മാഹി: പള്ളുർ പോലീസ് പരിധിയിലെ ഈസ്റ്റ് പള്ളുരിൽ പൂട്ടിയിട്ട വീട് കുത്തിത്തുറന്ന് കവർച്ച നടത്തിയ കേസിലെ പ്രതി പിടിയിൽ. പത്തനംതിട്ട തിരുവല്ല സ്വദേശി നസീം എന്ന റോയി (55) യാണ് അറസ്റ്റിലായത്. പള്ളുർ എസ്.ഐ. റെനിൽ കുമാർ, ഗ്രെയിഡ് എസ്-ഐ- രാജേഷ് കുമാർ എന്നിവരടങ്ങുന്ന സംഘമാണ് അറസ്റ്റ് ചെയ്തത്. കഴിഞ്ഞ 13 ന് രാത്രി ഈസ്റ്റ്‌ പള്ളൂർ ആർ എസ് എസ് കാര്യാലയത്തിന് സമീപം വൈഷ്ണവിൻ്റെ വീട് കുത്തിത്തുറന്നാണ് കവർച്ച നടത്തിയത്ത്. പണവും ,സ്വർണവും നഷ്ടപ്പെട്ടെന്ന വൈഷ്ണവിൻ്റെ പരാതിയിൽ കേസെടുത്ത് പള്ളൂർ പോലീസ് അന്വേഷണം നടത്തി വരികയായിരുന്നു.

സമീപത്തെ സി സി ടി വി ദൃശ്യങ്ങൾ നിരീക്ഷിച്ചും സൈബർ സെല്ലിൻ്റേയും സഹായത്തോടെയാണ് പ്രതിയെ പിടികൂടിയത്. മോഷണം നടന്ന ശേഷം പ്രതി വീട്ടിനകത്ത് മുളക് പൊടി വിതറിയതായും പോലീസ് പറഞ്ഞു. വൈഷ്ണവ് കുടുംബത്തോടൊപ്പം വീട് പൂട്ടി ബന്ധുവിൻ്റെ കല്യാണത്തിന് പോയതായിരുന്നു. മാഹി കോടതി പ്രതിയെ രണ്ടാഴ്ച്ചത്തേക്ക് റിമാൻഡ് ചെയ്തു. നിരവധി മോഷണ കേസുകളിലെ പ്രതിയാണ് നസീം എന്ന് പോലീസ് പറഞ്ഞു.