ന്യൂഡല്‍ഹി: 10 വർഷം നിയമസഭാ തിരഞ്ഞെടുപ്പുകളെ നേരിട്ട മോദി മൂന്നാംതവണയും രാജ്യം ഭരിച്ചേക്കും.എൻ.ഡി.എ.യിൽ 16 സീറ്റുള്ള ചന്ദ്രബാബു നായിഡുവിന്റെ ടി.ഡി.പി. 12 സീറ്റുള്ള നിതീഷ് കുമാറിന്റെ ജെ.ഡി.യു. എന്നിവയാകും മുന്നണിയിലെ ഇരട്ട എൻജിൻ. ഈ ഇരട്ട എൻജിനുകളെ സുഗമമായി മുന്നോട്ടു കൊണ്ടുപോകുക എന്നതാണ് ബി.ജെ.പി.യുടെ വെല്ലുവിളി.ലോക്‌സഭാ തിരഞ്ഞെടുപ്പിലെ ജയപരാജയങ്ങളുടെ വിലയിരുത്തലുകൾക്കിടയിൽ ബി.ജെ.പി.യുടെ നേതൃത്വത്തിൽ എൻ.ഡി.എ.യും കോൺഗ്രസിന്റെ നേതൃത്വത്തിൽ ഇന്ത്യസഖ്യവും കൂടിയാലോചനകളും ചർച്ചകളും ആരംഭിച്ചു.&nbsp;
സഖ്യകക്ഷികളുടെ പിന്തുണ ഉറപ്പിച്ച് മൂന്നാംസർക്കാർ രൂപവത്കരണത്തിനുള്ള നടപടികളുമായി മുന്നോട്ടുപോകാൻ പ്രധാനമന്ത്രിയുടെ വസതിയിൽച്ചേർന്ന എൻ.ഡി.എ. തീരുമാനിച്ചു. സഖ്യത്തിന്റെ നേതാവായി യോഗം നരേന്ദ്രമോദിയെ ഐകകണ്ഠ്യേന തിരഞ്ഞെടുത്തു.വെള്ളിയാഴ്ച എൻ.ഡി.എ. ലോക്‌സഭാംഗങ്ങളുടെ യോഗം ഡൽഹിയിൽച്ചേർന്ന് മോദിയെ പാർലമെന്ററി നേതാവായി തിരഞ്ഞെടുക്കും. തുടർന്ന് മോദിയും സഖ്യകക്ഷിനേതാക്കളും രാഷ്ട്രപതിയെക്കണ്ട് സർക്കാർ രൂപവത്കരണത്തിന് അവകാശവാദം ഉന്നയിക്കും. സത്യപ്രതിജ്ഞ ശനിയാഴ്ച രാത്രി എട്ടിന് നടക്കുമെന്നാണ് സൂചന.

മൂന്നാംതവണയും മോദി തന്നെ രാജ്യം ഭരിക്കും;സത്യപ്രതിജ്ഞ ശനിയാഴ്ചയെന്ന് സൂചന

തിരുവനന്തപുരം ; കനത്തപ്രഹരമേറ്റ എൽ.ഡി.എഫിന് അൽപ്പമെങ്കിലും ആശ്വസിക്കാനായത് ആലത്തൂരിലെ കെ.രാധാകൃഷ്ണന്റെ വിജയമാണ്. വോട്ടെണ്ണലിന്റെ ഓരോ ഘട്ടത്തിലും തന്റെ ലീഡ് മുറുകെ പിടിച്ചു കൊണ്ട് രാധാകൃഷന്‍ എൽ.ഡി.എഫിന്റെ മാനം കാത്തു. ആലത്തൂരിന്റെ ജനകീയ മുഖമായ കെ രാധാകൃഷ്ണന്‍ നഷ്ടമായ ചെങ്കോട്ട തിരിച്ചു പിടിച്ചു.എല്‍ഡിഎഫ് വിജയം എന്നതിനേക്കാള്‍ രാധാകൃഷ്ണന്‍ എന്ന ജനകീയനേതാവിന്റെ വ്യക്തിപ്രഭാവത്തിന്‌ ജനങ്ങള്‍ നല്‍കിയ സമ്മാനമെന്ന് ഈ വിജയത്തെ അടയാളപ്പെടുത്താം. 19,587 വോട്ടിന്റെ ഭൂരിപക്ഷത്തിലാണ് രാധാകൃഷണന്റെ വിജയം.3,98,818 വോട്ടുകളാണ് അദ്ദേഹം നേടിയത്.
നിലവില്‍ ദേവസ്വം മന്ത്രിയാണ് കെ രാധാകൃഷ്ണന്‍. മറ്റു വകുപ്പുകളെ അപേക്ഷിച്ച് നിത്യേന ജനങ്ങളുമായി അധിക സമ്പര്‍ക്കമില്ലാതിരുന്ന വകുപ്പായിരിന്നിട്ടും അദ്ദേഹം നേടിയ ഈ മിന്നും വിജയം അദ്ദേഹത്തിന്റെ വ്യക്തിപ്രഭാവത്തെ വ്യക്തമാക്കുന്നു.

ആലത്തൂര്‍ ചുവന്നു; 'കനലൊരുതരി'യായി കെ.രാധാകൃഷ്ണൻ

വടകര: സംസ്ഥാനത്ത് ഏറ്റവും വാശിയേറിയ പോരാട്ടം നടന്ന കടത്തനാടന്‍ അങ്കത്തിൽ വിജയിയായത് യു ഡി എഫിലെ ഷാഫി പറമ്പില്‍. ഷാഫി പറമ്പില്‍ പരാജയപ്പെടുത്തിയത് കേരളത്തിലെ ഏറ്റവും ജനകീയയായ സ്ഥാനാര്‍ത്ഥിയെയാണ്. ഒരു ലക്ഷത്തിലധികം വോട്ടിന്റെ ഭൂരിപക്ഷം നല്‍കിയാണ് വടകരക്കാര്‍ ഷാഫിയെ ഡല്‍ഹിക്ക് അയക്കുന്നത്.
ഏറ്റവും ശക്തയായ സ്ഥാനാര്‍ത്ഥിയെ രംഗത്തിറക്കിയിട്ടും ഒരുകാലത്തെ പൊന്നാപുരം കോട്ടയായിരുന്ന വടകര കൈവിട്ട് പോയത് സിപിഎമ്മിനെ ഞെട്ടിച്ചിരിക്കുകയാണ്. അശ്ലീല വീഡിയോ വിവാദവും കാഫിര്‍ പ്രയോഗവും മണ്ഡലത്തിലെ പ്രചാരണത്തിന്റെ ചൂട് വര്‍ദ്ധിപ്പിച്ചിരുന്നു. സോഷ്യല്‍ മീഡിയയിലും വലിയ ചർച്ചകൾ കണ്ട മണ്ഡലമാണ് വടകര. ന്യൂനപക്ഷ വോട്ടുകളുടെ ഏകീകരണവും യുഡിഎഫ് തരംഗവും ഷാഫി പറമ്പിലിന് അനുകൂലമായ ഘടകങ്ങളായി. അതോടൊപ്പം മുസ്ലീം ലീഗിന്റെ സാന്നിദ്ധ്യവും യുഡിഎഫ് മുന്നേറ്റത്തിന് വഴിവെച്ചു. ഷാഫി പറമ്പിലെന്ന യുവ സ്ഥാനാര്‍ത്ഥിയെ രംഗത്തറിക്കയതിലൂടെ കോണ്‍ഗ്രസിന്റെ ഏറ്റവും വലിയ ജയമാണ് വടകരയില്‍ ഇത്തണ സംഭവിച്ചത്.
2019ല്‍ കെ മുരളീധരന്‍ പി. ജയരാജനെ പരാജയപ്പെടുത്തിയത് 84663 വോട്ടുകള്‍ക്കാണ്. അതിനേയും മറികടന്നാണ് ഷാഫി മുന്നേറിയത്. കണ്ണൂര്‍ ജില്ലയിലെ തലശേരിയും കൂത്തുപറമ്പും ഉള്‍പ്പെടുന്ന മണ്ഡലമാണ് വടകര. മറ്റ് മണ്ഡലങ്ങളില്‍ വോട്ട് കുറഞ്ഞാലും തലശേരിയിലേയും കൂത്തുപറമ്പിലേയും ലീഡിലൂടെ അതിനെ മറികടക്കാമെന്നാണ് സിപിഎം കണക്ക്കൂട്ടിയിരുന്നത്. 2009 മുതലാണ് സിപിഎമ്മിനെ ശക്തികേന്ദ്രമായ വടകര കൈവിട്ടത്.

ഇത്തവണയും കടത്തനാട് തിരിച്ച് പിടിക്കാനായില്ല; ഷാഫി പറമ്പിൽ പരാജയപ്പെടുത്തിയത് സിപിഎമ്മിലെ ഏറ്റവും ജനപ്രിയ നേതാവിനെ

കണ്ണൂര്‍: കണ്ണൂര്‍ മണ്ഡലത്തില്‍ കെ.സുധാകരന്‍ വന്‍ ലീഡിലേക്ക് കുതിക്കുന്നു. സുധാകരന് വെല്ലുവിളിയുയര്‍ത്താന്‍ സിപിഎം ജില്ലാ സെക്രട്ടറി എം.വി ജയരാജന് സാധിച്ചില്ലെന്ന തരത്തിലാണ് ഫലം പറയുന്നത്. 40,000-ല്‍പ്പരം വോട്ടുകളുടെ ലീഡാണ് നിലവില്‍ കെ സുധാകരനുള്ളത്. എം വി ജയരാജന് ഇടതുമുന്നണി പ്രതീക്ഷിച്ച തരത്തിലുള്ള മുന്നേറ്റം കാഴ്ചവെക്കാനായില്ല.&nbsp;
ആദ്യ ഘട്ടത്തില്‍ ലീഡെടുത്തതൊഴിച്ചാല്‍ പിന്നീട് ഒരു ഘട്ടത്തിലും എം വി ജയരാജന് സുധാകരനെ മറികടക്കാനായില്ല. ഓരോ റൗണ്ട് കഴിയുമ്പോഴും സുധാകരന്‍ ലീഡ് ഉയര്‍ത്തിക്കൊണ്ടിരിക്കുകയാണ്. ആദ്യ റൗണ്ടില്‍ മുഖ്യമന്ത്രി പിണറായി വിജയന്റെ മണ്ഡലത്തിലടക്കം ലീഡ് നേടിയാണ് സുധാകരന്‍ കുതിച്ചത്. ധര്‍മടത്തെ ഈ ലീഡ് സിപിഎമ്മിനെ പ്രതിസന്ധിയിലാക്കുന്നതാണ്. ഇടതുകോട്ടകളിലടക്കം മുന്നേറ്റം നടത്തിയ കെ സുധാകരന്‍ ജയത്തിലേക്ക് നീങ്ങുകയാണ്.&nbsp;

പിണറായി വിജയന്റെ മണ്ഡലത്തിലടക്കം ലീഡ് ;കണ്ണൂരിൽ കെ.സുധാകരന്‍ വിജയക്കുതിപ്പിൽ

ന്യൂഡൽഹി: ആദ്യമണിക്കൂര്‍ പിന്നിടുമ്പോള്‍ കുതിച്ച് മുന്നേറി ഇന്ത്യ സഖ്യം. 270 സീറ്റുകളില്‍ ഇന്ത്യസഖ്യം ലീഡ് ചെയ്യുമ്പോള്‍ 262 സീറ്റുകളിലാണ് എന്‍.ഡി.എ. മുന്നേറുന്നത്.അതേ സമയം കേരളത്തില്‍ 14 സീറ്റുകളില്‍ യു.ഡി.എഫും അഞ്ച് സീറ്റില്‍ എല്‍.ഡി.എഫും ലീഡ് ചെയ്യുന്നു.&nbsp;
പ്രധാനമന്ത്രി നരേന്ദ്ര മോദി വാരാണസിയില്‍ കോണ്‍ഗ്രസിന്റെ അജയ് റായിക്ക് പിന്നിലാണ്. വയനാട് മണ്ഡലത്തിലും റായ് ബറേലിയിലും രാഹുല്‍ ഗാന്ധി ലീഡ് ചെയ്യുന്നു. ബി.ജെ.പി. കേരളത്തില്‍ ഏറെ പ്രതീക്ഷ അര്‍പ്പിക്കുന്ന തിരുവനന്തപുരം, തൃശ്ശൂര്‍ മണ്ഡലങ്ങളില്‍ ഇഞ്ചോടിഞ്ച് മത്സരമാണ് നടക്കുന്നത്.

ആദ്യമണിക്കൂറിൽ കുതിച്ച് മുന്നേറി ഇന്ത്യ സഖ്യം

തിരുവനന്തപുരം: ലോക്സഭാ തിരഞ്ഞെടുപ്പിന് നാമനിര്‍ദേശ പത്രിക സമര്‍പ്പിക്കുന്നതിനുള്ള സമയപരിധി വ്യാഴാഴ്ച അവസാനിച്ചപ്പോള്‍ സംസ്ഥാനത്ത് വിവിധ ലോക്‌സഭാ മണ്ഡലങ്ങളിലായി 290 സ്ഥാനാര്‍ഥികള്‍ നാമനിര്‍ദേശ പത്രിക സമര്‍പ്പിച്ചതായി മുഖ്യതിരഞ്ഞെടുപ്പ് ഓഫീസര്‍ സഞ്ജയ് കൗള്‍ അറിയിച്ചു. ആകെ 499 പത്രികകള്‍ ഇതുവരെ ലഭിച്ചു.
വെള്ളിയാഴ്ച നാമനിര്‍ദേശ പത്രികകളുടെ സൂക്ഷ്മ പരിശോധന നടക്കും. ഏപ്രില്‍ എട്ടിന് നാമനിര്‍ദേശപത്രിക പിന്‍വലിക്കുന്നതിനുള്ള സമയപരിധി അവസാനിക്കുന്നതോടെ അന്തിമ സ്ഥാനാര്‍ഥി പട്ടികയ്ക്ക് രൂപമാകും. ഇതുവരെ നാമനിര്‍ദേശ പത്രിക സമര്‍പ്പിച്ചിട്ടുള്ള സ്ഥാനാര്‍ഥികളുടെ മണ്ഡലം തിരിച്ചുള്ള വിവരം: തിരുവനന്തപുരം 22, ആറ്റിങ്ങല്‍ 14, കൊല്ലം 15, പത്തനംതിട്ട 10, മാവേലിക്കര 14, ആലപ്പുഴ 14, കോട്ടയം 17, ഇടുക്കി 12, എറണാകുളം 14, ചാലക്കുടി 13, തൃശൂര്‍ 15, ആലത്തൂര്‍ 8, പാലക്കാട് 16, പൊന്നാനി 20, മലപ്പുറം 14, കോഴിക്കോട് 15, വയനാട് 12, വടകര 14, കണ്ണൂര്‍ 18, കാസര്‍കോട് 13.
ഇതുവരെ ഏറ്റവുമധികം സ്ഥാനാര്‍ഥികള്‍ പത്രിക സമര്‍പ്പിച്ചത് തിരുവനന്തപുരം മണ്ഡലത്തിലാണ്(22). ഏറ്റവും കുറവ് ആലത്തൂരിലും(8). മാര്‍ച്ച് 28 നാണ് സംസ്ഥാനത്ത് നാമനിര്‍ദേശ പത്രികാ സമര്‍പ്പണം തുടങ്ങിയത്. അവസാന ദിവസമായ വ്യാഴാഴ്ച 252 നാമനിര്‍ദേശ പത്രികകളാണ് ലഭിച്ചത്.

സംസ്ഥാനത്ത് സ്ഥാനാര്‍ഥികളാകാന്‍ അപേക്ഷിച്ചത് 290 പേര്‍; വടകരയിൽ 14

Kerala

തിരുവനന്തപുരം: ലോക്സഭാ തെരഞ്ഞെടുപ്പിനുള്ള നാമ നിർദ്ദേശ പത്രികകളുടെ സമർപ്പണം നാളെ (മാർച്ച് 28) മുതൽ ആരംഭിക്കും. സംസ്ഥാനത്ത് 20 ലോക്സഭാ മണ്ഡലങ്ങളിലേക്കും ബന്ധപ്പെട്ട റിട്ടേണിംഗ് ഓഫീസർമാർക്കു മുമ്പാകെയാണ് പത്രിക സമർപ്പിക്കേണ്ടത്.
രാവിലെ 11 മുതൽ വൈകിട്ട് മൂന്നു വരെയാണ് പത്രിക സ്വീകരിക്കുന്ന സമയം. അവസാന തീയതി ഏപ്രിൽ നാല്. നെഗോഷ്യബിള്‍ ഇന്‍സട്രമെന്റ്‌സ് ആക്ട് പ്രകാരം അവധി ദിനങ്ങളായ മാര്‍ച്ച് 29, 31, എപ്രില്‍ ഒന്ന് തീയതികളില്‍ പത്രിക സമര്‍പ്പിക്കാനാവില്ല. സൂക്ഷ്മ പരിശോധന ഏപ്രിൽ അഞ്ചിന് നടക്കും. നാമനിര്‍ദേശ പത്രിക പിന്‍വലിക്കാനുള്ള അവസാന തീയതി ഏപ്രില്‍ എട്ടാണ്.

ലോക്സഭാ തെരഞ്ഞെടുപ്പ്: നാമനിർദേശ പത്രിക സമർപ്പണം നാളെ തുടങ്ങും

തിരുവനന്തപുരം: ലോക്സഭാ തിരഞ്ഞെടുപ്പിൽ മുസ്‍ലിം ലീഗിന് മൂന്നാം സീറ്റില്ല. രാജ്യസഭാ സീറ്റ് പകരമായി മുസ്‍ലിം ലീഗിന് നൽകും. മുസ്‍ലിം ലീഗ് മലപ്പുറത്തും, പൊന്നാനിയിലും മത്സരിക്കും. കോൺഗ്രസ് 16 സീറ്റിൽ മത്സരിക്കും. ഇത്തവണ രാജ്യസഭാ സീറ്റ് ലീഗിനു നൽകുന്നതിനു പകരമായി, പിന്നീട് വരുന്ന രാജ്യസഭാ സീറ്റ് കോൺഗ്രസ് എടുക്കുമെന്ന് പ്രതിപക്ഷ നേതാവ് വി.ഡി.സതീശൻ പറഞ്ഞു.
യുഡിഎഫ് ഭരണത്തിലെത്തുമ്പോൾ മൂന്ന് രാജ്യസഭാ സീറ്റ് കോൺഗ്രസിനും രണ്ടു സീറ്റ് മുസ്‍ലിം ലീഗിനുമാണ് ഉണ്ടാകാറുള്ളത്. അത് ഉറപ്പു വരുത്തും. ലീഗ് നേതാക്കളും പ്രവർത്തകരും ലോക്സഭയിലേക്ക് മൂന്നാം സീറ്റ് ചോദിച്ചിരുന്നു. കൊടുക്കണമെന്ന് കോൺഗ്രസിന് ആഗ്രമുണ്ടായെങ്കിലും പ്രായോഗിക ബുദ്ധിമുട്ടുണ്ടായതായി പ്രതിപക്ഷ നേതാവ് പറഞ്ഞു. മൂന്നാം സീറ്റിന് ലീഗിന് അർഹതയുണ്ട്. സാധാരണ പ്രതിപക്ഷത്തുള്ളപ്പോൾ ലീഗിന് ഒരു രാജ്യസഭാ സീറ്റാണ് ഉണ്ടാകാറുള്ളത്. എന്നാൽ, രണ്ടു വർഷം മുൻപ് തന്നെ രണ്ടു രാജ്യസഭാ സീറ്റ് ലീഗിന് ലഭിച്ചു. സീറ്റ് വിഭജനം ദേശീയ നേതൃത്വവുമായി ആലോചിച്ച് എടുത്ത തീരുമാനമാണ്.
കോൺഗ്രസ് സ്ഥാനാർഥി ചർച്ചകളിലേക്ക് ഇന്ന് കടക്കുമെന്ന് പ്രതിപക്ഷ നേതാവ് പറഞ്ഞു. കേന്ദ്ര നേതൃത്വവുമായി സംസാരിച്ച് തീരുമാനം പ്രഖ്യാപിക്കും. കോൺഗ്രസ് സ്ഥാനാർഥി ചർച്ചകൾ വൈകിയിട്ടില്ല. തിരഞ്ഞെടുപ്പ് പ്രഖ്യാപിച്ചിട്ടില്ല. 5 ദിവസം മുൻപാണ് എല്‍ഡിഎഫ് സ്ഥാനാർഥി ചർച്ച പൂർത്തിയാക്കിയത്. ആദ്യം കോൺഗ്രസിന്റെ സ്ക്രീനിങ് കമ്മിറ്റി യോഗം ചേരും. ഇവിടുത്തെ ചർച്ചകൾ കമ്മിറ്റിയെ അറിയിക്കും. പിന്നീട് സെൻട്രൽ ഇലക്ഷൻ കമ്മിറ്റി ചേരുമെന്നും പ്രതിപക്ഷ നേതാവ് പറഞ്ഞു.
ടി.പി കൊലപാതക കേസിൽ നിയമപോരാട്ടം തുടരുമെന്ന് കെപിസിസി പ്രസിഡന്റ് കെ.സുധാകരൻ പറഞ്ഞു. കൊലയിൽ സിപിഎമ്മിന് പങ്കില്ലെന്ന വാദം പൊളിഞ്ഞു. ഗൂഢാലോചന നടത്തിയ മുഴുവൻ പേരെയും പിടികൂടണം. ടി.പി കേസിലെ പ്രതികൾക്ക് പരോൾ ലഭിക്കുന്നത് സർക്കാർ സഹായത്തോടെയാണെന്ന് കോടതിക്ക് മനസിലായി. ടി.പി കേസിലെ പ്രതികളുടെ വാലാട്ടി നിൽക്കുന്ന ഉദ്യോഗസ്ഥരാണ് ജയിലുകളിലുള്ളത്. പാർട്ടി ഭരിക്കുമ്പോൾ പ്രതികൾക്ക് സുഖജീവിതം ലഭിക്കുമെന്ന് കണ്ടതിനാലാണ് കോടതി ശിക്ഷ വർധിപ്പിച്ചതും പരോൾ ഒഴിവാക്കണമെന്ന് നിർദേശിച്ചതും. സിപിഎമ്മിന്റെ അക്രമരാഷ്ട്രീയം തിരഞ്ഞെടുപ്പിൽ പ്രചാരണവിഷയമാകും. മുഖ്യമന്ത്രിയടക്കം രക്തദാഹിയാണെന്നും കെ.സുധാകരൻ പറഞ്ഞു.

യുഡിഎഫ് സീറ്റ് വിഭജനം പൂർത്തിയായി; മൂന്നാം സീറ്റില്ല, മലപ്പുറത്തും പൊന്നാനിയിലും മാത്രം മുസ്‍ലിം ലീഗ് മത്സരിക്കും

വടകര: ലോക്സഭാ മണ്ഡലത്തിൽ വളരെ ദയനീയമായ പരാജയം കെ കെ ശൈലജക്ക് നേരിടേണ്ടി വരുമെന്ന് കെകെ രമ എംഎൽഎ. വടകരയിൽ കെ കെ ശൈലജ വന്ന് മത്സരിക്കാതിരിക്കുന്നതാണ് നല്ലത്. ശൈലജ മത്സരരം​ഗത്തേക്കെത്തുന്നത് കൊണ്ട് ആർഎംപിയ്ക്ക് യാതൊരു പ്രശ്നവുമില്ലെന്നും കെകെ രമ പ്രമുഖ മാധ്യമത്തോട് പറഞ്ഞു. വടകരയിൽ സിപിഎം സ്ഥാനാർത്ഥിയായി കെകെ ശൈലജ എത്തുന്നതിനോടാണ് രമയുടെ പ്രതികരണം.&nbsp;
ശൈലജ സിപിഎമ്മിന്റെ വക്താവണല്ലോ. പാർട്ടിയുടെ എല്ലാ കൊള്ളരുതായ്മകളേയും ന്യായീകരിച്ചുകൊണ്ടിരിക്കുന്ന ആളാണ് കെകെ ശൈലജ. ആ പാർട്ടിയുടെ നേതാവല്ലേ, അത് കൊണ്ട് തന്നെ വ്യക്തി മാറിയത് കൊണ്ട് മാത്രം കാര്യമില്ല. സിപിഎമ്മിൽ വ്യക്തികൾക്കല്ല, പാർട്ടിക്കാണല്ലോ പ്രാധാന്യം. ഏതെങ്കിലും തരത്തിൽ ഒരു സീറ്റ് എങ്ങനെയെങ്കിലും ഉറപ്പിക്കാനാവുമോ എന്ന കാര്യമാണ് പാർട്ടി നോക്കുന്നതെന്നും കെകെ രമ പറഞ്ഞു.&nbsp;&nbsp;

മത്സരിക്കാതിരിക്കുന്നതാണ് നല്ലത്; വടകരയിൽ കെ കെ ശൈലജ ദയനീയമായി പരാജയപെടുമെന്ന് കെകെ രമ

Vadakara

തിരുവനന്തപുരം: ലോക്സഭാ തിരഞ്ഞെടുപ്പില്‍ ഓരോ മണ്ഡലത്തിലെയും വിജയസാധ്യത വിലയിരുത്തി സ്ഥാനാര്‍ഥികളെ നിശ്ചയിക്കാനുള്ള പ്രാഥമിക ചര്‍ച്ച സി.പി.എം. സംസ്ഥാന സെക്രട്ടേറിയറ്റില്‍ നടന്നു. നിലവിലെ മന്ത്രിമാരാരും മത്സരിക്കേണ്ടതില്ലെന്നും എം.എല്‍.എ.മാര്‍ അനിവാര്യമായ ഘട്ടത്തില്‍മാത്രം മതിയെന്നുമാണ് ധാരണ. കെ.കെ. ശൈലജ എം.എല്‍.എ.യ്ക്ക് സാധ്യതകല്പിച്ചിരുന്ന കണ്ണൂര്‍, വടകര മണ്ഡലങ്ങളില്‍ അപ്രതീക്ഷിത മുഖമാണ് പരീക്ഷിക്കുന്നത്. കണ്ണൂരില്‍ ജില്ലാസെക്രട്ടറി എം.വി. ജയരാജന്‍ സ്ഥാനാര്‍ഥിയായേക്കും. വടകരയില്‍ മുന്‍ എം.എല്‍.എ. എ. പ്രദീപ്കുമാറിനെയാണ് ആലോചിക്കുന്നത്.
ജില്ലകളില്‍നിന്നുള്ള റിപ്പോര്‍ട്ടുകൂടി പരിശോധിച്ചാകും അന്തിമതീരുമാനം. പട്ടിക അംഗീകരിക്കാനായി 21-ന് സംസ്ഥാന കമ്മിറ്റി വിളിച്ചുചേര്‍ക്കാനും സെക്രട്ടേറിയറ്റ് യോഗം തീരുമാനിച്ചു. ജില്ലയിൽ കോഴിക്കോട്, വടകര മണ്ഡലങ്ങളും വയനാട് മണ്ഡലത്തിന്റെ ഒരു ഭാഗവുമാണ് ഉൾപ്പെട്ടിരിക്കുന്നത്. ഇതിൽത്തന്നെ വടകര മണ്ഡലം കോഴിക്കോട്, കണ്ണൂർ ജില്ലകളിലായി പരന്നു കിടക്കുകയാണ്. ഒ‍ഞ്ചിയം ഏരിയ സെക്രട്ടറിയും മു‍ൻ എസ്എഫ്ഐ സംസ്ഥാന സെക്രട്ടറിയുമായിരുന്ന ടി.പി.ബീനീഷിന്റെ പേരും വടകരയിൽ ഉയർന്ന് കേൾക്കുന്നുണ്ട്. കണ്ണൂർ ജില്ലയിലെ പാർട്ടി ശക്തികേന്ദ്രങ്ങൾ വടകര മണ്ഡലത്തിന്റെ ഭാഗമാണ്. കെ.കെ.ശൈലജയുടെ സ്വീകാര്യതയാണ് വടകരയിൽ മുന്നണിക്കു ഗുണം ചെയ്യുമെന്നാണു മുന്നണിയിലെ പൊതു അഭിപ്രായം. അതേസമയം കോഴിക്കോട് നോർത്ത് മുൻ എംഎൽഎ എ.പ്രദീപ് കുമാറിനെ മത്സരിപ്പിക്കുന്നതിൽ കണ്ണൂർ മേഖലയ്ക്ക് താൽപര്യമുണ്ടെന്നും സൂചനയുണ്ട്. സിപിഎമ്മിന്റെ സൗമ്യ മുഖമായ പ്രദീപിന് ജില്ലയിൽ പരക്കെ വ്യക്തിപരമായ സ്വാധീനമുണ്ട്. ടി.പി.ചന്ദ്രശേഖരന്റെ നാട്ടിൽ നിന്നുള്ള സ്ഥാനാർഥി എന്ന നിലയിൽ ടി.പി.ബിനീഷിനു സ്വീകാര്യതയുണ്ട്. പ്രായം കുറഞ്ഞ ബീനീഷിനെ ഒഞ്ചിയം ഏരിയ കമ്മിറ്റി സെക്രട്ടറിയായി പരിഗണിച്ചതുപോലും പല ലക്ഷ്യങ്ങളും മുന്നിൽ കണ്ടാണെന്നു ചിലർ സംശയം പ്രകടിപ്പിച്ചിരുന്നു.
ആരായിരിക്കും ജില്ലയിലെ യുഡിഎഫ് സ്ഥാനാർഥികൾ എന്നതിനെച്ചൊല്ലി ചർച്ച നടക്കുന്നുണ്ട്. എന്നാൽ വലിയ തർക്കങ്ങളോ അവകാശ വാദങ്ങളോ ഇല്ല എന്നതിലാണ് യുഡിഎഫിന്റെ ആത്മവിശ്വാസം. കോഴിക്കോട്ട് എം.കെ.രാഘവൻ വീണ്ടും മത്സരിക്കണമെന്നാണ് ജനങ്ങളും ഞങ്ങളും ആഗ്രഹിക്കുന്നതെന്ന് ‘സമരാഗ്നി’ പ്രതിഷേധ ജാഥാ വേദിയിൽ കെപിസിസി പ്രസിഡന്റ് കെ.സുധാകരൻ പ്രഖ്യാപിച്ചിരുന്നു. എം.കെ.രാഘവന്റെ ആദ്യ പ്രചാരണ വേദിയാണ് സമരാഗ്നി സമ്മേളനമെന്നും സുധാകരൻ പറഞ്ഞിരുന്നു.&nbsp;
ഈ പ്രഖ്യാപനം ശരിയാണെങ്കിൽ കോഴിക്കോട് മണ്ഡലത്തിൽ നാലാമങ്കത്തിനാണ് എം.കെ.രാഘവൻ വരുന്നത്. ആദ്യ 3 തവണയും പടിപടിയായി ഭൂരിപക്ഷം ഉയർത്തിയ ആളാണ് രാഘവൻ. വടകര മണ്ഡലത്തിൽ യുഡിഎഫ് കെ.മുരളീധരന്റെ പേരു മാത്രമാണ് ഇതുവരെ ഉയർന്നു വന്നിട്ടുള്ളു. സമരാഗ്നി വേദിയിൽ കെപിസിസി പ്രസിഡന്റ് കെ.സുധാകരൻ വടകരയിൽ മുരളീധരനെ മത്സരിപ്പിക്കുന്നതു സംബന്ധിച്ച സൂചനകൾ നൽകിയിട്ടുണ്ട്. ഇദ്ദേഹം മത്സരിക്കുന്നില്ലെങ്കി‍ൽ മാത്രമേ മറ്റു പേരുകൾ പരിഗണിക്കൂ. അത്തരമൊരു സാഹചര്യം ഉണ്ടായാൽ ഡിസിസി പ്രസിഡന്റും മണ്ഡലത്തിലെ താമസക്കാരനുമായ കെ.പ്രവീൺ കുമാറിന്റെ പേരും പരിഗണിക്കപ്പെട്ടേക്കുമെന്നും സൂചനയുണ്ട്.
ജില്ലയിൽ എൻഡിഎ സ്ഥാനാർഥികൾ ആരായിരിക്കുമെന്നതു സംബന്ധിച്ച് ഊഹാപോഹങ്ങളും സൂചനകളുമല്ലാതെ ഇതുവരെ കൃത്യമായ ഒരുത്തരം നേതാക്കൾക്കു പോലുമില്ല. അന്തിമതീരുമാനം കേന്ദ്ര നേതൃത്വത്തിൽ നിന്നാണ്. സ്വകാര്യ ഏജൻസികൾ വഴി നടത്തിയ അഭിപ്രായ സർവേയിലെ മാർക്കു കൂടി പരിഗണിച്ചാണ് സ്ഥാനാർഥി നിർണയം. നിലവിൽ കോഴിക്കോട് മണ്ഡലത്തിൽ ഉയർന്നു കേൾക്കുന്നത് ബിജെപി ദേശീയ നിർവാഹകസമിതി അംഗം പി.കെ.കൃഷ്ണദാസ്, ജില്ലയുടെ ചുമതലയുള്ള സംസ്ഥാന വൈസ് പ്രസിഡന്റ് ശോഭ സുരേന്ദ്രൻ, ബിജെപി ജില്ലാ പ്രസിഡന്റ് വി.കെ.സജീവൻ, സംസ്ഥാന ജനറൽ സെക്രട്ടറി എം.ടി.രമേശ് എന്നിവരുടെ പേരുകളാണ്.
4 മണ്ഡലങ്ങളുടെ ചുമതലക്കാരനാണു നിലവിൽ പി.കെ.കൃഷ്ണദാസ്. ജില്ലയിൽ ചുമതലയേറ്റ ശേഷം സമര രംഗത്തും വിവിധ പ്രവർത്തനങ്ങളിലും ശോഭ സുരേന്ദ്രൻ സജീവമാണ്. വി.കെ.സജീവൻ കഴിഞ്ഞ തവണ സ്വന്തം മണ്ഡലമായ വടകരയിലാണ് മത്സരിച്ചത്. എന്നാൽ ജില്ലാ പ്രസിഡന്റായി ചുമതലയേറ്റ ശേഷം കോഴിക്കോട് മണ്ഡലത്തിൽ സജീവമാണ്. കോഴിക്കോട്ടുകാർക്കു സുപരിചിതനായ എം.ടി.രമേശിനും മണ്ഡലത്തിൽ സ്വാധീനമുണ്ട്. അതേസമയം പൊതുപ്രശ്നങ്ങളിൽ ശക്തമായ ഇടപെടൽ നടത്തുന്ന നഗരസഭാ കൗൺസിലർ ടി.രെനീഷിന്റെ പേരും ചർച്ചകളിലുണ്ട്.
വടകരയിൽ യുവമോർച്ച സംസ്ഥാന പ്രസിഡന്റ് സി.ആർ.പ്രഫുൽക‍ൃഷ്ണനെ പരിഗണിച്ചേക്കുമെന്ന സൂചനകളുണ്ട്. കെ.കെ.ശൈലജയെപ്പോലുള്ള നേതാവാണ് എൽഡിഎഫിനായി രംഗത്തിറങ്ങുന്നതെങ്കിൽ എം.ടി.രമേശിനെ പരിഗണിക്കാനാണ് സാധ്യത. കഴിഞ്ഞ തവണ മത്സരിച്ച ജില്ലാ പ്രസിഡന്റ് വി.കെ.സജീവന്റെ പേരും പരിഗണിക്കപ്പെടുന്നതായി അറിയുന്നു.

കരുത്തരെ ഇറക്കാൻ എൽഡിഎഫ്; വിജയം തുടരാൻ യു ഡി എഫ്, തീരുമാനം കാത്ത് എൻഡിഎ; ജില്ലയിൽ ചർച്ച സജീവം

തിരുവനന്തപുരം: ലോക്‌സഭ തെരഞ്ഞെടുപ്പിൽ സീറ്റ് വേണമെന്ന് ഐ.എൻ.ടി.യു.സി. കോൺഗ്രസ് മത്സരിക്കുന്നതിൽ ഒരു സീറ്റ് ഐ.എൻ.ടി.യു.സിക്ക് വേണമെന്നാണ് ആവശ്യം. നേതാക്കൻമാർ നൽകിയ ഉറപ്പ് പാലിക്കണമെന്ന് ഐ.എൻ.ടി.യു.സി സംസ്ഥാന പ്രസിഡന്‍റ് ആർ.ചന്ദ്രശേഖരൻ പറഞ്ഞു. ഐ.എൻ.ടി.യു.സി ഒരു വ്യക്തിക്കായല്ല സീറ്റ് ചോദിച്ചതെന്നും തൊഴിലാളി സംഘടനക്കായാണെന്നും ആർ.ചന്ദ്രശേഖരൻ.
ഇതിനിടെ ആർ.എസ്.പിക്കെതിരെ ഒളിയമ്പുമായി ഐ.എൻ.ടി.യു.സി രംഗത്തെത്തിയിരുന്നു. ചില ഘടക കക്ഷികൾക്ക് അർഹമായതിലും കൂടുതൽ പരിഗണന യു.ഡി.എഫ് നൽകുന്നുണ്ടെന്നും ഇനിയും എത്ര നാൾ ഇങ്ങനെ മുന്നോട്ട് പോകുമെന്ന് കോൺഗ്രസ് നേതൃത്വം ആലോചിക്കണമെന്നും പറഞ്ഞ ഐ.എൻ.ടി.യു.സി കൊല്ലം എം.പിയുടെ മുൻ നിലപാടുകളടക്കം ചർച്ച ചെയ്യണമെന്നും ആർ.എസ്.പിക്ക് സീറ്റ് കൊടുത്തത് അന്നത്തെ രാഷ്ട്രീയ സാഹചര്യമാണെന്നും വ്യക്തമാക്കി.

'ലോക്‌സഭ തെരഞ്ഞെടുപ്പിൽ സീറ്റ് വേണം'; ആവശ്യവുമായി ഐ.എൻ.ടി.യു.സി

തിരുവനന്തപുരം: ഡിസംബര്‍ 10ന് നടക്കുന്ന തദ്ദേശസ്ഥാപന ഉപതിരഞ്ഞെടുപ്പില്‍ വോട്ട് ചെയ്യുന്നവരുടെ ഇടത് കൈയ്യിലെ നടുവിരലിലാണ് മഷി പുരട്ടേണ്ടതെന്ന് സംസ്ഥാന തിരഞ്ഞെടുപ്പ് കമ്മീഷന്‍. നവംബര്‍ 13നും 20നും സംസ്ഥാനത്ത് നടന്ന ലോക്‌സഭ, നിയമസഭ ഉപതിരഞ്ഞെടുപ്പുകളില്‍ സമ്മതിദാനാവകാശം വിനിയോഗിച്ച വോട്ടര്‍മാരുടെ ഇടതു കൈയ്യിലെ ചൂണ്ടുവിരലിലെ മഷി അടയാളം മാഞ്ഞു പോകാന്‍ ഇടയില്ലാത്തതിനാലാണിത്.
തദ്ദേശസ്ഥാപന ഉപതിരഞ്ഞെടുപ്പുകളില്‍ വോട്ട് ചെയ്യാനെത്തുന്നവരുടെ നിജസ്ഥിതി പോളിങ് ഉദ്യോഗസ്ഥര്‍ക്ക് മനസ്സിലാകുന്നതിന് കൂടിയാണ് ഈ നടപടി. നിര്‍ദ്ദേശം ഡിസംബര്‍ 10ന് നടക്കുന്ന ഉപതിരഞ്ഞെടുപ്പിനു വേണ്ടി മാത്രമുള്ളതായിരിക്കും. സംസ്ഥാനത്തെ 31 തദ്ദേശസ്ഥാപന വാര്‍ഡുകളിലേക്കാണ് ഡിസംബര്‍ 10ന് ഉപതിരഞ്ഞെടുപ്പ് നടക്കുന്നത്.തിരഞ്ഞെടുപ്പ് ചട്ടങ്ങളിലെ ആള്‍മാറാട്ടത്തിനെതിരേയുള്ള മുന്‍കരുതല്‍ വ്യവസ്ഥ പ്രകാരം ഇടതു കൈയ്യിലെ ചൂണ്ടുവിരലില്‍ പ്രിസൈഡിങ് ഓഫീസറോ പോളിങ് ഓഫീസറോ മഷി പുരട്ടേണ്ടതുണ്ട്. വോട്ടറുടെ ഇടതു ചൂണ്ടുവിരലില്‍ അത്തരത്തിലുള്ള മഷിയടയാളം നേരത്തേ ഉണ്ടെങ്കില്‍ വോട്ട് ചെയ്യാനാകില്ല. അതിനാലാണ് തിരഞ്ഞെടുപ്പ് കമ്മീഷന്‍ ഇത്തരത്തില്‍ നിര്‍ദ്ദേശം പുറപ്പെടുവിച്ചത്.

തദ്ദേശസ്ഥാപന ഉപതിരഞ്ഞെടുപ്പിൽ മഷി പുരട്ടുക നടുവിരലില്‍

വടകര: കാഫിര്‍ സ്‌ക്രീന്‍ഷോട്ട് കേസിലെ അന്വേഷണ പുരോഗതി റിപ്പോര്‍ട്ട് ഇന്ന് തന്നെ ഹാജരാക്കണമെന്ന് കോടതി. വടകര ഫസ്റ്റ്ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയാണ് പോലീസിന് നിര്‍ദേശം നല്‍കിയത്. ഇന്ന് കേസ് പരിഗണിച്ചപ്പോള്‍ പോലീസ് റിപ്പോര്‍ട്ട് സമര്‍പ്പിച്ചിരുന്നില്ല.
അന്വേഷണ പുരോഗതിയുടെ റിപ്പോര്‍ട്ടും പിടിച്ചെടുത്ത ഫോണുകളുടെ ഫോറന്‍സിക് പരിശോധന ഫലവും ഹാജരാക്കാന്‍ രണ്ടാഴ്ച മുന്നേ പോലീസിന് കോടതി നിര്‍ദേശം നല്‍കിയിരുന്നു. പക്ഷെ ഇന്ന് കേസ് പരിഗണിച്ചപ്പോള്‍ പോലീസത് ഹാജരാക്കിയില്ല. കൂടുതല്‍ സമയം ആവശ്യപ്പെടുകയും ചെയ്തു. എന്നാല്‍ ഇന്ന് ഉച്ചക്ക് ശേഷം കോടതി ചേരുമ്പോള്‍ തന്നെ റിപ്പോര്‍ട്ടുകള്‍ ഹാജരാക്കണമെന്നാണ് കോടതി പോലീസിന് നല്‍കിയിരിക്കുന്ന നിര്‍ദേശം.കേസെടുത്ത് എട്ട് മാസമായിട്ടും അന്വേഷണത്തിലെ മെല്ലെപ്പോക്ക് ചൂണ്ടിക്കാട്ടിയും അന്വേഷണത്തില്‍ കോടതി മേല്‍നോട്ടം ആവശ്യപ്പെട്ടുമാണ് പരാതിക്കാരനായ എം.എസ്.എഫ് നേതാവ് മുഹമ്മദ് കാസിം വടകര മജിസ്‌ട്രേറ്റ് കോടതിയെ സമീപിച്ചത്.&nbsp;

കാഫിര്‍ സ്‌ക്രീന്‍ഷോട്ട് കേസ്;അന്വേഷണ റിപ്പോര്‍ട്ട് ഇന്ന് തന്നെ ഹാജരാക്കാൻ നിർദ്ദേശം

കൊച്ചി: വയനാട്ടിൽ എൽ.ഡി.എഫും യു.ഡി.എഫും ചൊവ്വാഴ്ച നടത്തിയ ഹർത്താലിൽ വിമർശനവുമായി ഹൈക്കോടതി. ദൈവത്തിന്റെ സ്വന്തം നാട്ടിൽ എന്ത് നടക്കുന്നുവെന്ന് ദൈവത്തിനു പോലും അ‌റിയാത്ത അ‌വസ്ഥയാണെന്ന് കോടതി പറഞ്ഞു. മുണ്ടക്കൈ-ചൂരൽമല ഉരുൾപൊട്ടൽ ദേശീയദുരന്തമായി പ്രഖ്യാപിക്കില്ലെന്ന കേന്ദ്രനിലപാടിൽ പ്രതിഷേധിച്ചായിരുന്നു ഹർത്താൽ.
വയനാട് പുനർനിർമാണവുമായി ബന്ധപ്പെട്ട് സ്വമേധയാ എടുത്ത കേസ് പരിഗണിക്കവേയാണ് ഹൈക്കോടതി സർക്കാരിനെയും പ്രതിപക്ഷത്തെയും വിമർശിച്ചത്. ഹർത്താൽ കൊണ്ട് എന്തു നേടിയെന്നും കോടതി ചോദിച്ചു.ടൂറിസം ഡെസ്റ്റിനേഷനെന്ന നിലയിൽ ദൈവത്തിന്റെ സ്വന്തം നാടെന്നാണ് കേരളം അ‌റിയപ്പെടുന്നത്. എന്നാൽ, ഇവിടെ എന്ത് നടക്കുന്നുവെന്ന് ദൈവത്തിനുപോലും അ‌റിയില്ല. ഭരണകക്ഷി ഹർത്താൽ നടത്തിയത്‌ എന്തിനാണ്? മിന്നൽ ഹർത്താൽ നടത്തില്ലെന്ന പ്രതിപക്ഷകക്ഷിയുടെ ഉറപ്പും പാലിക്കപ്പെട്ടില്ലെന്നും ഹൈക്കോടതി ചൂണ്ടിക്കാട്ടി.

'എന്നിട്ട് എന്തു നേടി'; വയനാട് ഹർത്താലിനെതിരെ രൂക്ഷവിമർശനവുമായി ഹൈക്കോടതി

ആലപ്പുഴ: നഗരത്തിലെ പിഡബ്ല്യുഡി റസ്റ്റ് ഹൗസിലെ ടോയ്‌ലറ്റിൽ കോൺക്രീറ്റ് സീലിംഗ് ഇളകി വീണു. ലീഗൽ മെട്രോളജി വകുപ്പിലെ ഉദ്യോഗസ്ഥൻ തലനാരിഴയ്‌ക്കാണ് പരിക്കേൽക്കാതെ രക്ഷപ്പെട്ടത്. ഇന്നലെ സെക്രട്ടേറിയറ്റിലെ ടോയ്‌ലറ്റിലുണ്ടായ അപകടത്തിൽ ജീവനക്കാരിക്ക് ഗുരുതര പരിക്കേറ്റതിന് പിന്നാലെയാണ് ആലപ്പുഴയിലും അപകടമുണ്ടായിരിക്കുന്നത്.
ഇന്ന് രാവിലെയായിരുന്നു സംഭവം. ആലപ്പുഴ സിവിൽ സ്റ്റേഷനിൽ പ്രവർത്തിക്കുന്ന ഡെപ്യൂട്ടി കൺട്രോളർ ഓഫീസിലേക്ക് പരിശോധനയ്‌ക്ക് എത്തിയതായിരുന്നു ലീഗൽ മെട്രോളജി വകുപ്പിലെ ഉദ്യോഗസ്ഥർ. പിഡബ്ല്യുഡി റസ്റ്റ് ഹൗസിലായിരുന്നു ഇവർ താമസിച്ചിരുന്നത്. രാവിലെ ടോയ്‌ലറ്റിൽ പോയ ശേഷം ഒരു ഉദ്യോഗസ്ഥൻ പുറത്തേക്ക് ഇറങ്ങുന്നതിനിടെയാണ് സീലിംഗ് തകർന്ന് വീണത്. അൽപ്പം വൈകിയിരുന്നെങ്കിൽ അദ്ദേഹം അപകടത്തിൽപ്പെട്ടേനെ. ലീഗൽ മെട്രേളജി വകുപ്പിലെ ജൂനിയർ സൂപ്രണ്ട് ജി ആർ അനിലാണ് അപകടത്തിൽ നിന്ന് തലനാരിഴയ്‌ക്ക് രക്ഷപ്പെട്ടത്. കോൺക്രീറ്റ് നിലത്ത് വീണ് പൊട്ടിച്ചിതറിയതിന്റെ ദൃശ്യങ്ങളും പുറത്തുവന്നിട്ടുണ്ട്.പിഡബ്ല്യുഡി റസ്റ്റ് ഹൗസ് പൊതു ജനങ്ങൾക്ക് ഉൾപ്പെടെ തുറന്ന് കൊടുക്കുന്നതിനെപ്പറ്റി സർക്കാർ ആലോചിക്കുന്നതിനിടെയാണ് ഇത്തരമൊരു അപകടമുണ്ടായിരിക്കുന്നത്. ജി സുധാകരൻ പൊതുമരാമത്ത് വകുപ്പ് മന്ത്രിയായിരുന്നപ്പോഴാണ് അവസാനമായി റസ്റ്റ് ഹൗസിൽ അറ്റകുറ്റ പണികൾ നടത്തിയിരുന്നത്.

വീണ്ടും ടോയ്‌ലറ്റ് അപകടം; പിഡബ്ല്യുഡി റസ്റ്റ് ഹൗസിൽ സീലിംഗ് ഇളകി വീണു

തിരുവനന്തപുരം: ഭരണഘടനാവിരുദ്ധ പ്രസംഗത്തിന്റെപേരില്‍ സജി ചെറിയാന്‍ മന്ത്രിസ്ഥാനം രാജിവെക്കേണ്ടതില്ലെന്ന് സിപിഎം സംസ്ഥാന സെക്രട്ടേറിയറ്റിൽ തീരുമാനം. കേസ് നിയമപരമായി നേരിടുമെന്നാണ് സിപിഎം വ്യക്തമാക്കുന്നത്.
ഒരിക്കൽ ധാർമ്മികത മുൻനിർത്തി സജി ചെറിയാൻ രാജിവച്ചതാണെന്നും അതിനാൽ ഇപ്പോൾ ഒരേ വിഷയത്തിൽ രണ്ട് തവണ രാജി വേണ്ടെന്നുമാണ് പാർട്ടി നിലപാട്. ഇതേനിലപാട് തന്നെയാണ് കഴിഞ്ഞദിവസം മന്ത്രിയും സ്വീകരിച്ചത്. കേസിൽ സ്വതന്ത്രമായ അന്വേഷണം നടക്കട്ടെ.&nbsp;
സജി ചെറിയാന്റെ ഭാഗം കേട്ടില്ലെന്ന അദ്ദേഹത്തിന്റെ വാദം ശരിയാണെന്നാണ് പാർട്ടി നിലപാട്. മന്ത്രിസ്ഥാനത്തിരിക്കുന്ന ആളാണെങ്കിലും അന്വേഷണം വേണം എന്ന് ഹൈക്കോടതി പറയുമ്പോൾതന്നെ അദ്ദേഹത്തിന്റെ മന്ത്രി സ്ഥാനത്തെ കോടതി ചോദ്യം ചെയ്‌തിട്ടില്ല എന്നും സംസ്ഥാനത്തെ നീതിന്യായ വ്യവസ്ഥയിൽ സത്യസന്ധമായ അന്വേഷണം നടക്കുമെന്ന് കോടതി വിശ്വാസം അർപ്പിച്ചിട്ടുണ്ട് എന്നും സിപിഎം പറയുന്നു അതിനാൽ തന്നെ മന്ത്രിസ്ഥാനം സജി ചെറിയാൻ രാജിവയ്‌ക്കേണ്ട എന്നാണ് പാർട്ടി വ്യക്തമാക്കുന്നത്.

പാർട്ടി ഒപ്പമുണ്ട്; സജി ചെറിയാന്‍ മന്ത്രിസ്ഥാനം രാജിവെക്കേണ്ടതില്ലെന്ന് സിപിഎം

Search Results for: 26.04.2024