തിരുവനന്തപുരം: പാർലമെന്റ് തെരഞ്ഞെടുപ്പിൽ സംസ്ഥാനത്തെ 20 സീറ്റുകളിൽ ഇടതുമുന്നണി 12 സീറ്റ് വരെ നേടുമെന്ന് സി.പി.ഐ. കടുത്ത പോരാട്ടം നടന്ന തൃശൂരിലും മാവേലിക്കരയിലും പാർട്ടിക്ക് ജയം ഉറപ്പാണെന്നാണ് വിലയിരുത്തൽ. പാർട്ടി സംസ്ഥാന എക്സിക്യൂട്ടിവാണ് ഈ വിലയിരുത്തലിലെത്തിയത്. സി.പി.ഐ ദേശീയ നേതാവുകൂടിയായ ആനി രാജ മത്സരിച്ച വയനാട് പാർലമെന്റ് മണ്ഡലത്തിൽ കോൺഗ്രസ് നേതാവ് രാഹുൽ ഗാന്ധിയുടെ ഭൂരിപക്ഷം ഗണ്യമായി കുറയുമെന്നും പാർട്ടി വിലയിരുത്തുന്നു.
കടുത്ത ത്രികോണ മത്സരം നടന്ന തിരുവനന്തപുരത്ത് പാർട്ടി സ്ഥാനാർഥി പന്ന്യൻ രവീന്ദ്രന് നേരിയ ഭൂരിപക്ഷത്തിൽ ജയിക്കാനാകുമെന്നും സി.പി.ഐ കണക്കുകൂട്ടുന്നുണ്ട്. നേരത്തേ സി.പി.എമ്മും കേരളത്തിൽ എൽ.ഡി.എഫിന് 12 സീറ്റുകളിൽ ജയസാധ്യതയു​ണ്ടെന്ന് വിലയിരുത്തിയിരുന്നു.
സി.പി.എം ജയസാധ്യത കൽപിച്ച അതേ സീറ്റുകളാണ് സി.പി.ഐയും വിജയസാധ്യതയുള്ളവയായി എണ്ണുന്നത്. ആറ്റിങ്ങൽ, മാവേലിക്കര, തൃശൂർ, ആലത്തൂർ, പാലക്കാട്, കാസർകോട്, കണ്ണൂര്‍, വടകര, കോഴിക്കോട് അടക്കമുള്ള മണ്ഡലങ്ങളിൽ എൽ.ഡി.എഫിന് സാധ്യതയു​ണ്ടെന്നാണ് എക്സിക്യൂട്ടിവ് കമ്മിറ്റി വിലയിരുത്തിയത്. സി.പി.എമ്മും ഇതേ രീതിയിലുള്ള വിലയിരുത്തലിലാണ് തെരഞ്ഞെടുപ്പിന് ശേഷം എത്തിയത്.
പാർട്ടി മത്സരിച്ച നാലു മണ്ഡലങ്ങളിൽ രണ്ടിലും വിജയം സുനിശ്ചിതമാണെന്നാണ് സി.പി.ഐ നിഗമനം. തൃശൂരിൽ വി.എസ്. സുനിൽകുമാർ മികച്ച ഭൂരിപക്ഷത്തിൽ വിജയിക്കും. മാവേലിക്കരയിൽ അരുൺ കുമാറിന്റെ ജയവും ഉറപ്പാണെന്ന് സി.പി.ഐ കണക്കുകൂട്ടുന്നു. ഉറച്ച ജയസാധ്യതയുള്ള മണ്ഡലങ്ങളിൽ തിരുവനന്തപുരത്തെ ഉൾപ്പെടുത്തുന്നില്ലെങ്കിലും നേരിയ ഭൂരിപക്ഷത്തിൽ ജയിക്കാനുള്ള സാധ്യതയുണ്ടെന്നാണ് വിലയിരുത്തുന്നത്.
ന്യൂനപക്ഷ വോട്ടുകളുടെ കേന്ദ്രീകരണം മുന്നണിക്ക് അനുകൂലമായി ഉണ്ടായിട്ടുണ്ടെന്നാണ് സി.പി.ഐ കണക്കുകൂട്ടുന്നത്. വയനാട്ടിൽ രാഹുൽ ഗാന്ധിയുടെ ഭൂരിപക്ഷം വലിയ തോതിൽ കുറക്കാൻ ആനി രാജക്ക് കഴിയുമെന്നും സംസ്ഥാന എക്സിക്യൂട്ടിവ് വിലയിരുത്തുന്നു.

വടകര ഉൾപ്പെടെ എൽ ഡി എഫ് 12 സീറ്റ്‌ നേടുമെന്ന് സി പി ഐ വിലയിരുത്തൽ

Kerala

കാഞ്ഞങ്ങാട്: ഇടതുമുന്നണിയുടെ ബൂത്ത് ഏജന്റ് ബല്ലാക്കടപ്പുറത്തെ മൂസാൻകുട്ടിയുടെ കഫെയ്ക്ക് തീയിട്ടു. ബല്ലാക്കടപ്പുറം ഫിഷറീസ് സൊസൈറ്റിക്കടുത്താണ് കോർണിഷ് എന്ന പേരിലുള്ള കഫെ. ശനിയാഴ്ച പുലർച്ചെ മൂന്നരയോടെയാണ് സംഭവം. മീൻപിടിക്കാൻ പോകുന്നവരാണ് തീ ആളിപ്പടരുന്നത് കണ്ടത്.
കടലിലേക്കു പോകുന്നവരും നാട്ടുകാരും ചേർന്ന് തീ അണച്ചു. മേൽക്കൂര ഓലമേഞ്ഞതായതിനാൽ പെട്ടെന്ന് തീ പടർന്നുപിടിക്കുകയായിരുന്നു. ഭക്ഷണം കഴിക്കാനുള്ള ഇരിപ്പിടമുൾപ്പെടെ കഫെയ്ക്കകത്തുണ്ടായിരുന്ന ഫർണിച്ചറും മറ്റു സാധന-സാമഗ്രകികളും കത്തിയമർന്നു. രണ്ടുലക്ഷം രൂപയുടെ നഷ്ടമുണ്ടായതായി മൂസാൻകുട്ടി ഹൊസ്ദുർഗ് പോലീസിൽ നൽകിയ പരാതിയിൽ പറഞ്ഞു.
സി.പി.എം. ബല്ലാക്കടപ്പുറം ബ്രാഞ്ച് അംഗമാണ് മൂസാൻകുട്ടി. ലോക്‌സഭാ തിരഞ്ഞെടുപ്പിൽ മീനാപ്പീസ് കണ്ടത്തിൽ ഗവ. എൽ.പി. സ്‌കൂളിലെ 138-ാം നമ്പർ ബൂത്ത് എൽ.ഡി.എഫ്. ഏജന്റായിരുന്നു. കഫെ ആളിക്കത്തുന്നതിനിടയിൽ ഇരുചക്രവാഹനങ്ങളിൽ ചിലർ പോകുന്നത് ശ്രദ്ധയിൽപ്പെട്ടതായി മത്സ്യത്തൊഴിലാളികൾ പോലീസിന് മൊഴി നൽകി. രണ്ടുപേർക്കെതിരേ കേസെടുത്തതായി ഇൻസ്‌പെക്ടർ എം.പി. ആസാദ് പറഞ്ഞു.
സി.പി.എം. ജില്ലാ ആക്ടിങ് സെക്രട്ടറി സി.എച്ച്. കുഞ്ഞമ്പു എം.എൽ.എ., എൽ.ഡി.എഫ്. സ്ഥാനാർഥി എം.വി. ബാലകൃഷ്ണൻ, സി.പി.എം. ജില്ലാ സെക്രട്ടേറിയറ്റംഗം വി.വി. രമേശൻ, കാഞ്ഞങ്ങാട് ഏരിയാ സെക്രട്ടറി കെ. രാജ്‌മോഹൻ, മുൻ ഏരിയാ സെക്രട്ടറി എം. പൊക്ലൻ, കാഞ്ഞങ്ങാട് നഗരസഭാധ്യക്ഷ കെ.വി. സുജാത, സി.ഐ.ടി.യു. നേതാവ് കാറ്റാടി കുമാരൻ, സി.പി.എം. തീരദേശ ലോക്കൽ സെക്രട്ടറി എൻ.വി. ബാലൻ, ജില്ലാ കമ്മിറ്റിയംഗം പി.കെ. നിഷാന്ത്, മഹമ്മൂദ് മുറിയനാവി എന്നിവർ സ്ഥലത്തെത്തി.
തീയിട്ടതിനു പിന്നിൽ മുസ്‍ലിം ലീഗുകാരാണെന്ന് എൽ.ഡി.എഫും ഇതുമായി യാതൊരു ബന്ധവുമില്ലെന്ന് യു.ഡി.എഫും പ്രതികരിച്ചു. കഫെ അഗ്നിക്കിരയാക്കിയതിനു പിന്നിൽ മുസ്‌ലിം ലീഗിന് യാതൊരു ബന്ധവുമില്ലെന്ന് പാർട്ടി ബല്ലാക്കടപ്പുറം ശാഖാ കമ്മിറ്റി പ്രസ്താവനയിൽ അറിയിച്ചു. മുസ്‌ലിം ലീഗാണ് ഇതിന്‌ പിന്നിലെന്ന സി.പി.എം. പ്രചാരണം യാഥാർഥ്യത്തിനു നിരക്കാത്തതാണ്. ഇതിൽ ദുരൂഹതയുണ്ട്. സമഗ്ര അന്വേഷണം വേണമെന്നും കമ്മിറ്റി ആവശ്യപ്പെട്ടു. മുസ്‌ലിം ലീഗ് സംസ്ഥാന പ്രവർത്തകസമിതി അംഗം എം.പി. ജാഫർ, യു.ഡി.എഫ്. ബല്ലാക്കടപ്പുറം തിരഞ്ഞെടുപ്പ് കമ്മിറ്റി ചെയർമാൻ എം.എസ്. ഫൈസൽ, എം.കെ. അബൂബക്കർ ഹാജി എന്നിവർ സ്ഥലം സന്ദർശിച്ചു.

എൽ.ഡി.എഫ്‌. ബൂത്ത് ഏജന്റിന്റെ കഫെയ്ക്ക് തീയിട്ടു; പിന്നിൽ ലീഗുകാരെന്ന് ആരോപണം

മലപ്പുറം: മലപ്പുറം ലോക്‌സഭാ മണ്ഡലത്തില്‍ വിജയിക്കുമെന്ന പ്രതീക്ഷ ഇതുവരെ കൈവിട്ടിട്ടില്ലെന്ന് എല്‍.ഡി.എഫ്. സ്ഥാനാര്‍ഥി വി. വസീഫ്. മുന്‍കാലങ്ങളില്‍നിന്ന് വ്യത്യസ്തമായി വലിയ പിന്തുണ മലപ്പുറം മണ്ഡലത്തിലുണ്ടെന്നും അദ്ദേഹം പറഞ്ഞു.
വലിയ വോട്ടിങ് ശതമാനം തങ്ങള്‍ക്ക് അനുകൂലമാവും. ഒരുലക്ഷംവോട്ടിന് താന്‍ വിജയിച്ചാലും അത്ഭുതപ്പെടാനില്ല. മലപ്പുറത്ത് യു.ഡി.എഫിന് അല്പം വിയര്‍ക്കേണ്ടിവന്നു. അവര്‍ക്ക് നന്നായിട്ട് ഫീല്‍ഡില്‍ ഇറങ്ങേണ്ടി വന്നുവെന്നും യു.ഡി.എഫിനെ ലക്ഷ്യമിട്ട്‌ വസീഫ് അവകാശപ്പെട്ടു.
'വളരേ ആത്മവിശ്വാസത്തോടുകൂടിത്തന്നെ മലപ്പുറത്ത് ഇടതുപക്ഷം ജയിക്കും എന്ന പ്രതീക്ഷയില്‍ തന്നെയാണുള്ളത്. ആ പ്രതീക്ഷ ഇതുവരെ കൈവിട്ടിട്ടില്ല', അദ്ദേഹം കൂട്ടിച്ചേര്‍ത്തു.

വലിയ പിന്തുണ മലപ്പുറം മണ്ഡലത്തിലുണ്ടെന്ന് വി. വസീഫ്

കോട്ടക്കൽ: പൊന്നാനി മണ്ഡലം എൽ.ഡി.എഫ് സ്ഥാനാർത്ഥിയുടെ പോസ്റ്റർ കീറിയെന്ന് ആരോപണം. എൽ.ഡി.എഫ്, യു.ഡി.എഫ് പ്രവർത്തകർ തമ്മിൽ വാഗ്വാദവും സംഘർഷവുമുണ്ടായി.
കോട്ടക്കൽ ഗവ. രാജാസ് എച്ച്.എസ്.എസിന് സമീപമാണ് രാവിലെ സംഘർഷം അരങ്ങേറിയത്. തുടർന്ന് മലപ്പുറം ഡിവൈ.എസ്.പി പി.ഷംസിന്‍റെ നേതൃത്വത്തിൽ വൻ പൊലീസ് സംഘം സ്ഥലത്തെത്തി പ്രവർത്തകരെ നീക്കി.
പ്രശ്നബാധിത ബൂത്തായതിനാൽ ജില്ല പൊലീസ് മേധാവി പി. ശശിധരൻ ബൂത്ത് സന്ദർശിച്ചു. പ്രദേശത്ത് വൻ പൊലീസ് സന്നാഹം ക്യാമ്പ് ചെയ്യുകയാണ്. വിഷയത്തിൽ മുഖം നോക്കാതെ നടപടിയെടുക്കുമെന്ന് ഇൻസ്പെക്ടർ അശ്വിത് എസ്. കാരന്മയിൽ അറിയിച്ചു.

എൽ.ഡി.എഫ് സ്ഥാനാർത്ഥിയുടെ പോസ്റ്റർ കീറിയെന്ന് ആരോപണം; കോട്ടക്കലിൽ സംഘർഷം

കോഴിക്കോട്: ജനങ്ങൾ കൂടുതലായി എൽഡിഎഫിനോട് അടുക്കുന്നുവെന്ന് വടകരയിലെ എൽഡിഎഫ് സ്ഥാനാർഥി കെ കെ ശൈലജ. എല്ലായിടത്തും വമ്പിച്ച ജനക്കൂട്ടം സ്ഥാനാർത്ഥിയെ കാണാൻ എത്തിച്ചേരുന്നു. വ്യക്തിഹത്യ ഇവിടെ മാത്രമല്ല, എല്ലായിടത്തും ഉണ്ടായിട്ടുണ്ടെന്ന് വ്യക്തമാക്കിയ കെകെ ശൈലജ അതിൽ നിയമനടപടി തുടരുമെന്നും പറഞ്ഞു. കൂത്തുപറമ്പിൽ സംസാരിക്കുകയായിരുന്നു കെകെ ശൈലജ.
അതേ സമയം, സൈബര്‍ ആക്രമണമെന്ന ആരോപണത്തില്‍ വടകരയിലെ യുഡിഎഫ് സ്ഥാനാര്‍ത്ഥി ഷാഫി പറമ്പിലിനെതിരെ എല്‍ഡിഎഫ് സ്ഥാനാര്‍ത്ഥി കെ കെ ശൈലജ വക്കീൽ നോട്ടീസ് അയച്ചിരുന്നു. സൈബർ അധിക്ഷേപം ചൂണ്ടിക്കാട്ടിയാണ് നോട്ടീസ്. യുഡിഎഫ് പ്രവര്‍ത്തകര്‍ പ്രചരിപ്പിക്കുന്ന വ്യാജ വീഡിയോകളും മോര്‍ഫ് ചെയ്ത ചിത്രങ്ങളും അശ്ലീല കമന്‍റുകളും പിന്‍വലിച്ച് ഷാഫി മാപ്പു പറയണമെന്നാണ് വക്കീല്‍ നോട്ടീസിലെ ആവശ്യം. സൈബര്‍ ആക്രണ കേസിലെ 16 കാര്യങ്ങള്‍ വിശദീകരിച്ചുകൊണ്ടാണ് വക്കീല്‍ നോട്ടീസ് അയച്ചിരിക്കുന്നത്. പ്രചരിക്കുന്നവ പിൻവലിക്കാൻ തയ്യാറായില്ലെങ്കിൽ നിയമ നടപടി സ്വീകരിക്കുമെന്ന് നോട്ടീസിൽ കെ കെ ശൈലജ വ്യക്തമാക്കിയിട്ടുണ്ട്.

'ജനങ്ങൾ കൂടുതലായി എൽഡിഎഫിനോട് അടുക്കുന്നു'; കെ കെ ശൈലജ

Kannur

കോഴിക്കോട്: സുപ്രഭാതം ദിനപത്രത്തിൽ വീണ്ടും എല്‍.ഡി.എഫ് പരസ്യം. കഴിഞ്ഞ ദിവസം എല്‍.ഡി.എഫ് പരസ്യം വന്നത് സമസ്ത അണികൾക്കിടയിൽ വ്യാപക വിമർശത്തിനിടയായിരുന്നു. മലപ്പുറത്ത് പത്രം കത്തിച്ചത് തർക്കം രൂക്ഷമാക്കി. ചില സമസ്ത നേതാക്കളുടെ എല്‍.ഡി.എഫ് അനുകൂല പ്രസ്താവന തള്ളി സമസ്ത നേതൃത്വം രംഗത്തെത്തിയിരുന്നു. ഇതിന് പിന്നാലെയാണ് ഇന്നത്തെ പത്രത്തിലും എല്‍.ഡി.എഫ് പരസ്യം വന്നത്. സമസ്ത പ്രവർത്തകരുടെ വാട്ട്സാപ്പ് ഗ്രൂപ്പുകളിൽ ഇത് വീണ്ടും വലിയ ചർച്ചയായിട്ടുണ്ട്.
കഴിഞ്ഞ ദിവസവും എൽ.ഡി.എഫിന് വോട്ട് അഭ്യർഥിച്ച് പരസ്യം നൽകിയിരുന്നു. സുപ്രഭാതം പത്രത്തിന്‍റെ ഒന്നാം പേജിലാണ് എൽ.ഡി.എഫിന് വോട്ട് അഭ്യർഥിച്ച് പരസ്യം പ്രസിദ്ധീകരിച്ചത്. 'ന്യൂനപക്ഷ വിഭാഗങ്ങൾ രണ്ടാംകിട പൗരൻമാരാകും...ഇടതില്ലെങ്കിൽ... ഇടതുണ്ടെങ്കിലേ നമ്മുടെ ഇന്ത്യയുള്ളൂ' എന്നാണ് പരസ്യവാചകം. മുഖ്യമന്ത്രിയുടെ ഫോട്ടോ അടക്കമാണ് പരസ്യം പ്രസിദ്ധീകരിച്ചത്.

കത്തിച്ച് പ്രതിഷേധിച്ചതിന് പിന്നാലെ സുപ്രഭാതം ദിനപത്രത്തിൽ വീണ്ടും എല്‍.ഡി.എഫ് പരസ്യം

വടകര: സൈബർ ആക്രമണം സംബന്ധിച്ച് പറഞ്ഞതിൽ ഉറച്ചുനിൽക്കുന്നുവെന്നും തെളിവ് കൊടുക്കേണ്ടിടത്ത് കൊടുക്കുമെന്നും എൽ.ഡി.എഫ് സ്ഥാനാർഥി കെ.കെ. ശൈലജ. തെരഞ്ഞെടുപ്പിൽ വില കുറഞ്ഞ പണിയൊന്നും എടുക്കേണ്ട കാര്യം തനിക്കില്ലെന്നും കെ.കെ. ശൈലജ വ്യക്തമാക്കി.
സോഷ്യൽ മീഡിയ ഇംപാക്ട് യു.ഡി.എഫിന് ബൂമറാങ്ങായി വരും. തനിക്കെതിരായ സൈബർ ആക്രമണത്തിൽ ജനത്തിന് പ്രതിഷേധമുണ്ടെന്നും കെ.കെ. ശൈലജ വ്യക്തമാക്കി.

പറഞ്ഞതിൽ ഉറച്ചുനിൽക്കുന്നു: തെളിവ് കൊടുക്കേണ്ടിടത്ത് കൊടുക്കുമെന്ന് കെ.കെ. ശൈലജ

Vadakara

കോഴിക്കോട്: കോഴിക്കോട്ടെ എൽ.ഡി.എഫ് സ്ഥാനാർഥി എളമരം കരീമിനെതിരെ തിരഞ്ഞെടുപ്പ് കമ്മീഷന് പരാതി സമർപ്പിച്ച് യു.ഡി.എഫ്. നവമാധ്യമത്തിൽ പങ്കുവെച്ച വീഡിയോയ്ക്കെതിരെയാണ് പരാതി.&nbsp;
വീഡിയോ ഇ.വി.എമ്മിന്റെ വിശ്വാസ്യത ഇല്ലാതാക്കുന്നുവെന്നാണ് യു.ഡി.എഫ് ആരോപണം. യു.ഡി.എഫ് കോഴിക്കോട് പാർലമെന്റ് മണ്ഡലം കമ്മിറ്റിയാണ് പരാതി നൽകിയിരിക്കുന്നത്.

എൽ ഡി എഫ് സ്ഥാനാർഥി എളമരം കരീമിനെതിരെ തിര. കമ്മീഷന് പരാതി

Kozhikode

കോഴിക്കോട് : വടകരയിലെ ഇടതുസ്ഥാനാർത്ഥി കെ കെ ശൈലജയ്ക്കെതിരായ സൈബർ ആക്രമണവുമായി ബന്ധപ്പെട്ട് കോൺഗ്രസ് പ്രാദേശിക നേതാവിനെതിരെ കേസെടുത്തു. ബാലുശ്ശേരി പഞ്ചായത്ത് ഏഴാം വാർഡ് അംഗം ഹരീഷ് നന്ദനത്തിനെതിരെയാണ് കേസെടുത്തത്. കെ കെ ശൈലജയ്ക്കെതിരായ അപകീർത്തികരമായ പോസ്റ്റ് പ്രചരിപ്പിച്ചുവെന്നാണ് എഫ്ഐആറിലെ പരാമർശം. ഇയാളെ അറസ്റ്റ് ചെയ്ത് ജാമ്യത്തിൽ വിട്ടു. വടകരയിൽ എൽഡിഎഫ് നൽകിയ സൈബർ ആക്രമണ പരാതിയിൽ പ്രതി ചേർക്കപ്പെടുന്ന ആദ്യ കോൺഗ്രസ് പ്രവർത്തകനാണ് ഹരീഷ്. ഇതോടെ കെ കെ ശൈലജക്കെതിരായ സൈബർ ആക്രമണവുമായി ബന്ധപ്പെട്ട് രജിസ്റ്റർ ചെയ്ത ആകെ കേസുകളുടെ എണ്ണം അഞ്ച് ആയി.&nbsp;
ഇന്നലെ മാത്രം രണ്ട് പേർക്കെതിരെ കേസെടുത്തിരുന്നു. നടുവണ്ണൂർ സ്വദേശി മിൻഹാജിനെതിരെ മട്ടന്നൂർ, വടകര എന്നിവടങ്ങളിലും സൽമാൻ വാളൂരിന് എതിരെ പേരാമ്പ്രയിലുമാണ് കേസെടുത്തത്. ഇരുവരും ലീഗ് പ്രവർത്തകരാണ്. വടകരയിലെ ഇടതു സ്ഥാനാർഥി കെ കെ ശൈലജ നൽകിയ പരാതിയിലാണ് കേസുകളെടുത്തത്. പരാതിക്കാരിയുടെ മാനം ഇകഴ്ത്തി, കലാപം ഉണ്ടാക്കാൻ ശ്രമിച്ചു എന്നി വകുപ്പുകൾ ചുമത്തിയാണ് കേസെടുത്തത്.

കെ കെ ശൈലജയ്ക്കെതിരായ സൈബർ ആക്രമണം: കോൺഗ്രസ് പ്രാദേശിക നേതാവിനെ അറസ്റ്റ് ചെയ്തു

വടകര: ഓരോ തിരഞ്ഞെടുപ്പിലും രാഷ്ട്രീയ കേരളം ഉറ്റു നോക്കുന്ന വടകരയിൽ പ്രചാരണവിഷയങ്ങൾ മാറിമറിയുന്നു. വടകരയിൽ ഇപ്പോൾ യു.ഡി.എഫും എൽ.ഡി.എഫും കൊമ്പുകോർക്കുന്നത് രണ്ടു വിഷയങ്ങളിലാണ്. ഒന്ന് പാനൂരിലെ ബോംബ് സ്ഫോടനം, രണ്ട് യു.ഡി.എഫ്. റാലിയിൽ തൊഴിലുറപ്പുസ്ത്രീകളെക്കുറിച്ച് ഉയർന്ന മുദ്രാവാക്യം. ബോംബിനെ തൊഴിലുറപ്പുവിവാദംകൊണ്ട് പ്രതിരോധിക്കുകയാണ് എൽ.ഡി.എഫ്.
യു.ഡി.എഫ്. സ്ഥാനാർഥി ഷാഫി പറമ്പിൽ നാലിന് നാമനിർദേശപത്രിക സമർപ്പിക്കാനായി യു.ഡി.എഫ്., ആർ.എം.പി.ഐ. വനിതാസംഘടനകൾക്കൊപ്പം പോകുമ്പോൾ ചില വനിതാപ്രവർത്തകർ വിളിച്ച മുദ്രാവാക്യമാണ് വിവാദമായത്. ‘ഈ റാലിയിലുള്ളത് തൊഴിലുറപ്പിൻ പെണ്ണുങ്ങളല്ല’ എന്നരീതിയിലായിരുന്നു മുദ്രാവാക്യം. ഇത് തൊഴിലുറപ്പുതൊഴിലാളികളോടുള്ള അവഹേളനമാണെന്ന ആരോപണം എൽ.ഡി.എഫ്. ഉയർത്തി. നാലിന് റാലി നടന്നെങ്കിലും ഇതിന്റെ വീഡിയോ പുറത്തുവരുന്നത് ആറിനാണ്. പാനൂരിലെ സ്ഫോടനത്തിന്റെ പശ്ചാത്തലത്തിൽ എൽ.ഡി.എഫ്. പ്രതിരോധത്തിൽ നിൽക്കുന്ന സമയമാണിത്.
മുദ്രാവാക്യ വീഡിയോ പുറത്തുവന്നതോടെ എൽ.ഡി.എഫ്. സൈബർ പോരാളികൾ ഇതിന് പല മാനങ്ങളും ചമച്ച് പ്രചാരണം തുടങ്ങി. സി.പി.എമ്മിന്റെയും എൽ.ഡി.എഫിന്റെയും മുതിർന്നനേതാക്കൾവരെ ഈ വിഷയത്തിൽ പോസ്റ്റുകളിട്ടു. മറുഭാഗത്ത് യു.ഡി.എഫും ആർ.എം.പി.ഐ.യും ബോംബ് രാഷ്ട്രീയവും കൊലപാതകരാഷ്ട്രീയവും ചർച്ചയാക്കുമ്പോൾ അതിനോടുപ്രതികരിക്കാതെ തൊഴിലുറപ്പുവിഷയത്തിൽ ഉറച്ചുനിന്ന് പോരടിക്കുകയാണ് എൽ.ഡി.എഫ്.
സി.പി.എം. റാലികളിലും മറ്റും തൊഴിലുറപ്പുതൊഴിലാളികളെ ഭീഷണിപ്പെടുത്തി കൊണ്ടുപോകുന്നതിനെതിരേയുള്ള പ്രതികരണമാണ് യു.ഡി.എഫ്. വനിതാസംഘടനകളുടെ റാലിയിൽ കേട്ടതെന്നാണ് യു.ഡി.എഫ്. വിശദീകരണം. തൊഴിലുറപ്പുപദ്ധതി കൊണ്ടുവന്നത് കോൺഗ്രസ് നേതൃത്വത്തിലുള്ള യു.പി.എ. സർക്കാരാണ്. തൊഴിലുറപ്പുതൊഴിലാളികളുടെ മറവിൽ രാഷ്ട്രീയമുതലെടുപ്പാണ് എൽ.ഡി.എഫ്. നടത്തുന്നതെന്നും യു.ഡി.എഫ്. വിശദീകരിക്കുന്നു.
ഇതിനിടെ, തൊഴിലുറപ്പുതൊഴിലാളികൾക്കൊപ്പം എൽ.ഡി.എഫ്. സ്ഥാനാർഥി കെ.കെ. ശൈലജ നിൽക്കുന്ന ചിത്രങ്ങളും വീഡിയോകളും പുറത്തുവന്നു. ഇതേരീതിയിൽ വീഡിയോ ഇറക്കി യു.ഡി.എഫും ഇതിനെ പ്രതിരോധിച്ചു. യു.ഡി.എഫ്. മുദ്രാവാക്യത്തിനെതിരേ തൊഴിലുറപ്പുതൊഴിലാളികളെത്തന്നെ രംഗത്തിറക്കിയുള്ള പ്രതികരണങ്ങളും കണ്ടു.
ഇതിനിടയിലും ബോംബ് രാഷ്ട്രീയത്തിനെതിരേയുള്ള പ്രചാരണങ്ങളുമായി യു.ഡി.എഫും ആർ.എം.പി.ഐ.യും രംഗത്തുണ്ട്. തിങ്കളാഴ്ച എല്ലാ പഞ്ചായത്ത്-നഗരസഭ ആസ്ഥാനങ്ങളിലും പ്രകടനവും പൊതുയോഗവും നടന്നു. ഇതുതുടരാനാണ് യു.ഡി.എഫ്. തീരുമാനം. തൊഴിലുറപ്പുവിഷയം സജീവചർച്ചയാക്കാനും പ്രതിഷേധപരിപാടികൾ ഉൾപ്പെടെ സംഘടിപ്പിക്കാനുമുള്ള ഒരുക്കത്തിലാണ് എൽ.ഡി.എഫ്. പാനൂർ സ്ഫോടനത്തിൽ സമഗ്ര അന്വേഷണം വേണമെന്ന് എൻ ഡി എയും വാർത്ത സമ്മേളനം നടത്തി ആവശ്യപ്പെട്ടിരുന്നു.

പാനൂരിലെ ബോംബ് വിടാതെ യു ഡി എഫ്, പ്രതിരോധിക്കാന്‍ തൊഴിലുറപ്പ് മുദ്രാവാക്യ വിവാദവുമായി എൽ ഡി എഫ്; വടകരയിലെ പ്രചാരണ തന്ത്രങ്ങള്‍

കോഴിക്കോട്: 47 കോടിയുടെ ക്രിപ്റ്റോ കറൻസി തട്ടിപ്പ് കേസിൽ കൊടുവള്ളി നഗരസഭയിലെ എൽ.ഡി.എഫ് കൗൺസിലറെ ഹൈദരാബാദ് പ‍ൊലീസ് അറസ്റ്റ് ചെയ്തു. കൊടുവള്ളി നഗരസഭ 12ാം വാർഡംഗം അഹമ്മദ്‌ ഉനൈസിനെയാണ് അറസ്റ്റ് ചെയ്തത്.
ഹൈദരാബാദ് പൊലീസ് രജിസ്റ്റർ ചെയ്ത കേസിലാണ് അറസ്റ്റ്. കൊടുവള്ളിയിലെത്തിയ ഹൈദരാബാദ് പ‍ൊലീസ് കൊടുവള്ളി പൊലീസിന്റെ സഹായത്തോടെയാണ് ഉനൈസി​നെ പിടികൂടിയത്.
ഇയാളെ ഹൈദരാബാദിലേക്ക് കൊണ്ടുപോയി. പി.ടി.എ റഹീം എം.എൽ.എ അധ്യക്ഷനായ എൻ.എസ്.സി (നാഷണൽ സെക്കുലർ കോൺഫറൻസ്) അംഗമാണ് അഹമ്മദ് ഉനൈസ്.

47 കോടിയുടെ ക്രിപ്റ്റോ കറൻസി തട്ടിപ്പ്: എൽ.ഡി.എഫ് കൗൺസിലർ അറസ്റ്റിൽ

നാദാപുരം: നാട്ടിൻ പുറങ്ങളിൽ ആവേശത്തിരയിളക്കി വടകര ലോകസഭാ മണ്ഡലം എൽഡിഎഫ് സ്ഥാനാർഥി കെ കെ ശൈലജയുടെ ഒന്നാം ഘട്ട മണ്ഡല പര്യടനം. നാടിന്റെ നന്മ കാക്കാനുള്ള പോരാട്ടത്തിന് കരുത്ത് പകർന്ന് ഹൃദയപക്ഷമായ ഇടതുപക്ഷത്തിന് പിന്തുണയേകാൻ ഞങ്ങളുണ്ടാകുമെന്ന പ്രഖ്യാപനമായി മാറുകയാണ് കെ കെ ശൈലജയുടെ സ്വീകരണ കേന്ദ്രങ്ങളിലെ വർദ്ധിച്ച ജനപങ്കാളിത്തം. പൂക്കൾ വിതറിയും ബേന്റ് വാദ്യങ്ങളുടെയും ശിങ്കാരിമേളത്തിന്റെ അകമ്പടിയിൽ സ്നേഹനിർഭരമായ വരവേൽപ്പാണ് എല്ലായിടത്തും ലഭിച്ചത്. തുറന്ന വാഹനത്തിൽ സഞ്ചരിച്ച സ്ഥാനാർത്ഥിയെയും കാത്ത് പാതയോരങ്ങളിൽ നൂറുക്കണക്കിന് പേരാണ് ഉണ്ടായത്. ഞായർ രാവിലെ മരുതോങ്കര മുണ്ടകുറ്റിയിലായിരുന്നുണ്ടകുറ്റിയിലായിരുന്നു ആദ്യ സ്വീകരണം. തുവ്വാട്ട് പൊയിലെ സ്വീകരണത്തിന് ശേഷം കുണ്ടുത്തോട്ടിൽ വാളും പരിചയും നല്കി ഉജ്വല വരവേൽപ്പ്.&nbsp;
തൊട്ടിൽ പാലം ടൗണിൽ വിദേശ സഞ്ചാരി ഹാരി ടീച്ചർക്കൊപ്പം സെൽഫിയെടുത്തത് വേറിട്ട കാഴ്ച്ചയായി. കായക്കൊടി ശിങ്കാരിമേളത്തിൻ്റെ അകമ്പടിയിൽ സ്വീകരിച്ചാനയിച്ചു. കൈവേലിയിൽ കണിക്കൊന്ന നല്കി വരവേറ്റു. കരുകുളം പുഷ്പ്പവൃഷ്ടി നടത്തി സ്വീകരിച്ചു. ചുഴലി, വളയം, കുറുവന്തേരി, പാറക്കടവ്, തൂണേരി, വെള്ളൂർ, ഇരിങ്ങണ്ണൂർ, എടച്ചേരി, കല്ലാച്ചി, എന്നിവിടങ്ങളിലെ ഉജ്വല സ്വീകരണത്തിന് ശേഷം കുമ്മങ്കോട് സമാപിച്ചു. മുണ്ടകുറ്റിയിൽ ഇകെ വിജയൻ എംഎൽഎയാണ് ഉദ്ഘാടനം ചെയ്തത്. എൽഡിഎഫ് നേതാക്കളായ പി പി ചാത്തു, വി പി കുഞ്ഞികൃഷ്ണൻ, ടി കെ രാജൻ ,ബോബി മൂക്കൻതോട്ടം, പി എം നാണു ,കരിമ്പിൽ ദിവാകരൻ, കെ കെ സുരേഷ്,എ എം റഷീദ് ,സമദ് നരിപ്പറ്റ, രജീന്ദ്രൻ കപ്പള്ളി എന്നിവർ അനുഗമിച്ചു. വിവിധ സ്വീകരണ കേന്ദ്രങ്ങളിൽ സി എച്ച് മോഹനൻ ,ശ്രീജിത്ത് മുടപ്പിലായി, അഡ്വ കെ പി ബിനിഷ, പ്രേംരാജ് കായക്കൊടി, എം കെ ശശി, അഡ്വ രാഹുരാജ്, കെ പി പ്രദീഷ് ,വത്സരാജ് മണലാട്ട്, ഇ കെ സജിത്ത് കുമാർ, പി ഭാസ്കരൻ, എൻ കെ ലീല, എം പി വിജയൻ, കെ ജി ലത്തീഫ്, എ റഷീദ്, കെ കെ മോഹൻ ദാസ് എന്നിവർ സംസാരിച്ചു.

നാട്ടിൻ പുറങ്ങളിൽ ആവേശം തീർത്ത് കെ കെ ശൈലജയുടെ നാദാപുരം മണ്ഡലം പര്യടനം

Nadapuram

നാദാപുരം: എൽഡിഎഫ് നാദാപുരം നിയോജക മണ്ഡലം തെരഞ്ഞെടുപ്പ് കൺവൻഷൻ കല്ലാച്ചിയിൽ സിപിഐ സംസ്ഥാന എക്സിക്യൂട്ടീവ് അംഗം സത്യൻ മൊകേരി ഉദ്ഘാടനം ചെയ്തു. രജീന്ദ്രൻ കപ്പള്ളി അധ്യക്ഷനായി. കൺവഷനിൽ പങ്കെടുക്കാനെത്തിയ കെ കെ ശൈലജയെ ആവേശകരമായ മുദ്രാവാക്യം വിളികളോടെ ഉഷ്മള വരവേൽപ്പ് നല്കി വേദിയിലേക്ക് സ്വീകരിച്ചാനയിച്ചു. സിപിഐ എം സംസ്ഥാന കമ്മിറ്റി അംഗം കെ കെ ലതിക, ഇ പി ദാമോദരൻ, ഒ രാജൻ,ഇ കെ വിജയൻ എംഎൽഎ,
ബോബി മൂക്കൻതോട്ടം, സമദ് നരിപ്പറ്റ,
വി ഗോപാലൻ ,സി എം മാത്യു, ലതിക ശ്രീനിവാസ്, ബിജു കായക്കൊടി എന്നിവർ സംസാരിച്ചു. പി പി ചാത്തു സ്വാഗതം പറഞ്ഞു.

എൽഡിഎഫ് നാദാപുരം മണ്ഡലം കൺവൻഷൻ പങ്കാളിത്തം കൊണ്ട് ശ്രദ്ധേയം

പേരാമ്പ്ര: കേരളത്തിന്റെ അവകാശങ്ങൾ നിഷേധിക്കുന്നതിനെതിരെ മുഖ്യമന്ത്രിയും മന്ത്രിമാരും എംഎൽഎമാരും എംപിമാരും ഡൽഹിയിൽ നടത്തിയ സമരത്തിന് ഐക്യദാർഢ്യം പ്രഖ്യാപിച്ച് ഇടതുപക്ഷ ജനാധിപത്യമുന്നണി മേപ്പയൂർ പഞ്ചായത്ത് കമ്മിറ്റിയുടെ നേതൃത്വത്തിൽ മേപ്പയൂരിൽ നടന്ന ജനകീയ സദസ്സ് സിപിഐഎം ജില്ലാ കമ്മിറ്റി അംഗം എസ് കെ സജീഷ് ഉദ്ഘാടനം ചെയ്തു. പി ബാലൻ അധ്യക്ഷത വഹിച്ചു. സി ബിജു സുനിൽ ഓടയിൽ, ഈ കുഞ്ഞിക്കണ്ണൻ, കെ കുഞ്ഞിരാമൻ , എൻ കെ രാധ എന്നിവർ പ്രസംഗിച്ചു. കൺവീനർ കെ ടി രാജൻ സ്വാഗതമാശംസിച്ചു. ബൂത്തുകളിൽ നിന്ന് പ്രകടനമായാണ് ബഹുജനങ്ങൾ ജനകീയ സദസ്സിൽ എത്തിച്ചേർന്നത്.

ഡൽഹി സമരത്തിന് ഐക്യദാർഢ്യം പ്രഖ്യാപിച്ച് ജനകീയ സദസ്സ്

Perambra

തിരുവനന്തപുരം: ഡിസംബര്‍ 10ന് നടക്കുന്ന തദ്ദേശസ്ഥാപന ഉപതിരഞ്ഞെടുപ്പില്‍ വോട്ട് ചെയ്യുന്നവരുടെ ഇടത് കൈയ്യിലെ നടുവിരലിലാണ് മഷി പുരട്ടേണ്ടതെന്ന് സംസ്ഥാന തിരഞ്ഞെടുപ്പ് കമ്മീഷന്‍. നവംബര്‍ 13നും 20നും സംസ്ഥാനത്ത് നടന്ന ലോക്‌സഭ, നിയമസഭ ഉപതിരഞ്ഞെടുപ്പുകളില്‍ സമ്മതിദാനാവകാശം വിനിയോഗിച്ച വോട്ടര്‍മാരുടെ ഇടതു കൈയ്യിലെ ചൂണ്ടുവിരലിലെ മഷി അടയാളം മാഞ്ഞു പോകാന്‍ ഇടയില്ലാത്തതിനാലാണിത്.
തദ്ദേശസ്ഥാപന ഉപതിരഞ്ഞെടുപ്പുകളില്‍ വോട്ട് ചെയ്യാനെത്തുന്നവരുടെ നിജസ്ഥിതി പോളിങ് ഉദ്യോഗസ്ഥര്‍ക്ക് മനസ്സിലാകുന്നതിന് കൂടിയാണ് ഈ നടപടി. നിര്‍ദ്ദേശം ഡിസംബര്‍ 10ന് നടക്കുന്ന ഉപതിരഞ്ഞെടുപ്പിനു വേണ്ടി മാത്രമുള്ളതായിരിക്കും. സംസ്ഥാനത്തെ 31 തദ്ദേശസ്ഥാപന വാര്‍ഡുകളിലേക്കാണ് ഡിസംബര്‍ 10ന് ഉപതിരഞ്ഞെടുപ്പ് നടക്കുന്നത്.തിരഞ്ഞെടുപ്പ് ചട്ടങ്ങളിലെ ആള്‍മാറാട്ടത്തിനെതിരേയുള്ള മുന്‍കരുതല്‍ വ്യവസ്ഥ പ്രകാരം ഇടതു കൈയ്യിലെ ചൂണ്ടുവിരലില്‍ പ്രിസൈഡിങ് ഓഫീസറോ പോളിങ് ഓഫീസറോ മഷി പുരട്ടേണ്ടതുണ്ട്. വോട്ടറുടെ ഇടതു ചൂണ്ടുവിരലില്‍ അത്തരത്തിലുള്ള മഷിയടയാളം നേരത്തേ ഉണ്ടെങ്കില്‍ വോട്ട് ചെയ്യാനാകില്ല. അതിനാലാണ് തിരഞ്ഞെടുപ്പ് കമ്മീഷന്‍ ഇത്തരത്തില്‍ നിര്‍ദ്ദേശം പുറപ്പെടുവിച്ചത്.

തദ്ദേശസ്ഥാപന ഉപതിരഞ്ഞെടുപ്പിൽ മഷി പുരട്ടുക നടുവിരലില്‍

വടകര: കാഫിര്‍ സ്‌ക്രീന്‍ഷോട്ട് കേസിലെ അന്വേഷണ പുരോഗതി റിപ്പോര്‍ട്ട് ഇന്ന് തന്നെ ഹാജരാക്കണമെന്ന് കോടതി. വടകര ഫസ്റ്റ്ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയാണ് പോലീസിന് നിര്‍ദേശം നല്‍കിയത്. ഇന്ന് കേസ് പരിഗണിച്ചപ്പോള്‍ പോലീസ് റിപ്പോര്‍ട്ട് സമര്‍പ്പിച്ചിരുന്നില്ല.
അന്വേഷണ പുരോഗതിയുടെ റിപ്പോര്‍ട്ടും പിടിച്ചെടുത്ത ഫോണുകളുടെ ഫോറന്‍സിക് പരിശോധന ഫലവും ഹാജരാക്കാന്‍ രണ്ടാഴ്ച മുന്നേ പോലീസിന് കോടതി നിര്‍ദേശം നല്‍കിയിരുന്നു. പക്ഷെ ഇന്ന് കേസ് പരിഗണിച്ചപ്പോള്‍ പോലീസത് ഹാജരാക്കിയില്ല. കൂടുതല്‍ സമയം ആവശ്യപ്പെടുകയും ചെയ്തു. എന്നാല്‍ ഇന്ന് ഉച്ചക്ക് ശേഷം കോടതി ചേരുമ്പോള്‍ തന്നെ റിപ്പോര്‍ട്ടുകള്‍ ഹാജരാക്കണമെന്നാണ് കോടതി പോലീസിന് നല്‍കിയിരിക്കുന്ന നിര്‍ദേശം.കേസെടുത്ത് എട്ട് മാസമായിട്ടും അന്വേഷണത്തിലെ മെല്ലെപ്പോക്ക് ചൂണ്ടിക്കാട്ടിയും അന്വേഷണത്തില്‍ കോടതി മേല്‍നോട്ടം ആവശ്യപ്പെട്ടുമാണ് പരാതിക്കാരനായ എം.എസ്.എഫ് നേതാവ് മുഹമ്മദ് കാസിം വടകര മജിസ്‌ട്രേറ്റ് കോടതിയെ സമീപിച്ചത്.&nbsp;

കാഫിര്‍ സ്‌ക്രീന്‍ഷോട്ട് കേസ്;അന്വേഷണ റിപ്പോര്‍ട്ട് ഇന്ന് തന്നെ ഹാജരാക്കാൻ നിർദ്ദേശം

കൊച്ചി: വയനാട്ടിൽ എൽ.ഡി.എഫും യു.ഡി.എഫും ചൊവ്വാഴ്ച നടത്തിയ ഹർത്താലിൽ വിമർശനവുമായി ഹൈക്കോടതി. ദൈവത്തിന്റെ സ്വന്തം നാട്ടിൽ എന്ത് നടക്കുന്നുവെന്ന് ദൈവത്തിനു പോലും അ‌റിയാത്ത അ‌വസ്ഥയാണെന്ന് കോടതി പറഞ്ഞു. മുണ്ടക്കൈ-ചൂരൽമല ഉരുൾപൊട്ടൽ ദേശീയദുരന്തമായി പ്രഖ്യാപിക്കില്ലെന്ന കേന്ദ്രനിലപാടിൽ പ്രതിഷേധിച്ചായിരുന്നു ഹർത്താൽ.
വയനാട് പുനർനിർമാണവുമായി ബന്ധപ്പെട്ട് സ്വമേധയാ എടുത്ത കേസ് പരിഗണിക്കവേയാണ് ഹൈക്കോടതി സർക്കാരിനെയും പ്രതിപക്ഷത്തെയും വിമർശിച്ചത്. ഹർത്താൽ കൊണ്ട് എന്തു നേടിയെന്നും കോടതി ചോദിച്ചു.ടൂറിസം ഡെസ്റ്റിനേഷനെന്ന നിലയിൽ ദൈവത്തിന്റെ സ്വന്തം നാടെന്നാണ് കേരളം അ‌റിയപ്പെടുന്നത്. എന്നാൽ, ഇവിടെ എന്ത് നടക്കുന്നുവെന്ന് ദൈവത്തിനുപോലും അ‌റിയില്ല. ഭരണകക്ഷി ഹർത്താൽ നടത്തിയത്‌ എന്തിനാണ്? മിന്നൽ ഹർത്താൽ നടത്തില്ലെന്ന പ്രതിപക്ഷകക്ഷിയുടെ ഉറപ്പും പാലിക്കപ്പെട്ടില്ലെന്നും ഹൈക്കോടതി ചൂണ്ടിക്കാട്ടി.

'എന്നിട്ട് എന്തു നേടി'; വയനാട് ഹർത്താലിനെതിരെ രൂക്ഷവിമർശനവുമായി ഹൈക്കോടതി

ആലപ്പുഴ: നഗരത്തിലെ പിഡബ്ല്യുഡി റസ്റ്റ് ഹൗസിലെ ടോയ്‌ലറ്റിൽ കോൺക്രീറ്റ് സീലിംഗ് ഇളകി വീണു. ലീഗൽ മെട്രോളജി വകുപ്പിലെ ഉദ്യോഗസ്ഥൻ തലനാരിഴയ്‌ക്കാണ് പരിക്കേൽക്കാതെ രക്ഷപ്പെട്ടത്. ഇന്നലെ സെക്രട്ടേറിയറ്റിലെ ടോയ്‌ലറ്റിലുണ്ടായ അപകടത്തിൽ ജീവനക്കാരിക്ക് ഗുരുതര പരിക്കേറ്റതിന് പിന്നാലെയാണ് ആലപ്പുഴയിലും അപകടമുണ്ടായിരിക്കുന്നത്.
ഇന്ന് രാവിലെയായിരുന്നു സംഭവം. ആലപ്പുഴ സിവിൽ സ്റ്റേഷനിൽ പ്രവർത്തിക്കുന്ന ഡെപ്യൂട്ടി കൺട്രോളർ ഓഫീസിലേക്ക് പരിശോധനയ്‌ക്ക് എത്തിയതായിരുന്നു ലീഗൽ മെട്രോളജി വകുപ്പിലെ ഉദ്യോഗസ്ഥർ. പിഡബ്ല്യുഡി റസ്റ്റ് ഹൗസിലായിരുന്നു ഇവർ താമസിച്ചിരുന്നത്. രാവിലെ ടോയ്‌ലറ്റിൽ പോയ ശേഷം ഒരു ഉദ്യോഗസ്ഥൻ പുറത്തേക്ക് ഇറങ്ങുന്നതിനിടെയാണ് സീലിംഗ് തകർന്ന് വീണത്. അൽപ്പം വൈകിയിരുന്നെങ്കിൽ അദ്ദേഹം അപകടത്തിൽപ്പെട്ടേനെ. ലീഗൽ മെട്രേളജി വകുപ്പിലെ ജൂനിയർ സൂപ്രണ്ട് ജി ആർ അനിലാണ് അപകടത്തിൽ നിന്ന് തലനാരിഴയ്‌ക്ക് രക്ഷപ്പെട്ടത്. കോൺക്രീറ്റ് നിലത്ത് വീണ് പൊട്ടിച്ചിതറിയതിന്റെ ദൃശ്യങ്ങളും പുറത്തുവന്നിട്ടുണ്ട്.പിഡബ്ല്യുഡി റസ്റ്റ് ഹൗസ് പൊതു ജനങ്ങൾക്ക് ഉൾപ്പെടെ തുറന്ന് കൊടുക്കുന്നതിനെപ്പറ്റി സർക്കാർ ആലോചിക്കുന്നതിനിടെയാണ് ഇത്തരമൊരു അപകടമുണ്ടായിരിക്കുന്നത്. ജി സുധാകരൻ പൊതുമരാമത്ത് വകുപ്പ് മന്ത്രിയായിരുന്നപ്പോഴാണ് അവസാനമായി റസ്റ്റ് ഹൗസിൽ അറ്റകുറ്റ പണികൾ നടത്തിയിരുന്നത്.

വീണ്ടും ടോയ്‌ലറ്റ് അപകടം; പിഡബ്ല്യുഡി റസ്റ്റ് ഹൗസിൽ സീലിംഗ് ഇളകി വീണു

തിരുവനന്തപുരം: ഭരണഘടനാവിരുദ്ധ പ്രസംഗത്തിന്റെപേരില്‍ സജി ചെറിയാന്‍ മന്ത്രിസ്ഥാനം രാജിവെക്കേണ്ടതില്ലെന്ന് സിപിഎം സംസ്ഥാന സെക്രട്ടേറിയറ്റിൽ തീരുമാനം. കേസ് നിയമപരമായി നേരിടുമെന്നാണ് സിപിഎം വ്യക്തമാക്കുന്നത്.
ഒരിക്കൽ ധാർമ്മികത മുൻനിർത്തി സജി ചെറിയാൻ രാജിവച്ചതാണെന്നും അതിനാൽ ഇപ്പോൾ ഒരേ വിഷയത്തിൽ രണ്ട് തവണ രാജി വേണ്ടെന്നുമാണ് പാർട്ടി നിലപാട്. ഇതേനിലപാട് തന്നെയാണ് കഴിഞ്ഞദിവസം മന്ത്രിയും സ്വീകരിച്ചത്. കേസിൽ സ്വതന്ത്രമായ അന്വേഷണം നടക്കട്ടെ.&nbsp;
സജി ചെറിയാന്റെ ഭാഗം കേട്ടില്ലെന്ന അദ്ദേഹത്തിന്റെ വാദം ശരിയാണെന്നാണ് പാർട്ടി നിലപാട്. മന്ത്രിസ്ഥാനത്തിരിക്കുന്ന ആളാണെങ്കിലും അന്വേഷണം വേണം എന്ന് ഹൈക്കോടതി പറയുമ്പോൾതന്നെ അദ്ദേഹത്തിന്റെ മന്ത്രി സ്ഥാനത്തെ കോടതി ചോദ്യം ചെയ്‌തിട്ടില്ല എന്നും സംസ്ഥാനത്തെ നീതിന്യായ വ്യവസ്ഥയിൽ സത്യസന്ധമായ അന്വേഷണം നടക്കുമെന്ന് കോടതി വിശ്വാസം അർപ്പിച്ചിട്ടുണ്ട് എന്നും സിപിഎം പറയുന്നു അതിനാൽ തന്നെ മന്ത്രിസ്ഥാനം സജി ചെറിയാൻ രാജിവയ്‌ക്കേണ്ട എന്നാണ് പാർട്ടി വ്യക്തമാക്കുന്നത്.

പാർട്ടി ഒപ്പമുണ്ട്; സജി ചെറിയാന്‍ മന്ത്രിസ്ഥാനം രാജിവെക്കേണ്ടതില്ലെന്ന് സിപിഎം

Search Results for: suspended