പാനൂർ: ഓൺലൈൻ സർവിസ് സെന്ററിൽ എത്തിയ 19കാരി കുഴഞ്ഞുവീണുമരിച്ചു. ചമ്പാട് അരയാക്കൂലിലെ നെല്ലിയുള്ളതിൽ തൈപ്പറമ്പത്ത് റഫീഖ് - ഷെമീന ദമ്പതികളുടെ മകൾ ഫാത്തിമ റെന (19)യാണ് മരിച്ചത്.
ഇന്നലെ രാവിലെ പൂക്കോത്തെ ഗ്ലോബൽ ടെക്ക് സെൻററിൽ എത്തിയതായിരുന്നു. ഇവിടെ വെച്ച് കുഴഞ്ഞുവീണ ഉടൻ പാനൂർ ന്യൂക്ലിയസ് ആശുപത്രിയിലും തലശേശരി ഇന്ദിരാഗാന്ധി ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.സന ഫാത്തിമ ഏക സഹോദരിയാണ്. മയ്യിത്ത് പാനൂർ ജുമാമസ്ജിദ് ഖബർസ്ഥാനിൽ ഖബറടക്കി

പാനൂരിൽ 19കാരി കുഴഞ്ഞുവീണ് മരിച്ചു

Kerala

വടകര : യാത്രക്കിടെ രണ്ടര വയസ്സുകാരനെ ബസില്‍ മറന്നുവെച്ച് അമ്മ. ബസ് യാത്ര അവസാനിപ്പിക്കുമ്പോഴാണ് കുട്ടി ഒറ്റയ്ക്കിരിക്കുന്നത് ജീവനക്കാരുടെ ശ്രദ്ധയിൽ പെട്ടത്. പിന്നാലെ 'മറന്നുവെച്ച' കുഞ്ഞിനെ തേടി അമ്മയെത്തി.
ഓര്‍ക്കാട്ടേരിക്ക് സമീപത്തെ ബസ് സ്റ്റോപ്പില്‍ നിന്നാണ് വടകര-വളയം റൂട്ടില്‍ സര്‍വീസ് നടത്തുന്ന സ്വകാര്യ ബസിൽ രണ്ട് സ്ത്രീകളും ഒരു കുട്ടിയും കയറിയത്. ബസ് വടകരയില്‍ യാത്ര അവസാനിപ്പിച്ചപ്പോഴാണ് ഗിയര്‍ ബോക്‌സിന് മുകളില്‍ കുട്ടി തനിച്ചിരിക്കുന്നത് ഡ്രൈവറുടെ ശ്രദ്ധയില്‍പ്പെട്ടത്. പോലീസില്‍ വിവരം അറിയിക്കാന്‍ തീരുമാനിച്ചെങ്കിലും അപ്പോഴേക്കും അമ്മയെത്തി. കുഞ്ഞ് കൂടെയുണ്ടായിരുന്ന കാര്യം മറന്നുപോയതായിരുന്നുവെന്നായിരുന്നു പരിഭ്രമിച്ചെത്തിയ അമ്മയുടെ മറുപടി.

വടകരയിലേക്കുള്ള യാത്രക്കിടെ രണ്ടര വയസ്സുകാരനെ ബസില്‍ മറന്നുവെച്ച് അമ്മ

Nadapuram

മടപ്പള്ളി: വയോധികനെ കാണ്മാനില്ലെന്ന് പരാതി. നാദാപുരം റോഡ് സ്വദേശി പുളിക്കൂൽ കൃഷ്ണനെയാണ് ഞായറാഴ്ച (11.01.2026) വൈകുന്നേരം മുതൽ കാണാതായത്. കണ്ട് കിട്ടുന്നവർ 9446027412 എന്ന നമ്പറിലോ ചോമ്പാല പോലീസ് സ്റ്റേഷനിലോ ബന്ധപ്പെടുക.

Vadakara

കാണ്മാനില്ല

വടകര: മാഹി ബൈപ്പാസിലുണ്ടായ വാഹനാപകടത്തില്‍ ബൈക്ക് യാത്രികന്‍ മരിച്ചു. മണിയൂര്‍ മുടപ്പിലാവില്‍ മീത്തലെ വന്മേരി വീട്ടില്‍ അഖിലാണ് (31) മരിച്ചത്. മാഹി ബൈപ്പാസില്‍ മാടപ്പീടികക്കു സമീപം വച്ച് അഖില്‍ സഞ്ചരിച്ച ബൈക്ക് ആന്ധ്രയില്‍ നിന്നുള്ള അയപ്പഭക്തരുടെ വാനുമായി കൂട്ടിയിടിക്കുകയായിരുന്നു.&nbsp;
ഭാര്യ: ശ്യാമിലി. മകന്‍: ആര്‍ധിക്. അച്ഛന്‍: പരേതനായ മോഹനന്‍. അമ്മ: രാധ. സഹോദരങ്ങള്‍: ഷിഖില്‍, രമ്യ. തലശ്ശേരി ജനറല്‍ ആശുപത്രിയില്‍ പോസ്റ്റ്‌മോര്‍ട്ടത്തിനു ശേഷം മൃതദേഹം വീട്ടുവളപ്പില്‍ സംസ്‌കരിച്ചു.

വാഹനാപകടത്തില്‍ മണിയൂർ സ്വദേശി ബൈക്ക് യാത്രികന്‍ മരിച്ചു

കോട്ടയം: കാഞ്ഞിരപ്പള്ളി കുളപ്പുറത്ത് വീട്ടമ്മയേയും യുവാവിനെയും വീടിനുള്ളിൽ മരിച്ച നിലയിൽ കണ്ടെത്തി. വീട്ടമ്മയെ കഴുത്തറുത്ത നിലയിലും യുവാവിനെ സ്റ്റെയർകേയ്‌സിൽ തൂങ്ങി മരിച്ച നിലയിലുമാണ് കണ്ടെത്തിയത്. മോർക്കോലിൽ ഷേർലി മാത്യു (45)വിനെയാണ് കഴുത്തറത്ത നിലയിൽ കണ്ടെത്തിയത്. തൂങ്ങി മരിച്ച നിലയിൽ കണ്ടെത്തിയ യുവാവ് കോട്ടയം സ്വദേശിയാണന്ന് സംശയിക്കുന്നു.
വീട്ടമ്മയെ ഫോണിൽ ലഭിക്കാതെ വന്നതോടെ നടത്തിയ അന്വേഷണത്തിലാണ് ഇവരെ കിടപ്പുമുറിയിലെ കട്ടിലിനോട് ചേർന്ന് കഴുത്തറത്ത നിലയിലും, യുവാവിനെ സ്റ്റെയർകേയ്‌സിൽ തൂങ്ങി മരിച്ച നിലയിലും കണ്ടെത്തിയത്.വീട് പോലീസ് സീൽ ചെയ്തിരിക്കുകയാണ്. സയന്റഫിക് വിദഗ്ധർ എത്തിയ ശേഷം വീട് തുറന്ന് പരിശോധന നടത്തും.

കാഞ്ഞിരപ്പള്ളിയിൽ യുവാവും വീട്ടമ്മയും വീടിനുള്ളിൽ മരിച്ച നിലയിൽ

നാദാപുരം : പുറമേരിയിൽ സ്കൂൾ ബസ് കടന്ന് പോകുന്നതിനിടെ ഉണ്ടായ സ്ഫോടനത്തില്‍ പൊട്ടിയത് പടക്കമെന്ന് സ്ഥിരീകരണം. ബോംബ് സ്‌ക്വാഡ് നടത്തിയ പരിശോധനയിലാണ് ഇക്കാര്യം സ്ഥിരീകരിച്ചത്. പുതുവത്സരാഘോഷത്തിനിടെ ഉപേക്ഷിച്ച പടക്കം ബസിന്‍റെ ടയർ കയറിതിനെ തുടർന്ന് പൊട്ടിയതാകാമെന്നും പൊലീസ് പറഞ്ഞു. സംഭവത്തിൽ സ്ഫോടക വസ്തു അശ്രദ്ധമായി കൈകാര്യം ചെയ്തതിന് പൊലീസ് കേസെടുത്തു.ഇന്നലെ രാവിലെ ഒമ്പത് മണിക്കായിരുന്നു സംഭവം.&nbsp;
സ്കൂൾ ബസ് കടന്ന് പോയ ഉടനെ പൊട്ടിത്തെറി ഉണ്ടായി. ഉഗ്രശബ്ദം കേട്ടതിനെത്തുടർന്ന് ഡ്രൈവർ പുറത്തിറങ്ങി പരിശോധിച്ചപ്പോഴാണ് സ്ഫോടക വസ്തുവാണ് പൊട്ടിത്തെറിച്ചതെന്ന് മനസിലായത്. വിദ്യാർത്ഥികളെ സ്കൂളിൽ എത്തിച്ചതിന് ശേഷമാണ് ഡ്രൈവർ സംഭവം പൊലീസിൽ അറിയിച്ചത്.തുടർന്ന് നടത്തിയ പരിശോധനയിലാണ് പൊട്ടിയത് പടക്കമാണെന്ന് കണ്ടെത്തിയത്.

പുറമേരിയിലെ സ്‌ഫോടനം; പൊട്ടിയത് പടക്കമെന്ന് സ്ഥിരീകരണം

വടകര: മൂന്ന് ട്രെയിനുകൾക്ക് വടകരയിൽ സ്റ്റോപ്പ് അനുവദിച്ചു. തിരുവനന്തപുരം–വെരാവൽ എക്സ്പ്രസ് (16334 ), തിരുവനന്തപുരം–ഭാവ്നഗർ എക്സ്പ്രസ് (19259), എറണാകുളം–പൂനെ സൂപ്പർ ഫാസ്റ്റ് എക്സ്പ്രസ് (22149, 22150) എന്നീ ട്രെയിനുകൾക്കാണ് സ്റ്റോപ്പ് അനുവദിച്ചത്. വെരാവൽ, ഭാവ്നഗർ എക്സ്പ്രസുകൾ ഒരു ദിശയിൽ മാത്രമായിരുന്നു നിർത്തിയിരുന്നത്. ഇതോടെ ഇരുഭാഗത്തും സ്റ്റോപ്പ് ലഭിച്ചു. പൂനെ സൂപ്പർ ഫാസ്റ്റിന് ഇരുഭാഗത്തേക്കും സ്റ്റോപ്പ് ഉണ്ട്. ഷാഫി പറമ്പിൽ എംപി റെയിൽവേ മന്ത്രാലയത്തിൽ നടത്തിയ ഇടപെടലുകളെ തുടർന്നാണ് 3 ദീർഘദൂര ട്രെയിനുകൾക്ക് സ്റ്റോപ് അനുവദിച്ചതെന്ന് എംപി ഓഫിസ് അറിയിച്ചു. ഗുജറാത്തിലേക്ക് 4 ട്രെയിനുകളാണ് വടകരയിൽ നിർത്തുന്നത്. ഓഖ, ഗാന്ധിധാം ട്രെയിനുകൾക്ക് നിലവിൽ ഇരുഭാഗത്തേക്കും സ്റ്റോപ്പ് ഉണ്ട്.&nbsp;
എന്നാൽ, വെരാവൽ, ഭാവ് നഗർ ട്രെയിനുകൾ തിരിച്ചുള്ള യാത്രയിൽ മാത്രമേ വടകരയിൽ നിർത്തിയിരുന്നുള്ളൂ. അങ്ങോട്ടേക്കുള്ള ട്രെയിനുകൾക്ക് സ്റ്റോപ് ലഭിച്ചതോടെ യാത്രക്കാർക്ക് വലിയ അനുഗ്രഹമായി. ഈ ട്രെയിനുകളിൽ യാത്ര ചെയ്യാൻ കോഴിക്കോടും കണ്ണൂരും പോയാണ് ടിക്കറ്റ് റിസർവ് ചെയ്തിരുന്നത്. എറണാകുളം പൂനെ സൂപ്പർ ഫാസ്റ്റ് നേരത്തെ വടകരയിൽ നിർത്തിയിരുന്നു.&nbsp;
ഷാഫി പറമ്പിൽ എംപി ഒരു ദിശയിൽ മാത്രം സ്റ്റോപ്പുള്ള ട്രെയിനുകൾക്ക് സ്റ്റോപ് ഇല്ലാത്തതിന്റെ ബുദ്ധിമുട്ട് ചൂണ്ടിക്കാട്ടി റെയിൽവേ മന്ത്രിക്ക് നേരിട്ടും കത്തുകൾ മുഖേനയും പലതവണ നൽകിയ നിവേദനം പരിഗണിച്ചാണ് നടപടി. പൂനെ സൂപ്പർ ഫാസ്റ്റിന് സ്റ്റോപ് അനുവദിച്ചതോടെ വിദ്യാഭ്യാസ ആവശ്യങ്ങൾക്കും തീർഥാടന കേന്ദ്രങ്ങളിലേക്കും യാത്ര ചെയ്യുന്നവർക്ക് വലിയ സൗകര്യമാണ് ലഭിക്കുക.

വടകരയിൽ 3 ട്രെയിനുകൾക്ക് കൂടി സ്റ്റോപ്പ് അനുവദിച്ചു

വടകര: എക്സൈസ് സർക്കിൾ ഓഫീസിലെ എക്സൈസ് ഇൻസ്പെക്ടർ അനുശ്രീ എമ്മും പാർട്ടിയും മടപ്പള്ളിയിൽ ദേശീയ പാതയിൽ സമീപം നടത്തിയ പരിശോധനയിൽ 105 ഗ്രാം കഞ്ചാവുമായി ഇതര സംസ്ഥാന തൊഴിലാളി പിടിയിൽ. ബീഹാർ സ്വദശി അബ്ദുൾ റഹ്മാൻ (27) ആണ് അറസ്റ്റിൽ ആയത്.&nbsp;
പരിശോധനയിൽ അസിസ്റ്റൻറ് എക്സൈസ് ഇൻസ്പെക്ടർ പ്രമോദ് പുളിക്കൂൽ, പ്രിവൻ്റീവ് ഓഫീസർമാരായ ഷൈജു പി പി, ഷിരാജ് കെ, സിവിൽ എക്സൈസ് ഓഫീസർമാരായ മുസ്ബിൻ ഇ.എം , ശ്യാംരാജ്.എ , സിവിൽ എക്സൈസ് ഓഫീസർ ഡ്രൈവർ പ്രജീഷ് ഇ.കെ എന്നിവർ പരിശോധനയിൽ പങ്കെടുത്തു.

മടപ്പള്ളിയിൽ കഞ്ചാവുമായി ഇതര സംസ്ഥാന തൊഴിലാളി പിടിയിൽ

പുറമേരി: പുറമേരിയിൽ സ്‌കൂൾ ബസ് കടന്നുപോകുന്നതിനിടെ റോഡിൽ സ്‌ഫോടകവസ്തു പൊട്ടിത്തെറിച്ചു. പുറമേരി ക്ഷേത്രത്തിന് സമീപത്തെ റോഡിൽ ഇന്ന് രാവിലെ എട്ടേമുക്കാലോടെയാണ് സംഭവം. കുട്ടികളുമായി വന്ന ബസ് സ്‌ഫോടകവസ്തുവിന് മുകളിലൂടെ കയറി ഇറങ്ങിയ ഉടനാണ് പൊട്ടിത്തെറി ഉണ്ടായത്.
സ്‌ഫോടനത്തിന്റെ ആഘാതത്തിൽ ബസിന്റെ ടയറിന് സാരമായ കേടുപാടുകൾ സംഭവിച്ചു. റോഡിൽ വലിയ കുഴി രൂപപ്പെട്ടിട്ടുണ്ട്. വൻ ദുരന്തമാണ് ഒഴിവായത്. സംഭവത്തിന് പിന്നാലെ പൊലീസ് സ്ഥലത്തെത്തി പ്രാഥമിക പരിശോധനകൾ നടത്തി. സ്‌ഫോടനത്തിന്റെ തീവ്രതയും സ്‌ഫോടകവസ്തുവും ഏതാണെന്ന് കണ്ടെത്താൻ ഫോറൻസിക് വിദഗ്‌‌ദ്ധരും ബോംബ് സ്‌ക്വാഡും സ്ഥലത്തെത്തി പരിശോധന നടത്തി.

പുറമേരിയിൽ റോഡിൽ സ്ഫോടനം; സ്കൂൾ ബസിന്റെ ടയർ കയറി ഇറങ്ങിയ ഉടൻ പൊട്ടിത്തെറിച്ചു