2025ല്‍ നടക്കുന്ന കീം പരീക്ഷ തീയതികള്‍ പ്രഖ്യാപിച്ചു. ഔദ്യോഗിക വെബ്‌സൈറ്റില്‍ ബന്ധപ്പെട്ട വിജ്ഞാപനം വിശദമായി നല്‍കിയിട്ടുണ്ട്.ഏപ്രില്‍ 23 മുതല്‍ പരീക്ഷകള്‍ ആരംഭിക്കും
പരീക്ഷയ്ക്ക് സെന്ററില്‍ രണ്ട് മണിക്കൂര്‍ മുന്‍പ് എത്തി റിപ്പോര്‍ട്ട് ചെയ്യണം. പരീക്ഷയുമായി ബന്ധപ്പെട്ട അപ്‌ഡേറ്റുകള്‍ അറിയാന്‍ ഔദ്യോഗിക വെബ്‌സൈറ്റ് നിരന്തരം സന്ദര്‍ശിക്കണമെന്ന് അധികൃതര്‍ അറിയിക്കുന്നു.
വിശദവിവരങ്ങള്‍ക്കായി ഔദ്യോഗിക വെബ്‌സൈറ്റ് സന്ദര്‍ശിക്കാം: <a href="https://cee.kerala.gov.in/cee/index-ml.php" target="_blank">https://cee.kerala.gov.in/cee/index-ml.php</a>

കീം 2025, പരീക്ഷ തീയതികള്‍ പ്രസിദ്ധീകരിച്ചു

Kerala

തിരുവനന്തപുരം: 2023-ലെ കേരള സംസ്ഥാന ചലച്ചിത്ര അവാര്‍ഡുകളുടെ സമര്‍പ്പണം ബുധനാഴ്ച മുഖ്യമന്ത്രി പിണറായി വിജയന്‍ നിര്‍വഹിക്കും. വൈകീട്ട് ഏഴുമണിക്ക് തിരുവനന്തപുരം നിശാഗന്ധി ഓഡിറ്റോറിയത്തില്‍ നടക്കുന്ന ചടങ്ങില്‍ സാംസ്‌കാരിക വകുപ്പ് മന്ത്രി സജി ചെറിയാന്‍ അധ്യക്ഷത വഹിക്കും. കേരള സര്‍ക്കാരിന്റെ പരമോന്നത ചലച്ചിത്ര ബഹുമതിയായ ജെ.സി ഡാനിയേല്‍ അവാര്‍ഡ് സംവിധായകന്‍ ഷാജി എന്‍. കരുണിന് മുഖ്യമന്ത്രി സമ്മാനിക്കും.
പൃഥ്വിരാജ് സുകുമാരന്‍, ഉര്‍വശി, ബ്ളെസി, വിജയരാഘവന്‍, റസൂല്‍ പൂക്കുട്ടി, വിദ്യാധരന്‍ മാസ്റ്റര്‍, ജിയോ ബേബി, ജോജു ജോര്‍ജ്, റോഷന്‍ മാത്യൂ, സംഗീത് പ്രതാപ് തുടങ്ങി 48 ചലച്ചിത്രപ്രതിഭകള്‍ പുരസ്‌കാരങ്ങള്‍ ഏറ്റുവാങ്ങും. പുരസ്‌കാര സമര്‍പ്പണത്തിനുശേഷം സ്റ്റീഫന്‍ ദേവസ്സിയുടെ സോളിഡ് ബാന്‍ഡ് അവതരിപ്പിക്കുന്ന സംഗീത പരിപാടി ഉണ്ടായിരിക്കും.ചടങ്ങില്‍ മന്ത്രിമാരായ വി.ശിവന്‍കുട്ടി, കെ.എന്‍. ബാലഗോപാല്‍, കെ. രാജന്‍, വി.കെ. പ്രശാന്ത് എംഎല്‍എ, മേയര്‍ ആര്യാ രാജേന്ദ്രന്‍, ജില്ലാ പഞ്ചായത്ത് പ്രസിഡന്റ് അഡ്വ. ഡി. സുരേഷ് കുമാര്‍, സാംസ്‌കാരിക വകുപ്പ് അഡീഷണല്‍ ചീഫ് സെക്രട്ടറി ഡോ. രാജന്‍ എന്‍. ഖോബ്രഗഡെ ഐഎഎസ്, സാംസ്‌കാരിക വകുപ്പ് ഡയറക്ടര്‍ ഡോ. ദിവ്യ എസ്. അയ്യര്‍ ഐഎഎസ്, ജെ.സി. ഡാനിയേല്‍ അവാര്‍ഡ് ജൂറി ചെയര്‍മാന്‍ ടി.വി. ചന്ദ്രന്‍, ചലച്ചിത്ര അവാര്‍ഡ് ജൂറി ചെയര്‍മാന്‍ സുധീര്‍ മിശ്ര, രചനാവിഭാഗം ജൂറി ചെയര്‍പേഴ്സണ്‍ ഡോ. ജാനകി ശ്രീധരന്‍, സാംസ്‌കാരിക പ്രവര്‍ത്തക ക്ഷേമനിധി ബോര്‍ഡ് ചെയര്‍മാന്‍ മധുപാല്‍, ചലച്ചിത്ര അക്കാദമി ചെയര്‍മാന്‍ പ്രേംകുമാര്‍, സെക്രട്ടറി സി.അജോയ് എന്നിവര്‍ പങ്കെടുക്കും.

സംസ്ഥാന ചലച്ചിത്ര പുരസ്‌കാര സമര്‍പ്പണം ബുധനാഴ്ച

കട്ടപ്പന: ഉപ്പുതറയിൽ ഒരു കുടുംബത്തിലെ നാലു പേരെ മരിച്ച നിലയിൽ കണ്ടെത്തി. ഉപ്പുതറ പട്ടത്തമ്പലം സ്വദേശിയായ സജീവ് മോഹനൻ, ഭാര്യ രേഷ്മ, നാലും ആറും വയസ്സുള്ള രണ്ട് മക്കൾ എന്നിവരാണ് മരിച്ചത്. ആത്മഹത്യയാണെന്നാണ് പ്രാഥമിക വിവരം. ഉപ്പുതറ പോലീസ് സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചു.
നാലുപേരെയും തൂങ്ങി മരിച്ച നിലയിലാണ് കണ്ടെത്തിയതെന്നാണ് പ്രാഥമിക വിവരം. മക്കളെ കൊലപ്പെടുത്തിയതിന് ശേഷം മാതാപിതാക്കൾ ജീവനൊടുക്കിയാതാണെന്നാണ് സംശയം. ഓട്ടോ ഡ്രൈവറായിരുന്നു സജീവ്. വലിയ സാമ്പത്തിക ബാധ്യത ഉണ്ടായിരുന്നുവെന്നാണ് വിവരം.

ഇടുക്കിയിൽ ഒരു കുടുംബത്തിലെ നാല് പേർ മരിച്ചനിലയിൽ

വടകര: മലയാള കവിയും ഗാനരചയിതാവുമായിരുന്ന പി.ടി. അബ്ദുറഹ്മാൻ അനുസ്മരണവും അവാർഡ് സമർപ്പണവും ഏപ്രിൽ 11 ന് വെള്ളിയാഴ്ച വൈകുന്നേരം 5 മണിക്ക് വടകര നഗരസഭാ സാംസ്കാരിക ചത്വരത്തിൽ നടക്കും. കേരള സംഗീത നാടക അക്കാദമി സിക്രട്ടറി കരിവള്ളൂർ മുരളി ഉദ്ഘാടനം ചെയ്യും. വടകരയിലെ സാംസ്കാരികരംഗത്തെ നിറസാന്നിദ്ധ്യമായ എക്സൽ ഫൈൻ ആർട്സ് സൊസൈറ്റി (എഫാസ്) യുടെ നേതൃത്വത്തിലാണ് അനുസ്മരണപരിപാടി സംഘടിപ്പിക്കുന്നത്. കഴിഞ്ഞ ആറുവർഷമായി തുടർച്ചയായി മാപ്പിളപ്പാട്ട് രംഗത്തും, കലാ- സാഹിത്യ സാംസ്കാരിക മേഖലകളിലും നിരവധി സംഭാവനകൾ നൽകിയ വി.എം. കുട്ടി,പീർമുഹമ്മദ്, എം. കുഞ്ഞമ്മൂസ, ജമാൽ കൊച്ചങ്ങാടി, റഫീക് അഹമ്മദ് തുടങ്ങി പ്രമുഖ വ്യക്തിത്വങ്ങൾക്കാണ് ഇതുവരെ പുരസ്കാരങ്ങൾ നൽകിയിട്ടുള്ളത്.&nbsp;
മലയാള സിനിമാ - നാടക ഗാനരംഗത്ത് നിറഞ്ഞ് നിൽക്കുന്ന വടകരയുടെ പ്രിയ ഗായകൻ വി.ടി. മുരളിക്കാണ് ഈ വർഷം പി.ടി. പുരസ്കാരം ലഭിച്ചിട്ടുള്ളത്. പതിനായി രം രൂപയും ശില്പവുമടങ്ങുന്നതാണ് പുരസ്കാരം. പി.ടി. അബ്ദുറഹ്മാൻ രചിച്ച 'ഓത്തുപള്ളീലന്ന് നമ്മള് 'എന്നു തുടങ്ങുന്ന പ്രശസ്തമായ സിനിമാ ഗാനം വി.ടി. മുരളിയുടെ മധുര ശബ്ദത്തിലൂടെ കേട്ടാണ് മലയാളികളുടെ മനസ്സിൽ പാടി പതിഞ്ഞത്. പ്രശസ്തമായ നിരവധി മാപ്പിളപ്പാട്ടുകൾ പി.ടി രചിച്ചിട്ടുണ്ട്. വടകര മുനിസിപ്പൽ ചെയർപേഴ്സൻ കെ.പി. ബിന്ദുവിൻ്റെ അദ്ധ്യക്ഷതയിൽ നടക്കുന്ന പരിപാടിയിൽ ആർ. ബാലറാം പി.ടി.അബ്ദുറഹ്മാൻ അനുസ്മരണം നടത്തും. തുടർന്ന് 6.30 ന് വടകര റെഡ് വെയ്വ്സ് മ്യൂസിക് ബേൻ്റ് ഒരുക്കുന്ന സംഗീത വിരുന്നും ഒരുക്കിയിട്ടുണ്ട്.

പി.ടി. അബ്ദുറഹ്മാൻ അനുസ്മരണവും പുരസ്കാര സമർപ്പണവും

Vadakara

തുറയൂർ: ടാസ്ക് തുറയൂർ സംഘടിപ്പിച്ച 28ആമത് അഖിലേന്ത്യ വോളിബോൾ മത്സരത്തിലെ ഡിപ്പാർട്മെന്റ് മത്സരത്തിൽ ഇന്ത്യൻ ആർമി ജേതാക്കളായി. ഫൈനൽ മത്സരത്തിൽ ഇന്ത്യൻ എയർഫോയ്സിനെതിരെ ഒന്നിനെതിരെ മൂന്ന് സെറ്റുകൾക്കായിരുന്നു വിജയം. വാശിയേറിയ മത്സരത്തിൽ ആദ്യ രണ്ട് സെറ്റ് ജയിച്ച ഇന്ത്യൻ ആർമി ആദ്യമേ വിജയം പ്രതീക്ഷിച്ചിരുന്നെങ്കിലും പിന്നീടുള്ള സെറ്റ് വിജയിച്ച് ഇന്ത്യൻ എയർഫോയ്‌സ് കനത്ത വെല്ലുവിളിയാണ് ഇന്ത്യൻ ആർമിക്കെതിരെ ഉയർത്തിയത്. കനത്ത പോരാട്ടം നടന്ന നാലാം സെറ്റ് മത്സരം ഇന്ത്യൻ ആർമി വിജയിച്ചതോടെ കനക കിരീടം ചൂടുകയായിരുന്നു. ആദ്യം നടന്ന ജില്ലാ തല മത്സരത്തിൽ ആതിഥേയരായ ടാസ്ക് തുറയൂർ സയൻസ് സെന്റർ വടകരയെ പരാജയപ്പെടുത്തി. എതിരില്ലാത്ത രണ്ട് സെറ്റുകൾക്കായിരുന്നു ജയം.&nbsp;
ജില്ലാ തല മത്സരത്തിലെ ബെസ്റ്റ് സെറ്ററായി അമലും ബെസ്റ്റ് അറ്റാക്കറായി അജിത്ത് തുമ്പിയും ബെസ്റ്റ് പ്ലെയറായി റിജാസും തിരഞ്ഞെടുക്കപ്പെട്ടു. അഖിലേന്ത്യ മത്സരത്തിൽ ബെസ്റ്റ് ലിബറോ രമേഷും ബെസ്റ്റ് സെറ്ററായി ലാൽ സുജനും ബെസ്റ്റ് അറ്റാക്കറായി അശോക് ബിഷ്നോയിയും ബെസ്റ്റ് പ്ലെയറായി അമൽ തോമസും അർഹരായി. അഖിലേന്ത്യ മത്സരത്തിലെ എവർറോളിംഗ് ട്രോഫി അഫ്നാസ് മേക്കിലാട്ടും തെനങ്കാലിൽ ഇസ്മായിലും റണ്ണേയ്സ് അപ്പ്‌ ട്രോഫി കുന്നുമ്മൽ റസാക്ക്, മണിയോത്ത് മൂസ എന്നിവർ ചേർന്ന് കൈമാറി. ജില്ലാ തല മത്സരത്തിലെ വിജയികൾക്കുള്ള എവർ റോളിംഗ് ട്രോഫി ഹംസ കോയിലോത്ത്, എ.എം റഫീഖ് എന്നിവരും റണ്ണേയ്സ് അപ്പ് ട്രോഫി വി.പി അസ്സൈനാർ എം.ടി റംഷിദ് എന്നിവരും ചേർന്ന് കൈമാറി.

ടാസ്ക് വോളി മേള; ഇന്ത്യൻ ആർമി ജേതാക്കൾ

Koyilandy

തിരുവനന്തപുരം: മാസപ്പടി വിവാദവുമായി ബന്ധപ്പെട്ട് തന്നെ മനപ്പൂര്‍വം വേട്ടയാടുകയാണെന്നും അത്തരക്കാര്‍ക്ക് വേണ്ടത് തന്റെ രക്തമാണെന്നുമുള്ള മുഖ്യമന്ത്രി പിണറായി വിജയന്റെ പ്രസ്താവന അനുകമ്പ കിട്ടാന്‍വേണ്ടിയാണെന്ന് ബിജെപി നേതാവ് കുമ്മനം രാജശേഖരന്‍.&nbsp;
സുരേഷ്‌ഗോപി നല്ല മനുഷ്യനാണ് അദ്ദേഹത്തിനെതിരായ കുപ്രചാരണത്തിനുവേണ്ടി മാത്രം ഒരു കോക്കസ് പ്രവര്‍ത്തിക്കുന്നുണ്ട്. ഗതാതഗത മന്ത്രി കെ.ബി. ഗണേഷ്‌കുമാറും ഈ കോക്കസിന്റെ ഭാഗമാണ്. മാസപ്പടി വിവാദം തന്റെ രക്തത്തിന് വേണ്ടിയുള്ള നീക്കമാണെന്ന മുഖ്യമന്ത്രിയുടെ പ്രസ്താവന അനുകമ്പ കിട്ടാന്‍ വേണ്ടിയാണ്. പലതില്‍നിന്നും ജനങ്ങളുടെ ശ്രദ്ധതിരിക്കുകയാണ് മുഖ്യമന്ത്രിയുടെ ലക്ഷ്യമെന്നും കുമ്മനം പറഞ്ഞു.

മുഖ്യമന്ത്രിയുടെ പ്രസ്താവന അനുകമ്പ കിട്ടാന്‍വേണ്ടിയാണെന്ന് കുമ്മനം രാജശേഖരന്‍

കൊച്ചി: പൂക്കോട് വെറ്ററിനറി സർവകലാശാലയിൽ റാ​ഗിങ്ങിനിരയായി സിദ്ധാർഥനെന്ന വിദ്യാർഥി ആത്മഹത്യ ചെയ്ത സംഭവത്തിൽ കോളേജിലെ 19 വിദ്യാർഥികളെ പുറത്താക്കി. സർവകലാശാലയുടെ ആഭ്യന്തര അന്വേഷണ റിപ്പോർട്ടിന്റെ അടിസ്ഥാനത്തിലാണ് നടപടി. സർവകലാശാലയുടെ തീരുമാനം ഹൈക്കോടതിയെ അറിയിച്ചു.
പ്രതികളായ 19 വിദ്യാർഥികളെയാണ് പുറത്താക്കിയത്. മുമ്പ് മറ്റൊരു ക്യാമ്പസിൽ ഇവർക്ക് പഠിക്കുന്നതിന് സൗകര്യം ഒരുക്കിയിരുന്നു. അത് ചോദ്യം ചെയ്ത് സിദ്ധാർഥിന്റെ കുടുംബമുൾപ്പെടെ ഹൈക്കോടതിയെ സമീപിച്ചിരുന്നു. ആ അപ്പീൽ പരി​ഗണിച്ച കോടതി ശക്തമായ നിലപാട് സ്വീകരിക്കുകയായിരുന്നു. തുടർന്നാണ് സർവകലാശാല ആന്റി റാ​ഗിങ് കമ്മറ്റിയോട് അടിയന്തിര റിപ്പോർട്ട് ആവശ്യപ്പെട്ടത്. ഈ റിപ്പോർട്ട് പരി​ഗണിച്ചാണ് 19 വിദ്യാർഥികളെ സർവകലാശാലയിൽ നിന്ന് പുറത്താക്കിയത്. ഇവർക്ക് അടുത്ത മൂന്നു വർഷത്തേക്ക് മറ്റൊരു സർവകലാശാലയിലോ ക്യാമ്പസിലോ പഠനത്തിനുള്ള സൗകര്യമൊരുക്കരുതെന്നും റിപ്പോർട്ടിൽ ആവശ്യപ്പെട്ടിട്ടുണ്ട്.

സിദ്ധാർഥന്റെ മരണം; പൂക്കോട് സർവകലാശാലയിൽ നിന്ന് 19 വിദ്യാർഥികളെ പുറത്താക്കി

കോഴിക്കോട്: കാരശ്ശേരി വലിയ പറമ്പിൽ പ്രതിയെ പിടിക്കാൻ എത്തിയ പോലീസുകാർക്ക് വെട്ടേറ്റു. കാർ മോഷണക്കേസിലെ പ്രതിയായ വലിയപറമ്പ് സദേശി അർഷാദാണ് പൊലീസുകാരെ വെട്ടിപരിക്കേൽപ്പിച്ചത്. വയനാട് കല്പറ്റയില്‍ നിന്നുമാണ് ഇയാള്‍ കാര്‍ മോഷ്ടിച്ചത്‌.
വൈകീട്ട് 3.30ഓടെ പ്രതിയുടെ വീട്ടിൽ വെച്ചാണ് സംഭവം. വയനാട് എസ്പി യുടെ സ്ക്വാഡ് അം​ഗങ്ങൾക്കാണ് വെട്ടേറ്റത്. ‌സി.പി.ഒമാരായ ശാലു, നൗഫൽ എന്നിവർക്ക് വെട്ടേറ്റു. രണ്ടുപേരുടെയും കൈയിലാണ് വെട്ടേറ്റത്. വെട്ടേറ്റ പൊലീസുകാരെ മുക്കം കെഎംസിടി മെഡിക്കൽ കോളേജിൽ എത്തിച്ചു. മുക്കം പോലീസ് സ്ഥലത്ത് എത്തിയിട്ടുണ്ട്.

കോഴിക്കോട്ട്‌ കാര്‍ മോഷണക്കേസ് പ്രതിയെ പിടികൂടാനെത്തിയ പോലീസുകാര്‍ക്ക് വെട്ടേറ്റു

Kozhikode

വള്ളിക്കാട്: കിണറ്റിൽ വീണ ബക്കറ്റ് പുറത്തെടുക്കാൻ ഇറങ്ങിയ ആൾ കിണറ്റിൽ കുടുങ്ങി. ബാലവാടി ബസ് സ്റ്റോപ്പിന് സമീപം ഷൈൻ വിഹാറിലാണ് സംഭവം. തൊടുവയിൽ ശ്രീധരൻ എന്നയാളാണ് തിരിച്ചു കയറാനാവാതെ കിണറ്റിൽ കുടുങ്ങിയത്. വിവരം അറിയിച്ചതിനെ തുടർന്ന് വടകര അഗ്നി രക്ഷാ സേന സ്ഥലത്തെത്തി. റസ്ക്യൂ നെറ്റ് ഉപയോഗിച്ച് ഇയാളെ സുരക്ഷിതമായി കരക്കെത്തിച്ചു.&nbsp;
സ്റ്റേഷൻ ഓഫീസർ പി.ഒ . വർഗ്ഗീസിന്റെ നേതൃത്വത്തിലുള്ള സംഘത്തിൽ അസി. സ്റ്റേഷൻ ഓഫീസർ പി. വിജിത്ത്കുമാർ, സീനിയർ ഫയർ &amp; റസ്ക്യൂ ഓഫീസർ അനീഷ്.ഒ , ഫയർ &amp; റസ്ക്യൂ ഓഫീസർമാരായ റാഷിദ് എം.ടി, സഹീർ പി.എം, മുനീർ അബ്ദുളള, റഷീദ് കെ പി , ഹരിഹരൻ സി , രതീഷ് ആർ എന്നിവരാണ് രക്ഷാപ്രവർത്തനം നടത്തിയത്.

വള്ളിക്കാട് കിണറ്റിൽ കുടുങ്ങിയ ആളെ അഗ്നി രക്ഷാ സേന രക്ഷപ്പെടുത്തി

നിസാം ബഷീറിന്റെ പൃഥ്വിരാജ്- പാര്‍വതി തിരുവോത്ത് ചിത്രം 'നോബഡി' ചിത്രീകരണം ആരംഭിച്ചു. ഇ4 എന്റര്‍ടെയ്ന്‍മെന്റ്‌സിന്റെ ബാനറില്‍ മുകേഷ് മേത്തയും സി.വി. സാരഥിയും പൃഥ്വിരാജ് പ്രൊഡക്ഷന്‍സിന്റെ ബാനറില്‍ സുപ്രിയ മേനോനും സംയുക്തമായാണ് ചിത്രം നിര്‍മിക്കുന്നത്. മമ്മൂട്ടി ചിത്രം റോഷാക്കിന് ശേഷം നിസാം ബഷീര്‍ സംവിധാനംചെയ്യുന്ന ചിത്രമാണ് നോബഡി.
എന്നു നിന്റെ മൊയ്തീന്‍, കൂടെ, മൈ ലവ് സ്‌റ്റോറി എന്നീ ചിത്രങ്ങള്‍ക്ക് ശേഷം പാര്‍വതിയും പൃഥ്വിരാജും ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്. ചിത്രത്തിന്റെ പൂജ കൊച്ചിയില്‍ നടന്നു. അശോകന്‍, മധുപാല്‍, ഹക്കിം ഷാജഹാന്‍, ലുക്മാന്‍, ഗണപതി, വിനയ് ഫോര്‍ട്ട് എന്നിവരും ചിത്രത്തില്‍ പ്രധാനവേഷങ്ങള്‍ അവതരിപ്പിക്കുന്നു.അനിമല്‍, അര്‍ജുന്‍ റെഡ്ഡി എന്നീ ചിത്രങ്ങളിലൂടെ ശ്രദ്ധേയനായ ഹര്‍ഷ്‌വര്‍ധന്‍ രാമേശ്വര്‍ ആണ് ചിത്രത്തിന്റെ സംഗീതം. സമീര്‍ അബ്ദുള്ളയാണ് ചിത്രത്തിന്റെ തിരക്കഥ ഒരുക്കുന്നത്. ദിനേശ് പുരുഷോത്തമനാണ് ഛായാഗ്രാഹണം.

പൃഥ്വിരാജും പാര്‍വതിയും വീണ്ടും ഒന്നിക്കുന്നു; 'നോബഡി' സിനിമയുടെ ചിത്രീകരണം ആരംഭിച്ചു

തിരുവനന്തപുരം: സംസ്ഥാനത്തെ കള്ളുഷാപ്പുകള്‍ ആധുനികവത്കരിക്കുമെന്നും കള്ളിനെ കേരളത്തിന്റെ തനത് പാനീയമാക്കി മാറ്റുമെന്നും മന്ത്രി എം.ബി. രാജേഷ്. വിദ്യാഭ്യാസ സ്ഥാപനങ്ങളെ ലഹരി മുക്തമാക്കുക, ജനങ്ങള്‍ക്ക് ലഹരിയോടുള്ള ആസക്തി കുറയ്ക്കുക എന്നീ കാര്യങ്ങളാണ് മദ്യനയത്തിലൂടെ സര്‍ക്കാര്‍ ലക്ഷ്യമിടുന്നതെന്നും മന്ത്രി പറഞ്ഞു.
സര്‍ക്കാരിന്റെ മുന്‍വര്‍ഷത്തെ മദ്യനയത്തിന്റെ തുടര്‍ച്ചയാണ് പുതിയ മദ്യനയം. ലഹരിയോടുള്ള ആസക്തി കുറയ്ക്കുക എന്നതാണ് മദ്യനയത്തിലൂടെ സര്‍ക്കാര്‍ ലക്ഷ്യമിടുന്നത്. മയക്കുമരുന്നും രാസലഹരിയും തടയാനുള്ള ഇടപെടലും മദ്യനയം മുന്നോട്ടുവയ്ക്കുന്നു. വിദ്യാഭ്യാസ സ്ഥാപനങ്ങളെ ലഹരി മുക്തമാക്കുക എന്നതും മദ്യനയത്തിലൂടെ സര്‍ക്കാര്‍ ലക്ഷ്യമിടുന്നുവെന്നും മന്ത്രി വ്യക്തമാക്കി.
മദ്യത്തെ വ്യവസായമായാണ് സര്‍ക്കാര്‍ കാണുന്നത്. മദ്യത്തിന്റെ കയറ്റുമതിയാണ് സര്‍ക്കാര്‍ ലക്ഷ്യം വയ്ക്കുന്നത്. ജവാന്‍ മദ്യത്തിന്റെ ഉത്പാദനം വര്‍ധിപ്പിക്കും. ത്രീസ്റ്റാര്‍ മുതല്‍ മുകളിലേക്ക് ടോഡി പാര്‍ലര്‍ തുടങ്ങാന്‍ അനുമതി നല്‍കും. കള്ളുഷാപ്പുകളെ ആധുനികവത്കരിക്കുകയും നവീകരിക്കുകയും ചെയ്യും. പ്രാകൃതമായിട്ടുള്ള അവസ്ഥയില്‍നിന്ന് മാറ്റി, കള്ളുഷാപ്പുകള്‍ എല്ലാവര്‍ക്കും കുടുംബസമേതം വരാന്‍ പറ്റുന്ന ഇടങ്ങളായി മാറ്റുകയാണ് ലക്ഷ്യമെന്നും മന്ത്രി കൂട്ടിച്ചേര്‍ത്തു.സ്‌കൂള്‍ തലത്തിലും ജില്ലാ തലത്തിലുമുള്ള ജാഗ്രതാ സമിതികള്‍ തുടര്‍ച്ചയായി യോഗം ചേര്‍ന്ന് ലഹരിവിരുദ്ധ പ്രവര്‍ത്തനങ്ങള്‍ ആസൂത്രണം ചെയ്യുകയും അതിന് നേതൃത്വം ചെയ്യുകയും ചെയ്യുമെന്നും മന്ത്രി പറഞ്ഞു.

ഷാപ്പുകള്‍ ആധുനികവത്കരിക്കും; കള്ളിനെ തനത് പാനിയമാക്കുമെന്നും മന്ത്രി എം.ബി. രാജേഷ്

മാനന്തവാടി: കാട്ടിക്കുളത്ത് തേനീച്ചയുടെ കുത്തേറ്റ് ആലത്തൂർ എസ്റ്റേറ്റിലെ തൊഴിലാളി മരിച്ചു. മണ്ണുണ്ടി ഉന്നതിയിലെ വെള്ളു (63) ആണ് മരിച്ചത്.വ്യാഴാഴ്ച രാവിലെ 11.30ഓടെയാണ് സംഭവം.&nbsp;
ജോലിക്കിടെ മരത്തിന് മുകളിൽ ഉണ്ടായിരുന്ന തേനീച്ച കൂട് പരുന്ത് ആക്രമിക്കുകയും കൂട് വെള്ളുവിന്‍റെ തലയിലേക്ക് വീഴുകയുമായിരുന്നു.

തേനീച്ചയുടെ കുത്തേറ്റ് എസ്റ്റേറ്റ് തൊഴിലാളിക്ക് ദാരുണാന്ത്യം

കണ്ണൂര്‍: ഉളിക്കലില്‍ കടയ്ക്കുള്ളിലെ ചില്ലുകൂട്ടില്‍ കുടുങ്ങിയ അടയ്ക്കാ കുരുവിയെ ജില്ലാ കളക്ടര്‍ ഇടപെട്ട് രക്ഷപ്പെടുത്തി.കളക്ടറുടെ ഉത്തരവിന്റെ അടിസ്ഥാനത്തില്‍ ജില്ലാ ജഡ്ജി നേരിട്ട് സ്ഥലത്തെത്തി രക്ഷപ്പെടുത്തുകയായിരുന്നു. കേസില്‍പ്പെട്ട് കോടതി സീല്‍ ചെയ്ത് താഴിട്ടുപൂട്ടിയ കടയ്ക്കുള്ളിലാണ് കുരുവി കുടുങ്ങിയിരുന്നത്. പക്ഷി കുടുങ്ങിക്കിടക്കുന്നതു കണ്ട നാട്ടുകാര്‍ ഭക്ഷണവും വെള്ളവുമെല്ലാം നല്‍കിയിരുന്നു.
ജില്ലാ കളക്ടര്‍ അരുണ്‍ കെ. ജയന്റെ ഉത്തരവ് പ്രകാരം ജില്ലാ ജഡ്ജി നേരിട്ടെത്തി പൂട്ടുതുറന്നാണ് രക്ഷപ്പെടുത്തിയത്. തര്‍ക്കത്തെത്തുടര്‍ന്ന് സീല്‍ചെയ്ത് പൂട്ടിയ വസ്ത്ര വ്യാപാരസ്ഥാപനമാണിത്. കടയ്ക്ക് മുന്‍പില്‍ ചില്ലുകൂടുണ്ട്. അതിനകത്താണ് അടയ്ക്കാക്കുരുവി അബദ്ധത്തില്‍ കുടുങ്ങിയത്. ഗ്ലാസോ കടയുടെ പൂട്ടോ തകര്‍ത്ത് മാത്രമേ കുരുവിയെ രക്ഷിക്കാനാവുമായിരുന്നുള്ളൂ.ലക്ഷങ്ങള്‍ വിലമതിക്കുന്നതിനാല്‍ ഗ്ലാസ് പാളികള്‍ തകര്‍ക്കാനുള്ള തീരുമാനത്തില്‍നിന്ന് പിന്മാറി. നിയമക്കുരുക്കില്‍ കിടക്കുന്നതിനാല്‍ കടയുടെ പൂട്ട് പൊളിച്ച് രക്ഷപ്പെടുത്താനുള്ള ശ്രമവും വിഫലമായി. തുടര്‍ന്നാണ് കളക്ടറും ജഡ്ജിയുമടക്കം ഇടപെട്ടത്.&nbsp;

സീൽചെയ്ത കടയ്ക്കുള്ളിൽ കുടുങ്ങി അടക്കാക്കുരുവി; കളക്ടറുടെ ഉത്തരവിന്റെ അടിസ്ഥാനത്തില്‍ രക്ഷപെടുത്തി

Kannur

ഉപ്പ്, പൊതിയിന, ഗ്രാമ്പൂ തുടങ്ങിയ ടൂത്ത് പേസ്റ്റ് ഫ്‌ളേവറുകള്‍ നമുക്ക് സുപരിചിതമാണ്, അല്ലേ? ഇവയ്ക്ക് പുറമെ നാരങ്ങ, കാപ്പി, ചോക്‌ലേറ്റ്, മറ്റ് പഴങ്ങള്‍ എന്നിവയുടെ ഫ്‌ളേവറുകളിലും ടൂത്ത് പേസ്റ്റ് വിപണിയിലുണ്ട്.&nbsp;
ഫ്രൈഡ് ചിക്കന്‍ ഫ്‌ളേവറില്‍ തന്നെ ഒരു ടൂത്ത് പേസ്റ്റ് രംഗത്തെത്തിയാലോ.അത് യാഥാര്‍ഥ്യമാക്കിയിരിക്കുകയാണ് കെഎഫ്‌സിയും ഹൈസ്‌മൈലും. ഇരു കമ്പനികളുടേയും പങ്കാളിത്തത്തോടെ അമേരിക്കയില്‍ ഫ്രൈഡ് ചിക്കന്‍ ഫ്‌ളേവറിലുള്ള ടൂത്ത് പേസ്റ്റിന്റെ ലിമിറ്റഡ് എഡിഷന്‍ ഉപഭോക്താക്കളിലേക്ക് എത്തിയിരിക്കുകയാണ്.
കെഎഫ്‌സിയുടെ 11 ഔഷധസസ്യങ്ങളും സുഗന്ധവ്യഞ്ജനങ്ങളും അടങ്ങിയ ചേരുവയില്‍നിന്ന് പ്രചോദനമുള്‍ക്കൊണ്ടാണ് പുതിയ ടൂത്ത് പേസ്റ്റ് തയ്യാറാക്കിയിരിക്കുന്നത്. ഉപഭോക്താക്കള്‍ എങ്ങനെ പുതിയ ടൂത്ത് പേസ്റ്റിനെ എങ്ങനെ സ്വീകരിക്കുമെന്ന് ആശങ്ക തുടക്കത്തില്‍ നിലനിന്നിരുന്നെങ്കിലും ഫ്രൈഡ് ചിക്കന്‍ പ്രേമികളെ ആകര്‍ഷിച്ച ടൂത്ത് പേസ്റ്റ് വില്‍പനയ്‌ക്കെത്തി ഒരാഴ്ച കഴിയുന്നതിന് മുമ്പേ ഓണ്‍ലൈനില്‍ വിറ്റ് തീര്‍ന്നതായാണ് വിവരം. 13 അമേരിക്കന്‍ ഡോളറാണ്(1,126.90 രൂപ) ഫ്‌ളൂറൈഡ് രഹിതമായ 60 ഗ്രാം ഫ്രൈഡ് ചിക്കന്‍ ടൂത്ത് പേസ്റ്റിന്റെ വില.മസാലയോടുകൂടിയ നല്ല ചൂടുള്ള കെഎഫ്‌സിയുടെ ഫ്രൈഡ് ചിക്കന്‍ കടിക്കുന്ന പോലെയാണ് പുതിയ ടൂത്ത് പേസ്റ്റെന്നാണ് പുതിയ ഉത്പന്നം സംബന്ധിച്ച വാര്‍ത്താ കുറിപ്പില്‍ വിവരിച്ചിരിക്കുന്നത്.

ഫ്രൈഡ് ചിക്കന്‍ ഫ്‌ളേവറില്‍ ടൂത്ത് പേസ്റ്റ് ;വൻ ഹിറ്റ്

Health

വടകര: ദീർഘകാലങ്ങളായി ജില്ലയിലും അയൽ ജില്ലകളിലും ജോലി ചെയ്ത് വരുന്ന തീവണ്ടിയിലെ ദിവസ യാത്രക്കാരായ അധ്യാപകരുടെ കൂട്ടായ്മയായ "യാത്രാക്കൂട്ടം വടകര" യുടെ നേതൃത്വത്തിൽ ഈ വർഷം സർവ്വീസിൽ നിന്നും വിരമിക്കുന്ന അധ്യാപകർക്കായി നടത്തിയ യാത്രയയപ്പ് ശ്രദ്ദേയമായി. വടകര മുനിസിപ്പൽ പാർക്കിൽ നടന്ന സംഗമത്തിൽ സ്ഥിരം ട്രെയിൻ യാത്രക്കാരായ നൂറുക്കണക്കിന് അധ്യാപകർ പങ്കെടുത്തു. യാത്രയയപ്പ് സമ്മേളനം കവി ഗോപീ നാരായണൻ ഉൽഘാടനം ചെയ്തു. ബഷീർ കടമേരി അധ്യക്ഷനായി.&nbsp;
എഴുത്തുകാരൻ രാധാകൃഷ്ണൻ എടച്ചേരി മുഖ്യപ്രഭാഷണം നടത്തി. വിരമിക്കുന്ന അധ്യാപകർക്കുള്ള ഉപഹാരം വിതരണം ചെയ്തു. ദേവദാസൻ.പി, ഹരിദാസൻ. കെ, കുഞ്ഞമ്മത്. കെ.സി. പീതാംബരൻ. പി, മുഹമ്മദ്. ടി, രമേശൻ കുന്നിൽ, ഗിരീഷ് വള്ള്യാട്, രഘുനാഥ്.ഒ, ശാനിനി. പി, സുരേഷ്.പി, ദിലീപൻ. കെ.പി, ഷീബ.ടി.കെ, രാമചന്ദ്രൻ. ടി.വി, ഷീജ പറമ്പത്ത് എന്നിവർ സംസാരിച്ചു. ഷാജി മാധവൻ സ്വാഗതവും രാജീവൻ. പി.പി.നന്ദിയും പറഞ്ഞു. തുടർന്ന്‌ വടകര സ്വരമാധുരി കലാസംഘം അവതരിപ്പിച്ച കലാവിരുന്നും അരങ്ങേറി.

തീവണ്ടി യാത്രാക്കൂട്ടത്തിന്റെ യാത്രയയപ്പ് ശ്രദ്ദേയമായി

കൈനാട്ടി: കുടുംബങ്ങളിലെ അസ്വാസ്ഥ്യങ്ങളും സംഘർഷങ്ങളും കുട്ടികളെ ലഹരിയിലേക്ക് തള്ളിവിടുന്നതായി വടകര ഡി.വൈ.എസ്.പി. ഹരിപ്രസാദ് പറഞ്ഞു. മാങ്ങോട്ട് പാറയിൽ ലഹരി വിരുദ്ധ ജനകീയ കൂട്ടായ്മ നടത്തിയ "മാനിഷാദാ" ബഹുജന സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ലഹരി വിരുദ്ധ ജനകീയ സമിതി ചെയർമാൻ പ്രസാദ് വിലങ്ങിൽ അദ്യക്ഷത വഹിച്ചു. അസിസ്റ്റന്റ് എകൈ്സസ് ഇൻസ്പെക്ടർ ജയരാജ് മുഖ്യപ്രഭാഷണം നടത്തി.&nbsp;
ഗ്രാമ പഞ്ചായത്തംഗങ്ങളായ ജംഷിദ കെ, ഷിനിത ചെറുവത്ത്, വിവിധ രാഷ്ട്രിയ പാർട്ടി നേതാക്കളായ കെ.കെ.രാമചന്ദ്രൻ, രാജേഷ് ചോറോട്, അഷ്കർ കെ എം, ഉദയകുമാർ പി.കെ, ശശി.പി.കെ., എൻ.കെ. മോഹൻ, രാജേഷ് കെ.പി. എന്നിവർ സംസാരിച്ചു. കൺവീനർ പത്മനാഭൻ കിഴക്കയിൽ സ്വാഗതവും ശ്രീജീഷ് യു.എസ്. നന്ദിയും പറഞ്ഞു.

ലഹരിക്കെതിരെ "മാനിഷാദാ" ബഹുജന സംഗമം നടത്തി

താമരശ്ശേരി: കോഴിക്കോട് റൂറൽ ജില്ലാ പോലീസ് താമരശ്ശേരിയിൽ ലഹരി വസ്തുക്കളുടെ ഉപയോഗത്തിനെതിരെയുള്ള ജനകീയ പ്രതിരോധ കൂട്ടായ്മ സംഘടിപ്പിച്ചു. കഴിഞ്ഞ രണ്ട് മാസത്തിനുള്ളിൽ ലഹരി ഉപയോഗത്തെ തുടർന്ന് താമരശ്ശേരി പോലീസ് സ്റ്റേഷൻ പരിധിയിൽ മാത്രം സമൂഹ മനസാക്ഷിയെ ഞെട്ടിച്ച കൊലപാതകവും ലഹരി ഉപയോഗിച്ച്കൊണ്ട് സമൂഹത്തിൽ ഉണ്ടായ മറ്റ് ഗുരുതര അക്രമ സംഭവങ്ങളും വർദ്ധിച്ച സാഹചര്യത്തിലാണ് താമരശ്ശേരിക്കൊപ്പം നിന്നുകൊണ്ടു ലഹരിക്കെതിരെ ഒരു ജനകീയ പ്രതിരോധ കൂട്ടായ്മ സംഘടിപ്പിക്കാൻ തീരുമാനിച്ചത്. സമൂഹത്തെ കാർന്നു തിന്നുന്ന വിപത്തായ ലഹരി ഉപയോഗം മൂലം കോഴിക്കോട് റൂറൽ ജില്ലയിൽ മാത്രം നിരവധി വിലപ്പെട്ട ജീവനുകൾ നഷ്ടപ്പെടുകയും അക്രമ സംഭവങ്ങൾ വർധിക്കുകയും കുഞ്ഞുങ്ങൾ അടക്കമുള്ളവർ അതിന്റെ ദുരന്ത ഫലം അനുഭവിക്കേണ്ടി വരികയും ചെയ്ത സാഹചര്യത്തിൽ കോഴിക്കോട് റൂറൽ പോലീസ് നടത്തിയ ഓപ്പറേഷൻ ഡി -ഹണ്ടിൻ്റെ ഭാഗമായി 408 കേസുകൾ രജിസ്റ്റർ ചെയ്യുകയും 425 ഓളം പ്രതികളെ അറസ്റ്റ് ചെയ്യുകയും ചെയ്തു. കൂടാതെ ഈ ഓപ്പറേഷനിലൂടെ 106.354 ഗ്രാംഎം ഡി എം എയും 15688.35 ഗ്രാം കഞ്ചാവും 343 ഓളം കഞ്ചാവ് ബീഡികളും 14.77 ഗ്രാം മെത്താഫെറ്റമിനും 1.8 ഗ്രാം ബൗൺഷുഗറും അഞ്ചോളം നൈട്രാസിപ്പാം ടാബ്ലറ്റ്സും അടക്കമുള്ള മാരക ലഹരി വസ്തുക്കളും ഒരു കഞ്ചാവ് ചെടിയും പിടിച്ചെടുത്തു. സ്ഥിരം ലഹരി വിൽപ്പനക്കാരായ കുറ്റവാളികളെ നിയമത്തിനു മുൻപിൽ കൊണ്ടുവരാനും കാപ്പ അടക്കമുള്ള വകുപ്പുകൾ ചുമത്തി ജയിലിൽ അടയ്ക്കാനും നാടുകടത്താനും വേണ്ട നടപടികളും ഈ കാലയളവിൽ ഊർജിതമാക്കി.&nbsp;
കോഴിക്കോട് റൂറൽ ജില്ലാ പോലീസിന്റെ നേതൃത്വത്തിൽ സംഘടിപ്പിച്ച ജനകീയ പ്രതിരോധ കൂട്ടായ്മയിൽ ജനമൈത്രി സുരക്ഷ പദ്ധതി, സ്റ്റുഡൻ്റ് പോലീസ് കേഡറ്റ്സ്, ഹോപ്പ് പ്രൊജക്ട് വിദ്യാർത്ഥികൾ, ആശാ വർക്കർമാർ, എസ്.സി.എസ്.ടി മോണിറ്ററിംഗ് കമ്മിറ്റി പ്രവർത്തകർ, റസിഡന്റ്സ് അസോസിയേഷൻ അംഗങ്ങൾ, കുടുംബശ്രീ, തൊഴിലുറപ്പ് പ്രവർത്തകർ, ലഹരിവിരുദ്ധ കൂട്ടായ്‌മ പ്രവർത്തകർ, ജനപ്രതിനിധികൾ, പൊതുജനങ്ങൾ തുടങ്ങിയവർ പങ്കെടുത്തു. സ്റ്റുഡൻ്റ്സ് പോലീസ് കേഡറ്റ്സിൻ്റെ സംഗീത ശിൽപ്പവും അവതരിപ്പിച്ചു. കണ്ണൂർ റെയ്ഞ്ച് ഡെപ്യൂട്ടി ഇൻസ്പെക്ടർ ജനറൽ ഓഫ് പോലീസ് യതീഷ് ചന്ദ്ര.ജി.എച്ച് ഐ പി എസ് പരിപാടി ഉദ്ഘാടനം ചെയ്തു. താമരശ്ശേരി പരപ്പൻപൊയിൽ ഹൈലാന്റ് കൺവെൻഷൻ സെൻ്ററിൽ നടന്ന പരിപാടിയിൽ തിരുവമ്പാടി എം.എൽ.എ ലിൻ്റോ ജോസഫ്, കൊടുവള്ളി, മുക്കം മുനിസിപ്പൽ ചെയർമാൻമാർ, പഞ്ചായത്ത് പ്രസിഡൻ്റ്മാർ, മറ്റു ജനപ്രതിനിധികൾ എന്നിവർ പങ്കെടുത്തു.&nbsp;&nbsp;

ലഹരി വസ്തുക്കളുടെ ഉപയോഗത്തിനെതിരെ ജനകീയ പ്രതിരോധ കൂട്ടായ്മ സംഘടിപ്പിച്ച് കോഴിക്കോട് റൂറൽ ജില്ലാ പോലീസ്

കനത്ത ചൂടിൽ വെന്തുരുകുകയാണ് കേരളം. ഉഷ്‌ണം വർദ്ധിച്ചതോടെ പഴങ്ങളും തണുത്ത ഭക്ഷണ വിഭവങ്ങളും കഴിക്കാനാണ് കൂടുതൽ പേരും ഇഷ്ടപ്പെടുന്നത്. ജലാംശം ധാരാണമുള്ള പഴവർഗങ്ങളായ തണ്ണിമത്തൻ, പൈനാപ്പിൾ, ഓറഞ്ച് തുടങ്ങിയവയ്ക്കാണ് ഇപ്പോൾ ആവശ്യക്കാരേറെ. ഡിമാൻഡ് കൂടിയതോടെ തട്ടിപ്പുകാരും രംഗത്തിറങ്ങിയിട്ടുണ്ട്. പാകമാകാത്ത പഴവർഗങ്ങളിൽ മരുന്ന് കുത്തിവച്ചും മറ്റ് തട്ടിപ്പ് മാർഗങ്ങളിലൂടെ പഴുപ്പിച്ചും വിപണിയിലെത്തിക്കുന്ന പ്രവണത വർദ്ധിക്കുകയാണ്.കൃത്യമായി പഴുത്തവയെ കണ്ടെത്താൻ ചില കാര്യങ്ങൾ ശ്രദ്ധിക്കേണ്ടതുണ്ട്. കൃത്യമായി പഴുത്ത പൈനാപ്പിളും തണ്ണിമത്തനും കണ്ടെത്താൻ ചില സൂത്രങ്ങളുണ്ട്.പൈനാപ്പിൾ വാങ്ങുമ്പോൾ ഇനിമുതൽ&nbsp;
ഇക്കാര്യങ്ങൾ ശ്രദ്ധിക്കാം:
<ul>
<li>പൈനാപ്പിൾ പഴുത്തതാണോയെന്ന് അറിയാനുള്ള ഏറ്റവും എളുപ്പമാർഗം അതിന്റെ നിറമാണ്. അധികം പച്ചനിറമില്ലാത്ത സ്വർണ നിറത്തിലെ പൈനാപ്പിൾ കണ്ടാൽ അവ പഴുത്തതാണെന്ന് ഉറപ്പിക്കാം.</li>
<li>പൈനാപ്പിളിന്റെ പുറംതോടിൽ അമർത്തി നോക്കുക. പഴുത്തതാണെങ്കിൽ പുറംതോട് മൃദുലമായിരിക്കും. പഴുക്കാത്തവയുടെ പുറംതോടിന് നല്ല കട്ടിയുണ്ടായിരിക്കും.</li>
<li>പഴുത്ത പൈനാപ്പിളിന്റെ അടിവശത്ത് നല്ല മണമുണ്ടായിരിക്കും.</li>
<li>ഭാരക്കൂടുതലുള്ള പൈനാപ്പിൾ പഴുത്തതായിരിക്കും.</li>
<li>പൈനാപ്പിളിന്റെ മുകളിലത്തെ ഇല എളുപ്പത്തിൽ പറിച്ചെടുക്കാൻ കഴിയുന്നുണ്ടെങ്കിൽ അവ പഴുത്തതായിരിക്കും.</li>
</ul>

നന്നായി പഴുത്ത പൈനാപ്പിൾ കണ്ടെത്താൻ ചില സൂത്രങ്ങളുണ്ട്

നാദാപുരം: കേന്ദ്ര ഗസർക്കാർ പാസാക്കിയ വഖഫ് ഭേദഗതി നിയമം വംശഹത്യ പദ്ധതിയാണെന്നും ഇതിനെതിരെ മതേതര സമൂഹം ഒറ്റക്കെട്ടായി പ്രതികരിക്കണമെന്നും വെൽഫെയർ പാർട്ടി ജില്ലാ വൈസ് പ്രസിഡൻറ് ഷംസുദ്ദീൻ ചെറുവാടി ആവശ്യപ്പെട്ടു. 'വഖഫ് ഭേദഗതി നിയമം വംശഹത്യാ പദ്ധതി' എന്ന പ്രമേയത്തിൽ വെൽഫെയർ പാർട്ടി മണ്ഡലം കമ്മിറ്റി സംഘടിപ്പിച്ച പ്രതിഷേധ സംഗമം ഉദ്ഘാടനം ചെയ്യുകയായിരുന്നു അദ്ധേഹം. മണ്ഡലം പ്രസിഡണ്ട് കളത്തിൽ അബ്ദുൽ ഹമീദ് അധ്യക്ഷത വഹിച്ചു.
ടി.കെ മമ്മു,പി ആയിശ, ഒ മുജീബ് എന്നിവർ പ്രസംഗിച്ചു. പ്രകടനത്തിന് ജലീൽ നാമത്ത്, ആർ കെ ഹമീദ്, എം എ വാണിമേൽ, പൊയിൽ സൂപ്പി, യുകെ ഹമീദ്, പി. കെ. ബഷീർ, എ സി കുഞ്ഞബ്ദുള്ള, പി സുലൈഖ തുടങ്ങിയവർ നേതൃത്വം നൽകി.

വഖഫ് ഭേദഗതി നിയമം വംശഹത്യ പദ്ധതി; ഷംസുദ്ദീൻ ചെറുവാടി

Nadapuram

ന്യൂഡൽഹി: വിമാനം ലാൻഡ് ചെയ്തതിന് പിന്നാലെ ഹൃദയാഘാതം മൂലം എയർ ഇന്ത്യ എക്സ്പ്രസ് പൈലറ്റ് മരിച്ചു. ശ്രീനഗറിൽ നിന്നുള്ള വിമാനം ഡൽഹിയിൽ ലാൻഡ് ചെയ്തതിന് പിന്നാലെ പൈലറ്റിന് ഹൃദയാഘാതമുണ്ടാകുകയായിരുന്നു. വിമാനം സുരക്ഷിതമായി ലാൻഡ് ചെയ്തതിന് ശേഷമായിരുന്നു സംഭവം.
വിമാനം ലാൻഡ് ചെയ്തതിന് പിന്നാലെ പൈലറ്റിന് ശാരീരിക അസ്വസ്ഥതകൾ ഉണ്ടാകുകയായിരുന്നു. കാബിനിനുള്ളിൽ ഛർദിച്ച പൈലറ്റിനെ ഉടൻ തന്നെ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. ജീവനക്കാരന്റെ മരണത്തിൽ എയർ ഇന്ത്യ ദുഃഖം രേഖപ്പെടുത്തി. ഇതുമായി ബന്ധപ്പെട്ട് അന്വേഷണം ആരംഭിച്ചിട്ടുണ്ട്. അധികൃതരുമായി ചേർന്ന് പൈലറ്റിന്റെ കുടുംബാംഗങ്ങൾക്ക് സാധ്യമായ സഹായമെല്ലാം ചെയ്യുമെന്നും വിമാന കമ്പനി അറിയിച്ചു.

വിമാനം ലാൻഡ് ചെയ്തതിന് പിന്നാലെ ഹൃദയാഘാതം ;പൈലറ്റ് മരിച്ചു

National

കോഴിക്കോട്: തെക്ക് പടിഞ്ഞാറൻ ബംഗാൾ ഉൾക്കടലിന് മുകളിൽ രൂപപ്പെട്ട ന്യൂനമർദ്ദം ശക്തി കൂടിയ ന്യുനമർദ്ദമായി മാറിയതായി കേന്ദ്ര കാലാവസ്ഥാ വിഭാഗം അറിയിച്ചു. അടുത്ത 24 മണിക്കൂർ വടക്ക് - വടക്ക് പടിഞ്ഞാറ് ദിശയിൽ മധ്യ പടിഞ്ഞാറൻ ബംഗാൾ ഉൾക്കടലിനു മുകളിലൂടെ സഞ്ചരിക്കുന്ന ന്യൂനമർദ്ദം തുടർന്നുള്ള 24 മണിക്കൂറിൽ വടക്ക് -വടക്കു കിഴക്ക് ദിശയിൽ സഞ്ചരിച്ച് ശക്തി കുറയാനാണ് സാധ്യത.
ന്യൂനമർദത്തിന്‍റെ ഫലമായി കേരളത്തിൽ അടുത്ത അഞ്ച് ദിവസം ഇടിമിന്നലോടു കൂടിയ നേരിയ / ഇടത്തരം മഴക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. അതേസമയം, കേരളത്തിൽ പ്രത്യേക മഴമുന്നറിയിപ്പുകളൊന്നും നിലവിൽ നൽകിയിട്ടില്ല.

ബംഗാൾ ഉൾക്കടലിൽ ന്യൂനമർദ്ദം ശക്തിപ്രാപിച്ചു; കേരളത്തിൽ അഞ്ച് ദിവസം മഴക്ക് സാധ്യത

കോഴിക്കോട്: വെര്‍ച്വല്‍ അറസ്റ്റ് തട്ടിപ്പ് വീണ്ടും. തട്ടിപ്പിനിരയായ കോഴിക്കോട് എലത്തൂര്‍ സ്വദേശിയായ 83-കാരന് 8,80,000 രൂപ നഷ്ടമായി. പണം എത്തിയത് തെലങ്കാനയിലുള്ള ഒരു അക്കൗണ്ടിലേക്കാണ് എന്ന് പോലീസ് കണ്ടെത്തിയിട്ടുണ്ട്. സംഭവത്തില്‍ എലത്തൂര്‍ പൊലീസ് കേസ് രജിസ്റ്റര്‍ ചെയ്തു.
തട്ടിപ്പിനിരയാക്കപ്പെട്ട വ്യക്തി നേരത്തെ മുംബൈയില്‍ ജോലിചെയ്തിരുന്നു. ആ സമയത്ത് ഗുരുതരമായ കുറ്റകൃത്യം ചെയ്തിട്ടുണ്ടെന്നും കേസ് തീര്‍ക്കാന്‍ ബാങ്ക് രേഖകള്‍ അയച്ചുതരണമെന്നുമാണ് ഇദ്ദേഹത്തെ വിളിച്ചയാള്‍ ആവശ്യപ്പെട്ടത്.മുംബൈ സൈബര്‍ ക്രൈമിന്റെ ഡെപ്യൂട്ടി കമ്മിഷണര്‍ എന്നാണ് വിളിച്ചയാള്‍ സ്വയം പരിചയപ്പെടുത്തിയിരുന്നത്. തുടര്‍ന്ന് ബാങ്ക് രേഖകള്‍ കൈക്കലാക്കിയ സംഘം പണം അപഹരിക്കുകയായിരുന്നു.

വെര്‍ച്വല്‍ അറസ്റ്റ് തട്ടിപ്പ് ;എലത്തൂര്‍ സ്വദേശിക്ക് നഷ്ടമായത് 8,80,000 രൂപ

തൃശ്ശൂര്‍: ഗുരുവായൂരപ്പന് വഴിപാട് സമര്‍പ്പണമായി സ്വര്‍ണക്കിരീടം. 36 പവന്‍ (288.5 ഗ്രാം) തൂക്കം വരുന്ന സ്വര്‍ണക്കിരീടം സമര്‍പ്പിച്ചത് തമിഴ്‌നാട് കല്ലാക്കുറിച്ചി സ്വദേശിയായ കുലോത്തുംഗന്‍ എന്ന ഭക്തനാണ്. കഴിഞ്ഞ ദിവസം രാവിലെ ഒന്‍പത് മണിയോടെ കൊടിമരത്തിന് സമീപം നടന്ന ചടങ്ങിലായിരുന്നു സമര്‍പ്പണം.
ദേവസ്വം ചെയര്‍മാന്‍ ഡോ. വി.കെ. വിജയന്‍ കിരീടം ഏറ്റുവാങ്ങി. അഡ്മിനിസ്‌ട്രേറ്റര്‍ കെ.പി. വിനയന്‍, ക്ഷേത്രം ഡെപ്യൂട്ടി അഡ്മിനിസ്‌ട്രേറ്റര്‍ പ്രമോദ് കളരിക്കല്‍, ക്ഷേത്രം അസി. മാനേജര്‍മാരായ കെ.രാമകൃഷ്ണന്‍, കെ.കെ.സുഭാഷ്, സി.ആര്‍. ലെജുമോള്‍, വഴിപാടുകാരനായ കുലോത്തുംഗന്റെ ഭാര്യ രേണുകാദേവി, മക്കള്‍ എന്നിവര്‍ സന്നിഹിതരായി.സമര്‍പ്പണശേഷം ദര്‍ശനം കഴിഞ്ഞുവന്ന കുലോത്തുംഗനും കുടുംബത്തിനും കളഭം, കദളിപ്പഴം, പഞ്ചസാര, ചാര്‍ത്തിയ തിരുമുടിമാല, പട്ട് എന്നിവ അടങ്ങിയ ശ്രീഗുരുവായൂരപ്പന്റെ പ്രസാദകിറ്റ് നല്‍കി.

ഗുരുവായൂരപ്പന് വഴിപാടായി 36 പവന്റെ സ്വര്‍ണക്കിരീടം

കോഴിക്കോട്‌: ചക്കിട്ടപ്പാറയില്‍ പുലിയുടെ സാന്നിധ്യം. സ്ഥലത്ത്‌ ആടിനെ പുലി കൊന്നനിലയിൽ കണ്ടെത്തി. പൂഴിത്തോട് മാവട്ടത്ത് ബുധനാഴ്ച രാത്രിയാണ് പുലി പകുതി ഭക്ഷിച്ച നിലയിലാണ് ആടിനെ കണ്ടെത്തിയത്. ഷെഡില്‍ കെട്ടിയിരുന്ന ആടിനെ പുലി പിടിക്കുകയാണെന്ന്‌ നാട്ടുകാർ പറയുന്നു.
കഴിഞ്ഞ ജനുവരിയിൽ സ്ഥലത്ത്‌ പുലിയുടെ സാന്നിധ്യം സ്ഥിരീകരിച്ചിരുന്നു. വീണ്ടും പുലിയുടെ സാന്നിധ്യം സ്ഥിരീകരിച്ചതോടെ വനം വകുപ്പ് സ്ഥലത്ത്‌ കൂട് സ്ഥാപിച്ചിട്ടുണ്ട്‌.

ചക്കിട്ടപ്പാറയില്‍ പുലിയുടെ സാന്നിധ്യം ;ആടിനെ കൊന്ന നിലയിൽ

കോട്ടയം : സർക്കാർ നഴ്സിങ് കോളജിലെ റാഗിങ് കേസിൽ പ്രതികൾക്ക് ജാമ്യം. കോട്ടയം ജില്ലാ സെഷൻസ് കോടതിയാണ് പ്രതികൾക്ക് ജാമ്യം നൽകിയത്. 50 ദിവസത്തിലേറെയായി ജയിലിൽ കിടക്കുന്ന വിദ്യാർഥികളുടെ പ്രായമടക്കം പരിഗണിച്ച് ജാമ്യം നൽകണമെന്നായിരുന്നു പ്രതിഭാഗത്തിന്റെ വാദം.
സിപിഎം അനുകൂല സംഘടനയായ കേരള ഗവ. സ്റ്റുഡന്റ് നഴ്സസ് അസോസിയേഷൻ (കെജിഎസ്എൻഎ) സംസ്ഥാന സെക്രട്ടറി വണ്ടൂർ കരുമാറപ്പറ്റ കെ.പി.രാഹുൽ രാജ് (22),‌ മൂന്നിലവ് വാളകം കരയിൽ കീരിപ്ലാക്കൽ വീട്ടിൽ സാമുവൽ ജോൺസൺ (20), നടവയലിൽ പുൽപ്പള്ളി ഞാവലത്ത് എൻ.എസ്.ജീവ (19), മഞ്ചേരി പയ്യനാട് കച്ചേരിപ്പടി വീട്ടിൽ സി.റിജിൽ ജിത്ത് (20), കോരിത്തോട് മടുക്ക നെടുങ്ങാട്ട് എൻ.വി.വിവേക് (21) എന്നിവർക്കാണ് കോടതി ജാമ്യം അനുവദിച്ചത്.&nbsp;
പ്രതികൾക്കെതിരെ ഭാരത നിയമ സംഹിതയിലെ 118–ാം വകുപ്പ് (ആയുധം ഉപയോഗിച്ചുള്ള ദേഹോപദ്രവം), 308 (2) (ഭീഷണിപ്പെടുത്തി പണമോ വിലപിടിപ്പുള്ളതോ അപഹരിക്കുക), 351 (1) (കൊന്നു കളയുമെന്ന് ഭീഷണിപ്പെടുത്തുക) എന്നിവയും റാഗിങ് നിരോധന നിയമത്തിലെ വകുപ്പുകളും ചേർത്താണ് പൊലീസ് കേസ് എടുത്തത്. കഴിഞ്ഞ നവംബർ 4 മുതലായിരുന്നു കോട്ടയം സർക്കാർ നഴ്സിങ് കോളജ് ഹോസ്റ്റലിൽ വിദ്യാർഥികൾ ക്രൂര റാഗിങ്ങിനു ഇരയായത്.

കോട്ടയം നഴ്സിങ് കോളജ് റാഗിങ്: പ്രതികൾക്ക് ജാമ്യം, തീരുമാനം വിദ്യാർഥികളുടെ പ്രായം പരിഗണിച്ച്

വന്‍ കുതിപ്പില്‍ സ്വര്‍ണം. സംസ്ഥാനത്ത് വ്യാഴാഴ്ച മാത്രം കൂടിയത് 2,160 രൂപ. ഇതോടെ പവന്റെ വില 68,480 രൂപയായി. 66,320 രൂപയായിരുന്നു കഴിഞ്ഞ ദിവസത്തെ വില. ഇതോടെ രണ്ട് ദിവസത്തിനിടെ 2680 രൂപയാണ് കൂടിയത്. 8560 രൂപയാണ് ഗ്രാമിന്.
അപ്രതീക്ഷിതമായി സ്വര്‍ണത്തിന് ഡിമാന്റ് കൂടിയതാണ് വിലയിലെ കുതിപ്പിന് പിന്നില്‍. വിവിധ രാജ്യങ്ങള്‍ക്ക് ചുമത്തിയ തീരുവ താത്കാലികമായി നിര്‍ത്തിവെയ്ക്കാന്‍ തീരുമാനിച്ചെങ്കിലും ചൈനയുടേത് വന്‍തോതില്‍ വര്‍ധിപ്പിച്ചതാണ് പെട്ടെന്നുള്ള ഡിമന്റ് വര്‍ധനയ്ക്ക് പിന്നില്‍.രാജ്യാന്തര വിപണിയില്‍ സ്‌പോട് ഗോള്‍ഡ് വില ട്രോയ് ഔണ്‍സിന് 3,089.17 ഡോളറിലെത്തി. ഗോള്‍ഡ് ഫ്യൂച്ചേഴ്‌സ് വില 3,167 ഡോളര്‍ നിലവാരത്തിലാണ്.

സ്വര്‍ണവില എഴുപത്തിനായിരത്തിലേക്ക് ;പവന് 2,160 രൂപ കൂടി 68,480 രൂപയായി

മലപ്പുറം : ചട്ടിപ്പറമ്പിലെ വീട്ടിൽ അഞ്ചാം പ്രസവം നടത്തിയ യുവതി മരിച്ച സംഭവത്തില്‍ ഒരാൾ കൂടി പൊലീസ് കസ്റ്റഡിയിൽ. അസ്മയുടെ പ്രസവം എടുക്കാൻ സഹായിച്ച സ്ത്രീയെയാണ് പൊലീസ് കസ്റ്റഡിയിലെടുത്തത്. ഒതുക്കുങ്ങൽ സ്വദേശി ഫാത്തിമയാണ് മലപ്പുറം പൊലീസിന്റെ കസ്റ്റഡിയിലായത്. സംഭവത്തില്‍ അസ്മയുടെ ഭർത്താവ് സിറാജുദ്ദീനെ നേരത്തെ പൊലീസ് അറസ്റ്റ് ചെയ്തിരുന്നു.&nbsp;
വീട്ടില്‍ വച്ച് പ്രസവിക്കുന്നതിന് ഭാര്യ അസ്മയെ നിര്‍ബന്ധിച്ചുവെന്നാണ് സിറാജുദ്ദീനെതിരായ കുറ്റം. പ്രസവത്തില്‍ അസ്മ മരിച്ചതിനാല്‍ നരഹത്യയും പിന്നീട് തെളിവ് നശിപ്പിച്ചതിനാല്‍ ഈ കുറ്റവും സിറാജുദ്ദീനെതിരെ ചുമത്തിയിട്ടുണ്ട്. അസ്മയുടെ നേരത്തെയുള്ള നാലു പ്രസവത്തില്‍ രണ്ടു പ്രസവം വീട്ടിലാണ് നടന്നത്. പ്രസവശേഷം വൈദ്യസഹായം ലഭിക്കാതെ രക്തം വാര്‍ന്നാണ് യുവതി മരിച്ചതെന്നാണ് പോസ്റ്റ്മോര്‍ട്ടം റിപ്പോര്‍ട്ടിലെ കണ്ടെത്തല്‍.&nbsp;

അസ്മയുടെ മരണം;പ്രസവം എടുക്കാൻ സഹായിച്ച സ്ത്രീ കസ്റ്റഡിയിൽ

ബേസിൽ ജോസഫ് നായകനായെത്തുന്ന 'മരണമാസ് ' എന്ന ചിത്രം സൗദി അറേബ്യയിൽ നിരോധിച്ചു. സിനിമയുടെ കാസ്റ്റിൽ ട്രാൻസ്‌ജെൻഡർ വ്യക്തിയും ഉൾപ്പെട്ടതിനാലാണ് ചിത്രം നിരോധിച്ചിരിക്കുന്നത്. അതേസമയം കുവൈറ്റിൽ ട്രാൻസ്‌ജെൻഡർ താരം അഭിനയിച്ച ഭാഗങ്ങൾ വെട്ടി മാറ്റി പ്രദർശിപ്പിക്കാൻ സെൻസർ ബോർഡ് ആവശ്യപ്പെട്ടു.
"കുവൈറ്റിൽ മരണമാസ്സ് കാണുന്ന പ്രേക്ഷകരോട്- കുവൈറ്റിലെ സെൻസർ നിയമപ്രകാരം സിനിമയിലെ ഫസ്റ്റ് ഹാഫിലെയും സെക്കൻഡ് ഹാഫിലെയും ചില സീനുകൾ കട്ട് ചെയ്ത് കളയേണ്ടി വന്നിട്ടുണ്ട്. എഡിറ്റ് ചെയ്‌ത സീനുകളിലെ കല്ലുകടികൾ പൂർണമായി സിനിമാ ആസ്വാദനത്തെ ബാധിക്കുകയില്ല എന്ന് കരുതുന്നു. എല്ലാവരും സിനിമ തീയേറ്ററുകളിൽ തന്നെ കാണുക..", എന്നാണ് മരണമാസ്സ്‌ ടീം സോഷ്യൽ മീഡിയയിൽ കുറിച്ചത്.
അതേസമയം ചിത്രത്തിന് ഇന്ത്യയിൽ യു/ എ സർട്ടിഫിക്കറ്റാണ് നൽകിയിരിക്കുന്നത്. ടൊവിനോ പ്രൊഡക്ഷൻ ,​ റാഫേൽ ഫിലിം പ്രോഡക്ഷൻസ്,​ വേൾഡ് വൈഡ് ഫിലിംസ് എന്നിവയുടെ ബാനറുകളിൽ ടൊവിനോ തോമസ്,​ റാഫേൽ പൊഴോലിപറമ്പിൽ,​ ടിങ്സ്റ്റൺ തോമസ്,​ തൻസീർ സലാം എന്നിവർ ചേർന്നാണ് ചിത്രം നിർമ്മിച്ചത്.

ബേസിൽ ജോസഫ് ചിത്രം 'മരണമാസ് ' സൗദിയിൽ നിരോധിച്ചു

Gulf

തിരുവനന്തപുരം: ആര്യനാട് കൊക്കോട്ടേലയിൽ വീടിനുള്ളിൽ വയോധികയുടെ മൃതദേഹം കണ്ടെത്തി. പൂച്ചപ്പാറ കളത്തിൽ വീട്ടിൽ സതികുമാരിയുടെ (65) മൃതദേഹമാണ് അഴുകിയ നിലയിൽ കണ്ടെത്തിയത്. കൊക്കോട്ടേലയിൽ നിന്നും ഇഞ്ചപ്പുരിക്ക് പോകുന്ന വഴിയിൽ കോരപ്പറമ്പ് എന്ന സ്ഥലത്തെ വീട്ടിലാണ് ഇവർ താമസിച്ചിരുന്നത്. വീട് പുതുക്കിപ്പണിയുന്നതിനാൽ ബോംബെയിൽ താമസിക്കുന്ന സഹോദരിയുടെ കൊക്കോട്ടല ജംഗ്ഷന് സമീപമുള്ള വീട്ടിലായിരുന്നു ഒറ്റയ്ക്ക് താമസിച്ചിരുന്നത്. സതികുമാരിക്ക് ശ്വാസകോശ സംബന്ധ അസുഖം ഉണ്ടായിരുന്നുവെന്നാണ് റിപ്പോർട്ട്.
കഴിഞ്ഞ നാല് ദിവസങ്ങൾക്ക് മുൻപ് ഇവരെ പ്രദേശത്ത് കണ്ടതായി അയൽവാസികൾ പറയുന്നു. ഇന്നലെ വെെകുന്നേരം വീട്ടിൽ നിന്ന് ദുർഗന്ധം വമിക്കുകയും ഈച്ചകളെയും കണ്ടതിനാൽ അയൽവാസികൾ നടത്തിയ പരിശോധനയിൽ വീട്ടിനുള്ളിൽ ലെെറ്റുകൾ തെളിഞ്ഞ നിലയിൽ കണ്ടത്. ഇതോടെ വീടിനകത്ത് ആളുണ്ടായിരുന്നുവെന്ന സംശയമുയർന്നു. പിന്നാലെ നാട്ടുകാർ വാർഡ് മെമ്പറെയും പൊലീസിനെയും വിവരം അറിയിക്കുകയായിരുന്നു. പൊലീസ് സ്ഥലത്തെത്തിയ വീട് തുറന്നപ്പോഴാണ് അഴുകിയ നിലയിൽ വയോധികയുടെ മൃതദേഹം കണ്ടെത്തിയത്. മൃതദേഹത്തിന് നാല് ദിവസത്തോളം പഴക്കമുണ്ടെന്ന് പൊലീസ് പറഞ്ഞു.

ഒറ്റയ്ക്ക് താമസിച്ചിരുന്ന വയോധികയുടെ മൃതദേഹം അഴുകിയ നിലയിൽ കണ്ടെത്തി

കൊച്ചി: പാതിവില തട്ടിപ്പ് കേസിൽ കോൺഗ്രസ് നേതാവ് ലാലി വിൻസെന്റിനെ ക്രെെംബ്രാഞ്ച് ചോദ്യം ചെയ്തു. തൃപ്പൂണിത്തുറ ക്രെെംബ്രാഞ്ച് ഓഫീസിലേക്ക് വിളിച്ചുവരുത്തിയാണ് ലാലിയെ ചോദ്യം ചെയ്തത്. തട്ടിപ്പിൽ മുഖ്യപ്രതി അനന്തു കൃഷ്ണന് മാത്രമല്ല എൻജിഒ കോൺഫെഡറേഷന്റെ മറ്റ് ഭാരവാഹികൾക്കും പങ്കുണ്ടെന്ന തരത്തിലാണ് ലാലി മൊഴി നൽകിയതെന്നാണ് സൂചന.&nbsp;
കേസിൽ കൂടുതൽ ആളുകളെ ചോദ്യം ചെയ്യുമെന്ന് ക്രെെംബ്രാഞ്ച് അറിയിച്ചു.എന്നാൽ തന്നെ ചോദ്യം ചെയ്യലിന് വിളിച്ചുവരുത്തിയിട്ടില്ലെന്നും തന്റെ ആവശ്യപ്രകാരം അന്വേഷണസംഘം തന്റെ മൊഴിയെടുക്കുകയായിരുന്നുവെന്നുമാണ് ലാലി ഒരു മാധ്യമത്തോട് പ്രതികരിച്ചത്. എറണാകുളത്ത് നിന്നുള്ള എഐസിസി അംഗമായ ലാലി ഗുജറാത്തിലെ എഐസിസി സമ്മേളനം ഒഴിവാക്കിയാണ് ചോദ്യം ചെയ്യലിന് ഹാജരായത്.

പാതിവില തട്ടിപ്പ് കേസ് ;ലാലി വിൻസെന്റിനെ ക്രെെംബ്രാഞ്ച് ചോദ്യം ചെയ്തു

കാസര്‍കോട് : മുന്‍വര്‍ഷത്തെ അപേക്ഷിച്ച് ഇത്തവണ വേനല്‍മഴയും ഇടിമിന്നലും കാറ്റും കൂടുതലാണ്. ഇടിമിന്നല്‍ മനുഷ്യന്റെയും മൃഗങ്ങളുടെയും ജീവഹാനിക്കും വൈദ്യുത-ആശയവിനിമയ ശൃംഖലകള്‍ക്കും വൈദ്യുതചാലകങ്ങളുമായി ബന്ധിപ്പിച്ചിട്ടുള്ള വീട്ടുപകരണങ്ങള്‍ക്കും നാശത്തിനും കാരണമാകുന്നുണ്ട്. ഈ സാഹചര്യത്തില്‍ മിന്നലിനെതിരേ ജാഗ്രത പാലിക്കണമെന്ന് കാലാവസ്ഥാവകുപ്പും ദുരന്തനിരാവരണ അതോറിറ്റിയും മുന്നറിയിപ്പ് നല്‍കിയിട്ടുണ്ട്
കാര്‍മേഘം കണ്ടുതുടങ്ങുന്ന സമയംമുതല്‍തന്നെ മുന്‍കരുതലെടുക്കണം. ഇടിമിന്നല്‍ എപ്പോഴും ദൃശ്യമാകണമെന്നില്ലാത്തതിനാല്‍ ഇക്കാര്യത്തില്‍ ഉപേക്ഷ പാടില്ല. ഇടിമിന്നല്‍ സാധ്യത മനസ്സിലാക്കാന്‍ കേന്ദ്രകാലാവസ്ഥാവകുപ്പ് തയ്യാറാക്കിയിട്ടുള്ള 'ദാമിനി (damini)' മൊബൈല്‍ ആപ്ലിക്കേഷന്‍ ഉപയോഗിക്കാം.
പ്രഥമശുശ്രൂഷ നല്‍കാന്‍മടിക്കരുത്
മിന്നലിന്റെ ആഘാതത്താല്‍ പൊള്ളല്‍ ഏല്‍ക്കുകയോ കാഴ്ചയോ കേള്‍വിയോ നഷ്ടമാവുകയോ ഹൃദയാഘാതം സംഭവിക്കുകയോ വരെ ചെയ്യാം. മിന്നലാഘാതം ഏറ്റ ആളിന്റെ ശരീരത്തില്‍ വൈദ്യുതപ്രവാഹമുണ്ടാകില്ല. അതിനാല്‍ പ്രഥമശുശ്രൂഷ നല്‍കാന്‍ മടിക്കരുത്. മിന്നല്‍ ഏറ്റാല്‍ ആദ്യ മുപ്പത് സെക്കന്‍ഡ് ജീവന്‍ രക്ഷിക്കാനുള്ള സുവര്‍ണ നിമിഷങ്ങളാണ്. ഉടന്‍ വൈദ്യസഹായം എത്തിക്കാനും ശ്രദ്ധിക്കണം.
ഇക്കാര്യങ്ങള്‍ ശ്രദ്ധിക്കാം
<ul>
<li>ഇടിമിന്നലിന്റെ ആദ്യ ലക്ഷണം കണ്ടുകഴിഞ്ഞാലുടന്‍ സുരക്ഷിതമായ കെട്ടിടത്തിനുള്ളിലേക്ക് മാറുക. തുറസ്സായ സ്ഥലങ്ങളില്‍ തുടരുന്നത് ഇടിമിന്നലേല്‍ക്കാനുള്ള സാധ്യത കൂട്ടും.</li>
<li>ശക്തമായ കാറ്റിനും ഇടിമിന്നലിനും സാധ്യതയുള്ള ഘട്ടത്തില്‍ ജനലും വാതിലും അടച്ചിടുക. വാതിലിനും ജനലിനും അടുത്ത് നില്‍ക്കരുത്. കെട്ടിടത്തിനകത്ത് തന്നെ ഇരിക്കുകയും പരമാവധി ഭിത്തിയിലോ തറയിലോ സ്പര്‍ശിക്കാതിരിക്കാന്‍ ശ്രദ്ധിക്കുകയും വേണം.</li>
<li>ഗൃഹോപകരണങ്ങളുടെ വൈദ്യുതിബന്ധം വിച്ഛേദിക്കുക. വൈദ്യുതോപകരണങ്ങളുമായുള്ള സാമീപ്യം ഇടിമിന്നലുള്ള സമയത്ത് ഒഴിവാക്കുക.</li>
<li>ഇടിമിന്നലുള്ള സമയത്ത് ടെലിഫോണ്‍ ഉപയോഗിക്കുന്നത് ഒഴിവാക്കണം. മൊബൈല്‍ഫോണ്‍ ഉപയോഗിക്കുന്നതുകൊണ്ട് കുഴപ്പമില്ല.</li>
<li>അന്തരീക്ഷം മേഘാവൃതമാണെങ്കില്‍ തുറസ്സായ സ്ഥലത്തും ടെറസിലും കുട്ടികള്‍ ഉള്‍പ്പെടെ കളിക്കുന്നത് ഒഴിവാക്കുക.</li>
<li>വൃക്ഷങ്ങളുടെ ചുവട്ടില്‍ നില്‍ക്കരുത്. വാഹനങ്ങള്‍ മരച്ചുവട്ടില്‍ പാര്‍ക്ക് ചെയ്യുകയുമരുത്.</li>
<li>ഇടിമിന്നലുള്ള സമയത്ത് വാഹനത്തിനകത്ത് തന്നെ തുടരുക. കൈകാലുകള്‍ പുറത്തിടാതിരിക്കുക. വാഹനത്തിനകത്ത് നിങ്ങള്‍ സുരക്ഷിതരായിരിക്കും. സൈക്കിള്‍, ബൈക്ക്, ട്രാക്ടര്‍ തുടങ്ങിയ വാഹനങ്ങളിലുള്ള യാത്ര ഇടിമിന്നല്‍ സമയത്ത് ഒഴിവാക്കുകയും ഇടിമിന്നല്‍ അവസാനിക്കുന്നതുവരെ സുരക്ഷിതമായ ഒരു കെട്ടിടത്തില്‍ അഭയം തേടുകയും വേണം.</li>
<li>തുണികള്‍ എടുക്കാന്‍ ടെറസിലേക്കോ മുറ്റത്തേക്കോ ഇടിമിന്നലുള്ള സമയത്ത് പോകരുത്.</li>
<li>കാറ്റില്‍ മറിഞ്ഞുവീഴാന്‍ സാധ്യതയുള്ള വസ്തുക്കള്‍ കെട്ടിവെക്കുക.</li>
<li>കുളിക്കുന്നത് ഒഴിവാക്കുക. ടാപ്പുകളില്‍നിന്ന് വെള്ളം ശേഖരിക്കുന്നതും ഒഴിവാക്കുക. പൈപ്പിലൂടെ മിന്നല്‍ മൂലമുള്ള വൈദ്യുതി സഞ്ചരിച്ചേക്കാം.</li>
<li>ജലാശയത്തില്‍ മീന്‍പിടിക്കാനോ കുളിക്കാനോ ഇറങ്ങാന്‍ പാടില്ല. കാര്‍മേഘങ്ങള്‍ കണ്ട് തുടങ്ങുമ്പോള്‍ തന്നെ മത്സ്യബന്ധനം, ബോട്ടിങ് തുടങ്ങിയവ നിര്‍ത്തിവെച്ച് അടുത്തുള്ള കരയിലേക്ക് എത്താന്‍ ശ്രമിക്കണം. ഇടിമിന്നലുള്ള സമയത്ത് ബോട്ടിന്റെ ഡെക്കില്‍ നില്‍ക്കരുത്. ചൂണ്ടയിടുന്നതും വലയെറിയുന്നതും ഒഴിവാക്കണം.</li>
<li>പട്ടം പറത്തുന്നത് ഒഴിവാക്കുക.</li>
<li>ടെറസിലോ മറ്റ് ഉയരമുള്ള സ്ഥലങ്ങളിലോ വൃക്ഷക്കൊമ്പിലോ ഇരിക്കുന്നത് അപകടകരമാണ്.</li>
<li>വളര്‍ത്തുമൃഗങ്ങളെ തുറസ്സായ സ്ഥലത്ത് ഈ സമയത്ത് കെട്ടരുത്. അവയെ അഴിക്കാനും സുരക്ഷിതമായി മാറ്റിക്കെട്ടാനും മഴമേഘം കാണുന്ന സമയത്ത് പോകരുത്. ഇത് നിങ്ങള്‍ക്ക് ഇടിമിന്നലേല്‍ക്കാന്‍ കാരണമായേക്കാം.</li>
<li>അടുത്തുള്ള കെട്ടിടത്തിലേക്ക് മാറാന്‍ സാധിക്കാത്ത വിധത്തില്‍ തുറസ്സായ സ്ഥലത്താണങ്കില്‍ പാദങ്ങള്‍ ചേര്‍ത്തുവെച്ച് തല, കാല്‍മുട്ടുകള്‍ക്ക് ഇടയില്‍ ഒതുക്കി പന്തുപോലെ ഉരുണ്ട് ഇരിക്കുക.</li>
<li>ഇടിമിന്നലില്‍നിന്ന് സുരക്ഷിതമാക്കാന്‍ കെട്ടിടങ്ങള്‍ക്കു മുകളില്‍ മിന്നല്‍രക്ഷാചാലകം സ്ഥാപിക്കാം. വൈദ്യുതോപകരണങ്ങളുടെ സുരക്ഷക്കായി സര്‍ജ് പ്രൊട്ടക്ടര്‍ ഘടിപ്പിക്കാം.&nbsp;</li>
</ul>

വേനൽമഴയും ഇടിമിന്നലും, കരുതൽ വേണം ; ജീവഹാനിയും നാശനഷ്ടങ്ങളും ഒഴിവാക്കാന്‍ ഇക്കാര്യങ്ങള്‍ ശ്രദ്ധിക്കാം

പെരുമ്പാവൂര്‍ (എറണാകുളം): പെണ്‍സുഹൃത്തിന്റെ വീട്ടിലെത്തി പോര്‍ച്ചിലിരുന്ന ബൈക്ക് കത്തിച്ച യുവാവ് പിടിയില്‍. കൊല്ലം പള്ളിമുക്ക് മല്ലതോട്ടത്തില്‍ വീട്ടില്‍ അനീഷാണ് (38) പിടിയിലായത്.ഇരിങ്ങോള്‍ കാവ് റോഡില്‍ യുവതി വാടകയ്ക്ക് താമസിക്കുന്ന വീട്ടില്‍ പോര്‍ച്ചിലിരുന്ന ബൈക്കിനാണ് തീയിട്ടത്. ബൈക്ക് പൂര്‍ണമായി കത്തിനശിച്ചു. വീടിന്റെ ജനല്‍ പാളികളും ഭാഗികമായി കത്തിനശിച്ചു.
ബുധനാഴ്ച പുലര്‍ച്ചെ രണ്ടിനായിരുന്നു ആക്രമണം. എറണാകുളത്ത് മേയ്ക്കപ്പ് ആര്‍ട്ടിസ്റ്റായ യുവതിയും ഫര്‍ണിച്ചര്‍ സ്ഥാപനം നടത്തിയിരുന്ന അനീഷും മുന്‍പ് സൗഹൃദത്തിലായിരുന്നുവെന്ന് പോലീസ് പറഞ്ഞു. രാത്രി അനീഷ് യുവതിയുടെ വീട്ടിലെത്തിയപ്പോള്‍ മുറ്റത്ത് പരിചയമില്ലാത്ത ബൈക്ക് കാണുകയും വിളിച്ചിട്ട് വാതില്‍ തുറക്കാതിരിക്കുകയും ചെയ്തതാണ് പ്രകോപനത്തിന് കാരണമെന്നു പറയുന്നു.യുവതിയുടെ പരാതി പ്രകാരം സ്ഥലത്തെത്തിയ പെരുമ്പാവൂര്‍ പോലീസ് വീടിന്റെ പരിസരത്തു നിന്നുതന്നെ പ്രതിയെ പിടികൂടി.

പെണ്‍സുഹൃത്തിന്റെ വീട്ടിലെത്തി ബൈക്ക് തീയിട്ട യുവാവ് പിടിയിൽ

കുറ്റ്യാടി: കുറ്റ്യാടിയിൽ മയക്കുമരുന്ന് നൽകി പ്രായപൂർത്തിയാകാത്ത കുട്ടിയെ പീഡിപ്പിച്ച കേസിൽ ഒന്നാം പ്രതിയുടെ ഭാര്യയെയും പ്രതി ചേർത്തു. അടുക്കത്ത് സ്വദേശി അജ്നാസിൻ്റെ ഭാര്യ മിസ് രിയെയാണ് പ്രതി ചേർത്തത്.
ഭാര്യയും ഭർത്താവും ചേർന്ന് മയക്കു മരുന്ന് നൽകി ലൈംഗികമായി പീഡിപ്പിച്ചതെന്നാണ് പ്രായപൂർത്തിയാകാത്ത കുട്ടി പൊലീസിൽ നൽകിയ പരാതിയിൽ പറയുന്നത്. അജ്‌നാസും ഭാര്യ മിസ്‍രിയും മയക്കുമരുന്ന് നൽകിയ ശേഷം ലൈംഗികമായി പീഡിപ്പിച്ചുവെന്ന് ഇരയാക്കപ്പെട്ട കുട്ടി പറഞ്ഞു. അജ്‌നാസും ഭാര്യ മിസ്‍രിയും ഇപ്പോള്‍ റിമാൻഡിലാണ്.
ഇന്നലെയാണ് മിസ്‍രിയെ അറസ്റ്റ് ചെയ്തത്. ലൈംഗികമായി പീഡിപ്പിച്ചെന്ന കുട്ടിയുടെ പരാതിയിൽ പോക്സോ ചുമത്തിയാണ് കേസ്. കഴിഞ്ഞ ആഴ്ചയാണ് അജ്‌നാസ് പൊലീസ് പിടിയിലാകുന്നത്. പോക്‌സോ വകുപ്പുകള്‍ ഉള്‍പ്പെടെ ചുമത്തിയാണ് പ്രതിക്കെതിരെ കേസ് എടുത്തത്. കേസ് എടുത്തതിന് പിന്നാലെ പ്രതി അജ്മീറിലേക്ക് പോവുകയാണ് ഉണ്ടായത്. ഈ വിവരം പൊലീസിന് ലഭിച്ചതിനെ തുടര്‍ന്ന് മംഗലാപുരത്ത് വെച്ച് പ്രതിയെ പിടികൂടുകയായിരുന്നു. കുറ്റ്യാടി സ്വദേശിയായ പ്രായപൂർത്തിയാകാത്ത കുട്ടിയുടെ കുടുംബം നൽകിയ പരാതിയിലാണ് പൊലീസ് കേസെടുത്തത്.

കുറ്റ്യാടിയിലെ പ്രകൃതിവിരുദ്ധ പീഡനം; അജ്‍നാസിന്‍റെ ഭാര്യയെയും പ്രതി ചേര്‍ത്തു

Kuttiadi

കുറ്റ്യാടി: സ്വകാര്യ ലാബിൽ ഒളിക്യാമറ വച്ച് ജീവനക്കാരിയുടെ ദൃശ്യങ്ങൾ പകർത്തിയ നടത്തിപ്പുകാരൻ പിടിയിൽ. താലൂക്ക് ആശുപത്രിക്ക് സമീപമുള്ള അരീക്കര ലാബ് ഉടമയുടെ സഹോദരൻ അസ്‍ലമാണ് പിടിയിലായത്. രാത്രി 11 മണിയോടെ ജീവനക്കാരി ശുചിമുറിയിൽ കയറിയതോടെയാണ് ഒളിച്ചു വെച്ച മൊബൈൽ ഫോൺ ശ്രദ്ധയിൽപ്പെട്ടത്. യുവതി ബഹളം വെച്ചതോടെ നാട്ടുകാർ സ്ഥലത്തെത്തി പൊലീസിൽ ഏൽപ്പിച്ചു. ആശുപത്രിയിൽ എത്തിച്ച് പരിശോധനകൾ നടത്തിയ ശേഷം കുറ്റ്യാടി പൊലീസ് സ്റ്റേഷനിലേക്ക് കൊണ്ടുപോയി.

കുറ്റ്യാടിയിലെ സ്വകാര്യ ലാബിൽ ഒളിക്യാമറ വച്ച് ജീവനക്കാരിയുടെ ദൃശ്യങ്ങൾ പകർത്തി; നടത്തിപ്പുകാരൻ പിടിയിൽ

വടകര : ദേശീയപാതയിൽ മടപ്പള്ളിയിൽ ഓടിക്കൊണ്ടിരുന്ന കെ.എസ്.ആർ.ടി.സി. ബസിൻ്റ ടയർ പൊട്ടിത്തെറിച്ച് പുക ഉയർന്നത് പരിഭ്രാന്തിക്കിടയാക്കി. വെള്ളിയാഴ്ച രാവിലെ 7.15 ഓടെയാണ് സംഭവം. തിരുവനന്തപുരത്തു നിന്നും കാസർകോടേക്ക് പോവുകയായിരുന്ന ബസിൻ്റ പിൻ ചക്രമാണ് പൊട്ടിത്തെറിച്ചത്.&nbsp;
ഉഗ്രസ്ഫോടന ശബ്ദവും പുകയും ഉയരുന്നത് കണ്ട് ബസ് നിർത്തിയ ഉടനെ യാത്രക്കാർ പുറത്തിറങ്ങി. ഒരാഴ്ച്ച മുന്നേ മാറ്റിയിട്ട ടയറാണ് പൊട്ടിത്തെറിച്ചതെന്ന് ജീവനക്കാർ പറഞ്ഞു. ഉഗ്രസ്ഫോടന ശബ്ദം കേട്ടു നാട്ടുകാരും വഴിയാത്രക്കാരും ഓടി കൂടുകയുണ്ടായി. ദേശീയപാതയിൽ സംഭവത്തെ തുടർന്ന് ഗതാഗത തടസമുണ്ടായി. യാത്രക്കാരെ മറ്റൊരു ബസിൽ കയറ്റി വിട്ടു. ശേഷം ബസ് വടകര ഡിപ്പോയിലേക്ക് മാറ്റി.

മടപ്പള്ളിയിൽ കെ.എസ്.ആർ.ടി.സി. ബസിൻ്റ ടയർ പൊട്ടിത്തെറിച്ചത് പരിഭ്രാന്തിക്കിടയാക്കി

കോഴിക്കോട്: കൂട്ടുകാരോടൊപ്പം സംസാരിച്ചു കൊണ്ടിരിക്കെ പിണങ്ങി ടിപ്പറിന് മുന്നിലേക്ക് എടുത്തു ചാടിയ വിദ്യാര്‍ത്ഥി ഡ്രൈവറുടെ സമയോചിത ഇടപെടലില്‍ രക്ഷപ്പെട്ടു.
കട്ടാങ്ങല്‍ പെട്രോള്‍ പമ്പിന് സമീപത്തെ കോഫീ ഷോപ്പിന് മുന്നില്‍ നിന്നും സംസാരിക്കുകയായിരുന്ന മൂന്ന് കുട്ടികളില്‍ ഒരാളാണ് പിണങ്ങി റോഡിലേക്കിറങ്ങുകയും ടിപ്പര്‍ വന്നപ്പോള്‍ മുന്നിലേക്ക് ചാടുകയും ചെയ്തത്. ഇന്നലെ വൈകീട്ട് 5:30 ഓടെയാണ് സംഭവം.സ്‌കൂട്ടറില്‍ കൂട്ടുകാര്‍ക്കൊപ്പം ഇരിക്കുകയായിരുന്നു വിദ്യാര്‍ഥി. ഇവര്‍ സംസാരിക്കുന്നതും വീഡിയോയില്‍ കാണാം. ഇതിനിടെ സ്‌കൂട്ടറില്‍നിന്നിറങ്ങിയ ഒരു വിദ്യാര്‍ഥി റോഡിലേക്ക് നടന്നു നീങ്ങുന്നത് കാണാം. ആദ്യം നടന്നുനീങ്ങിയ വിദ്യാര്‍ഥി ടിപ്പര്‍ ലോറി കടന്നുവരുന്നത് കണ്ട് റോഡിലേക്ക് ഓടിക്കയറുകയായിരുന്നു. ടിപ്പറിന് മുന്നിലേക്കാണ് എടുത്ത് ചാടിയത്. എന്നാല്‍ ടിപ്പര്‍ ഡ്രൈവര്‍ സഡന്‍ ബ്രേക്കിട്ടതുകൊണ്ട് വിദ്യാര്‍ഥി രക്ഷപ്പെട്ടു. കാര്യമായ പരിക്കും ഏറ്റിട്ടില്ല.

കൂട്ടുകാരോട് പിണങ്ങി ടിപ്പറിന് മുന്നിലേക്ക് ചാടി ;വിദ്യാര്‍ത്ഥി രക്ഷപ്പെട്ടത് തലനാരിഴയ്ക്ക്

അഴിയൂർ: ന്യൂസീലൻഡിൽനിന്ന് മാഹിയിലെ വീട്ടിൽ നടക്കുന്ന മോഷണം ഉടമ സി സി ടി വി യിൽ കണ്ടതോടെ മോഷ്ട്ടാവ് കയ്യോടെ പിടിയിൽ. ന്യൂസീലൻഡിൽ സമയം പുലർച്ചെ അഞ്ചരയ്ക്കാണ് ദിവസങ്ങൾക്കുമുൻപ് പൂട്ടിപ്പോയ വീട് ഒന്ന് കാണാനായി മാഹിയിലെ കെ.ഒ. ശശിപ്രകാശ് മൊബൈൽ ഫോണിലെ ആപ്ലിക്കേഷൻ തുറന്ന് നോക്കിയത്. മാഹി റെയിൽവേ സ്റ്റേഷൻ റോഡിലെ വീടും പരിസരവും അർധരാത്രി മയക്കത്തിലൂടെ കടന്നുപോകുന്നത് കാണാൻ കൊതിച്ച അദ്ദേഹം വീട്ടുപരിസരത്തെ ആളനക്കം കണ്ട് ഞെട്ടി. കണ്ണുതിരുമ്മി സ്വപ്നമല്ലെന്ന് ഉറപ്പിച്ച് വീണ്ടും ഫോൺ സ്‌ക്രീനിലേക്ക് നോക്കുമ്പോഴേക്കും മുന്നിലെ വാതിൽ തകർത്ത് ഒരാൾ വീടിനുള്ളിലേക്ക് കയറുന്നു.
ശശിപ്രകാശ് മറ്റൊന്നും ആലോചിച്ചില്ല. തൊട്ടടുത്ത് താമസിക്കുന്ന സഹോദരൻ സരോഷ് കണ്ടോത്തിനെ ഫോണിൽ വിളിച്ചുണർത്തി കാര്യം പറഞ്ഞു. അദ്ദേഹം അയൽവാസികളെ വിളിച്ച് കാര്യം പറയുമ്പോഴേക്കും ശശി മാഹി പോലീസിലും വിവരമറിയിച്ചു. മിനുട്ടുകൾക്കുള്ളിൽ മാഹി എസ്‌ഐ കെ.സി.അജയകുമാർ സ്ഥലത്തെത്തുമ്പോഴേക്കും നാട്ടുകാർ വീടുവളഞ്ഞിരുന്നു. പോലീസ് ഉള്ളിൽ കയറി പരിശോധിച്ചെങ്കിലും ആരെയും കണ്ടില്ല. എന്നാൽ, വിശദമായ പരിശോധനയിൽ കട്ടിലിനടിയിൽനിന്ന് ആളെ കൈയോടെ പിടിച്ചു. കർണാടകയിലും കേരളത്തിലുമായി നിരവധി മോഷണക്കേസുകളിൽ പിടിയിലായി ശിക്ഷയനുഭവിച്ചിറങ്ങിയ ചിക്കമഗളൂരുവിലെ അനിൽകുമാർ (39) ആയിരുന്ന മോഷ്ടാവ്‌. പോലീസ് അറസ്റ്റ് ചെയ്ത ഇയാളെ മാഹി കോടതി റിമാൻഡ് ചെയ്തു.
അബുദാബിയിൽ റിഗ്ഗിലെ ജോലിക്കാരനായ ശശിപ്രകാശ് മകൾ സഹനയ്ക്കും കുടുംബത്തിനുമൊപ്പം ചേരാനാണ് ഭാര്യ എൻ.സി.പ്രീതിക്കൊപ്പം ന്യൂസീലൻഡിലെത്തിയത്. മറ്റൊരു മകൾ ടിഷ അമേരിക്കയിലാണ്.

ന്യൂസീലൻഡിൽ നിന്ന് ഉടമ കണ്ടു, മാഹിയിലെ വീട്ടിൽ നടക്കുന്ന മോഷണം; പ്രതി പിടിയിൽ

Mahe

നാദാപുരം: ഭർതൃമതിയായ വീട്ടമ്മയ്ക്ക് അശ്ലീല സന്ദേശം അയച്ചെന്ന പരാതിയിൽ പോലീസുകാരനെതിരെ നാദാപുരം പോലീസ് കേസെടുത്തു. താമരശ്ശേരി സബ് ഡിവിഷന് കീഴിൽ കോടഞ്ചേരി പോലിസ് സ്റ്റേഷനിലെ സിവിൽ പോലിസ് ഓഫീസർ കടമേരി സ്വദേശി സുരേഷിനെതിരെയാണ് പോലീസ് കേസ് രജിസ്റ്റർ ചെയ്തത്. കഴിഞ്ഞ ദിവസമാണ് ഭർതൃമതിയായ യുവതി സുരേഷിനെതിരെ പരാതി നൽകിയത്. യുവതിയുടെ വാട്സാപ്പിലും ഇൻസ്റ്റ് ഗ്രാമിലും തുടർച്ചയായി അശ്ലീല സന്ദേശം അയച്ച് പിന്തുടർന്ന് ശല്യപ്പെടുത്തിയെന്നാണ് പരാതി.

ഭർതൃമതിയായ വീട്ടമ്മയ്ക്ക് അശ്ലീല സന്ദേശം; നാദാപുരം പോലീസ് കേസെടുത്തു

വടകര: എക്സൈസ് സർക്കിൾ ഓഫീസിലെ സർക്കിൾ ഇൻസ്പെക്ടർ ഹിരോഷ് വി.ആർ ഉം പാർട്ടിയും വടകര തെരു ഗണപതി ക്ഷേത്രത്തിന് സമീപം നടത്തിയ പരിശോധനയിൽ കഞ്ചാവുമായി ഇതര സംസ്ഥാന തൊഴിലാളിയെ പിടികൂടി. പശ്ചിമ ബംഗാൾ സ്വദേശി ആലംഗിർ സെക്ക് (35) ആണ് 50 ഗ്രാം കഞ്ചാവുമായി പിടിയിലായത്. പരിശോധനയിൽ പ്രിവന്റീവ് ഓഫീസർ ഉനൈസ് എൻ.എം, പ്രിവന്റീവ് ഓഫീസർ (ഗ്രേഡ്)മാരായ സി.എം സുരേഷ് കുമാർ, ഷൈജു പി.പി., സായിദാസ് കെ.പി, ഡ്രൈവർ പ്രജീഷ് ഇ.കെ എന്നിവർ പങ്കെടുത്തു.

വടകരയിൽ കഞ്ചാവുമായി ഇതര സംസ്ഥാന തൊഴിലാളി പിടിയിൽ

നാദാപുരം : നാദാപുരത്ത് സഹോദരങ്ങൾക്ക് വെട്ടേറ്റു. വാടക സ്റ്റോർ ഉടമകളായ ഊരം വീട്ടിൽ നാസർ, സലിം എന്നിവർക്കാണ് വെട്ടേറ്റത്.അയൽവാസിയായ ചിറക്കുനി ബഷീർ ആണ് ഇരുവരെയും വെട്ടിയത്. വാട്സ്ആപ്പില്‍ നാസറിനും സലീമിനും എതിരെ ബഷീർ മോശമായി പറഞ്ഞത് ചോദ്യം ചെയ്താണ് അക്രമം. ഒളിവിൽ പോയ പ്രതിക്കായി തിരച്ചിൽ തുടരുന്നു.
ചൊവ്വാഴ്ച രാത്രി എട്ടരയോടെയായിരുന്നു സംഭവം. ബഷീറിന്റെ വീട്ടില്‍വെച്ചാണ് സഹോദരങ്ങള്‍ക്ക് നേരേ ആക്രമണമുണ്ടായത്. നാസറിന്റെ വയറിനും സലീമിന്റെ കൈക്കുമാണ് പരിക്ക്. ഇരുവരെയും കോഴിക്കോട്ടെ ആശുപത്രിയിലേക്ക് മാറ്റി.

വാട്‌സ്ആപ്പിലെ മോശം പരാമർശം ചോദിക്കാനെത്തി; നാദാപുരത്ത് സഹോദരങ്ങളെ വെട്ടിപ്പരിക്കേൽപ്പിച്ച് അയൽവാസി

പയ്യോളി : പയ്യോളിയില്‍ മകന്‍ നല്‍കിയ പരാതിയില്‍ പിതാവിന്റെ ഖബര്‍ തുറന്ന് പോസ്റ്റ്‌മോര്‍ട്ടം നടത്തിയ സംഭവത്തില്‍ അസ്വാഭാവികത ഇല്ല. മരിച്ച ഈളുവയല്‍ മുഹമ്മദിന്റ മൃതദേഹമാണ് ഖബര്‍ തുറന്നെടുത്ത് പോസ്റ്റ്‌മോര്‍ട്ടം നടത്തിയത്. ഹൃദയാഘാതമാണ് മുഹമ്മദിന്റെ മരണകാരണമെന്ന് പോസ്റ്റ്‌മോര്‍ട്ടത്തില്‍ കണ്ടെത്തി.
27 വര്‍ഷമായി കുടുംബവുമായി അകന്ന് താമസിച്ചു വരികയായിരുന്ന പയ്യോളി അങ്ങാടി സ്വദേശി മുഹമ്മദ് കഴിഞ്ഞ മാസം 26നാണ് മരിച്ചത്. വീട്ടിലെ കസേരയില്‍ മരിച്ച നിലയില്‍ കാണപ്പെടുകയായിരുന്നു. തുടര്‍ന്ന് സഹോദരന്‍ ഇസ്മയിലിനെ വിവരം അറിയിക്കുകയും ചെയ്തു. ഡോക്ടര്‍ എത്തി മരണം സ്ഥിരീകരിച്ചെങ്കിലും പോസ്റ്റ് മോര്‍ട്ടം നടത്തിയിരുന്നില്ല. മുഹമ്മദിന്റെ മൃതദേഹം ചെരിച്ചില്‍ പള്ളിയില്‍ ഖബറടക്കി.മരണത്തിനു പിന്നാലെ മുഹമ്മദിന്റെ ബാങ്ക് അക്കൗണ്ടില്‍ നിന്നും പണം പിന്‍വലിച്ചിട്ടുണ്ടായിരുന്നു. ഇതില്‍ സംശയം തോന്നിയാണ് മകന്‍ പരാതി നല്‍കിയത്. പൊലീസ് ഇക്കാര്യത്തില്‍ അന്വേഷണം നടത്തി. ബാങ്ക് അക്കൗണ്ടില്‍ നിന്ന് പണം പിന്‍വലിച്ചത് മൃതദേഹം സംസ്‌കരിക്കുന്നതിനും മരണാനന്തര ചടങ്ങുകള്‍ക്കും വേണ്ടിയാണ് എന്നും ബാക്കി പണം അക്കൗണ്ടിലുണ്ടെന്നാണ് ബന്ധുക്കളുടെ പ്രതികരണം.

തുറയൂരിലെ മുഹമ്മദിന്റ മരണം;അസ്വാഭാവികതയില്ലെന്ന്  പോസ്റ്റ്മോർട്ടത്തിലെ പ്രാഥമിക നിഗമനം

Search Results for: 05.10.2024