വടകര: മാഹിയിൽ വച്ചുണ്ടായ ബൈക്ക് അപകടത്തിൽ കല്ലേരി സ്വദേശിയായ യുവാവ് മരിച്ചു. വലിയ മലയിൽ ശ്രീഷിൻ (23) ആണ് മരിച്ചത്. തിങ്കൾ വൈകിട്ട് അഞ്ചോടെ മാഹി ടൗണിലെ പെട്രോൾ പമ്പിന് സമീപത്തായിരുന്നു അപകടം. ഉടൻ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഡിവൈഎഫ്ഐ കല്ലേരി വെസ്റ്റ് യൂണിറ്റ് കമ്മിറ്റി അംഗവും പെർഫോമിങ് ആർട്ടിസ്റ്റുമാണ് ശ്രീഷിൻ. മൃതദേഹം ചൊവ്വ പകൽ മൂന്നോടെ വീട്ടുവളപ്പിൽ സംസ്ക‌രിച്ചു. അച്ഛൻ: ചന്ദ്രൻ. അമ്മ: ഉഷ. സഹോദരൻ: സീതുകിരൺ.&nbsp;

മാഹിയിൽ ബൈക്ക് അപകടം; കല്ലേരി സ്വദേശി യുവാവ് മരിച്ചു

Mahe

നാദാപുരം: രണ്ട് പേർക്ക് തെരുവുപട്ടിയുടെ കടിയേറ്റു. നാദാപുരം ചാലപ്രത്തും, വെള്ളൂരിലുമാണ് തെരുവുപട്ടി അക്രമം നടത്തിയത്. തിങ്കൾ വൈകുന്നേരം ആറര മണിയോടെ ചാലപ്രം കുളശ്ശേരി ക്ഷേത്ര പരിസരത്ത് വെച്ച് ഷാജു (40) , വെള്ളൂർ പറപ്പട്ടോളി ക്ഷേത്ര പരിസരത്ത് വെച്ച് കണ്ണൻ (75) എന്നിവരെയാണ് പട്ടി കടിച്ചത്. ഇരുവരുടെയും കാലിലാണ് പട്ടി കടിച്ചത്. രണ്ട് പേരും നാദാപുരം ഗവ താലൂക്ക് ആശുപത്രിയിൽ ചികിത്സ തേടി.

നാദാപുരത്ത് തെരുവ് പട്ടിയുടെ പരാക്രമം; രണ്ട് പേർക്ക് കടിയേറ്റു

Nadapuram

മട്ടന്നൂര്‍(കണ്ണൂര്‍): വെളിയമ്പ്ര ഏളന്നൂര്‍ പുഴയില്‍ ഒഴുക്കില്‍പ്പെട്ട പെണ്‍കുട്ടിയുടെ മൃതദേഹം 28 കിലോമീറ്ററോളം അകലെ പറശ്ശിനിക്കടവില്‍ കണ്ടെത്തി. കുറ്റ്യാടി സ്വദേശി ഇര്‍ഫാന(19)യുടെ മൃതദേഹമാണ് തിങ്കളാഴ്ച ഉച്ചയോടെ കണ്ടെത്തിയത്. ശനിയാഴ്ച വൈകിട്ട് നാലോടെയാണ് ഏളന്നൂരില്‍ കുളിക്കാനിറങ്ങിയ ഇര്‍ഫാന ഒഴുക്കില്‍പ്പെട്ടത്. അഗ്‌നിരക്ഷാസേനയും നാട്ടുകാരും ചേര്‍ന്ന് മൂന്നുദിവസമായി പുഴയില്‍ തിരച്ചില്‍ നടത്തിവരികയായിരുന്നു.
പറശ്ശിനിക്കടവ് ഫ്‌ളോട്ടിങ് റസ്റ്ററന്റിന് സമീപത്തായി പുഴയോരത്താണ് മൃതദേഹം കണ്ടെത്തിയത്. തുടര്‍ന്ന് തളിപ്പറമ്പ് പോലീസും അഗ്‌നിരക്ഷാസേനയും സ്ഥലത്തെത്തി. മട്ടന്നൂര്‍ പോലീസില്‍ വിവരമറിയിച്ചതിനെത്തുടര്‍ന്ന് ഇര്‍ഫാനയുടെ ബന്ധുക്കളെത്തി മൃതദേഹം തിരിച്ചറിഞ്ഞു. ഓണാവധിക്ക് വെളിയമ്പ്രയിലെ മാതാവിന്റെ വീട്ടിലെത്തിയതായിരുന്നു ഇര്‍ഫാന. ബന്ധുക്കള്‍ക്കൊപ്പം പുഴയില്‍ കുളിക്കാനിറങ്ങിയപ്പോഴാണ് ഒഴുക്കില്‍പ്പെട്ടത്. ശനിയാഴ്ച ഇര്‍ഫാന ഒഴുക്കില്‍പ്പെടുമ്പോള്‍ പഴശ്ശി ഡാമിന്റെ ഷട്ടറുകള്‍ തുറന്ന നിലയിലായിരുന്നു. പിന്നീട് തിരച്ചിലിനായി രണ്ടുദിവസം ഷട്ടറുകള്‍ അടച്ചിട്ടിരുന്നു. റിസര്‍വോയറിന്റെ സമീപപ്രദേശങ്ങളില്‍ വെള്ളമുയര്‍ന്നതോടെ ഞായറാഴ്ച വൈകിട്ട് ഷട്ടറുകള്‍ തുറന്നു. വളയം നരിക്കോട്ടുംചാലില്‍ കണ്ടോത്ത് വീട്ടില്‍ ഖലീല്‍ റഹ്‌മാന്റെയും സമീറയുടെയും ഏക മകളാണ്.

പുഴയില്‍ ഒഴുക്കില്‍പ്പെട്ട കുറ്റ്യാടി സ്വദേശിനിയുടെ മൃതദേഹം കണ്ടെത്തി

Kerala

വടകര: പുതിയ ബസ് സ്റ്റാൻഡിനു സമീപം ദേശീയപാതയിൽ ലോഡുമായി എത്തിയ ലോറി നിയന്ത്രണം വിട്ട് ‍ഡിവൈഡറിൽ ഇടിച്ചു. മുംബൈയിൽ നിന്നു തൃശൂരിലേക്ക് പോകുന്ന കണ്ടെയ്നർ ലോറിയാണ് സ്റ്റിയറിങ് വീൽ പൊട്ടി കോൺക്രീറ്റ് ഡിവൈഡറിൽ ഇടിച്ച് നിന്നത്. അപകടത്തിൽ ലോറിയുടെ മുൻവശം തകർന്നു. മുൻവശത്തെ ടയർ പഞ്ചറാവുകയും ചെയ്തു. നിറയെ ലോഡുമായി ഇടതു വശം ചരിഞ്ഞു നിന്ന ലോറി അതുവഴി വന്ന വാഹനങ്ങൾക്ക് മുകളിലേക്ക് മറിയാനുള്ള സാധ്യത കണക്കിലെടുത്ത് ഉടൻ മറ്റൊരു ലോറി എത്തിച്ച് ലോഡ് അതിലേക്ക് മാറ്റുകയായിരുന്നു.&nbsp;
അപകടത്തെ തുടർന്ന് ദേശീയപാതയിലെ സർവീസ് റോഡിൽ ഗതാഗതം തടസ്സപ്പെട്ടു. ഇത് മണിക്കൂറുകൾ ഗതാഗത കുരുക്കിനിടയാക്കി. പ്രവൃത്തി നടക്കുന്ന ഭാഗത്ത് താൽക്കാലിക റോഡ് നിർമിച്ച് കോഴിക്കോട് ഭാഗത്തേക്ക് വാഹനങ്ങൾ കടത്തി വിടുകയായിരുന്നു. രണ്ടു ലോറികൾ എത്തിച്ചാണ് ചാക്കിൽ നിറച്ച മുത്തുകൾ അടങ്ങിയ ലോഡ് മാറ്റിയത്.&nbsp;

വടകരയിൽ ദേശീയപാതയിലെ ഡിവൈഡറിൽ ലോറി ഇടിച്ചു

Vadakara

നാദാപുരം: വളയത്ത് സൈനികനെ തൂങ്ങി മരിച്ച നിലയിൽ കണ്ടെത്തി. നിരവുമ്മൽ സ്വദേശി ബോർഡർ സെക്യൂരിറ്റി ഫോഴ്സ് ഉദ്യോഗസ്ഥൻ ഒന്തമ്മൽ അർജുൻ (30) ആണ് മരിച്ചത്. ഒരാഴ്ച മുൻപാണ് അർജുൻ നാട്ടിലെത്തിയത്. അച്ഛൻ: രവീന്ദ്രൻ. അമ്മ: റീജ . ഭാര്യ: പ്രവിഷ വാണിമേൽ. മകൾ: ദേവൂട്ടി (വിദ്യാർഥിനി, ലിറ്റിൽ ഫ്ലവർ സ്കൂൾ കല്ലാച്ചി), സഹോദരി: അദർശ (ചെക്കോറ്റ).

വളയത്ത് സൈനികൻ തൂങ്ങി മരിച്ച നിലയിൽ

പേരാമ്പ്ര: കുറ്റ്യാടി-കോഴിക്കോട് സംസ്ഥാന പാതയിൽ കടിയങ്ങാട് മുൻ സൈനികൻ സ്കൂട്ടറിടിച്ച് മരിച്ചു. കടിയങ്ങാട് പുത്തൻപുരയിൽ ബാലകൃഷ്ണൻ നായരാണ് (78) മരിച്ചത്. വ്യാഴാഴ്ച രാവിലെ കടിയങ്ങാട് ഡേ മാർട്ടിനു സമീപത്തായിരുന്നു അപകടം.&nbsp;
കോഴിക്കോട് സ്വകാര്യ ആശുപത്രിയിൽ ചികിത്സയിലിക്കെ വെള്ളിയാഴ്ചയായിരുന്നു അന്ത്യം. ഭാര്യ: വിമല, മക്കൾ: സന്തോഷ്‌ കുമാർ (ഒമാൻ), രജിത്കുമാർ (ഷാർജ). മരുമക്കൾ: സിന്ധു (ചെന്നൈ), രജിഷ (മണിയൂർ).

കടിയങ്ങാട്  സ്കൂട്ടറിടിച്ച് ചികിത്സയിലായിരുന്ന മുൻ സൈനികൻ മരിച്ചു

Perambra

ചോമ്പാല: സൈബർ തട്ടിപ്പ് കേസിലെ പ്രധാന പ്രതി അറസ്റ്റിൽ. ബീഹാറിലെ ഔറങ്കാബാദ് ജില്ലയിലെ മാലി എന്ന സ്ഥലത്ത് വെച്ച് അഭിമന്യു കുമാർ (22) എന്നയാളെയാണ് ചോമ്പാല പോലീസ് അറസ്റ്റ് ചെയ്തത്. ഇൻസ്റ്റഗ്രാമിലൂടെ ലോൺ പരസ്യം നൽകി അതിൽ ക്ലിക്ക് ചെയ്ത അഴിയൂർ സ്വദേശിയായ യുവതിയുടെ ഫോൺ ഐഡി ആക്സസ് ചെയ്യുകയും പണം തട്ടിയെടുക്കുകയും ശേഷം കൂടുതൽ പണം ആവശ്യപ്പെടുകയും പണം അയച്ച് നൽകാത്തതിൽ യുവതിയുടെയും 13 വയസ്സ് മാത്രം പ്രായമുള്ള മകളുടെയും ഫോട്ടോ മോർഫ് ചെയ്ത് നഗ്ന ഫോട്ടോ നിർമ്മിച്ച് അയച്ച് ഭീഷണിപ്പെടുത്തുകയും ചെയ്യുകയായിരുന്നു. പണം ആവശ്യപ്പെട്ടതിനെ തുടർന്ന് യുവതി നൽകിയ പരാതി പ്രകാരം ചോമ്പാല പോലീസ് കേസ് രജിസ്റ്റർ ചെയ്ത് അന്വേഷണം നടത്തി വരികയായിരുന്നു. ബാങ്ക് അക്കൗണ്ടുകളും മൊബെൽ നമ്പറും സോഷ്യൽ മീഡിയ അക്കൗണ്ടുകളും കേന്ദ്രീകരിച്ച് നടത്തിയ അന്വേഷണത്തിൽ പ്രതികളെ കുറിച്ച് സൂചന ലഭിച്ചു.
ജില്ലാ പോലീസ് മേധാവി കെ ഇ ബൈജു ഐ പി.എസ് നൽകിയ നിർദ്ദേശപ്രകാരം കേസിലെ അന്വേഷണ ഉദ്യോഗസ്ഥനനായ ഇൻസ്പക്ടർ സേതുനാഥ് എസ് ആർ ബീഹാറിൽ പോയി അന്വേഷണം നടത്തുന്നതിനായി സബ് ഇൻസ്പക്ടർ ജെഫിൻ രാജുവിൻ്റെ നേതൃത്വത്തിൽ സീനിയർ സിവിൽ പോലീസ് ഓഫീസർ സജിത്ത് പിടി, സിവിൽ പോലീസ് ഓഫീസർ രാജേഷ് എം കെ എന്നിവരടങ്ങിയ സംഘത്തെ നിയോഗിക്കുകയായിരുന്നു. നക്സൽ ഭീഷണിയുള്ളതും വർഷങ്ങൾക്ക് മുമ്പ് പോലീസ് സ്‌റ്റേഷൻ ആക്രമിച്ച് പോലീസുകാരെ വധിച്ച് ആയുധങ്ങളുമായി കടന്ന ഔറങ്കബാദ് ജില്ലയിലെ മാലി പോലീസ് സ്റ്റേഷൻ പരിധിയിൽ വെച്ച് മാലി പോലീസിൻ്റെ സഹായത്തോടെയാണ് ഇയാളെ പിടികൂടിയത്. പോലീസ് സാന്നിദ്ധ്യം മനസ്സിലാക്കി പ്രതി രക്ഷപ്പെടുന്നത് ഒഴിവാക്കാൻ വാഹനം ഒഴിവാക്കി അർദ്ധരാത്രിയിൽ ആയുധങ്ങളേന്തിയ ഇരുപതോളം സായുധ സേനക്കൊപ്പം കിലോമീറ്ററുകൾ കാൽനടയായി സഞ്ചരിച്ച് പ്രതിയുടെ വീട് വളഞ്ഞ് സാഹസികമായി പിടികൂടുകയായിരുന്നു. അറസ്റ്റ് ചെയ്ത പ്രതിയെ കോടതി ഉത്തരവ് വാങ്ങി താല്കാലിക കസ്റ്റഡിയിൽ പാർപ്പിച്ച് മറ്റ് പ്രതികളെ കുറിച്ച് അന്വേഷണം നടത്തി നിർണ്ണായക വിവരങ്ങൾ ശേഖരിച്ചാണ് അന്വേഷണ സംഘം മടങ്ങിയത്.

സൈബർ തട്ടിപ്പ് കേസിലെ പ്രധാന കണ്ണി ചോമ്പാല പോലീസ് പിടിയിൽ

കണ്ണൂര്‍ : പെരുന്തട്ടയില്‍ വാഹനാപകടത്തില്‍ രണ്ടുപേര്‍ മരിച്ചു. മേച്ചിറ പാടിയില്‍ അങ്കണവാടിക്ക് സമീപമാണ് അപകടമുണ്ടായത്. രണ്ടുപേര്‍ റോഡില്‍ അബോധാവസ്ഥയില്‍ കിടക്കുന്നത് കണ്ടു നാട്ടുകാര്‍ പരിയാരം മെഡിക്കല്‍ കോളേജില്‍ എത്തിച്ചെങ്കിലും മരണപ്പെടുകയായിരുന്നു.
എരമം കിഴക്കേ കരയിലെ എം.എം. വിജയന്‍ (50), എരമം ഉള്ളൂരിലെ പി.കെ. രതിഷ്(40) എന്നിവരാണ് മരണപ്പെട്ടത്. അപകടം നടന്ന റോഡിന്റെ മറ്റൊരു വശത്ത് ബൈക്ക് അപകടത്തില്‍ ടി.പി. ശ്രീദുല്‍ (27 ) അപകടത്തില്‍പ്പെട്ട വീണുകിടക്കുന്നുണ്ടായിരുന്നു ശ്രീദുലിനെ പരിയാരം മെഡിക്കല്‍ കോളേജില്‍ പ്രവേശിപ്പിച്ചിട്ടുണ്ട്.രണ്ടുപേര്‍ റോഡില്‍ കിടക്കുന്നത് കണ്ടു ബൈക്ക് വെട്ടിച്ചപ്പോഴാണ് തനിക്ക് അപകടം പറ്റിയതെന്നാണ് ശ്രീദുല്‍ പറയുന്നത്. അപകടത്തിന്റെ വ്യക്തമായ കാരണം പോലീസ് അന്വേഷിക്കുകയാണ്.

കണ്ണൂരില്‍ റോഡരികിൽ രണ്ടുപേര്‍ മരിച്ച നിലയില്‍

വേളം: വയോധികനെ കാണാനില്ലെന്ന് പരാതി. വേളം പള്ളിയത്ത് സ്വദേശി കുഴിക്കണ്ടത്തിൽ മാധവനെ (78)യാണ് ചൊവ്വ (02/09/2025) പകൽ 11.30 ന് ശേഷം കാണാതായത്. കാവി മുണ്ടും പച്ച നിറത്തിലുള്ള ഷർട്ടുമാണ് കാണാതാവുമ്പോൾ ധരിച്ചത്. ബന്ധുക്കൾ കുറ്റ്യാടി പോലീസിൽ പരാതി നൽകിയിട്ടുണ്ട്. എന്തെങ്കിലും വിവരം ലഭിക്കുന്നവർ കുറ്റ്യാടി പോലീസ് സ്റ്റേഷനിലോ 8590550816 എന്ന നമ്പറിലോ ബന്ധപ്പെടുക.

വേളം സ്വദേശിയെ കാണാനില്ലെന്ന് പരാതി