കൊയിലാണ്ടി: കരിമരുന്ന് പ്രയോ​ഗത്തിനിടെയുണ്ടായ അപകടത്തിൽ രണ്ടുപേർക്ക് പരിക്ക്. അഭിനന്ദ്, സം​ഗീത് എന്നിവർക്കാണ് പരിക്കേറ്റത്. മുചുകുന്ന് കോട്ട കോവിലകം ക്ഷേത്രത്തിൽ വെള്ളിയാഴ്ച രാത്രിയോടെയായിരുന്നു അപകടം. പടക്കം പൊട്ടിച്ചപ്പോൾ സമീപത്ത് കൂടിനിന്ന ആളുകളുടെ ഇടയിലേക്ക് തീപ്പൊരി തെറിച്ചുവീഴുകയായിരുന്നു.

മുചുകുന്ന് കോട്ടയിൽ കരിമരുന്ന് പ്രയോ​ഗത്തിനിടെ അപകടം; രണ്ടുപേർക്ക് പരിക്ക്

Koyilandy

കൊച്ചി: കളമശ്ശേരി ഗവ. പോളിടെക്‌നിക് കോളേജിലെ ആണ്‍കുട്ടികളുടെ ഹോസ്റ്റലില്‍നിന്ന് രണ്ടുകിലോ കഞ്ചാവ് പിടികൂടി. വ്യാഴാഴ്ച രാത്രി നടത്തിയ റെയ്ഡിലാണ് കഞ്ചാവ് ശേഖരം പിടികൂടിയത്.
പോലീസിനും ഡാന്‍സാഫിനും ലഭിച്ച രഹസ്യവിവരത്തെത്തുടര്‍ന്ന് വ്യാഴാഴ്ച രാത്രിയാണ് ഹോസ്റ്റലില്‍ റെയ്ഡ് നടത്തിയത്. മുറികളില്‍ നടത്തിയ പരിശോധനയില്‍, ഒരു മുറിയില്‍നിന്ന് മാത്രം 1.9 കിലോ കഞ്ചാവ് കണ്ടെത്തി. മറ്റൊരു മുറിയില്‍നിന്ന് ഒമ്പതുഗ്രാം കഞ്ചാവും പിടികൂടി.കൊല്ലം സ്വദേശിയായ ആകാശിന്റെ മുറിയില്‍നിന്നാണ് 1.9 കിലോ കഞ്ചാവ് കണ്ടെത്തിയത്. ആലപ്പുഴ സ്വദേശിയായ ആദിത്യന്‍, കൊല്ലം സ്വദേശിയായ അഭിരാജ് എന്നിവരുടെ മുറിയില്‍നിന്നാണ് ഒമ്പതുഗ്രാം കഞ്ചാവ് പിടികൂടിയത്. മൂവരും പോലീസ് കസ്റ്റഡിയിലാണ്.പരിശോധനയ്ക്കായെത്തിയ പോലീസ് സംഘത്തെ കണ്ട് മൂന്നുപേർ ഓടി രക്ഷപ്പെട്ടു. ഇവര്‍ക്കായി തിരച്ചില്‍ തുടരുകയാണ്.

കളമശ്ശേരി ഗവ. പോളിടെക്‌നിക് ഹോസ്റ്റലില്‍ വന്‍ ലഹരി ശേഖരം; പിടികൂടിയത്  2 കിലോ കഞ്ചാവ്

Kerala

തിരുവനന്തപുരം : മീനമാസ പൂജകൾക്കായി ശബരിമല നട നാളെ (ശനി) തുറക്കും. വൈകിട്ട് 5ന് തന്ത്രി കണ്ഠര് രാജീവരുടെ സാന്നിധ്യത്തിൽ മേൽശാന്തി അരുൺകുമാർ നമ്പൂതിരി നട തുറന്ന് ദീപം തെളിക്കും. തുടർന്ന് പതിനെട്ടാംപടിക്കു താഴെ ആഴിയിൽ അഗ്നിപകരും.
പതിനെട്ടാംപടി കയറി എത്തുന്ന ഭക്തർക്ക് മേൽപാലം കയറാതെ നേരിട്ട് കൊടിമരച്ചുവട്ടിൽ നിന്ന് ശ്രീകോവിലിനു മുന്നിലെത്തി ദർശനം നടത്തുന്നതിന്റെ ട്രയലും നാളെ ആരംഭിക്കും. മീനമാസ പൂജകൾ പൂർത്തിയാക്കി മാർച്ച് 19ന് രാത്രി 10ന് നട അടയ്ക്കും.

മീനമാസ പൂജകൾക്കായി ശബരിമല നട നാളെ തുറക്കും

അടൂര്‍: നഗരസഭാ അധ്യക്ഷയ്ക്ക് മയക്കുമരുന്ന് മാഫിയയുമായി ബന്ധമുണ്ടെന്ന് പറയുന്ന സി.പി.എം പാര്‍ട്ടി കൗസിലറുടെ ശബ്ദസന്ദേശം പുറത്തുവന്നതിന് പിന്നാലെ വിശദീകരണം തേടാന്‍ പാര്‍ട്ടി. കൗണ്‍സിലര്‍ റോണി പാണംതുണ്ടിലിനോടാണ് വിശദീകരണം തേടുക. അനാവശ്യ ആരോപണങ്ങള്‍ കമ്യൂണിസ്റ്റ് രീതിയല്ലെന്ന് അടൂര്‍ ഏരിയ സെക്രട്ടറി എസ്. മനോജ് വ്യക്തമാക്കി.
സി.പി.എം അടൂര്‍ ഏരിയ കമ്മിറ്റി അംഗം കൂടിയായ അടൂര്‍ നഗരസഭാ അധ്യക്ഷ ദിവ്യാ റെജി മുഹമ്മദിനെതിരെയാണ് കൗണ്‍സിലര്‍ റോണി പാണംതുണ്ടില്‍ ശബ്ദസന്ദേശം പുറത്തുവിട്ടത്. നഗരത്തില്‍ യുവാക്കള്‍ക്ക് ലഹരി എത്തിച്ചുകൊടുക്കുന്ന മാഫിയകള്‍ക്ക് നഗരസഭാ അധ്യക്ഷ എല്ലാ സൗകര്യങ്ങളും ചെയ്തു കൊടുക്കുന്നുവെന്ന ഗുരുതര ആരോപണമാണ് കൗണ്‍സിലര്‍ ഉന്നയിച്ചത്. ബുധനാഴ്ച രാത്രി നഗരസഭാംഗങ്ങളുടെ വാട്‌സാപ്പ് ഗ്രൂപ്പില്‍ ശബ്ദസന്ദേശം പങ്കുവെയ്ക്കുകയും ചെയ്തു.

ഇത് പുറത്തുവന്നതിന് പിന്നാലെ കോണ്‍ഗ്രസും യൂത്ത് കോണ്‍ഗ്രസും ബി.ജെ.പിയും പ്രതിഷേധപ്രകടനം നടത്തി. ആ ശബ്ദരേഖ അടിസ്ഥാനരഹിതമാണെന്നും ഇത്തരം ആരോപണം ഉന്നയിച്ചതിന് പിന്നിലുള്ള ലക്ഷ്യം എന്താണെന്ന് അറിയില്ലെന്നും ദിവ്യാ റെജി മുഹമ്മദ് പ്രതികരിച്ചു. അതേസമയം നഗരത്തില്‍ ക്യാമറയും വെളിച്ചവും വേണമെന്ന് ഒട്ടേറെ തവണ പരാതി നല്‍കിയിട്ടും പരിഹാരമുണ്ടായില്ലെന്ന്‌ റോണി വ്യക്തമാക്കി.

നഗരസഭാ അധ്യക്ഷയ്ക്ക്‌ മയക്കുമരുന്ന് മാഫിയയുമായി ബന്ധമുണ്ടെന്ന് ആരോപണം; സിപിഎം വിശദീകരണം തേടും

രാജസ്ഥാന്‍: മാധുരി ദീക്ഷിത് രണ്ടാം നിര നടിയാണെന്നും അവരുടെ കാലം കഴിഞ്ഞുപോയെന്നും കോണ്‍ഗ്രസ് നേതാവ് ടിക്കറാം ജുള്ളി. രാജസ്ഥാന്‍ അസംബ്ലിയിലായിരുന്നു അദ്ദേഹം ഈ പരാമര്‍ശം നടത്തിയത്. ഐഐഎഫ്എ പരിപാടി രാജസ്ഥാനില്‍ നടത്തിയതില്‍ സംസ്ഥാനത്തിന് എന്ത് ലാഭം ലഭിച്ചുവെന്ന് ചോദിക്കുകയായിരുന്നു അദ്ദേഹം.
'ഐഐഎഫ്എയുടെ പേരില്‍ പൊതുജനങ്ങളുടെ 100 കോടിയാണ് ചിലവിട്ടത്. അത് ഐഐഎഫ്എയുടെ പ്രമോഷന്‍ മാത്രമായിരുന്നു രാജസ്ഥാന്റെ പ്രമോഷന്‍ ഉണ്ടായിരുന്നില്ല. ഇത്‌ പരസ്യ ബോര്‍ഡുകള്‍ കണ്ടാല്‍ അറിയാം. ഐഐഎഫ്എ നടത്തി രാജസ്ഥാന് എന്ത് കിട്ടാനാണ്.അവിടെയെത്തിയ താരങ്ങളാരും തന്നെ രാജസ്ഥാനിലെ ടൂറിസ്റ്റ് കേന്ദ്രങ്ങള്‍ സന്ദര്‍ശിച്ചിരുന്നില്ല. ഷാരുഖ് അല്ലാതെ ഒരു പ്രമുഖ താരങ്ങളും പരിപാടിക്കായി എത്തിയിരുന്നില്ല, വന്നതെല്ലാം രണ്ടാം നിര താരങ്ങളാണ്. മാധുരി ദീക്ഷിത്തെല്ലാം രണ്ടാ തരം നടിയാണ്. അവരുടെ പ്രധാനപ്പെട്ട സമയം കഴിഞ്ഞു. ബേട്ട, ദില്‍ തുടങ്ങിയ ചിത്രങ്ങളുടെ സമയത്തായിരുന്നു അവര്‍ കത്തി നിന്ന കാലം'- ടിക്കാറാം പറഞ്ഞു. ടിക്കാറാമിന്റെ കമന്റ് വലിയ വിവാദമായി. സമൂഹമാധ്യമങ്ങളില്‍ മാധുരി ദീക്ഷിതിനെ അധിക്ഷേപിച്ചത് ശരിയായില്ലെന്ന് തരത്തിലുള്ള ചര്‍ച്ചകള്‍ സജീവമാണ്

മാധുരി ദീക്ഷിത് രണ്ടാം നിര നടി ;കോണ്‍ഗ്രസ് നേതാവിന്റെ പരാമർശം വിവാദത്തിൽ

National

കണ്ണൂർ: മെഡിക്കൽ സ്റ്റോറിൽ നിന്ന് മരുന്ന് മാറിനൽകിയതിനെത്തുടർന്ന് എട്ടുമാസം പ്രായമുള്ള കുഞ്ഞ് ഗുരുതരാവസ്ഥയിൽ. കണ്ണൂർ പഴയങ്ങാടിയിലാണ് സംഭവം.പഴയങ്ങാടി സ്വദേശി സമീറിന്റെ ആൺകുഞ്ഞാണ് ചികിത്സയിലുള്ളത്.
ഡോക്ടർ എഴുതിക്കൊടുത്ത മരുന്നിന് പകരം അമിത ഡോസുള്ള മറ്റൊരു മരുന്നാണ് മെഡിക്കൽ സ്റ്റോറുകാർ നൽകിയതെന്നാണ് പരാതി. നൽകിയ മരുന്ന് കുഞ്ഞിന്റെ കരളിന്റെ പ്രവർത്തനത്തെ ഗുരുതരമായി ബാധിച്ചുവെന്നാണ് റിപ്പോർട്ട്. പനിക്കുള്ള സിറപ്പാണ് ഡോക്ടർ നിർദ്ദേശിച്ചത്. ഇത് കുറിപ്പടിയിൽ വ്യക്തമായി എഴുതിയിട്ടുമുണ്ടായിരുന്നു. എന്നാൽ മെഡിക്കൽ ഷോപ്പുകാർ നൽകിയതാകട്ടെ ഡ്രോപ്സും. മരുന്ന് മാറിയത് തിരിച്ചറിയാതെ രക്ഷിതാക്കൾ സിറപ്പ് നൽകാൻ നിർദ്ദേശിച്ച അതേ അളവിൽ ഡ്രോപ്സ് നൽകുകയും ചെയ്തു. മരുന്ന് നൽകി അല്പം കഴിഞ്ഞതോടെ കുഞ്ഞിന്റെ ആരോഗ്യനില വഷളായി. തുടർന്ന് കുറിപ്പടി എഴുതി നൽകിയ ഡോക്ടറെ ബന്ധപ്പെട്ടപ്പോഴാണ് മരുന്ന് മാറിയ വിവരം അറിയുന്നത്.
&nbsp;ഡോക്ടറുടെ നിർദ്ദേശാനുസരണം ഉടൻ കുഞ്ഞിനെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. മരുന്ന് മാറിനൽകിയതിനെക്കുറിച്ച് ചോദിച്ചപ്പോൾ മെഡിക്കൽ സ്റ്റോറുകാരുടെ ഭാഗത്തുനിന്ന് മോശംപ്രതികരണമാണ് ഉണ്ടായതെന്നും കുഞ്ഞിന്റെ ബന്ധുക്കൾ ആരോപിക്കുന്നു. സംഭവത്തെക്കുറിച്ച് ചോദിച്ചപ്പോൾ എന്നാൽ പോയി കേസുകൊട് എന്നായിരുന്നു മെഡിക്കൽ സ്റ്റോറുകാർ പറഞ്ഞതെന്നാണ് ബന്ധുക്കൾ ആരോപിക്കുന്നത്.

മെഡിക്കൽ ഷോപ്പിൽ നിന്ന് മരുന്ന് മാറിനൽകി, പിഞ്ചുകുഞ്ഞ് ഗുരുതരാവസ്ഥയിൽ