WED 27 NOV, 2024, 2:06 PM IST
വടകര: വ്യാജ കാഫിര്‍ സ്‌ക്രീന്‍ ഷോട്ട് കേസില്‍ പോലീസ് റിപ്പോര്‍ട്ട് സമര്‍പ്പിച്ചു. വടകര ജുഡീഷ്യല്‍ ഫസ്റ്റ് ക്‌ളാസ് മജിസ്ട്രേറ്റ് കോടതിയിലാണ് വടകര പോലീസ് റിപ്പോര്‍ട്ട് സമര്‍പ്പിച്ചത്. കേസില്‍ അന്വേഷണം പുരോഗമിക്കുകയാണെന്ന് പോലീസ് കോടതിയെ അറിയിച്ചു.
കേസുമായി ബന്ധപ്പെട്ട് 24 പേരില്‍ നിന്നും മൊഴിയെടുത്തെന്നും ഫോണുകള്‍ പരിശോധിച്ചതിന്റെ ഫോറന്‍സിക്‌ റിപ്പോര്‍ട്ട് ഇതുവരെ ലഭ്യമായിട്ടില്ലെന്നും മെറ്റയില്‍നിന്നാണ് ഇതു സംബന്ധിച്ച് റിപ്പോര്‍ട്ട് ലഭിക്കേണ്ടതെന്നും പോലീസ് സമര്‍പ്പിച്ച റിപ്പോര്‍ട്ടിലുണ്ട്. കേസ് ഈ മാസം 29-ന് വീണ്ടും പരിഗണിക്കും.
കാഫിര്‍ സ്‌ക്രീന്‍ഷോട്ട് കേസില്‍ അന്വേഷണം കാര്യക്ഷമമല്ലെന്ന് കാണിച്ച് എം.എസ്.എഫ്. നേതാവ് മുഹമ്മദ് കാസിം, വടകര മജിസ്ട്രേറ്റ് കോടതിയെ സമീപിച്ചിരുന്നു. ഈ ഹര്‍ജി പരിഗണിച്ചാണ് കോടതി അന്വേഷണ റിപ്പോര്‍ട്ടും അന്വേഷണ പുരോഗതിയും സമര്‍പ്പിക്കാന്‍ ഉത്തരവിട്ടത്.
