തിരുവനന്തപുരം: സംസ്ഥാനത്ത് ഇന്ന് സ്വർണവില കുത്തനെ ഉയർന്നു. ഒരു പവന് 680 രൂപയാണ് ഒറ്റയടിക്ക് വർദ്ധിച്ചത്. ഇതോടെ സ്വർണവില പുതിയ റെക്കാഡിട്ടിരിക്കുകയാണ്. ഒരു പവൻ സ്വർണത്തിന്റെ ഇന്നത്തെ വിപണിവില 60,​760 രൂപയാണ്. കഴിഞ്ഞ രണ്ട് ദിവസമായി സ്വർണവില കുറഞ്ഞത് ജനങ്ങൾക്ക് അല്പം ആശ്വാസമായിരുന്നു.

360 രൂപയാണ് രണ്ട് ദിവസം കൊണ്ട് കുറഞ്ഞത്. എന്നാൽ ഇന്ന് കുത്തനെ വില ഉയരുകയായിരുന്നു. ഇന്നത്തെ വിലയനുസരിച്ച് ഒരു പവൻ സ്വർണം വാങ്ങണമെങ്കിൽ ജിഎസ്ടിയും പണിക്കൂലിയുമടക്കം 65,​000 രൂപയ്ക്ക് മുകളിൽ കൊടുക്കണം. ആഗോള വിപണിയിൽ സ്വർണവില വർദ്ധിച്ചതാണ് വില ഉയരാൻ കാരണം. ഇനിയും സ്വർണവില ഉയരാൻ സാദ്ധ്യതയുണ്ട്.ഇന്ന് ഒരു ഗ്രാം സ്വർണവിലയിൽ 85 രൂപയാണ് വർദ്ധിച്ചത്. ഒരു ഗ്രാം 22 കാരറ്റ് സ്വർണത്തിന്റെ ഇന്നത്തെ വിപണി വില 7,​595 രൂപയാണ്. 18 കാരറ്റ് ഗ്രാമിന് 75 രൂപ വർദ്ധിച്ചു. ഒരു ഗ്രാം 18 കാരറ്റ് സ്വർണത്തിന്റെ വിപണി വില 6,​275 രൂപയാണ്.