കൊച്ചി: മാധ്യമ പ്രവർത്തകക്കെതിരെ ലൈംഗികച്ചുവയുള്ള പരാമർശം നടത്തിയെന്ന കേസിൽ ചലച്ചിത്ര സംവിധായകൻ മേജർ രവി വിചാരണ നേരിടണമെന്ന് ഹൈകോടതി. കേസ് റദ്ദാക്കണമെന്ന് ആവശ്യപ്പെട്ട് മേജർ രവി നൽകിയ ഹരജി തള്ളിയാണ് എറണാകുളം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ വിചാരണ നേരിടാൻ ജസ്റ്റിസ് ഉത്തരവിട്ടത്.
2016 മാർച്ച് 12ന് എറണാകുളത്തെ ഹോട്ടലിൽ നടന്ന പരിപാടിയിൽ ഏഷ്യാനെറ്റ് ചീഫ് കോഓഡിനേറ്റിങ് എഡിറ്റർ സിന്ധു സൂര്യകുമാറിനെതിരെ നടത്തിയ പരാമർശമാണ് കേസിനിടയാക്കിയത്. മുൻ സൈനിക ഉദ്യോഗസ്ഥനും സെലിബ്രിറ്റിയുമായ ഹരജിക്കാരന്‍റെ പ്രസംഗവും പ്രസ്താവനകളും പൊതുജനങ്ങൾ ശ്രദ്ധിക്കുമെന്നതിനാൽ ഇക്കാര്യത്തിൽ ജാഗ്രത പുലർത്തേണ്ടതുണ്ടെന്ന് കോടതി ചൂണ്ടിക്കാട്ടി.
വിചാരണയിൽനിന്ന് ഹരജിക്കാരനെ ഒഴിവാക്കാൻ മതിയായ കാരണമില്ല. നിരപരാധിയാണെങ്കിൽ വിചാരണയിലൂടെ ഹരജിക്കാരന് അത് തെളിയിക്കാൻ അവസരം ലഭിക്കുമെന്നും കോടതി വ്യക്തമാക്കി.

മാധ്യമ പ്രവർത്തകക്കെതിരെ ലൈംഗിക പരാമർശം നടത്തി;മേജർ രവി വിചാരണ നേരിടണമെന്ന് ഹൈകോടതി

ന്യൂഡൽഹി: രാഹുൽ ഗാന്ധിയുടെ ഇന്ത്യൻ പൗരത്വം റദ്ദാക്കാൻ ആഭ്യന്തര മന്ത്രാലയത്തിന് നിർദേശം നൽകണമെന്ന് ആവശ്യപ്പെട്ട് ബി.ജെ.പി. നേതാവ് സുബ്രഹ്മണ്യം സ്വാമി ഡൽഹി ഹൈക്കോടതിയെ സമീപിച്ചു.യു.കെയിൽ 2003-ൽ രജിസ്റ്റർ ചെയ്തിട്ടുള്ള ബാക്കോപ്സ് ലിമിറ്റഡ് കമ്പനിയുടെ ഡയറക്ടർമാരിലും സെക്രട്ടറിമാരിലും ഒരാളാണ് രാഹുൽ ​ഗാന്ധിയെന്നും അദ്ദേഹത്തിന് ബ്രിട്ടീഷ് പൗരത്വമുണ്ടെന്നും ആരോപിച്ച് 2019-ൽ സുബ്രഹ്മണ്യം സ്വാമി ആഭ്യന്തര മന്ത്രാലയത്തിന് കത്തെഴുതിയിരുന്നു.
ബാക്കോപ്‌സ് ലിമിറ്റഡിന്റെ വാർഷിക റിട്ടേണുകളിൽ ഒന്നിൽ രാഹുൽ ഗാന്ധിയെ ബ്രിട്ടീഷ് പൗരനായാണ് രേഖപ്പെടുത്തിയിരിക്കുന്നത്. 2005 ഒക്ടോബർ 10-നും 2006 ഒക്ടോബർ 31-നും സമർപ്പിച്ച വാർഷിക റിട്ടേണുകളിലും 2009 ഫെബ്രുവരി 17-ന് ബാക്കോപ്‌സ് ലിമിറ്റഡിൻ്റെ പിരിച്ചുവിടൽ അപേക്ഷയിലും രാഹുൽ ബ്രിട്ടീഷ് പൗരനാണെന്ന് പറയുന്നുണ്ടെന്ന് സ്വാമി ആരോപിക്കുന്നു.ഇത് ഭരണഘടനയുടെ 9ാം അനുച്ഛേദത്തിന്‍റേയും 1955-ലെ ഇന്ത്യൻ പൗരത്വ നിയമത്തിൻ്റെയും ലംഘനമാണെന്ന് സുബ്രഹ്മണ്യം സ്വാമി ആരോപിച്ചു. ഇതിന്റെ അടിസ്ഥാനത്തിൽ 2019 ഏപ്രിൽ 29-ന് ആഭ്യന്തര മന്ത്രാലയം രാഹുൽ ഗാന്ധിക്ക് കത്തെഴുതുകയും ഇക്കാര്യത്തിൽ രണ്ടാഴ്ചയ്ക്കുള്ളിൽ മറുപടി നൽകാനും ആവശ്യപ്പെട്ടിരുന്നു.കത്ത് നൽകി അഞ്ച് വർഷം കഴിഞ്ഞിട്ടും വിഷയത്തിൽ ആഭ്യന്തര മന്ത്രാലയത്തിന് വ്യക്തതയില്ലെന്ന് ആരോപിച്ചാണ് സുബ്രഹ്മണ്യം സ്വാമി രാഹുൽ ഗാന്ധിയുടെ ഇന്ത്യൻ പൗരത്വം റദ്ദാക്കാൻ നിർദേശം നൽകണമെന്ന് ആവശ്യപ്പെട്ട് ഹൈക്കോടതിയെ സമീപിച്ചിരിക്കുന്നത്.&nbsp;

രാഹുൽ ഗാന്ധിയുടെ ഇന്ത്യൻ പൗരത്വം റദ്ദാക്കണം; ഹൈക്കോടതിയെ സമീപിച്ച് സുബ്രഹ്മണ്യൻ സ്വാമി

National

തിരുവനന്തപുരം: വയനാട് ദുരന്ത ബാധിതരെ സഹായിക്കാൻ സർക്കാർ ജീവനക്കാർക്ക്​ സാലറി ചാലഞ്ച്​. ഇതുസംബന്ധിച്ച്​ ഉത്തരവിറങ്ങി. കുറഞ്ഞത് അഞ്ച് ദിവസത്തെ ശമ്പളമാണ് ഈടാക്കുന്നത്. കൂടുതൽ നൽകാൻ ആഗ്രഹിക്കുന്നവർക്ക് അതിനും അവസരമുണ്ട്. മേലധികാരിക്ക് സമ്മതപത്രം നൽകുന്നവരുടെ ശമ്പളം സ്പാർക്കിൽ ക്രമീകരണം വരുത്തി ഈടാക്കുന്നതാണ് രീതി.
ഒറ്റത്തവണ ആയോ മൂന്ന് തവണ ആയോ നൽകാം. ഇങ്ങനെ ഒടുക്കുന്ന തുക പ്രത്യേകമായി തുറക്കുന്ന ഒരു ട്രഷറി അക്കൗണ്ടിലേക്ക് വരവ് ചെയ്യും. ശമ്പളത്തുക കണക്കാക്കുന്നത് 2024 ആഗസ്റ്റിലെ മൊത്ത ശമ്പളത്തെ അടിസ്ഥാനമാക്കിയാണ്. ഈ തുകയുടെ മുപ്പതിലൊന്നായി ഒരുദിവസത്തെ ശമ്പളത്തുക കണക്കാക്കും. സി.എം.ഡി.ആർ.എഫിലേക്ക് സംഭാവനയായി നൽകുന്ന തുക 2024 സെപ്റ്റംബറിൽ വിതരണം ചെയ്യുന്ന ആഗസ്റ്റിലെ ശമ്പളം മുതൽ കുറവ് ചെയ്യും.ജീവനക്കാർക്ക് തങ്ങളുടെ പ്രോവിഡന്‍റ്​ ഫണ്ടിൽ നിന്നും സി.എം.ഡി.ആർ.എഫിലേക്ക് തുക അടയ്ക്കാം. ഇതിനുള്ള അപേക്ഷ പ്രത്യേകമായി നൽകണം. ശമ്പളത്തിൽ നിന്നും ഗഡുക്കൾ പിടിക്കുന്നത് അവസാനിക്കുന്നതുവരെ ജി.പി.എഫ്, ടി.എ തിരിച്ചടവ്, ജീവനക്കാരൻ ആവശ്യപ്പെടുന്ന പക്ഷം മരവിപ്പിക്കും. അഞ്ചു ദിവസത്തിൽ കൂടുതൽ സംഭാവന ചെയ്യാൻ സന്നദ്ധരാകുന്നവർക്ക് ഒരു മാസം ചുരുങ്ങിയത് രണ്ട് ദിവസം എന്ന ക്രമത്തിൽ 10 ഗഡുക്കൾ വരെ അനുവദിക്കും.

സാലറി ചലഞ്ച് ഉത്തരവിറങ്ങി; കുറഞ്ഞത് അഞ്ചു ദിവസത്തെ ശമ്പളം ഈടാക്കും

Kerala

തിരുവനന്തപുരം: ടൂറിസ്റ്റ് ബസ്സുകളുടെ നിറം വെള്ളയായി തന്നെ തുടരും. ബസ്സുകൾക്ക് പലനിറം വേണ്ടെന്ന് സംസ്ഥാന ​ഗതാ​ഗതവകുപ്പ് ഉത്തരവിറക്കി. ഡ്രൈവിങ് സ്കൂൾ വാ​ഹനങ്ങൾക്ക് പ്രത്യേക നിറം നൽകണമെന്നും ഉത്തരവിൽ പറയുന്നു. വാഹനങ്ങളുടെ മുന്നിലും പിന്നിലും മഞ്ഞ നിറം അടിക്കാനാണ് നിർദേശം. ഡ്രൈവിങ് സ്കൂൾ വാഹനങ്ങൾ സംബന്ധിച്ച ഉത്തരവ് ഒക്ടോബർ ഒന്ന് മുതൽ പ്രാബല്യത്തിൽ വരും.


ഇരുചക്രവാഹനങ്ങൾക്ക് ഉത്തരവ് ബാധകമല്ല. ടൂറിസ്റ്റ് ബസ് ഓപ്പറേറ്റർമാരുമായും ഡ്രൈവിങ് സ്കൂൾ ഉടമകളുമായും നടത്തിയ ചർച്ചയ്ക്കുശേഷം ചേർന്ന യോ​ഗത്തിലാണ് തീരുമാനം. ടൂറിസ്റ്റ് ബസ്സുകളുടെ ​ഗ്ലാസിലും ബോഡിയിലും സിനിമാ താരങ്ങളുടേത് ഉൾപ്പെടെയുള്ള ചിത്രങ്ങളും എഴുത്തുകളും പതിക്കുന്നത് അനുവദിക്കാനാകില്ലെന്ന് 2019 ഓക്ടോബർ ഒന്നിന് ഹൈക്കോടതി ഉത്തരവിട്ടിരുന്നു. ഇക്കാര്യംകൂടി പരി​ഗണിച്ചാണ് സ്റ്റേറ്റ് ട്രാൻസ്പോർട്ട് അതോറിറ്റി വെള്ളനിറം തുടരാൻ തീരുമാനിച്ചത്.

വെള്ളയായി തന്നെ തുടരും, ടൂറിസ്റ്റ് ബസുകളുടെ നിറം മാറില്ല; ഉത്തരവിറക്കി ​ഗതാ​ഗതവകുപ്പ്

സംസ്ഥാന ചലച്ചിത്ര പുരസ്കാര നേട്ടത്തിൽ മമ്മൂട്ടിക്കും മോഹൻലാലിനുമൊപ്പം നടി ഉർവശിയും. ആറുതവണയാണ് മൂന്നുപേരും പുരസ്കാരത്തിന് അർഹരായത്.ക്രിസ്റ്റോ ടോമി സംവിധാനം ചെയ്ത ഉള്ളൊഴുക്ക് എന്ന ചിത്രത്തിലെ പ്രകടനമാണ് ഉർവശിക്ക് പുരസ്കാരം നേടിക്കൊടുത്തത്.&nbsp;
മഴവിൽക്കാവടി, വർത്തമാനകാലം (1989), തലയണമന്ത്രം (1990), കടിഞ്ഞൂൽ കല്യാണം, കാക്കത്തൊള്ളായിരം, ഭരതം, മുഖചിത്രം (1991), കഴകം (1995), മധുചന്ദ്രലേഖ (2006) എന്നീ സിനിമകളിലെ അഭിനയത്തിനാണ് ഉർവശിക്ക് മികച്ച നടിക്കുള്ള പുരസ്കാരം ലഭിച്ചിരുന്നു. 2006 ല്‍ അച്ചുവിന്‍റെ അമ്മ എന്ന ചിത്രത്തിലൂടെ മികച്ച സഹനടിക്കുള്ള ദേശീയ പുരസ്‌കാരവും ലഭിച്ചു.

യഥാർത്ഥ ലേഡി സൂപ്പർസ്റ്റാർ ഉര്‍വശി മികച്ച നടിയാകുന്നത് ആറാം തവണ

യഥാർത്ഥ ലേഡി സൂപ്പർസ്റ്റാർ ; ഉര്‍വശി മികച്ച നടിയാകുന്നത് ആറാം തവണ

തിരുവനന്തപുരം: കാഫിർ സ്ക്രീൻഷോട്ട് വിവാദത്തിൽ യു.ഡി.എഫിനെ പഴിച്ച് സി.പി.എം സംസ്ഥാന സെക്രട്ടറി എം.വി. ഗോവിന്ദൻ. വടകര മണ്ഡലത്തിൽ അധിക്ഷേപം തുടങ്ങിവച്ചത് യു.ഡി.എഫാണ്. കെ.കെ. ശൈലജ മുസ്‌ലിം വിരോധിയെന്ന തരത്തിൽ പ്രചരിപ്പിച്ചു. ശൈലജക്കെതിരെ മുസ്‌ലിം വിരുദ്ധത ആരോപിക്കാൻ ബോധപൂർവം ശ്രമം നടന്നു. വ്യക്തിഹത്യയിൽ ഊന്നിയുള്ള പ്രചാരണമാണ് യു.ഡി.എഫ് നടത്തിയത്. വാട്സ്ആപ്പ് ഗ്രൂപ്പുകളുമായി പാർട്ടിക്ക് ബന്ധമില്ലെന്നും അന്വേഷണം നടക്കട്ടെയെന്നും എം.വി. ഗോവിന്ദൻ പറഞ്ഞു.
“വടകര പാർലമെന്‍റ് നിയോജക മണ്ഡലത്തിലുണ്ടായ ചില സംഭവങ്ങളുമായി ബന്ധപ്പെട്ട് വലിയ ചർച്ചയാണിപ്പോൾ നടക്കുന്നത്. കാഫിർ സ്ക്രീൻഷോട്ടുമായി ബന്ധപ്പെട്ട പ്രശ്നം വിശദമായി പരിശോധിക്കുമ്പോൾ, യു.ഡി.എഫാണ് വ്യാജപ്രചാരണങ്ങൾക്ക് തുടക്കമിട്ടതെന്നു കാണാം. ഒറ്റപ്പെട്ട പ്രശ്നം പൊലെയാണ് ചിലർ അതിനെ സമീപിക്കുന്നത്. അത് ശരിയല്ല. അവിടെയുണ്ടായ അശ്ലീല ചിത്രവുമായി ബന്ധപ്പെട്ട വിവാദം മുതലുള്ള കാര്യങ്ങൾ വിശകലനം ചെയ്യണം. ഷാഫി വടകരയിൽ എത്തിയപ്പോൾ മുതൽ കെ.കെ. ശൈലജയെ ആക്രമിച്ചുകൊണ്ടായിരുന്നു തുടക്കം. പിന്നീട് പലപ്പോഴായി വ്യക്തിഹത്യ നടത്തുന്ന രീതിയിലുള്ള പരാമർശങ്ങളാണ് നടത്തിയത്.
മുസ്‌ലിം വിഭാഗത്തിനു നേരെ ടീച്ചർ വിദ്വേഷ പരാമർശങ്ങളുന്നയിച്ചു എന്ന് പ്രചാരണമുണ്ടായി. ലൗ ജിഹാദിന്‍റെ കാര്യത്തിൽ ആർ.എസ്.എസിന്‍റെ നിലപാടാണ് ശൈലജയുടേത് എന്നുപോലും പ്രചരിപ്പിച്ചു. കാന്തപുരം എ.പി. അബൂബക്കറിന്‍റെ ലെറ്റർപാഡ് വ്യാജമായി നിർമിച്ച് ടീച്ചർക്കെതിരെ പ്രചാരണം നടത്തി. പാനൂർ ബോംബ് കേസ് പ്രതികൾക്കൊപ്പം നിൽക്കുന്ന ചിത്രമടക്കം വ്യാജമായി നിർമിച്ചു. ഇത്തരം പ്രവൃത്തികൾക്കു പിന്നിൽ മാഹിയിലും പേരാമ്പ്രയിലുമുള്ള ലീഗ് പ്രവർത്തകരടക്കമുണ്ട്. ഇവർക്കെല്ലാമെതിരെ പൊലീസ് കേസെടുത്തിട്ടുണ്ട്. എല്ലായ്പ്പോഴും മതനിരപക്ഷേതക്കായി നിലകൊണ്ടിട്ടുള്ള പാർട്ടിയാണ് സി.പി.എം.
എസ്.ഡി.പി.ഐ, ജമാഅത്തെ ഇസ്ലാമി കൂട്ടുകെട്ടിലാണ് കോൺഗ്രസ് മത്സരിച്ചത്. കാഫിർ സ്ക്രീൻഷോട്ട് വിവാദവുമായി ബന്ധപ്പെട്ട് സി.പി.എമ്മിന് ഒന്നും ഒളിച്ചുവെക്കാനില്ല. കെ.കെ. ലതിക സ്ക്രീൻഷോട്ട് ഷെയർ ചെയ്തത് പ്രചരിപ്പിക്കാനല്ല. നാടിനാപത്താണെന്നും ഇത്തരം പ്രവണത തടയണമെന്നും ആഗ്രഹിച്ചാണ് ഷെയർ ചെയ്തത്. സംഭവത്തിൽ ആദ്യം ഇടതുമുന്നണിയാണ് പരാതി കൊടുത്തത്. ഇടതു സൈബർ ഗ്രൂപ്പുകളെന്ന പേരിൽ പറയുന്നവരുമായോ വാട്സ്ആപ്പ് ഗ്രൂപ്പുകളുമായോ പാർട്ടിക്ക് ബന്ധമില്ല. പോരാളി ഷാജിയല്ല ഇടതുപക്ഷം. റെഡ് എൻകൗണ്ടറിന് ആളെ അറിയാമെങ്കിൽ പറയട്ടെ. യഥാർഥ പ്രതിയെ പൊലീസ് കണ്ടെത്തണം” -എം.വി. ഗോവിന്ദൻ പറഞ്ഞു.

പോരാളി ഷാജിയല്ല ഇടതുപക്ഷം ;കാഫിർ വിവാദത്തിലെ യഥാർഥ പ്രതിയെ പൊലീസ് കണ്ടെത്തണമെന്നും എം.വി. ഗോവിന്ദൻ

പത്തനംതിട്ട : കല്ലുങ്കൽ സ്വദേശിയായ 61കാരൻ സൈക്കിളിൽ നിന്നും വീണു മരിച്ചു. കല്ലുങ്കൽ പാപ്പിനാട്ടിൽ വീട്ടിൽ കെ.പി. മുരളിയാണ് മരിച്ചത്. വെള്ളിയാഴ്ച ഉച്ചക്ക് തുകലശ്ശേരി ശ്രീരാമകൃഷ്ണ ആശ്രമത്തിന് സമീപമായിരുന്നു സംഭവം.
തലക്ക് ഗുരുതര പരിക്കേറ്റ് വഴിയരികിൽ വീണു കിടന്നിരുന്ന മുരളിയെ സമീപവാസികൾ ചേർന്ന് തിരുവല്ല താലൂക്ക് ആശുപത്രിയിൽ എത്തിച്ചു. തുടർന്ന് കോട്ടയം മെഡിക്കൽ കോളജ് ആശുപത്രിയിൽ എത്തിച്ചെങ്കിലും മരിക്കുകയായിരുന്നു.അസ്വാഭാവിക മരണത്തിന് പൊലീസ് കേസ് രജിസ്റ്റർ ചെയ്തിട്ടുണ്ട്.

വയോധികൻ സൈക്കിളിൽ നിന്നും വീണു മരിച്ചു

ഇടുക്കി : ഉടുമ്പൻചോലയിൽ മുത്തശ്ശിയോടൊപ്പം കാണാതായ പിഞ്ചു കുഞ്ഞിനെ മരിച്ച നിലയിൽ കണ്ടെത്തി.പുത്തൻപുരയ്ക്കൽ ചിഞ്ചു, സിജോ ദമ്പതികളുടെ രണ്ടുമാസം പ്രായമുള്ള പെൺകുഞ്ഞിനെയാണ് പുരയിടത്തിനടുത്ത തോട്ടുവക്കത്ത് മരിച്ച നിലയിൽ കണ്ടെത്തിയത്. പോലീസ് കേസെടുത്ത് അന്വേഷണം ആരംഭിച്ചു
വെള്ളിയാഴ്ച രാവിലെ മുത്തശ്ശി ജാൻസിയെയും കുഞ്ഞിനെയും കാണാതാവുകയായിരുന്നു. തുടർന്ന് നാട്ടുകാരുടെ നേതൃത്വത്തിൽ നടത്തിയ തിരച്ചിലിൽ വീടിന് സമീപമുള്ള തോട്ടുവക്കത്ത് കുഞ്ഞിനെയും മുത്തശ്ശിയെയും കണ്ടെത്തി. കുഞ്ഞിനെ ഉടൻതന്നെ നെടുങ്കണ്ടം താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ജാൻസിയെ രാജാകാട്ടിലെ സർക്കാർ ആശുപത്രിയിലേക്കും തുടർന്ന് അടിമാലി താലൂക്ക് ആശുപത്രിയിലേക്ക് മാറ്റി. ഇവരുടെ ആരോഗ്യ സ്ഥിതിയിൽ പുരോഗതിയുണ്ട്.കുഞ്ഞിന്റെ മൃതദേഹം പോസ്റ്റ്മോർട്ടത്തിനായി ഇടുക്കി മെഡിക്കൽ കോളേജിലേക്ക് മാറ്റി

രണ്ടുമാസം പ്രായമുള്ള കുഞ്ഞ് മരിച്ച നിലയിൽ;മുത്തശ്ശി ഗുരുതരാവസ്ഥയിൽ

തിരുവനന്തപുരം: സംസ്ഥാനത്ത് വെള്ളിയാഴ്ച വൈദ്യുതി നിയന്ത്രണം. രാത്രി ഏഴു മുതൽ 11 മണിവരെയാണ് നിയന്ത്രണം ഉണ്ടാവുക എന്നാണ് കെ.എസ്.ഇ.ബിയുടെ അറിയിപ്പ്.
വൈദ്യുതി ആവശ്യകതയിൽ വന്ന വർധനവും പവർ എക്സ്ചേഞ്ച് മാർക്കറ്റിലെ വൈദ്യുതി ലഭ്യതക്കുറവുമാണ് നിയന്ത്രണത്തിന് കാരണം. സംസ്ഥാനത്തെ വിവിധ പ്രദേശങ്ങളിൽ 15 മിനിറ്റ് വീതമാകും നിയന്ത്രണം ഉണ്ടാവുക.

സംസ്ഥാനത്ത് ഇന്ന് രാത്രി വൈദ്യുതി നിയന്ത്രണം

മണിയൂർ: വെട്ടിൽ പീടിക കെ.പി ഷാജി ഗ്രന്ഥാലയത്തിൻ്റെ നേതൃത്വത്തിൽ രാജ്യത്തിൻ്റെ 78ാമത് സ്വാതന്ത്ര്യ ദിനാഘോഷം നടത്തി. പതാക ഉയർത്തൽ, പ്രഭാഷണം എന്നിവ സംഘടിപ്പിച്ചു. സ്വാതന്ത്ര്യ സമര ചരിത്രവും വർത്തമാന കടമകളും എന്ന വിഷയത്തിൽ രാജീവൻ കണ്ണമ്പത്ത് പ്രഭാഷണം നടത്തി. ചടങ്ങിൽ വി.കെ.കരുണാകരൻ അധ്യക്ഷത വഹിച്ചു. കെ.കെ.പ്രദീപൻ സ്വാഗതം പറഞ്ഞു. വി.കെ. റീബ നന്ദി പറഞ്ഞു.

സ്വാതന്ത്ര്യ ദിനാഘോഷം നടത്തി

Inshort

പയ്യോളി: കൊളാവിപ്പാലം ആർ വൈ ജെ ഡിയുടെ നേതൃത്വത്തിൽ 78-ാം സ്വാതന്ത്ര്യദിനം സമുചിതമായി ആഘോഷിച്ചു. നഗരസഭാ കൗൺസിലർ ചെറിയാവി സുരേഷ് ബാബു ദേശീയ പതാകയുയർത്തി. പിപി.ദി നേഗ്ബാബു അദ്ധ്യക്ഷം വഹിച്ചു. എൻ. ടി. അബ്ദുള്ള, അഭിജിത്ത് എം.ടി, ആദർശ് എരണിക്കൽ, ധനീഷ് വി.സി. തുടങ്ങിയവർ സംസാരിച്ചു. പ്രകാശ് ബാബു പ്രതിജ്ഞ ചൊല്ലി. ദേശീയഗാനാലാപനത്തിന് ശേഷം പായസ വിതരണവും ഉണ്ടായി.

സ്വാതന്ത്ര്യദിനം സമുചിതമായി ആഘോഷിച്ചു

വടകര : പ്രമുഖ സോഷ്യലിസ്റ്റും മുൻ വിദ്യാഭ്യാസ റവന്യൂ വകുപ്പ് മന്ത്രിയും ദീർഘകാലം വടകര എംഎൽഎയും പ്രഗൽഭനായ നിയമജ്ഞനുമായ കെ.ചന്ദ്രശേഖരന്റെ പതിനെട്ടാം ചരമവാർഷികം ആർജെഡി വടകര മണ്ഡലം കമ്മിറ്റി നേതൃത്വത്തിൽ ആചരിച്ചു. എംപി വീരേന്ദ്രകുമാർ ഹാളിൽ ചേർന്ന് അനുസ്മരണ സമ്മേളനം ആർ ജെ ഡി ജില്ലാ പ്രസിഡണ്ട് എം കെ ഭാസ്കരൻ ഉദ്ഘാടനം ചെയ്തു. ആർജെഡി സംസ്ഥാന ജനറൽ സെക്രട്ടറി മനയത്ത് ചന്ദ്രൻ അനുസ്മരണ പ്രഭാഷണം നടത്തി. മണ്ഡലം വൈസ് പ്രസിഡണ്ട് അഡ്വ.ബൈജു രാഘവൻ അധ്യക്ഷത വഹിച്ചു. എടയത്ത് ശ്രീധരൻ, സി പി രാജൻ, പി പി രാജൻ, കെ കെ കൃഷ്ണൻ, മഹേഷ് ബാബു.എൻ.പി എന്നിവർ പ്രസംഗിച്ചു. മണ്ഡലം സെക്രട്ടറി പ്രസാദ് വിലങ്ങിൽ സ്വാഗതം പറഞ്ഞു.

കെ ചന്ദ്രശേഖരൻ അനുസ്മരണം നടത്തി

Vadakara

വടകര: ചോറോട് ബഡ്‌സ് സ്കൂളിൽ ബഡ്‌സ് ദിനചാരണത്തോടനുബന്ധിച്ച്‌ രക്ഷകർത്തൃ ബോധവത്കരണ ക്ലാസ്സ്‌ നടത്തി. ഗ്രാമപഞ്ചായത്ത് പ്രസിഡണ്ട് പി പി ചന്ദ്രശേഖരൻ ഉദ്ഘാടന കർമ്മം നിർവഹിച്ചു. ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ശ്യാമള പൂവേരി അധ്യക്ഷ സ്ഥാനം വഹിച്ചു. സി. ഡി. എസ് ചെയർപേഴ്സൺ അനിത കെ സ്വാഗതം പറഞ്ഞ പരിപാടിയിൽ വടകര ബ്ലോക്ക്‌ കൗൺസിലർ അതുല്യ പി പാരന്റിങ് എന്ന വിഷയത്തിൽ രക്ഷിതാക്കൾക്ക് ക്ലാസ് നൽകി.
വികസന സ്റ്റാൻഡിങ് കമ്മിറ്റി ചെയർമാൻ കെ.മധുസൂദനൻ, ആരോഗ്യ സ്റ്റാൻഡിങ് കമ്മിറ്റി ചെയർമാൻ സി. നാരായണൻ, വാർഡ് മെമ്പർമാരായ ജിഷ പനങ്ങാട്ട് , സജിതകുമാരി സി. കെ , ബിന്ദു.ടി , പ്രസാദ് വിലങ്ങിൽ എന്നിവർ ആശംസകൾ അറിയിച്ചു. ബഡ്‌സ് സ്കൂൾ അദ്ധ്യാപിക പ്രേമ കെ. എം നന്ദി അറിയിച്ചു. സി. ഡി. എസ് മെമ്പർമാർ, സി. ഡി. എസ് അക്കൗണ്ടന്റ് രമ്യ എം. ടി. കെ, സാമൂഹിക വികസനം ആർ പി അനഘ എന്നിവർ പരിപാടിയിൽ പങ്കെടുത്തു.

ബോധവത്കരണ ക്ലാസ്സ്‌ നടത്തി

വടകര: സ്വാതന്ത്ര്യദിനത്തിൽ താഴെഅങ്ങാടി പാണ്ടികശാല എസ് ഡി പി ഐ കബറുംപുറം ബ്രാഞ്ച് പ്രസിഡൻറ് സവാദ് വടകര പതാക ഉയർത്തി. അംഗനവാടി വിദ്യാർത്ഥികൾ , രക്ഷിതാക്കൾ തുടങ്ങി നിരവധിപേർ പങ്കെടുത്ത പരിപാടിയിൽ മധുര പലഹാര വിതരണവും നടത്തി. ബ്രാഞ്ച് സെക്രട്ടറി ഹാഷിദ് ഖാലിദ്, ട്രഷറർ ഷാജഹാൻ പി വി, ബ്രാഞ്ച് ജോയിന്റ് സെക്രട്ടറിമാരായ റസീന പി സ്, ഷെറീജ ടി കെ, ശബാന പി വി, സുനീർ ടി കെ, കബീർ പി, ഷക്കീർ പി എസ്, അഷ്‌ക്കർ ടി, നസീർ ബാലത്തി, ഷമീർ യു, സവാദ് പി കെ, ഷമീർ കെ, അക്‌ബർ യു എന്നിവർ നേതൃത്വം നൽകി.

സ്വാതന്ത്ര്യദിനം ആഘോഷിച്ച് എസ് ഡി പി ഐ

വടകര: ഒഞ്ചിയം ഗവൺമെന്റ് യു.പി സ്കൂളിൽ സ്വാതന്ത്ര്യദിനം കുട്ടികളിൽ ദേശാഭിമാനം വളർത്താനുതകുന്ന ലളിതമായ പരിപാടികളോടെ ആചരിച്ചു. വയനാട് ,വിലങ്ങാട് പ്രകൃതിദുരന്ത പശ്ചാത്തലത്തിൽ വിപുലമായ ആഘോഷ പരിപാടികൾ വേണ്ടെന്ന് അധ്യാപക രക്ഷാകർതൃ സമിതി തീരുമാനിച്ചതിന്റെ അടിസ്ഥാനത്തിലാണ് ലളിതമായ രീതിയിൽ സ്വാതന്ത്ര്യ ദിനം ആചരിച്ചത്. സീനിയർ അസിസ്റ്റന്റ് റീന.എൻ പതാക ഉയർത്തി. പി.ടി.എ പ്രസിഡന്റ് ശ്രീകാന്ത് അധ്യക്ഷത വഹിച്ചു. ഭാസ്കരൻ സ്വാതന്ത്ര്യ ദിന സന്ദേശം നൽകി. ബിജു മൂഴിക്കൽ, പ്രീതി കെ.കെ, അശ്വിനി, നവ്യശ്രീ, അപർണ, ശ്രീജ എന്നിവർ പ്രസംഗിച്ചു. കുട്ടികളുടെ പ്രസംഗമത്സരം,ദേശഭക്തിഗാനാലാപനം, സ്വാതന്ത്ര്യസമര പതിപ്പ് നിർമ്മാണം തുടങ്ങിയ പരിപാടികളും നടന്നു.

ഒഞ്ചിയം ഗവൺമെന്റ് യു.പി സ്കൂളിൽ സ്വാതന്ത്ര്യദിനാഘോഷം

വടകര: വിലങ്ങാട്- വയനാട് ഉരുൾപൊട്ടലിന്റെ പശ്ചാത്തലത്തിൽ പരിസ്ഥിതിക്ക് മേലുള്ള കോർപ്പറേറ്റ് - മൂലധനശക്തികളുടെ കടന്നാക്രമണം അവസാനിപ്പിക്കണം എന്നാവശ്യപ്പെട്ടുകൊണ്ട് സി.പി ഐ (എം എൽ ) റെഡ് സ്റ്റാർ കോഴിക്കോട് ജില്ലാക്കമ്മറ്റിയുടെ നേതൃത്വത്തിൽ ബഹുജന കൂട്ടായ്മ സംഘടിപ്പിച്ചു. വികസനത്തിൻ്റെ പേരിൽ ആദിവാസികളുടെയും മർദ്ദിത വിഭാഗങ്ങളുടെയും ജീവന് പുല്ലുവില കല്പിക്കാതെ അവരുടെ ആവാസവ്യവസ്ഥയിൽ കടന്നു കയറി റിസോർട്ടുകളും മറ്റ് നിർമ്മാണ പ്രവർത്തനങ്ങളും നടത്തി പാരിസ്ഥിതിക ദുരന്തം വിളിച്ചു വരുത്ത നടപടികൾ അവസാനിപ്പിക്കണം. കക്കാടൻ പൊയിൽ വയനാട് തുരങ്കപ്പാത പദ്ധതി ഉപേക്ഷിക്കണമെന്നും ബഹുജന കൂട്ടായ്മ ആവശ്യപ്പെട്ടു. ശ്രീജിത്ത് ഒഞ്ചിയം അധ്യക്ഷത വഹിച്ചു. എ എം അഖിൽ കുമാർ, വേണുഗോപാലൻ കുനിയിയിൽ വി.എ ബാലകൃഷ്ണൻ എന്നിവർ സംസാരിച്ചു. കെ.ബാബുരാജ് , എടോനി ചന്ദ്രൻ , ത്രിവിക്രമൻ, കെ.പി സുനിൽ കുമാർ, സുധാകരൻ, ഭാസ്കരൻ പിള്ളേരു കണ്ടി എന്നിവർ നേതൃത്വം നല്കി.

ആഗസ്ത് 15 സാമ്രാജ്യത്വ വിരുദ്ധ - ഫാസിസ്റ്റ് വിരുദ്ധ ദിനമായി ആചരിച്ചു

വടകര: മേമുണ്ട ഹയർസെക്കണ്ടറി സ്കൂൾ എൻ എസ് എസ് യൂനിറ്റ് (No 279) വളണ്ടിയർമാർ വയനാട് ഭവന നിർമാണത്തിന് വേണ്ടി തേങ്ങ ചാലഞ്ച് പരിപാടിയിലൂടെ സമാഹരിച്ച 25000 രൂപ കോഴിക്കോട് ആർ ഡി ഡി സന്തോഷ്‌ കുമാറിന് പ്രിൻസിപ്പാൾ ബീന കൈമാറി. ചടങ്ങിൽ എൻ എസ് എസ് ജില്ലാ കോർഡിനേറ്റർ ശ്രീജിത്ത് , വടകര ക്ലസ്റ്റർ കൺവീനർ ഷാജി, വളന്റിയര്മാരായ നിവേദ് ബാബു, ശ്രീലക്ഷ്മി, മുഹമ്മദ്‌ ഷാദിൽ, ആരുണോദയ, പ്രോഗ്രാം ഓഫീസർ ജൂലി ടി കെ തുടങ്ങിയവർ പങ്കെടുത്തു.&nbsp;

വയനാടിനായി കൈകോർത്ത് മേമുണ്ടയിലെ എൻ എസ് എസ് യൂനിറ്റ്

കല്ലാച്ചി: നാദാപുരം, തൊട്ടിൽപ്പാലം മേഖലയിൽ ഭക്ഷ്യ സുരക്ഷ വകുപ്പ് പരിശോധന നടത്തി. നാദാപുരത്തു ലൈസൻസ്, മെഡിക്കൽ ഫിറ്റ്നസ് സർട്ടിഫിക്കറ്റ് , വെള്ളം പരിശോധിച്ച റിപ്പോർട്ട്‌ എന്നിവ ഇല്ലാതെ പ്രവർത്തിച്ച എണ്ണകടി നിർമാണ /വില്പന കേന്ദ്രങ്ങളിൽ പിഴ ചുമത്തി നോട്ടീസ് നൽകി. തൊട്ടിൽപ്പാലത്തു നടത്തിയ പരിശോധനയിൽ മത്സ്യം വിതരണം ചെയ്യുന്ന വാഹനത്തിൽ നിന്നും പഴകിയ 25 കിലോഗ്രാം അയല പിടിച്ചെടുത്തു നശിപ്പിച്ചു. മൊബൈൽ ഫുഡ്‌ ടെസ്റ്റിംഗ് ലാബ് ഉപയോഗിച്ച് 22 മത്സ്യ സാമ്പിൾ, ഐസ് സാമ്പിൾ, ഹോട്ടലുകളിൽ ഉപയോഗിച്ച എണ്ണ എന്നിവ പരിശോധിച്ചു. ഗുണനിലവാരം ഉറപ്പു വരുത്തി. ഫുഡ്‌ സേഫ്റ്റി ഓഫീസർ ഫെബിന മുഹമ്മദ്‌, അഷ്‌റഫ്‌ എ പി, വിഷ്ണു ഉണ്ണി, നൗഷീന മഠത്തിൽ, സ്നേഹ, ശശീന്ദ്രൻ എന്നിവർ പങ്കെടുത്തു.

നാദാപുരം, തൊട്ടിൽപ്പാലം മേഖലയിൽ ഭക്ഷ്യ സുരക്ഷ പരിശോധന; പഴകിയ മത്സ്യം പിടികൂടി

Nadapuram

മുടിയുടെ ആരോ​ഗ്യത്തിന് പണ്ട് മുതൽക്കേ ഉപയോ​ഗിച്ച് വരുന്ന എണ്ണയാണ് ആവണക്കെണ്ണ. ആൻ്റിഓക്‌സിഡൻ്റുകളും ഫാറ്റി ആസിഡുകളും അടങ്ങിയ ആവണക്കെണ്ണ മുടിവളർച്ച വേ​ഗത്തിലാക്കുന്നു. ആവണക്കെണ്ണ ഉപയോഗിക്കുന്നത് ഓക്സിഡേറ്റീവ് സമ്മർദ്ദം കുറയ്ക്കുകയും മുടി കൊഴിച്ചിൽ തടയുകയും ചെയ്യുന്നു. ആവണക്കെണ്ണയിലെ ഒമേഗ - 6 ഫാറ്റി ആസിഡുകൾ മുടിപൊട്ടുന്നതും തടയുന്നു.
ആവണക്കെണ്ണ തലയോട്ടിയിലേക്കുള്ള രക്തയോട്ടം വർദ്ധിപ്പിക്കുകയും അങ്ങനെ ആരോഗ്യമുള്ള മുടിയെ പ്രോത്സാഹിപ്പിക്കുകയും ചെയ്യുന്നു. നല്ല മുടി വളർച്ചയ്ക്ക് ആഴ്ചയിൽ ഒരിക്കൽ ആവണക്കെണ്ണ ഉപയോ​ഗിക്കുക.ഒലീവ് ‌ഓയിലിനൊപ്പം ഒരു ടേബിൾ സ്പൂൺ ആവണക്കെണ്ണയും അൽപം നാരങ്ങയുടെ നീരും യോജിപ്പിച്ച് തലയിൽ പുരട്ടുക. അരമണിക്കൂറിന് ശേഷം കഴുകി കളയുക. ഇതും മുടി വളർച്ച വേ​ഗത്തിലാക്കും. ആവണക്കെണ്ണയും ബദാം ഓയിലും തുല്യ അളവിലെടുത്ത് തലയിൽ പുരട്ടുന്നത് അകാലനര മാറാനും തലമുടി നല്ല കരുത്തോടെ വളരാനും സഹായിക്കും.

മുടി വളർച്ചയ്ക്ക് ആവണക്കെണ്ണ ഈ രീതിയിൽ ഉപയോഗിക്കാം

Health

തിരുവനന്തപുരം:മാധ്യമ പ്രവർത്തകൻ കെ.എം ബഷീറിനെ വാഹനമിടിച്ചു കൊലപ്പെടുത്തിയ കേസില്‍ ശ്രീറാം വെങ്കിട്ടരാമന്‍ ഐ.എ.എസ് കോടതിയില്‍ ഹാജരായി. തിരുവനന്തപുരം ഒന്നാം അഡീഷണല്‍ സെഷന്‍സ് കോടതിയിലാണ് ഹാജരായത്. കുറ്റപത്രം വായിച്ചു കേള്‍ക്കുന്നതിന്റെ ഭാഗമായാണ് ശ്രീറാം വെങ്കിട്ടരാമന്‍ കോടതിയില്‍ ഹാജരായത്. കഴിഞ്ഞ പ്രാവശ്യം കേസ് പരിഗണിച്ചപ്പോൾ ശ്രീറാം ഹാജരാകാത്തതിനെ കോടതി വിമര്‍ശിച്ചിരുന്നു.
കുറ്റപത്രം വായിക്കുന്നതിനു മുന്നോടിയായുള്ള പ്രാഥമിക വാദം കഴിഞ്ഞ തവണ കോടതി കേട്ടിരുന്നു. അപകടം നടന്നിട്ട് അഞ്ചു വര്‍ഷം പിന്നിട്ടു. മജിസ്‌ട്രേട്ട് കോടതി മുതല്‍ സുപ്രീംകോടതി വരെ കേസ് പരിഗണിച്ചെങ്കിലും വിചാരണ നടപടികള്‍ ആരംഭിച്ചിരുന്നില്ല.രണ്ടാം പ്രതി വഫ ഫിറോസിനെ കോടതി കുറ്റപത്രത്തില്‍നിന്നും ഒഴിവാക്കുകയും ചെയ്തു. അതോടെ ശ്രീറാം വെങ്കിട്ടരാമന്‍ മാത്രമായി പ്രതി. 2019 ഓഗസ്റ്റ് മൂന്നിന് പുലര്‍ച്ചെ ശ്രീറാമും വഫയും സഞ്ചരിച്ചിരുന്ന കാര്‍ ഇടിച്ചായിരുന്നു ബഷീറിന്റെ മരണം.

കെ എം ബഷീര്‍ കേസ്: ശ്രീറാം വെങ്കിട്ടരാമന്‍ കോടതിയില്‍ ഹാജരായി

ന്യൂഡൽഹി: എഴുപതാമത് ദേശീയ ചലച്ചിത്ര പുരസ്കാരങ്ങൾ പ്രഖ്യാപിച്ചു. 2022-ലെ ചിത്രങ്ങൾക്കുള്ള പുരസ്കാരങ്ങളാണ് പ്രഖ്യാപിക്കുന്നത്. 2022 ജനുവരി ഒന്നുമുതൽ ഡിസംബർ 31 വരെ സെൻസർ ചെയ്ത ചിത്രങ്ങളെയാണ് പുരസ്കാരത്തിനായി പരി​ഗണിച്ചിരിക്കുന്നത്
പുരസ്കാരങ്ങൾ ഇങ്ങനെ:
നടൻ - റിഷഭ് ഷെട്ടി (കാന്താര)
മികച്ച നടി - നിത്യാ മേനോൻ (തിരുച്ചിത്രമ്പലം) , മാനസി പരേഖ് ( കച്ച് എക്സ്പ്രസ്)
സംവിധായകൻ - സൂരജ് ആർ ബർജാത്യ (ഊഞ്ചായി)
ജനപ്രിയ ചിത്രം -കാന്താര
നവാ​ഗത സംവിധായകൻ -പ്രമോദ് കുമാർ - ഫോജ
ഫീച്ചർ ഫിലിം - ആട്ടം
തിരക്കഥ - ആനന്ദ് ഏകർഷി (ആട്ടം)
തെലുങ്ക് ചിത്രം - കാർത്തികേയ 2.
തമിഴ് ചിത്രം- പൊന്നിയിൻ സെൽവൻ
മലയാള ചിത്രം - സൗദി വെള്ളക്ക
കന്നഡ ചിത്രം - കെ.ജി.എഫ് 2
ഹിന്ദി ചിത്രം - ​ഗുൽമോഹർ
സംഘട്ടനസംവിധാനം - അൻബറിവ് (കെ.ജി.എഫ് 2)
നൃത്തസംവിധാനം - ജാനി, സതീഷ് (തിരുച്ചിത്രാമ്പലം)
​ഗാനരചന - നൗഷാദ് സാദർ ഖാൻ (ഫൗജ)
സം​ഗീതസംവിധായകൻ - പ്രീതം (ബ്രഹ്മാസ്ത്ര)
ബി.ജി.എം -എ.ആർ.റഹ്മാൻ (പൊന്നിയിൻ സെൽവൻ 1)
കോസ്റ്റ്യൂം- നിഖിൽ ജോഷി
പ്രൊഡക്ഷൻ ഡിസൈൻ -അനന്ദ് അധ്യായ (അപരാജിതോ)
എഡിറ്റിങ്ങ് - ആട്ടം (മഹേഷ് ഭുവനേന്ദ്)
സൗണ്ട് ഡിസൈൻ - ആനന്ദ് കൃഷ്ണമൂർത്തി (പൊന്നിയിൻ സെൽവൻ 1)
ക്യാമറ - രവി വർമൻ (പൊന്നിയിൻ സെൽവൻ-1)
​ഗായിക - ബോംബെ ജയശ്രീ (സൗദി വെള്ളക്ക)
​ഗായകൻ - അരിജിത് സിം​ഗ് (ബ്രഹ്മാസ്ത്ര)
ബാലതാരം- ശ്രീപഥ് (മാളികപ്പുറം)
സഹനടി - നീന ​ഗുപ്ത (ഊഞ്ചായി)
സഹനടൻ- പവൻ രാജ് മൽഹോത്ര (ഫൗജ)

പ്രത്യേക ജൂറി പുരസ്കാരം -​ നടൻ - മനോജ് ബാജ്പേയി (ഗുൽമോഹർ), കാഥികൻ - സം​ഗീത സംവിധായകൻ സഞ്ജയ് സലിൽ ചൗധരി

തെലുങ്ക് ചിത്രം - കാർത്തികേയ 2.
തമിഴ് ചിത്രം- പൊന്നിയിൻ സെൽവൻ
മലയാള ചിത്രം - സൗദി വെള്ളക്ക
കന്നഡ ചിത്രം - കെ.ജി.എഫ് 2
ഹിന്ദി ചിത്രം - ​ഗുൽമോഹർ

മികച്ച ഫിലിം ക്രിട്ടിക് -ദീപക് ​ദുവ

മികച്ച പുസ്തകം - അനിരുദ്ധ ഭട്ടാചാര്യ, പാർത്ഥിവ് ധർ (കിഷോർകുമാർ: ദ അൾട്ടിമേറ്റ് ബയോ​ഗ്രഫി)

ദേശീയ ചലച്ചിത്ര അവാർഡുകൾ പ്രഖ്യാപിച്ചു;മികച്ച നടൻ റിഷഭ് ഷെട്ടി, നടിമാരായി നിത്യാ മേനോനും മാനസിയും

വടകര: അടക്കാതെരു അറക്കിലാട് റോഡ് എ ആർ നഗർ ജംഗ്ഷനിൽ എ ആർ നഗർ റസിഡന്റ്‌സ് അസോസിയേഷൻ സ്വാതന്ത്ര്യ ദിനം ആഘോഷിച്ചു. പ്രസിഡന്റ് കെ. പി. രാധാകൃഷ്ണൻ പതാക ഉയർത്തി.&nbsp;
ജനറൽ സെക്രട്ടറി റഫീക്ക് വടക്കയിൽ, ട്രഷർ ഹരിദാസൻ ടി. പി, മുൻ പ്രസിഡന്റ് ടി. വത്സലൻ, എടത്തിൽ ബാലൻ, വിനോദ്. കെ, രജീഷ് ജയന്ദ്രൻ, ദിനേശ് ബാബു എ, അജി. ടി. കെ, ബാബു സിഗ്മ, രാഗേഷ് എരഞ്ഞിക്കൽ പ്രമീള എടത്തിൽ, സീത രയരോത്ത് എന്നിവർ നേതൃത്വം നൽകി. മധുര വിതരണവുമുണ്ടായി.

റസിഡന്റ്‌സ് അസോസിയേഷൻ സ്വാതന്ത്ര്യ ദിനം ആഘോഷിച്ചു

പേരാമ്പ്ര : മഅ്ദനുൽ ഉലൂം മദ്രസയിൽ ഭാരതത്തിന്റെ എഴുപത്തി എട്ടാം സ്വാതന്ത്ര്യദിനം സമുചിതമായി ആചരിച്ചു. പിടിഎ പ്രസിഡണ്ട് റഷീദ് മലപ്പാടി പതാക ഉയർത്തി. ശിഹാബ് അൻവരി പ്രാർത്ഥന നടത്തി.
സ്വദർ മുഅല്ലിം സഫീർ അശ്അരി സ്വാതന്ത്ര്യ ദിന സന്ദേശം നൽകി. ഫിനാൻ റാഷിദ് മുസ്ലിം പ്രാതിനിത്യം സ്വാതന്ത്ര്യ സമരത്തിൽ എന്ന വിഷയത്തിൽ മുഖ്യപ്രഭാഷണം നടത്തി. അഫ്‌ലഹ് ആമിൽ പ്രതിജ്ഞ ചൊല്ലിക്കൊടുത്തു. നസീർ ദാരിമി, ഹാഫിള് മുഹ്സിൻ ,കുഞ്ഞബ്ദുള്ള മുസ്ല്യാർ, നിഷൽ ഹിനാൻ എന്നിവർ സംസാരിച്ചു. വിവിധ മത്സര പരിപാടികളും, മധുര വിതരണവും നടന്നു.

വിവിധ പരിപാടികളോടെ സ്വാതന്ത്ര്യദിനാഘോഷം

റാന്നി: പെരുനാട് കൂനങ്കരയ്ക്ക് സമീപം റബർ തോട്ടത്തിൽ ചിതറിയ നിലയിൽ അസ്ഥികൂടം കണ്ടെത്തി. റോഡിൽ നിന്ന് ഉൾഭാഗത്തുള്ള റബർ തോട്ടത്തിലാണ് മനുഷ്യന്റെ അസ്ഥികൂടം കണ്ടെത്തിയത്. കൂടുതൽ പരിശോധനകൾ നടക്കുകയാണ്.
പൊലീസ് ഉൾപ്പെടെ അന്വേഷണ ഉദ്യോഗസ്ഥർ സ്ഥലത്ത് ക്യാമ്പ് ചെയ്യുന്നുണ്ട്. മരം മുറിക്കാൻ എത്തിയ തൊഴിലാളികളാണ് ചിതറിക്കിടക്കുന്ന അസ്ഥികൾ കണ്ടെത്തിയത്. സമീപത്തുനിന്ന് ഷർട്ടും കണ്ടെത്തിയിട്ടുണ്ട്.ഒരു വർഷത്തോളമായി വെട്ടാതെ കിടന്ന റബർ തോട്ടമാണിത്. അസ്ഥികൂടത്തിന്റെ ഭാഗങ്ങൾ പലയിടത്തായി ചിതറി കിടക്കുന്ന നിലയിലായിരുന്നു

റബർ തോട്ടത്തിൽ ചിതറിയ നിലയിൽ അസ്ഥികൂടം കണ്ടെത്തി

കണ്ണൂർ: കാഫിർ സ്ക്രീൻ ഷോട്ട് വിവാദത്തിൽ ചർച്ച മുറുകുന്നു.പോസ്റ്റ് പങ്കുവെച്ച സി.പി.എം നേതാവ് കെ.കെ. ലതികയെ കെ.കെ. ​ശൈലജ തള്ളിപ്പറഞ്ഞത് എന്തിനാണെന്ന് അവരോട് തന്നെ ചോദിക്കണമെന്ന് എൽ.ഡി.എഫ് കൺവീനർ ഇ.പി. ജയരാജൻ. ‘
ഇത്തരം ഒരു വാർത്ത കണ്ടാൽ എല്ലാവരും ഷെയർ ചെയ്യും. അത് തെറ്റാണോ ശരിയാണോ എന്നൊന്നും നിജസ്ഥിതി അന്വേഷിക്കാൻ നിൽക്കില്ല. അത് ഷെയർ ചെയ്തതിന്റെ പേരിൽ കെ.കെ. ലതികയെ ശൈലജ തള്ളിപ്പറഞ്ഞത് എന്തിനാണെന്ന് അവരോട് തന്നെ ചോദിക്കണം. അതെനിക്കറിഞ്ഞുകൂട. ‘ഇത്തരം പ്രചരണം ആപത്താണ്, ഇങ്ങനെ പ്രചരിപ്പിക്കരുത്‘ എന്ന് പറഞ്ഞുകൊണ്ടാണ് ലതിക ആ പോസ്റ്റ് ഷെയർ ചെയ്തത്’ -ഇ.പി. ജയരാജൻ മാധ്യമങ്ങളോട് പറഞ്ഞു.
‘പൊലീസിന് ലഭിച്ച വിവരമാണ് പൊലീസ് ​കോടതിയിൽ കൊടുക്കുക. അത് കോടതിയിൽ എത്തട്ടെ. അവിടെ തെളിയിക്കണമല്ലോ. കേരളത്തിലെ പൊലീസ് രാഷ്ട്രീയം നോക്കിയല്ല, നീതിപൂർവമായും സത്യസന്ധമായുമാണ് പ്രവർത്തിക്കുന്നത് എന്ന് പ്രതിപക്ഷം അംഗീകരിച്ചല്ലോ, അതിന് അവരോട് നന്ദിയുണ്ട്. കാഫിർ സ്ക്രീൻ ഷോട്ട് വിഷയത്തിൽ യു.ഡി.എഫി​ന്റെയും യൂത്ത് കോൺഗ്രസിന്റെയും പങ്കാളിത്തം കോടതിയിൽ എൽ.ഡി.എഫ് തെളിയിക്കും. എൽ.ഡി.എഫിന്റെ മേൽ കുറ്റം ചുമത്താൻ ആരും ശ്രമിക്കണ്ട’- ജയരാജൻ പറഞ്ഞു.

കാഫിർ വിവാദം; ലതികയെ കെ.കെ.ശൈലജ തള്ളിപ്പറഞ്ഞത് എന്തിനാണെന്ന് അവരോട് തന്നെ ചോദിക്കണമെന്ന് ഇ.പി. ജയരാജൻ

വടകര: ആധുനിക കേരളത്തിന്റെ ശിൽപികളിൽ പ്രധാനിയും കേരളത്തിന്റെ മുൻ മുഖ്യ മന്ത്രിയും സി പി ഐ യുടെ പ്രമുഖ നേതാവുമായിരുന്ന സി അച്യുതമേനോന്റെ ചരമദിനം വടകര മണ്ഡലത്തില സി പി ഐ ഘടകങ്ങൾ പ്രഭാതഭേരി, പതാക ഉയർത്തൽ , പുഷ്പാർച്ചന, അനുസ്മരണ യോഗങ്ങൾ എന്നിവ സംഘടിപ്പിച്ച് വിപുലമായി ആചരിച്ചു. വടകര മണ്ഡലം കമ്മിറ്റി ഓഫീസ് പ്രവർത്തിക്കുന്ന എം കുമാരൻ , ടി പി മൂസ സ്മാരകത്തിൽ ജില്ലാ എക്സിക്യൂട്ടീവ് അംഗം ആർ സത്യൻ പതാക ഉയർത്തി.&nbsp;
കാർത്തിക പള്ളി നോർത്തിൽ വടകര മണ്ഡലം സെക്രട്ടറി എൻ എം ബിജു, മേപ്പയിൽ മണ്ഡലം സെക്രട്ടറിയേറ്റ് അംഗം സി രാമക്യഷ്ണൻ , വള്ളിക്കാട് മണ്ഡലം സെക്രട്ടറിയേറ്റ് അംഗം പി കെ സതീശൻ എന്നിവർ പതാക ഉയർത്തി. മണ്ഡലം കമ്മിറ്റി അംഗങ്ങളായ ടി പി റഷീദ് കാർത്തിക പള്ളി, എ കെ കുഞ്ഞികണാരൻ - കുറിഞ്ഞാലിയോട് , വി പി രാഘവൻ - നാദാപുരം റോഡ് ടി വി സ്മാരകം , പി അശോകൻ - പഴങ്കാവ്, പി ഗീത - പുതിയാപ്പ് എന്നിവർ പതാക ഉയർത്തി. പുതുപ്പണം - പി കെ കൃഷ്ണൻ , പുറങ്കര - ഇ രാജശേഖരൻ , വടകര പെരുവാട്ടും താഴ, കെ പി പവിത്രൻ , പുത്തൂർ കെ വി വിശ്വനാഥൻ, കുരിക്കാലാട് - വി ടി കെ സുരേഷ്, നൂഞ്ഞിയിൽ താഴെ -ഒ എം അ ശോകൻ , കണ്ടിക്കര - ദിനേശൻ കെ ടി കെ , മുയിപ്ര - ആർ കെ ഗംഗാധരൻ , കുന്നുമ്മക്കര - കെ ടി സുരേന്ദ്രൻ , വെള്ളി കുളങ്ങര - ബാബു കക്കാട്ട്, ഒഞ്ചിയം - കെ ഗംഗാധരകുറുപ്പ് എന്നിവർ പതാക ഉയർത്തി

സി അച്യുതമേനോൻ ചരമദിനം ആചരിച്ച് സി പി ഐ

തിരുവനന്തപുരം: 2023ലെ സംസ്ഥാന ചലച്ചിത്ര പുരസ്‌കാരം പ്രഖ്യാപിച്ചപ്പോൾ ബ്ലെസിയുടെ സംവിധാന മികവിൽ പുറത്തിറങ്ങിയ 'ആടുജീവിതം' വാരിക്കൂട്ടിയത് നിരവധി പുരസ്‌കാരങ്ങൾ.ജനപ്രിയ ചിത്രമായും ആടുജീവിതം തിരഞ്ഞെടുക്കപ്പെട്ടു. മരുഭൂമിയിലെ നജീബിൻ്റെ യാതനകൾ ഒപ്പിയെടുത്ത സുനിൽ കെ. എസ് ആണ് മികച്ച ഛായാ​ഗ്രാഹകൻ. മികച്ച തിരക്കഥയ്ക്കുളള പുരസ്കാരവും ( അവലംബിത തിരക്കഥ) ആടുജീവിതത്തിലൂടെ ബ്ലെസി സ്വന്തമാക്കി.
ചിത്രത്തിൽ ഹക്കീമായി വേഷമിട്ട കെ.ആർ​ ഗോ​കുൽ പ്രത്യേക ജൂറി പരാമർശം സ്വന്തമാക്കി. മേക്കപ്പിന് രഞ്ജിത് അമ്പാടിക്കും പുരസ്കാരമുണ്ട്. റസൂൽ പൂക്കുട്ടി, ശരത് മോഹൻ എന്നിവർ ശബ്ദമിശ്രണത്തിനുള്ള പുരസ്കാരം കരസ്ഥമാക്കി.
പൃഥ്വിരാജിന്റെ കരിയറിലെ തന്നെ ഏറ്റവും വലിയ സിനിമയാണ് ആടുജീവിതം. 2008-ൽ ആരംഭിച്ച 'ആടുജീവിതം' വർഷങ്ങളുടെ തയ്യാറെടുപ്പുകൾക്കൊടുവിൽ 2018-ലായിരുന്നു ചിത്രീകരണം ആരംഭിച്ചത്.&nbsp;

മിന്നും തിളക്കം ; പുരസ്കാരങ്ങൾ വാരിക്കൂട്ടി ആടുജീവിതം

മിന്നും തിളക്കം;പുരസ്കാരങ്ങൾ വാരിക്കൂട്ടി ആടുജീവിതം

തിക്കോടി: ദയ എഡ്യുക്കേഷണൽ ആൻഡ് ചാരിറ്റബിൾ സൊസൈറ്റിയുടെ ആഭിമുഖ്യത്തിൽ സ്വാതന്ത്ര്യ ദിനം ആഘോഷിച്ചു. ദയ സ്നേഹതീരത്ത് തഖ്‌വ മൊയ്തുഹാജി പതാക ഉയർത്തി. വാർഡ് മെമ്പർ ഉസ്ന എ.വി ഉദ്ഘാടനം ചെയ്തു. പി. ആമിന സ്വാതന്ത്ര്യ ദിന സന്ദേശം നൽകി. കെ.ബഷീർ, ടി.വി. മുഹമ്മദ് നജീബ്, സബീൽ സി.പി, സാഹിറ ജമാൽ എന്നിവർ സംസാരിച്ചു. നദീം ബി നന്ദി പറഞ്ഞു. പായസ വിതരണം നടത്തി.

സ്വാതന്ത്ര്യ ദിനം ആഘോഷിച്ചു

തിരുവനന്തപുരം: 54-ാമത് സംസ്ഥാന ചലച്ചിത്ര പുരസ്കാരങ്ങൾ പ്രഖ്യാപിച്ചു. തിരുവനന്തപുരത്ത് മന്ത്രി സജി ചെറിയാനാണ് പുരസ്കാര പ്രഖ്യാപനം നടത്തിയത്. സംവിധായകനും തിരക്കഥാകൃത്തുമായ സുധീര്‍ മിശ്ര അധ്യക്ഷനായ ജൂറിയാണ് പുരസ്‌കാര ജേതാക്കളെ തിരഞ്ഞെടുത്തത്.
പുരസ്‌കാരങ്ങള്‍ ഇങ്ങനെ
മികച്ച നടൻ -പൃഥ്വിരാജ് സുകുമാരൻ (ആടുജീവിതം)
മികച്ച നടി- ഉർവശി, ബീന ആർ ചന്ദ്രൻ (ഉള്ളൊഴുക്ക്, തടവ്)
മികച്ച സംവിധായകൻ -ബ്ലെസി (ആടുജീവിതം)
മികച്ച ചിത്രം -കാതൽ (ജിയോ ബേബി)
രണ്ടാമത്തെ ചിത്രം -ഇരട്ട(രോഹിത് എം.ജി കൃഷ്ണൻ)
ഛായാ​ഗ്രഹണം -സുനിൽ.കെ.എസ് (ആടുജീവിതം)
സ്വഭാവനടി- ​ശ്രീഷ്മ ചന്ദ്രൻ (പൗമ്പളൈ ഒരുമൈ)
സ്വഭാവനടൻ -വിജയരാഘവൻ (പൂക്കാലം)
തിരക്കഥാകൃത്ത് (അഡാപ്‌റ്റേഷന്‍) - ബ്ലെസി (ആടുജീവിതം)
തിരക്കഥാകൃത്ത്- രോഹിത് എം.ജി.കൃഷ്ണൻ (ഇരട്ട)
സ്പെഷ്യൽ ജൂറി| നടന്മാർ -കെ.ആർ ​ഗോകുൽ (ആടുജീവിതം), സുധി കോഴിക്കോട് -കാതൽ
സ്പെഷ്യൽ ജൂറി ചിത്രം -​ഗ​ഗനചാരി
നവാ​ഗത സംവിധായകൻ- ഫാസിൽ റസാഖ് (തടവ്)ജനപ്രിയ ചിത്രം -ആടുജീവിതം
നൃത്തസംവിധാനം - വിഷ്ണു (സുലൈഖ മൻസിൽ)
ഡബ്ബിങ് ആർട്ടിസ്റ്റ് പെൺ - സുമം​ഗല (ജനനം 1947 പ്രണയം തുടരുന്നു)
ഡബ്ബിങ് ആർട്ടിസ്റ്റ് ആൺ - റോഷൻ മാത്യു -ഉള്ളൊഴുക്ക്, വാലാട്ടിമേക്കപ്പ് ആർട്ടിസ്റ്റ് -രഞ്ജിത് അമ്പാടി (ആടുജീവിതം)
ശബ്ദരൂപകല്പന- ജയദേവൻ ചക്കാടത്ത്, അനിൽ രാധാകൃഷ്ണൻ (ഉള്ളൊഴുക്ക്)
ശബ്ദമിശ്രണം -റസൂൽ പൂക്കുട്ടി, ശരത് മോഹൻ (ആടുജീവിതം)
സിങ്ക് സൗണ്ട്- ഷമീർ അഹമ്മദ് (ഓ ബേബി)
കലാസംവിധായകൻ - മോഹൻദാസ് (2018)
എഡിറ്റിങ് -സം​ഗീത പ്രതാപ് (ലിറ്റിൽ മിസ് റാവുത്തർ)
പിന്നണി ​ഗായിക -ആൻ ആമി (തിങ്കൾപ്പൂവിൻ -പാച്ചുവും അദ്ഭുതവിളക്കും)
പിന്നണി ​ഗായകൻ - വിദ്യാധരൻമാസ്റ്റർ (പതിരാണെന്നോർത്തൊരു കനവിൽ - ജനനം 1947 പ്രണയം തുടരുന്നു)
സംഗീതസംവിധായകന്‍ (ബി.ജി.എം)- മാത്യൂസ് പുളിക്കൻ (കാതൽ)
സംഗീതസംവിധായകന്‍- ജസ്റ്റിൻ വർ​ഗീസ് (ചാവേർ)
ഗാനരചയിതാവ്- ഹരീഷ് മോഹനൻ (ചാവേർ)
ചലച്ചിത്ര​ഗ്രന്ഥം- മഴവിൽക്കണ്ണിലൂടെ മലയാള സിനിമ (കിഷോർ കുമാർ)
ചലച്ചിത്രലേഖനം- കാമനകളുടെ സാംസ്കാരിക സന്ദർഭങ്ങൾ (പി.പ്രേമചന്ദ്രൻ)

സംസ്ഥാന ചലച്ചിത്ര അവാർഡുകൾ പ്രഖ്യാപിച്ചു; മികച്ച നടൻ പൃഥ്വിരാജ്, ഉർവ്വശിയും ബീന ആർ ചന്ദ്രനും നടിമാർ

വടകര: വിവിധ സാമൂഹ്യ സാംസ്‌കാരിക സംഘടനകൾ ഒന്നിച്ചു സ്വാതന്ത്ര്യദിനം ആഘോഷിച്ചു. മുൻ മന്ത്രി സി. കെ. നാണു ഉത്ഘാടനം ചെയ്തു. പുറന്തോടത്ത് ഗംഗാധരൻ അദ്യക്ഷം വഹിച്ചു. പ്രൊ.കെ. കെ. മഹമൂദ്, അഡ്വ.ഇ. നാരായണൻ നായർ, രാജേഷ് വൈഭവ്, പി. പി. രാജൻ, ടി. കെ. വിജയരാഘവൻ, പുറന്തോടത്തു സുകുമാരൻ, തയ്യുള്ളതിൽ രാജൻ, കെ. പി. ചന്ദ്രശേഖരൻ, കെ. രവിചന്ദ്രൻ, ഡോ. കെ. സി. വിജയരാഗവൻ, അടിയേരി രവീന്ദ്രൻ, സി. കുമാരൻ, അഡ്വ. ലതിക ശ്രീനിവാസൻ, കെ. ഗീത, മിനി പി. എസ്‌. നായർ, ടി. ശ്രീധരൻ, വി. പി. ബൈജു, അഡ്വ. സി. വത്സലൻ, വി. പി. ബാലഗോപാൽ, കെ. ദേവീ ദാസ്, നടരാജൻ നമ്പ്യാർ, അരവിന്ദൻ കിങ്‌സ്, കെ. രഞ്ജിത്ത് എന്നിവർ പ്രസംഗിച്ചു.

സ്വാതന്ത്ര്യദിനം ആഘോഷിച്ചു

മലപ്പുറം: കോഴിക്കോട് വിമാനത്താവളത്തിലെ വാഹന പാർക്കിങ്‌ നിരക്ക് ഒറ്റയടിക്ക് നാലിരട്ടി വരെ വർധിപ്പിച്ചു. പുതിയ നിരക്ക് ഇന്ന് മുതൽ പ്രാബല്യത്തിൽ വരും.7 സീറ്റ് വരെയുള്ള കാറുകൾക്ക് ആദ്യത്തെ അരമണിക്കൂർ പാർക്കിങ്ങിന് 20 രൂപ എന്നത് 50 രൂപയാക്കി വർധിപ്പിച്ചു. 7 സീറ്റിൽ മുകളിലുള്ള എസ്.യു.വി കാറുകൾക്കും മിനി ബസുകൾക്കും 20 രൂപയിൽ നിന്ന് 80 രൂപ വരെയാക്കി ഉയർത്തി. അരമണിക്കൂർ കഴിഞ്ഞാൽ യഥാക്രമം 65 രൂപ, 130 രൂപ എന്നിങ്ങനെ വർധിക്കും.
ഇരുചക്ര വാഹനങ്ങൾക്ക് പത്തുരൂപയും അരമണിക്കൂർ കഴിഞ്ഞാൽ 15 രൂപയുമാണ് ഫീസ്. വിമാനത്താവളത്തിൽ വാഹനം പാർക്ക് ചെയ്യാതെ പുറത്ത് കടക്കുന്ന വാഹനങ്ങൾക്ക് നൽകിയിരുന്ന ആറ് മിനിറ്റ് സൗജന്യ സമയം 11 മിനിറ്റ് ആക്കി ഉയർത്തിട്ടുണ്ട്.
അതോറിറ്റിയുടെ അംഗീകാരമുള്ള ടാക്സി വാഹനങ്ങൾക്ക് നേരത്തെ സൗജന്യമായിരുന്നു. ഇപ്പോൾ 20 രൂപയാക്കി. അംഗീകാരമില്ലാത്ത വാഹനങ്ങൾ 40 രൂപ നൽകേണ്ടതിനു പകരം 226 രൂപ നൽകണം. അര മണിക്കൂറിനു ശേഷം 2 മണിക്കൂർ വരെ 276 രൂപ. പാർക്കിങ് സ്ഥലത്തുനിന്ന് നിശ്ചിത സമയത്തിനകം പുറത്തു കടന്നില്ലെങ്കിൽ വീണ്ടും അര മണിക്കൂർ സമയത്തേക്കുള്ള 226 രൂപ നൽകണം. പാർക്കിങ് ഏരിയയിൽ പോകാതെ യാത്രക്കാരനെ ടെർമിനലിനു മുൻപിൽ ഇറക്കുകയോ കയറ്റുകയോ ചെയ്ത് പുറത്തേക്കു പോയാൽ 283 രൂപയാണു നൽകേണ്ടത്.

കരിപ്പൂർ വിമാനത്താവളത്തിലെ പാർക്കിങ്‌ ഫീ നാലിരട്ടി വരെ കൂട്ടി

തിരൂര്‍: അവധി ദിനത്തിൽ ഉമ്മയുടെ വീട്ടില്‍ വിരുന്നെത്തിയ ഒന്നാംക്ലാസ് വിദ്യാര്‍ഥി കുളത്തില്‍ മുങ്ങിമരിച്ചു. പറവണ്ണ അരിക്കാഞ്ചിറ സ്വദേശി മേലേപുറത്ത് വളപ്പില്‍ ഷിഹാബിന്റെയും ഷാഹിദയുടെയും മകന്‍ എം.വി. മുഹമ്മദ് ഷെഹ്‌സിന്‍ (ആറ്) ആണ് മരിച്ചത്. താഴെപ്പാലം ഫാത്തിമ മാതാ ഇംഗ്ലീഷ് മിഡിയം എല്‍.പി. സ്‌കൂള്‍ ഒന്നാം ക്ലാസ് വിദ്യാര്‍ഥിയാണ്.
ബി.പി. അങ്ങാടി കോട്ടത്തറ പഞ്ചായത്ത് കുളത്തില്‍ വീണാണ് കുട്ടി മരിച്ചത്. മുഹമ്മദ് ഷാദില്‍ സഹോദരനാണ്. പോസ്റ്റ്‌മോര്‍ട്ടം നടപടികള്‍ക്ക് ശേഷം വെള്ളിയാഴ്ച കബടക്കം നടത്തും.

ഉമ്മയുടെ വീട്ടില്‍ വിരുന്നെത്തിയ ഒന്നാംക്ലാസ് വിദ്യാര്‍ഥി കുളത്തില്‍ വീണ് മരിച്ചു

തിരുവനന്തപുരം: സംസ്ഥാനത്ത് ഇന്ന് അതിശക്തമായ മഴയ്ക്ക് സാധ്യത. രണ്ട് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. പത്തനംതിട്ട, ഇടുക്കി ജില്ലകളിലാണ് ഓറഞ്ച് അലർട്ട്. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാദ്ധ്യതയാണ് പ്രവചിച്ചിരിക്കുന്നത്. 24 മണിക്കൂറിൽ 115.6 മില്ലീ മീറ്റർ മുതൽ 204.4 മില്ലീ മീറ്റർ വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്.വിവിധ ജില്ലകളിൽ ഇന്ന് യെല്ലോ അലർട്ടും പ്രഖ്യാപിച്ചിട്ടുണ്ട്.&nbsp;
തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് യെല്ലോ അലർട്ട്. ഒറ്റപ്പെട്ട ശക്തമായ മഴയ്ക്കുള്ള സാദ്ധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലി മീറ്റർ മുതൽ 115.5 മില്ലി മീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.
ഓഗസ്റ്റ് 19 വരെ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ (പരമാവധി 50 kmph വരെ) വേഗതയിൽ വീശിയേക്കാവുന്ന ശക്തമായ കാറ്റിനും സാദ്ധ്യതയുണ്ട്. അതേസമയം, കേരള - ലക്ഷദ്വീപ് തീരങ്ങളിൽ മത്സ്യബന്ധനത്തിന് വിലക്കേർപ്പെടുത്തി.

സംസ്ഥാനത്ത് അതിശക്തമായ മഴയ്ക്ക് സാധ്യത ; രണ്ട് ജില്ലകളിൽ ഓറഞ്ച് അലർട്ട്

തിരുവനന്തപുരം: സംസ്ഥാന സിവിൽ സപ്ലൈസ്‌ കോർപറേഷന്‌ വിപണി ഇടപെടൽ പ്രവർത്തനങ്ങൾക്കായി 225 കോടി രൂപ അനുവദിച്ചതായി ധനമന്ത്രി കെ.എൻ ബാലഗോപാൽ. ഓണക്കാലത്ത്‌ അവശ്യ നിത്യോപയോഗ സാധനങ്ങളുടെ വിലക്കയറ്റം ഒഴിവാക്കാനുള്ള വിവിധ പ്രവർത്തനങ്ങൾക്കായാണ് തുക അനുവദിച്ചത്‌.
ബജറ്റ്‌ വിഹിതത്തിന്‌ പുറമെ 120 കോടി രൂപയാണ്‌ സപ്ലൈകോയ്‌ക്ക്‌ അധികമായി ലഭ്യമാക്കിയത്‌. വിപണി ഇടപടലിന്‌ ഈ സാമ്പത്തിക വർഷത്തെ ബജറ്റ്‌ വകയിരുത്തൽ 205 കോടി രൂപയാണ്‌. കഴിഞ്ഞ മാസം 100 കോടി രൂപ അനുവദിച്ചിരുന്നു. ബാക്കി 105 കോടി രൂപയാണ്‌ ബജറ്റ്‌ വകയിരുത്തൽ ഉണ്ടായിരുന്നത്‌. എന്നാൽ, 120 കോടി രൂപ അധികമായി നൽകാൻ ധനവകുപ്പ്‌ തീരുമാനിക്കുകയായിരുന്നു.

സപ്ലൈകോയ്‌ക്ക്‌ 225 കോടി അനുവദിച്ചതായി ധനമന്ത്രി

തിരുവനന്തപുരം: തലസ്ഥാനത്ത് യുവാവിനെ കുത്തിക്കൊന്നു. ബീമാപള്ളി കടപ്പുറത്താണ് സംഭവം. ഷിബിലി എന്ന യുവാവ് ആണ് കൊല്ലപ്പെട്ടത്. ഇന്ന് പുലർച്ചെയാണ് കൊലപാതകം നടന്നത്. ഇരുപത്തിരണ്ടുകാരനായ ഹിജാസ് ആണ് കൃത്യം നടത്തിയതെന്നാണ് റിപ്പോർട്ടുകൾ.
&nbsp;മുൻവൈരാഗ്യമാണ് കൊലയ്ക്ക് കാരണമെന്നാണ് പ്രാഥമിക നിഗമനം. സംഭവത്തിന് മുമ്പ് ഇരുവരും തമ്മിൽ വാക്കുതർക്കമുണ്ടായിരുന്നു. ബീമാപള്ളി കടപ്പുറത്തിന് സമീപമുള്ള ഇടവഴിയിൽ വച്ചാണ് ഷിബിലിക്ക് കുത്തേറ്റത്. ഉടൻ ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഒളിവിൽപ്പോയ പ്രതിക്കായി തെരച്ചിൽ ആരംഭിച്ചു. പൊലീസിന്റെ റൗഡി ലിസ്റ്റിൽപ്പെട്ടയാളാണ് ഷിബിലി.&nbsp;

തിരുവനന്തപുരത്ത് യുവാവിനെ കുത്തിക്കൊന്നു.

തിരുവനന്തപുരത്ത് യുവാവിനെ കുത്തിക്കൊന്നു

കോഴിക്കോട്: ഷിരൂരിലെ മണ്ണിടിച്ചിലിൽ കോഴിക്കോട് സ്വദേശി അർജുനെ കാണാതായിട്ട് ഒരുമാസം പിന്നിടുന്നു. ജൂലായ് 16-ന് രാവിലെയുണ്ടായ മണ്ണിടിച്ചിലിലാണ് തടി കയറ്റിയ ലോറിയുമായി എടവണ്ണയിലേക്ക് വരുകയായിരുന്ന അർജുൻ അകപ്പെട്ടത്.
&nbsp;ദൂരെ പോയാലും ഫോൺ കോളിലൂടെ കുടുംബത്തെ ചേർത്തു നിർത്തിയിരുന്ന മകൻ തിരിച്ചുവരുമെന്ന പ്രതീക്ഷയിലാണ് ഇപ്പോഴും അർജുന്റെ കുടുംബം.ഈ കാര്യത്തിൽ കൃത്യമായ ഒരുത്തരം വേണമെന്ന് അർജുന്റെ സഹോദരി പറയുന്നു. എന്താണ് സംഭവിച്ചത് എന്ന് അറിയണം. കാർവാറിൽ ലോറി ഉയർത്താൻ ഉപയോ​ഗിച്ച വാഹനങ്ങളും യന്ത്രങ്ങളും കൂടി ​ഗം​ഗാവലിപ്പുഴയിൽ അടിഞ്ഞ് കൂടിയ തടിക്കഷ്ണങ്ങൾ പൊക്കിയെടുക്കാൻ എത്തിക്കുമെന്നാണ് ലഭിച്ച വിവരം.&nbsp;
കോട്ടയ്ക്കലിൽ നിന്നും ടൈലുമായി മൈസൂരിലേക്കു പോയ അർജുൻ ജൂലായ് 15-നാണ് ബെൽ​ഗാമിൽ നിന്നും തടിയുമായി എടവണ്ണയിലേക്ക് തിരിച്ചത്. 16-ന് രാവിലെ ഷിരൂരിൽ ​ഗം​ഗാവാലിപ്പുഴയ്ക്ക് സമീപം വണ്ടി നിർത്തി വിശ്രമിക്കുന്നതിനിടെ മണ്ണിടിച്ചിലിൽ പെട്ടു. നിർത്തി വെച്ച തിരച്ചിൽ പുനരാംഭിച്ചത് മുതൽ അർജുനെക്കുറിച്ച് സൂചന കിട്ടും എന്ന പ്രതീക്ഷയിലാണ് കുടുംബവും അർജുന്റെ നാട്ടുകാരും.

അർജുനെ കാണാതായിട്ട് ഇന്നേക്ക് ഒരുമാസം ;തിരച്ചിൽ പുനരാരംഭിച്ചു

പാലക്കാട്: താഴ്ന്നുകിടന്ന വൈദ്യുതി ലൈനില്‍ നിന്ന് ഷോക്കേറ്റ് ക്ഷീര കര്‍ഷകന്‍ മരിച്ചു. കുഴല്‍മന്ദം നൊച്ചുള്ളി മഞ്ഞാടി വീട്ടീല്‍ വേലമണി(75) യാണ് മരിച്ചത്. വെള്ളിയാഴ്ച പുലര്‍ച്ചെ ആറുമണിയോടെയാണ് സംഭവം.
പെരുങ്കുന്നം ക്ഷീരസംഘത്തിലെ ക്ഷീര കര്‍ഷകനാണ്. കാലത്ത് പാല്‍ നല്‍കുന്നതിനായി പോകുന്നതിനിടെയാണ് വഴിയരികിലെ കെ.എസ്.ഇ.ബി. പോസ്റ്റില്‍ നിന്നും താഴ്ന്നുകിടന്ന വൈദ്യുതി കമ്പിയില്‍ നിന്ന് ഷോക്കേറ്റത്. മൃതദേഹം ജില്ലാ ആശുപത്രി മോര്‍ച്ചറിയില്‍.ഭാര്യ: വള്ളിക്കുട്ടി. മക്കള്‍: രാധാകൃഷ്ണന്‍, രമേഷ്, പരേതനായ രാജേഷ്, സതീഷ്. മരുമക്കള്‍: ദീപ, കുഞ്ഞിലക്ഷ്മി, രമ്യ, പ്രീത. സഹോദരങ്ങള്‍: പരേതയായ തങ്ക, കണ്ടു, കമലാക്ഷി, വേലായുധന്‍, പാര്‍വ്വതി, രാമകൃഷ്ണന്‍, കാഞ്ചന, രാജന്‍, ചെല്ലമണി.

താഴ്ന്നുകിടന്ന വൈദ്യുതി ലൈനില്‍ നിന്ന് ഷോക്കേറ്റ് ക്ഷീര കര്‍ഷകന്‍ മരിച്ചു

ന്യൂഡൽഹി / തിരുവനന്തപുരം: കൊൽക്കത്ത ആർ.ജി. കർ മെഡിക്കൽ കോളേജിൽ വനിതാ ഡോക്ടർ ബലാത്സംഗത്തിനിരയായി കൊല്ലപ്പെട്ട സംഭവത്തിൽ കേരളത്തിലും ഡോക്ടർമാർ സമരത്തിനിറങ്ങും. കേരള മെഡിക്കല്‍ പോസ്റ്റ് ഗ്രാജുവേറ്റ് അസോസിയേഷന്‍ (കെ.എം.പി.ജി.എ) ആണ് സമരം പ്രഖ്യാപിച്ചത്. വെള്ളിയാഴ്ച ഒപിയും വാര്‍ഡ് ഡ്യൂട്ടിയും ബഹിഷ്‌കരിക്കും. അത്യാഹിത വിഭാ​ഗങ്ങളിൽ സേവനമുണ്ടാകും.
രാജ്യവ്യാപകമായി പണിമുടക്കുമെന്ന് ഐ.എം.എ നേരത്തെ അറിയിച്ചിരുന്നു. വെള്ളിയാഴ്ച രാവിലെ ആറ് മുതൽ ശനിയാഴ്ച രാവിലെ ആറ് വരെ 24 മണിക്കൂറാണ് പ്രതിഷേധം. ഓള്‍ ഇന്‍ഡ്യ ഫെഡറേഷന്‍ ഓഫ് ഗവണ്‍മെന്റ് ഡോക്ടേഴ്‌സ് അസോസിയേഷന്‍ ( AIFGDA) ദേശീയ തലത്തില്‍ കരിദിനം ആചരിക്കും. കെജിഎംഒഎയും പ്രതിഷേധ ദിനത്തില്‍ പങ്കു ചേരും. എല്ലാ ആരോഗ്യ സ്ഥാപനങ്ങളിലും പ്രതിഷേധ യോഗങ്ങള്‍ സംഘടിപ്പിക്കുമെന്നും കെജിഎംഒഎ അറിയിച്ചു.
കഴിഞ്ഞ വെള്ളിയാഴ്ച പുലർച്ചെയാണ് കൊലപാതകം നടന്നത്. ആർ.ജി. കർ മെഡിക്കൽ കോളേജിലെ നെഞ്ചുരോഗ വിഭാഗത്തിൽ പി.ജി. ട്രെയിനിയായ വനിതാ ഡോക്ടറെയാണ് ബലാത്സംഗം ചെയ്ത് കൊലപ്പെടുത്തിയത്. കോളേജിലെ സെമിനാർ ഹാളിനുള്ളിൽ അർധനഗ്‌നമായ നിലയിലായിരുന്നു വനിതാ ഡോക്ടറുടെ മൃതദേഹം.&nbsp;

വനിതാ ഡോക്ടറുടെ കൊലപാതകം: 24 മണിക്കൂര്‍ പണിമുടക്കിന് ഐ.എം.എ ; കേരളത്തിലും സമരം .

വനിതാ ഡോക്ടറുടെ കൊലപാതകം: 24 മണിക്കൂര്‍ പണിമുടക്കിന് ഐ.എം.എ ; കേരളത്തിലും സമരം

കണ്ണൂര്‍ : കണ്ടെയ്‌നര്‍ ലോറി റോഡ് മാറി ഓടി. അടിപ്പാതയുടെ മുകളില്‍ കാബിന്‍ കുടുങ്ങിയതുകൊണ്ട് വന്‍ അപകടം ഒഴിവായി. ദേശീയ പാതയില്‍ കരിവെള്ളൂര്‍ ബസാറില്‍ വ്യാഴാഴ്ച രാത്രിയാണ് അപകടം.
മംഗളൂരുവില്‍നിന്ന് കണ്ണൂരിലേക്ക് കാറുകളുമായി പോവുകയായിരുന്നു ലോറി. കരിവെള്ളൂര്‍ ടൗണില്‍നിന്ന് 150 മീറ്റര്‍ വടക്കു ഭാഗത്തുവെച്ച് സര്‍വീസ് റോഡിലൂടെ നേരെ പോകേണ്ടതിനു പകരം നിര്‍മാണത്തിലിരിക്കുന്ന പുതിയ റോഡിലേക്ക് കയറി. അടിപ്പാത നിര്‍മാണത്തിന്റെ ഭാഗമായി തറനിരപ്പില്‍ നിന്നും 10 മീറ്റര്‍ ഉയരത്തിലൂടെയാണ് ഇവിടെ റോഡ് കടന്നുപോകുന്നത്. അടിപ്പാതയുടെ ഒരു ഭാഗം മണ്ണിട്ട് ഉയര്‍ത്തിയിട്ടുമില്ല. 10 മീറ്ററോളം താഴ്ചയിലേക്ക് വീഴുന്നതിന് തൊട്ടുമുമ്പാണ് കാബിന്‍ കുടുങ്ങിയത്. ഡ്രൈവര്‍ സ്ഥലത്തുനിന്ന് ഓടിപ്പോയി.

ലോറി വഴിമാറി ഓടി, നിര്‍മാണത്തിലിരുന്ന അടിപ്പാതയ്ക്ക് മുകളില്‍ കാബിന്‍ കുടുങ്ങി, ഒഴിവായത് വൻ അപകടം

Kannur

കോട്ടക്കൽ: അവധി ദിനമായ വ്യാഴാഴ്ച കൂട്ടുകാരുമൊത്ത് കുളത്തിലിറങ്ങിയ വിദ്യാർഥി മുങ്ങിമരിച്ചു. കോട്ടക്കൽ ചിനക്കൽ സ്വദേശി പൂക്കയിൽ മുഹമ്മദലിയുടെ മകൻ മുഹമ്മദ് അഫ്ലഹ് (12) ആണ് മരിച്ചത്.
കോട്ടക്കൽ കുറ്റിപ്പുറം സർഹിന്ദ് നഗറിലെ കുളത്തിലാണ് അപകടം. നാട്ടുകാർ കുട്ടിയെ രക്ഷപ്പെടുത്തി സ്വകാര്യ ആശുപത്രിയിൽ എത്തിച്ചു. ചികിത്സയിലിരിക്കെ ഇന്ന് പുലർച്ചെയാണ് മരിച്ചത്.കോട്ടക്കൽ പൊലീസ് നടപടികൾ സ്വീകരിച്ചു. കോട്ടൂർ എ.കെ.എം. ഹയർ സെക്കൻഡറി സ്‌കൂളിൽ ആറാം ക്ലാസ് വിദ്യാർഥിയാണ്.

കൂട്ടുകാരുമൊത്ത് കുളത്തിലിറങ്ങിയ വിദ്യാർഥി മുങ്ങിമരിച്ചു

ന്യൂഡൽഹി: നാല് സംസ്ഥാനങ്ങളിലെ നിയമസഭാ തിരഞ്ഞെടുപ്പ് തീയതികൾ ഇന്ന് പ്രഖ്യാപിക്കും. ജമ്മു കശ്മീർ, ഝാർഖണ്ഡ്‌, ഹരിയാണ, മഹാരാഷ്ട്ര എന്നിവിടങ്ങളിലെ തിരഞ്ഞെടുപ്പ് തീയതികളായിരിക്കും വൈകിട്ട് മൂന്നുമണിക്ക് വാർത്താ സമ്മേളനത്തിൽ തിരഞ്ഞെടുപ്പ് കമ്മിഷൻ പ്രഖ്യാപിക്കുക.
കേരളത്തിലെ ഉപതിരഞ്ഞെടുപ്പ് തീയതികളും ഇന്ന് പ്രഖ്യാപിച്ചേക്കും. പാലക്കാട്, ചേലക്കര നിയമസഭാ മണ്ഡലങ്ങളിലെ ഉപതിരഞ്ഞെടുപ്പ് തീയതികളായിരിക്കും പ്രഖ്യാപിക്കുക. വയനാട് ഉപതിരഞ്ഞെടുപ്പ് ഇതിനൊപ്പം ഉണ്ടാകുമോ അതോ ദുരന്തത്തിന്റെ പശ്ചാത്തലത്തിൽ നീളുമോ എന്ന കാര്യം ഉച്ചയ്ക്ക് അറിയാം.ഹരിയാണ സർക്കാരിന്റെ കാലാവധി നവംബർ മൂന്നിനാണ് കഴിയുന്നത്. മഹാരാഷ്ട്രയിൽ നവംബർ 26-നും. 288 നിയമസഭാ സീറ്റുകളിലേക്കാണ് മഹാരാഷ്ട്രയിൽ മത്സരം, ഹരിയാണയിൽ 90 സീറ്റുകളിലേക്കും. സെപ്റ്റംബറിന് മുമ്പ് തിരഞ്ഞെടുപ്പ് നടത്തണമെന്ന സുപ്രീം കോടതിയുടെ ഉത്തരവിന്റെ പശ്ചാത്തലത്തിൽ ജമ്മുകശ്മീരിലെ തീയതിയും പ്രഖ്യാപിച്ചേക്കും

നാല് സംസ്ഥാനങ്ങളിലെ നിയമസഭാ തിരഞ്ഞെടുപ്പ് തീയതികൾ ഇന്നറിയാം ;കേരളത്തിലെ ഉപതിരഞ്ഞെടുപ്പും പ്രഖ്യാപിച്ചേക്കും

തായ്‌ലാന്‍ഡിലെ ഫുക്കറ്റില്‍ വാട്ടര്‍ റൈഡിനിടെയുണ്ടായ അപകടത്തില്‍ തലശ്ശേരി സ്വദേശിനിയായ യുവതി മരിച്ചു. പിലാക്കൂല്‍ ഗാര്‍ഡന്‍സ് റോഡ് മാരാത്തേതില്‍ ലവീന റോഷനാണ് (നിമ്മി-34) മരിച്ചത്. സെപ്റ്റംബര്‍ നാലിനായിരുന്നു അപകടം. പരിക്കേറ്റ് അബോധാവസ്ഥയില്‍ സിങ്കപ്പൂര്‍ ആശുപത്രിയിലായിരുന്നു. ചികിത്സയ്ക്ക് നാട്ടിലേക്ക് മാറ്റാനിരിക്കെയാണ് മരണം.
സിങ്കപ്പൂരിലാണ് ലവീനയും കുടുംബവും താമസം. മാതാപിതാക്കളോടും കുടുംബാഗങ്ങളോടുമൊപ്പം ബാങ്കോക്കില്‍ സന്ദര്‍ശനത്തിന് പോയ പ്പോഴായിരുന്നു അപകടം. മൃതദേഹം ബുധനാഴ്ച ധര്‍മ്മടം പാലയാട് യൂണിവേഴ്സിറ്റി സെന്ററിനടുത്തുള്ള ലിനാസില്‍ എത്തിക്കും. കബറടക്കം 12-ന് സെയ്ദാര്‍ പള്ളി കബറിസ്താനില്‍ നടക്കും.
പിതാവ്: മാരാത്തേയില്‍ നസീര്‍, മാതാവ്: ഷബീന നസീര്‍. ഭര്‍ത്താവ്: മുഹമ്മദ് റോഷന്‍. മകന്‍: ആദം ഈസ മുഹമ്മദ്. സഹോദരി: ഷസിന്‍ സിതാര (ദുബായ്). കേരള ബാര്‍ കൗണ്‍സില്‍ വൈസ് ചെയര്‍മാനും കേരള വഖഫ് ബോര്‍ഡ് അംഗവുമായ അഡ്വ. എം. ഷറഫുദ്ദീന്റെ സഹോദരന്റെ മകളാണ്.

തായ്‌ലാന്‍ഡില്‍ വാട്ടര്‍ റൈഡിനിടെ അപകടം; തലശ്ശേരി സ്വദേശിനിയായ യുവതി മരിച്ചു

Search Results for: 28-11-2023