പത്തനംതിട്ട: കോന്നിയിൽ തൊട്ടിലില്‍ കഴുത്ത് കുരുങ്ങി അഞ്ച് വയസുകാരിക്ക് ദാരുണാന്ത്യം. ചെങ്ങറ സ്വദേശികളായ ഹരിദാസ് - നീതു ദമ്പതികളുടെ മകൾ ഹൃദ്യ ആണ് മരിച്ചത്. ഇളയ കുട്ടിക്ക് വേണ്ടി വീട്ടിൽ കെട്ടിയിരുന്ന തൊട്ടിലിൽ കയറിയപ്പോൾ കഴുത്തില്‍ കുരുങ്ങിയാണ് അപകടമുണ്ടായത്. വീട്ടിൽ ആരും ഇല്ലാത്ത സമയത്തായിരുന്നു അപകടം.

തൊട്ടിലിൽ കഴുത്ത് കുരുങ്ങി 5 വയസുകാരി മരിച്ചു

Kerala

വില്യാപ്പള്ളി: എൻ ഡി എ സ്ഥാനാർത്ഥി പ്രഫുൽ കൃഷ്ണന് വില്യാപ്പള്ളി പ്രദേശത്ത് സീകരണം. രാവിലെ അന്തരിച്ച ബി ജെ.പി സംസ്ഥാന സമിതി അംഗമായിരുന്ന ചുള്ളിയിൽ നാരായണന്റെ സ്മൃതി മണ്ഡപത്തിൽ പുഷ്പാച്ചന നടത്തി. വൈകുന്നേരം അന്തരിച്ച പിടി ഉഷയുടെ കോച്ച് ഒ എം നമ്പ്യാരുടെ വീട്ടിൽ സന്ദർശനം നടത്തി. തുടർന്ന് വില്യാപ്പള്ളി കുളത്തൂർ റോഡിൽ നിന്ന് നൂറുക്കണക്കിന് പ്രവർത്തകർ പങ്കെടുത്ത റോഡ് ഷോയും നടന്നു. സ്ഥാനാർത്ഥിക്ക് ഒപ്പം ഉത്തര മേഖല വൈസ് പ്രസിഡന്റ് എം.പി രാജൻ, മണ്ഡലം പ്രസിഡന്റ് എം കെ രജീഷ് , മണ്ഡലം ജനറൽ സെക്രട്ടറി ടി.വി ഭരതൻ , പ്രബേഷ് പുന്നക്കാരി, അരീക്കൽ രാജൻ, കെ.കെ രാജീവൻ , എടുക്കുടി മനോജൻ , ഗോപാലൻ എന്നിവരും ഉണ്ടായിരുന്നു.

വില്യാപ്പള്ളിയിൽ എൻ ഡി എ സ്ഥാനാർത്ഥി പര്യടനം നടത്തി

Vadakara

കുലശേഖരം: ബ്യൂട്ടിപാർലർ ഉടമയെ ചിറ്റാർഡാമിൽ മുങ്ങി മരിച്ച നിലയിൽ കണ്ടെത്തി. ആര്യനാട് മേലെക്കര പുത്തൻവീട്ടിൽ സനൽകുമാറിന്റെ മകൻ സനീഷ്(28) ആണ് മരിച്ചത്. കാട്ടാക്കടയിൽ ബ്യൂട്ടിപാർലർ നടത്തുന്ന സനീഷിനെ ഇക്കഴിഞ്ഞ ബുധനാഴ്ച മുതൽ കാണാനില്ലെന്ന് വീട്ടുകാർ ആര്യനാട് പൊലീസിൽ പരാതി നൽകിയിരുന്നു. വെള്ളിയാഴ്ച രാവിലെയാണ് മൃതദേഹം ക​ണ്ടെത്തിയത്.
സനീഷിൻ്റെ കാർ നെട്ട ഭാഗത്ത് ഒരു ലോഡ്ജിന് സമീപം കണ്ടെത്തിയിരുന്നു. സഹോദരൻ രാഹുൽ ലോഡ്ജിൽ വിവരം തിരക്കിയപ്പോൾ സനീഷ് മുറി എടുത്തിരുന്നുവെന്നും രണ്ട് ദിവസമായി കാണാനില്ല എന്നും വിവരം ലഭിച്ചു. തുടർന്ന് കടയാലുമൂട് പൊലീസിൽ വിവരം അറിയിച്ചു. അതിനിടയിലാണ് ചിറ്റാർഡാമിൽ മൃതദേഹം കണ്ടെത്തിയത്. ആത്മഹത്യയായിരിക്കാം എന്നാണ് പൊലീസിൻ്റെ പ്രാഥമിക നിഗമനം.&nbsp;&nbsp;

ബ്യൂട്ടിപാർലർ ഉടമ ഡാമിൽ മുങ്ങി മരിച്ച നിലയിൽ

മമ്മൂട്ടിയെ നായകനാക്കി ഡിനോ ഡെന്നിസ് തിരക്കഥ എഴുതി സംവിധാനം ചെയ്യുന്ന 'ബസൂക്ക'യുടെ ചിത്രീകരണം പൂർത്തിയായി. 90 ​ദിവസത്തെ ചിത്രീകരണത്തിനൊടുവിലാണ് ബിഗ് ബജറ്റിൽ ഒരുങ്ങുന്ന ഈ ഗെയിം ത്രില്ലർ ചിത്രത്തിന്റെ ഷൂട്ടിം​ഗ് പൂർത്തീകരിച്ചത്. തീയേറ്റർ ഓഫ് ഡ്രീംസിൻ്റെ ബാനറിൽ ജിനു വി എബ്രഹാമും ഡോൾവിൻ കുര്യാക്കോസും സരിഗമയുടെ ഫിലിം സ്റ്റുഡിയോ ആയ യൂഡ്ലീ ഫിലിംസിന്റെ ബാനറിൽ വിക്രം മെഹ്‌റയും സിദ്ധാർത്ഥ് ആനന്ദ് കുമാറും ചേർന്നാണ് ചിത്രം നിർമ്മിക്കുന്നത്.
മലയാളത്തിൽ എക്കാലത്തെയും മികച്ച തിരക്കഥാകൃത്ത് കലൂർ ഡെന്നിസിന്റെ മകനാണ് സംവിധായകൻ ഡീനോ ഡെന്നിസ്. മമ്മൂട്ടിയുടെ ബിഗ് ബജറ്റ് ചിത്രമാണ് 'ബസൂക്ക'. തെന്നിന്ത്യൻ നടനും സംവിധായകനുമായ ഗൗതം വാസുദേവ് മേനോൻ വളരെ സുപ്രധാനമായൊരു കഥാപാത്രത്തെ ചിത്രത്തിൽ അവതരിപ്പിക്കുന്നുണ്ട്. 'ബെഞ്ചമിൻ ജോഷുവ' എന്നാണ് ഗൗതം മേനോന്റെ കഥാപാത്രത്തിന്റെ പേര്.
സിദ്ധാർഥ് ഭരതൻ, ബാബു ആന്റണി, ഹക്കീം ഷാജഹാൻ, ഭാമ അരുൺ, ദിവ്യാ പിള്ള, ഡീൻ ഡെന്നിസ്, സുമിത് നേവൽ (ബിഗ് ബി ഫെയിം), സ്ഫടികം ജോർജ്, തുടങ്ങിയവരും അഭിനയിക്കുന്നു. തിയേറ്ററുകളിൽ വൻ വിജയം കൊയ്ത പൃഥ്വിരാജ് ചിത്രം 'കാപ്പ', ടൊവിനോ ചിത്രം 'അന്വേഷിപ്പിൻ കണ്ടെത്തും' എന്നിവക്ക് ശേഷം സരിഗമയും തിയേറ്റർ ഓഫ് ഡ്രീംസും ചേർന്ന് നിർമ്മിക്കുന്ന സിനിമയാണ് 'ബസൂക്ക'.
എക്സിക്യൂട്ടീവ് പ്രൊഡ്യുസർ: സൂരജ് കുമാർ, കോ-പ്രൊഡ്യൂസർ: സഹിൽ ശർമ്മ, ഛായാഗ്രഹണം: നിമിഷ് രവി, സെക്കൻഡ് യൂണിറ്റ് ക്യാമറ: റോബി വർഗീസ്‌, ചിത്രസംയോജനം: നിഷാദ് യൂസഫ്, സംഗീതം: മിഥുൻ മുകുന്ദൻ, കലാസംവിധാനം: ഷിജി പട്ടണം, വസ്ത്രാലങ്കാരം: സമീറ സനീഷ്, ചീഫ് അസോസിയേറ്റ്: സൂജിത്ത്, പ്രൊഡക്ഷൻ കൺട്രോളർ: സഞ്ജു ജെ, പിആർഒ: ശബരി.

മമ്മൂട്ടി ചിത്രം 'ബസൂക്ക' ചിത്രീകരണം പൂർത്തിയായി

പയ്യോളി: ലോക ജലദിനത്തിൽ ജെ സി ഐ പയ്യോളിയുടെയും സോഫ്റ്റ്‌ റെസിഡന്റ്‌സ് അസോസിയേഷന്റയും സംയുക്താഭിമുഖ്യത്തിൽ പൊതുജനങ്ങൾക്കായി സൗജന്യ ജലപരിശോധന ക്യാമ്പ് സംഘടിപ്പിച്ചു. എൻ എ ബി എൽ അംഗീകാരത്തോടെ പ്രവർത്തിക്കുന്ന വടകര ഇന്നേറ്റ് അനലിറ്റിക്സ് ജലപരിശോധന കേന്ദ്രത്തിന്റെ സഹകരണത്തോടെയാണ് ക്യാമ്പ് സംഘടിപ്പിച്ചത്.&nbsp;
ജെ സി ഐ പയ്യോളി പ്രസിഡന്റ്‌ നിഷാന്ത് ഭാസുര നേതൃത്വം നൽകിയ പരിപാടിയിൽ ജെ സി ഐ സെക്രട്ടറി ജെ സി നിഷിൽ, ജെ സി ജയേഷ് ഗായത്രി, സോഫ്റ്റ്‌ റെസിഡന്റ്‌സ് അസോസിയേഷൻ പ്രസിഡന്റ്‌ അരുൺ കുമാർ ടി, സെക്രട്ടറി സത്യൻ കുറ്റിപ്പുറം, ശശിധരൻ മുളികണ്ടത്തിൽ എന്നിവർ പങ്കെടുത്തു. പയ്യോളിയിലെയും പരിസര പ്രദേശങ്ങളിലെയും നൂറോളം സാമ്പിളുകൾ പരിശോധിക്കുകയും വേണ്ട മാർഗ നിർദേശങ്ങൾ നൽകുകയും ചെയ്തു.&nbsp;

സൗജന്യ ജലപരിശോധന ക്യാമ്പ് സംഘടിപ്പിച്ചു

Koyilandy

കോട്ടയം: ഓട്ടോ ഡ്രൈവറെ കുത്തിയ ശേഷം ഗൃഹനാഥന്‍ കിടപ്പു മുറിയിൽ തൂങ്ങി മരിച്ചു. അറുനൂറ്റിമംഗലത്ത് മുള്ളം മടയ്ക്കൽ വീട്ടിൽ ഷിബു ലൂക്കോസാണ് തൂങ്ങി മരിച്ചത്. ഓട്ടം പോകണം എന്ന് പറഞ്ഞാണ് ഓട്ടോ ഡ്രൈവറെ ഷിബു ലൂക്കോസ് വീട്ടിലേക്ക് വിളിച്ചു വരുത്തിയത്. അറുനൂറ്റിമംഗലം സ്റ്റാൻഡിലെ ഓട്ടോ ഡ്രൈവർ കെഎസ് പുരം വടക്കേ കണ്ണങ്കരയത്ത് വി എസ് പ്രഭാതിനിക്കാണ് കുത്തേറ്റത്.
ഓട്ടം പോകണമെന്ന് പറഞ്ഞ് വീട്ടിലേക്ക് വിളിച്ച് വരുത്തിയ ശേഷം ടാപ്പിങ് കത്തിയെടുത്ത് കുത്തുകയായിരുന്നുവെന്ന് പൊലീസ് പറഞ്ഞു. കുത്തേറ്റ പ്രഭാത് ഓട്ടോ ഓടിച്ച് അറുനൂറ്റിമംഗലം സെന്റ് തോമസ് പള്ളിക്കു സമീപം വരെ എത്തിയെങ്കിലും നിയന്ത്രണം വിട്ട് സമീപത്തെ പോസ്റ്റിലിടിച്ചു നിന്നു. അവശനിലയിൽ ഓട്ടോയിൽ കിടന്ന പ്രഭാതിനെ നാട്ടുകാരാണ് ആശുപത്രിയിൽ എത്തിച്ചത്.
പ്രഭാതിനെ കുത്തിയ ശേഷം ഷിബു വീടിനുള്ളിൽ‍ കിടപ്പു മുറിയിൽ തൂങ്ങി മരിക്കുകയായിരുന്നു. നാട്ടുകാർ അറിയിച്ചതിനെ തുടർന്ന് വെള്ളൂർ പൊലീസ് സ്ഥലത്ത് എത്തി ഷിബുവിനെ മുട്ടുചിറ ആശുപത്രിയിൽ എത്തിച്ചെങ്കിലും മരിച്ചു. കുടുംബ പ്രശ്നമാണ് സംഭവത്തിനു പിന്നിലെന്ന് വെള്ളൂർ പൊലീസ് അറിയിച്ചു.

ഓട്ടോ ഡ്രൈവറെ വീട്ടിലേക്ക് വിളിച്ച് കുത്തി പരിക്കേൽപ്പിച്ചു; പിന്നാലെ ഗൃഹനാഥൻ തൂങ്ങി മരിച്ചു

കൊച്ചി: സംസ്ഥാനത്ത് ഉയര്‍ന്ന ചൂട് തുടരുന്ന സാഹചര്യത്തില്‍ ജലജന്യ രോഗങ്ങള്‍ക്കെതിരെ ജാഗ്രത പാലിക്കണമെന്ന് ആരോഗ്യ വകുപ്പ് മന്ത്രി വീണാ ജോര്‍ജ്. വേനല്‍ക്കാലത്ത് ശുദ്ധ ജലത്തിന്റെ ലഭ്യത കുറവായതിനാല്‍ ജലജന്യ രോഗങ്ങള്‍ ഉണ്ടാകുവാന്‍ സാധ്യതയുണ്ട്. വയറിളക്ക രോഗങ്ങള്‍ നിര്‍ജലീകരണത്തിനും തുടര്‍ന്നുള്ള സങ്കീര്‍ണ ആരോഗ്യ പ്രശ്‌നങ്ങള്‍ക്കും കാരണമായേക്കാം. വയറിളക്ക രോഗങ്ങള്‍, മഞ്ഞപിത്തത്തിന് കാരണമാകുന്ന ഹെപ്പറ്റൈറ്റീസ്-എ, ഹെപ്പറ്റൈറ്റിസ് ഇ, കോളറ, ടൈഫോയിഡ്, ഷിഗല്ല തുടങ്ങിയ അസുഖങ്ങള്‍ ഇത്തരത്തില്‍ ഉണ്ടാകാന്‍ സാദ്ധ്യതയുണ്ട്. ഉയര്‍ന്ന ചൂട് കാരണം പെട്ടെന്ന് നിര്‍ജലീകരണമുണ്ടാകാന്‍ സാധ്യതയുള്ളതിനാല്‍ ദാഹം തോന്നിയില്ലെങ്കിലും വെളളം കുടിക്കണം. എന്തെങ്കിലും രോഗ ലക്ഷണങ്ങളുണ്ടെങ്കില്‍ സങ്കീര്‍ണമാകാതെ ചികിത്സ തേടണമെന്നും മന്ത്രി അഭ്യര്‍ത്ഥിച്ചു.
ചൂട് കാലമായതിനാല്‍ ഭക്ഷണം പെട്ടന്ന് കേടാകാന്‍ സാധ്യതയുള്ളതിനാല്‍ പ്രത്യേകം ശ്രദ്ധിക്കണം. ഭക്ഷ്യ സുരക്ഷാ വകുപ്പും ശക്തമായ നടപടി സ്വീകരിച്ചു വരുന്നു. രുചിയിലോ മണത്തിലോ സംശയമുള്ള ഭക്ഷണങ്ങള്‍ കഴിക്കരുത്. കുടിക്കുന്ന വെള്ളം ശുദ്ധമാണെന്ന് ഉറപ്പ് വരുത്തണം. തിളപ്പിച്ചാറിയ വെള്ളം നല്ലത്.
പുറത്ത് പോകുമ്പോള്‍ കുടിക്കുവാനായി തിളപ്പിച്ചാറിയ വെള്ളം കരുതുന്നത് നല്ലത്. ഭക്ഷണപാനീയങ്ങള്‍ ഈച്ച കടക്കാതെ അടച്ചു സൂക്ഷിക്കുക. ഭക്ഷണം പാചകം ചെയ്യാനും കഴിക്കാനും ഉപയോഗിക്കുന്ന പാത്രങ്ങള്‍ ശുദ്ധജലത്തില്‍ മാത്രം കഴുകുക. പാനീയങ്ങളില്‍ ശുദ്ധജലം ഉപയോഗിച്ച് തയ്യാറാക്കിയ ഐസ് മാത്രം ചേര്‍ക്കുക. കുടിവെള്ള സ്രോതസുകളില്‍ മലിന ജലം കലരുന്നത് തടയുക. കിണറുകളും കുടിവെള്ള സ്രോതസുകളും കൃത്യമായ ഇടവേളകളില്‍ ക്ലോറിനേറ്റ് ചെയ്യുക. മലിനജലം കലര്‍ന്നിട്ടുണ്ടെങ്കില്‍ സൂപ്പര്‍ ക്ലോറിനേഷന്‍ നടത്തുക.
വ്യക്തിശുചിത്വവും പരിസര ശുചിത്വവും ഏറെ പ്രധാനമാണ്. ആഹാരം പാകം ചെയ്യുന്നതിനും വിളമ്പുന്നതിനും കഴിക്കുന്നതിനും മുമ്പും മലമൂത്ര വിസര്‍ജനത്തിനു ശേഷവും കൈകള്‍ സോപ്പുപയോഗിച്ച് കഴുകുക. കൈകളിലെ നഖം വെട്ടി വൃത്തിയായി സൂക്ഷിക്കുക. കുട്ടികള്‍ മണ്ണില്‍ കളിച്ചാല്‍ കൈകള്‍ സോപ്പുപയോഗിച്ച് കഴുകുക. മലമൂത്ര വിസര്‍ജ്ജനം കക്കൂസില്‍ മാത്രം നടത്തുക. ഈച്ചശല്യം ഒഴിവാക്കുക. വീടിന്റെ പരിസരത്തും പൊതുസ്ഥലങ്ങളിലും മാലിന്യം കുന്നു കൂടാതെ ശ്രദ്ധിക്കുക. പൊതു ടാപ്പുകളും പരിസരവും വൃത്തിയായി സൂക്ഷിക്കുക. കൊതുകിന്റെ ഉറവിടമാകാതിരിക്കാന്‍ വീട്ടിനകത്തും പുറത്തും വെള്ളം കെട്ടി നിര്‍ത്തരുത്.
വയറിളക്ക രോഗങ്ങള്‍ പകരാതിരിക്കാന്‍ പ്രത്യേകം കരുതല്‍ വേണം. രോഗി മലമൂത്ര വിസര്‍ജനം ശുചിമുറിയില്‍ മാത്രം ചെയ്യുക. മലമൂത്ര വിസര്‍ജനത്തിന് ശേഷം കൈകള്‍ സോപ്പുപയോഗിച്ച് കഴുകുക. രോഗി ഉപയോഗിച്ച ശുചിമുറി അണുനാശിനി ഉപയോഗിച്ച് വൃത്തിയാക്കിയതിന് ശേഷം മാത്രം മറ്റുള്ളവര്‍ ഉപയോഗിക്കുക. രോഗി ഭക്ഷണം പാചകം ചെയ്യുകയോ ഭക്ഷണ പാനീയങ്ങള്‍ കൈകാര്യം ചെയ്യുകയോ പാടില്ല. കുഞ്ഞുങ്ങളുടെ വിസര്‍ജ്യം ശുചിമുറിയില്‍ മാത്രം കളയുക. കുഞ്ഞുങ്ങളെ മലവിസര്‍ജനത്തിന് ശേഷം ശുചിമുറിയില്‍ മാത്രം കഴുകിക്കുക. കഴുകിച്ച ശേഷം കൈകള്‍ സോപ്പുപയോഗിച്ച് കഴുകുക. ഉപയോഗശേഷം ഡയപ്പറുകള്‍ വലിച്ചെറിയാതെ ആഴത്തില്‍ കുഴിച്ചിടുക.
കുട്ടികള്‍ക്ക് വയറിളക്ക രോഗങ്ങളുണ്ടായാല്‍ വളരെ ശ്രദ്ധിക്കണം. നിര്‍ജലീകരണം ഉണ്ടാകാതിരിക്കാന്‍ ഉപ്പിട്ട കഞ്ഞിവെള്ളം, കരിക്കിന്‍വെള്ളം, ഒ.ആര്‍.എസ്. എന്നിവ ഇടയ്ക്കിടയ്ക്ക് നല്‍കണം. വയറിളക്ക രോഗമുള്ളപ്പോള്‍ ഒ.ആര്‍.എസിനൊപ്പം ഡോക്ടറുടെ നിര്‍ദേശാനുസരണം സിങ്കും നല്‍കേണ്ടതാണ്. വയറിളക്കം കുറഞ്ഞില്ലെങ്കില്‍ എത്രയും വേഗം വൈദ്യ സഹായം തേടേണ്ടതാണ്.

ദാഹം തോന്നിയില്ലെങ്കിലും ധാരാളം വെള്ളം കുടിക്കണം; ജലജന്യ രോഗങ്ങള്‍ക്കെതിരെ ജാഗ്രത പാലിക്കണമെന്ന് ആരോഗ്യമന്ത്രി

Health

ഒഞ്ചിയം: ഒഞ്ചിയം നുസ്രത്തുൽ ഇസ്ലാം മദ്രസാ മുൻ സദർ മുഅല്ലിമും ഒഞ്ചിയം ജുമാ മസ്ജിദ് മുതവല്ലിയും, പ്രമുഖ പണ്ഡിതനും സൂഫീ വര്യനുമായ അബ്ബാസ് മുസ്ലിയാർ (78) അന്തരിച്ചു. നാലു പതിറ്റാണ്ടിലേറെ കാലം ഒഞ്ചിയത്തെ മത സാമൂഹിക രാഷ്ട്രീയ രംഗങ്ങളിൽ നിറസാന്നിധ്യമായിരുന്നു. പട്ടാമ്പി സ്വദേശിയായ ഉസ്താദ് നാലു തലമുറകൾക്ക് വിദ്യ പകർന്നു നൽകുന്നതിൽ നിസ്തുലമായ പങ്കുവഹിച്ചു. ഖബറടക്ക ചടങ്ങുകൾ ശനിയാഴ്ച രാവിലെ എട്ടുമണിക്ക് സ്വവസതിയായ പട്ടാമ്പിയിൽ വെച്ച് നടക്കും.

ഒഞ്ചിയം നുസ്രത്തുൽ ഇസ്ലാം മദ്രസാ മുൻ സദർ മുഅലിം പ്രമുഖ പണ്ഡിതൻ അബ്ബാസ് മുസ്ലിയാർ അന്തരിച്ചു

Obituary

തിരുവല്ലം: ഭർത്താവും ഭാര്യയും സഞ്ചരിച്ച ബൈക്കിൽ എതിരെ വന്ന മറ്റൊരു ബൈക്കിടിച്ചുണ്ടായ അപകടത്തിൽ ഭർത്താവ് മരിച്ചു. കാലിനും കൈയ്ക്കും പരിക്കേറ്റ ഭാര്യ ചികിത്സയിൽ. വെങ്ങാനൂർ മുട്ടയ്ക്കാട് ശാസ്താറോഡിൽ സ്വാതി ഭവനിൽ എ. കുമാർ( 40) ആണ് മരിച്ചത്. ഭാര്യ സരിത(39) ആണ് പരിക്കുകളോടെ രക്ഷപ്പെട്ടത്. ബുധനാഴ്ച വൈകിട്ട് 6.30 ഓടെ തിരുവല്ലം-കോവളം ബൈപ്പാസിൽ തിരുവല്ലം ജങ്ഷനിലായിരുന്നു അപകടം.
തിരുവല്ലം ഭാഗത്ത് നിന്ന് എതിരെ വന്ന ബൈക്ക് ഇവരുടെ ബൈക്കിൽ ഇടിക്കുകയായിരുന്നു. റോഡിലേക്ക് തെറിച്ച് വീണ കുമാറിന്റെ തലയ്ക്ക് ഗുരുതര പരിക്കേറ്റ് ബോധം മറഞ്ഞ നിലയിലായിരുന്നു. അപകടത്തെ തുടർന്ന് തിരുവല്ലം പോലീസെത്തി ദേശീയപാത അധികൃതരുടെ ആംബൂലൻസിൽ മെഡിക്കൽ കോളേജ് ആശുപത്രിയിലേക്ക് മാറ്റി. എന്നാൽ, ചികിത്സയിലിരിക്കെ വ്യാഴാഴ്ച പുലർച്ചെ മൂന്നോടെ മരിച്ചു. വെളളം കൊണ്ടുപോകുന്ന ടാങ്കർ ലോറിയിൽ ഡ്രൈവറായിരുന്നു കുമാർ . തിരുവല്ലം പോലീസ് കേസെടുത്തു. മകൾ: സ്വാതി.

ബൈക്കില്‍ മറ്റൊരു ബൈക്കിടിച്ച് ഭര്‍ത്താവ് മരിച്ചു; ഭാര്യയ്ക്ക് പരിക്ക്

കോഴിക്കോട്: കരിപ്പുർ അന്താരാഷ്ട്ര വിമാനത്താവളം വഴി കടത്തിയ 54 ലക്ഷം രൂപയുടെ സ്വർണം പോലീസ് പിടികൂടി. അബുദാബിയില്‍നിന്നും ഇന്ത്യയിലേക്ക് കടത്താന്‍ ശ്രമിച്ച 859 ഗ്രാം സ്വര്‍ണമാണ് മലപ്പുറം പോലീസ് പിടിച്ചെടുത്തത്. എയര്‍ ഇന്ത്യ എക്സ്പ്രസ്സ് വിമാനത്തില്‍ കരിപ്പുർ വിമാനത്താവളത്തിറങ്ങിയ കോഴിക്കോട് നല്ലളം സ്വദേശി മുനീര്‍ പിടിയിലായി.
സ്വര്‍ണം മിശ്രിത രൂപത്തിലാക്കി മൂന്ന് ക്യാപ്സ്യൂളുകളാക്കി പാക്ക് ചെയ്ത് ശരീരത്തിനകത്ത് ഒളിപ്പിച്ചാണ് ഇയാള്‍ അബുദാബിയില്‍ നിന്നെത്തിയത്. പിടിച്ചെടുത്ത സ്വർണത്തിന് ആഭ്യന്തര വിപണിയില്‍ 54 ലക്ഷത്തിലധികം വില വരും. വിമാനത്താവളത്തിന് പുറത്തുവെച്ചാണ് പോലീസ് സ്വർണം പിടികൂടിയത്.
വിമാനത്താവളത്തിനകത്തെ ആധുനിക എക്സ്-റേ സംവിധാനങ്ങളും പരിശോധനകളും മറികടന്നാണ് മുനീർ പുറത്തെത്തിയത്. മലപ്പുറം ജില്ലാ പോലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പോലീസ് വിമാനത്താവളത്തിന് പുറത്തുവെച്ച് ഇയാളെ കസ്റ്റഡിയിലെടുത്തത്.

മൂന്ന് ക്യാപ്സ്യൂളുകളാക്കി പാക്ക് ചെയ്ത് ശരീരത്തിനകത്ത് ഒളിപ്പിച്ചു; കരിപ്പുരിൽ 54 ലക്ഷത്തിന്റെ സ്വര്‍ണവുമായി യാത്രക്കാരൻ പിടിയിൽ

മലപ്പുറം: ആലത്തൂർ മണ്ഡലം ഇടത് സ്ഥാനാർത്ഥി കെ രാധാകൃഷ്ണൻ്റെ ബോർഡിന് തീയിട്ടു. കുഴൽമന്ദം ചന്തപ്പുര ജംക്ഷനിൽ സ്ഥാപിച്ച പ്രചാരണ ബോർഡിനാണ് തീയിട്ടത്. യൂ
ഇന്നലെ രാത്രി 12 മണിയോടെയായിരുന്നു സംഭവം. തീ സമീപത്തെ പറമ്പിലേക്കും വ്യാപിച്ചിരുന്നു. ഫയർഫോഴ്സ് എത്തിയാണ് തീ അണച്ചത്. യൂത്ത് കോൺഗ്രസ് പ്രവർത്തകരാണ് സംഭവത്തിന് പിന്നിലെന്ന് എൽഡിഎഫ് ആരോപിച്ചു.

ആലത്തൂരിലെ ഇടത് സ്ഥാനാർത്ഥി കെ.രാധാകൃഷ്ണൻ്റെ പ്രചാരണ ബോർഡ് തീയിട്ടു

പാലക്കാട്: രാത്രി ഭക്ഷണം കഴിച്ച് ഉറങ്ങാന്‍ കിടന്ന പ്ലസ്ടു വിദ്യാര്‍ഥി മരിച്ചു. കൂറ്റനാട് മതുപ്പുള്ളി വെളുത്തവളപ്പില്‍ മുഹമ്മദ് നാജിലാണ് (18) മരിച്ചത്. ചാലിശ്ശേരി എച്ച്.എസ്.എസിലെ പ്ലസ്ടു കൊമേഴ്‌സ് വിഭാഗം വിദ്യാര്‍ഥിയാണ്. ബുധനാഴ്ച രാത്രി പത്തരയോടെയാണ് സംഭവം. കുട്ടിക്ക് അസുഖങ്ങളൊന്നുമുണ്ടായിരുന്നില്ലെന്നാണ് വീട്ടുകാര്‍ പറയുന്നത്. ഉറക്കത്തിനിടയില്‍ ശ്വാസതടസ്സം നേരിട്ട് പെട്ടെന്ന് കുഴഞ്ഞുവീഴുകയായിരുന്നു. ഉടനെ വീട്ടുകാരും ബന്ധുക്കളും ചേര്‍ന്ന് പെരുമ്പിലാവിലെ സ്വകാര്യ ആശുപത്രിയിലും പിന്നീട് വിദഗ്ധചികിത്സയ്ക്കായി തൃശ്ശൂരിലെ സ്വകാര്യ ആശുപത്രിയിലും എത്തിച്ചെങ്കിലും രക്ഷിക്കാനായില്ല.
സംസ്ഥാന കലോത്സവങ്ങളില്‍ മാപ്പിളക്കലകളില്‍ മികച്ച പ്രകടനം കാഴ്ചവെച്ച വിദ്യാര്‍ഥിയാണ്. പിതാവ്: ജമാല്‍. മാതാവ്: സബീന. സഹോദരിമാര്‍: ലിയ, റെന.

ഉറങ്ങാന്‍ കിടന്ന പ്ലസ്ടു വിദ്യാര്‍ഥി മരിച്ചു

കോഴിക്കോട്: പൗരത്വ ഭേദഗതി നിയമത്തിനെതിരായ സിപിഐഎം റാലി ഇന്ന്. മുഖ്യമന്ത്രി പിണറായി വിജയന്‍ റാലി ഉദ്ഘാടനം ചെയ്യും.സമസ്ത ഉള്‍പ്പടെയുള്ള മത, സാമൂഹ്യ, രാഷ്ട്രീയ സാംസ്‌കാരിക സംഘടനകളുടെ നേതാക്കളെ പരിപാടിയിലേക്ക് ക്ഷണിച്ചിട്ടുണ്ട്. 2020ല്‍ മഹാറാലി സംഘടിപ്പിച്ചതിന് സമാനമായി വിവിധ മത സാമൂഹ്യ രാഷ്ട്രീയ സാംസ്‌കാരിക നേതാക്കള്‍ പങ്കെടുക്കും. 2020ല്‍ സമസ്ത ജനറല്‍ സെക്രട്ടറി പ്രൊഫസര്‍ കെ.ആലിക്കുട്ടി മുസല്യാരായിരുന്നു അധ്യക്ഷനെങ്കില്‍ ഇത്തവണ കോഴിക്കോട്ടെ എല്‍ഡിഎഫ് സ്ഥാനാര്‍ഥി എളമരം കരീമാണ് അധ്യക്ഷന്‍.
മാർച്ച് 22 മുതൽ 27 വരെ കോഴിക്കോട്, കാസർഗോഡ് , കണ്ണൂർ, മലപ്പുറം, കൊല്ലം ജില്ലകളിലായാണ് റാലികൾ സംഘടിപ്പിക്കുന്നത്. ആദ്യ റാലി വൈകുന്നേരം 7 മണിക്ക് കോഴിക്കോട് കടപ്പുറത്ത് നടക്കും. മതത്തിന്റെ പേരു പറഞ്ഞു പൗരത്വം നിഷേധിക്കുന്ന ഈ കിരാത നിയമം കേരളത്തിൽ നടപ്പിലാക്കില്ലെന്നത് എൽഡിഎഫ് സർക്കാരിന്റെ ഉറച്ച നിലപാടാണ്. ഈ നിലപാട് ഉയർത്തിപ്പിടിച്ചുകൊണ്ട് ഒരുമിച്ച് നമുക്ക് മതനിരപേക്ഷ -ജനാധിപത്യ ഇന്ത്യക്കായി അണിചേരാമെന്നും മുഖ്യമന്ത്രി കുറിച്ചു.

പൗരത്വഭേദഗതി നിയമത്തിനെതിരെ സിപിഐഎം റാലി കോഴിക്കോട്ട് മുഖ്യമന്ത്രി ഉദ്ഘാടനം ചെയ്യും

Kozhikode

വടകര: കീഴൽ ആയടവൻ വീട്ടിൽ എ. രാജൻ (കോയമ്പത്തൂർ) (59) അന്തരിച്ചു. ഭാര്യ; സരള. മക്കൾ: സന്ദീപ്, സഞ്ജീവ്. സഹോദരങ്ങൾ: വനജ, ബാലൻ, ശശികല ,ഉഷ.

കീഴൽ ആയടവൻ വീട്ടിൽ എ. രാജൻ അന്തരിച്ചു

വടകര: നിപയെ അതിജീവിച്ച അജന്യയെയും കുടുംബത്തെയും സന്ദര്‍ശിച്ച് വടകരയിലെ എൽഡിഎഫ് സ്ഥാനാർത്ഥി കെകെ ശൈലജ. വൈറസ് ബാധ സമയത്ത് അജന്യ കാണിച്ച ആത്മധൈര്യം മാതൃകാപരമാണെന്ന് ശൈലജ പറഞ്ഞു. ഇത്തവണ ഞങ്ങളെ സ്വീകരിക്കാന്‍ അജന്യയുടെ കൂടെ ഒരു കുഞ്ഞുവാവയും ഉണ്ടായിരുന്നു. നിപയെ അതിജീവിച്ച കരുത്താണ് അജന്യ. വൈറസ് ബാധ സമയത്ത് അജന്യ കാണിച്ച നിശ്ചയദാര്‍ഢ്യവും ആത്മധൈര്യവും മാതൃകാപരമാണെന്നും ശൈലജ ഫേസ്ബുക്കിൽ കുറിച്ചു.
കെകെ ശൈലജയുടെ കുറിപ്പ്:
”ഒരു കുടുംബത്തിലുള്ള അസ്വാഭാവിക മരണത്തിന്റെ പിറകെയുള്ള അന്വേഷണമാണ് നിപ വൈറസ് എന്ന ഭീകര വൈറസിനെ കണ്ടെത്തുന്നതിന്റെ തുടക്കം. അപ്പോഴേക്കും നിപ സ്ഥിരീകരിച്ച 18 പേരില്‍ 16 പേരും മരണത്തിന് കീഴടങ്ങിയിരുന്നു. മറ്റുള്ളവരെ ഏതുവിധേനയും രക്ഷപ്പെടുത്തുക എന്നത് സാഹസികമാണെങ്കിലും കൃത്യമായ ഏകീകരണവും കൂട്ടായ പരിശ്രമവും കൊണ്ട് അതിനെ മറികടക്കുകയാണ് ഉണ്ടായത്.”
”അജന്യയ്ക്കും മലപ്പുറം സ്വദേശി ഉബീഷിനും നിപ നെഗറ്റീവ് ആയത് വളരെ ആശ്വാസകരമായെങ്കിലും, നെഗറ്റീവായവരെ എങ്ങനെയാണ് ജനം സ്വീകരിക്കുക എന്നത് ആ സമയത്തുള്ള മറ്റൊരു ആശങ്കയായിരുന്നു. അതിനെ മറികടക്കാന്‍ അജന്യയെ നേരിട്ട് ഹോസ്പിറ്റലില്‍ പോയി കാണുക വഴി അജന്യയില്‍ നിന്ന് ഇനി മറ്റൊരാളിലേക്ക് രോഗം പകരില്ലെന്ന് ഉറപ്പ് പൊതുജനങ്ങള്‍ക്ക് നല്‍കുകയുമായിരുന്നു. അജന്യക്ക് അത് വലിയ ആത്മവിശ്വാസമാണ് നല്‍കിയത് എന്ന് പറഞ്ഞു കേള്‍ക്കുമ്പോള്‍ ഏറെ സന്തോഷം തോന്നി. തിരഞ്ഞെടുപ്പ് പ്രചരണത്തിനിടെ അജന്യയെ കണ്ടിരുന്നു. ഇത്തവണ ഞങ്ങളെ സ്വീകരിക്കാന്‍ അജന്യയുടെ കൂടെ ഒരു കുഞ്ഞുവാവയും ഉണ്ടായിരുന്നു. നിപയെ അതിജീവിച്ച കരുത്താണ് അജന്യ. വൈറസ് ബാധ സമയത്ത് അജന്യ കാണിച്ച നിശ്ചയദാര്‍ഢ്യവും ആത്മധൈര്യവും മാതൃകാപരമാണ്.”

'നിപയെ അതിജീവിച്ച കരുത്ത്'; അജന്യയെ വീട്ടിൽ സന്ദര്‍ശിച്ച് കെകെ ശൈലജ

Perambra

തലശ്ശേരി: എട്ടു വയസ്സുകാരിക്കെതിരെ ലൈംഗികാതിക്രമം നടത്തിയ കേസിൽ പ്രതിക്ക് എട്ടുവർഷം തടവും 40,000 രൂപ പിഴയും. കുന്നിരിക്ക കൂടത്തിങ്കൽ ഹൗസിൽ കെ. ഷൈജുവിനെയാണ് തലശ്ശേരി അതിവേഗ കോടതി ജഡ്ജി ടിറ്റി ജോർജ് ശിക്ഷിച്ചത്. 2021 ഡിസംബർ ഒമ്പതിന് വൈകീട്ട് മൂന്നരക്കാണ് കേസിനാസ്പദമായ സംഭവം.
മക്രേരി സുബ്രഹ്മണ്യ ക്ഷേത്രത്തിനടുത്ത് വെച്ച് മിഠായിയും പൈസയും നൽകാമെന്ന് പറഞ്ഞ് വശീകരിച്ച് പെൺകുട്ടിയെ വിവസ്ത്രയാക്കി ലൈംഗികാതിക്രമം നടത്തിയെന്നാണ് കേസ്. ചക്കരക്കല്ല് പൊലീസ് രജിസ്റ്റർ ചെയ്ത കേസിൽ പോക്സോ ഉൾപ്പെടെയുള്ള വകുപ്പുകളിലാണ് പ്രതിയെ ശിക്ഷിച്ചത്. ചക്കരക്കല്ല് എസ്.ഐയായിരുന്ന ഗംഗാധരനാണ് കേസന്വേഷണം നടത്തി കോടതിയിൽ കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി പി.എം. ബാസുരി ഹാജരായി.

എട്ടു വയസ്സുകാരിക്ക് നേരെ ലൈംഗികാതിക്രമം: പ്രതിക്ക് എട്ടുവർഷം തടവും പിഴയും വിധിച്ച് തലശ്ശേരി കോടതി

Kannur

ന്യൂഡൽഹി: മുഖ്യമന്ത്രി അരവിന്ദ് കെജ്രിവാളിന്റെ അറസ്റ്റിൽ പ്രതിഷേധിച്ച എഎപി മന്ത്രിമാരെയും പ്രവർത്തകരേയും പൊലീസ് കസ്റ്റഡിയിലെടുത്തു. ബിജെപി ഓഫീസിലേക്ക് വിദ്യാഭ്യാസ മന്ത്രി അതിഷി മർലേനയുടേയും ആരോഗ്യമന്ത്രി സൗരഭ് ഭരദ്വാജിന്റെയും നേതൃത്വത്തിൽ നടത്തിയ പ്രതിഷേധ മാർച്ചിലുണ്ടായ സംഘർഷത്തെ തുടർന്നാണ് അറസ്റ്റ്. ഡല്‍ഹി മദ്യനയ അഴിമതിക്കേസില്‍ മുഖ്യമന്ത്രി അരവിന്ദ് കെജരിവാള്‍ ഉള്‍പ്പെടെ എഎപി നേതാക്കള്‍ 100 കോടി കൈപ്പറ്റിയെന്ന് ആരോപിച്ചാണ് കെജ്രിവാളിനെ ഇന്നലെ രാത്രി അറസ്റ്റ് ചെയ്തത്.&nbsp;
മോദിക്കും ബിജെപി സർക്കാരിനും എതിരേ മുദ്രാവാക്യങ്ങളുമായെത്തിയ പ്രവർത്തകരെ പോലീസ് നേരിട്ടതാണ് സംഘർഷത്തിന് കാരണം. പ്രവർത്തകരെ വലിച്ചിഴച്ചാണ് പോലീസ് വാഹനങ്ങളിൽ കയറ്റിയത്. പ്രതിഷേധത്തെ തുടർന്ന് ഡൽഹിയിൽ ഗതാഗതം സ്തംഭിച്ചു. ശക്തമായ പ്രതിഷേധത്തിനുള്ള സാധ്യത മുന്നിൽക്കണ്ട് ഡൽഹിയിൽ പോലീസ് സുരക്ഷയായിരുന്നു ഏർപ്പെടുത്തിയിരുന്നു. പലയിടത്തും ബാരിക്കേടുകൾ വെച്ച് തടഞ്ഞിട്ടുണ്ട്.
കെജ്‌രിവാളിനെ അറസ്റ്റ് ചെയ്തതോടെ ഡല്‍ഹി മുഖ്യമന്ത്രിസ്ഥാനം രാജിവെക്കണമെന്ന് ബിജെപി ആവശ്യമുന്നയിച്ചു. എന്നാല്‍, രാജിവെക്കില്ലെന്നും ജയിലില്‍കിടന്ന് ഭരണം നടത്തുമെന്നുമാണ് എഎപി പ്രതികരിച്ചത്. അതേസമയം അറസ്റ്റിനെതിരേ കെജ്‌രിവാള്‍ സമര്‍പ്പിച്ച ഹര്‍ജി ഇന്ന് സുപ്രീംകോടതി പരിഗണിക്കും. അറസ്റ്റിലായ അരവിന്ദ് കെജ്‌രിവാളിനെ ഇ ഡി കോടതിയില്‍ ഹാജരാക്കും.&nbsp;

ഡൽഹിയിൽ പ്രതിഷേധം കനക്കുന്നു; അതിഷിയടക്കം എഎപി മന്ത്രിമാർ കസ്റ്റഡിയിൽ

National

മാഹി : മഹത്തായ സാംസ്ക്കാരിക പൈതൃകമുള്ള, വികസന വഴിയിൽ ഏറെ മുന്നിൽ നിൽക്കുന്ന മയ്യഴിയെ വികലമായി ചിത്രീകരിച്ച് മയ്യഴി ജനതയെ മ്ലേച്ഛമായ ഭാഷയിൽ അപമാനിച്ച ബി.ജെ.പി. നേതാവ് പി.സി.ജോർജ് കഴിഞ്ഞ ദിവസം കോഴിക്കോട് നടത്തിയ പ്രസംഗം അങ്ങേയറ്റം പ്രതിഷേധാർഹമാണെന്ന് മാഹി എം എൽ എ രമേശ് പറമ്പത്ത് പറഞ്ഞു. നാവിൽ വരുന്നതെന്തും പുലമ്പുന്ന പി.സി.ജോർജ് മയ്യഴിയിലെ സ്ത്രീ സമൂഹത്തെയടക്കം ജനങ്ങളെയാകെ അപമാനിച്ചിരിക്കയാണ്. ഈ കാര്യത്തിൽ ദേശീയ വനിതാ കമ്മീഷൻ ഉൾപ്പെടെയുള്ള സംവിധാനങ്ങൾ അടിയന്തിരമായി ഇടപെടണമെന്ന് എം എൽ എ ആവശ്യപ്പെട്ടു. ജനങ്ങളെ മോശക്കാരായി ചിത്രീകരിക്കുന്ന ഇദ്ദേഹത്തെ പോലുള്ളവരെ തെരഞ്ഞെടുപ്പ് പ്രചാരണ രംഗത്ത് നിന്ന് മാറ്റി നിർത്താൻ ഇലക്ഷൻ കമ്മീഷൻ നടപടി സ്വീകരിക്കണം.&nbsp;&nbsp;&nbsp;
മയ്യഴി വേശ്യകളുടെ കേന്ദ്രമാണെന്നും, രാത്രികാലങ്ങളിൽ ഇതു വഴി യാത്ര ചെയ്യാനാവില്ലെന്നും, ഗുണ്ടകളും റൗഡികളും, തെമ്മാടികളും കൂത്താടിയിരുന്ന പ്രദേശമാണിതെന്നുമാണ് പി.സി.ജോർജ് പ്രസംഗിച്ചത്. സ്വാതന്ത്ര്യ സമരത്തിലടക്കം പങ്കെടുത്തവരും, കലാ-സാംസ്ക്കാരിയ-സാഹിത്യ രംഗത്ത് ചിരപ്രതിഷ്ഠ നേടിയവരുമായ വനിതകൾ മയ്യഴിയിലുണ്ടെന്നും, ഫ്രഞ്ച് ഭരണകാലത്തു തന്നെ വിദ്യാസമ്പന്നരായിരുന്നു മയ്യഴിയിലെ സ്ത്രീകളടക്കമുള്ളവരെന്നും ചരിത്രത്തിൽ കണ്ണോടിച്ചാൽ മാത്രം വായിക്കാൻ പി.സി.ജോർജിന് കഴിയേണ്ടതാണ്. സ്ത്രീത്വത്തെ അപമാനിച്ചതിനും നാട്ടിൽ കലാപം സൃഷ്ടിക്കാൻ ശ്രമിച്ചതിനും ഇയാൾക്കെതിരെ നിയമ നടപടികളുമായി കോൺഗ്രസ്സ് മുന്നോട്ട് പോകുമെന്ന് എം എൽ എ പറഞ്ഞു. ബ്ലോക്ക് ഭാരവാഹികളായ കെ മോഹനൻ, നളിനി ചാത്തു, പി പി വിനോദ് ,പി ടി സി ശോഭ, ആശാലത, കെ.പി.രജിലേഷ് എന്നിവർ വാർത്താ സമ്മേളനത്തിൽ സംബന്ധിച്ചു.

മയ്യഴിയെ അപമാനിച്ച പി.സി.ജോർജിനെതിരെ നിയമ നടപടി സ്വീകരിക്കും; രമേശ് പറമ്പത്ത് എംഎൽഎ

Mahe

കൊയിലാണ്ടി : തീവണ്ടിയിൽനിന്ന് തെറിച്ചുവീണ്‌ യുവാവ് മരിച്ചു. മലപ്പുറം പുത്തനത്താണി സ്വദേശി റിൻഷാദ്‌‌ (24) ആണ് മരിച്ചത്. കൂടെ യാത്രചെയ്ത സുഹൃത്ത് വിനിൽ (29) നും തീവണ്ടിയിൽനിന്നുവീണ്‌ പരിക്കേറ്റിട്ടുണ്ട്. ഇയാളെ മെഡിക്കൽ കോളേജിൽ പ്രവേശിപ്പിച്ചു. ആനക്കുളം റെയിൽവേ ഗേറ്റിനു സമീപം വ്യാഴാഴ്ച രാത്രി ഒൻപതുമണിയോടെയായിരുന്നു അപകടം. മംഗളൂരു-തിരുവനന്തപുരം മാവേലി എക്സ്പ്രസിൽനിന്നാണ് ഇരുവരും വീണത്.
കൊയിലാണ്ടി അഗ്നിരക്ഷാസേനയെത്തിയാണ് റിൻഷാദിന്റെ മൃതദേഹം താലൂക്കാശുപത്രിയിലേക്കെത്തിച്ചത്. മാവേലി എക്സ്പ്രസ് കൊല്ലം ആനക്കുളം റെയിൽവേ ഗേറ്റിനു സമീപമെത്തിയപ്പോഴാണ് റിൻഷാദ് വണ്ടിയിൽനിന്ന് തെറിച്ചുവീണത്. സഹയാത്രക്കാർ അപായച്ചങ്ങല വലിച്ചതിനെത്തുടർന്ന് തീവണ്ടി കൊല്ലം റെയിൽവേ ഗേറ്റിനു സമീപം നിർത്തിയപ്പോൾ പെട്ടെന്ന് ഇറങ്ങുന്നതിനിടയിൽ വിനിലിന് പരിക്കേറ്റെന്നാണ് വിവരം. റിൻഷാദിന്റെ മൃതദേഹം കോഴിക്കോട് മെഡിക്കൽ കോളേജ് മോർച്ചറിയിലേക്കു മാറ്റി.

കൊയിലാണ്ടിയിൽ തീവണ്ടിയിൽ നിന്നുവീണ് യുവാവ് മരിച്ചു

പേരാമ്പ്ര : വാളൂരിലെ കുറുങ്കുടി മീത്തല്‍ അനു കൊലപാതകക്കേസില്‍ പ്രതിയായ കൊണ്ടോട്ടി ചെറുപറമ്പ് കോളനി കാവുങ്കല്‍ നമ്പിലത്ത് വീട്ടില്‍ മുജീബ് റഹ്‌മാന്റെ (49) പഴയ കേസുകളിലെ ജാമ്യം റദ്ദാക്കാന്‍ പോലീസ് നടപടി തുടങ്ങി. ജാമ്യത്തിലിറങ്ങിയശേഷവും കൊലപാതകവും മോഷണവുമടക്കമുള്ള കേസുകളില്‍ ഉള്‍പ്പെടുന്ന കാര്യം ചൂണ്ടിക്കാട്ടി കോടതികളില്‍ റിപ്പോര്‍ട്ട് സമര്‍പ്പിക്കാന്‍ പോലീസ് ഉന്നതോദ്യോഗസ്ഥര്‍ വിവിധ സ്റ്റേഷന്‍ ഓഫീസര്‍മാര്‍ക്ക് നിര്‍ദേശം നല്‍കിയിട്ടുണ്ട്. കൊടുംകുറ്റവാളികള്‍ നാട്ടിലിറങ്ങി വിഹരിച്ച് വീണ്ടും തുടര്‍ച്ചയായി കുറ്റകൃത്യത്തില്‍ ഏര്‍പ്പെടുന്നത് തടയാന്‍ കര്‍ശനനടപടി വേണമെന്ന ആവശ്യം ശക്തമായ സാഹചര്യത്തിലാണ് പോലീസ് നടപടി.
മുക്കം മുത്തേരിയില്‍ വയോധികയെ ഓട്ടോയില്‍ കയറ്റി ആക്രമിച്ച് പീഡിപ്പിക്കുകയും മോഷണം നടത്തുകയുംചെയ്ത കേസ് അന്ന് നാടിനെയാകെ ഞെട്ടിച്ചതാണ്. അതിനുപിന്നാലെയാണ് ബൈക്കില്‍ ലിഫ്റ്റ് നല്‍കി വാളൂരില്‍ അനുവിനെ തോട്ടിലെ വെള്ളത്തില്‍ മുക്കിക്കൊന്ന് സ്വര്‍ണാഭരണങ്ങള്‍ മോഷ്ടിച്ചത്. മുക്കത്തെ കേസില്‍ പോലീസ് കുറ്റപത്രം സമര്‍പ്പിച്ചെങ്കിലും മുജീബ് ജാമ്യത്തിലിറങ്ങിയതാണ്. 2020 ജൂലായ് രണ്ടിനായിരുന്നു ഈ സംഭവം. ചോമ്പാലയില്‍നിന്ന് മോഷ്ടിച്ച ഓട്ടോയാണ് സ്ത്രീയെ കൊണ്ടുപോകാന്‍ ഉപയോഗിച്ചത്. അതിന് ചോമ്പാല പോലീസ് സ്റ്റേഷനിലും കേസുണ്ട്. 2019 ഡിസംബറില്‍ തലപ്പുഴ സ്റ്റേഷന്‍ പരിധിയില്‍ സ്ത്രീയുടെ ആഭരണം കവര്‍ന്ന കേസിലും പ്രതിയാണ്. കഴിഞ്ഞവര്‍ഷം ചാത്തമംഗലത്തെ ബാറ്ററിക്കട കുത്തിത്തുറന്ന് ബാറ്ററി മോഷ്ടിച്ചതിന് കുന്ദമംഗലം പോലീസ് സ്റ്റേഷനില്‍ മുജീബിന്റെ പേരില്‍ കേസുണ്ട്.
2019-ല്‍ മഞ്ചേരി പോലീസിലും താമരശ്ശേരി പോലീസിലും 2020-ലും 2021-ലും നടക്കാവ് പോലീസിലും 2021-ല്‍ ചോമ്പാല പോലീസിലും 2022-ല്‍ തേഞ്ഞിപ്പലം പോലീസിലും 2020-ല്‍ എലത്തൂര്‍ പോലീസിലും 2022-ല്‍ മയ്യില്‍ പോലീസിലും മുജീബിന്റെ പേരില്‍ കേസുകളുണ്ട്. 60-ഓളം കേസുകളുള്ള മുജീബിന് കൊണ്ടോട്ടിയില്‍മാത്രം 13 കേസുകളും മഞ്ചേരിയില്‍ ആറുകേസുകളുമുണ്ട്.
വ്യാഴാഴ്ച രാവിലെമുതല്‍ തെളിവെടുപ്പിന് പ്രതിയെ കൊണ്ടുവരുന്നതുംകാത്ത് ഒട്ടേറെപ്പേര്‍ വാളൂര്‍ നടുക്കണ്ടിപ്പാറയിലെ കൊലപാതകം നടന്ന തോടിനു സമീപം എത്തിയിരുന്നു. ഉച്ചയോടെ സ്ത്രീകളടക്കം നൂറുകണക്കിനുപേര്‍ റോഡില്‍ തടിച്ചുകൂടി. കൊലപാതത്തില്‍ പ്രതിയെ അറസ്റ്റ് ചെയ്ത ദിവസംമുതല്‍ ഇവിടെ ആളുകള്‍ തടിച്ചുകൂടിയിരുന്നു. പോലീസ് കസ്റ്റഡിയില്‍ മുജീബ് റഹ്‌മാനെ വിട്ടുനല്‍കിയതറിഞ്ഞ് രാവിലെമുതല്‍ ആളുകള്‍ ഇവിടെയെത്തി. കൊലപാതകത്തില്‍ നാടിന്റെ വികാരം അവരുടെയെല്ലാം വാക്കുകളില്‍ പ്രകടമായിരുന്നു. വ്യാഴാഴ്ച തെളിവെടുപ്പിനുമുമ്പ് സ്ഥിതിഗതികള്‍ മനസ്സിലാക്കാനെത്തിയ ഇന്‍സ്‌പെക്ടര്‍ എം.എ. സന്തോഷിന്റെ മുന്നിലും രോഷപ്രകടനമുണ്ടായി. അവനെ മുഖംമൂടി നീക്കി കാണിക്കണമെന്നായിരുന്നു ആവശ്യം. എന്നാല്‍, തെളിവെടുപ്പ് കഴിയാതെ മുഖംമൂടി ഒഴിവാക്കാന്‍ പോലീസിന് കഴിയുമായിരുന്നില്ല.
പ്രതിയെ കൊണ്ടുവരുന്നതിന് തൊട്ടുമുമ്പ് പഞ്ചായത്ത് പ്രസിഡന്റ് ശാരദ പട്ടേരിക്കണ്ടിയും ജനപ്രതിനിധികളുമെല്ലാം ജനങ്ങളോട് ശാന്തരാകണമെന്ന് അഭ്യര്‍ഥിച്ചു. പോലീസും തെളിവെടുപ്പിന്റെ പ്രാധാന്യത്തെപ്പറ്റി ജനങ്ങളോടു സംസാരിച്ചു. ഇതിനുശേഷം മുജീബ് റഹ്‌മാനെ സ്ഥലത്തെത്തിച്ചപ്പോഴേക്കും ജനങ്ങളുടെ രോഷം അണപൊട്ടുന്ന കാഴ്ചയായിരുന്നു.

പേരാമ്പ്ര കൊലപാതകം; മുജീബ് റഹ്‌മാന്റെ പഴയ കേസുകളിലെ ജാമ്യം റദ്ദാക്കാന്‍ നടപടി തുടങ്ങി

തൃശൂർ: ആർ.എൽ.വി. രാമകൃഷ്ണനെ ഉദ്ദേശിച്ച് ഒരു യൂട്യൂബ് ചാനലിൽ കറുത്ത നിറമുള്ളവർ നൃത്തം ചെയ്യരുതെന്നു പറഞ്ഞ കലാമണ്ഡലം സത്യഭാമയുടെ വിവാദ പരാമർശത്തിനെതിരെ മനുഷ്യാവകാശ കമ്മിഷൻ സ്വമേധയാ കേസെടുത്തു.&nbsp;
ത്യശൂർ ജില്ലാ പൊലീസ് മേധാവിയും സാംസ്കാരിക വകുപ്പ് ഗവൺമെന്റ് സെക്രട്ടറിയും പരാമർശം പരിശോധിച്ച് 15 ദിവസത്തിനകം റിപ്പോർട്ട് സമർപ്പിക്കണമെന്നു കമ്മിഷൻ അംഗം വി.കെ. ബീനാ കുമാരി ആവശ്യപ്പെട്ടു. മാധ്യമ വാർത്തയുടെ അടിസ്ഥാനത്തിൽ സ്വമേധയാ റജിസ്റ്റർ ചെയ്ത കേസിലാണു നടപടി. മനുഷ്യാവകാശ പ്രവർത്തകനായ ഗിന്നസ് മാട സാമിയും ഇതേ വിഷയത്തിൽ പരാതി നൽകിയിരുന്നു.

കലാമണ്ഡലം സത്യഭാമയ്‌ക്കെതിരെ മനുഷ്യാവകാശ കമ്മിഷൻ കേസെടുത്തു

ഉള്ളിയേരി: കരിങ്ങറ്റിക്കോട്ട ഭഗവതി ക്ഷേതത്തിലെ തിറമഹോത്സവം മാർച്ച് 27, 28 തിയ്യതികളിൽ നടക്കും. കാലത്ത് 6 മണിക്ക് ഗണപതി ഹോമം, സുന്ദർശന ഹോമം, കൂട്ടപ്രാർത്ഥന. ക്ഷേത്രം തന്ത്രി വേലായുധൻ കാരക്കട്ട് മീത്തലിന്റെ നേതൃത്വത്തിൽ ക്ഷേത്രം ശാന്തി സ്വമി ചെറുകാവിൽ കാർമികത്വം വഹിക്കും. മാർച്ച് 27 ന് ബുധൻ കാലത്ത് ഗണപതി ഹോമം. 6.30 ന് വാൾ എഴുന്നള്ളിപ്പ്, ഇളംനീർക്കുലവരവ്, ഉച്ചപൂജ, വൈകുന്നേരം കലശം പനിച്ചി പറമ്പത്ത്, ദീപാരാധന, കരിങ്കലശം.&nbsp;
മാർച്ച് 28 ന് ഉഷ പൂജ , ഇളംനീർക്കുല വരവ്, വാദ്യമേങ്ങളോടു കുടി നടുവണ്ണൂരിൽ നിന്നും ഉള്ള ആഘോഷ വരവ്, ഉച്ചക്ക് പ്രസാദ ഊട്ട്. വൈകീട്ട് 4 മണിക്ക് ഭഗവതി വെള്ളാട്ട്, സസ്യക്ക് ദീപാരാധന. പനിച്ചി പറമ്പത്ത് നിന്നും ആരംഭിക്കുന്ന താലപ്പൊലി എഴുന്നള്ളത്ത്, ഭഗവതി തിറ, നാഗകാളി തിറ, ഗുളികൻ തിറ. രാത്രി 10.30 ന് നാടകദേശം കന്നുര് അവതരിപ്പിക്കുന നാടകം വയൽ കിളികളുടെ പാട്ട്. പുലർച്ച 2 മണിക്ക് കുട്ടി ചാത്തൻ തിറ, കരിയാത്തൻ തിറ, പുലി തിറ, ഗുരുദേവൻ തിറ, കാളി തിറയോട് കൂടി സമാപനം.

ഉളളിയേരി കരിങ്ങറ്റിക്കോട്ട ഭഗവതി ക്ഷേത്ര തിറ മഹോത്സവം

Inshort

കണ്ണൂര്‍: കേളകം അടയ്ക്കാത്തോടില്‍ മയക്കുവെടി വെച്ച് പിടികൂടിയ കടുവ ചത്തു. ജനവാസ മേഖലയിലിറങ്ങി ദിവസങ്ങളായി അടയ്ക്കാത്തോട് മേഖലയെ വിറപ്പിച്ച കടുവയെ കരിയംകാപ്പിലെ കൃഷിയിടത്തില്‍നിന്ന് വനംവകുപ്പ് മയക്കുവെടിവെച്ച് പിടികൂടിയിരുന്നു. വ്യാഴാഴ്ച വൈകിട്ട് നാലോടെ വെറ്ററിനറി ഡോക്ടറുടെ നേതൃത്വത്തിലുള്ള സംഘം മയക്കുവെടി വെച്ച് പിടികൂടിയ രണ്ടുവയസ്സുള്ള ആണ്‍കടുവയെ കൂട്ടിലാക്കി കണ്ണവം വനം ഓഫീസിലെത്തിച്ചിരുന്നു. രാത്രി ഒന്‍പതോടെയാണ് കടുവ ചത്തത്. മയക്കുവെടിയേറ്റ കടുവ ക്ഷീണിതനായിരുന്നുവെന്ന് ഉദ്യോഗസ്ഥര്‍ പറയുന്നു. അടുത്തിടെ കൊട്ടിയൂര്‍ പന്ന്യാംമലയില്‍ കെണിയില്‍ കുടുങ്ങിയ കടുവയെ മയക്കുവെടിവെച്ച് പിടിച്ചെങ്കിലും അതും ചത്തിരുന്നു.
ഉച്ചയോടെയാണ് കടുവയെ മയക്കുവെടി വെക്കാനുള്ള ശ്രമം ആരംഭിച്ചിരുന്നു. എന്നാല്‍ ആദ്യ ശ്രമം പരാജയപ്പെടുകയും കടുവ ഒരു കൃഷിയിടത്തിലേക്ക് ഓടി മാറുകയുമായിരുന്നു. തുടര്‍ന്ന് അവിടെ വെച്ചാണ് കടുവയെ മയക്കുവെടി വെച്ചത്. ഏറെ നാളുകളായി ജനവാസ മേഖലയില്‍ തന്നെ തുടരുകയായിരുന്നു കടുവ. വീടുകളിലെ വളര്‍ത്തുനായ്ക്കളെ കടുവ പിടികൂടുന്നത് സ്ഥിരം സംഭവമായിരുന്നു. പലയിടങ്ങളിലും നിരോധനാജ്ഞ പ്രഖ്യാപിക്കേണ്ട അവസ്ഥ വരെ ഉണ്ടായിരുന്നു.
കരിയംകാപ്പില്‍നിന്ന് പിടിച്ച കടുവയുടെ ദേഹമാകെ പരിക്കുകളുണ്ടായിരുന്നുവെന്ന് വനം വകുപ്പ് ഉദ്യോഗസ്ഥര്‍ പറയുന്നു. ജഡം വെള്ളിയാഴ്ച പൂക്കോട് വെറ്ററിനറി സര്‍വകലാശാലയില്‍ കൊണ്ടുപോയി പരിശോധിക്കാനാണ് ആലോചന. കടുവ സെന്‍സസില്‍ കണ്ണൂര്‍ ജില്ലയില്‍ നാല് കടുവകളുണ്ടെന്ന് കണ്ടെത്തിയിരുന്നു. ഇതില്‍ രണ്ടാമത്തേതാണ് വ്യാഴാഴ്ച ചത്തത്. ഇനി രണ്ടെണ്ണമേ ശേഷിക്കുന്നുള്ളൂ.
മയക്കുവെടിയേറ്റ കടുവയെ കരിയംകാപ്പ് പൊത്തനാനിയില്‍ സണ്ണിയുടെ കൃഷിയിടത്തിന് സമീപത്തെ ചാലില്‍നിന്നാണ് പിടിച്ചത്. കൂട്ടിലാക്ക കണ്ണവം വനം ഓഫീസിലെത്തിച്ച കടുവയെ നെയ്യാറിലേക്ക് കൊണ്ടുപോകാനായിരുന്നു ആലോചന. വനംവകുപ്പിന്റെ തിരച്ചിലിനിടെ വ്യാഴാഴ്ച ഉച്ചയോടെ ചിറക്കുഴി ബാബുവിന്റെ കൃഷിയിടത്തിലാണ് കടുവയെ കണ്ടത്. ഇതോടെ പ്രദേശത്തിന്റെ നിയന്ത്രണം വനംവകുപ്പ് ഏറ്റെടുത്ത് മയക്കുവെടി വെയ്ക്കാന്‍ ശ്രമമാരംഭിച്ചു. ഇതിനിടെ കടുവ വനപാലകര്‍ക്കുനേരേ തിരിഞ്ഞു. പടക്കംപൊട്ടിച്ചതോടെ കടുവ ഓടി. വനപാലകരും മയക്കുവെടി വെയ്ക്കാനെത്തിയ ഡോ. ആര്‍.രാജ്, ഡോ. അരുണ്‍ സത്യന്‍ എന്നിവരും പിന്നാലെ ഓടി. കടുവയുെട വേഗം കുറഞ്ഞതോടെ ഡോ. രാജ് മയക്കുവെടിവെച്ചു. 20 മിനിറ്റ് കഴിഞ്ഞപ്പോഴേക്ക് കടുവ ചാലില്‍ വീഴുകയായിരുന്നു. പിന്നീട് വനപാലകര്‍ കടുവയെ വലയിലാക്കി വാഹനത്തിലേക്ക് മാറ്റി.
മാര്‍ച്ച് 12-നാണ് അടയ്ക്കാത്തോട് വാളുമുക്കില്‍ റോഡില്‍ ആദ്യമായി കടുവയെ കണ്ടത്. 17-ന് നടത്തിയ തിരച്ചിലില്‍ കൃഷിയിടത്തിലെ തോട്ടില്‍ കടുവയെ കണ്ടെത്തിയെങ്കിലും മയക്കുവെടി വെയ്ക്കാന്‍ ആളെത്തിയപ്പോഴേക്കും സന്ധ്യയായതിനാല്‍ ഒന്നുംചെയ്യാനായില്ല. ഇതിനിടെ കടുവയെ കാണാതായി. രോഷാകുലരായ നാട്ടുകാര്‍ ഡിവിഷണല്‍ വനം ഓഫീസര്‍ അടക്കമുള്ളവരെ മണിക്കൂറുകളോളം തടഞ്ഞുവെച്ചിരുന്നു. ഇതേത്തുടര്‍ന്ന് മൂന്നിടത്ത് കൂടുകളും ക്യാമറയും സ്ഥാപിച്ചു. ഇതിനിടെ പലതവണ പലേടത്തും കടുവയെ കണ്ടെങ്കിലും പിടികൂടാനായിരുന്നില്ല. കടുവ കൂട്ടിലായത് പ്രദേശവാസികള്‍ക്ക് വലിയ ആശ്വാസമായിരുന്നു.

കണ്ണൂരില്‍ മയക്കുവെടി വെച്ച് പിടികൂടിയ കടുവ ചത്തു

തിരുവനന്തപുരം: പരിശീലനത്തിനിടെ ഹൃദയാഘാതത്തെത്തുടർന്ന് ജമ്മുകശ്മീരിലെ കുപ്‌വാരയിൽ കരമന സ്വദേശിയായ സി.ആർ.പി.എഫ്. ജവാൻ ജെ.ശ്രീജിത്ത്(33) കുഴഞ്ഞുവീണ് മരിച്ചു. കരമന കീഴാറന്നൂർ കുന്നുംപുറം വീട്ടിൽ ജയകുമാർ- ഗിരിജ ദമ്പതിമാരുടെ മകനാണ്. വ്യാഴാഴ്ച രാവിലെയാണ് വീട്ടുകാർക്കു വിവരം ലഭിച്ചത്. ക്യാമ്പിലെ പരേഡ് ഗ്രൗണ്ടിൽ ഓടിയതിനുശേഷം ശ്രീജിത്ത് കുഴഞ്ഞുവീഴുകയായിരുന്നു. യൂണിറ്റിലെ മെഡിക്കൽ സംഘം പരിശോധന നടത്തി കുപ്‌വാരയിലെ സബ് ഡിവിഷണൽ ആശുപത്രിയിലെത്തിച്ചെങ്കിലും രക്ഷിക്കാനായില്ലെന്നാണ് വീട്ടുകാർക്കു ലഭിച്ച വിവരം. 2010ലാണ് ശ്രീജിത്ത് ജോലിയിൽ പ്രവേശിച്ചത്. ഭാര്യ: രേണുക. മക്കൾ: ഋത്വിക് റോഷൻ, ഹാർത്തിക് കൃഷ്ണ.

പരിശീലനത്തിനിടെ ഹൃദയാഘാതം; ജമ്മുകശ്മീരിൽ മലയാളി സൈനികൻ മരിച്ചു

ന്യൂഡല്‍ഹി: അത്യന്തം നാടകീയമായ സംഭവങ്ങള്‍ക്കൊടുവില്‍ ഡല്‍ഹി മദ്യനയ കേസില്‍ മുഖ്യമന്ത്രി അരവിന്ദ് കെജ്‌രിവാളിനെ ഇ.ഡി അറസ്റ്റ് ചെയ്തതോടെ രാജ്യവ്യാപക പ്രതിഷേധത്തിന് എ.എ.പി. ബി.ജെ.പി ഓഫീസുകള്‍ക്ക് മുന്നിലാണ് ഇന്ന് പ്രതിഷേധം സംഘടിപ്പിക്കുക. ശക്തമായ പ്രതിഷേധത്തിനുള്ള സാധ്യത മുന്നിൽക്കണ്ട് ഡൽഹിയിൽ പോലീസ് സുരക്ഷ ശക്തമാക്കി.
രാവിലെ ബി.ജെ.പി ആസ്ഥാനത്താണ് എ.എ.പിയുടെ പ്രതിഷേധത്തിന് തുടക്കം. തുടര്‍ന്ന് രാജ്യത്തെമ്പാടും പ്രതിഷേധ സമരം നടത്തും. ലോക്‌സഭാ തിരഞ്ഞെടുപ്പിന് തൊട്ടുമുമ്പ് പ്രതിപക്ഷ മുന്നണിയുടെ പ്രമുഖ നേതാവിനെ ഇ.ഡി അറസ്റ്റ് ചെയ്തത് കഴിഞ്ഞ ദിവസം തന്നെ വലിയ പ്രതിഷേധത്തിന് വഴിവെച്ചിരുന്നു. കോണ്‍ഗ്രസ് നേതാവ് രാഹുല്‍ഗാന്ധി ഇന്ന് കെജ്‌രിവാളിന്റെ കുടുംബത്തെ സന്ദര്‍ശിക്കുന്നുണ്ട്.
ഇതിനിടെ, അറസ്റ്റിനെതിരേ കെജ്‌രിവാള്‍ സമര്‍പ്പിച്ച ഹര്‍ജി ഇന്ന് സുപ്രീംകോടതി പരിഗണിക്കുന്നുണ്ട്. അറസ്റ്റിലായ അരവിന്ദ് കെജ്‌രിവാളിനെ ഇ.ഡി കോടതിയില്‍ ഹാജരാക്കും. കെജ്‌രിവാളിനെ അറസ്റ്റ് ചെയ്തതോടെ ഡല്‍ഹി മുഖ്യമന്ത്രിസ്ഥാനം രാജിവെക്കണമെന്ന് ബിജെപി ആവശ്യപ്പെട്ടു.
എന്നാല്‍, രാജിവെക്കില്ലെന്നും ജയിലില്‍കിടന്ന് ഭരണം നടത്തുമെന്നുമായിരുന്നു കഴിഞ്ഞ ദിവസം എ.എ.പി പ്രതികരിച്ചത്. ഇതോടെയാണ് പ്രതിഷേധവുമായി ബിജെപി എത്തിയത്. ജയിലില്‍ കിടന്ന് ഭരണം നടത്തുന്നത് ഭരണഘടനാ വിരുദ്ധമാണെന്നും അനുവദിക്കാന്‍ പാടില്ലെന്നുമാണ് ബിജെപിയുടെ ആവശ്യം.

കെജ്‌രിവാളിന്റെ അറസ്റ്റിൽ വ്യാപക പ്രതിഷേധം: ഡൽഹിയിൽ സുരക്ഷ ശക്തമാക്കി

കുമളി: ഓടിക്കൊണ്ടിരുന്ന ബൈക്കിന് തീ പിടിച്ച് ബസ് ഡ്രൈവർ വെന്തുമരിച്ചു. അണക്കര കളങ്ങരയില്‍ എബ്രഹാം (തങ്കച്ചന്‍, 50) ആണ് മരിച്ചത്. തീപ്പിടിച്ചതോടെ ബൈക്ക് ഉപേക്ഷിച്ച് രക്ഷപ്പെടാന്‍ ശ്രമിക്കുന്നതിനിടെ എബ്രഹാമിന് ഗുരുതരമായി പൊള്ളലേൽക്കുകയായിരുന്നു. വെള്ളിയാഴ്ച പുലർച്ചെ അഞ്ചുമണിയോടെയാണ് അപകടമുണ്ടായത്.
സ്വകാര്യ ബസ് ഡ്രൈവറായ എബ്രഹാം രാവിലെ ബൈക്കില്‍ ബസ് സ്റ്റാന്‍ഡിലേക്ക് പോകുമ്പോഴായിരുന്നു അപകടം. അണക്കര ഏഴാംമൈലിലെ ഇറക്കത്തില്‍വെച്ച് ബൈക്കിന് തീ പിടിക്കുകയായിരുന്നു. ബൈക്കില്‍നിന്ന് ഇയാളുടെ വസ്ത്രത്തിലേക്ക് തീ വേഗത്തില്‍ പടര്‍ന്നുകയറുകയായിരുന്നു. ബൈക്ക് ഉപേക്ഷിച്ച് സമീപത്തെ പാടത്തിലേക്ക് പ്രാണരക്ഷാര്‍ഥം ഓടുന്നതിടെ തീ ശരീരത്തില്‍ മുഴുവന്‍ പടരുകയുംചെയ്തു.
ആളൊഴിഞ്ഞ സ്ഥലമായതിനാല്‍ അല്‍പം വൈകിയാണ് സമീപവാസികള്‍ പോലും അപകടവിവരം അറിഞ്ഞത്. കുമളി പോലിസെത്തി മേല്‍ നടപടികള്‍ സ്വീകരിച്ചു.

ഓടുന്ന ബൈക്കിന് തീപിടിച്ച് യാത്രകാരൻ വെന്തുമരിച്ചു

വയനാട്: മുണ്ടക്കൈ - ചൂരൽമല ദുരന്തത്തിന് ഒരാണ്ട് പൂർത്തിയാകുമ്പോൾ അതിജീവിതർക്കായി ഒരുക്കുന്ന ടൗൺഷിപ്പിന്റെ നിർമാണം അതിവേഗം പുരോഗമിക്കുന്നു. എൽസ്റ്റൺ എസ്റ്റേറ്റിൽ 410 വീടുകളിൽ 1662 പേർക്കാണ് തണലൊരുങ്ങുന്നത്. മാർച്ച് 27ന് മുഖ്യമന്ത്രി പിണറായി വിജയൻ തറക്കല്ലിട്ടതിനു ശേഷം അഞ്ച് മാസം കഴിയുമ്പോൾ മാതൃകാ വീടിന്റെ നിർമാണം അവസാന ഘട്ടത്തിലാണ്. വീടിന്റെ പെയിന്റിംഗ് പണി നടക്കുന്നു. മഴ തടസം സൃഷ്ടിച്ചില്ലെങ്കിൽ ഈ മാസം വീടിന്റെ പണി പൂത്തിയാകും.&nbsp;
അഞ്ച് സോണുകളിലായി നിർമ്മിക്കുന്ന 410 വീടുകളിൽ ആദ്യ സോണിൽ 140, രണ്ടാം സോണിൽ 51, മൂന്നാം സോണിൽ 55, നാലാം സോണിൽ 51, അഞ്ചാം സോണിൽ 113 എന്നിങ്ങനെയാണ് വീടുകളുണ്ടാവുക. പ്രകൃതി ദുരന്തങ്ങൾ അതിജീവിക്കാൻ സാധിക്കും വിധം 1000 ചതുരശ്രയടിയിൽ ഒറ്റ നിലയിൽ പണിയുന്ന കെട്ടിടം ഭാവിയിൽ ഇരു നില നിർമ്മിക്കാനുള്ള അടിത്തറയോടെയാണ് തയ്യാറാക്കുന്നത്. പ്രധാന കിടപ്പുമുറി, രണ്ട് മുറികൾ, സിറ്റൗട്ട്, ലിവിങ്, സ്റ്റഡി റൂം, ഡൈനിങ്, അടുക്കള, സ്റ്റോർ ഏരിയ എന്നിവ വീടിന്റെ ഭാഗമാണ്.
വീടുകൾക്ക് പുറമെ പൊതു റോഡ്, ആരോഗ്യ കേന്ദ്രം, അങ്കണവാടി, പൊതുമാർക്കറ്റ്, കമ്മ്യൂണിറ്റി സെന്ററുകൾ എന്നിവയും ടൗൺഷിപ്പിൽ ഉണ്ടാവും. ആരോഗ്യ കേന്ദ്രത്തിൽ ലബോറട്ടറി, ഫാർമസി, പരിശോധന-വാക്‌സിനേഷൻ-ഒബ്‌സർവേഷൻ മുറികൾ, ഒപി, ടിക്കറ്റ് കൗണ്ടർ സൗകര്യങ്ങൾ സജ്ജീകരിക്കും. പൊതു മാർക്കറ്റിൽ കടകൾ, സ്റ്റാളുകൾ, ഓപ്പൺ മാർക്കറ്റ്, കുട്ടികൾക്ക് കളി സ്ഥലം, പാർക്കിങ് എന്നിവ ഒരുക്കും. മർട്ടി പർപ്പസ് ഹാൾ, കളി സ്ഥലം, ലൈബ്രറി, സ്‌പോട്‌സ് ക്ലബ്ബ്, ഓപ്പൺ എയർ തിയേറ്റർ എന്നിവ കമ്മ്യൂണിറ്റി സെന്ററിൽ നിർമ്മിക്കും.
ഏപ്രിൽ 11ന് എൽസ്റ്റൺ എസ്റ്റേറ്റിന്റെ ഭൂമി ഏറ്റെടുത്തതിന്റെ തൊട്ടടുത്ത ദിവസം മുതൽ വീട് നിർമാണം സർക്കാർ ആരംഭിച്ചിരുന്നു. കൽപ്പറ്റ വില്ലേജിലെ എൽസ്റ്റൺ എസ്റ്റേറ്റിൽ ബ്ലോക്ക് 19, റീ സർവ്വെ നമ്പർ 88 ലെ 64.4705 ഹെക്ടർ ഭൂമിയാണ് ഏറ്റെടുത്തത്. എൽസ്റ്റൺ എസ്റ്റേറ്റിൽ ടൗൺഷിപ്പ് നിർമ്മാണത്തിനായി 43.77 കോടി രൂപ ഹൈക്കോടതി രജിസ്ട്രാർ ജനറലിന്റെ അക്കൗണ്ടിൽ കെട്ടിവെച്ചാണ് സർക്കാർ ഭൂമി ഏറ്റെടുത്തത്. ഹൈക്കോടതി ഉത്തരവിന്റെ അടിസ്ഥാനത്തിൽ 26 കോടി രൂപ ആദ്യം കെട്ടിവെച്ചു. എന്നാൽ എൽസ്റ്റൺ എസ്റ്റേറ്റ് ഉടമകൾ സുപ്രീം കോടതിയിൽ നൽകിയ ഹർജിയുടെ അടിസ്ഥാനത്തിൽ അധിക നഷ്ടപരിഹാര തുകയായ 17.77 കോടി രൂപ കൂടി കോടതിയിൽ കെട്ടിവെച്ചു.
ദുരന്തത്തിൽ മരണപ്പെട്ട 298 പേരിൽ 220 പേരുടെ കുടുംബങ്ങൾക്ക് അടിയന്തര ധനസഹായമായി സംസ്ഥാന ദുരന്ത നിവാരണ നിധി, മുഖ്യമന്ത്രിയുടെ ദുരിതാശ്വാസ നിധി എന്നിവയിൽ നിന്ന് ആറ് ലക്ഷം വീതം 13.21 കോടി (132190000) രൂപ വിതരണം ചെയ്തു. അടിയന്തര മരണാനന്തര ധനസഹായമായി 1036 കുടുംബങ്ങൾക്ക് 10000 രൂപ വീതം 1.03 (10360000) കോടി രൂപയും നൽകി.
അതിജീവിതർക്ക് താത്ക്കാലിക ജീവനോപാധിയായി സംസ്ഥാന സർക്കാർ 11087 ഗുണഭോക്താക്കൾക്ക് ആറ് ഘട്ടങ്ങളിലായി നൽകിയത് 10.09 (10,09,98,000) കോടി രൂപയാണ്. ദുരന്തം നടന്ന ഒരാഴ്ചയ്ക്കകം ഗുരുതര പരിക്കേറ്റ് ചികിത്സയിൽ കഴിഞ്ഞ 10 പേർക്ക് 5,54,000 രൂപയും ഒരാഴ്ചയിൽ കൂടുതൽ പരിക്കേറ്റ് ചികിത്സയിലുണ്ടായ 27 പേർക്ക് 17,82,000 രൂപയും അടിയന്തര സഹായമായി നൽകി. അപ്രതീക്ഷിത ദുരന്തത്തിൽ തൊഴിലും ജീവനോപാധിയും നഷ്ടമായവർക്ക് ഒരു കുടുംബത്തിലെ മുതിർന്ന രണ്ടു വ്യക്തികൾക്ക് ദിവസം 300 രൂപ പ്രകാരം 18000 രൂപ വീതം നൽകുന്നുണ്ട്. താത്ക്കാലിക പുനരധിവാസ സംവിധാനത്തിന്റെ ഭാഗമായി 2024 ഓഗസ്റ്റ് മുതൽ 2025 ജൂൺ വരെ വാടക ഇനത്തിൽ 4.3 കോടി (4,34,14,200) രൂപ നൽകി. 795 കുടുംബങ്ങൾക്കാണ് താത്ക്കാലിക പുനരധിവാസം ഒരുക്കിയത്.

മുണ്ടക്കൈ - ചൂരൽമല ഉരുൾപൊട്ടൽ; മാതൃകാ വീട് പൂർത്തിയാകുന്നു

തിരുവനന്തപുരം: 25 കോടി രൂപ ഒന്നാം സമ്മാനം നൽകുന്ന തിരുവോണം ബമ്പർ ഭാഗ്യക്കുറി വിപണിയിൽ എത്തി. സംസ്ഥാന ധനകാര്യ മന്ത്രി കെ എൻ ബാലഗോപാലാണ് തിരുവനന്തപുരത്ത് ടിക്കറ്റ് പ്രകാശനം ചെയ്തത്. ആയിരക്കണക്കിന് ഭാഗ്യശാലികളെ സൃഷ്ടിക്കുന്ന സംസ്ഥാന ഭാഗ്യക്കുറി ഒരു ലക്ഷത്തോളം പാവങ്ങളുടെ ജീവിത മാർഗവും അത്താണിയുമാണന്ന് ചടങ്ങിൽ മന്ത്രി പറഞ്ഞു. 25 കോടി സമ്മാനത്തുക നൽകുന്ന വിദേശ ലോട്ടറി വാങ്ങാൻ ഏകദേശം 15,000 രൂപ വേണമെന്നിരിക്കെ അതേ സമ്മാനത്തുകയുള്ള കേരള ഭാഗ്യക്കുറി വാങ്ങാൻ കേവലം 500 രൂപ മാത്രം മതി. നടത്തിപ്പിലെ സുതാര്യതയും വിശ്വാസ്യതയുമാണ് കേരള ഭാഗ്യക്കുറിയെ ഇത്രയേറെ ജനകീയമാക്കിയതെന്നും മന്ത്രി പറഞ്ഞു.
രണ്ടാം സമ്മാനമായി ഒരു കോടി രൂപ വീതം 20 പേർക്കും മൂന്നാം സമ്മാനമായി 50 ലക്ഷം വീതം 20 പേർക്കും നാലാം സമ്മാനമായി അഞ്ചുലക്ഷം വീതം 10 പരമ്പരകൾക്കും അഞ്ചാം സമ്മാനമായി രണ്ടു ലക്ഷം വീതം 10 പരമ്പരകൾക്കും നൽകുന്നു എന്നതാണ് തിരുവോണം ബമ്പർ ഭാഗ്യക്കുറിയുടെ വലിയ പ്രത്യേകത. കൂടാതെ 5,000 മുതൽ 500 രൂപ വരെ സമ്മാനമായി നൽകുന്നുമുണ്ട്. ആന്റണി രാജു എം എൽ എ അധ്യക്ഷനായ ചടങ്ങിൽ വി കെ പ്രശാന്ത് എം എൽ എ യും പങ്കെടുത്തു. ഭാഗ്യക്കുറി വകുപ്പ് ഡയറക്ടർ എബ്രഹാം റെൻ സ്വാഗതം പറഞ്ഞു. ലോട്ടറി വെൽഫെയർ ബോർഡ് ചെയർമാൻ ടി ബി സുബൈർ, ഭാഗ്യക്കുറി വകുപ്പിലെ ഉദ്യോഗസ്ഥർ തുടങ്ങിയവരും സംബന്ധിച്ചു.

25 കോടിയുടെ തിരുവോണം ബമ്പർ വിപണിയിൽ

കൊച്ചി: ടി.പി. ചന്ദ്രശേഖരൻ വധക്കേസ് പ്രതിക്ക് പരോൾ അനുവദിക്കണമെന്ന ആവശ്യം തള്ളി ഹൈക്കോടതി. ആറാം പ്രതിയായ സിജിത്തിനാണ് കോടതി പരോൾ നിഷേധിച്ചത്.
കുഞ്ഞിന്റെ ചോറൂണിൽ പങ്കെടുക്കുന്നതിനായി സിജിത്തിന് പത്തുദിവസത്തെ പരോൾ അനുവദിക്കണമെന്ന് ആവശ്യപ്പെട്ട് ഭാര്യ സി.എസ്. അഞ്ജുവാണ് കോടതിയെ സമീപിച്ചത്. ചോറൂണിന്റെ സമയത്ത് കുഞ്ഞിന്റെ പിതാവ് അടുത്തുണ്ടാകണമെന്നു കാണിച്ചായിരുന്നു പരോൾ ആവശ്യപ്പെട്ട് ഹൈക്കോടതിയെ സമീപിച്ചത്.ഇക്കഴിഞ്ഞ ഫെബ്രുവരിയിൽ സിജിത്തിന് കുഞ്ഞ് ജനിച്ചതിനെ തുടർന്ന് പത്ത് ദിവസത്തെ പരോൾ കോടതി അനുവദിച്ചിരുന്നു.വീണ്ടും പരോൾ ആവശ്യപ്പെട്ട് കോടതിയെ സമീപിച്ചപ്പോൾ കോടതി ഇക്കാര്യം ചൂണ്ടിക്കാട്ടി. ജസ്റ്റിസ് പി.വി. കുഞ്ഞികൃഷ്ണനാണ് സിജിത്തിന് പരോൾ നിഷേധിച്ചത്.

കുഞ്ഞിന്റെ ചോറൂണിന് പരോൾ തേടി ടി.പി. കേസ് പ്രതി; അനുമതി നിഷേധിച്ച് ഹൈക്കോടതി

ഇടുക്കി : കാട്ടാന ആക്രമണത്തില്‍ വയോധികന് ദാരുണാന്ത്യം. കാഞ്ഞിരപ്പള്ളി തമ്പലക്കാട് കുറ്റിക്കാട്ടില്‍ പുരുഷോത്തമനാ (64)ണ് മരിച്ചത്. പെരുവന്താനത്തെ മതമ്പയില്‍ രാവിലെ പത്തരയോടെ ആയിരുന്നു സംഭവം.
പാട്ടത്തിനെടുത്ത റബ്ബര്‍ തോട്ടത്തില്‍ ടാപ്പിങ്ങിന് എത്തിയതായിരുന്നു പുരുഷോത്തമനും മകനും. കാടിറങ്ങിയ കാട്ടാനക്കൂട്ടം ഇവര്‍ക്കു നേരെ പാഞ്ഞടുത്തു. മകന് ഓടി രക്ഷപ്പെടാന്‍ കഴിഞ്ഞെങ്കിലും പുരുഷോത്തമന് സാധിച്ചില്ല. വയറിന് ഗുരുതരമായി പരിക്കേറ്റ പുരുഷോത്തമനെ ആശുപത്രിയിലെത്തിച്ചെങ്കിലും രക്ഷിക്കാനായില്ല.

വീണ്ടും ജീവനെടുത്ത് കാട്ടാന ; ടാപ്പിങ്ങിനെത്തിയ വയോധികന് ദാരുണാന്ത്യം

തിരുവനന്തപുരം: വീണ്ടും സമരത്തിനൊരുങ്ങി സ്വകാര്യ ബസ് സംഘടനകൾ. വിദ്യാർഥികളുടെ ടിക്കറ്റ് നിരക്ക് വർധിപ്പിക്കണം എന്നതുൾപ്പെടെയുള്ള ആവശ്യങ്ങൾ സർക്കാർ അംഗീകരിച്ചില്ലെന്ന് ചൂണ്ടിക്കാട്ടിയാണ് വീണ്ടും സമരത്തിനൊരുങ്ങുന്നത്.&nbsp;
ഗതാഗത സെക്രട്ടറിയുമായി വിദ്യാർഥി സംഘടനകളും ബസ് ഉടമകളും ചർച്ച നടത്തിയിരുന്നു. എന്നാൽ, ചർച്ചയിൽ പരിഹാരം ഉണ്ടായില്ലെന്ന് ചൂണ്ടിക്കാട്ടിയാണ് വീണ്ടും സമരത്തിലേക്ക് നീങ്ങുന്നത്. സമരത്തിന്‍റെ തീയതി രണ്ടുദിവസത്തിനുള്ളിൽ പ്രഖ്യാപിച്ചേക്കും.

വിദ്യാർഥികളുടെ ടിക്കറ്റ് നിരക്ക് വർധിപ്പിക്കണം;വീണ്ടും സമരത്തിനൊരുങ്ങി സ്വകാര്യ ബസ് സംഘടനകൾ

Search Results for: attack in kallachi