വടകര: ദേശീയ അദ്ധ്യാപക ദിനത്തിൽ വടകരയിലെ പ്രമുഖ അദ്ധ്യാപകനും പ്രഭാഷകനും നിരൂപകനുമായ സാമൂഹിക സാംസ്‌കാരിക പ്രവർത്തകനുമായ കടത്തനാട് നാരായണനെ വടകര ലയൺസ് ക്ലബ്ബ് ആദരിച്ചു. കെ പി രാധാകൃക്ഷൻ അധ്യക്ഷത വഹിച്ചു. പാസ്ററ് ഡിസ്ട്രിക്ട് ഗവർണ്ണർ സുജിത് കെ , സുഹാന സനത്ത്, രാഘവൻ പി പി, അജിത് പാലയാട് , കെ ബാലൻ , പി പി സുരേന്ദ്രൻ, ഗീത രാഘവൻ , ഷീല അജിത്, ഗീതാഞ്ജലി എന്നിവർ സംസാരിച്ചു.

അധ്യാപക ദിനത്തിൽ ആദരം

Vadakara

പാലക്കാട്: വെസ്റ്റ്‌കോസ്റ്റ് എക്‌സ്പ്രസിന്റെയും പരശുറാം എക്‌സ്പ്രസിന്റെയും വിവിധ ദിവസങ്ങളിലെ സര്‍വീസ് പുനഃക്രമീകരിച്ചത് റെയില്‍വേ റദ്ദാക്കി. പാളത്തിലെ അറ്റകുറ്റപ്പണി കാരണം രണ്ട് തീവണ്ടികളുടെയും ചില ദിവസങ്ങളിലെ യാത്രസമയത്തിൽ വരുത്തിയ മാറ്റമാണ് പിൻവലിച്ചത്. ഈ ദിവസങ്ങളില്‍ രണ്ട് തീവണ്ടികളും സാധാരണ സമയക്രമം പാലിച്ച് സര്‍വീസ് നടത്തുമെന്നും റെയില്‍വേ അറിയിച്ചു.
22638 മംഗളൂരു സെന്‍ട്രല്‍- ചെന്നൈ സെന്‍ട്രല്‍ വെസ്റ്റ്‌കോസ്റ്റ് എക്‌സ്പ്രസ് മേയ് 10, 21, 24, ജൂണ്‍ നാല്, ഏഴ്, തീയതികളില്‍ സാധാരണ സമയക്രമം അനുസരിച്ച് സര്‍വീസ് നടത്തുമെന്നാണ് റെയില്‍വേയുടെ അറിയിപ്പ്. പതിവുപോലെ രാത്രി 11.45-ന് തന്നെ വെസ്റ്റ്‌കോസ്റ്റ് എക്‌സ്പ്രസ് മംഗളൂരു സെന്‍ട്രലില്‍നിന്ന് യാത്രതിരിക്കും. ഈ ദിവസങ്ങളില്‍ മംഗളൂരുവിനും ഉള്ളാളിനും ഇടയില്‍ വെസ്റ്റ്‌കോസ്റ്റിന്റെ സര്‍വീസ് റദ്ദാക്കുകയും തീവണ്ടി ഉള്ളാളില്‍നിന്ന് പുറപ്പെടുമെന്നുമാണ് നേരത്തെ റെയില്‍വേ അറിയിച്ചിരുന്നത്.
16649 മംഗളൂരു സെന്‍ട്രല്‍-നാഗര്‍കോവില്‍ ജങ്ഷന്‍ പരശുറാം എക്‌സ്പ്രസ് മേയ് 11, 22, 25, ജൂണ്‍ അഞ്ച്, എട്ട് തീയതികളില്‍ സാധാരണ സമയക്രമം പാലിച്ച് സര്‍വീസ് നടത്തും. ഈ ദിവസങ്ങളില്‍ പതിവുപോലെ രാവിലെ 05.05-ന് പരശുറാം എക്‌സ്പ്രസ് മംഗളൂരു സെന്‍ട്രലില്‍നിന്ന് യാത്രതിരിക്കും. ഈ ദിവസങ്ങളില്‍ പരശുറാം എക്‌സ്പ്രസ് ഒന്നരമണിക്കൂര്‍ വൈകി പുറപ്പെടുമെന്നായിരുന്നു റെയില്‍വേ നേരത്തെ അറിയിച്ചിരുന്നത്.

സമയമാറ്റമില്ല; പരശുറാം, വെസ്റ്റ്‌കോസ്റ്റ് എക്സ്പ്രസുകൾ പതിവുപോലെ സർവീസ് നടത്തും

Kerala

തിരുവനന്തപുരം: ക്ഷേത്രങ്ങളില്‍ ഇനിമുതല്‍ പൂജയ്ക്കായും നിവേദ്യത്തിലും അര്‍ച്ചന പ്രസാദത്തിലും അരളിപ്പൂവ് ഉപയോഗിക്കേണ്ടെന്ന് ഉത്തരവിറക്കി തിരുവിതാംകൂര്‍ ദേവസ്വംബോര്‍ഡ്. അരളിപ്പൂവില്‍ വിഷാംശം ഉണ്ടെന്ന ആശങ്കയുടെ അടിസ്ഥാനത്തിലാണ് തീരുമാനം. അരളിക്ക് പകരം തെച്ചി, തുളസി തുടങ്ങിയവ ഉപയോഗിക്കും.
ദേവസ്വംബോര്‍ഡിന്റെ യോഗത്തിലാണ് പുതിയ തീരുമാനം. അതേസമയം, അരളിപ്പൂവ് പൂര്‍ണമായും ക്ഷേത്ര ആവശ്യങ്ങളില്‍നിന്നും ഒഴിവാക്കില്ല. അരളിപ്പൂവ് ഉപയോഗിച്ചുള്ള ഹാരം ചാര്‍ത്തല്‍, പുഷ്പാഭിഷേകം, പൂമൂടല്‍ പോലെയുള്ള ചടങ്ങുകള്‍ എന്നിവയ്‌ക്കെല്ലാം ക്ഷേത്രങ്ങളില്‍ അരളിപ്പൂവിന്റെ ഉപയോഗം തുടരും.
കഴിക്കുന്ന പ്രസാദത്തിനൊപ്പവും നെറ്റിയില്‍ തൊടുന്ന പ്രസാദത്തിനൊപ്പവും അരളിപ്പൂവ് ഭക്തജനങ്ങള്‍ക്ക് കൈയില്‍ കിട്ടുമ്പോള്‍ അത് ശരീരത്തിനുള്ളിലേക്ക് പോകാനുള്ള സാധ്യതയുണ്ട്. ഈ സാധ്യത കണക്കിലെടുത്താണ് അരളിപ്പൂവ് നിവേദ്യത്തില്‍നിന്നും അര്‍ച്ചനയില്‍നിന്നും ഒഴിവാക്കാനുള്ള തീരുമാനം കൈക്കൊണ്ടിരിക്കുന്നത്.
നേരത്തേ, ശബരിമല മുന്നൊരുക്കങ്ങള്‍ തീരുമാനിക്കാന്‍ ചേര്‍ന്ന യോഗത്തില്‍ അരളിപ്പൂവിന്റെ വിഷയം ചര്‍ച്ചയായിരുന്നു. ആലപ്പുഴയില്‍ ഒരു യുവതി മരിച്ചത് അരളിപ്പൂവ് ശരീരത്തിനുള്ളില്‍ ചെന്നാണ് എന്ന വാര്‍ത്തകള്‍ പുറത്തുവന്നതോടെയാണ് ക്ഷേത്രങ്ങളില്‍ അരളിപ്പൂവ് ഉപയോഗിക്കുന്നതുമായി ബന്ധപ്പെട്ട ചര്‍ച്ചകള്‍ക്ക് തുടക്കമായത്.

പൂജയ്ക്കും നിവേദ്യത്തിനും അരളിപ്പൂവ് ഉപയോഗിക്കേണ്ടെന്ന് തിരുവിതാംകൂര്‍ ദേവസ്വംബോര്‍ഡ്

മലപ്പുറം: എസ്.എസ്.എൽ.സി ഫലപ്രഖ്യാപനം വന്നതിനുപിന്നാലെ ഒരു ഉപ്പ മകനെ കുറിച്ച് എഴുതിയ കുറിപ്പ് സാമൂഹിക മാധ്യമങ്ങളിൽ വൈറലാവുന്നു. ഇത്തവണ പത്താം ക്ലാസ് പാസായ മകൻ മുഹമ്മദ് ഹാഷിമിനെ കുറിച്ച് എഴുത്തുകാരൻ കൂടിയായ മുഹമ്മദ് അബ്ബാസാണ് ഫേസ്ബുക്കിൽ കുറിപ്പിട്ടത്. രണ്ട് എ പ്ലസും ബാക്കി എയും ബി യുമാണ് ഹാഷിമിന് ലഭിച്ചത്.
മകനെ അഭിമാനത്തോടെ ചേർത്തു പിടിക്കുന്നുവെന്ന് പറഞ്ഞ് തുടങ്ങുന്ന കുറിപ്പ് ആയിരക്കണക്കിനാളുകളാണ് പങ്കുവെക്കുകയും കമന്റ് ചെയ്യുകയും ചെയ്തത്. ‘അന്നത്തിൽ ഒരോഹരി പൂച്ചകൾക്ക് കൊടുക്കുന്നതിന്, പൊരിവെയിലത്ത് ഒറ്റ ദിവസം പോലും മുടങ്ങാതെ കിളികൾക്കും കാക്കകൾക്കും വെള്ളം കൊടുക്കുന്നതിന്, സ്വന്തം വസ്ത്രങ്ങൾ അലക്കുകയും കഴിച്ച പാത്രങ്ങൾ കഴുകുകയും സ്വന്തം കിടപ്പിടം തുടക്കുകയും മുറ്റമടിക്കുകയും ചെയ്യുന്നതിന്, പോക്കറ്റ് മണിയിൽ നിന്ന് കൂട്ടുകാർക്ക് ഒരോഹരി കൊടുക്കുന്നതിന്, നന്നായിട്ട് പന്തു കളിക്കുന്നതിന്, ഈ ഭൂമിയിൽ എൻ്റെ മകനായി പിറന്നതിന് ഞാനവനോട് നന്ദി പറയുന്നു. ഏറ്റവും സ്നേഹത്തോടെ ഞാനവൻ്റെ നിറുകയിൽ ഉമ്മ വെയ്ക്കുന്നു’ -അബ്ബാസ് കുറിപ്പിൽ പറയുന്നു.
കുറിപ്പിന്റെ പൂർണരൂപം:
ഫുൾ എ പ്ലസ് ഒന്നുമില്ല.
രണ്ട് എ പ്ലസ്,
ബാക്കി എ യും,
ബി യും.
ഞാനെൻ്റെ മകനെ അഭിമാനത്തോടെ ചേർത്തു പിടിക്കുന്നു.
അന്നത്തിൽ ഒരോഹരി പൂച്ചകൾക്ക് കൊടുക്കുന്നതിന് ,
ഈ പൊരിവെയിലത്ത് ഒറ്റ ദിവസം പോലും മുടങ്ങാതെ കിളികൾക്കും കാക്കകൾക്കും വെള്ളം കൊടുക്കുന്നതിന്,
സ്വന്തം വസ്ത്രങ്ങൾ അലക്കുകയും ,കഴിച്ച പാത്രങ്ങൾ കഴുകുകയും ,സ്വന്തം കിടപ്പിടം തുടക്കുകയും മുറ്റമടിക്കുകയും ചെയ്യുന്നതിന്.
ഞാൻ കൊടുക്കുന്ന ചെറിയ പോക്കറ്റ് മണിയിൽ നിന്ന്, പോക്കറ്റ് മണി കിട്ടാത്ത കൂട്ടുകാർക്ക്
ഒരോഹരി കൊടുക്കുന്നതിന്,
ഒരു ദിവസത്തെ വീട്ടു ചിലവിന് എത്ര രൂപ വേണമെന്ന് കൃത്യമായിട്ട് അറിവുള്ളതിന്,
നന്നായിട്ട് പന്തു കളിക്കുന്നതിന്,
ഈ ഭൂമിയിൽ എൻ്റെ മകനായി പിറന്നതിന് ഞാനവനോട് നന്ദി പറയുന്നു. ഏറ്റവും സ്നേഹത്തോടെ ഞാനവൻ്റെ നിറുകയിൽ ഉമ്മ വെയ്ക്കുന്നു.
ജീവിതത്തിലെ യഥാർത്ഥ പരീക്ഷകൾ വരാനിരിക്കുന്നതേയുള്ളൂ ,ഹാഷിമേ എന്ന് ഞാനവനോടു ഉറക്കെ പറയുന്നു. ഒപ്പം ഫുൾ എ പ്ലസ് നേടിയ അവൻ്റെ കൂട്ടുകാരെയും, മറ്റു കുട്ടികളെയും അഭിനന്ദിക്കുന്നു.
ഒത്തിരി സ്നേഹത്തോടെ, അതിലേറെ അഭിമാനത്തോടെ
മുഹമ്മദ് ഹാഷിമിൻ്റെ
ഉപ്പ ,
അബ്ബാസ്.

‘ഫുൾ എ പ്ലസ് ഒന്നുമില്ല​; നന്നായി പന്തു കളിക്കുന്ന, അന്നത്തിൽ ഒരോഹരി പൂച്ചകൾക്ക് കൊടുക്കുന്ന, പക്ഷികൾക്ക് വെള്ളം കൊടുക്കുന്ന മകനെ അഭിമാനത്തോടെ ചേർത്തു പിടിക്കുന്നു...’ -വൈറലായി ഉപ്പയുടെ കുറിപ്പ്

തിരുവനന്തപുരം: ഹയര്‍സെക്കണ്ടറി, വൊക്കേഷണല്‍ ഹയര്‍ സെക്കന്‍ഡറി പരീക്ഷ ഫലം പ്രഖ്യാപിച്ചു. റെഗുലര്‍ വിഭാഗത്തില്‍ 374755 പേര്‍ പരീക്ഷയെഴുതി 294888 പേര്‍ ഉപരിപഠനത്തിന് യോഗ്യത നേടി.78.69 വിജയശതമാനം. മുന്‍ വര്‍ഷം ഇത്. 88.95 ശതമാനമായിരുന്നു .4.26 വിജയശതമാനം കുറഞ്ഞു. 39242 പേര്‍ എല്ലാ വിഷയങ്ങള്‍ക്കും എപ്ലസ് നേടി.
വിവിധ ഗ്രൂപ്പുകളിലെ വിജയ ശതമാനം
സയന്‍സ് - 84.84
കൊമേഴ്‌സ് - 76.11
ഹ്യുമാനിറ്റിക്‌സ് -67.09
വിജയ ശതമാനം കൂടുതലുള്ള ജില്ല എറണാകുളവും കുറവുള്ള ജില്ല വയനാടുമാണ്. മലപ്പുറം ജില്ലയിലാണ് കൂടുതല്‍ എപ്ലസ്. 105 പേര്‍ ഫുള്‍ മാര്‍ക്ക് നേടി.
63 സ്‌കൂളുകള്‍ സമ്പൂര്‍ണ്ണ വിജയം നേടി ഇതില്‍ 7 സര്‍ക്കാര്‍ സ്‌കുളുകളുമുണ്ട്. ജൂണ്‍ 12 മുതല്‍ 20 വരെ സേ പരീക്ഷ നടക്കും. മെയ് 14 മുതല്‍ പുനര്‍ മൂല്യ നിര്‍ണ്ണയത്തിന് അപേക്ഷിക്കാം.&nbsp;

പ്ലസ്ടു പരീക്ഷ ഫലം പ്രസിദ്ധീകരിച്ചു; 78.69 ശതമാനം വിജയം

യു എ ഇ: ബാഫഖി തങ്ങൾ കമ്മ്യൂണിറ്റി റിസോഴ്സ് ഡെവലപ്പ്മെൻ്റ് സെൻ്റർ പ്രചരണാർത്ഥം ദുബൈയിലെത്തിയ നേതാക്കൾക്ക് സ്വീകരണം. കോഴിക്കോട് ജില്ലാ മുസ്‌ലിം ലീഗ് നേതാക്കളായ എം.എ റസാഖ്, ടി.ടി ഇസ്മായിൽ, സൂപ്പി നരിക്കാട്ടേരി, അഹമ്മദ് പുന്നക്കൽ എന്നിവർക്ക് യു എ ഇ കെ.എം.സി.സി കോഴിക്കോട് ജില്ലാ കോർഡിനേഷൻ കമ്മിറ്റിയുടെ നേതൃത്വത്തിൽ വിമാനത്താവളത്തിൽ സ്വീകരണം നൽകി.

നേതാക്കൾക്ക് സ്വീകരണം

Gulf

മാഹി: ഭാരതീയ വിചാരകേന്ദ്രം എല്ലാ വർഷവും നടത്താറുള്ള സംസ്കൃതി പാഠശാല ഈ വർഷം മാഹി ചാലക്കര ഉസ്മാൻ ഗവൺമെന്റ് ഹൈസ്കൂളിൽ വച്ച് മെയ് മാസം 24,25 തിയ്യതികളിൽ നടക്കും. 9,10,+1, +2 ക്ലാസ്സിൽ പഠിക്കുന്ന ആൺകുട്ടികൾക്കും പെൺകുട്ടികൾക്കും പങ്കെടുക്കാം.
പരിസ്ഥിതി, യോഗ, വേദഗണിതം, ഭാരതത്തിന്റെ പൗരാണികത, ഭാരതത്തിന്റെ സാംസ്കാരിക പൈതൃകം എന്നിവയും സങ്കല്പ് ഐ എ എസ് അക്കാദമി കേരള ചാപ്റ്റർ, സിവിൽ സർവീസിന്റെ സാധ്യതകളെക്കുറിച്ച് വിശദമായ ക്ലാസ് നൽകും.നൂറു കുട്ടികൾക്ക് മാത്രം പ്രവേശനം നൽകുന്ന പാഠശാലയിൽ പങ്കുചേരാൻ താല്പര്യമുള്ളവർ മെയ് മാസം 15ന് മുൻപ് പേര് രജിസ്റ്റർ ചെയ്യേണ്ടതാണ്. ബന്ധപ്പെടുക; 9746404979, 8086272061. പ്രവേശന നിരക്ക് ഇല്ല.

സംസ്കൃതി പാഠശാല മാഹിയിൽ

Mahe

നാദാപുരം: കല്ലാച്ചി മിനി ബൈപാസ് റോഡിൽ അമിത വേഗത്തിൽ എത്തിയ പിക്കപ്പ് വാനിടിച്ച് പരുക്കേറ്റ കാൽനട യാത്രക്കാരിയായ വിദ്യാർഥിനി മരിച്ചു. ചിയ്യൂർ സ്വദേശിനി പാറേമ്മൽ ഹരിപ്രിയ (20) ആണ് മരിച്ചത്.കാലിനും, തലയ്ക്കും ഗുരുതര പരുക്കേറ്റ ഹരിപ്രിയ കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിൽ കഴിയവേ ബുധനാഴ്ച രാത്രിയോടെ മരിച്ചത്. എഴുത്തുപള്ളി പറമ്പത്ത് അമയ (20)ക്ക് പരുക്കേറ്റിരുന്നു.&nbsp;
വെള്ളിയാഴ്ച രാവിലെ ഒമ്പതരയോടെയായിരുന്നു അപകടം. വാണിമേൽ ഭാഗത്തുനിന്ന് അമിത വേഗതയിൽ വന്ന വാഹനമാണ് അപകടം വരുത്തിയത്. ഗ്യാസ് സിലിണ്ടർ കയറ്റിയ കല്ലാച്ചിയിലി ഹൈമ ഗ്യാസ് ഏജൻസിലെ വാഹനമാണ് വിദ്യാർഥിനിയെ ഇടിച്ചത്. വാഹനം നിയന്ത്രണം വിട്ട് റോഡരികിലൂടെ നടന്നുപോവുകയായിരുന്ന വിദ്യാർഥികളെ ഇടിക്കുകയായിരുന്നു. റോഡരികിലെ ഇലക്ട്രിക് പോസ്റ്റിലിടിച്ചാണ് വണ്ടിനിന്നത്. പോസ്റ്റിനും വാഹനത്തിനും ഇടയിൽ കുരുങ്ങിക്കിടന്ന ഹരിപ്രിയയെ നാട്ടുകാരാണ് പുറത്തെടുത്തത്. ഉണ്ണികൃഷ്ണൻ ശ്രീലേഖ ദമ്പതികളുടെ മകളാണ്.

കല്ലാച്ചിയിൽ നിയന്ത്രണംവിട്ട വാൻ ഇടിച്ച് പോസ്റ്റിനും വാഹനത്തിനുമിടയിൽ കുടുങ്ങിയ വിദ്യാർഥിനി മരിച്ചു

Nadapuram

നാദാപുരം: ജെ സി ഐ നാദാപുരം പാത്ത് വെയ്സുമായി സഹകരിച്ച് കരിയർ ഗൈഡൻസ് ക്യാമ്പ് സംഘടിപ്പിക്കുന്നു. മെയ്‌ 16 വ്യാഴാഴ്ച രാവിലെ 10 മണി മുതൽ ഉച്ചക്ക് 1 മണി വരെ നാദാപുരം എൻ കെ കോംപ്ലക്സിൽ പ്രവർത്തിക്കുന്ന പാത്ത് വെയ്‌സിൽ വെച്ച് നടത്തുന്ന കരിയർ ക്ലിനിക്കിലേക്ക് എസ് എസ് എൽ സി , പ്ലസ് വൺ, പുസ് ടു പൂർത്തിയാക്കിയ വിദ്യാർത്ഥികൾക്ക് സൗജന്യമായി പങ്കെടുക്കാം. കൂടുതൽ വിവരങ്ങൾക്ക് : ജെ സി മുഹമ്മദ്‌ സുന്നുമ്മൽ - 9446888543, ജെ എഫ് എം നജീബ് എൻ എം - 9961771189.

കരിയർ ഗൈഡൻസ് ക്യാമ്പ് നാദാപുരത്ത്

Inshort

കണ്ണൂർ: പാനൂരിൽ സ്കൂട്ടറിന് പിന്നിൽ ടിപ്പറിടിച്ച് പ്ലസ് ടു വിദ്യാർഥി മരിച്ചു. പാനൂർ കെ.കെ.വി ഹയർ സെക്കൻഡറി സ്കൂൾ വിദ്യാർഥി ഫായിസ് ആണ് മരിച്ചത്. സ്കൂട്ടറിൽ യാത്ര ചെയ്ത മറ്റൊരു വിദ്യാർത്ഥിക്ക് ഗുരുതര പരിക്കുണ്ട്. വൈകിട്ട് നാലുമണിയോടെയായിരുന്നു അപകടം. ഫായിസും സുഹൃത്തും സഞ്ചരിച്ച സ്കൂട്ടറിന് പിന്നിൽ ടിപ്പർ ഇടിക്കുകയായിരുന്നു. ഇടിയുടെ ആഘാതത്തിൽ ഇരുവരും റോഡിലേക്ക് തെറിച്ചുവീണു. നാട്ടുകാർ ചേർന്ന് ആശുപത്രിയിൽ എത്തിച്ചെങ്കിലും ഫായിസിന്റെ ജീവൻ രക്ഷിക്കാനായില്ല.

പാനൂരിൽ സ്‌കൂട്ടറിന് പിന്നിൽ ടിപ്പറിടിച്ച് പ്ലസ് ടു വിദ്യാർഥി മരിച്ചു

Kannur

ദുബൈ: പൈലറ്റുമാർ കൂട്ടത്തോടെ സിക്ക് ലീവ് എടുത്തതിനാൽ എയർ ഇന്ത്യ എക്‌സ്പ്രസ് സർവീസുകൾ മുടങ്ങിയതു കാരണം ദുരിതത്തിലായി പ്രവാസികൾ. സ്ത്രീകളും കുട്ടികളും ഉൾപ്പെടെ നൂറുകണക്കിന് യാത്രക്കാരാണ് വിവിധ ഗൾഫ് രാജ്യങ്ങളിലെ വിമാനത്താവളങ്ങളിൽ കുടുങ്ങിയത്. യു.എ.ഇ, സൗദി , ഖത്തർ ഉൾപ്പെടെ വിവിധ ഗൾഫ് രാജ്യങ്ങളിൽ നിന്ന് നാട്ടിലേക്ക് പോകാൻ കുടുംബസമേതം എത്തിയ യാത്രക്കാരാണ് അപ്രതീക്ഷിത സർവീസ് റദ്ദാക്കലിൽ വലഞ്ഞത്.
വെളുപ്പിന് വിമാനത്താവളങ്ങളിൽ എത്തിയ ശേഷമാണ് സർവീസ് റദ്ദാക്കിയ വിവരം പോലും യാത്രക്കാർ അറിയുന്നത്. യു.എ.ഇയിലെ ദുബൈ, അബൂദബി, ഷാർജ, റാസൽഖൈമ എന്നിവിടങ്ങളിൽ നിന്ന് കാലത്ത് പുറപ്പെടേണ്ടിയിരുന്ന എയർ ഇന്ത്യൻ എക്‌സ്പ്രസ് വിമാനങ്ങളാണ് മുടങ്ങിയത്. സൗദി അറേബ്യയിൽ നിന്ന് മൂന്നും ഖത്തറിൽ നിന്ന് രണ്ടും സർവീസുകൾ റദ്ദാക്കി. സന്ദർശക വിസാ കാലാവധി തീരുന്നവരും യാത്രക്കാരിലുണ്ട്.
അബൂദബിയിൽ നിന്ന് തിരുവനന്തപുരം, കണ്ണൂർ, ദുബൈയിൽ നിന്ന് കോഴിക്കോട്, അമൃത്‌സർ, തിരുച്ചിറപ്പള്ളി, ഷാർജയിൽ നിന്ന് കൊച്ചി, കണ്ണൂർ എന്നിവക്കു പുറമെ റാസൽഖൈമയിൽ നിന്ന് രണ്ട് സർവീസുകളും റദ്ദായി. സർവീസ് നിലച്ച കാര്യം അറിയിച്ചില്ലെന്നു മാത്രമല്ല, ടിക്കറ്റ് റീഫണ്ടിങ് ഉൾപ്പെടെയുള്ള കാര്യങ്ങളിലും എയർ ഇന്ത്യ ഉദ്യോഗസ്ഥർ കുറ്റകരമായ മൗനം പാലിക്കുന്നതായി യാത്രക്കാർ പരാതിപ്പെട്ടു.
സമരം എപ്പോൾ അവസാനിക്കുമെന്ന കാര്യത്തിൽ അനിശ്ചിതത്വം തുടരുന്നതിനാൽ മറ്റു വിമാന കമ്പനികളിൽ സീറ്റ് ബുക്ക് ചെയ്യാനുള്ള നെട്ടോട്ടത്തിലാണ് പലരും. എന്നാൽ പല വിമാനങ്ങളിലും ഉയർന്ന നിരക്കാണ് നിലവിൽ. യാത്രാപ്രതിസന്ധിക്ക് അടിയന്തര പരിഹാരം വേണമെന്ന് വിവിധ പ്രവാസി കൂട്ടായ്മകൾ ആവശ്യപ്പെട്ടു. പ്രവാസികൾ നേരിടുന്ന കടുത്ത പ്രതിസന്ധിയാണിതെന്നും അടിയന്തര ഇടപെടൽ വേണമെന്നും യു.എ.ഇ കെ.എം.സി.സി പ്രസിഡൻറ് പുത്തൂർ റഹ്‌മാൻ ആവശ്യപ്പെട്ടു.

എയർ ഇന്ത്യ സമരത്തിൽ വലഞ്ഞ് പ്രവാസികൾ

വടകര: മാർക്കറ്റ് റോഡിൽ ജോലി ചെയ്യവേ ഷോക്കേറ്റ് അവശനായി മേൽക്കൂരയിൽ കുടുങ്ങിയ തൊഴിലാളിയെ രക്ഷപെടുത്തിയ ഓവർസീയർ സികെ രഞ്ജിത്തിന് വടകര കൂട്ടു കുടുംബം വാട്സ്ആപ്പ് കൂട്ടായ്മയുടെ സ്നേഹാദരം. സാമൂഹ്യ പ്രവർത്തകൻ രാജേഷ് കെ ഉപഹാരം നൽകി. സവാദ് വടകര അദ്യക്ഷ സ്ഥാനം വഹിച്ചു. സീനിയർ സൂപ്രണ്ട് സന്ധ്യ റാണി, സബ് എൻജിനിയർ വിഷ്ണു ,വാട്സ്ആപ്പ് ഗ്രൂപ്പ്‌ മെയിൻ അഡ്മിൻ സിറാജ് കോട്ടക്കൽ, റിയാസ്, അമീർ, ഷബീർ, മഹ്‌റൂഫ്, കെ എസ് ഇ ബി ബീച്ച് ഓഫിസ് ജീവനക്കാരും മറ്റുള്ളവരും സംബന്ധിച്ചു.

ഓവർസീയർ രഞ്ജിത്തിന് സ്നേഹാദരം

തിരുവനന്തപുരം: പ്ലസ് ടു പരീക്ഷാ ഫലപ്രഖ്യാപനം ഇന്ന്. കഴിഞ്ഞ വർഷത്തേക്കാൾ 16 ദിവസം നേരത്തെ ആണ് ഇക്കുറി ഫലം വരുന്നത്. നാല് ലക്ഷത്തി 41,220 വിദ്യാർത്ഥികൾ ഫലം കാത്തിരിക്കുന്നു. 82.5 ആയിരുന്നു കഴിഞ്ഞ തവണത്തെ വിജയ ശതമാനം .ഏപ്രിൽ 3 മുതൽ 24 വരെ നടന്ന മൂല്യനിർണയ ക്യാമ്പിൽ ഇരുപത്തി അയ്യായിരത്തോളം അധ്യാപകർ പങ്കെടുത്തു. വൊക്കേഷണൽ ഹയർ സെക്കണ്ടറി പരീക്ഷാ ഫലപ്രഖ്യാപനവും ഇന്ന് തന്നെ പ്രഖ്യാപിക്കും. റഗുലർ വിഭാഗത്തിൽ 27,798 ഉം പ്രൈവറ്റ് വിഭാഗത്തിൽ 1502 ഉം വിദ്യാർത്ഥികളാണ് പരീക്ഷ എഴുതിയത്.
ഫലമറിയാനുള്ള വെബ്സൈറ്റുകള്‍
പ്ലസ്ടു
1 www.prd.kerala.gov.in
2 www.keralaresults.nic.in
3 www.result.kerala.gov.in
4 www.examresults.kerala.gov.in
5 www.results.kite.kerala.gov.in
എന്നീ വെബ്‌സൈറ്റുകളിലും PRD Live മൊബൈല്‍ ആപ്പിലും ഫലം ലഭ്യമാകും.
വിഎച്ച്എസ്ഇ
1 www.keralaresults.nic.in
2 www.vhse.kerala.gov.in
3 www.results.kite.kerala.gov.in
4 www.prd.kerala.gov.in
5 www.examresults.kerala.gov.in
6 www.results.kerala.nic.in
എന്നീ വെബ്‌സൈറ്റുകളിലും PRD Live മൊബൈല്‍ ആപ്പിലും ലഭ്യമാകും.
രജിസ്‌ട്രേഷൻ നമ്പർ, പാസ്‌വേഡ്, ജനനത്തീയതി തുടങ്ങിയ വ്യക്തിഗത ലോഗിൻ വിശദാംശങ്ങൾ ഉപയോഗിച്ച് വെബ്‌സൈറ്റിൽ നിന്നും ഡൗൺലോഡ് ചെയ്യാം.

ഹയര്‍സെക്കന്‍ഡറി, വൊക്കേഷണല്‍ ഹയര്‍സെക്കന്‍ഡറി പരീക്ഷാഫലം ഇന്ന്

കോഴിക്കോട്: കഴിഞ്ഞദിവസം അന്തരിച്ച കേരള മാപ്പിള കലാ അക്കാദമി സംസ്ഥാന പ്രസിഡണ്ട് പി എച്ച് അബ്ദുല്ലയെ അനുസ്മരിക്കാൻ ഈ മാസം 10 മുതൽ 17 വരെ കോഴിക്കോട് ജില്ലയിൽ ഓർമ്മ വാരമായി ആചരിക്കും. 10 ന് നാദാപുരം ചാപ്റ്ററിൽ നടക്കുന്ന അനുസ്മരണ സംഗമത്തോടെയാണ് തുടക്കം. തുടർന്നുള്ള ദിവസങ്ങളിൽ മറ്റു ഏഴ് ചാറ്ററുകളിലും സ്മൃതി സംഗമങ്ങൾ നടക്കും. അക്കാദമി ജില്ലാ ഭാരവാഹികളുടെ ഓൺലൈൻ മീറ്റിങ്ങിലാണ് തീരുമാനം. പ്രസിഡന്റ് എം കെ അഷ്റഫ് അധ്യക്ഷത വഹിച്ചു. ജനറൽ സെക്രട്ടറി അഷ്റഫ് കൊടുവള്ളി, ഭാരവാഹികളായ സി വി അഷ്റഫ്, സുലൈമാൻ മണ്ണാറത്ത്, മുഷ്താഖ് തീക്കുനി തുടങ്ങിയവർ സംസാരിച്ചു.

പി എച്ച് ഓർമ്മവാരം ആചരിക്കും

Kozhikode

അഴിയൂർ: പഞ്ചായത്ത് മുസ്ലീം ലീഗ് കമ്മിറ്റിയുടെ ആഭിമുഖ്യത്തിൽ വില്ലേജ് ഓഫീസിൽ കുടിവെള്ള സൗകര്യം ഒരുക്കി. അഴിയൂർ വില്ലേജ് ഓഫീസർ ധന്യാ ബാലകൃഷ്ണൻ ഉൽഘാടനം നിർവ്വഹിച്ചു. യു.എ.റഹീം, പി.കെ. കാസിം, ബമ്പിത സി.കെ, ജബ്ബാർ നെല്ലോളി, മഹമ്മൂദ് ഫനാർ, ഐസം ഇസ്മായിൽ എന്നിവർ പങ്കെടുത്തു.

വില്ലേജ് ഓഫീസിൽ കുടിവെള്ള സകര്യം ഒരുക്കി

വടകര: 2023 - 24 വർഷത്തെ എസ് എസ് എൽ സി പരീക്ഷയിൽ മേമുണ്ട ഹയർസെക്കണ്ടറി സ്കൂൾ മിന്നും വിജയം കരസ്ഥമാക്കി. 862 വിദ്യാർത്ഥികളെ പരീക്ഷ എഴുതിച്ചതിൽ മുഴുവൻ പേരും തുടർപഠനത്തിന് അർഹരായി. മേമുണ്ട സ്കൂൾ തുടർച്ചയായി ഈ വർഷവും 100% വിജയം കരസ്ഥമാക്കി. 252 വിദ്യാർത്ഥികൾക്ക് മുഴുവൻ വിഷയങ്ങൾക്കും A+ ലഭിച്ചു. 67 വിദ്യാർത്ഥികൾക്ക് 9 A+ ഉം ലഭിച്ചു. ഫുൾ A+ കളുടെ എണ്ണത്തിൽ ജില്ലയിൽ ഒന്നാം സ്ഥാനമാണ് മേമുണ്ടക്ക്. ഏറ്റവും കൂടുതൽ കുട്ടികളെ പരീക്ഷയ്ക്ക് ഇരുത്തി 100% വിജയവും, ഏറ്റവും കൂടുതൽ A+ ഉം നേടിയതിൽ സംസ്ഥാനത്തെ മികച്ച വിജയമാണ് മേമുണ്ടയുടേത്. കഴിഞ്ഞ വർഷവും മേമുണ്ടയ്ക്കായിരുന്നു ഫുൾ A+ ൽ ജില്ലയിൽ ഒന്നാം സ്ഥാനം. ജൂൺ മാസം മുതൽ ആരംഭിക്കുന്ന ചിട്ടയായ പരിശീലനമാണ് വിദ്യാർത്ഥികളെ ഈ നേട്ടത്തിന് അർഹരാക്കിയത്.&nbsp;
റിസൽട്ട് പ്രഖ്യാപിച്ചപ്പോൾ ചരിത്രം വിജയം കരസ്ഥമാക്കിയ വിദ്യാർത്ഥികളെയും, അധ്യാപകരെയും അനുമോദിക്കാൻ കോഴിക്കോട് ജില്ലാ വിദ്യാഭ്യാസ ഉപഡയറക്ടർ (DDE) സി മനോജ്കുമാർ സ്കൂളിലെത്തി. വിദ്യാർത്ഥികൾക്കും, അധ്യാപകർക്കും, രക്ഷിതാക്കൾക്കും മധുരം വിതരണം ചെയ്തു. ഹെഡ്മാസ്റ്റർ പി കെ ജിതേഷ്, പി ടി എ പ്രസിഡണ്ട് ഡോ: എം വി തോമസ്, മാനേജ്മെന്റ് സിക്രട്ടറി പി പി പ്രഭാകരൻ, പി ടി എ മെമ്പർമാരായ ഇ എം മനോജ്കുമാർ, സി വി കുഞ്ഞമ്മദ്, സ്റ്റാഫ് സിക്രട്ടറി ടി പി രജുലാൽ, അധ്യാപകരായ പി എം സൗമ്യ, വി പി ബൈജു, രാഗേഷ് പുറ്റാറത്ത് എന്നിവർ സംസാരിച്ചു. ഈ മഹത്തായ വിജയം കരസ്ഥമാക്കിയ വിദ്യാർത്ഥികളെയും അതിന് അവരെ പ്രാപ്തരാക്കിയ അധ്യാപകരെയും ജീവനക്കാരെയും പിടിഎ യും മാനേജ്മെന്റും അഭിനന്ദിച്ചു.

തുടർച്ചയായി 100%, 252 ഫുൾ എ പ്ലസ്; എസ് എസ് എൽ സി റിസൽട്ടിൽ മേമുണ്ടയ്ക്ക് ചരിത്ര വിജയം

മാഹി : ഈ വർഷത്തെ എസ്.എസ്.എൽ. സി പരീക്ഷയിൽ മാഹിയിലെ വിദ്യാലയങ്ങൾ തിളക്കമാർന്ന വിജയം നേടി. മേഖലയിലെ ആറു സർക്കാർ വിദ്യാലയങ്ങളിൽ നിന്നു പരീക്ഷയെഴുതിയ 398 കുട്ടികളിൽ 395 പേർ തുടർ പഠനത്തിനു അർഹത നേടി. 27 കുട്ടികൾ മുഴുവൻ വിഷയങ്ങളിലും ഏ പ്ലസ് വിജയം കരസ്ഥമാക്കി.
സ്വകാര്യ മേഖലയിലെ എട്ടു വിദ്യാലയങ്ങളിൽ നിന്നു പരീക്ഷയെഴുതിയ 295 കുട്ടികളിൽ മുഴുവൻ പേരും തുടർ പഠനത്തിനു അർഹത നേടി. 84 കുട്ടികൾ മുഴുവൻ വിഷയങ്ങളിലും എ പ്ലസ് നേട്ടം കൈവരിച്ചു. മേഖലയിൽ നിന്നു പരീക്ഷയെഴുതിയ 698 കുട്ടികളിൽ 695 പേരും സമ്പൂർണ്ണ വിജയം നേടിയതോടെ മേഖലയിലെ മൊത്തം വിജയ ശതമാനം 99.56 ആണ്.

എസ്. എസ് എൽ.സി പരീക്ഷാഫലം; മാഹി മേഖലക്ക് മികച്ച വിജയം

പയ്യോളി: ഒരുമാസംമുമ്പ് അച്ഛന്‍ കൊലപ്പെടുത്തിയ ഗോപികയുടെ ഉന്നതവിജയത്തില്‍ ആഹ്ലാദംപങ്കിടാന്‍ ആരുമില്ല. എസ്.എസ്.എല്‍.സി. ഫലം വന്നപ്പോള്‍ ഗോപികയ്ക്ക് ഒമ്പത് എ പ്ലസും ഒരു വിഷയത്തില്‍ എ യുമാണ് ലഭിച്ചത്. പരീക്ഷയെഴുതിയ അടുത്തദിവസമാണ് ഗോപികയെയും അനിയത്തി ജ്യോതികയെയും വിഷം നല്‍കി കൊലപ്പെടുത്തിയശേഷം അച്ഛന്‍ അയനിക്കാട് കുറ്റിയില്‍ പീടികയ്ക്കുസമീപം പുതിയോട്ടില്‍ വള്ളില്‍ ലക്ഷ്മിനിലയത്തില്‍ സുമേഷ് തീവണ്ടിക്ക് മുന്നില്‍ച്ചാടി മരിച്ചത്. ഗോപികയുടെ അമ്മ നേരത്തേ മരിച്ചിരുന്നു.
720 പേര്‍ പരീക്ഷയെഴുതിയ പയ്യോളി ടി.എസ്. ജി.വി.എച്ച്.എസ്. സ്‌കൂളിലെ ഫലം വന്നപ്പോള്‍ എല്ലാവരും അന്വേഷിച്ചത് ഗോപികയുടെ റിസള്‍ട്ടായിരുന്നു. ഗോപികയുടെ വിജയം പ്രതീക്ഷിച്ചതാണ്. എങ്കിലും ആ വിജയം അധ്യാപകര്‍ക്കും സഹപാഠികള്‍ക്കും നാട്ടുകാര്‍ക്കുമെല്ലാം വേദനാജനകമായ അനുഭവമായി.
''ആ കുട്ടിയെക്കുറിച്ച് ഓര്‍ക്കുമ്പോള്‍...'' -അധ്യാപകര്‍ വാക്കുകള്‍ പൂര്‍ത്തിയാക്കിയില്ല. പഠനത്തിലും പഠനേതരപ്രവര്‍ത്തനങ്ങളിലും മികവുപുലര്‍ത്തിയ ഗോപിക സ്‌കൂളിലെ മിടുക്കിയായ വിദ്യാര്‍ഥിയായിരുന്നു. 'ഒരു പാട്ട് പാടുമോ' എന്നുചോദിക്കേണ്ട താമസമേ ഉണ്ടാകൂ. മടിയേതുമില്ലാതെ ഒഴുകിയെത്തുമായിരുന്നു ഗോപികാഗാനം. സംഘഗാനത്തില്‍ സംസ്ഥാനകലോത്സവത്തില്‍ ഗോപിക നയിച്ച ടീം എ ഗ്രേഡ് നേടിയിരുന്നു. പരീക്ഷകഴിഞ്ഞ് അവധിക്കാലമാഘോഷിക്കാന്‍ ഒരുങ്ങവേയാണ് നാടിനെ നടുക്കിയ സംഭവമുണ്ടായത്. ഗോപികയുടെ അമ്മ സ്വപ്ന മൂന്നുവര്‍ഷംമുമ്പ് കോവിഡ് ബാധിച്ചാണ് മരിച്ചത്.
മാര്‍ച്ച് 28 ന് വ്യാഴാഴ്ച രാവിലെ 8.15-ന് തിരുവനന്തപുരത്തേക്കുപോയ പരശുറാം എക്‌സ്പ്രസ് തട്ടി ഒരാള്‍ മരിച്ചെന്ന വിവരമാണ് നാട്ടുകാര്‍ ആദ്യമറിയുന്നത്. സ്ഥലത്ത് എത്തിയവര്‍ മരിച്ചത് സുമേഷാണെന്ന് തിരിച്ചറിഞ്ഞു. സംഭവമറിഞ്ഞ് സുമേഷിന്റെ വീട്ടിലെത്തിയവര്‍ പുറമേനിന്ന് ഫാന്‍ കറങ്ങുന്നത് കണ്ടെങ്കിലും കുട്ടികളെ വിളിച്ചപ്പോള്‍ മറുപടി ഉണ്ടായില്ല. വാതില്‍ പുറത്തുനിന്ന് പൂട്ടിയനിലയിലായിരുന്നു. സ്ഥലത്തെത്തിയ സുമേഷിന്റെ സഹോദരന്‍ സുഭാഷ് വാതില്‍ ചവിട്ടിത്തുറന്നപ്പോഴാണ് മുറിക്കകത്തെ കട്ടിലില്‍ ഇരുവരെയും പുതപ്പിച്ച് കിടത്തിയത് കണ്ടത്. കുട്ടികളുടെ മൂക്കില്‍ പഞ്ഞിയുംവെച്ചിരുന്നു. പഞ്ഞിയില്‍ രക്തം നിറഞ്ഞിരുന്നു. സ്വപ്നയുടെ ഫോട്ടോയും കട്ടിലില്‍ കുട്ടികള്‍ക്കരികിലുണ്ടായിരുന്നു. സമീപം ആത്മഹത്യക്കുറിപ്പും കണ്ടെത്തി.
സുമേഷ് മുമ്പ് ഗള്‍ഫിലായിരുന്നു. ഗോപിക പയ്യോളി ടി.എസ്.ജി.വി.എച്ച്.എസ്. സ്‌കൂള്‍ 10-ാം ക്ലാസ് വിദ്യാര്‍ഥിയും ജ്യോതിക അയനിക്കാട് അയ്യപ്പന്‍കാവ് യു.പി. സ്‌കൂള്‍ അഞ്ചാംക്ലാസ് വിദ്യാര്‍ഥിയുമാണ്. സുമേഷിന്റെ തറവാട് വീട്ടിലായിരുന്ന കുട്ടികളെ പരീക്ഷ കഴിഞ്ഞതിനാല്‍ ബുധനാഴ്ച വൈകീട്ട് സ്വന്തംവീട്ടിലേക്ക് കൂട്ടിക്കൊണ്ടുവരുകയായിരുന്നു.
സംഭവത്തെപ്പറ്റി പോലീസ് പറയുന്നത്: കുട്ടികളുടെ ഉള്ളില്‍ വിഷം ചെന്നതായിരിക്കാം മരണകാരണമെന്നാണ് പ്രാഥമിക നിഗമനം. കുട്ടികളുടെ ശബ്ദമൊന്നും പുറത്തുവരാത്തതിനാല്‍ ആദ്യം ചിലപ്പോള്‍ മയങ്ങിപ്പോകുന്ന എന്തെങ്കിലും കൊടുത്തിട്ടുണ്ടാവും. മരണം ഉറപ്പുവരുത്താനായി കഴുത്തില്‍ എന്തോ ഉപയോഗിച്ച് മുറുക്കിയതിന്റെ പാടുമുണ്ട്. മുറികളിലൊന്നുംതന്നെ അസാധാരണമായി ഒന്നുമില്ല. എന്നാല്‍ നിലത്ത് തുടച്ച് വൃത്തിയാക്കിയതിന്റെ ലക്ഷണമുണ്ട്. മരണത്തില്‍ മറ്റാര്‍ക്കും പങ്കില്ലെന്നും ഭാര്യയുടെ അടുത്തേക്ക് പോകുന്നു എന്നുമാണ് കുറിപ്പിലെ ഉള്ളടക്കം.

ഒമ്പത് എ പ്ലസും ഒരു എയും നേടി ഗോപിക; പക്ഷെ ആഹ്ലാദം പങ്കിടാന്‍ അയനിക്കാട്ടെ വീട്ടിൽ അവളില്ല, പ്രിയപ്പെട്ടവരും...

Koyilandy

തൃശ്ശൂര്‍: പീച്ചി ഡാമിന്റെ റിസർവോയറിൽ കാണാതായ യുവാവിന്റെ മൃതദേഹം കണ്ടെത്തി. മലപ്പുറം താനൂർ സ്വദേശി മുഹമ്മദ് യഹിയ (25) യുടെ മൃതദേഹമാണ് തിരച്ചിലിനൊടുവിൽ വ്യാഴാഴ്ച രാവിലെ കണ്ടെത്തിയത്. ബുധനാഴ്‌ച വൈകുന്നേരം 6.30-ന് രണ്ട്‌ സുഹൃത്തുക്കളോടൊപ്പം കുളിക്കാനിറങ്ങിയപ്പോഴായിരുന്നു അപകടം. എറണാകുളം മഹാരാജാസ് കോളേജിലെ എം.എസ്‌സി. ബോട്ടണി വിദ്യാർഥിയും എസ്.എഫ്.ഐ.യുടെ കോളേജ് യൂണീറ്റ് സെക്രട്ടറിയുമാണ് യഹിയ. കേരള വനഗവേഷണസ്ഥാപനത്തിൽ ഇന്റേൺഷിപ്പ് ചെയ്യാൻ എത്തിയതായിരുന്നു.
അഗ്നിരക്ഷാ സേനാംഗങ്ങളാണ് തിരച്ചിൽ നടത്തിയത്. രാത്രി 11 വരെ തിരച്ചിൽ നടത്തിയെങ്കിലും ചെളിയും വെളിച്ചക്കുറവുമൂലം തിരച്ചിൽ നിർത്തിവയ്ക്കുകയായിരുന്നു. വ്യാഴാഴ്ച പുലർച്ചെ തിരച്ചിൽ പുനരാരംഭിച്ചു. വൈകുന്നേരം 6.30-ന് വിദ്യാർഥി റിസർവോയറിൽ മുങ്ങിപ്പോയെങ്കിലും രാത്രി ഒൻപതുമണിയോടുകൂടിയാണ് തിരച്ചിൽ ആരംഭിക്കാൻ കഴിഞ്ഞത്. തിരച്ചിലിന് ബോട്ട് ലഭിക്കാതിരുന്നതാണ് കാരണം. പീച്ചി ഡാമിലുള്ള വനംവകുപ്പിന്റെ ബോട്ടിൽ ഡ്രൈവർ ഇല്ലായിരുന്നു. മന്ത്രി കെ. രാജൻ തിരച്ചിൽ പ്രവർത്തനങ്ങൾ ഏകോപിപ്പിച്ചു.

പീച്ചി ഡാമിന്റെ റിസർവോയറിൽ കാണാതായ വിദ്യാർഥിയുടെ മൃതദേഹം കണ്ടെത്തി

വടകര: പൂജക്കായി വീട്ടിലെത്തിയ പതിനൊന്നുകാരനെ ലൈംഗികമായി പീഡിപ്പിച്ച മധ്യ വയസ്‌കന്‍ അറസ്റ്റില്‍. മണിയൂര്‍ മന്തരത്തൂര്‍ പുന്നേരി മീത്തല്‍ രാമദാസനെയാണ് (49) വടകര പോലീസ് അറസ്റ്റ് ചെയ്തത്. തിരുവള്ളൂരിലെ 11 കാരനെയാണ് പീഡിപ്പിച്ചത്. കോഴിക്കോട് കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.

പതിനൊന്നുകാരനെ പീഡിപ്പിച്ച കേസിൽ മണിയൂർ സ്വദേശി അറസ്റ്റില്‍

കോഴിക്കോട്: ജില്ലയിലെ പേരാമ്പ്ര എസ്റ്റേറ്റ്, കൂരാച്ചുണ്ട് എന്നിവിടങ്ങളില്‍ കടുവാ സാന്നിദ്ധ്യം സംശയിക്കുന്നതിനെ തുടര്‍ന്ന് അധികൃതര്‍ ജനങ്ങള്‍ക്ക് ജാഗ്രതാ നിര്‍ദേശം നല്‍കി. കഴിഞ്ഞ ദിവസം റിസര്‍വോയറിനോട് ചേര്‍ന്ന പ്രദേശത്ത് വനം വകുപ്പ് ഉദ്യോഗസ്ഥര്‍ നടത്തിയ പരിശോധനയിലാണ് കടുവയുടേതിന് സമാനമായ കാല്‍പ്പാടുകള്‍ കണ്ടെത്തിയത്. തുടര്‍ന്ന് പെരുവണ്ണാമൂഴി ഫോറസ്റ്റ് ഉദ്യോഗസ്ഥരും ചക്കിട്ടപ്പാറ പഞ്ചായത്ത് അധികൃതരും ജാഗ്രതാ നിര്‍ദേശം നല്‍കുകയായിരുന്നു.
കടുവയെ നേരിട്ട് കാണാന്‍ കഴിഞ്ഞിട്ടില്ലെന്നും എങ്കിലും എല്ലാവരും മുന്‍കരുതല്‍ സ്വീകരിക്കണമെന്നും ഡെപ്യൂട്ടി ഫോറസ്റ്റ് റെയ്ഞ്ച് ഓഫീസര്‍ ഇ ബൈജുനാഥ് പറഞ്ഞു. പേരാമ്പ്ര എസ്റ്റേറ്റില്‍ തൊഴിലാളികള്‍ അതിരാവിലെ തന്നെ ജോലിക്കെത്തുന്നവരാണ്. പുലര്‍കാലങ്ങളില്‍ ജോലിയ്ക്ക് പോകുന്നവരും ജാഗ്രത പുലര്‍ത്തണമെന്ന് ചക്കിട്ടപ്പാറ പഞ്ചായത്ത് പ്രസിഡന്റ് കെ സുനില്‍ സൂചിപ്പിച്ചു.

പേരാമ്പ്ര എസ്റ്റേറ്റ്, കൂരാച്ചുണ്ട് ഭാഗങ്ങളില്‍ കടുവയുടെ സാന്നിദ്ധ്യം

ബംഗളൂരു: വയനാട് സ്വദേശിയായ ബിരുദ വിദ്യാർത്ഥിയെ താമസസ്ഥലത്ത് മരിച്ച നിലയിൽ കണ്ടെത്തി. മേപ്പാടി തറയിൽ ടിഎം നിഷാദിന്റെ മകൻ മുഹമ്മദ് ഷാമിൽ (23) ആണ് മരിച്ചത്. രാജകുണ്ഡെയിലെ അപ്പാർട്ട്‌മെന്റിലാണ് ഷാമിലിനെ തൂങ്ങി മരിച്ച നിലയിൽ കണ്ടെത്തിയത്. മത്തിക്കര എംഎസ് രാമയ്യ കോളേജിലെ മൂന്നാം വർഷ ബിബിഎ വിദ്യാർത്ഥിയായിരുന്നു.
ഒപ്പം താമസിച്ചിരുന്നവർ വെള്ളിയാഴ്‌ച നാട്ടിലേക്ക് മടങ്ങിയതിനാൽ ഷാമിൽ ഒറ്റയ്‌ക്കാണ് മുറിയിലുണ്ടായിരുന്നത്. ഞായറാഴ്‌ച ഇവർ തിരികെ എത്തിയപ്പോഴാണ് ജീർണിച്ച നിലയിൽ മൃതദേഹം കണ്ടത്. സംഭവത്തിൽ രാജകുണ്ഡെ പൊലീസ് ഇൻക്വസ്റ്റ് നടത്തി. മൃതദേഹം അംബേദ്‌ക്കർ മെഡിക്കൽ കോളേജിൽ പോസ്റ്റ്‌മോർട്ടം നടത്തി. ശേഷം ഓൾ ഇന്ത്യ കേരള മുസ്ലീം കൾച്ചറൽ സെന്ററിന്റെ (എഐകെഎംസിസി) സഹായത്തോടെ നാട്ടിലേക്ക് കൊണ്ടുപോയി.ഷാമിലിന്റെ ബന്ധുക്കൾ നൽകിയ പരാതിയിൽ പൊലീസ് കേസെടുത്തു. മാതാവ് - വഹീദ, സഹോദരങ്ങൾ - അഫ്രിൻ മുഹമ്മദ്, തൻവീർ അഹമ്മദ്.

മലയാളി വിദ്യാർത്ഥി ബംഗളൂരുവിൽ മരിച്ച നിലയിൽ; മൃതദേഹം ജീർണിച്ച അവസ്ഥയിൽ

National

നാദാപുരം: യുവതിയെ തൂങ്ങി മരിച്ചനിലയിൽ കണ്ടെത്തി. ഉണിയമ്പ്രോൽ മനോഹരൻ–സനില ദമ്പതികളുടെ മകൾ ആരതി (21) ആണ് മരിച്ചത്. തിങ്കളാഴ്ച രാവിലെ 9 മണിയോടെയാണ് സംഭവം. അമ്മ സനില പുറമേരി ടൗണിൽ പോയി മടങ്ങി എത്തിയപ്പോഴാണ് ആരതിയെ തൂങ്ങിയ നിലയിൽ കണ്ടത്.&nbsp;
ഉടൻ നാദാപുരം ഗവ.താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കണ്ണൂരിലെ സ്വകാര്യ ആശുപത്രിയിൽ നഴ്സായി ജോലി ചെയ്യുകയായിരുന്നു. അടുത്തിടെയാണ് ആരതിയുടെ വിവാഹം ഉറപ്പിച്ചത്. സംഭവത്തിൽ പൊലീസ് അന്വേഷണം തുടങ്ങി. ആതിരയാണ് സഹോദരി.

നാദാപുരത്ത് നഴ്സായ  യുവതിയെ തൂങ്ങി മരിച്ചനിലയിൽ കണ്ടെത്തി

കൊയിലാണ്ടി: വിദ്യാർഥിയുടെ ആക്രമണത്തിൽ കൊയിലാണ്ടി പൊലീസ് സ്റ്റേഷനിലെ നാല് പൊലീസുകാർക്ക് പരിക്കേറ്റു. എസ്.ഐ ജിതേഷ്, ഗ്രേഡ് എസ്.ഐ അബ്ദുല്ല, സീനിയർ സിവിൽ പൊലീസ് ഓഫിസർമാരായ പ്രവീൺ കുമാർ, സിനു രാജ് എന്നിവർക്കാണ് പരിക്കേറ്റത്. ഇവരെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു. സംഭവത്തിൽ ബിരുദ വിദ്യാർഥി അത്തോളി കൊങ്ങന്നൂർമലയിൽ നോബിൻ(23)നെ അറസ്റ്റ് ചെയ്തു.
ചിത്രാ ടാക്കീസിനു സമീപം തിങ്കളാഴ്ച വൈകീട്ടാണ് സംഭവം. രഹസ്യവിവരം കിട്ടിയതിനെ തുടർന്ന് പോക്സോ കേസിലെ പ്രതിയെ പിടിക്കാൻ പോകവെ സംശയാസ്പദ സാഹചര്യത്തിൽ നോബിൻ ചിത്രാടാക്കീസിന് സമീപം നിൽക്കുന്നത് കണ്ടത് ചോദ്യം ചെയ്യുന്നതിനിടയിൽ ആക്രമിക്കുകയായിരുന്നുവെന്ന് പൊലീസ് പറയുന്നു. കല്ല് കൊണ്ടാണ് ആക്രമിച്ചത്.&nbsp;

കൊയിലാണ്ടിയിൽ വിദ്യാർഥിയുടെ ആക്രമണത്തിൽ നാല് പൊലീസുകാർക്ക് പരിക്കേറ്റു

ഫറോക്ക്: പ്രായപൂർത്തിയാകാത്ത കുട്ടികളെ ഉപയോഗപ്പെടുത്തിയുള്ള ബൈക്ക്‌ മോഷണത്തിൽ വാഹനങ്ങളെല്ലാം കണ്ടെടുത്ത്‌ പൊലീസ്‌. കഴിഞ്ഞ ദിവസം പിടിയിലായ രവിരാജിന്റെ (സെങ്കുട്ടി) നേതൃത്വത്തിലുള്ള മോഷണ സംഘത്തിലുൾപ്പെട്ട പ്രായപൂർത്തിയാകാത്ത രണ്ട്‌ പ്രതികളെക്കൂടി പിടികൂടുകയുംചെയ്‌തു. കോഴിക്കോട് ടൗൺ, ഫറോക്ക്, കുന്നമംഗലം, വടകര തുടങ്ങിയ പൊലീസ് സ്റ്റേഷൻ പരിധിയിൽനിന്ന്‌ കഴിഞ്ഞ ഒരുമാസത്തിനിടെ മോഷ്ടിക്കപ്പെട്ട നാല്‌ ബൈക്കുകളും രണ്ടു സ്കൂട്ടറുകളുമാണ് വിവിധ സ്ഥലങ്ങളിൽനിന്ന്‌ പൊലീസ്‌ കണ്ടെടുത്തത്. ഫറോക്ക് എസിപി എ എം സിദ്ദിഖിന്റെ നേതൃത്വത്തിൽ നടത്തിയ അന്വേഷണത്തിൽ കഴിഞ്ഞ അഞ്ചിന് പിടിയിലായി റിമാൻഡിലായിരുന്ന മുഖ്യപ്രതി രവിരാജിനെ കസ്റ്റഡിയിൽ വാങ്ങി ഫറോക്ക് ഇൻസ്പെക്ടർ ടി എസ് ശ്രീജിത്ത്, എസ്ഐ വിനയൻ എന്നിവരുടെ നേതൃത്വത്തിൽ പൊലീസ് നടത്തിയ തുടരന്വേഷണത്തിലാണ് വാഹനങ്ങൾ പിടിച്ചെടുത്തത്‌.
ഫറോക്ക് നഗരത്തിൽ റെയിൽവേ സ്റ്റേഷൻ പരിസരത്തുനിന്ന്‌ തുടർച്ചയായി ബൈക്കുകൾ മോഷ്ടിക്കപ്പെട്ടതോടെയാണ് അസി. കമീഷണറുടെ നേതൃത്വത്തിൽ പ്രത്യേക അന്വേഷണമാരംഭിച്ചതും കുട്ടിക്കുറ്റവാളികളടങ്ങുന്ന സംഘം വലയിലായതും. ഫറോക്കിന് പുറമെ, കോഴിക്കോട്, വടകര റെയിൽവേ സ്റ്റേഷനുകൾ, കുന്നമംഗലം ടൗൺ എന്നിവിടങ്ങളിൽനിന്നാണ് സംഘം വാഹനങ്ങൾ മോഷ്ടിച്ചത്. പിടിച്ചെടുത്ത വാഹനങ്ങൾ ബന്ധപ്പെട്ട സ്‌റ്റേഷനുകൾക്ക്‌ കൈമാറി. മുഖ്യപ്രതി രവിരാജിനെ വീണ്ടും കോടതിയിൽ ഹാജരാക്കി റിമാൻഡ് ചെയ്തു. പ്രായപൂർത്തിയാകാത്തവരെ ജുവനൈൽ ജസ്റ്റിസ് ബോർഡിന്‌ മുന്നിൽ ഹാജരാക്കി.

വടകരയിൽ ഉൾപ്പടെ കുട്ടികളെ ഉപയോഗിച്ച്‌ മോഷണം; ഇരുചക്രവാഹനങ്ങൾ കണ്ടെടുത്തു

ഗാന്ധിന​ഗർ: മുതിർന്ന വിദ്യാർഥികളുടെ റാ​ഗിങിന് ഇരയായ എം.ബി.ബി.എസ് വിദ്യാർഥി മരിച്ചെന്ന് പരാതി. ​ഗുജറാത്തിലെ ധാർപുർ പടാനിലുള്ള ജി.എം.ഇ.ആർ.എസ് മെഡിക്കൽ കോളേജ് ആൻഡ് ഹോസ്പിറ്റൽസിലെ ഒന്നാം വർഷ വിദ്യാർഥി അനിൽ മെതാനിയ ആണ് മരിച്ചത്. റാ​ഗിങിന്റെ ഭാ​ഗമായി അനിലിനെ മൂന്ന് മണിക്കൂർ തുടർച്ചായി നിർത്തിച്ചെന്നും പിന്നീട് കുഴഞ്ഞു വീണെന്നുമാണ് ആരോപണം.
മുതിർന്ന വിദ്യാർഥികളുടെ പീഡനത്തെ സംബന്ധിച്ച് ആശുപത്രിയിൽ പ്രവേശിപ്പിച്ചശേഷം അനിൽ പോലീസിന് മൊഴി നൽകിയിരുന്നു. ഇതിനുശേഷമായിരുന്നു മരണം. പോസ്റ്റുമോർട്ടത്തിനു ശേഷമേ മരണകാരണം വ്യക്തമാകൂ.
അനിൽ കുഴഞ്ഞുവീണെന്നും ആശുപത്രിയിൽ പ്രവേശിപ്പിച്ചെന്നും അറിയിച്ച് ഇന്നലെ കോളേജിൽനിന്നും ഒരു കോൾ വന്നെന്ന് ബന്ധുവായ ധർമേന്ദ്ര പറഞ്ഞു. ഞങ്ങൾ കോളേജിലെത്തിയപ്പോൾ, മൂന്നാം വർഷ വിദ്യാർഥികൾ അനിലിനെ റാ​ഗിങ് ചെയ്തതായി അറിഞ്ഞു. ഞങ്ങൾക്ക് നീതി വേണം, അദ്ദേഹം ആവശ്യപ്പെട്ടു.വിദ്യാർഥിയുടെ പിതാവിന്റെ പരാതിയിൽ അസ്വഭാവിക മരണത്തിന് കേസെടുത്തതായി ഉന്നത പോലീസ് ഉദ്യോ​ഗസ്ഥൻ അറിയിച്ചു. പോസ്റ്റുമോർട്ടം നടത്തി റിപ്പോർട്ട് നൽകാൻ മെഡിക്കൽ കോളേജിനോട് ആവശ്യപ്പെട്ടിട്ടുണ്ട്.&nbsp;

3 മണിക്കൂർ ഒരേനിൽപ്പ് നിർത്തി റാ​ഗിങ്, കുഴഞ്ഞുവീണ എം.ബി.ബി.എസ് വിദ്യാർഥി മരിച്ചു

കോഴിക്കോട്: ജില്ലയിൽ ഞായറാഴ്ച കോൺഗ്രസ് ഹർത്താലിന് ആഹ്വാനം ചെയ്തു. ചേവായൂര്‍ സര്‍വിസ് സഹകരണ ബാങ്ക് തെരഞ്ഞെടുപ്പിനിടെയുണ്ടായ സംഘർഷത്തിൽ പ്രതിഷേധിച്ചാണ് പാർട്ടി ഹർത്താൽ പ്രഖ്യാപിച്ചത്. രാവിലെ ആറു മുതൽ വൈകീട്ട് ആറുവരെയാണ് ഹർത്താൽ. വോട്ടെടുപ്പിനിടെ കോൺഗ്രസ്, സി.പി.എം പ്രവർത്തകർ ഏറ്റുമുട്ടി. മൂന്ന് വാഹനങ്ങൾക്കുനേരെ കല്ലേറുണ്ടായി. വോട്ടർമാരുമായി എത്തിയ വാഹനങ്ങൾക്കുനേരെയാണ് കല്ലേറുണ്ടായത്. വാഹനങ്ങളുടെ ചില്ലുകൾ തകർന്നു. പൊതുതെരഞ്ഞെടുപ്പിന് സമാനമായ വീറും വാശിയിലുമാണ് ബാങ്ക് ഭരണ സമിതി തെരഞ്ഞെടുപ്പ് നടക്കുന്നത്. കോൺഗ്രസ് പാനലും സി.പി.എം പിന്തുണയുള്ള കോൺഗ്രസ് വിമതരും തമ്മിലാണ് മത്സരം.
പതിറ്റാണ്ടുകളായി കോൺഗ്രസ് ഭരിക്കുന്ന ബാങ്കാണിത്. എന്നാൽ, നേരത്തെ ഭരണസമിതിയിലുണ്ടായിരുന്ന ഒരു വിഭാഗം കോൺഗ്രസുമായി തെറ്റി നേതൃത്വവുമായി ഇടഞ്ഞ് സ്വന്തമായാണ് കുറച്ചുകാലമായി പ്രവർത്തിച്ചിരുന്നത്. ഇവരെ അച്ചടക്ക നടപടി സ്വീകരിച്ച് പാർട്ടി പുറത്താക്കുകയും ചെയ്തിരുന്നു. ഇവരെ പിന്തുണച്ച് സി.പി.എം എത്തുകയായിരുന്നു. ഇതോടെയാണ് ഇത്തവണത്തെ തെരഞ്ഞെടുപ്പ് വാശിയേറിയതായി മാറിയത്. 1800ഓളം ആളുകളെ അനധികൃതമായി പുതുതായി ചേർത്തെന്ന് ആരോപിച്ച് കോൺഗ്രസ് ഹൈകോടതിയെ സമീപിച്ചിരുന്നു. ഇതേതുടർന്ന്, തർക്കമുന്നയിക്കപ്പെട്ട 1800ഓളം വോട്ടുകൾ പ്രത്യേകം പെട്ടിയിലാക്കാനാണ് കോടതി നിർദേശം.

കോഴിക്കോട് ജില്ലയിൽ നാളെ കോൺഗ്രസ് ഹർത്താൽ

Search Results for: 09.05.2024