പറഞ്ഞു.&nbsp;
മഹിളാ ജനതാദൾ (ആർ ജെ ഡി ) വടകര മണ്ഡലം പ്രവർത്തക യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വിമല കളത്തിൽ അദ്ധ്യക്ഷം വഹിച്ച യോഗത്തിൽ ആർ ജെ ഡി സംസ്ഥാന വൈസ് പ്രസിഡണ്ട് ഇ പി ദാമോദരൻ , പ്രസാദ് വിലങ്ങിൽ, എം സതി, ബേബി ബാലമ്പ്രത്ത് , റീന രയരോത്ത് തുടങ്ങിയവർ സംസാരിച്ചു.

മോദി സർക്കാരിന്റെ അഴിമതി മൂടിവെക്കാൻ പ്രതിപക്ഷത്തെ വേട്ടയാടുന്നു; മനയത്ത് ചന്ദ്രൻ

കൽപറ്റ: കളിക്കുന്നതിനിടെ പന്ത് തൊണ്ടയിൽ കുരുങ്ങി രണ്ടര വയസ്സുകാരന് ദാരുണാന്ത്യം. വയനാട് ചെന്നലോടാണ് സംഭവം. എളങ്ങോളി ജലീലിന്റെ മകൻ മുഹമ്മദ് അബൂബക്കറാണ് മരിച്ചത്. ഇന്നലെ രാത്രി പത്തു മണിയോടെയാണ് സംഭവം. മൃതദേഹം മേപ്പാടി വിംസ് ആശുപത്രിയിൽ സൂക്ഷിച്ചിരിക്കുകയാണ്. സംഭവം നടന്ന ഉടനെ കുട്ടിയെ ആദ്യം പടിഞ്ഞാറത്തറയിലെയും പിന്നീട് കൽപറ്റയിലെയും സ്വകാര്യ ആശുപത്രികളിൽ പ്രവേശിപ്പിച്ചിരുന്നു. തുടർന്ന് മേപ്പാടി വിംസ് ആശുപത്രിയിലേക്കും മാറ്റിയെങ്കിലും ജീവൻ രക്ഷിക്കാനായില്ല.

&nbsp;

കളിക്കുന്നതിനിടെ പന്ത് തൊണ്ടയിൽ കുരുങ്ങി രണ്ടര വയസ്സുകാരൻ മരിച്ചു

വടകര: മനുഷ്യർ തമ്മിൽ കൂടുതൽ കൂടുതൽ അകന്നു പോയിക്കൊണ്ടിരിക്കുന്ന കാലത്ത് സൗഹൃദ കൂട്ടായ്മയുടെ പ്രസക്തി വിളിച്ചോതി സ്നേഹപൂർവം 2024 മാക്കൂൽ പീടിക കുറുമ്പയിൽ എൻ എം യു പി സ്കൂളിൽ ഇഫ്താർ സംഗമം സംഘടിപ്പിച്ചു. സംഗമത്തിൽ വിവിധ തുറകളിൽപ്പെട്ട നിരവധി പേർ പങ്കെടുത്തു.
ഇഫ്താർ സംഗമം ചരിത്രകാരൻ പി.ഹരീന്ദ്രനാഥ് ഉദ്ഘാടനം ചെയ്തു. വി. പി. മൊയ്തു ആധ്യക്ഷ്യം വഹിച്ചു. കെ. കെ.രമ എംഎൽഎ, നഗരസഭ കൗൺസിൽ കെ. കെ. വനജ, അനൂപ് അനന്തൻ, മേമുണ്ട മസ്ജിദ്ഖാസി ബഷീർ ബാഖ്ഹഫി, മഹല്ല് കമ്മിറ്റി സെക്രട്ടറി ടി കെ അബ്ദുല്ല , കെ.എം. റഖീബ്, സി.എം കരീം, കോഡിനേറ്റർമാരായ പി.പി അനസ്, വി.പി ഉസ്മാൻ എന്നിവർ പ്രസംഗിച്ചു.

ഇഫ്താർ സംഗമം സംഘടിപ്പിച്ചു

വടകര: കെ റെയിൽ സിൽവർ ലൈൻ അനുകൂലികൾക്ക് 2024 ലോക്സഭ തെരഞ്ഞെടുപ്പിന് വോട്ട് നൽകില്ലെന്ന് കെ റെയിൽസിൽവർ ലൈൻ വിരുദ്ധ ജനകീയ സമരസമിതി അഴിയൂർ മേഖല കമ്മിറ്റി തീരുമാനിച്ചു. സമരസമിതി അഴിയൂർ മേഖല വനിതാ കമ്മിറ്റി ചെയർമാൻ സതി സ്വാഗതം പറഞ്ഞ ചടങ്ങിൽ സമരസമിതി അഴിയൂർ മേഖല കൺവീനർ ബാലകൃഷ്ണൻ പാമ്പള്ളി അദ്ധ്യക്ഷം വഹിച്ചു. സമരസമിതി സംസ്ഥാന കമ്മിറ്റി അംഗം ടി.സി.രാമചന്ദ്രൻ മുഖ്യപ്രഭാഷണം നടത്തി.&nbsp;
സിൽവർ ലൈൻ അനുകൂലികൾ തെരഞ്ഞെടുപ്പിൽ വിജയിച്ച് പാർലമെന്റിൽ എത്തിയാൽ പദ്ധതി നടപ്പാക്കാനായി കേന്ദ്ര സർക്കാരിൽ സമ്മർദ്ദം ചെലുത്താൻ സാധ്യതയുണ്ടെന്നും യാതൊരുവിധത്തിലും അതിന് സാഹചര്യമുണ്ടാക്കരുത് എന്നും അദ്ദേഹം പറഞ്ഞു. തെരഞ്ഞെടുപ്പിൽ ജയ സാധ്യതയുള്ളവർക്ക് വോട്ട് നൽകാൻ യോഗം ഐക്യകണ്ഠേന തീരുമാനിച്ചു. രാജൻ തീർത്ഥം, നസീർ വീരോളി, ബാലകൃഷ്ണൻ മുക്കാളി, രവീന്ദ്രൻ അമൃതംഗമയ, ഇക്ബാൽ അഴിയൂർ, കെ.വി ബാലകൃഷ്ണൻ, സജ്ന.സി.കെ, സ്മിത സരയു, അശോകൻ കളത്തിൽ എന്നിവർ സംസാരിച്ചു.

സിൽവർലൈൻ അനുകൂലികൾക്ക് വോട്ട് നൽകില്ല; ജനകീയ സമരസമിതി

വടകര: ബിജെപിയുമായി അവിശുദ്ധ കൂട്ടുകെട്ട് ഉണ്ടാക്കിയ സിപിഐഎം നെതിരെ വടകരയിലെ പ്രബുദ്ധരായ ജനങ്ങൾ വിധിയെഴുതുമെന്ന് യൂത്ത് കോൺഗ്രസ്‌ സംസ്ഥാന പ്രസിഡന്റ് രാഹുൽ മാങ്കൂട്ടത്തിൽ. വടകരയിൽ മത്സരിക്കുന്ന ഷാഫി പറമ്പിലിനെതിരെ ബിജെപി സംസ്ഥാന പ്രസിഡന്റ്‌ നിരന്തരം പ്രസ്താവനകൾ ഇറക്കുന്നത് ഇതിന്റെ ഭാഗമായാണെന്നും, സുരേന്ദ്രനും സിപിഐഎംമ്മും എത്ര ശ്രമിച്ചാലും വടകരയിൽ ഷാഫി പറമ്പിൽ വിജയിച്ചു കേറുമെന്നും അദ്ദേഹം കൂട്ടിച്ചേർത്തു.&nbsp;
ചോറോട് പഞ്ചായത്ത് യു ഡി എഫ്- ആർ എം പി ഐ തെരഞ്ഞെടുപ്പ് കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അഡ്വ : പി. ടി. കെ നജ്മൽ അധ്യക്ഷത വഹിച്ചു. യു ഡി എഫ് ജില്ലാ കൺവീനർ അഹമ്മദ് പുന്നക്കൽ, കോട്ടയിൽ രാധാകൃഷ്ണൻ, സതീശൻ കുരിയാടി, ഒ. എം അസീസ്, വി. പി ദുൽഖിഫിൽ, അഫ്നാസ് ചോറോട്, സദാശിവൻ, കെ. പി കരുണൻ, ഇസ്മായിൽ, ശശി വള്ളിക്കാട്, കൂടാളി അശോകൻ, എം ടി സലാം, സി നിജിൻ തുടങ്ങിയവർ സംസാരിച്ചു.
ഭാരവാഹികൾ; ചെയർമാൻ : അഡ്വ : നജ്മൽ. പി. ടി. കെ , ജനറൽ കൺവീനർ : ഒ. എം അസീസ് , ട്രഷറർ : കെ. കെ സദാശിവൻ.

ബിജെപി - സിപിഎം അവിശുദ്ധ കൂട്ടുകെട്ടിനെതിരെ വടകരയിലെ ജനങ്ങൾ വിധിയെഴുതും: രാഹുൽ മാങ്കൂട്ടത്തിൽ

വടകര: കേന്ദ്ര-കേരള ഭരണത്തിനെതിരെ വടകരയിലെ ജനങ്ങൾ ഒന്നായി ഷാഫി പറമ്പിലിന് അനുകൂലമായി വോട്ട് ചെയ്യുമെന്ന് യൂത്ത് കോൺഗ്രസ് നേതാവ് റിജിൽ മാക്കുറ്റി. യുഡിവൈഎഫ്- റവല്യൂഷണറി യൂത്ത് വടകര നിയോജക മണ്ഡലം കൺവെൻഷൻ ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. അഫ്സൽ പി കെ സി അധ്യക്ഷ്യം വഹിച്ചു .പാറക്കൽ അബ്ദുല്ല, കോട്ടയിൽ രാധാകൃഷ്ണൻ, റസാക്ക്, എസ്. പി കുഞ്ഞമ്മദ്, അബ്ദുള്ള ഹാജി, ആർ.റിജു., സി. നിജിൻ, അഫ്നാസ് ചോറോട്, ഷുഹൈബ് കുന്നത്ത്, അൻസീർ പനോളി, നിഖിൽ.പി. ടി എന്നിവർ സംസാരിച്ചു. ഭാരവാഹികൾ അഫ്സൽ.പി. കെ. സി (ചെയർമാൻ), സി. നിജിൻ (കൺവീനർ), നിഖിൽ. ടി. പി (കൺവീനർ).

കേരള-കേന്ദ്ര ഭരണത്തിനെതിരെ വടകരയിലെ ജനങ്ങൾ വോട്ട് ചെയ്യും; റിജിൽ മാക്കുറ്റി

ഗാസിയബാദ്: റീൽ ഷൂട്ട് ചെയ്യുന്നതിനിടയിൽ ബൈക്കിലെത്തിയ കള്ളൻ യുവതിയുടെ മാലപൊട്ടിച്ചു. ഉത്തർപ്രദശേിലെ ഗാസിയബാദിലെ ഇന്ദ്രാപുരത്താണ് സംഭവം.
സുഷമ എന്ന യുവതിയുടെ മാലയാണ് പൊട്ടിച്ചത്. റീലിന് വേണ്ടി റോഡിലൂടെ ചിരിച്ച് അഭിനയിക്കുന്നതിനിടയിലാണ് ‘അപ്രതീക്ഷിത ട്വിസ്റ്റ്’. ഷൂട്ടിനിടയിൽ ഹെൽമെറ്റ് ധരിച്ച് ബൈക്കിലെത്തിയ യുവാവ് മാലപൊട്ടിച്ച് അമിതവേഗത്തിൽ ബൈ​​ക്കോടിച്ച് പോവുകയായിരുന്നു. യുവതിയുടെ പരാതിൽ പൊലീസ് കേസെടുത്ത് അന്വേഷണം ആരംഭിച്ചു.

റീൽ ഷൂട്ട് ചെയ്യുന്നതിനിടയിൽ ബൈക്കിലെത്തിയ കള്ളൻ യുവതിയുടെ മാലപൊട്ടിച്ച് കടന്നു

തിരുവനന്തപുരം: നേമം നരുവാമൂട് മൊട്ടമൂട്ടില്‍ കാറിടിച്ച് സ്‌കൂട്ടര്‍ യാത്രക്കാരി മരിച്ചു. പിന്നിലിരുന്ന മകന് പരിക്കേറ്റു. പ്രാവച്ചമ്പലം മൊട്ടമൂട് സ്വാതി ലൈനില്‍ കൈതൂര്‍കോണം തടത്തരികത്ത് വീട്ടില്‍ സൂസന്‍ (31) ആണ് മരിച്ചത്. ഞായറാഴ്ച വൈകിട്ട് ആറുമണിയോടെ ആയിരുന്നു അപകടം.
നരുവാമൂട്ടില്‍ താമസിക്കുന്ന അമ്മയെ വീട്ടിലെത്തിച്ച ശേഷം മടങ്ങുകയായിരുന്നു സൂസനും മകന്‍ ഷാരോണും. വീട്ടിലേയ്ക്ക് തിരിയുന്ന വഴിയില്‍ പ്രാവച്ചമ്പലം ഭാഗത്തുനിന്ന് വന്ന കാര്‍ നിയന്ത്രണം വിട്ട് ഇവരുടെ സ്‌കൂട്ടറില്‍ ഇടിക്കുകയായിരുന്നു. കാറിനടിയിലേയ്ക്ക് വീണ സൂസന്‍ തത്ക്ഷണം മരിച്ചു.
സ്‌കൂട്ടറിന് പിന്നില്‍ ഇരിക്കുകയായിരുന്ന ഏഴുവയസുകാരന്‍ ഷാരോണ്‍ ഇടിയുടെ ആഘാതത്തില്‍ മറുഭാഗത്തേയ്ക്ക് തെറിച്ചുവീഴുകയായിരുന്നു. ഷാരോണിനും സാരമായ പരിക്കേറ്റിട്ടുണ്ട്. കാറില്‍ ഉണ്ടായിരുന്നവര്‍ക്കും പരിക്കുണ്ട്. മൊബൈല്‍ ഷോപ്പ് ജീവനക്കാരിയായിരുന്നു സൂസന്‍. ഭര്‍ത്താവ്: നിഖില്‍.

കാറിടിച്ച് സ്‌കൂട്ടര്‍ യാത്രക്കാരി മരിച്ചു

പത്തനംതിട്ട: ആരോഗ്യവകുപ്പിനെ വെട്ടിലാക്കി മന്ത്രി സജി ചെറിയാന്റെ വിവാദ പ്രസ്താവന. സര്‍ക്കാര്‍ ആശുപത്രിയിലെ ചികിത്സയില്‍ മരിക്കാന്‍ തുടങ്ങിയപ്പോഴാണ് താന്‍ സ്വകാര്യ ആശുപത്രിയില്‍ ചികിത്സ തേടിയതെന്നായിരുന്നു അദ്ദേഹത്തിന്റെ പരാമര്‍ശം. സ്വകാര്യ ആശുപത്രിയില്‍ മന്ത്രിമാര്‍ ചികിത്സ തേടുന്നത് പുതുമയല്ലെന്ന ന്യായീകരണത്തിനിടെ ആയിരുന്നു മന്ത്രി ഇങ്ങനെ പറഞ്ഞത്.
സ്വകാര്യ ആശുപത്രിയില്‍ മന്ത്രിമാരും പോകും. സാധാരണക്കാരും പോകും. അല്ലാത്തവരും പോകും. ഞാന്‍ പോയത് മെഡിക്കല്‍ കോളേജിലാണ്. കുഴപ്പമൊന്നും സംഭവിച്ചില്ല. ചിലര്‍ സ്വകാര്യ ആശുപത്രിയില്‍ പോകും. 2019-ല്‍ ഡെങ്കിപ്പനി വന്നപ്പോള്‍ ഞാന്‍ സര്‍ക്കാര്‍ ആശുപത്രിയിലായിരുന്നു പോയത്. സര്‍ക്കാര്‍ ആശുപത്രിയിലെ ചികിത്സ കൊണ്ട് മരിക്കാന്‍ സാധ്യത വന്നപ്പോള്‍ എന്നെ അമൃത ആശുപത്രിയില്‍ കൊണ്ടുപോകാന്‍ ശുപാര്‍ശ ചെയ്തു. എന്നെ അമൃതയില്‍ കൊണ്ടുപോയി. അവിടെ ചെന്നപ്പോള്‍ 14 ദിവസം ബോധമില്ലായിരുന്നു. ഞാന്‍ രക്ഷപ്പെട്ടു. അപ്പോള്‍ അമൃത ആശുപത്രി മോശമാണോ. അതൊക്കെ ഈ നാട്ടില്‍ വ്യവസ്ഥാപിതമായ കാര്യങ്ങളാണ്, എന്നായിരുന്നു മന്ത്രിയുടെ വാക്കുകൾ.

കൂടുതല്‍ സാങ്കേതിക വിദ്യകളുള്ള സ്വകാര്യ ആശുപത്രികളുണ്ട്. അത്രയും ചിലപ്പോള്‍ സര്‍ക്കാര്‍ ആശുപത്രിയില്‍ വന്നുകാണില്ല. കാരണം കൂടുതല്‍ ആളുകള്‍ വരുന്ന സ്ഥാപനമെന്ന നിലയ്ക്ക് സര്‍ക്കാര്‍ ആശുപത്രികളില്‍ അതിന്റെ ടെക്‌നോളജികളും സാമ്പത്തികമായ സഹായങ്ങളും കുറവായിരിക്കും. ഒരു സ്വകാര്യ ആശുപത്രിയില്‍ കൂടുതല്‍ ടെക്‌നോളജി വരും. അപ്പോള്‍ കൂടുതല്‍ ചികിത്സ അവിടെകിട്ടും. അപ്പോള്‍ അങ്ങോട്ടു പോകണമെന്നും സജി ചെറിയാന്‍ പറഞ്ഞു.&nbsp;

ഗവ. ആശുപത്രിയിലെ ചികിത്സകൊണ്ട് മരിച്ചേക്കാവുന്ന നിലവന്നു, സ്വകാര്യ ആശുപത്രിയിലെത്തി രക്ഷപ്പെട്ടു' ;ആരോഗ്യവകുപ്പിനെ വെട്ടിലാക്കി സജി ചെറിയാന്റെ പ്രസ്താവന

തൊടുപുഴ: ഇടുക്കി ജില്ലയിലെ ജീപ്പ് സഫാരി നിരോധിച്ചു കൊണ്ട് കളക്ടർ ഉത്തരവിട്ടു. അനധികൃതമായി നടത്തിയ ഓഫ് റോഡ് യാത്രക്കിടെ സഫാരി ജീപ്പ് മറിഞ്ഞ് മൂന്നാറിൽ ഒരു വിനോദ സഞ്ചാരി മരിച്ചിരുന്നു. ഇതിന്റെ പശ്ചാത്തലത്തിലാണ് ഉത്തരവ്. സുരക്ഷാ മാനദണ്ഡങ്ങൾ രൂപവത്കരിച്ച ശേഷം സഫാരി പുനഃസ്ഥാപിക്കുമെന്നാണ് ജില്ലാ ഭരണകൂടം വ്യക്തമാക്കുന്നത്.
ഇതിനായി അതാത് പ്രദേശങ്ങളിൽ ദൗത്യ സംഘങ്ങളെ നിയോഗിക്കും. ജൂലായ് 10-ന് ഇവർ കളക്ടർക്ക് റിപ്പോർട്ട് നൽകണം. കളക്ടർ അന്തിമ തീരുമാനമെടുക്കും. അതുവരെ ജീപ്പ് സവാരി അനുവദിക്കില്ല. നിരോധനം ലംഘിച്ചാൽ 2005-ലെ ദുരന്തനിവാരണ നിയമം 2005 പ്രകാരമുള്ള നടപടി നേരിടണം.
ഇതിനൊപ്പം പോലീസും മോട്ടോർ വാഹന വകുപ്പും കേസെടുക്കും.എന്നാൽ, ജീപ്പ് സഫാരി ഒറ്റയടിക്ക് നിരോധിച്ച് ആയിരക്കണക്കിന് സാധാരണക്കാരുടെ ഉപജീവനമാർഗം നഷ്ടമായെന്ന പരാതിയുമായി ഡ്രൈവർമാരും വിവിധ തൊഴിലാളി സംഘടനകളും രംഗത്തെത്തിയിട്ടുണ്ട്.

ഇടുക്കി ജില്ലയിലെ ജീപ്പ് സഫാരി നിരോധിച്ചു

കൊച്ചി: കേന്ദ്രമന്ത്രിയും നടനുമായ സുരേഷ് ഗോപി ധരിച്ച മാലയില്‍ പുലിപ്പല്ലുണ്ടെന്ന പരാതിയില്‍ വനംവകുപ്പ് നോട്ടീസ് നല്‍കും. സുരേഷ് ഗോപി ധരിച്ചതായി കണ്ട മാല ഹാജരാക്കണമെന്ന് ആവശ്യപ്പെട്ടാകും നോട്ടീസ് നല്‍കുക. റാപ്പര്‍ വേടന്‍ (ഹിരണ്‍ദാസ്) പുലിപ്പല്ല് കേസില്‍ അറസ്റ്റിലായതിന് പിന്നാലെയാണ് സുരേഷ് ഗോപിയുമായി ബന്ധപ്പെട്ട വിഷയവും ഉയര്‍ന്നുവന്നത്.
സുരേഷ് ഗോപി പുലിപ്പല്ല് കെട്ടിയ ലോക്കറ്റുള്ള മാല ധരിച്ചെന്ന് കാണിച്ച് പരാതികളും വന്നിരുന്നു. ഇതിന്റെ പശ്ചാത്തലത്തില്‍ വനംവകുപ്പ് വിഷയത്തില്‍ പ്രാഥമിക അന്വേഷണം നടക്കുകയാണ്. മാലയിലെ ലോക്കറ്റിലുള്ളത് യഥാര്‍ഥത്തിലുള്ള പുലിപ്പല്ലാണോ എന്ന് പരിശോധിക്കും. വനം-വന്യജീവി സംരക്ഷണ നിയമപ്രകാരം ഷെഡ്യൂള്‍ ഒന്നില്‍ രണ്ടാംഭാഗത്തിലാണ് പുലി ഉള്‍പ്പെട്ടിട്ടുള്ളത്. പാരമ്പര്യമായി കൈമാറി ലഭിച്ചതാണെങ്കിലും പുലിപ്പല്ല് സൂക്ഷിക്കാന്‍ പാടില്ല.
വാടാനപ്പള്ളി സ്വദേശിയും ഐഎന്‍ടിയുസി യുവജന വിഭാഗം സംസ്ഥാന ജനറല്‍ സെക്രട്ടറിയും യൂത്ത് കോണ്‍ഗ്രസ് മുന്‍ ദേശീയ വക്താവുമായ എ.എ. മുഹമ്മദ് ഹാഷിമാണ് സുരേഷ് ഗോപിക്കെതിരേ പരാതി നല്‍കിയത്. പുലിപ്പല്ല് മാല ധരിച്ച് നടക്കുന്ന സുരേഷ് ഗോപിയുടെ ദൃശ്യങ്ങള്‍ സഹിതം സംസ്ഥാന പോലീസ് മേധാവിക്കാണ് ഹാഷിം പരാതി നല്‍കിയിരുന്നത്.

മാലയിലെ പുലിപ്പല്ല് ലോക്കറ്റ്: സുരേഷ് ഗോപിക്ക് നോട്ടീസ് നല്‍കാനൊരുങ്ങി വനംവകുപ്പ്

തിരുവനന്തപുരം: ക്യാമറയുള്ള കണ്ണടയുമായി ശ്രീപത്മനാഭസ്വാമി ക്ഷേത്രത്തിൽ പ്രവേശിച്ച വയോധികൻ പിടിയിൽ. അഹമ്മദാബാദ് സ്വദേശി സുരേന്ദ്ര ഷായാണ് പിടിയിലായത്. ഇന്നലെ വൈകിട്ടായിരുന്നു ഇയാൾ ക്ഷേത്രത്തിനകത്ത് കയറിയത്.&nbsp;
എന്നാൽ കണ്ണടയിൽ ലൈറ്റ് മിന്നുന്നത് കണ്ടതോടെ പരിശോധിക്കുകയായിരുന്നു. തുടർന്നാണ് ക്യാമറ ശ്രദ്ധയിൽപ്പെട്ടത്. സ്മാർട്ട് ഗ്ലാസാണ് വയോധികൻ ഉപയോഗിച്ചത്. ക്ഷേത്രത്തിനകത്തെ ചില ദൃശ്യങ്ങൾ ക്യാമറയിൽ പതിഞ്ഞിട്ടുണ്ടെന്നാണ് സൂചന.

ക്യാമറയുള്ള കണ്ണടയുമായി ശ്രീപത്മനാഭസ്വാമി ക്ഷേത്രത്തിൽ പ്രവേശിച്ചയാൾ പിടിയിൽ

തൃശ്ശൂർ: പൗരസ്ത്യ കൽദായ സുറിയാനി സഭയുടെ ആർച്ച് ബിഷപ്പ് മാർ അപ്രേം മെത്രാപ്പോലീത്ത (85)അന്തരിച്ചു. 64 വർഷത്തെ പൗരോഹിത്യ ജീവിതത്തിൽ 56 വർഷം ഭാരത സഭയെ നയിച്ചു. ആത്മീയാചാര്യൻ, സഭാതലവൻ, സാംസ്‌കാരിക നേതാവ്, സഭാചരിത്ര ഗവേഷകൻ, ഗ്രന്ഥകർത്താവ്, സുറിയാനി ഭാഷാ പ്രേമി എന്നിങ്ങനെ ബഹുമുഖ വ്യക്തിത്വത്തിന് ഉടമയായിരുന്നു.
തൃശ്ശൂർ കിഴക്കേക്കോട്ട മാർ യോഹന്നാൻ മാംദ്ദാനപള്ളി ഇടവകയിലെ മൂക്കൻ കുടുംബത്തിൽ ദേവസിയുടെയും പറപ്പുള്ളി കൊച്ചുമറിയത്തിന്റെയും 10 മക്കളിൽ നാലാമനായി 1940 ജൂൺ 13-നാണ് ജോർജ്ജ് ഡേവിസ് മൂക്കൻ എന്ന മാർ അപ്രേം മെത്രാപ്പോലീത്ത ജനിച്ചത്. യുണൈറ്റഡ് തിയോളജിക്കൽ കോളേജ്, ന്യൂയോർക്ക് യൂണിയൻ തിയോളജിക്കൽ സെമിനാരി, പ്രിൻസ്ടൺ തിയോളജിക്കൽ സെമിനാരി എന്നിവിടങ്ങളിൽ നിന്നാണ് ദൈവശാസ്ത്ര പഠനം പൂർത്തിയാക്കിയത്.
1961 ജൂൺ 25-ന് ശെമ്മാശപട്ടം സ്വീകരിച്ചു. 26-ാം ജന്മദിനത്തിൽ 1965 ജൂൺ 13-ന് കശീശപട്ടം സ്വീകരിച്ചു. 1968 സെപ്റ്റംബർ 21-ന് എപ്പിസ്‌കോപ്പയായും ഒരാഴ്ചയ്ക്ക്‌ശേഷം 29-ന് മെത്രാപ്പോലീത്തയായും ഇറാഖിലെ പ്രസിദ്ധമായ മാർ സയ്യാകത്തീഡ്രലിൽ വെച്ച് സ്ഥാനാരോഹണം ചെയ്തു. ഭാരത സഭയുടെ ചരിത്രത്തിൽ ഏറ്റവും പ്രായം കുറഞ്ഞ രണ്ടാമത്തെ മെത്രാനായിരുന്നു. 1968 ഒക്ടോബർ 26-ന് ഇന്ത്യയിൽ തിരിച്ചെത്തി സഭയുടെ ഭരണച്ചുമതല ഏറ്റെടുത്തു. 2015-ൽ മാറൻ മാർ ദിൻഹാ നാലാമൻ പാത്രിയാർക്കീസ് കാലം ചെയ്തതിനെത്തുടർന്ന് പുതിയ പാത്രിയാർക്കീസ് തിരഞ്ഞെടുപ്പുവരെ ആറുമാസത്തോളം ആഗോള തലവനായി സഭയെ നയിച്ചു. എഴുപതിലധികം ഗ്രന്ഥങ്ങളുടെ കർത്താവാണ്. യാത്രാവിവരണം, നർമഭാവന, സഭാചരിത്രം തുടങ്ങിയവ കേന്ദ്രീകരിച്ചുള്ളവയാണ് ഗ്രന്ഥങ്ങൾ. മദ്രാസിലെ മാർത്തോമ ഹയർസെക്കൻഡറി സ്‌കൂളും തൃശ്ശൂരിലെ കാൽഡിയൻ കോളേജും സ്ഥാപിക്കുന്നതിൽ നിർണായക പങ്ക് വഹിച്ചു.&nbsp;

കൽദായ സഭ ആർച്ച് ബിഷപ്പ് മാർ അപ്രേം മെത്രാപ്പോലീത്ത അന്തരിച്ചു

Search Results for: lizard