കൊയിലാണ്ടി: കൊയിലാണ്ടിയിൽ 10 വയസ്സുകാരിയോട് ലൈംഗികാതിക്രമം കാട്ടിയ കേസിൽ ചിത്രകലാധ്യാപകൻ അറസ്റ്റിൽ.കൊല്ലം സ്വദേശി രവീന്ദ്രനെയാണ് പൊലീസ് അറസ്റ്റ് ചെയ്തത്.

കൊയിലാണ്ടിയിൽ ഇയാൾ നടത്തുന്ന ചിത്രകലാ ഇൻസ്റ്റിറ്റ്യൂട്ടിൽ പഠിക്കാനെത്തിയ കുട്ടിയോട് മോശമായി പെരുമാറിയെന്നാണ് പരാതി. സംഭവത്തിന് പിന്നാലെ കുട്ടിയുടെ കുടുംബം പൊലീസിൽ പരാതി നൽകുകയായിരുന്നു.

കേസ് രജിസ്റ്റർ ചെയ്തതിന് പിന്നാലെ രവീന്ദ്രനെ അറസ്റ്റ് ചെയ്യാൻ പൊലീസ് വീട്ടിലെത്തി. ഇതിനിടെ ഇയാൾ വീടിന് പുറകിലൂടെ ഓടി രക്ഷപ്പെടാൻ ശ്രമിച്ചെങ്കിലും പൊലീസ് പിന്തുടർന്ന് പിടികൂടുകയായിരുന്നു.രവീന്ദ്രന്റെ വൈദ്യപരിശോധന കൊയിലാണ്ടി താലൂക്ക് ആശുപത്രിയിൽ പൂർത്തിയാക്കി. ഇന്ന് രാത്രി മജിസ്ട്രേറ്റിന് മുന്നിൽ ഹാജരാക്കുമെന്ന് പൊലീസ് അറിയിച്ചു.