കൊയിലാണ്ടി: തൊഴിലുറപ്പ് തൊഴിലാളികൾക്ക് കടന്നൽ കുത്തേറ്റു. നിരവധി പേർക്ക് പരിക്കേറ്റു. ഉള്ളിയേരി തെരുവത്ത് കടവ് ഒറവിൽ ഇന്നു രാവിലെയാണ് സംഭവം. ജോലിക്കിടയിൽ കുത്തേൽക്കുകയായിരുന്നു. പരിക്കേറ്റ ശാന്ത, സുമതി, ഇന്ദിര, അനില,ശൈല എന്നിവരെ കൊയിലാണ്ടി താലൂക്ക് ആശുപത്രിയിലും മാധവൻ, ബൽരാമൻ, രാരിച്ച കുട്ടി, പ്രേമ തുടങ്ങിയവരെ മലബാർ മെഡിക്കൽ കോളജ് ആശുപത്രിയിലും പ്രവേശിപ്പിച്ചു.

ഉള്ളിയേരിയിൽ  തൊഴിലുറപ്പ് തൊഴിലാളികൾക്ക് കടന്നൽ കുത്തേറ്റു

Koyilandy

മാഹി: മാഹി റീജിയണൽ മസ്ജിദ് മദ്രസാ കോർഡിനേഷൻ കമ്മിറ്റിയുടെ ആഭിമുഖ്യത്തിൽ മാഹിയിൽ വഖഫ് സെമിനാർ സംഘടിപ്പിച്ചു. കേരള സംസ്ഥാന വഖഫ് ബോർഡ് മെമ്പർ അഡ്വ.പി.വി.സൈനുദ്ദീൻ മുഖ്യ പ്രഭാഷണം നടത്തി. പ്രസിഡണ്ട് കെ.ഇ മമ്മു അദ്ധ്യക്ഷത വഹിച്ചു. ഷമീർ സഖാഫി, അബ്ദുൽ ഖാദർ ചാലക്കര, അഷ്റഫ് ഹാജി പന്തക്കൽ ,അബ്ദുൽ അസീസ് പള്ളൂർ, സിദീഖ് ഷാലിമാർ ,കുഞ്ഞി മുഹമ്മദ് സ്വാലിഹ് പി.കെ. വി , അഷ്റഫ് ഹാജി കല്ലാപള്ളി, മമ്മു ഹാജി ഈസ്റ്റ് പള്ളൂർ, ഷംസുദ്ദീൻ മഞ്ചക്കൽ, നാസർ മാടോൽ എന്നിവർ സംസാരിച്ചു. സെക്രട്ടറി ടി.കെ. വാസിം സ്വാഗതവും ട്രഷറർ ഏ.വി. യൂസഫ് നന്ദിയും പറഞ്ഞു. പി.മുഹമ്മദ് താഹിർ , റാഷി മാഹി, നിസ്താർ, ജലാലുദ്ദീൻ പാറാൽ എന്നിവർ നേതൃത്വം നൽകി.

വഖഫ് സെമിനാർ സംഘടിപ്പിച്ചു

Mahe

വില്യാപ്പള്ളി: കോഴിക്കോട് സമാപിച്ച റവന്യൂജില്ലാ സ്‌കൂൾ കലോത്സവത്തിൽ ഹയർസെക്കൻഡറി വിഭാഗം കോൽക്കളിയിൽ ഒന്നാം സ്ഥാനം നേടി വില്യാപ്പള്ളി എം ജെ വൊക്കേഷണൽ ഹയർസെക്കൻഡറി സ്കൂൾ സംസ്ഥാനതലത്തിലേക്ക് യോഗ്യത നേടി. മലബാറിന്റെ സ്വന്തം കലാരൂപമായ കോൽക്കളി നടക്കുമ്പോൾ എട്ടാം വേദിയായ പ്രൊവിഡൻസ് സ്കൂളിലെ എംപി വീരേന്ദ്രകുമാർ ഹാൾ ജനനിബിഡടമായിരുന്നു. 15 ടീമുകൾ മാറ്റുരച്ച മത്സരത്തിൽ കോലടക്കത്തിന്റെ താളവും ഇമ്പമാർന്ന ഈരടികളും കോൽക്കളി തനിമയുമാണ് എംജെയെ ഒന്നാമതെത്തിച്ചത്.&nbsp;
പ്രശസ്ത കോൽക്കളി പരിശീലകൻ മജീദ് കടമേരിയുടെ ശിക്ഷണത്തിൽ മുഹമ്മദ് മിസ്ഹബ്, മിർഷാൻ, ഇർഫാൻ ഇസ്മായിൽ, ഫാസിൽ, സവാദ് റഹ്മാൻ, മുഹമ്മദ് ഷഹിൻഷാ, മുഹമ്മദ് ഫഹീം, മുഹമ്മദ് മിൻഹാജ്, ഫാസ് റഹ്മാൻ, ഫുആദ് സക്കീർ, മുഹമ്മദ് സിദാദ്, മുഹമ്മദ് മുബഷിർ എന്നിവരടങ്ങുന്ന സംഘമാണ് നേട്ടം കൈവരിച്ചത്. വട്ടക്കോലിൽ തുടങ്ങിയ കളി മറിഞ്ഞടി മിൻകളിയും മുന്നോട്ടൊഴിക്കലും കടന്ന് ഒഴിച്ചൽ മുട്ട് മൂന്നിന്റെ കോർക്കലും ദൃശ്യമാക്കിയാണ് കളി അടക്കം വച്ചത്.

കോൽക്കളിയിൽ വില്യാപ്പള്ളി എം ജെ സംസ്ഥാനതലത്തിലേക്ക്

Vadakara

ആയഞ്ചേരി: തൊഴിലുറപ്പ് പദ്ധതിയോട് കേന്ദ്ര ഗവൺമെന്റ് കാണിക്കുന്ന അവഗണന അവസാനിപ്പിക്കണമെന്നും, തൊഴിലാളികൾക്ക് വേതനവും തൊഴിൽ ദിനങ്ങളും, മറ്റ് ആനുകൂല്യങ്ങളും വർദ്ധിപ്പിക്കണമെന്നും ആവശ്യപ്പെട്ട് എൻ ആർ ഇ ജി വർക്കേഴ്സ് യൂണിയൻ ഈ മാസം 27 ന് നടത്തുന്ന കേന്ദ്ര ഗവ: ഓഫീസ് മാർച്ച് വിജയിപ്പിക്കുന്നതിനുള്ള ഏരിയ വാഹന പ്രചരണ ജാഥ ആയഞ്ചേരിയിൽ സമാപിച്ചു. സമാപന സമ്മേളനം സി.പി.ഐ (എം) ഏരിയ സിക്രട്ടരി ടി.പി. ഗോപാലൻ ഉൽഘാടനം ചെയ്തു. ടി. കൃഷ്ണൻ അധ്യക്ഷം വഹിച്ചു. ജാഥാ ക്യാപ്റ്റൻ പി എം ബാലൻ, പി.പി. ബാലൻ, ടി. വി കുഞ്ഞിരാമൻ, സുജ , രജിത പി, ജാനു, ബിജീഷ് വി.കെ എന്നിവർ സംസാരിച്ചു.

എൻ ആർ ഇ ജി വർക്കേഴ്സ് യൂണിയൻ ഏരിയ പ്രചരണജാഥ സമാപിച്ചു

ന്യൂഡൽഹി: പാലക്കാട്ടെ തിരഞ്ഞെടുപ്പ് തോല്‍വിക്കു പിന്നാലെ ബി.ജെ.പി. സംസ്ഥാനാധ്യക്ഷൻ കെ.സുരേന്ദ്രൻ രാജിസന്നദ്ധ അറിയിച്ചെന്ന വാർത്ത തള്ളി കേന്ദ്രനേതൃത്വം. പാലക്കാട് ഉപതിരഞ്ഞെടുപ്പിലെ തോല്‍വിയുടെ കാരണത്താല്‍ ആരും ഉത്തരവാദിത്തങ്ങളില്‍ നിന്ന് രാജി വെക്കില്ലെന്നും ആരുടേയും രാജി ആവശ്യപ്പെട്ടിട്ടില്ലെന്നും ബി.ജെ.പി സംസ്ഥാന പ്രഭാരിയും മുന്‍ കേന്ദ്രമന്ത്രിയുമായ പ്രകാശ് ജാവഡേക്കർ വ്യക്തമാക്കി. യു.ഡി.എഫും എല്‍.ഡി.എഫും വ്യാജപ്രചരണം നടത്തുന്നുവെന്നും 2026-ല്‍ ബി.ജെ.പി പാലക്കാട് അടക്കം നിരവധി സീറ്റുകളിൽ വിജയിക്കുമെന്നും ജാവഡേക്കർ പ്രതികരിച്ചു.
പാലക്കാട്ടെ തോല്‍വി ബി.ജെ.പി കൗണ്‍സിലര്‍മാരുടെ തലയില്‍വെക്കേണ്ടെന്ന് ബി.ജെ.പി ദേശീയ കൗണ്‍സില്‍ അംഗം എന്‍. ശിവരാജന്‍ പ്രതികരിച്ചു. ജയിച്ചാല്‍ ക്രെഡിറ്റ് കൃഷ്ണകുമാറിന് തോറ്റാല്‍ ഉത്തരവാദിത്തം ശോഭയ്ക്ക് എന്ന നിലപാട് ശരിയല്ലെന്നും സ്ഥാനാര്‍ഥി നിര്‍ണയം പാളിയോ എന്ന് ദേശീയ നേതൃത്വം പരിശോധിക്കണമെന്നും ശിവരാജന്‍ ആവശ്യപ്പെട്ടു.
&nbsp;പാലക്കാട് തിരിച്ചടിയുണ്ടാവാന്‍ കാരണം ശോഭാ സുരേന്ദ്രന്‍ പക്ഷമാണെന്ന് സുരേന്ദ്രന്‍ പക്ഷം ആരോപിച്ചിരുന്നു. ശോഭയുടെ ഡ്രൈവര്‍ വോട്ടുമറിക്കാന്‍ കൂട്ടുനിന്നു എന്നായിരുന്നു പ്രധാന ആരോപണം.പരാജയത്തിനു പിന്നില്‍ ശോഭാ സുരേന്ദ്രനാണെന്ന് വരുത്തിത്തീര്‍ക്കാന്‍ മുരളീധരന്റെ പക്ഷവും ശ്രമിക്കുന്നതായി പാര്‍ട്ടിക്കകത്തുനിന്ന് പരാതി ഉയര്‍ന്നിരുന്നു. നഗരസഭയില്‍ 'ശോഭാപക്ഷം' ബി.ജെ.പിയെ സ്ഥാനാര്‍ഥിയായ കൃഷ്ണകുമാറിനെ തോല്‍പിച്ചു എന്നാണ് മുരളീധരന്റെ പക്ഷം ആവര്‍ത്തിക്കുന്നത്. പാലക്കാട്ടെ പരാജയം ശോഭ സുരേന്ദ്രന്റെ തലയില്‍ കെട്ടിവെക്കാന്‍ ശ്രമിക്കുന്നതായി ശോഭാപക്ഷവും ആരോപിച്ചു. കെ. സുരേന്ദ്രന് വി. മുരളീധരന്‍ സംരക്ഷണവലയം ഒരുക്കുന്നതായും ആരോപണം ഉയരുന്നുണ്ട.

2026-ല്‍ പാലക്കാട് പിടിക്കും; കെ.സുരേന്ദ്രൻ രാജിവെക്കേണ്ടെന്നും ബി.ജെ.പി കേന്ദ്ര നേതൃത്വം

കുറ്റ്യാടി: കടമേരി എം.എൽ.പി സ്കൂൾ റിട്ട: അധ്യാപകൻ മണിയോത്ത് ഗോപാലൻ നായരുടെ ഭാര്യ വടയം മൂരാട്ടുമ്മൽ നാരായണി (80) അന്തരിച്ചു. മക്കൾ: നാരായണൻ മണിയോത്ത് (റിട്ട:എയർ ഫോഴ്സ് ), ഭാമിനി (റിട്ട: ആരോഗ്യ വകുപ്പ്), മോഹൻ ദാസ് , ഉഷ, ഗീത, ഉണ്ണികൃഷ്ണൻ, രമണി ഭായ്. മരുമക്കൾ: ഗീത ( മുളിയങ്ങൽ), ശ്രീലത കൊയിലാണ്ടി (അദ്ധ്യാപിക എസ്.എൻ.എം എച്ച്.എസ്.എസ് പരപ്പനങ്ങാടി) ,വത്സൻ അഞ്ചാം പീടിക (റിട്ട: ഫോറസ്റ്റ് ) ,ഗോപാലൻ നായർ ( ചെറുവണ്ണൂർ), ലജിന, പി.കെ.സുരേഷ് (മുൻ പ്രധാന അധ്യാപകൻ നടുപ്പൊയിൽ യു.പി സ്കൂൾ, കുറ്റ്യാടി മണ്ഡലം കോൺഗ്രസ് കമ്മിറ്റി പ്രസിഡൻ്റ്) , പരേതനായ കുഞ്ഞിരാമൻ നായർ (തൂണേരി). സഹോദരങ്ങൾ: പ്രഭാകരൻ നായർ തങ്ങം കണ്ടി (പയന്തോങ്ങ്) ,കമലാക്ഷി (തൊട്ടിൽപ്പാലം), ദേവി (മൊകേരി ) ,ജാനകി (അരൂർ) പരേതയായ ലീല. സഞ്ചയനം: ബുധൻ.

വടയം മൂരാട്ടുമ്മൽ നാരായണി അന്തരിച്ചു

Obituary

തൃശൂർ : പാർട്ടിയെ നിർണായക ഘട്ടത്തിൽ ഉപേക്ഷിച്ച് പോയ പി.സരിൻ ചതിയനാണെന്ന് കെപിസിസി പ്രസിഡന്റ് കെ.സുധാകരൻ. തിരിച്ചുവന്നാലും സരിനെ ഇനി പരിഗണിക്കില്ലെന്നും സരിനെ ഇനി പാർട്ടിക്ക് താൽപ്പര്യമില്ലെന്നും സുധാകരൻ വ്യക്തമാക്കി.&nbsp;
‘‘സന്ദീപ് വാരിയരെ കുറിച്ച് മനോഹരമായ വാക്കുകളാണ് എൽഡിഎഫ് ഉപയോഗിച്ചത്. കോൺഗ്രസിലേക്ക് വന്നപ്പോൾ അഭിപ്രായം മാറി. അഭിപ്രായ സ്ഥിരത എന്നത് രാഷ്ട്രീയ നേതാവിന്റെ ക്വാളിറ്റിയാണ്. അതില്ലാത്തവർ രാഷ്ട്രീയത്തിലെ ഭ്രാന്ത് വികാരത്തിന്റെ ഉടമസ്ഥനാണ്. ഞങ്ങൾ ആരും എസ്ഡിപിയുടെ വോട്ട് ചോദിച്ച് പോയിട്ടില്ല. അവർ ഇങ്ങോട്ട് വന്നിട്ടുമില്ല. ഞങ്ങൾ ഔദ്യോഗികമായി ആരോടും വോട്ട് ചെയ്യാൻ ആവശ്യപ്പെട്ടിട്ടുമില്ല. ആരോപണങ്ങൾ ഒന്നും വെന്തില്ല, ഒന്നും വേവാതെ അങ്ങാടിപ്പുറത്ത് വീണു. സരിന്റെ കൂടെ ഒരീച്ച പോലും പോയിട്ടില്ല.’’– കെ.സുധാകരൻ തുറന്നടിച്ചു.

സരിൻ ചതിയൻ ;കോൺഗ്രസിലേക്ക് തിരിച്ച് വന്നാലും സ്വീകരിക്കില്ലെന്ന് കെ.സുധാകരൻ

കണ്ണൂര്‍: വളപ്പട്ടണത്തെ വീട്ടില്‍ വൻകവർച്ച നടന്നതിൽ പ്രതികരണവുമായി ഉടമയുടെ ബന്ധു. ലോക്കര്‍ ഉള്ള സ്ഥലം വരെ കൃത്യമായി മനസിലാക്കിയ ആളുകളാണ് മോഷണത്തിന് പിന്നിലെന്ന് സംശയിക്കുന്നതെന്ന് അഷ്‌റഫിന്റെ ഭാര്യാസഹോദരന്‍ ജാബിര്‍ പറഞ്ഞു. സ്വര്‍ണവും പണവും സൂക്ഷിച്ചിരുന്ന അലമാര പൂട്ടി അതിന്റെ താക്കോല്‍ വേറെ അലമാരയിലാണ് സൂക്ഷിച്ചിരുന്നത്. അതും കൃത്യമായി പൂട്ടിയിരുന്നുവെന്നും അദ്ദേഹം പറഞ്ഞു.
മോഷണത്തിന് പിന്നില്‍ അറിയുന്ന ആളുകളാണോയെന്ന് പറയാന്‍ കഴിയില്ല. മൂന്ന് കിടപ്പുമുറികളിലും മോഷ്ടാക്കള്‍ കയറിയിട്ടുണ്ട്. സ്വര്‍ണവും പണവും സൂക്ഷിച്ചിരുന്ന അലമാര പൂട്ടി അതിന്റെ താക്കോല്‍ മറ്റൊരു ബെഡ്‌റൂമിലെ അലമാരയിലായിരുന്നു സൂക്ഷിച്ചിരുന്നത്. ആ അലമാരയുടെ താക്കോല്‍ വേറെ മുറിയിലുമായിരുന്നു. മറ്റ് മുറികളില്‍ നിന്നൊന്നും വേറൊന്നും നഷ്ടപ്പെട്ടിട്ടില്ല.രണ്ടുപേര്‍ അടങ്ങുന്ന സംഘമാണ് മോഷണത്തിന് പിന്നിലെന്നാണ് പോലീസ് അറിയിച്ചതെന്നും ജാബിര്‍ പറഞ്ഞു.
യാത്രയ്ക്ക് മുമ്പ് പോലീസ് സ്‌റ്റേഷനില്‍ അറിയിച്ചിരുന്നില്ലെന്നും ദുബായിലും ബെംഗളൂരുവിലുമെല്ലാമായി സാധാരണയായിപോകുന്നവരാണെന്നും ജാബിർ പറഞ്ഞു. 30 വര്‍ഷത്തോളമായി ഇവിടെ താമസിക്കുന്നുണ്ട്. ഇതുവരെ ഇങ്ങനെ ഒരു അനുഭവമുണ്ടായിട്ടില്ല. വീട്ടില്‍ തന്നെ ലോക്കര്‍ ഉണ്ടായിരുന്നത് കൊണ്ട് സ്വര്‍ണവും പണവും ബാങ്കില്‍ സൂക്ഷിച്ചിരുന്നില്ലെന്നും അദ്ദേഹം പറഞ്ഞു.

കണ്ണൂരിലെ കവർച്ച; ലോക്കര്‍ ഇരിക്കുന്ന സ്ഥലംവരെ മനസിലാക്കിയവരാണ് മോഷണത്തിന് പിന്നിലെന്ന് ബന്ധു

Kannur

തിരുവനന്തപുരം: അങ്കണവാടിയിൽ വീണ് കുഞ്ഞിന് ​ഗുരുതര പരിക്ക്. മാറനല്ലൂർ പോങ്ങുംമൂട് ഷിബു നിവാസിൽ രതീഷ്-സിന്ധു ദമ്പതികളുടെ മകൾ വൈഗയ്ക്ക് (3) തലയ്ക്കാണ് പരിക്കേറ്റത്. തുടർന്ന് എസ്.എ.ടി. ആശുപത്രിയിൽ പ്രവേശിപ്പിച്ചു. കുട്ടിക്ക് തലയിൽ ആന്തരിക രക്തസ്രാവം ഉള്ളതായി പരിശോധനയിൽ കണ്ടെത്തി. കുഞ്ഞിന്റെ കഴുത്ത് ഉറയ്ക്കുന്നില്ലെന്നാണ് വിവരം. വീഴ്ചയിൽ സുഷുമ്നാനാഡിക്ക് ക്ഷതം സംഭവിച്ചതായി സ്ഥിരീകരിച്ചിട്ടുണ്ട്.
കുട്ടി വീണത് അങ്കണവാടി അധികൃതർ മറച്ചുവെച്ചുവെന്ന് ആരോപണമുയർന്നിട്ടുണ്ട്. വേദനയെ തുടർന്ന് വീട്ടിലെത്തി കുട്ടി രക്ഷിതാക്കളോട് വീണ വിവരം പറഞ്ഞതിന് ശേഷമാണ് ആശുപത്രിയിലെത്തിച്ചത്. സംഭവത്തിൽ ബാലാവകാശ കമ്മിഷൻ സ്വമേധയാ കേസേടുത്തു. വ്യാഴാഴ്ചയാണ് സംഭവം നടന്നത്. ഞായറാഴ്ച ശിശു ക്ഷേമ സമിതിയിൽ നിന്നും പരിശോധനയ്ക്ക് ആളെത്തിയതോടെയാണ് സംഭവം പുറത്തറിയുന്നത്. അങ്കണവാടി അധികൃതരുടെ ഗുരുതര വീഴ്ചയാണെന്ന കണ്ടെത്തലിലാണ് കമ്മിഷൻ കേസെടുത്തിരിക്കുന്നത്.
വ്യാഴാഴ്ച വൈഗ വീട്ടിൽ എത്തിയ ഉടനെ നിർത്താതെ കരയുകയും ഛർദ്ദിക്കുകയും ചെയ്തു. ഇതേ അങ്കണവാടിയിൽ പഠിക്കുന്ന വൈഗയുടെ സഹോദരനാണ് കുട്ടി വീണ വിവരം വീട്ടുകാരെ അറിയിച്ചത്. പരിശോധനയിൽ തലയുടെ പിറകിൽ കഴുത്തിനോട് ചേർന്ന ഭാഗത്ത് മുഴച്ചിരിക്കുന്നത് കണ്ടു. ഉടൻ രക്ഷിതാക്കൾ അധികൃതരുമായി ബന്ധപ്പെട്ടു. വീണ വിവരം അറിയിക്കാൻ മറന്നുപോയെന്നാണ് അധികൃതർ രക്ഷിതാക്കൾക്ക് നൽകിയ മറുപടി. വീടിന് സമീപത്തെ ആശുപത്രിയിൽ എത്തിച്ച് പരിശോധന നടത്തിയ ശേഷമാണ് കുഞ്ഞിനെ എസ്.എ.ടി.യിലേക്ക് മാറ്റിയത് സംഭവത്തിൽ ബാലാവകാശ കമ്മിഷൻ സ്വമേധയാ കേസെടുത്തു. ബാലാവകാശ കമ്മീഷൻ മനോജ് കുമാറിന്റെ നിർദ്ദേശാനുസരണം ബാലാവകാശ കമ്മിഷൻ അംഗം ഡോ. എഫ് വിൽസൺ വൈകുന്നേരത്തോടെ എസ്.എ.ടി ആശുപത്രിയിലെത്തി കുട്ടിയുടെ മാതാപിതാക്കളിൽ നിന്നും മൊഴിയെടുത്തതിന് പിന്നാലെ കേസെടുത്തു.

അങ്കണവാടിയിൽ വീണ് കുഞ്ഞിന് ​ഗുരുതരപരിക്ക് ;ബാലാവകാശകമ്മിഷൻ കേസെടുത്തു

Kerala

വടകര: ഉത്തർപ്രദേശിലെ സംഭാൽ മസ്ജിദ് അനധികൃത സർവേക്കെതിരെ പ്രതിഷേധിച്ച യുവാക്കളെ അന്യായമായി വെടിവെച്ചു കൊന്ന പോലീസ് നടപടിക്കെതിരെ എസ്ഡിപിഐ വടകര നിയോജക മണ്ഡലം കമ്മിറ്റി പ്രതിഷേധ പ്രകടനം നടത്തി. ഒന്തം ഓവർ ബ്രിഡ്ജിൽ നിന്നും തുടങ്ങി വടകര ടൗൺ ചുറ്റി കോതി ബസാറിൽ സമാപിച്ചു. സമാപന പരിപാടിയി വടകര നിയോജകമണ്ഡലം പ്രസിഡന്റ്‌ ഷംസീർ ചോമ്പാല ഉദ്ഘാടനം ചെയ്തു.&nbsp;
വടകര നിയോജക മണ്ഡലം ട്രഷറർ ബഷീർ കെ കെ സ്വാഗതം പറഞ്ഞ പരിപാടിക്ക് സിദ്ധീഖ് പുത്തൂർ, നവാസ് വരിക്കോളി, ഫിയാസ് ടി, റാഷിദ്‌ കെ പി, ജലീൽ ഇ കെ, സിദ്ധീഖ് പള്ളിത്താഴ എന്നിവർ നേതൃത്വം നൽകി.

യു പി മസ്ജിദിലെ വെടിവെപ്പ്; വടകരയിൽ എസ് ഡി പി ഐ പ്രതിഷേധം

പാലക്കാട്: പാർട്ടിയുടെ എ പ്ളസ് മണ്ഡലമായ പാലക്കാട് ഉപതിരഞ്ഞെടുപ്പിൽ കനത്ത തോൽവി ഏറ്റുവാങ്ങിയതിന് പിന്നാലെ രാജി സന്നദ്ധത അറിയിച്ച് ബിജെപി സംസ്ഥാന പ്രസിഡന്റ് കെ സുരേന്ദ്രൻ. എന്നാൽ കെ.സുരേന്ദ്രൻ രാജിവയ്‌ക്കേണ്ടതില്ലെന്ന് കേന്ദ്ര നേതൃത്വം അറിയിച്ചതായാണ് അദ്ദേഹത്തെ പിന്താങ്ങുന്ന വിഭാഗം പറയുന്നത്. പാലക്കാട് തിരഞ്ഞെടുപ്പ് പരാജയപ്പെടുകയും പാർട്ടി ഭരിക്കുന്ന കോർപറേഷനിലേതടക്കം 10000ലധികം വോട്ട് ഇത്തവണ കുറയുകയും ചെയ്‌ത പശ്ചാത്തലത്തിൽ സുരേന്ദ്രനെതിരെ വ്യാപക വിമർശനം ഉയ‌ർന്നിരുന്നു.
എന്നാൽ പരാജയത്തിന് കാരണം ശോഭാ സുരേന്ദ്രനും ശോഭയെ പിന്തുണക്കുന്ന 18 നഗരസഭാ കൗൺസിലർമാരും ആണെന്ന് കേന്ദ്ര നേതൃത്വത്തെ സുരേന്ദ്രൻ അറിയിച്ചതായാണ് സൂചന. ശോഭാ സുരേന്ദ്രന്റെ ഡ്രൈവർ കണ്ണാടി പഞ്ചായത്ത് കേന്ദ്രീകരിച്ച് വോട്ട് മറിച്ചെന്നും സുരേന്ദ്രന്റെ പക്ഷം ആരോപിക്കുന്നുണ്ട്.

പാലക്കാട്ടെ തോൽവി, രാജിസന്നദ്ധത അറിയിച്ച് കെ സുരേന്ദ്രൻ

ആയഞ്ചേരി: പറമ്പില്‍ ഗവ.യുപി സ്‌കൂളിന്റെ കെട്ടിട നിര്‍മാണ പ്രവൃത്തി അന്തിമഘട്ടത്തിലേക്ക്. 2017ല്‍ ഒന്നാം പിണറായിസര്‍ക്കാര്‍ അനുവദിച്ച ഒരു കോടി രൂപ ഉപയോഗിച്ച് മനോഹര കെട്ടിടമാണ് ആയഞ്ചേരി ഗ്രാമപഞ്ചായത്തിലെ ഈ ഏക സര്‍ക്കാര്‍ യുപി സ്‌കൂളിനായി പണിതിരിക്കുന്നത്. തുടക്കത്തില്‍ എങ്ങും എത്താതെ കിടന്ന അവസ്ഥയിലായിരുന്നു നിര്‍മാണം. സ്ഥലം നിശ്ചയിച്ചക്കാന്‍ കഴിയാത്തതിനെ തുടര്‍ന്ന് കരാറുകാരന് പ്രവൃത്തി ആരംഭിക്കാനാവാത്ത സ്ഥിതിയായിരുന്നു. ഇതേ തുടര്‍ന്ന് പ്രവൃത്തിയില്‍ നിന്ന് ഒഴിവാക്കി തരണമെന്ന് ആവശ്യപ്പെട്ടു കരാറുകാരന്‍ കത്ത് നല്‍കുകയും ചെയ്തു. അനിശ്ചിതത്വത്തില്‍ നില്‍ക്കുമ്പോഴാണ് കെ.പി.കുഞ്ഞമ്മദ്കുട്ടി എംഎല്‍എയായി ചുമതല ഏറ്റെടുത്തതിനു ശേഷം സ്ഥലം സന്ദര്‍ശിക്കുകയും പരിഹാര നടപടികളെ കുറിച്ച് ചര്‍ച്ച നടത്തുകയും ചെയ്തത്. സ്‌കൂള്‍ പിടിഎ പ്രതിനിധികളുമായി നടത്തിയ ചര്‍ച്ചകളുടെ അടിസ്ഥാനത്തില്‍ സ്‌കൂളില്‍ കെട്ടിടത്തിന്റെ സ്ഥലംനിശ്ചയിക്കുകയുണ്ടായി.&nbsp;
പിന്നാലെ ടെന്‍ഡര്‍ ചെയ്ത് പ്രവൃത്തി ഊരാളുങ്കല്‍ ലേബര്‍ കോണ്‍ട്രാക്ട് കോ ഓപ്പറേറ്റീവ് സൊസൈറ്റി ഏറ്റെടുക്കുകയും ചെയ്തു. 2023 ജൂണില്‍ പ്രവൃത്തി ഉദ്ഘാടനം നടത്തിയതിനു പിന്നാലെ കാര്യങ്ങള്‍ തകൃതിയായി മുന്നോട്ടുപോയി. രണ്ട് നിലകള്‍ കൂടി നിര്‍മിക്കുന്നതിനായി പൈല്‍ ഫൗണ്ടേഷന് മുകളിലാണ് കെട്ടിടം ഉയരുന്നത്. സ്റ്റേജ് കം ക്ലാസ് മുറി, രണ്ട് ക്ലാസ് മുറികള്‍, ടോയ്‌ലറ്റ് ബ്ലോക്ക്, സ്റ്റെയര്‍കെയ്‌സ് എന്നിവയുടെ നിര്‍മാണമാണ് പൂര്‍ത്തീകരിച്ചത്. ഒന്നാം നിലയുടെ വൈദ്യുതീകരണ പ്രവൃത്തികള്‍ ഈ വര്‍ഷം തന്നെ പൂര്‍ത്തിയാകും. പൊതുമരാമത്ത് വകുപ്പ് കെട്ടിട വിഭാഗത്തിന്റെ നേതൃത്വത്തില്‍ സമയബന്ധിതമായാണ് പ്രവൃത്തി നടക്കുന്നതെന്നും വിദ്യാഭ്യാസ മേഖലയുടെ സമഗ്ര പുരോഗതിയാണ് എല്‍ഡിഎഫ് സര്‍ക്കാര്‍ ലക്ഷ്യമിടുന്നതെന്നും കെ.പി.കുഞ്ഞമ്മദ്കുട്ടി എംഎല്‍എ പറഞ്ഞു.

പറമ്പിൽ ഗവൺമെൻറ് യുപി സ്കൂൾ കെട്ടിട നിർമ്മാണ പ്രവർത്തി അന്തിമഘട്ടത്തിലേക്ക്

പാലക്കാട്: തന്റെ ഒപ്പമുള്ളയാള്‍ മേക്കോവര്‍ ആര്‍ട്ടിസ്റ്റിനോട് മോശമായി പെരുമാറിയ സംഭവം അറിഞ്ഞിരുന്നുവെന്നും അതില്‍ ക്ഷമചോദിക്കുന്നുവെന്നും പി.സരിന്‍.
പണം നഷ്ടമായത് എങ്ങനെയെന്ന് ഉറപ്പില്ല. ആരെങ്കിലും എടുത്തുവെന്ന് പറയാനാവില്ല. അവിടെ തന്നെയാണോ വെച്ചതെന്ന് പ്രവര്‍ത്തകരോട് അന്വേഷിച്ചിരുന്നു. എന്നാല്‍ അത് അദ്ദേഹത്തിന്റെ പേരില്‍ പറഞ്ഞത് തികച്ചും നിരുത്തരവാദപരമായിപ്പോയി. നാല് വര്‍ഷമായി ബാവയെ അറിയാമെന്നും സരിൻ പറഞ്ഞു. ഇന്നലെ രാത്രി തന്നെ വിളിച്ചുവെങ്കിലും എടുക്കാന്‍ പറ്റിയില്ല. രാവിലെ വിളിക്കുമ്പോഴേക്കും അദ്ദേഹം മാധ്യമങ്ങളെ കണ്ടിരുന്നുവെന്നും സരിന്‍ വ്യക്തമാക്കി.
വിവിധ രാഷ്ട്രീയ നേതാക്കളുടേയും സെലിബ്രിറ്റികളുടെയും മേക്കോവര്‍ ആര്‍ട്ടിസ്റ്റായി പ്രവര്‍ത്തിച്ച് ശ്രദ്ധേയനായ ബാവ പട്ടാമ്പിയാണ് പി.സരിനെതിരെ രംഗത്തുവന്നത്.&nbsp;

ഹെയര്‍സ്റ്റൈലിസ്റ്റിനോട് ക്ഷമാപണം നടത്തി പി. സരിന്‍

സംസ്ഥാനത്ത് സ്വര്‍ണ വിലയില്‍ കനത്ത ഇടിവ്. പവന്റെ വില 800 രൂപ കുറഞ്ഞ് 57,600 രൂപയിലെത്തി. ഗ്രാമിന്റെ വിലയാകട്ടെ 100 രൂപ കുറഞ്ഞ് 7,200 രൂപയുമായി.
അന്താരാഷ്ട്ര വിപണിയില്‍ വ്യാപകമായി ലാഭമെടുപ്പ് നടന്നതാണ് സ്വര്‍ണത്തെ ബാധിച്ചത്. ദുര്‍ബലമായ ആഗോള സൂചനകളും സ്വര്‍ണത്തിന് തിരിച്ചടിയായി.ആഗോള വിപണിയില്‍ സ്‌പോട് ഗോള്‍ഡ് വില ട്രോയ് ഔണ്‍സിന് 2,719.19 ഡോളര്‍ നിലവാരത്തിലാണ്. രാജ്യത്തെ കമ്മോഡിറ്റി വിപണിയായ എംസിഎക്സില്‍ 10 ഗ്രാം 24 കാരറ്റ് സ്വര്‍ണത്തിന്റെ വില 76,644 രൂപയുമാണ്.

സ്വര്‍ണ വിലയില്‍ കനത്ത ഇടിവ് ; 800 രൂപ കുറഞ്ഞ് പവന് 57,600 രൂപയായി

വടകര: കെ.എസ്.എസ്.പി.യു. മേപ്പയിൽ യൂണിറ്റിൻ്റെ നേതൃത്വത്തിൽ കുടുംബ സംഗമം നടത്തി. മേപ്പയിൽ പീപ്പ്ൾസ്‌ലൈബ്രറി ഹാളിൽ നടന്ന ചടങ്ങിൽ യൂണിറ്റ് പ്രസിഡണ്ട് ധനഞ്ജയൻ അദ്ധ്യക്ഷത വഹിച്ചു. സംസ്ഥാന കമ്മറ്റി അ൦ഗ൦ എ. വേലായുധൻ ഉദ്ഘാടനം ചെയ്തു. എ.പി. ബാബു മുഖ്യപ്രഭാഷണം നടത്തി. പാറോൽ ബാലകൃഷ്ണൻ, ടി.ഭാസ്ക്കരൻ, കെ.വി. ശശിധരൻ, എ.കെ.ബാലൻ, തങ്കമണി, വി. പി. സുരക്ഷാ എന്നിവർ സംസാരിച്ചു. കുടുംബാംഗങ്ങളുടെ കലാപരിപാടികളും ഉണ്ടായിരുന്നു.

കെ.എസ്.എസ്.പി.യു കുടുംബ സംഗമം നടത്തി

കളമശ്ശേരി; റിയല്‍ എസ്‌റ്റേറ്റ് ജീവനക്കാരിയായ ജെയ്‌സി എബ്രഹാമിന്റെ കൊലപാതകത്തില്‍ ഇന്‍ഫോപാര്‍ക്ക് ജീവനക്കാരന്‍ കസ്റ്റഡിയില്‍. ജെയ്‌സിയുടെ സുഹൃത്ത് കൂടിയായ ഗിരീഷ് കുമാറാണ് കസ്റ്റഡിയിലായത്. നവംബര്‍ 17- നാണ് ജെയ്‌സിയെ അപ്പാര്‍ട്‌മെന്റില്‍ മരിച്ചനിലയില്‍ കണ്ടെത്തുന്നത്. പോസ്റ്റ്‌മോര്‍ട്ടത്തില്‍ തലയ്‌ക്കേറ്റ ക്ഷതമാണ് മരണകാരണമെന്ന് ചൂണ്ടിക്കാട്ടിയിരുന്നു.
സി.സി.ടി.വി ദൃശ്യങ്ങള്‍ പരിശോധിച്ച് പോലീസ് നടത്തിയ അന്വേഷണത്തിലാണ് പ്രതിയെ കുറിച്ചുള്ള സൂചനകള്‍ പോലീസിന് ലഭിക്കുന്നത്. ജെയ്‌സിയും ഗിരീഷ് കുമാറും സുഹൃത്തുക്കളായിരുന്നു. ഇയാള്‍ ജെയ്‌സിയുടെ വീട്ടില്‍ കയറി സ്വര്‍ണാഭരണങ്ങളടക്കം മോഷ്ടിച്ചതായാണ് പോലീസ് പറയുന്നത്. ആഭരണങ്ങള്‍ കവരാനായാണ് കൊലനടത്തിയതെന്നാണ് കരുതുന്നത്.പ്രതിയെ കളമശ്ശേരി പോലീസ് വിശദമായി ചോദ്യം ചെയ്തുവരികയാണ്.

കളമശ്ശേരി ജെയ്‌സി കൊലപാതകം; സുഹൃത്തായ ഇന്‍ഫോപാര്‍ക്ക് ജീവനക്കാരന്‍ കസ്റ്റഡിയില്‍

കണ്ണൂർ : പുഷ്പനില്ലാത്ത ആദ്യ കൂത്തുപറമ്പ് രക്തസാക്ഷി ദിനമാണിന്ന്. 1994 നവംബർ 25നു കൂത്തുപറമ്പിലുണ്ടായ പൊലീസ് വെടിവെപ്പിൽ അഞ്ചു ഡി.വൈ.എഫ്.ഐ. പ്രവർത്തകർ കൊല്ലപെട്ടു . ഇതാണ്, കൂത്തുപറമ്പ് വെടിവെപ്പ് എന്നറിയപ്പെടുന്നത്. അന്ന് സഹകരണമന്ത്രിയായിരുന്ന എം.വി. രാഘവന്റെ യോഗത്തിനിടെ ഉണ്ടായ സംഘർഷമാണ് വെടിവെപ്പിൽ കലാശിച്ചത്. അന്ന്, പരിയാരം മെഡിക്കൽ കോളജ് സ്വകാര്യ സ്വാശ്രയ വത്കരണത്തെ എതിർത്തുകൊണ്ടുള്ള സമരമാണ് നടന്നത്.
അഞ്ചുപേരാണന്ന് കൊല്ലപ്പെട്ടത്. കെ.കെ. രാജീവൻ, കെ. ബാബു, മധു, കെ.വി. റോഷൻ, ഷിബുലാൽ എന്നിവരാണത്. വെടിയേറ്റ് 30 വർഷം ശയ്യാവലംബിയായി ജീവിച്ച പുഷ്പൻ ഇക്കഴിഞ്ഞ സെപ്റ്റംബറിലാണ് വിടവാങ്ങിയത്. പുഷ്പന് യാത്രാമൊഴിയേകാൻ കൂത്തുപറമ്പിൽ ഒരുക്കിയ ചിത്രപ്രദർശനത്തിൽ മധുവിനും റോഷനും രാജീവനും ഷിബുലാലിനും ബാബുവിനും ഒപ്പം പുഷ്പന്റെ കൂടി ചിത്രം ഉൾപ്പെടുത്തി പുതിയ രക്തസാക്ഷി പട്ടികയാണിപ്പോഴുള്ളത്.

​

പുഷ്പനില്ലാത്ത ആദ്യത്തെ കൂത്തുപറമ്പ് രക്തസാക്ഷി ദിനം

പാലക്കാട്: ചെയ്ത ജോലിക്ക് കൂലി ചോദിച്ചപ്പോള്‍ പാലക്കാട് എല്‍.ഡി.എഫ് സ്ഥാനാര്‍ഥിയായിരുന്ന പി. സരിന്റെ സഹായി മോഷണക്കുറ്റം ആരോപിച്ചുവെന്ന് ഹെയര്‍ സ്റ്റൈലിസ്റ്റ് ബാവ പട്ടാമ്പി. സരിന്റെ വീട്ടില്‍ നിന്ന് 35000 രൂപ മോഷ്ടിച്ചതായാണ് ആരോപിച്ചതെന്ന് ബാവ പറയുന്നു. സരിന്റെ കൂടെയുള്ള ബോസ് എന്നയാളാണ് മോഷണം ആരോപിച്ചതെന്നും ബാവ പറഞ്ഞു.
പത്തിരുപത് വര്‍ഷമായി ഈ മേഖലയില്‍ പ്രവര്‍ത്തിക്കുന്നയാളാണ് താനെന്നും സ്ഥാനാര്‍ഥി ആവുന്നതിന് മുമ്പ് നടന്ന ഫോട്ടോഷൂട്ട് മുതല്‍ വോട്ടെണ്ണുന്നതിന് തലേദിവസം വരെ സരിനെ ഒരുക്കിയത് താനാണെന്നും ബാവ പറഞ്ഞു.വോട്ടെണ്ണുന്നതിന് തലേ ദിവസം അദ്ദേഹത്തിന്റെ വീട്ടില്‍ വെച്ചാണ് ഒരുക്കങ്ങള്‍ നടന്നത്. അതുവരെയുള്ള പ്രതിഫലമെല്ലാം സരിന്‍ കൃത്യമായി ചെയ്തിരുന്നു. എന്നാല്‍ വോട്ടെണ്ണലിന്റെ തലേ ദിവസം ചെയ്ത ജോലിയുടെ പ്രതിഫലം ചോദിച്ചപ്പോഴാണ് മോഷണക്കുറ്റം ആരോപിച്ചതെന്ന് ബാവ പറയുന്നു.
'പി സരിന്റെ കൂടെ നടക്കുന്ന ബോസ് എന്നയാളോടാണ് പ്രതിഫലം ചോദിച്ചത്. എന്നാല്‍ തലേദിവസം ഞാന്‍ സരിന്റെ വീട്ടില്‍ നിന്ന് പോയതിന് ശേഷം അവിടെ നിന്ന് 35000 രൂപയോളം നഷ്ടമായെന്ന് ബോസ് പറഞ്ഞു. അത് ഞാനെടുത്തു എന്ന രീതിയിലാണ് ബോസ് സംസാരിച്ചത്.' ബാവ പറഞ്ഞു.ആത്മാര്‍ത്ഥതയോടെയാണ് അദ്ദേഹത്തിന് വേണ്ടി ജോലി ചെയ്തത്. സരിന്‍ ഇത് അറിഞ്ഞിരുന്നുവെങ്കില്‍ തന്നോട് വിളിച്ചുപറയണമായിരുന്നുവെന്നും സംഭവത്തില്‍ കേസുമായി മുന്നോട്ട് പോവാനാണ് താല്‍പര്യമെന്നും ബാവ പറഞ്ഞു.

ചെയ്ത ജോലിക്ക് കൂലി ചോദിച്ചപ്പോള്‍ മോഷണക്കുറ്റമാരോപിച്ചു; സരിനെതിരെ ഹെയര്‍ സ്റ്റൈലിസ്റ്റ്

പാലക്കാട്: വീട്ടമ്മയെ കുളത്തില്‍ മരിച്ചനിലയില്‍ കണ്ടെത്തി. കുത്തനൂര്‍ പടിഞ്ഞാറേത്തറ നമ്പൂരാത്ത് വീട്ടില്‍ സുഷമ (51)യാണ് മരിച്ചത്. വീടിനടുത്തുള്ള ഏറ്റാംകുളത്ത് ഞായറാഴ്ച രാവിലെ എട്ടരയോടെയാണ് സംഭവം.
സുഷമയെ ഉടന്‍ പ്രദേശവാസികള്‍ ജില്ലാ ആശുപത്രിയില്‍ എത്തിച്ചെങ്കിലും രക്ഷിക്കാന്‍ കഴിഞ്ഞില്ല. കുഴല്‍മന്ദം പൊലീസ് ഇന്‍ക്വസ്റ്റ് നടത്തി. സംസ്‌കാരം തിങ്കളാഴ്ച രാവിലെ ഒമ്പതിന് പാമ്പാടി ഐവര്‍മഠം ശ്മശാനത്തില്‍. ഭര്‍ത്താവ്: ശിവന്‍ (കുത്തനൂര്‍ ഹോമിയോ ആശുപത്രി). മകന്‍: ആദിത്ത്.

വീട്ടമ്മയെ കുളത്തില്‍ മരിച്ചനിലയില്‍ കണ്ടെത്തി

തിരുവനന്തപുരം: പാലക്കാട് ഉപതിരഞ്ഞെടുപ്പ് റിപ്പോര്‍ട്ടിംഗിന്റെ ഭാഗമായി നല്‍കിയ വാര്‍ത്തകളുടെ പേരില്‍ മാധ്യമപ്രവർത്തകൻ ആര്‍ റോഷിപാലിനെതിരെ നടക്കുന്ന കോണ്‍ഗ്രസ് പ്രവര്‍ത്തകരുടെ സൈബര്‍ ആക്രമണത്തില്‍ പൊലീസ് നടപടി ആവശ്യപ്പെട്ട് കേരള പത്രപ്രവര്‍ത്തക യൂണിയന്‍. മുഖ്യമന്ത്രിക്കും സംസ്ഥാന പൊലീസ് മേധാവിക്കും പരാതി നല്‍കുമെന്ന് യൂണിയന്‍ നേതാക്കള്‍ അറിയിച്ചു.
'ഒത്തുകിട്ടിയാല്‍ തീര്‍ത്തേക്കണമെന്ന് ആഹ്വാനം ചെയ്യുന്ന നിസാര്‍ കുംമ്പിള എന്നയാളുടെ ഫേസ്ബുക്ക് പോസ്റ്റ് ഞെട്ടിക്കുന്നതാണ്. തിരഞ്ഞെടുപ്പ് ഫലം വന്നയുടന്‍ വിജയാഹ്ലാദത്തിന്റെ മറവിലുള്ള ഇത്തരം പ്രവണതകള്‍ അംഗീകരിക്കാന്‍ കഴിയില്ല. വാര്‍ത്ത നല്‍കിയതിന്റെ പേരില്‍ റോഷിപാലിനെതിരെ നടക്കുന്ന കൊലവിളിയിലും സൈബര്‍ ആക്രമണത്തിലും പത്രപ്രവര്‍ത്തക യൂണിയന്‍ സംസ്ഥാന സംസ്ഥാന കമ്മിറ്റി പ്രതിഷേധിക്കുന്നു' കെയുഡബ്ല്യൂജെ അറിയിച്ചു.
സൈബര്‍ ആക്രമണത്തിന് പിന്നിലുള്ളവരെ കണ്ടെത്തി നിയമനടപടികള്‍ സ്വീകരിക്കണമെന്നും കെയുഡബ്ല്യൂജെ ആവശ്യപ്പെട്ടു.

ആര്‍ റോഷിപാലിനെതിരെയായ സൈബർആക്രമണം; നടപടി ആവശ്യപ്പെട്ട് പത്രപ്രവര്‍ത്തക യൂണിയൻ

കോഴിക്കോട്: കൂടരഞ്ഞിയിലെ മേലെ കൂമ്പാറയില്‍ ടെമ്പോ ട്രക്ക് താഴ്ചയിലേക്ക് മറിഞ്ഞ് ഒരാള്‍ മരിച്ചു. പശ്ചിമ ബംഗാൾ സ്വദേശി ഷാഹിദുൽ ആണ് മരിച്ചത്. പതിനാറോളം പേര്‍ക്ക് പരിക്കേറ്റു. ജോലി കഴിഞ്ഞ് മടങ്ങുകയായിരുന്ന തൊഴിലാളികളാണ് അപകടത്തില്‍പ്പെട്ടത്. ഇതില്‍ രണ്ട് പേര്‍ മലയാളികളാണ്
വാഹനം നിയന്ത്രണം വിട്ട് മറിയുകയായിരുന്നു. അപകടത്തില്‍പെട്ടവരില്‍ രണ്ട് പേരുടെ നില ഗുരുതരമാണ്.

കൂടരഞ്ഞിയിൽ ടെമ്പോ ട്രക്ക് നിയന്ത്രണം വിട്ട് മറിഞ്ഞു, ഒരാള്‍ മരിച്ചു, നിരവധി പേര്‍ക്ക് പരിക്ക്

Kozhikode

ആലുവ: ഹേമ കമ്മിറ്റി റിപ്പോർട്ടിന് പിന്നാലെ മുകേഷ് അടക്കം ഏഴോളം പേർക്കെതിരേ നൽകിയ പീഡന പരാതി പിന്‍വലിക്കുന്നില്ലെന്ന് ആലുവ സ്വദേശിയായ നടി. തനിക്കെതിരായ പോക്സോ കേസിൽ അന്വേഷണം നടക്കുന്നില്ലെന്നതിൽ പ്രതിഷേധിച്ച് നേരത്തെ നൽകിയ പീഡന പരാതി പിൻവലിക്കാൻ തീരുമാനിച്ചതായി നടി കഴിഞ്ഞ ദിവസം സാമൂഹിക മാധ്യമങ്ങളിലൂടെ പറഞ്ഞിരുന്നു. എന്നാൽ പരാതി പിൻവലിക്കുന്നില്ലെന്നും തനിക്കുണ്ടായ ദുരന്തം ഇനിയാര്‍ക്കും ഉണ്ടാവരുതെന്നും നടി പറഞ്ഞു.
നടന്‍മാരായ മുകേഷ് എം.എല്‍.എ, ജയസൂര്യ, ബാലചന്ദ്രമേനോന്‍, ഇടവേള ബാബു എന്നിവരടക്കം ഏഴുപേര്‍ക്കെതിരേയായിരുന്നു പീഡന പരാതി നല്‍കിയത്. എന്നാല്‍, ഇതില്‍ കാര്യമായ അന്വേഷണം നടത്തുന്നതിന് പകരം, തന്നെ കുടുക്കുകയാണ് ചെയ്തതെന്ന് നടി നേരത്തേ പറഞ്ഞിരുന്നു.
"പീഡനപരാതി നൽകിയതിന് പിന്നാലെ ഞാൻ ഒറ്റപ്പെടുന്ന സാ​ഹചര്യമാണ് ഉണ്ടായത്. ഒറ്റയാൾ പോരാട്ടം തന്നെയാണ് നടത്തിയത്. ഇതിന്റെ ഇടയിലാണ് തനിക്കെതിരായ പോക്സോ കേസ് കൂടി വന്നത്. എന്നാൽ എന്നെ പ്രതിസ്ഥാനത്ത് നിർത്തിക്കൊണ്ട് എന്നെ തെറ്റുകാരിയായി ചിത്രീകരിക്കുകയാണ് ചെയ്തത്. കൃത്യമായി അന്വേഷണം നടത്തുകയോ എന്നോട് പരാതിയെപ്പറ്റി അന്വേഷിക്കുകയോ ചെയ്തിട്ടില്ല. നടന്മാർക്കെതിരേ പീഡന പരാതി നൽകിയതുകൊണ്ട് മാത്രമുണ്ടായ പരാതി ആണ് അത്. പക്ഷേ എന്റെ ഒറ്റയാൾ പോരാട്ടത്തിൽ എന്നോടൊപ്പം ആരുമില്ലെന്ന് തോന്നിയതുകൊണ്ടാണ് പരാതി പിൻവലിക്കാൻ തീരുമാനിച്ചത്. എന്റെ കുടുംബത്തോട് പോലും ഒരു വാക്ക് ചോദിക്കാതെയാണ് അങ്ങനെയൊരു തീരുമാനമെടുത്തത്. ഭർത്താവ് അടക്കം എല്ലാ പിന്തുണയു തരുന്നു. കേസുമായി മുന്നോട്ട് പോകണമെന്നും അന്വേഷണം അതിന്റെതായ വഴിക്ക് നടക്കട്ടേയെന്നും കുടുംബമടക്കം പറഞ്ഞതുകൊണ്ടാണ് പരാതി പിൻവലിക്കാനുള്ള തീരുമാനം മാറ്റുന്നത്."- നടി പറഞ്ഞു.

മുകേഷ് ഉൾപ്പെടെയുള്ളവർക്കെതിരെ നൽകിയ പരാതി പിന്‍വലിക്കുന്നില്ലെന്ന് നടി

തിരുവനന്തപുരം: അനുജന്റെ മരണവാര്‍ത്തയറിഞ്ഞ് ജ്യേഷ്ഠന്‍ കുഴഞ്ഞുവീണ് മരിച്ചു. ആറ്റിങ്ങല്‍ കൊടുമണ്‍ ജയഹരിതത്തില്‍ ഹരി (59) ഹൃദയാഘാതം മൂലമാണ് മരണപ്പെട്ടത്. ഹരിയുടെ മരണവാര്‍ത്തയറിഞ്ഞ ജ്യേഷ്ഠന്‍ ആറ്റിങ്ങല്‍ കരിച്ചയില്‍ രാമനിലയത്തില്‍ രാമകൃഷ്ണന്‍ പിള്ള (65) കുഴഞ്ഞുവീഴുകയായിരുന്നു.
തിരുവനന്തപുരം മെഡിക്കല്‍ കോളജില്‍ എത്തിച്ചെങ്കിലും ജീവന്‍ രക്ഷിക്കാനായില്ല. വെരിക്കോസ് സംബന്ധമായ അസുഖത്തിന് ചികിത്സയിലായിരുന്നു ഹരി. രണ്ടുപേരും കുടുംബങ്ങളായി രണ്ട് സ്ഥലത്താണ് താമസം. രാമകൃഷ്ണന്റെ മകളുടെ വിവാഹ നിശ്ചയം ഡിസംബര്‍ ആറിന് നടക്കാനിരിക്കുകയായിരുന്നു.
ജ്യേഷ്ഠനും അനുജനും തമ്മില്‍ അടുത്ത ആത്മബന്ധം പുലര്‍ത്തിയിരുന്നവരാണ്. രണ്ടുപേരും പ്രവാസികളായിരുന്നു. ഇരുവരുടേയും അച്ഛനും അമ്മയും നേരത്തെ മരണപ്പെട്ടിരുന്നു. ഹരിയുടെ സംസ്‌കാരം രാവിലെ ശാന്തി കവാടത്തിലും രാമകൃഷ്ണന്റെ സംസ്‌കാരം ഉച്ചകഴിഞ്ഞ് വീട്ടുവളപ്പിലും നടക്കും.

അനുജന്റെ മരണവാര്‍ത്തയറിഞ്ഞ് ജ്യേഷ്ഠന്‍ കുഴഞ്ഞുവീണ് മരിച്ചു

കൊച്ചി : മദ്യപിച്ച് അമിതവേഗത്തില്‍ വാഹനം ഓടിച്ചതിന് നടന്‍ ഗണപതിക്കെതിരേ കേസ്. എറണാകുളം കളമശ്ശേരി പോലീസ് നടനെ അറസ്റ്റ് ചെയ്ത് ജാമ്യത്തില്‍ വിട്ടയച്ചു.
ശനിയാഴ്ച രാത്രിയാണ് സംഭവം. നടന്‍ അമിതവേഗത്തില്‍ സഞ്ചരിച്ച വാഹനം പോലീസ് തടഞ്ഞുനിര്‍ത്തി പരിശോധിച്ചപ്പോള്‍ മദ്യപിച്ചതായി കണ്ടെത്തുകയായിരുന്നു.

മദ്യപിച്ച് അമിതവേഗത്തില്‍ വാഹനം ഓടിച്ചു; നടന്‍ ഗണപതിക്കെതിരേ കേസ്

കണ്ണൂര്‍: വളപട്ടണം മന്നയില്‍ പൂട്ടിയിട്ട വീട് കുത്തിത്തുറന്ന് ഒരു കോടി രൂപയും 300 പവന്‍ സ്വര്‍ണവും മോഷ്ടിച്ചു. അരി മൊത്തവ്യാപാരം നടത്തുന്ന കെ.പി. അഷ്‌റഫിന്റെ പൂട്ടിയിട്ടിരുന്ന വീട് കുത്തിത്തുറന്നാണ് മോഷണം നടത്തിയിരിക്കുന്നത്. കിടപ്പുമുറിയിലെ ലോക്കറില്‍ സൂക്ഷിച്ചിരുന്ന സ്വര്‍ണവും പണവുമായി മോഷ്ടിച്ചതെന്നാണ് റിപ്പോര്‍ട്ട്.
മന്ന കെ.എസ്.ഇ.ബി. ഓഫീസിന് സമീപമുള്ള വീട്ടിലാണ് മോഷണം നടന്നിരിക്കുന്നത്. വീട്ടിലുള്ളവര്‍ 19-ാം തിയതിയാണ് വീട് പൂട്ടി മധുരയിലെ സുഹൃത്തിനെ സന്ദര്‍ശിക്കാന്‍ പോയത്. യാത്ര കഴിഞ്ഞ ഞായറാഴ്ച രാത്രി തിരിച്ചെത്തിയപ്പോഴാണ് വീട്ടില്‍ മോഷണം നടന്ന വിവരം തിരിച്ചറിയുന്നത്.അടുക്കള ഭാഗത്തെ ജനലിന്റെ ഗ്രില്ല് മുറിച്ചുമാറ്റിയാണ് മോഷ്ടക്കള്‍ വീടിനുള്ളില്‍ കടന്നത്. മൂന്നുപേര്‍ മതില്‍ചാടി വീടിനുള്ളില്‍ കടക്കുന്നതിന്റെ ദൃശ്യങ്ങള്‍ സി.സി.ടി.വിയില്‍ പതിഞ്ഞിട്ടുണ്ട്. ഇന്‍സ്‌പെക്ടര്‍ ടി.പി.സുമേഷിന്റെ നേതൃത്വത്തിലുള്ള പോലീസ് സംഘം സംഭവ സ്ഥലത്തെത്തി പരിശോധന നടത്തി.

കണ്ണൂരില്‍ വന്‍കവര്‍ച്ച; പൂട്ടിയിട്ട വീട്ടിൽനിന്ന് 300പവന്‍ സ്വര്‍ണവും ഒരുകോടി രൂപയും മോഷ്ടിച്ചു

പാലക്കാട്: ഉപതിരഞ്ഞെടുപ്പിൽ മൂന്നാം സ്ഥാനത്തെത്തിയ എൽഡിഎഫ് സ്വതന്ത്ര സ്ഥാനാർത്ഥി ഡോ. പി സരിനെ ട്രോളി കോൺഗ്രസ് നേതാവ് ജ്യോതികുമാർ ചാമക്കാല. പാലക്കാട് തിരഞ്ഞെടുപ്പിൽ വിജയിച്ച ശേഷം ആദ്യം യുഡിഎഫ് ഓഫീസിൽ എത്തുമെന്ന് മാധ്യമങ്ങളോട് പ്രതികരിച്ച സംഭവം ചൂണ്ടിക്കാട്ടിയായിരുന്നു ട്രോൾ. 'പാലക്കാട് വിജയിച്ച ശേഷം നേരെ യുഡിഎഫ് കേന്ദ്ര തിരഞ്ഞെടുപ്പ് കമ്മിറ്റി ഓഫീസിൽ എത്തുമെന്നറിയിച്ച പി സരിനെയും കാത്ത്'- എന്നായിരുന്നു ട്രോളിക്കൊണ്ട് ജ്യോതികുമാർ ചാമക്കാല ഫേസ്ബുക്കിൽ കുറിച്ചത്.
പാലക്കാട് വിജയിച്ച ശേഷം ഷാഫി പറമ്പിലിന്റെ ഓഫീസിലേക്കും യു.ഡി.എഫിന്റെ ഓഫീസിലേക്കുമായിരിക്കും ആദ്യം എത്തുകയെന്ന് പി.സരിൻ നേരത്തെ മാധ്യമങ്ങളോട് പറഞ്ഞിരുന്നു. എന്നാൽ, ഫലം വന്നപ്പോൾ പാലക്കാട് മൂന്നാം സ്ഥാനത്തായിരുന്നു സരിൻ.

'വിജയിച്ച ശേഷം യു.ഡി.എഫ് ഓഫീസിൽ എത്തുമെന്നറിയിച്ച പി. സരിനെയും കാത്ത്...'; ട്രോളുമായി ജ്യോതികുമാർ ചാമക്കാല

ചേലക്കര : ഉപതെരഞ്ഞെടുപ്പ് ഫലം ഇടതുപക്ഷ ജനാധിപത്യ മുന്നണി സർക്കാരിനെതിരായ വിധിയെഴുത്താകുമോ എന്നു ചോദിച്ചവർക്കുള്ള മറുപടിയാണ് ഇന്നുണ്ടായതെന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ. തെരഞ്ഞെടുപ്പിൽ ഒരു ഭരണവിരുദ്ധവികാരവും പ്രകടിപ്പിക്കപ്പെട്ടിട്ടില്ലെന്നും‌ മൂന്നാം ടേമിലേക്ക് സർക്കാർ പോകുമെന്നതിന്റെ സൂചനയാണ് ഈ തെരഞ്ഞെടുപ്പ് ഫലമെന്നും അദ്ദേഹം പറഞ്ഞു.&nbsp;
ചേലക്കര എൽഡിഎഫ് സ്ഥാനാർഥി യു ആർ പ്രദീപിന്റേത് ഉജ്വലമായ വിജയമാണ്. 2016ൽ യു ആർ പ്രദീപ് നേടിയതിനേക്കാൾ ഭൂരിപക്ഷത്തിൽ ഇത്തവണ ജയിക്കാനായിട്ടുണ്ട്. പാർലമെന്റ് തെരഞ്ഞെടുപ്പിലേതിനേക്കാൾ ഭൂരിപക്ഷവും ലഭിച്ചു. എല്ലാ പിന്തിരിപ്പൻ ശക്തികളുടെയും വർ​ഗീയ വാദികളുടെയും അതിനെ പിന്തുണക്കുന്ന മാധ്യമ ശൃംഖലകളുടെയും എതിർപ്പുകളെ അതിജീവിച്ചുകൊണ്ടാണ് എൽഡിഎഫ് വിജയം. കേരള രാഷ്ട്രീയം ഏങ്ങോട്ടേക്കാണെന്നതിന് വ്യക്തത നൽകുന്ന തെരഞ്ഞെടുപ്പ് വിജയമാണ് ചേലക്കരയിലേത്. വരാൻ പോകുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിലും അതിന് ശേഷം നടക്കുന്ന അസംബ്ലി തെരഞ്ഞെടുപ്പിലും കേരളത്തിന്റെ ഭാവി നിർണയിക്കുന്നതിൽ ഇടതു പക്ഷ ജനാധിപത്യ മുന്നണിക്ക് നിർണായക ചുമതല നിർവഹിക്കാമെന്നു തന്നെയാണ് ചേലക്കര തെരഞ്ഞെടുപ്പ് ഫലം വ്യക്തമാക്കുന്നതെന്നും എം വി ​ഗോവിന്ദൻ പറഞ്ഞു.
പാലക്കാട് യുഡിഎഫ് ജയിച്ചത് എല്ലാ വർ​ഗീയ ശക്തികളെയും ചേർത്തുകൊണ്ടാണ് ഒരു മഴവിൽ സഖ്യം പോലെ പ്രവർത്തിച്ചാണ്. യുഡിഎഫിനു വേണ്ടി പ്രവർത്തിച്ച ഏറ്റവും വലിയ വിഭാ​ഗം ജമാഅത്തെ ഇലസ്ലാമിയും എസ്ഡിപിഐയുമാണ്. തെരഞ്ഞെടുപ്പ് ഫലം പുറത്തു വരും മുൻപ് തന്നെ പാലക്കാട് ആദ്യം ആഹ്ലാദ പ്രകടനം നടത്തിയത് എസ്ഡിപിഐ ആണ്. കോൺ​ഗ്രസിന്റെ വിജയത്തിൽ എസ്ഡിപിഐക്കും ജമാഅത്തെ ഇസ്ലാമിക്കുമുള്ള പങ്ക് അവർ തന്നെ പ്രകടനം നടത്തി പ്രഖ്യാപിക്കുകയായിരുന്നു. വയനാട്ടിലെ യുഡിഎഫ് വിജയം പ്രതീക്ഷിച്ചതാണെന്നും മൂന്ന് മണ്ഡലത്തിലും ബിജെപിയുടെ പരാജയം ആഹ്ലാദം ഉണ്ടാക്കുന്നതാണെന്നും എം വി ​ഗോവിന്ദൻ പറഞ്ഞു.

പാലക്കാട്ടെ യുഡിഎഫ് വർ​ഗീയ ശക്തികളെ ഒപ്പം നിർത്തി ;ചേലക്കരയിലെ വിജയം മൂന്നാം സർക്കാരിന്റെ മുന്നോടിയായെന്നും  എം വി ​ഗോവിന്ദൻ

ഒരു ഉപതിരഞ്ഞെടുപ്പിലെ സ്ഥാനാര്‍ഥിത്വം ഇത്രമാത്രം ചര്‍ച്ചയാവാന്‍ കാരണമെന്താണ്? ആരാണ് രാഹുല്‍ മാങ്കൂട്ടത്തില്‍ ? ചാനല്‍ ചര്‍ച്ചകളിലെ കോണ്‍ഗ്രസ് പ്രതിനിധിയായ രാഹുലിനെ ഷാഫി പറമ്പിലിന് പകരമായി പാലക്കാട്ടേക്കയക്കാന്‍ തീരുമാനിക്കാൻ നേതൃത്വം അധികം സമയമെടുത്തില്ല. ആ തീരുമാനം ഒട്ടും തെറ്റായിപ്പോയില്ല എന്ന് രാഹുല്‍ തെളിയിച്ചു.കരുത്തരായ സ്ഥാനാര്‍ഥികളോട് മത്സരിച്ച് കന്നിയങ്കത്തില്‍ തിളക്കമാര്‍ന്ന വിജയം നേടിയ രാഹുല്‍ മാങ്കുട്ടത്തിലിന്റെ രാഷ്ട്രീയയാത്രയും തെറ്റിയില്ല.&nbsp;
സമീപകാല ചരിത്രത്തില്‍ തിരഞ്ഞെടുപ്പിനുള്ള തീയ്യതി പ്രഖ്യാപിച്ച് മണിക്കൂറുകള്‍ക്കകം ഒരു സ്ഥാനാര്‍ഥിയെ പ്രഖ്യാപിക്കുന്നത് അധികം കണ്ടിട്ടുമില്ല.വിഡി സതീശനും കെ സുധാകരനുമെല്ലാം രാഹുലിനെ പിന്തുണച്ചെത്തി. ആളുകളുടെ ഹൃദയം കീഴടക്കിയ സമരനായകനാണ് രാഹുലെന്ന് സതീശനും പുതിയ തലമുറയുടെ പ്രതീകമാണെന്ന് സുധാകരനും പറഞ്ഞു.&nbsp;
പത്തനംതിട്ട കാതോലിക്കേറ്റ് കോളേജില്‍ പഠിക്കുമ്പോള്‍ 2006-ല്‍ കെ.എസ്.യു വിലൂടെയാണ് രാഹുല്‍ രാഷ്ട്രീയ ജീവിതം ആരംഭിക്കുന്നത്. തൊട്ടടുത്ത വര്‍ഷം കെ.എസ്.യുവിന്റെ അടൂര്‍ നിയോജക മണ്ഡലം പ്രസിഡന്റും യൂത്ത് കോണ്‍ഗ്രസിന്റെ പെരിങ്ങനാട് മണ്ഡലം കമ്മിറ്റി പ്രസിഡന്റുമായി. പിന്നീട് യൂണിവേഴ്‌സിറ്റി കൗണ്‍സിലര്‍, കെ.എസ്.യു, ജില്ലാ പ്രസിഡന്റ്, എന്‍.എസ്.യു.ഐ, ദേശീയ സെക്രട്ടറി, കെ.എസ്.യു, സംസ്ഥാന ജനറല്‍ സെക്രട്ടറി, യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി, കെ.പി.സി.സി, അംഗം, യൂത്ത് കോണ്‍ഗ്രസ് സംസ്ഥാന സെക്രട്ടറി അങ്ങനെ 18 വര്‍ഷം കൊണ്ട് പാര്‍ട്ടിയിലെ വിവിധ ചുമതലകള്‍, പദവികള്‍. ഒടുവില്‍ 2023ല്‍ യൂത്ത് കോണ്‍ഗ്രസിന്റെ സംസ്ഥാന പ്രസിഡന്റായും തിരഞ്ഞെടുക്കപ്പെട്ടു.
അച്ഛനോടുള്ള വൈകാരികമായ അടുപ്പമാണ് തന്നെ കോണ്‍ഗ്രസുകാരനാക്കിയതെന്ന് രാഹുല്‍ ഒരു അഭിമുഖത്തില്‍ പറഞ്ഞിട്ടുണ്ട്. പത്തനംതിട്ട മുണ്ടപ്പള്ളി പാറക്കൂട്ടം ആറ്റിവിളാകത്ത് എസ്. രാജേന്ദ്ര കുറുപ്പ് എന്ന രാഹുലിന്റെ അച്ഛന്‍ ഇന്ത്യന്‍ ആര്‍മി ഓഫീസറും കോണ്‍ഗ്രസുകാരനുമായിരുന്നു. ഖദറിട്ട് നടക്കുന്ന മനുഷ്യന്‍. രാഹുലിന്റെ കുട്ടിക്കാലത്ത് തന്നെ അച്ഛന്‍ മരണപ്പെട്ടതോടെ അമ്മ ബീനയായി പിന്നെയെല്ലാം. ഒരിക്കല്‍ രാഹുല്‍ അച്ഛന്റെ ഖദറിട്ടുനോക്കിയപ്പേള്‍ വൈകാരികമായ ഒരു സുരക്ഷിതത്വം അനുഭവപ്പെട്ടു. അന്ന് വെറുതെയിട്ട് നോക്കിയ ഖദര്‍ മനസിനകത്ത് ഇപ്പോഴും ധരിക്കുന്നുണ്ടെന്നാണ് രാഹുല്‍ പറയുന്നത്.&nbsp;
അടൂര്‍ തപോവന്‍ സ്‌കൂള്‍, പന്തളം സെന്റ് ജോണ്‍സ് പബ്ലിക് സ്‌കൂള്‍ എന്നിവിടങ്ങളില്‍ നിന്ന് പ്രാഥമിക വിദ്യാഭ്യാസം. പത്തനംതിട്ട കാതോലിക്കേറ്റ് കോളേജില്‍ നിന്ന് ബിരുദം. ഡല്‍ഹി സെയ്ന്റ് സ്റ്റീഫന്‍സ് കോളേജില്‍നിന്ന് ചരിത്രത്തില്‍ എം.എ.യും ഇന്ദിരാഗാന്ധി ഓപ്പണ്‍ യൂണിവേഴ്‌സിറ്റിയില്‍നിന്ന് ഇംഗ്ലീഷില്‍ എം.എ.യും നേടി. നിലവില്‍ കോട്ടയം യൂണിവേഴ്‌സിറ്റിയില്‍ പിഎച്ച്ഡി ചെയ്യുകയാണ്. രാഹുല്‍ അധ്യക്ഷനായതുമുതല്‍ നിരവധി സമരപരിപാടികള്‍ക്കാണ് യൂത്ത് കോണ്‍ഗ്രസ് രൂപം കൊടുത്തത്. സര്‍ക്കാര്‍ വിരുദ്ധ സമരങ്ങളിലൂടെ ശ്രദ്ധേയനായി. ഈ വര്‍ഷമാദ്യം സെക്രട്ടറിയേറ്റ് മാര്‍ച്ചിനിടെയുണ്ടായ സംഘര്‍ഷവുമായി ബന്ധപ്പെട്ട് അടൂരിലെ വീട് വളഞ്ഞ് രാഹുലിനെ അറസ്റ്റ് ചെയ്തത് കേരളമൊട്ടാകെ ചര്‍ച്ചയായിരുന്നു.
തൃക്കാക്കരയിലും, പുതുപ്പള്ളിയിലുമുള്‍പ്പെടെ നിരവധി ഉപതെരഞ്ഞെടുപ്പുകളില്‍ കോണ്‍ഗ്രസിന്റെ മുഖ്യപ്രചാരകനായിരുന്നു രാഹുല്‍.2023-ല്‍ യൂത്ത് കോണ്‍ഗ്രസ് സംസ്ഥാന പ്രസിഡന്റായിരുന്ന ഷാഫി പറമ്പില്‍ സ്ഥാനമൊഴിഞ്ഞപ്പോഴാണ് അതേ സ്ഥാനത്തേക്ക് രാഹുല്‍ എത്തുന്നത്. രാഷ്ട്രീയത്തില്‍ മാത്രമല്ല വ്യക്തിജീവിതത്തിലും ഷാഫിയുമായി രാഹുലിന് വളരെയധികം അടുപ്പമുണ്ട്. മൂത്ത സഹോദരനെ പോലെയാണ് ഷാഫിയെന്ന് രാഹുല്‍ പറഞ്ഞിട്ടുമുണ്ട്.&nbsp;
തന്റെ രാഷ്ട്രീയ ജീവിതത്തിലെ കന്നിയങ്കത്തിൽ കരുത്തരായ എതിരാളികളെയാണ് രാഹുല്‍ മലര്‍ത്തിയടിച്ചത്. ബിജെപിയുടെ കോട്ട തകർത്ത് ഇടത് വോട്ടുകള്‍ കുത്തിമറിച്ചാണ് രാഹുലിന്റെ വിജയം. സംസ്ഥാന രാഷ്ട്രീയത്തില്‍ കോണ്‍ഗ്രസിന്റെ യുവനിരയിലേക്കുയര്‍ന്ന രാഹുലിന്റെ രാഷ്ട്രീയഭാവി ശോഭനമാക്കിയ ഉപതിരഞ്ഞെടുപ്പാണിത് എന്ന് നിസംശയം പറയാം.

ഷാഫിയുടെ പിൻഗാമിയായി നിയമസഭയിലേക്ക്;നിയുക്ത എം.എൽ.എ രാഹുൽ മാങ്കൂട്ടത്തിലിനെ അറിയാം

പാലക്കാട്: ഉപതെരഞ്ഞെടുപ്പ് ഫലത്തിന് പിന്നാലെ ഫേസ്ബുക്ക് പോസ്റ്റുമായി പാലക്കാട്ടെ സ്ഥാനാർഥി പി.സരിൻ. നെഞ്ചോട് ചേർത്തുപിടിച്ച ഓരോ സഖാവിനും നന്ദിയുണ്ടെന്നും പി.സരിൻ ഫേസ്ബുക്കിൽ കുറിച്ചു. ജനാധിപത്യ, മതേതര മൂല്യങ്ങൾ ഉയർത്തിപ്പിടിക്കാനും പാലക്കാടിന്റെ വികസന സ്വപ്നങ്ങൾ യാഥാർത്ഥ്യമാക്കാനും ഇടത് പക്ഷത്തിന് വോട്ട് ചെയ്ത ഓരോ വോട്ടറോടുമുള്ള അകമഴിഞ്ഞ നന്ദി രേഖപ്പെടുത്തുന്നുവെന്നും സരിൻ പറഞ്ഞു.
കേരളം ഭരിക്കുന്നത് ഇടത് മുന്നണിയാണ്. പാലക്കാടിന്റെ വികസനം സർക്കാരിന്റെ മുഖ്യ അജണ്ടയായി തന്നെ തുടരും. അതിനായി പ്രവർത്തിക്കാൻ ജനങ്ങളുടെ ഇടയിൽ തന്നെ താനുണ്ടാവുമെന്നും പി.സരിൻ പറഞ്ഞു.
നിയമസഭ ഉപതെരഞ്ഞെടുപ്പിൽ പാലക്കാട് 18724 വോട്ടിന്‍റെ ലീഡിൽ യു.ഡി.എഫ് സ്ഥാനാർഥി രാഹുൽ മാങ്കൂട്ടത്തിൽ വിജയിച്ചിരുന്നു.

നെഞ്ചോട് ചേർത്തുപിടിച്ച ഓരോ സഖാവിനും നന്ദി ;ഫേസ്ബുക്ക് പോസ്റ്റുമായി സരിൻ

കൽപറ്റ: വയനാട് ലോക്സഭ ഉപതെരഞ്ഞെടുപ്പിൽ യു.ഡി.എഫ് സ്ഥാനാർഥി പ്രിയങ്ക ഗാന്ധി വൻ വിജയത്തിലേക്ക്. ലോക്സഭ പ്രതിപക്ഷ നേതാവും സഹോദരനുമായ രാഹുൽ ഗാന്ധി കഴിഞ്ഞ തെരഞ്ഞെടുപ്പിൽ നേടിയ ഭൂരിപക്ഷം ഇതിനകം പ്രിയങ്ക മറികടന്നു.
നിലവിലെ കണക്കുകൾ പ്രകാരം പ്രിയങ്കയുടെ ലീഡ് 3,82,975 കടന്നു. 5,78,526 വോട്ടുകളാണ് പ്രിയങ്ക നേടിയത്. തൊട്ടുപിന്നിലുള്ള എൽ.ഡി.എഫ് സ്ഥാനാർഥി സത്യൻ മൊകേരിക്ക് 1,95,551 വോട്ടുകളും ബി.ജെ.പിയുടെ നവ്യ ഹരിദാസിന് 1,04,947 വോട്ടുകളും ലഭിച്ചു. വോട്ടെണ്ണൽ തുടങ്ങി ആദ്യ മണിക്കൂർ പിന്നിടുമ്പോൾ തന്നെ എതിരാളികളെ ബഹുദൂരം പിന്നിലാക്കി പ്രിയങ്കയുടെ കുതിപ്പായിരുന്നു. കഴിഞ്ഞ തവണ 3,64,111 വോട്ടുകൾക്കാണ് രാഹുൽ ജയിച്ചത്.

ഇന്ദിരയുടെ കൊച്ചുമകൾ പാർലമെന്റിലേക്ക്;വയനാട്ടിൽ പ്രിയങ്കാ ഗാന്ധി വിജയിച്ചു

Search Results for: 25.11.2024