മലയിൻകീഴ് : ജാതി പറഞ്ഞ് അധിക്ഷേപിച്ചുവെന്ന പരാതിയിൽ കോൺ​ഗ്രസ് പഞ്ചായത്ത് അംഗത്തിനെതിരെ കേസെടുത്തു. വിളവൂർക്കൽ ഗ്രാമപഞ്ചായത്തിലെ പുതുവീട്ടുമേലെ വാർഡ് അംഗം ജോണിക്കെതിരെയാണ് കേസ്. ജൂലൈ ആറിനാണ് സംഭവം.
പഞ്ചായത്തിലെ എ.ഡി.എസ്.വാർഷികത്തോടനുബന്ധിച്ച് ആഹാര വിതരണത്തിലെ അപാകത ചൂണ്ടിക്കാണിച്ചതിന് പിന്നിലുള്ള വിരോധമാണ് പൊതുജനമധ്യത്തിൽ വെച്ച് അധിക്ഷേപിക്കുന്നതിലേക്ക് നയിച്ചതെന്നാണ് പരാതിയിൽ പറയുന്നത്. അസഭ്യം വിളിച്ച് മാനഹാനി വരുത്തിയെന്നും പരാതിയിൽ പറയുന്നു.

ജാതി അധിക്ഷേപം: കോൺ​ഗ്രസ് പഞ്ചായത്ത് അംഗത്തിനെതിരെ പോലീസ് കേസ്

Kerala

തിരുവനന്തപുരം: മെച്ചപ്പെട്ട ആനുകൂല്യങ്ങൾ ആവശ്യപ്പെട്ട് 35 ദിവസമായി സമരം തുടരുന്ന ആശാവർക്കറുമാരുടെ ഒരാവശ്യം കൂടി സർക്കാർ അംഗീകരിച്ചു. ഇതു സംബന്ധിച്ച് ഉത്തരവിറക്കുകയും ചെയ്തു. മാനദണ്ഡങ്ങൾ സങ്കീർണമായതിനാൽ തുഛമായ ഓണറേറിയമാണ് ലഭിക്കുന്നതെന്നായിരുന്നു സമരക്കാരുടെ പരാതി. സമരം തുടങ്ങിയ ശേഷം സർക്കാർ ഓണറേറിയവും ഇൻസന്റീവ് കുടിശ്ശികയും അനുവദിച്ചിരുന്നു. അതിനു പിന്നാലെയാണ് മാനദണ്ഡങ്ങൾ പിൻവലിച്ച് ഉത്തരവിറക്കിയിരിക്കുന്നത്. എന്നാൽ, പ്രധാന ആവശ്യങ്ങളായ ഓണറേറിയം വർധനയും പെൻഷനും സർക്കാർ അം​ഗീകരിച്ചിട്ടില്ല.
ആശമാർക്ക് ഓണറേറിയം ലഭിക്കുന്നതിന് നിശ്ചിയിച്ചിരുന്ന 10 മാനദണ്ഡങ്ങൾ പിൻവലിക്കുന്ന ഉത്തരവാണ് പുറത്തിറക്കിയത്. മാനദണ്ഡങ്ങൾ പിൻവലിക്കാൻ തീരുമാനിച്ചതായി ആരോഗ്യമന്ത്രി വീണ ജോർജ് കഴിഞ്ഞദിവസം നിയമസഭയിൽ അറിയിച്ചിരുന്നു. സർക്കാർ തീരുമാനം സമരത്തിന്റെ വിജയമാണെന്നായിരുന്നു ആശമാരുടെ പ്രതികരണം. എന്നാൽ സമരം അവസാനിപ്പിക്കില്ലെന്നും അവർ വ്യക്തമാക്കി.

ആശമാരുടെ ഓണറേറിയത്തിനുള്ള മാനദണ്ഡങ്ങൾ പിൻവലിച്ച് സർക്കാർ

തിരുവനന്തപുരം: മുഖ്യമന്ത്രിയുടെ പ്രസ് സെക്രട്ടറി പി.എം. മനോജിനെ മുഖ്യമന്ത്രിയുടെ ഓഫീസിൽനിന്ന് ഒഴിവാക്കിയേക്കും. ഇത് സംബന്ധിച്ച സൂചന മുഖ്യമന്ത്രിതന്നെ ഓഫീസ് സ്റ്റാഫിന്റെ യോഗത്തിൽ നൽകിയതായി അറിയുന്നു.പിആർഡിയുമായി ബന്ധപ്പെട്ട പരസ്യക്കരാറുകൾ മകന്റെ സ്ഥാപനത്തിന് നൽകിയതുമായി ബന്ധപ്പെട്ട് മനോജിനുനേരേ ആരോപണം ഉയർന്നിരുന്നു. പിആർഡി ഡയറക്ടർ നൽകിയ റിപ്പോർട്ടിലും ഇക്കാര്യം സ്ഥിരീകരിച്ചിട്ടുണ്ട്.
സിപിഎം മുഖപത്രമായ ദേശാഭിമാനിയുടെ റെസിഡന്റ് എഡിറ്റർ സ്ഥാനത്തുനിന്നാണ് മനോജ് മുഖ്യമന്ത്രിയുടെ പ്രസ് സെക്രട്ടറിയുടെ ചുമതലയിലേക്ക്‌ വന്നത്. തന്നെ മുഖ്യമന്ത്രിയുടെ ഓഫീസിൽനിന്ന് ഒഴിവാക്കി തിരികെ ദേശാഭിമാനിയിലേക്ക്‌ അയക്കണമെന്ന് ആവശ്യപ്പെട്ട് മനോജ് പാർട്ടി നേതൃത്വത്തിന് കത്തുനൽകിയിട്ടുണ്ട്. പാർട്ടി ഇത് അംഗീകരിച്ചതായാണ് സൂചന.ദേശാഭിമാനിയിൽ ഇപ്പോൾ എം. സ്വരാജാണ് റെസിഡന്റ് എഡിറ്റർ. മനോജിന് അവിടെ എന്തുചുമതല നൽകണമെന്നതിൽ തീരുമാനമായില്ല.എന്റെ കേരളം, നവകേരളസദസ്സ്, കേരളീയം തുടങ്ങിയ പരിപാടികളുമായി ബന്ധപ്പെട്ടാണ് മുഖ്യമന്ത്രിയുടെ ഓഫീസിലെ ചിലർക്കുനേരേ ആരോപണം ഉയർന്നത്. കരാറുകൾ പലതും മനോജിന്റെ മകന്റെ സ്ഥാപനത്തിനാണ് ലഭിച്ചത്. ഈ ആരോപണം മനോജോ, പാർട്ടികേന്ദ്രങ്ങളോ നിഷേധിച്ചിരുന്നില്ല.

പി.എം. മനോജിനെ മുഖ്യമന്ത്രിയുടെ ഓഫീസിൽനിന്ന് ഒഴിവാക്കിയേക്കും

വണ്ടിപ്പെരിയാര്‍: ഗ്രാമ്പി പ്രദേശത്ത് ഭീതി പരത്തിയ കടുവ അരണക്കല്‍ എസ്റ്റേറ്റില്‍ ഇറങ്ങി. തിങ്കളാഴ്ച്ച പുലര്‍ച്ചെ രണ്ടരക്ക് അരണക്കല്‍ എസ്റ്റേറ്റിലെ നാരായണന്റെ പശുവിനെയും ബാലമുരുകന്റെ വളര്‍ത്തുനായയെയും ആക്രമിച്ച് കൊന്നു. വനപാലകര്‍ സ്ഥലത്തെത്തി. ഫെബ്രുവരി 23-ന് വള്ളക്കടവ് പൊന്‍നഗറിലാണ് കടുവയെ ആദ്യം കണ്ടത്. പിന്നീട് മാര്‍ച്ച് രണ്ടിന് പോബ്‌സ് ഗ്രൂപ്പിന്റെ ഗ്രാമ്പി എസ്റ്റേറ്റില്‍ കടുവയെ കണ്ടിരുന്നു.
പിന്നീട് ഗ്രാമ്പി ഗവ. എല്‍.പി.സ്‌കൂളിന് സമീപം വളര്‍ത്തുമൃഗങ്ങളെ ആക്രമിച്ചിരുന്നു. തുടര്‍ന്ന് വനപാലകര്‍ സ്ഥലത്തെത്തി ഡ്രോണ്‍ നിരീക്ഷണം നടത്തി ഇവിടെ കൂട് സ്ഥാപിച്ചു. രണ്ടു ദിവസം തിരച്ചിൽ നടത്തി കടുവയെ മയക്കുവെടി വെക്കാൻ ശ്രമിച്ചെങ്കിലും നടന്നില്ല. ഞായറാഴ്ച്ച വീണ്ടും വനപാലകർ ഇവിടെ എത്തിയെങ്കിലും കടുവ പ്രദേശം വിട്ടുപോയി.തേക്കടിയില്‍നിന്ന് ജെഫി എന്ന സ്‌നിഫര്‍ നായ എത്തി തിരച്ചില്‍ നടത്തിയെങ്കിലും കടുവയെ കണ്ടെത്താനായില്ല. തുടര്‍ന്ന് ഞായറാഴ്ച്ച വൈകിട്ട് ആറോടെ വനം വകുപ്പ് തിരച്ചില്‍ അവസാനിപ്പിച്ചു. ഇതിന് ശേഷമാണ് തിങ്കളാഴ്ച്ച പുലര്‍ച്ചേ അരണക്കല്ലില്‍ കടുവ വളര്‍ത്തുമൃഗങ്ങളെ ആക്രമിച്ച് കൊന്നത്.&nbsp;

വണ്ടിപ്പെരിയാറില്‍ വീണ്ടും കടുവ, തോട്ടം തൊഴിലാളിയുടെ പശുവിനെ കൊന്നു

തിരുവനന്തപുരം: മുൻഗണനേതര വിഭാഗങ്ങൾക്ക് സബ്‌സിഡിയിനത്തിൽ നൽകുന്ന റേഷനരിവില കൂട്ടണമെന്ന് സർക്കാർ സമിതിയുടെ ശുപാർശ. ഒരു കിലോഗ്രാമിന് ഇപ്പോഴുള്ള നാലുരൂപ ആറുരൂപയായി വർധിപ്പിക്കണമെന്നാണ് ആവശ്യം. 8.30 രൂപയ്ക്ക് സർക്കാർ വാങ്ങുന്ന അരിക്കാണ് ബാക്കി സബ്സിഡി നൽകുന്നത്. വിലകൂട്ടിയാൽ മാസം 3.14 കോടിരൂപ അധികം കണ്ടെത്താനാവും.
റേഷൻകടകളുടെ പ്രവർത്തനസമയം ഒൻപതുമുതൽ ഒരുമണിവരെയും നാലുമുതൽ ഏഴുവരെയുമാക്കി പുനഃക്രമീകരിക്കണമെന്നും ശുപാർശയുണ്ട്. സബ്‌സിഡിയുള്ള മുൻഗണനേതര കാർഡുകാർക്കും സബ്‌സിഡിയില്ലാത്ത മുൻഗണനേതര കാർഡുകാർക്കും അരി വിതരണംചെയ്യാൻ കേന്ദ്രസർക്കാർ ഒരു സഹായവും നൽകുന്നില്ല.
എൻപിഎൻഎസ് അരിയുടെ വിലയായി എഫ്‌സിഐയിൽ കിലോഗ്രാമിന് 8.30 രൂപയാണ് സർക്കാർ അടയ്‌ക്കേണ്ടത്. ഈ അരിക്ക് റേഷൻ വ്യാപാരികൾ 8.90 രൂപനൽകും. വിലകൂട്ടിയാൽ രണ്ടുവിഭാഗങ്ങൾക്കുമുള്ള അരിവിലയിനത്തിൽ വർഷം 50 കോടി രൂപ അധികമായി സർക്കാർ ഖജനാവിലെത്തും.

മുൻഗണനേതര വിഭാഗങ്ങളുടെ റേഷനരിവില കൂട്ടിയേക്കും

ന്യൂഡല്‍ഹി: രാജ്യത്തെ പൗരന്‍മാരുടെ വോട്ടര്‍ ഐഡി കാര്‍ഡും ആധാറും തമ്മില്‍ ബന്ധിപ്പിക്കുന്ന നിര്‍ണായക നീക്കത്തിന് കേന്ദ്ര സര്‍ക്കാര്‍ തയ്യാറെടുക്കുന്നതായി റിപ്പോര്‍ട്ടുകള്‍. വിവിധ സംസ്ഥാനങ്ങളിലെ വോട്ടര്‍മാരുടെ എണ്ണത്തിലെ ഇരട്ടിപ്പുമായി ബന്ധപ്പെട്ട് ക്രമക്കേടുകളുണ്ടെന്ന പരാതി ചര്‍ച്ച ചെയ്യുന്ന യോഗത്തില്‍ ഇക്കാര്യത്തിലെ തീരുമാനമുണ്ടാകും. കേന്ദ്ര തിരഞ്ഞെടുപ്പ് കമ്മീഷന്‍ ചൊവ്വാഴ്ച വിളിച്ചിരിക്കുന്ന യോഗത്തില്‍ ആഭ്യന്തര, നിയമ മന്ത്രാലയങ്ങളിലെ ഉന്നത ഉദ്യോഗസ്ഥര്‍ പങ്കെടുക്കും.
രാജ്യത്തെ വിവിധ സംസ്ഥാനങ്ങളില്‍ വോട്ടര്‍മാരുടെ ഇരട്ടിപ്പുണ്ടെന്ന കാര്യം പരാതികളില്‍ നടത്തിയ പരിശോധനയുടെ അടിസ്ഥാനത്തില്‍ മുഖ്യ തിരഞ്ഞെടുപ്പ് കമ്മീഷന്‍ തന്നെ സമ്മതിച്ചിരുന്നു. 2021ല്‍ ജനപ്രാതിനിധ്യ നിയമം ഭേദഗതി ചെയ്ത് ആധാറും വോട്ടര്‍ ഐഡിയും ബന്ധിപ്പിക്കാമെന്ന വ്യവസ്ഥ കേന്ദ്രം കൊണ്ടു വന്നിരുന്നു. 66 കോടിയോളം പേരുടെ ആധാര്‍ നമ്പര്‍ ശേഖരിച്ചിട്ടുണ്ടെന്നും എന്നാല്‍ വോട്ടര്‍ ഐഡിയുമായി ബന്ധിപ്പിച്ചിട്ടില്ലെന്നും പാര്‍ലമെന്റില്‍ സര്‍ക്കാര്‍ അറിയിച്ചു.ആധാറും വോട്ടര്‍ ഐഡിയും ബന്ധിപ്പിച്ചാല്‍ പിന്നീട് ക്രമേക്കടിനുള്ള സാധ്യത കുറവാണെന്നാണ് തിരഞ്ഞെടുപ്പ് കമ്മിഷന്റെ നിഗമനം. യോഗത്തില്‍ ആഭ്യന്തര സെക്രട്ടറി, ലെജിസ്ലേറ്റീവ് സെക്രട്ടറി, യൂണിക്ക് ഐഡന്റിഫിക്കേഷന്‍ അതോറിറ്റി സിഇഒ തുടങ്ങിയവര്‍ പങ്കെടുക്കും. മുഖ്യ തിരഞ്ഞെടുപ്പ് കമ്മിഷണര്‍ ഗ്യാനേഷ് കുമാറും തിരഞ്ഞെടുപ്പ് കമ്മിഷണര്‍മാരും യോഗത്തില്‍ പങ്കെടുക്കും. മൂന്ന് മാസത്തിനുള്ളില്‍ പരാതി പരിഹരിക്കാനുള്ള നടപടികള്‍ സ്വീകരിക്കാനാണ് നീക്കം.

ആധാറും വോട്ടര്‍ ഐഡിയും ബന്ധിപ്പിക്കാനുള്ള നീക്കം; നിര്‍ണായക നടപടിയുമായി കേന്ദ്രം

Search Results for: 17.03.2025