പാലക്കാട്: മുണ്ടൂരില്‍ കാട്ടാനയാക്രമണത്തില്‍ ഗൃഹനാഥന്‍ കൊല്ലപ്പെട്ടു. പുതുപ്പരിയാരം ഒന്നാംവാര്‍ഡ് നൊച്ചിപ്പുള്ളി ഞാറാക്കോട് കുമാരന്‍ (65) ആണ് മരിച്ചത്.&nbsp;
പുലര്‍ച്ചെ വീടിന് പുറത്തിറങ്ങിയപ്പോള്‍ കാട്ടാനയുടെ ചവിട്ടേല്‍ക്കുകയായിരുന്നു. വനപാലകരെത്തിയെങ്കിലും മൃതദേഹം മാറ്റാന്‍ സമീപവാസികള്‍ സമ്മതിച്ചിട്ടില്ല.

പാലക്കാട് മുണ്ടൂരില്‍ കാട്ടാനയാക്രമണത്തില്‍ ഗൃഹനാഥന്‍ കൊല്ലപ്പെട്ടു

അട്ടപ്പാടി: അട്ടപ്പാടിയില്‍ കാട്ടാനയുടെ ആക്രമണത്തില്‍ ആദിവാസി വയോധികന്‍ മരിച്ചു. അട്ടപ്പാടി ചീരക്കടവില്‍ മല്ലന്‍ എന്നയാളാണ് ഗുരുതരമായി പരിക്കേറ്റ് ചികിത്സയിലിരിക്കെ മരിച്ചത്. വെള്ളിയാഴ്ചയാണ് മല്ലനെ കാട്ടാന ആക്രമിച്ചത്.
ആനയുടെ ആക്രമണത്തില്‍ വാരിയെല്ല് ഒടിഞ്ഞ് ശ്വാസകോശത്തില്‍ കയറിയതടക്കം ഗുരുതര പരിക്കുകളാണ് മല്ലന് ഉണ്ടായിരുന്നത്‌. മെച്ചപ്പെട്ട ചികിത്സയ്ക്കായാണ് മല്ലനെ ഇന്നലെ തൃശ്ശൂര്‍ മെഡിക്കല്‍ കോളേജിലേക്ക് മാറ്റിയത്. വെന്റിലേറ്ററിലാണ് തൃശ്ശൂരിലേക്ക് കൊണ്ടുപോയത്.ശനിയാഴ്ച രാവിലെ മല്ലന്‍ മരണത്തിന് കീഴടങ്ങുകയായിരുന്നു. മൃതദേഹം തൃശ്ശൂര്‍ മെഡിക്കല്‍ കോളേജില്‍. നടപടിക്രമങ്ങള്‍ പൂര്‍ത്തിയായ ശേഷം മൃതദേഹം അട്ടപ്പാടിയിലേക്ക് കൊണ്ടുപോകും.

അട്ടപ്പാടിയില്‍ കാട്ടാനയുടെ ആക്രമണത്തില്‍ ആദിവാസി വയോധികന്‍ മരിച്ചു

Kerala

ഗൂഡല്ലൂര്‍: മസിനഗുഡിയില്‍ കാട്ടാനയുടെ ആക്രമണത്തില്‍ പരിക്കേറ്റ് ചികിത്സയിലായിരുന്ന സ്ത്രീ മരിച്ചു. മസിനഗുഡി-ബൊക്കാപുരം റോഡില്‍വെച്ച് സ്‌കൂട്ടറില്‍ യാത്രചെയ്യുകയായിരുന്ന ദമ്പതിമാരെ കാട്ടാന ആക്രമിക്കുകയായിരുന്നു.തപാല്‍വകുപ്പിലെ താത്കാലിക ജീവനക്കാരി മസിനഗുഡി സ്വദേശി സരസു (58) ആണ് മരിച്ചത്. ഭര്‍ത്താവ് കുമാരസാമി (64) ചികിത്സയിലാണ്.
തിങ്കളാഴ്ച വൈകുന്നേരം അഞ്ചരയോടെയാണ് സംഭവം. പരിക്കേറ്റ് ഊട്ടി മെഡിക്കല്‍ കോളേജാശുപത്രിയില്‍ പ്രവേശിപ്പിച്ച സരസു ചികിത്സയിലിരിക്കെ, തിങ്കളാഴ്ച രാത്രി ഒന്‍പതരമണിയോടെ മരിച്ചു. ബൊക്കാപുരം മാരിയമ്മന്‍ കോവിലില്‍ ദര്‍ശനത്തിനുശേഷം സ്‌കൂട്ടറില്‍ മടങ്ങുകയായിരുന്ന ഇരുവരേയും റോഡിലിറങ്ങിയ കാട്ടാന ആക്രമിക്കുകയായിരുന്നു. സ്‌കൂട്ടര്‍ ഉപേക്ഷിച്ച് ഇരുവരും ഓടിരക്ഷപ്പെടാന്‍ ശ്രമിച്ചെങ്കിലും പിന്തുടര്‍ന്ന കാട്ടാന സരസുവിനെ ആക്രമിച്ചു. അതുവഴി ജീപ്പില്‍ വന്നവര്‍ കാട്ടാനയെ തുരത്തുകയായിരുന്നു.സാരമായി പരിക്കേറ്റ സരസുവിന് പ്രാഥമികാരോഗ്യകേന്ദ്രത്തില്‍ പ്രഥമശുശ്രൂഷ നല്‍കിയതിനുശേഷം വിദഗ്ധചികിത്സയ്ക്കായി ഊട്ടിയിലെ സര്‍ക്കാര്‍ മെഡിക്കല്‍ കോളേജാശുപത്രിയിലേക്ക് മാറ്റി.

മസിനഗുഡിയില്‍ സ്‌കൂട്ടര്‍ യാത്രക്കാർക്ക് നേരേ കാട്ടാന ആക്രമണം; സ്ത്രീ മരിച്ചു

National

തൃശ്ശൂര്‍: അതിരപ്പിള്ളിയില്‍ കാട്ടാന ആക്രമണത്തില്‍ രണ്ട് പേര്‍ കൊല്ലപ്പെട്ട സംഭവത്തില്‍ മരണകാരണം സ്ഥിരീകരിക്കേണ്ടതുണ്ടെന്ന് വനം മന്ത്രി എ.കെ. ശശീന്ദ്രന്‍. മന്ത്രിയുടെ നിർദേശമനുസരിച്ച്‌ പ്രാഥമിക അന്വേഷണം ആരംഭിച്ചതായി വനം വകുപ്പ് അഡീഷണല്‍ പ്രിന്‍സിപ്പല്‍ ചീഫ് കണ്‍സര്‍വേറ്റര്‍ അറിയിച്ചു.
മന്ത്രി പുറത്തുവിട്ട വാര്‍ത്താക്കുറിപ്പില്‍ അതിരപ്പിള്ളിയിലേത് 'അസാധാരണ മരണങ്ങള്‍' എന്നാണ് വിശേഷിപ്പിച്ചത്‌. മരണകാരണം സ്ഥിരീകരിക്കേണ്ടതുണ്ടെന്നും പോസ്റ്റ്‌മോര്‍ട്ടത്തിന് ഒരുക്കങ്ങള്‍ നടത്തിയിട്ടുണ്ടെന്നും വ്യക്തമാക്കി.
മന്ത്രിയുടെ വാര്‍ത്താക്കുറിപ്പ്
തൃശ്ശൂര്‍ അതിരപ്പിള്ളി പ്രദേശത്തും സമീപ പ്രദേശത്തും വന മേഖലയില്‍ ഉണ്ടായ അസാധാരണ മരണങ്ങള്‍ സംബന്ധിച്ച് അന്വേഷിച്ച് റിപ്പോര്‍ട്ട് നല്‍കാന്‍ ചീഫ് വൈല്‍ഡ് ലൈഫ് വാര്‍ഡന് മന്ത്രി എ കെ ശശീന്ദ്രന്‍ നിര്‍ദേശം നല്‍കി.
വാഴച്ചാല്‍ ഉന്നതിയിലെ സതീഷ്, അംബിക ദമ്പതികള്‍ കഴിഞ്ഞ മൂന്ന് ദിവസമായി കാട്ടിനകത്തു കുടില്‍ കെട്ടി തേന്‍ ശേഖരിച്ചു വരികയാരുന്നു. രണ്ടു പേരെയും കാണാനില്ലെന്ന വിവരം ലഭിച്ചതിനെ തുടര്‍ന്ന് വനം സ്റ്റാഫ് സ്ഥലത്തെത്തി പരിശോധിച്ചതില്‍, സംശയാസ്പദമായ സാഹചര്യത്തില്‍ സതീശന്റെ മൃതദേഹം കണ്ടെത്തി. അംബികയുടെ ശരീരം പോലീസ് എത്തി പുഴയില്‍ നിന്നും കണ്ടെത്തിയിട്ടുണ്ട്. പോലീസ് അന്വേഷിച്ചു വരുന്നു. മരണകാരണം സ്ഥീരീകരിക്കേണ്ടതുണ്ട്. പോസ്റ്റുമോര്‍ട്ടത്തിനുള്ള സജ്ജീകരണങ്ങള്‍ ഏര്‍പ്പെടുത്തിയിട്ടുണ്ട്.

അതിരപ്പിള്ളിയിലേത് അസാധാരണ മരണങ്ങൾ; കാരണം സ്ഥിരീകരിക്കേണ്ടതുണ്ടെന്ന് വനം വകുപ്പ് മന്ത്രി

തൃശൂർ: അതിരപ്പിള്ളിയിൽ കാട്ടാന ആക്രമണത്തിൽ രണ്ടുപേർ മരിച്ചു. വാഴച്ചാൽ ശാസ്‌താംപൂവം ഉന്നതിയിലെ സതീഷ്, അംബിക എന്നിവരാണ് മരിച്ചത്. വനവിഭവം ശേഖരിക്കാൻ അതിരപ്പിള്ളി വഞ്ചിക്കടവിൽ കുടിൽകെട്ടി താമസിച്ചവരാണ് കൊല്ലപ്പെട്ടത്. ഇരുവരും ആദിവാസി വിഭാഗത്തിൽപ്പെട്ടവരാണ്.
പ്രദേശത്ത് മൂന്നോളം കുടുംബങ്ങൾ താമസിക്കുന്നുണ്ടായിരുന്നു. ഇന്നലെയാണ് ഇവർക്കുനേരെ കാട്ടാന ആക്രമണം ഉണ്ടായത്. കാട്ടാനക്കൂട്ടം എത്തിയപ്പോൾ ഇവർ ചിതറിയോടി. സതീഷ് കാട്ടാനയുടെ മുന്നിൽപ്പെടുകയായിരുന്നു. സതീഷിന്റെ മൃതദേഹമാണ് ആദ്യം കണ്ടെത്തിയത്. തുടർന്ന് വനംവകുപ്പിനെ അറിയിച്ചതിനുശേഷം നടത്തിയ പരിശോധനയിൽ അംബികയുടെ മൃതദേഹം പുഴയിൽ നിന്ന് കണ്ടെത്തുകയായിരുന്നു. മൃതദേഹങ്ങൾ പുറത്തെത്തിക്കാനുള്ള നടപടികൾ സ്വീകരിച്ചു.സംസ്ഥാനത്ത് രണ്ട് ദിവസത്തിനിടെ മൂന്ന് പേരാണ് കാട്ടാന ആക്രമണത്തിൽ മരിച്ചത്.&nbsp;

വീണ്ടും ജീവനെടുത്ത് കാട്ടാന; അതിരപ്പിള്ളിയിൽ രണ്ടുപേർ മരിച്ചു.

വീണ്ടും ജീവനെടുത്ത് കാട്ടാന; അതിരപ്പിള്ളിയിൽ രണ്ടുപേർ മരിച്ചു

കണ്ണൂർ: ആറളം ഫാമിൽ കാട്ടാനയുടെ ആക്രമണം. കശുവണ്ടി ശേഖരിക്കുന്നതിനിടയിൽ ആദിവാസി ദമ്പതിമാരെ കാട്ടാന ചവിട്ടിക്കൊന്നു. പതിമൂന്നാം ബ്ലോക്ക് കരിക്കമുക്കിലെ വെള്ളി, ഭാര്യ ലീല എന്നിവരാണ് കൊല്ലപ്പെട്ടത്.
ഞായറാഴ്ച വൈകുന്നേരമാണ് സംഭവം നടന്നത്. ജനവാസ മേഖലയിലാണ് കാട്ടാന ആക്രമണം ഉണ്ടായതെന്നാണ് വിവരം. ആർആർടി സംഘം പ്രദേശത്തെത്തിയിട്ടുണ്ട്. ആന കൊല്ലപ്പെട്ട ദമ്പതിമാരുടെ മൃതദേഹത്തിനരികിൽ നിലയുറപ്പിച്ചിരിക്കുന്നതിനാൽ മൃതദേഹം പ്രദേശത്ത് നിന്നും മാറ്റാൻ സാധിച്ചിട്ടില്ലെന്നാണ് വിവരം.ആറളം ആദിവാസി പുനരധിവാസ മേഖലയിൽ കാട്ടാനശല്യം അതിരൂക്ഷമാണ്. വേലി നിർമാണം പൂർത്തിയാക്കണമെന്ന ആവശ്യം ശക്തമാണെങ്കിലും ഇഴഞ്ഞുനീങ്ങുന്ന സാഹചര്യമാണ് നിലവിലുള്ളത്.&nbsp;

ആറളം ഫാമിൽ ദമ്പതിമാരെ കാട്ടാന ചവിട്ടിക്കൊന്നു

Kannur

പാലോട്(തിരുവനന്തപുരം): സ്‌കൂട്ടറിൽ വരുകയായിരുന്ന യുവാക്കളെ കാട്ടാന ആക്രമിച്ചു. ശാസ്താംനട സ്വദേശികളായ സുധി(32), രാജീവ്(40) എന്നിവരെയാണ് ആന ആക്രമിച്ചത്. പെരിങ്ങമ്മല പഞ്ചായത്തിലെ വേങ്കൊല്ല, ശാസ്താംനട റോഡിൽ രാത്രി 7.30ഓടെയാണ് സംഭവം.
സ്കൂട്ടറിൽ വന്ന രണ്ടുപേരെയും വണ്ടിയോടെ ആന മറിച്ചിടുകയായിരുന്നു. രാജീവിനാണ് കൂടുതൽ പരിക്ക്. ഇയാളുടെ ഇരു കാലുകൾക്കും പൊട്ടലുണ്ട്. സുധി വണ്ടിയുപേക്ഷിച്ച് ഓടി രക്ഷപ്പെടാൻ ശ്രമിക്കുന്നതിനിടെ വീണു പരിക്കേറ്റു. ഇവർ സഞ്ചരിച്ചിരുന്ന ഇരുചക്രവാഹനം ആന ദൂരേക്കു വലിച്ചെറിഞ്ഞു.
വേങ്കൊല്ല ചെക്പോസ്റ്റിൽനിന്ന്‌ രണ്ട്‌ കിലോമീറ്റർ മാറി റോഡിലാണ് അപകടം. ഇവിടെ ക്ഷേത്രത്തിനു സമീപത്തെ കരിങ്കുറിഞ്ഞിപ്പച്ച എന്ന സ്ഥലത്താണ് കാട്ടാന ഇറങ്ങിയത്.ജോലി കഴിഞ്ഞുവന്ന്‌ വേങ്കൊല്ല ജങ്ഷനിൽനിന്നും വീട്ടുസാധനങ്ങൾ വാങ്ങി മടങ്ങുകയായിരുന്നു ഇരുവരും. പിന്നാലെ ജീപ്പിൽ വന്നവരാണ് പരിക്കേറ്റു കിടക്കുന്ന സുധിയെയും രാജീവിനെയും കണ്ടത്. വനംവകുപ്പ് അധികൃതർ സ്ഥലത്തെത്തിയാണ് പരിക്കേറ്റവരെ കുളത്തൂപ്പുഴ താലൂക്ക് ആശുപത്രിയിൽ പ്രവേശിപ്പിച്ചത്. പരിക്ക് ഗുരുതരമായതിനാൽ കൊല്ലം ജില്ലാ ആശുപത്രിയിലേക്ക് ഇരുവരെയും മാറ്റി.

സ്കൂട്ടർ യാത്രികരായ യുവാക്കളെ വണ്ടിയോടെ മറിച്ചിട്ട് കാട്ടാന; ഗുരുതര പരിക്ക്

കല്പറ്റ: വയനാട്ടില്‍ വീണ്ടും കാട്ടാന ആക്രമണത്തില്‍ ഒരാള്‍ കൊല്ലപ്പെട്ടു. വയനാട് അട്ടമലയിലാണ് സംഭവം. അട്ടമല സ്വദേശിയായ ബാലനാണ്(27) കാട്ടാന ആക്രമണത്തില്‍ ജീവന്‍ നഷ്ടമായത്. കഴിഞ്ഞദിവസം നൂല്‍പ്പുഴയിലും കാട്ടാന ആക്രമണത്തില്‍ ഒരാള്‍ കൊല്ലപ്പെട്ടിരുന്നു. ഒരാഴ്ചയ്ക്കിടെ കേരളത്തിൽ കാട്ടാനയാക്രമണത്തിൽ നാലുപേരാണ് കൊല്ലപ്പെട്ടത്.
മുണ്ടക്കൈ ചൂരല്‍മല ഉരുള്‍പ്പൊട്ടല്‍ ബാധിത മേഖലയോട് ചേര്‍ന്ന പ്രദേശമാണ് അട്ടമല. ബെയിലി പാലം കടന്ന് എത്തിച്ചേരുന്ന ഈ പ്രദേശത്ത് വളരെക്കുറച്ച് ആളുകള്‍ മാത്രമാണ് താമസിക്കുന്നത്. ഉരുള്‍പ്പൊട്ടലിന് ശേഷം ഇവിടെ കാട്ടാനശല്യം രൂക്ഷമാണെന്ന് അറിയിച്ചിട്ടും വേണ്ട നടപടികള്‍ സ്വീകരിച്ചില്ലെന്നാണ് നാട്ടുകാരുടെ ആരോപണം.

വയനാട്ടിൽ കാട്ടാന ആക്രമണത്തില്‍ ഒരാൾക്കൂടി കൊല്ലപ്പെട്ടു

നീലഗിരി: നീലഗിരിയില്‍ കാട്ടാന ആക്രമണത്തില്‍ യുവാവ് കൊല്ലപ്പെട്ടു.ഗൂഡല്ലൂര്‍ താലൂക്കിലെ ദേവര്‍ഷോല സ്വദേശി ജംഷീദ് (37) ആണ് കൊല്ലപ്പെട്ടത്. മൃതദേഹം ഗൂഡല്ലൂര്‍ സര്‍ക്കാര്‍ ആശുപത്രിയിലേക്ക് മാറ്റി.ഇന്നലെ അര്‍ധരാത്രിയിലാണ് ജംഷീദിനുനേരെ കാട്ടാനയാക്രമണമുണ്ടായത്.
നീലഗിരി ജില്ലയിലെ ഗൂഡല്ലൂര്‍, പന്തല്ലൂര്‍ മേഖലയിലെല്ലാം കാട്ടാന ശല്യം അതിരൂക്ഷമാണ്. കഴിഞ്ഞദിവസം അര്‍ധരാത്രി ദേവര്‍ഷോലയില്‍വെച്ചാണ് ജംഷീദിനുനേരെ കാട്ടാനയുടെ ആക്രമണമുണ്ടായത്. വനമേഖലയും തോട്ടം മേഖലയും ഇടകലര്‍ന്ന് സ്ഥിതിചെയ്യുന്ന പ്രദേശം തമിഴ്‌നാട് ഭൂപരിധിയിലാണെങ്കിലും നിരവധി മലയാളികള്‍ താമസിക്കുന്ന ഇടമാണ്.&nbsp;

ഗൂഡല്ലൂരില്‍ കാട്ടാനയാക്രമണത്തില്‍ യുവാവ് കൊല്ലപ്പെട്ടു

ഇടുക്കി: ഇടുക്കിയിൽ കാട്ടാന ആക്രമണത്തിൽ 22കാരന് ദാരുണാന്ത്യം. മുള്ളരിങ്ങാട് സ്വദേശി അമർ ഇലാഹിയാണ് മരിച്ചത്. പശുവിനെ അഴിക്കാൻ പോയപ്പോഴാണ് ആക്രമണം ഉണ്ടായത്. മുള്ളരിങ്ങാട് അമേൽ തൊട്ടിയിൽ വച്ചാണ് ആക്രമണം നടന്നത്.
തേക്കിൻ കൂപ്പിൽ പശുവിനെ അഴിക്കാൻ പോയതായിരുന്നു യുവാവ്. ഇയാൾക്കൊപ്പം കൂടെയുണ്ടായിരുന്നയാൾ ഓടിരക്ഷപ്പെട്ടു. ആക്രമണത്തിൽ ഗുരുതരമായി പരിക്കേറ്റ അമർ ഇലാഹിയെ ആശുപത്രിയിലെത്തിച്ചെങ്കിലും മണിക്കൂറുകൾക്കകം മരണത്തിന് കീഴടങ്ങുകയായിരുന്നു. മൃതദേഹം തൊടുപുഴ താലൂക്ക് ആശുപത്രിയിലേക്ക് മാറ്റി. പ്രദേശത്ത് ആനകളുടെ ശല്യം പതിവാണെന്ന് നാട്ടുകാർ പറയുന്നു. ആദ്യമായാണ് പ്രദേശത്ത് ഒരാൾ കൊല്ലപ്പെടുന്നത്.&nbsp;

കാട്ടാന ആക്രമണത്തിൽ യുവാവിന് ദാരുണാന്ത്യം

ഷാര്‍ജയിലെ താമസസ്ഥലത്ത് മരിച്ച നിലയില്‍ കണ്ടെത്തിയ കൊല്ലം സ്വദേശി വിപഞ്ചികയുടെ ഭര്‍ത്താവ് കടുത്ത വൈകൃതങ്ങള്‍ക്ക് അടിമ. നിധീഷ് സ്ത്രീകളുടെ അടിവസ്ത്രം ധരിച്ചിരിക്കുന്ന ചിത്രങ്ങള്‍ സഹിതം ഇപ്പോള്‍ സമൂഹമാദ്ധ്യമങ്ങളില്‍ പ്രചരിക്കുന്നുണ്ട്. വിപഞ്ചിക സോഷ്യല്‍ മീഡിയയില്‍ പങ്കുവച്ചതിന് ശേഷം ഡിലീറ്റ് ചെയ്തത് എന്നതരത്തിലാണ് ചിത്രങ്ങള്‍ പ്രചരിക്കുന്നത്. ഇയാള്‍ കിടപ്പറയില്‍ ഉള്‍പ്പെടെ ക്രൂരത കാണിച്ചിരുന്നതായി മുമ്പ് വിപഞ്ചിക തന്റെ ഡയറിക്കുറിപ്പില്‍ ആരോപിച്ചിരുന്നു.
കടുത്ത ശാരീരിക മാനസിക പീഡനങ്ങളാണ് വിപഞ്ചികയ്ക്ക് ഭര്‍ത്താവ് നിധീഷ് ,അയാളുടെ മാതാപിതാക്കള്‍, സഹോദരി എന്നിവരില്‍ നിന്ന് നേരിടേണ്ടി വന്നത്. ഭാര്യയായ താന്‍ ഉള്ളപ്പോള്‍ പോലും മറ്റൊരു സ്ത്രീയുമായി ബന്ധം പുലര്‍ത്തിയിരുന്നുവെന്നും അവരുടെ ഭര്‍ത്താവ് ഫോണില്‍ വിളിച്ച് പ്രശ്‌നങ്ങളുണ്ടാക്കിയെന്നും നേരത്തെ വിപഞ്ചിക ആരോപിച്ചിരുന്നു. സ്വന്തം കുഞ്ഞിനെയും ഭാര്യയേയും സ്‌നേഹിക്കാന്‍ തയ്യാറാകാതിരുന്ന നിധീഷ് കുട്ടിയുടെ ചോറൂണ് ചടങ്ങിന് പോലും പങ്കെടുത്തിരുന്നില്ല.കുട്ടിക്ക് വേണ്ടി എന്തെങ്കിലും ചെയ്തിട്ടുണ്ടോയന്ന് ചോദിച്ചാല്‍ ഫ്‌ളാറ്റ് വാങ്ങിയല്ലോയെന്നാണ് ഇയാള്‍ മറുപടിയെന്ന് വിപഞ്ചിക വീട്ടുകാര്‍ക്ക് അയച്ച ഒരു ഓഡിയോ സന്ദേശത്തില്‍ പറയുന്നു. ഒന്നര വയസ്സ് മാത്രം പ്രായമുള്ള കുട്ടിക്ക് ഫ്‌ളാറ്റാണോ ആവശ്യം എന്ന് ചോദിച്ചിട്ടുണ്ടെന്നും വിപഞ്ചിക പറയുന്നു. ഭര്‍ത്താവ് നിതീഷ് വൈകൃതമുള്ള മനുഷ്യനാണ്. കാണാന്‍ പാടില്ലാത്ത പല വിഡിയോകളും കണ്ട ശേഷം അത് ബെഡ് റൂമില്‍ വേണമെന്ന് ആവശ്യപ്പെടും. തനിക്ക് ആവശ്യമുള്ള ഒരു സാധനങ്ങളും വാങ്ങിത്തരില്ല, തന്നെ പുറത്തു കൊണ്ട് പോകില്ല എന്നും വിപഞ്ചിക ആരോപണം ഉന്നയിച്ചിരുന്നു.

വിപഞ്ചികയുടെ മരണം;ഭര്‍ത്താവ് കടുത്ത വൈകൃതങ്ങള്‍ക്ക് അടിമ,മറ്റൊരു സ്ത്രീയുമായും  ബന്ധം പുലര്‍ത്തി

മണിയൂർ :മണിയൂർ സ്വദേശിയായ യുവാവിനെ കാണാതായതായി പരാതി. എളമ്പിലാട് ചാലിപ്പറമ്പത്ത് വീട്ടിൽ പ്രകാശന്റെ മകൻ ശ്യാം പ്രസാദിനെയാണ് കാണാതായത്. അമ്മയുടെ വീടായ തിരുവള്ളൂരിൽ നിന്നും രാവിലെ ജോലിക്കു പോയതാണ്. എന്തെങ്കിലും വിവരം കിട്ടുന്നവർ താഴെ കാണുന്ന നമ്പറിൽ ബന്ധപ്പെടുക. കുഞ്ഞിരാമൻ :9747409246, പ്രകാശൻ : 8086662343

മണിയൂർ സ്വദേശിയായ യുവാവിനെ കാണാതായതായി പരാതി

Vadakara

ധർമ്മടം: ബാലസംഘം സമ്മേളനത്തിൽ പങ്കെടുത്ത് കൊലക്കേസ് പ്രതി. ബാലസംഘം ധർമ്മടം നോർത്ത് വില്ലേജ് സമ്മേളനത്തിലാണ് സിപിഎം പ്രവർത്തകനായ ശ്രീജിത്ത് എത്തിയത്.
തലശ്ശേരിയിലെ ബിജെപി പ്രവർത്തകൻ നിഖിലിനെ കൊലപ്പെടുത്തിയ കേസിൽ ജീവപര്യന്തം ശിക്ഷിക്കപ്പെട്ടയാളാണ് ടെൻഷൻ ശ്രീജിത്ത് എന്ന തെക്കേ കണ്ണോളി വീട്ടിൽ ശ്രീജിത്ത്. ബിജെപി പ്രവർത്തകനായിരുന്ന നിഖിലിനെ 2008-ൽ വെട്ടിക്കൊലപ്പെടുത്തിയ കേസിലെ ഒന്നാം പ്രതിയാണ് ശ്രീജിത്ത്.
2008 മാർച്ച് അഞ്ചിനാണ് വടക്കുമ്പാട്ട് വച്ച് നിഖിലിനെ സിപിഎം പ്രവർത്തകർ വെട്ടിക്കൊലപ്പെടുത്തിയത്. മുൻപ് ശ്രീജിത്തിന്റെ വീടിന്റെ പാലുകാച്ചിന് പി.ജയരാജൻ, എം.വി ജയരാജൻ തുടങ്ങിയ സിപിഎം നോതാക്കളെത്തിയത് വിവാദമായിരുന്നു.

ധർമ്മടത്ത് ബാലസംഘം സമ്മേളനത്തിൽ കൊലക്കേസ് പ്രതി; വിവാദം

വടകര: നഗരസഭാ പരിധിയില്‍ മേപ്പയിലെ വീട്ടില്‍ പട്ടാപ്പകല്‍ മോഷണം. മേപ്പയില്‍ ശ്രീനാരായണ മന്ദിരം റോഡിലെ ഐപിഎം വോളി അക്കാദമിക്ക് സമീപത്തെ പ്രേംരാജിന്റെ ഭാസുരം വീട്ടിലാണ് കവര്‍ച്ച. വാതില്‍ കുത്തിപ്പൊളിച്ച് അകത്തു കടന്ന മോഷ്ടാക്കള്‍ അലമാര തകര്‍ത്ത് അതിലെ 5,000 രൂപ കൈക്കലാക്കി.&nbsp;
അലമാരയിലുള്ള സാധനങ്ങള്‍ വാരി വലിച്ചിട്ട നിലയിലായിരുന്നു. സ്വര്‍ണാഭരണം അടങ്ങിയ പഴ്‌സ് വസ്ത്രങ്ങള്‍ക്കൊപ്പം നിലത്തു വീണത് മോഷ്ടാക്കള്‍ കണ്ടില്ല. ടിവിയ്ക്ക് മുകളില്‍ കുറിക്ക് നല്‍കാനായി സൂക്ഷിച്ച 3,000 രൂപയും ശ്രദ്ധയില്‍പ്പെട്ടില്ല. പ്രേംരാജിന്റെ ഭാര്യയും ഭാര്യയുടെ അമ്മയും പുറത്തു പോയിരുന്നു. ഉച്ചയ്ക്ക് 2.45 ഓടെ തിരിച്ച് എത്തിയപ്പോഴാണ് മോഷണം നടന്നതറിയുന്നത്.
ഗേറ്റിന്റെ പൂട്ടും തകര്‍ത്ത നിലയിലായിരുന്നു. ഹൈഡ്രോളിക് കട്ടര്‍ ഉപയോഗിച്ച് ആണ് ഗേറ്റിന്റെയും വാതിലിന്റെയുംപൂട്ടുകള്‍ തകര്‍ത്തത്. ഒന്നില്‍ കൂടുതല്‍ പേര്‍ ഉള്ളതായി സംശയിക്കുന്നു. വീട് മുഴുവന്‍ വാരി വലിച്ചിട്ട നിലയിലായിരുന്നു. വിവരം അറിയിച്ചതിനെ തുടര്‍ന്ന് പോലീസ് സ്ഥലത്ത് പരിശോധന നടത്തി.&nbsp;

മേപ്പയില്‍ പട്ടാപ്പകല്‍ വീട് കുത്തിത്തുറന്ന് പണം കവര്‍ന്നു

കൊച്ചി: എംഡിഎംഎയുമായി യൂട്യൂബറും ആൺസുഹൃത്തും പിടിയിൽ. റിൻസി, യാസിർ അറാഫത്ത് എന്നിവരെയാണ് പോലീസ് പിടികൂടിയത്. ഇവരിൽനിന്ന് 22.55 ​ഗ്രാം എംഎഡിഎംഎയാണ് പിടിച്ചെടുത്തത്.
കാക്കനാട്ടെ പാലച്ചുവട്ടിലെ ഫ്ളാറ്റിൽനിന്നാണ് ഇരുവരും പിടിയിലായത്. റിൻസിയും യാസിറും കോഴിക്കോട് സ്വദേശികളാണ്. കസ്റ്റഡിയിലെടുത്ത ഇരുവരേയും വൈദ്യപരിശോധനയ്ക്ക് വിധേയരാക്കി. ഇവർക്ക് എവിടെനിന്നാണ് എംഡിഎംഎ ലഭിച്ചതെന്ന അന്വേഷണം പോലീസ് ആരംഭിച്ചിട്ടുണ്ട്. നാട്ടിൽത്തന്നെയുള്ള ഒരാളിൽനിന്നാണ് രാസലഹരി വാങ്ങിയതെന്നാണ് ഇരുവരും പോലീസിന് നൽകിയിരിക്കുന്ന മൊഴി. ഇരുവരും ഫ്ളാറ്റ് വാടകയ്ക്കെടുത്ത് താമസിച്ച് വരികയാണ്.

എംഡിഎംഎയുമായി യൂട്യൂബറും ആൺസുഹൃത്തും പിടിയിൽ

താനൂര്‍ (മലപ്പുറം): ട്രാന്‍സ് യുവതിയെ സുഹൃത്തിന്റെ താമസസ്ഥലത്ത് മരിച്ചനിലയില്‍ കണ്ടെത്തി. വടകര സ്വദേശിയായ കമീലയെയാണ് സുഹൃത്തായ യുവാവ് താമസിച്ചിരുന്ന വീടിന് മുന്നില്‍ തൂങ്ങിമരിച്ച നിലയില്‍ കണ്ടെത്തിയത്. ബുധനാഴ്ച പുലര്‍ച്ചെ നാലരയോടെയായിരുന്നു സംഭവം.
തിരൂര്‍ പയ്യനങ്ങാടിയിലാണ് കമീല താമസിച്ചിരുന്നത്. ഇവരുടെ സുഹൃത്ത് വൈലത്തൂര്‍ സ്വദേശിയാണ്. എന്നാല്‍, ഒഴൂര്‍ കരിങ്കപ്പാറയിലുള്ള സഹോദരന്റെ വീട്ടിലാണ് ഇയാള്‍ താമസിച്ചിരുന്നത്. ഈ വീടിന് മുന്നിൽ വാഹനം നിര്‍ത്തിയിടാനായി നിര്‍മിച്ച താത്കാലിക ഷെഡ്ഡിനുള്ളിലാണ് കമീലയെ തൂങ്ങിമരിച്ച നിലയില്‍ കണ്ടെത്തിയത്.ജീവനൊടുക്കുന്നതിന് മുന്‍പ് ആത്മഹത്യചെയ്യാന്‍ പോവുകയാണെന്ന് പറഞ്ഞ് കമീല ഇന്‍സ്റ്റഗ്രാം വീഡിയോയും പങ്കുവെച്ചിരുന്നു. തന്റെ മരണത്തിന് ഉത്തരവാദി സുഹൃത്താണെന്നും ഇയാളുടെ വീടിനടുത്ത് പോയി മരിക്കാന്‍ പോവുകയാണെന്നുമാണ് കമീല വീഡിയോയില്‍ പറഞ്ഞിരുന്നത്.&nbsp;

മരിക്കാൻ പോവുകയാണെന്ന് വീഡിയോ; വടകര സ്വദേശിയായ ട്രാൻസ് യുവതി സുഹൃത്തിൻ്റെ താമസസ്ഥലത്ത് ജീവനൊടുക്കി

കൊണ്ടോട്ടി: വിമാനത്താവളം കേന്ദ്രീകരിച്ച് വിൽപ്പനയ്ക്കെത്തിച്ച മൂന്നുകിലോ കഞ്ചാവുമായി രണ്ട് അതിഥിത്തൊഴിലാളികൾ പിടിയിലായ കേസിൽ ഒരാൾകൂടി അറസ്റ്റിലായി. കോഴിക്കോട് പെരുവയൽ കായലം കണ്ണാച്ചോത്തുവീട്ടിൽ അഫ്‌ലാഹ് (29) ആണ് പിടിയിലായത്.
ഒഡിഷ നഗർബാനാപുർ സ്വദേശികളായ അജിത്ത് ജാനി (30), ബിഗ്‌നേഷ് ഹയാൽ (32) എന്നിവരെ രണ്ടുമാസം മുൻപ് കൊളത്തൂർ ജങ്ഷനിൽനിന്ന് ഡാൻസാഫ് സംഘം പിടികൂടിയ കേസിലാണ് ഇയാൾ അറസ്റ്റിലായത്.
പാലക്കാട് കഞ്ചിക്കോട്ടുനിന്നാണ് അഫ്‌ലാഹിനെ പിടികൂടിയത്. 2019-ൽ രണ്ടുകിലോ കഞ്ചാവുമായി മാവൂർ പോലീസ് ഇയാളെ പിടികൂടിയിരുന്നു.ഈ കേസിൽ ജാമ്യത്തിലിറങ്ങിയ ഇയാൾ വീണ്ടും ലഹരിവിൽപ്പനയിൽ സജീവമാകുകയായിരുന്നു.ഡിവൈഎസ്‌പി സന്തോഷ്, ഇൻസ്‌പെക്ടർ പി.എം. ഷമീർ എന്നിവരുടെ നേതൃത്വത്തിൽ ഡാൻസാഫ് സംഘവും കൊണ്ടോട്ടി പോലീസും ചേർന്നാണ് പിടികൂടിയത്.

കഞ്ചാവുമായി പിടിയിലായി; ജാമ്യത്തിലിറങ്ങി വീണ്ടും വില്‍പ്പന, അറസ്റ്റില്‍

മലപ്പുറം: കളിക്കുന്നതിനിടെ തലയില്‍ അലുമിനിയം പാത്രം കുടുങ്ങിയ രണ്ടരവയസുകാരന് രക്ഷകരായി അഗ്നിരക്ഷാസേന.വാഴക്കാട് ചെറുവായൂര്‍ ചോലയില്‍ ജിജിലാലിന്റെയും അതുല്യയുടെയും മകന്‍ അന്‍വിക്ക് ലാലിന്റെ തലയിലാണ് കളിക്കുന്നതിനിടെ അലുമിനിയംപാത്രം കുടുങ്ങിയത്.ചൊവ്വാഴ്ച വൈകുന്നേരം ആറുമണിയോടെയായിരുന്നു സംഭവം.
സംഭവം നടക്കുന്നതിന് തൊട്ടുമുമ്പുവരെ കുട്ടിയുടെ മുത്തശ്ശന്‍ കുട്ടിയോടൊപ്പം ഉണ്ടായിരുന്നു. അദ്ദേഹം കുട്ടിക്ക് കളിപ്പാട്ടം എടുക്കുന്നതിനായി അകത്തേക്ക് പോയി തിരിച്ചുവരുന്നതിനിടയിലാണ് കുട്ടി അവിടെ ഉണ്ടായിരുന്ന അലൂമിനിയം പാത്രം തലയിലിട്ടത്.കുട്ടിയുടെ തല പാത്രത്തില്‍നിന്നും പുറത്തെടുക്കാന്‍ വീട്ടുകാര്‍ പരമാവധി ശ്രമിച്ചെങ്കിലും നടന്നില്ല.തുടര്‍ന്ന് മുക്കം അഗ്നിരക്ഷാസേനയുടെ ഓഫീസിലേക്ക് കുട്ടിയുമായി നേരിട്ട് എത്തുകയായിരുന്നു. ഇരുപതുമിനിറ്റോളം സമയമെടുത്ത് അതീവശ്രദ്ധയോടെയാണ് ഉദ്യോഗസ്ഥര്‍ കുട്ടിയുടെ തലയില്‍നിന്നും പാത്രം വേര്‍പെടുത്തി എടുത്തത്.

രണ്ടരവയസുകാരന്റെ തലയില്‍ അലുമിനിയം പാത്രം കുടുങ്ങി;രക്ഷകരായി അഗ്നിരക്ഷാ സേന

തിരുവനന്തപുരം: ഡിജിറ്റൽ ലോകത്ത്, ആർട്ടിഫിഷ്യൽ ഇന്റലിജൻസ് ഉപയോഗിച്ച് അനേകം ആനിമേഷൻ കഥാപാത്രങ്ങളും വീഡിയോകളും ഉണ്ടാക്കാറുണ്ട്. കുട്ടികൾ വിനോദത്തിനും പഠനത്തിനും ഇവ ഉപയോഗിക്കുന്നു. എന്നാൽ ഇപ്പോൾ സമൂഹ മാധ്യമങ്ങളിൽ വയറലായ ഓറഞ്ച് പൂച്ചയുടെ വീഡിയോ അങ്ങനെയല്ല. ക്രൂരതയും അക്രമ സ്വഭാവവുമാണ് ഓറഞ്ച് പൂച്ചയുടെ മുഖമുദ്രയെന്നും സൂക്ഷിക്കണമെന്നും പൊലീസ് സോഷ്യൽ മീഡിയയിലുടെ വ്യക്തമാക്കി.
ക്ലാസിലെ ഒരു കുട്ടി ദിവസവും മറ്റുള്ളവരെ പേനയ്ക്ക് കുത്തുന്നത് ശ്രദ്ധയിൽ പെട്ടു. മറ്റുള്ളവർ കരയും വരെ അത് തുടരും. വഴക്കുപറഞ്ഞാലും കൂസലില്ല. രക്ഷിതാക്കളെ വിളിച്ച് അന്വേഷിച്ചപ്പോഴാണ് കുട്ടി നിരന്തരം ഇത്തരം വീഡിയോകൾ കാണാറുണ്ടെന്ന് അറിഞ്ഞത്.ഇത്തരം വിഡിയോകൾ ചെറുപ്പത്തിൽ തന്നെ അനുകരണചിന്ത വളർത്തുവാനും മറ്റുള്ളവരെ അക്രമിക്കുവാനും ക്രൂരമായ പ്രതികരണങ്ങളിലേക്കും മറ്റുള്ളവരുടെ വേദനയിൽ സന്തോഷിക്കുന്ന നാർസിസിസ്റ്റിക്ക് സ്വഭാവമുള്ളവരായും മാറ്റും.കുട്ടികൾ എന്ത് കാണുന്നു എന്ന് മാതാപിതാക്കൾ ശ്രദ്ധിക്കുകയും ആപ്പുകളിൽ പാരന്റൽ കൺട്രോൺ ഫീച്ചറിടുകയും കുട്ടികളിലെ പെരുമാറ്റത്തിലെ ചെറിയ മാറ്റങ്ങൾ പോലും രക്ഷിതാക്കൾ അദ്ധ്യാപകരെ അറിയിക്കുകയും വേണമെന്നും കുറിപ്പിൽ പറയുന്നു.​

പോസ്റ്റിന്റെ പൂർണരൂപം
ഇന്നത്തെ ഡിജിറ്റൽ ലോകത്ത്, ആർട്ടിഫിഷ്യൽ ഇന്റലിജൻസ് ഉപയോഗിച്ച് അനേകം ആനിമേഷൻ കഥാപാത്രങ്ങളും വീഡിയോകളും ഉണ്ടാക്കുന്നു. കുട്ടികൾ വിനോദത്തിനും പഠനത്തിനും ഇവ ഉപയോഗിക്കുന്നു.
എന്നാൽ ഇപ്പോൾ സമൂഹ മാധ്യമങ്ങളിൽ വയറലായ ഓറഞ്ച് പൂച്ചയുടെ വീഡിയോ അങ്ങനെയല്ല. ക്രൂരതയും അക്രമ സ്വഭാവവുമാണ് ഓറഞ്ച് പൂച്ചയുടെ മുഖമുദ്ര.
സഹജീവികളെ ചതിച്ച് കെണിയിലാക്കി മാരകമായി ആക്രമിച്ചു കൊന്നു തിന്നുന്നതും ഉറ്റസുഹൃത്തുക്കളെ ഭക്ഷണത്തിന് വീട്ടിലേക്ക് ക്ഷണിച്ച് മദ്യം നൽകി മയക്കി കൊല്ലുന്നതാണ് ഒട്ടുമിക്ക വീഡിയോകളുടെയും ഉള്ളടക്കം. ഇവ സമൂഹ മാധ്യമങ്ങളിൽ ട്രെൻഡിങ്ങുമാണ്.ക്ലാസിലെ ഒരു കുട്ടി ദിവസവും മറ്റുള്ളവരെ പേനയ്ക്ക് കുത്തുന്നത് ശ്രദ്ധയിൽ പെട്ടു. മറ്റുള്ളവർ കരയും വരെ അത് തുടരും. വഴക്കുപറഞ്ഞാലും കൂസലില്ല. രക്ഷിതാക്കളെ വിളിച്ച് അന്വേഷിച്ചപ്പോഴാണ് കുട്ടി നിരന്തരം ഇത്തരം വീഡിയോകൾ കാണാറുണ്ടെന്ന് അറിഞ്ഞത്.
ഇത്തരം വിഡിയോകൾ ചെറുപ്പത്തിൽ തന്നെ അനുകരണചിന്ത വളർത്തുവാനും മറ്റുള്ളവരെ അക്രമിക്കുവാനും ക്രൂരമായ പ്രതികരണങ്ങളിലേക്കും മറ്റുള്ളവരുടെ വേദനയിൽ സന്തോഷിക്കുന്ന നാർസിസിസ്റ്റിക്ക് സ്വഭാവമുള്ളവരായും മാറ്റും.
കുട്ടികൾ എന്ത് കാണുന്നു എന്ന് മാതാപിതാക്കൾ ശ്രദ്ധിക്കുകയും ആപ്പുകളിൽ പാരന്റ്ൽ കൺട്രോൺ ഫീച്ചറിടുകയും കുട്ടികളിലെ പെരുമാറ്റത്തിലെ ചെറിയ മാറ്റങ്ങൾ പോലും രക്ഷിതാക്കൾ അദ്ധ്യാപകരെ അറിയിക്കുകയും വേണം.

ഇൻസ്റ്റഗ്രാമിൽ വൈറലാവുന്ന ഓറഞ്ച് പൂച്ചയെ സൂക്ഷിക്കണം; മുന്നറിയിപ്പുമായി പൊലീസ്

Search Results for: gold rate