പാലക്കാട്: ഡിവിഷനിലെ വിവിധ സ്ഥലങ്ങളിൽ ട്രാക്ക് അറ്റകുറ്റപ്പണി നടക്കുന്നതിനാൽ വിവിധ ദിവസങ്ങളിൽ ട്രെയിൻ സർവിസുകൾക്കായി താഴെപ്പറയുന്ന നിയന്ത്രണങ്ങൾ ഏർപ്പെടുത്തിയതായി റെയിൽവേ അറിയിച്ചു.
*ട്രെയിൻ നമ്പർ 06459 കോയമ്പത്തൂർ ജങ്ഷൻ - ഷൊർണൂർ ജങ്ഷൻ പാസഞ്ചർ ജൂൺ ഒന്നിന് കോയമ്പത്തൂർ ജങ്ഷനിൽനിന്ന് ആരംഭിക്കുന്ന പ്രത്യേക യാത്ര പാലക്കാട് ജങ്ഷനിൽ അവസാനിക്കും. പാലക്കാടിനും ഷൊർണൂരിനുമിടയിലുള്ള സർവിസ് റദ്ദാക്കും.
*മേയ് 23ന് 11.45ന് മംഗലാപുരം സെൻട്രലിൽനിന്ന് പുറപ്പെടുന്ന ട്രെയിൻ നമ്പർ 22638 മംഗളൂരു സെൻട്രൽ - ഡോ. എം.ജി.ആർ ചെന്നൈ സെൻട്രൽ വെസ്റ്റ് കോസ്റ്റ് സൂപ്പർഫാസ്റ്റ് എക്സ്പ്രസ് ഒരു മണിക്കൂർ വൈകി മേയ് 24ന് 12.45ന് പുറപ്പെടും.
*ട്രെയിൻ നമ്പർ 06024 കണ്ണൂർ - ഷൊർണൂർ ജങ്ഷൻ മെമു മേയ് 21ന് കണ്ണൂരിൽനിന്ന് ഒരു മണിക്കൂർ 20 മിനിറ്റ് വൈകും.
* മേയ് 21ന് മംഗളൂരു സെൻട്രലിൽനിന്ന് ആരംഭിക്കുന്ന ട്രെയിൻ നമ്പർ 16603 മംഗളൂരു സെൻട്രൽ - തിരുവനന്തപുരം സെൻട്രൽ മാവേലി എക്സ്പ്രസ് യാത്ര ഒരു മണിക്കൂർ 10 മിനിറ്റ് വൈകും.
* മേയ് 21ന് മംഗളൂരു സെൻട്രലിൽനിന്ന് ആരംഭിക്കുന്ന ട്രെയിൻ നമ്പർ 16630 മംഗളൂരു സെൻട്രൽ - തിരുവനന്തപുരം സെൻട്രൽ മലബാർ എക്‌സ്‌പ്രസ് 55 മിനിറ്റ് വൈകും.
*ട്രെയിൻ നമ്പർ 22638 മംഗളൂരു സെൻട്രൽ - ഡോ. എം.ജി.ആർ ചെന്നൈ സെൻട്രൽ വെസ്റ്റ് കോസ്റ്റ് സൂപ്പർഫാസ്റ്റ് എക്‌സ്‌പ്രസ് മേയ് 22ന് മംഗളൂരു സെൻട്രലിൽനിന്ന് 40 മിനിറ്റ് വൈകും.
* മേയ് 22ന് ഡോ. എം.ജി.ആർ ചെന്നൈ സെൻട്രലിൽനിന്ന് ആരംഭിക്കുന്ന ട്രെയിൻ നമ്പർ 22637 ഡോ. എം.ജി.ആർ ചെന്നൈ സെൻട്രൽ - മംഗളൂരു സെൻട്രൽ വെസ്റ്റ് കോസ്റ്റ് സൂപ്പർഫാസ്റ്റ് എക്‌സ്‌പ്രസ് യാത്ര ഒരു മണിക്കൂർ 20 മിനിറ്റ് വൈകും.
*ട്രെയിൻ നമ്പർ 06458 ഷൊർണൂർ ജങ്ഷൻ - കോയമ്പത്തൂർ ജങ്ഷൻ പാസഞ്ചർ മേയ് 22, 26, 29, ജൂൺ 01, 05 തീയതികളിൽ ഷൊർണൂർ ജങ്ഷനിൽനിന്ന് ആരംഭിക്കുന്ന യാത്ര ഒരു മണിക്കൂർ വൈകും.
* മേയ് 25ന് മംഗളൂരു സെൻട്രലിൽനിന്ന് ആരംഭിക്കുന്ന നമ്പർ 16603 മംഗളൂരു സെൻട്രൽ - തിരുവനന്തപുരം സെൻട്രൽ മാവേലി എക്‌സ്‌പ്രസ് യാത്ര ഒരു മണിക്കൂർ വൈകും.
*ട്രെയിൻ നമ്പർ 16630 മംഗളൂരു സെൻട്രൽ - തിരുവനന്തപുരം സെൻട്രൽ മലബാർ എക്‌സ്‌പ്രസ് മേയ് 25ന് മംഗളൂരു സെൻട്രലിൽനിന്ന് 40 മിനിറ്റ് വൈകും.
* ട്രെയിൻ നമ്പർ 16307 ആലപ്പുഴ - കണ്ണൂർ എക്‌സ്‌പ്രസ് മേയ് 25നും ജൂൺ ഒന്നിനും ആലപ്പുഴയിൽനിന്ന് 50 മിനിറ്റ് വൈകും.

ട്രാക്ക് അറ്റകുറ്റപ്പണി; ട്രെയിൻ സർവിസുകളിൽ നിയന്ത്രണം

Kerala

വടകര : നേപ്പാളിൽ വെച്ച് നടന്ന ഏഷ്യൻ സോഫ്റ്റ് ബേസ് ബോൾ ടൂർണ്ണമെന്റിൽ ചാമ്പ്യൻമാരായ ഇന്ത്യൻ ടീം അംഗങ്ങളായ ഉമ്മത്തൂർ ഹയർ സെക്കണ്ടറി സ്കൂൾ കുട്ടികൾക്ക് വടകരയിൽ ഗംഭീരമായ സ്വീകരണം നൽകി. കെ.കെ.രമ എം എൽ എ ടീമംഗങ്ങളെ ഹാരാർപ്പണം ചെയ്ത് സ്വീകരിച്ചു. ഇന്ത്യൻ ജഴ്സിയണിഞ്ഞ് വിദേശ രാജ്യത്ത് പോയി ജേതാക്കളായി വന്ന കുട്ടികൾ രാജ്യത്തിന് നമ്മുടെ നാടിന്റെ അഭിമാന സംഭാവനയാണെന്ന് എം എൽ എ പറഞ്ഞു.&nbsp;
മാനേജിംഗ് കമ്മിറ്റി വൈസ് പ്രസിഡന്റ് അഹമ്മദ് പുന്നക്കൽ, ഏറാമല ഗ്രാമ പഞ്ചായത്ത് വൈസ് പ്രസിഡന്റ് ശുഹൈബ് കുന്നത്ത്, ചെക്യാട് ഗ്രാമ പഞ്ചായത്ത് മെമ്പർ ടി.കെ.ഖാലിദ്, പി.ടി.എ പ്രസിഡന്റ് ജലീൽ കൊട്ടാരം, ഹാരിസ് കൊത്തിക്കുടി, സ്കൂൾ അധ്യാപകർ, രക്ഷിതാക്കൾ, നാട്ടുകാർ തുടങ്ങിയവർ സ്വീകരണത്തിൽ പങ്കാളികളായി.

ഏഷ്യൻ സോഫ്റ്റ് ബേസ് ബോൾ ചാമ്പ്യൻമാർക്ക് വടകരയിൽ ഗംഭീര സ്വീകരണം

Vadakara

കക്കട്ടിൽ: പാതിരപ്പറ്റ കാപ്പുംചാലിൽ ലിനീഷ് കെ ടി (43) നിര്യാതനായി. അച്ഛൻ; കേളപ്പൻ. അമ്മ; ചന്ദ്രി. സഹോദരൻ; ലാലു കെ ടി. സഞ്ചയനം; വ്യാഴാഴ്ച.

പാതിരപ്പറ്റ ലിനീഷ് കെ ടി നിര്യാതനായി

Obituary

കുറ്റ്യാടി : ഊരത്ത് മാവുള്ളചാലിൽ വയോധിക മരിച്ച സംഭവത്തിൽ മകളുടെ മകൻ അറസ്റ്റിൽ. ഊരത്ത് സ്വദേശി ബഷീർ(40) ആണ് വടകരയിൽവെച്ച് പിടിയിലായത്. സംഭവശേഷം ഒളിവിലായിരുന്ന പ്രതിയെ നാട്ടുകാരുടെ സഹായത്തോടെയാണ് പോലീസ് പിടികൂടിയത്. പ്രതിയുടെപേരിൽ 304 വകുപ്പ്‌ പ്രകാരം നരഹത്യക്കാണ് കേസ് രജിസ്റ്റർ ചെയ്തിരിക്കുന്നത്.
മലപ്പുറം കാടാമ്പുഴ ചെരട മുഹമ്മദിന്റെ ഭാര്യ കറുത്തോടം ഖദീജുമ്മ(85)യാണ് ശനിയാഴ്ച മരിച്ചത്. ബഷീർ മർദിച്ചതിനെത്തുടർന്നുണ്ടായ മാനസികമ്മർദത്തിൽ ഹൃദയാഘാതത്താലാണ് മരിച്ചതെന്നും പ്രതി പലപ്രാവശ്യം സമാനരീതിയിൽ വീട്ടിൽ ബഹളമുണ്ടാക്കിയിരുന്നതായും കുറ്റ്യാടി സ്റ്റേഷൻ സി.ഐ. യു.പി. വിപിൻ പറഞ്ഞു. ശനിയാഴ്ച രാത്രി മാവുള്ളചാലിൽ മകൾ ഫാത്തിമയുടെ വീട്ടിൽവെച്ചാണ് ഖദീജുമ്മയുടെ മരണം സംഭവിച്ചത്.
ബഷീർ ലഹരിക്കടിമയായിരുന്നെന്നും പണത്തിനായി ഇവരെ നിരന്തരമായി ബുദ്ധിമുട്ടിക്കാറുണ്ടായിരുന്നുവെന്നും ബന്ധുക്കൾ പറഞ്ഞു. സംഭവദിവസം പണംചോദിച്ച് കൈപിടിച്ചു വട്ടംകറക്കിയെന്ന് ബഷീറിന്റെ മാതാവ് ഫാത്തിമ പറഞ്ഞു. അവശനിലയിലായ ഇവരെ കുറ്റ്യാടി ഗവ. താലൂക്ക് ആശുപത്രിയിൽ പ്രവേശിപ്പിച്ചെങ്കിലും രാത്രിയോടെ മരിക്കുകയായിരുന്നു. കാലിൽ ഓപ്പറേഷനെത്തുടർന്ന് ഇവർ വീട്ടിൽ വിശ്രമത്തിലായിരുന്നു.

കുറ്റ്യാടിയിൽ വയോധികയുടെ മരണം; പേരമകൻ അറസ്റ്റിൽ

Kuttiadi

മൊകേരി : മൊകേരി ഗവ. കോളേജിൽ കെമിസ്ട്രി, ഫിസിക്സ്, ഹിന്ദി, കോമേഴ്സ്, ഇക്കണോമിക്സ് എന്നീ വിഷയങ്ങളിൽ അതിഥി അധ്യാപകരെ ആവശ്യമുണ്ട്. ബന്ധപ്പെട്ട വിഷയത്തിൽ 55 ശതമാനം മാർക്കോടെയുള്ള ബിരുദാനന്തര ബിരുദം, നെറ്റ്/ പി.എച്ച്.ഡി യോഗ്യതയുള്ളവരും കോഴിക്കോട് കോളേജ് വിദ്യാഭ്യാസ ഡെപ്യൂട്ടി ഡയറക്ടറുടെ ഗസ്റ്റ്അധ്യാപക പാനലിൽ ഉൾപ്പെട്ടവരും ആയിരിക്കണം.
മേൽപ്പറഞ്ഞ യോഗ്യതയുള്ള ഉദ്യോഗാർഥികളുടെ അഭാവത്തിൽ ബന്ധപ്പെട്ട വിഷയത്തിൽ 55 ശതമാനം മാർക്കോടെയുള്ള ബിരുദാനന്തര ബിരുദധാരികളെയും പരിഗണിക്കും. താല്പര്യമുള്ളവർ കോളേജ് വെബ്സൈറ്റിൽ നൽകിയിട്ടുള്ള അപേക്ഷ ഫോം പൂരിപ്പിച്ച് മേയ് 25നകം സമർപ്പിക്കണം. അപേക്ഷയുടെ മാതൃക ഓഫീസിൽ നിന്നും കോളേജ് വെബ്സൈറ്റിൽ നിന്നും ലഭ്യമാവുന്നതാണ്. വെബ്സൈറ്റ് : www.govtcollegemokeri.ac.in ഫോൺ: 9947112244

മൊകേരി ഗവ. കോളേജിൽ അധ്യാപക നിയമനം

വളയം : ജാതിയേരിയിൽ വളയം സ്വദേശികളായ യുവാക്കളെ ആക്രമിച്ച് പരിക്കേൽപ്പിച്ച സംഭവത്തിൽ രണ്ടുപേർ അറസ്റ്റിൽ. ജാതിയേരി സ്വദേശികളായ പീടികയിൽ റസാഖ് (53), പീടികയിൽ ഷഫീഖ് (28) എന്നിവരാണ് അറസ്റ്റിലായത്. കഴിഞ്ഞ തിങ്കളാഴ്ച രാത്രി എട്ടരയോടെയാണ് കേസിനാസ്പദമായ സംഭവം.
ജാതിയേരിയിലെ കടയ്ക്ക് സമീപം ബൈക്ക് നിർത്തി വെള്ളം കുടിക്കുന്നതിനിടയിൽ വാഹനം നിർത്തിയതിനെ ചോദ്യംചെയ്ത് ഒരു സംഘം ആളുകൾ യുവാക്കളെ മർദിക്കുകയായിരുന്നു. വളയം തീക്കുനിയിലെ ചപ്പാരച്ചംകണ്ടിയിൽ അമൽബാബു, അഭിനന്ദ്, വിഷ്ണു, അർജുൻ എന്നിവർക്കാണ് മർദനമേറ്റത്. സംഘർഷത്തിനിടെ ഒരു യുവാവ് കടയിൽനിന്ന്‌ സോഡാകുപ്പി എടുത്ത് പൊട്ടിച്ചശേഷം അമൽ ബാബുവിനെ കുത്തിപ്പരിക്കേൽപ്പിക്കുകയായിരുന്നു.
കണ്ണിന് താഴെ മുറിവേറ്റ അമലിനെ വളയത്തെ സ്വകാര്യ ആശുപത്രിയിൽ പ്രാഥമികചികിത്സ നൽകിയശേഷം വിദഗ്ധ ചികിത്സയ്ക്കായി കോഴിക്കോട്ടേക്ക് മാറ്റി. അമൽ ബാബുവിന്റെ പരാതിയിൽ വധശ്രമം ഉൾപ്പടെയുള്ള വകുപ്പുകൾ ചുമത്തിയാണ് കേസെടുത്തത്. കേസ് രജിസ്റ്റർ ചെയ്തതിന് പിന്നാലെ പ്രതികൾ ഒളിവിൽ പോവുകയായിരുന്നു. അക്രമത്തിൽ രണ്ട് പേർ ഒളിവിലാണ്.

വളയത്ത് യുവാവിന് കുത്തേറ്റ സംഭവം; രണ്ടുപേർ അറസ്റ്റിൽ

Nadapuram

തിരുവനന്തപുരം: കേരളത്തില്‍ അടുത്ത അഞ്ച് ദിവസം ഇടി, മിന്നല്‍, കാറ്റ് എന്നിവയോടുകൂടിയ മഴക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്‍റെ മുന്നറിയിപ്പ്. തമിഴ്നാടിന്‍റെ തെക്കന്‍ തീരദേശത്തിന് മുകളിലായി ചക്രവാതചുഴിയും ഇവിടെനിന്ന് വടക്കന്‍ കര്‍ണാടകവരെ ന്യൂനമര്‍ദ പാത്തിയും രൂപപ്പെട്ടിട്ടുണ്ട്. വടക്കന്‍ കേരളത്തിന് മുകളിലായി മറ്റൊരു ചക്രവാതചുഴിയും നിലനില്‍ക്കുന്ന സാഹചര്യത്തിലാണ് കേരളത്തിൽ മഴ വ്യാപകമാകുന്നതെന്ന് മുന്നറിയിപ്പിൽ പറയുന്നു.
ഒറ്റപ്പെട്ട സ്ഥലങ്ങളില്‍ മെയ് 20-22 തീയതികളില്‍ അതിതീവ്രമായ മഴയ്ക്കും മെയ് 20 മുതല്‍ 24 വരെ ഒറ്റപ്പെട്ട സ്ഥലങ്ങളില്‍ ശക്തമായ/അതി ശക്തമായ മഴക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ മെയ് 22-ഓടെ ന്യൂനമര്‍ദ്ദം രൂപപ്പെടാന്‍ സാധ്യതയുണ്ട്. ഇത് വടക്കുകിഴക്കന്‍ ദിശയില്‍ സഞ്ചരിച്ച് മെയ് 24 രാവിലെയോടെ മധ്യ ബംഗാള്‍ ഉള്‍കടലില്‍ തീവ്ര ന്യൂനമര്‍ദമായി ശക്തി പ്രാപിച്ചേക്കുമെന്നും മുന്നറിയിപ്പിൽ പറയുന്നു.
കേരളത്തില്‍ അതിതീവ്ര മഴക്ക് സാധ്യതയുള്ളതിനാല്‍ വിവിധ ജില്ലകളില്‍ കേന്ദ്ര കാലാവസ്ഥാ വകുപ്പ് റെഡ്, ഓറഞ്ച്, മഞ്ഞ അലര്‍ട്ട് പ്രഖ്യാപിച്ചു.
റെഡ് അലര്‍ട്ട്
20-05-2024 :പത്തനംതിട്ട, കോട്ടയം, ഇടുക്കി
21-05-2024 :പത്തനംതിട്ട, കോട്ടയം, ഇടുക്കി
22-05-2024 :പത്തനംതിട്ട
ഒറ്റപ്പെട്ടയിടങ്ങളില്‍ അതിതീവ്രമായ മഴക്കുള്ള സാധ്യതയാണ് പ്രവചിച്ചിരിക്കുന്നത്. ഇവിടങ്ങളിൽ 24 മണിക്കൂറില്‍ 204.4 മില്ലി മീറ്ററില്‍ കൂടുതല്‍ മഴ ലഭിക്കുമെന്നാണ് പ്രവചനം.
ഓറഞ്ച് അലര്‍ട്ട്
20-05-2024: തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്
21-05-2024: തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂര്‍
22-05-2024: തിരുവനന്തപുരം, കൊല്ലം, ആലപ്പുഴ, കോട്ടയം, ഇടുക്കി, എറണാകുളം
23-05-2024: തിരുവനന്തപുരം, കൊല്ലം, പത്തനംതിട്ട, ആലപ്പുഴ
ഒറ്റപ്പെട്ടയിടങ്ങളില്‍ അതിശക്തമായ മഴയ്ക്കുള്ള സാധ്യതയാണ് ഇവിടങ്ങളിൽ പ്രവചിച്ചിരിക്കുന്നത്. 24 മണിക്കൂറില്‍ 115.6 മില്ലീമീറ്റർ മുതല്‍ 204.4 മില്ലീമീറ്റർ വരെ മഴ ലഭിക്കുമെന്നാണ് പ്രവചനം.
മഞ്ഞ അലര്‍ട്ട്
20-05-2024 : വയനാട്, കണ്ണൂര്‍, കാസറഗോഡ്
21-05-2024 :പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസറഗോഡ്
22-05-2024 : തൃശ്ശൂര്‍, പാലക്കാട്, മലപ്പുറം, കോഴിക്കോട്
23-05-2024 : കോട്ടയം, ഇടുക്കി, എറണാകുളം
24-05-2024 : ആലപ്പുഴ, എറണാകുളം, തൃശ്ശൂര്‍, കണ്ണൂര്‍, കാസറഗോഡ്
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുമെന്നാണ് മുന്നറിയിപ്പ്.
വിനോദ സഞ്ചാര കേന്ദ്രങ്ങൾക്ക് നിയന്ത്രണം
റെഡ്, ഓറഞ്ച് അലെർട്ടുകൾ പ്രഖ്യാപിക്കപ്പെട്ട ജില്ലകളിലും സമീപ ജില്ലകളിലുമുള്ള വെള്ളച്ചാട്ടം, ജലാശയങ്ങളുമായി ബന്ധപ്പെട്ട മറ്റ് വിനോദ സഞ്ചാര കേന്ദ്രങ്ങൾ എന്നിവയ്ക്ക് നിയന്ത്രണങ്ങൾ ഏർപ്പെടുത്തണമെന്ന് വിനോദസഞ്ചാര വകുപ്പിന് ദുരന്തനിവാരണ അതോറിറ്റി മുന്നറിയിപ്പ് നൽകി. കാലാവസ്ഥ സംബന്ധിച്ച മുന്നറിയിപ്പുകൾ പിൻവലിക്കുന്നതുവരെ നിയന്ത്രണങ്ങൾ തുടരണം.
മണ്ണിടിച്ചിൽ, ഉരുൾപൊട്ടൽ സാധ്യതയുള്ള മലയോര മേഖലകളിലും മഴ അവസാനിക്കുന്നതുവരെ നിയന്ത്രണങ്ങൾ ഏർപ്പെടുത്തണം. ഇത്തരം സ്ഥലങ്ങളിലേക്കുള്ള റോഡുകളിൽത്തന്നെ മണ്ണിടിച്ചിൽ സാധ്യത ഉള്ളയിടങ്ങളിൽ സുരക്ഷ ബോർഡുകൾ സ്ഥാപിക്കുകയും ആവശ്യമായ യാത്ര നിയന്ത്രണങ്ങൾ ഏർപ്പെടുത്തുകയും ചെയ്യണമെന്നും മുന്നറിയിപ്പിൽ പറയുന്നു.

കേരളത്തിൽ പരക്കെ ശക്തമായ മഴയ്ക്ക് സാധ്യത: വിവിധ ജില്ലകളിൽ അലേർട്ട്

മണിയൂർ: ആർ.ജെ ഡി സംസ്ഥാനകമ്മിറ്റിയുടെ നേതൃത്വത്തിൽ മെയ് 28 ന് നടക്കുന്ന വീരേന്ദ്രകുമാർ അനുസ്മരണ പരിപാടി വിജയിപ്പിക്കാൻ ആർ.ജെ.ഡി. മണിയൂർ പഞ്ചായത്ത് കമ്മിറ്റി തീരുമാനിച്ചു. പാർട്ടിയുടെ പഞ്ചായത്ത് പ്രവർത്തക കൺവെൻഷൻ ജൂൺ 8 ന് മുതവനയിൽ ചേരും. യോഗത്തിൽ ടി.എൻ. മനോജ് അധ്യക്ഷത വഹിച്ചു. ജില്ലാ വൈസ് പ്രസിഡണ്ട് കെ.പി.കുഞ്ഞിരാമൻ, സി. വിനോദൻ ,കെ.കെ.ഹരിദാസൻ , ഒ.പി.ചന്ദ്രൻ , ടി.രാഘവൻ , ടി.സാജിദ് , വിജയൻ , മനോജ് ചിറങ്കര എന്നിവർ സംസാരിച്ചു.

വീരേന്ദ്രകുമാർ അനുസ്മരണം വിജയിപ്പിക്കും

Inshort

അഴിയൂർ: മഴക്കാലപൂർവ്വ ശുചീകരണ പ്രവർത്തനങ്ങളുമായി ബന്ധപ്പെട്ട് പഞ്ചായത്ത്തല വ്യാപാരി പ്രതിനിധികളുടെ യോഗം ചേർന്നു. മെയ് 21ന് ചൊവ്വാഴ്ച കാലത്ത് 10 മണി വരെ അഴിയൂർ പഞ്ചായത്തിൽ വ്യാപാരികൾ സ്ഥാപനങ്ങൾ അടച്ച് ശുചീകരണ പ്രവർത്തനങ്ങൾ നടത്തും. പഞ്ചായത്തിൻ്റെ നേതൃത്വത്തിൽ നടന്ന് വരുന്ന ശുചിത്വ പ്രവർത്തനങ്ങളുമായി വ്യാപാരികൾ പൂർണ്ണമായും സഹകരിക്കും. ഇതിലൂടെ ലഭിക്കുന്ന അജൈവ മാലിന്യങ്ങൾ ഹരിത കർമ്മ സേന വഴി ശേഖരിക്കും. ശുചിത്വ ഹർത്താലുമായി മുഴുവൻ വ്യാപാരികളും ടൗണുകൾ കേന്ദ്രീകരിച്ചുള്ള ഓട്ടോറിക്ഷ- ചുമട്ട് തൊഴിലാളികളും സന്നദ്ധ പ്രവർത്തകരും സഹകരിക്കണമെന്ന് യോഗം അഭ്യർത്ഥിച്ചു.&nbsp;
അഴിയൂർ ചുങ്കം, മാഹി റെയിൽവെ സ്റ്റേഷൻ, കുഞ്ഞിപ്പള്ളി, മുക്കാളി എന്നീ ടൗണുകളിൽ ശുചീകരണം നടത്തും. ഓരോ വ്യാപാരികളും അവരുടെ സ്ഥാപനവും പരിസരങ്ങളും ശുചീകരിക്കും. ഗ്രാമപഞ്ചായത്ത് പ്രസിഡണ്ട് ആയിഷ ഉമർ അധ്യക്ഷത വഹിച്ചു. അസിസ്റ്റൻ്റ് സെക്രട്ടറി സുനീർ കാമ്പയിൻ വിശദീകരിച്ചു. വ്യാപാരി വ്യവസായി ഏകോപന സമിതി ഭാരവാഹികളായ സാലിം പുനത്തിൽ, സിടിസി ബാബു, മോഹൻകുമാർ, രജീഷ് കെ സി എന്നിവർ സംബന്ധിച്ചു.

അഴിയൂരിൽ ശുചിത്വ ഹർത്താൽ ആചരിക്കും

ബെംഗളൂരു: യുവതിയെ മടിയിലിരുത്തി ഇരുചക്രവാഹനം ഓടിച്ച യുവാവ് അറസ്റ്റിൽ. വെള്ളിയാഴ്ച ബെം​ഗളൂരു ഇൻ്റർനാഷണൽ എയർപോർട്ട് റോഡിലായിരുന്നു സംഭവം. ബെം​ഗളൂരു സിറ്റി പോലീസാണ് യുവാവിനെതിരേ നടപടിയെടുത്തത്. യുവതിയെ മടിയിലിരുത്തി യുവാവ് ഇരുചക്രവാഹനം ഓടിക്കുന്നതിന്റെ ദൃശ്യങ്ങൾ സാമൂഹ്യമാധ്യമങ്ങളിൽ പ്രചരിച്ചിരുന്നു. യുവാവിന്റെ തോളിൽ കൈ വെച്ചായിരുന്നു യുവതി ഇരുന്നിരുന്നത്. ഇരുവരും ഹെൽമറ്റും ധരിച്ചിരുന്നില്ല. ഇതിന് പിന്നാലെയാണ് ബെം​ഗളൂരു സിറ്റി പോലീസ് യുവാവിനെതിരേ നടപടിയെടുത്തത്.
സംഭവത്തിന്റെ വീഡിയോ ദൃശ്യങ്ങൾ ബെം​ഗളൂരു ട്രാഫിക് പോലീസും പങ്കുവച്ചിട്ടുണ്ട്. അഭ്യാസത്തിനുള്ള വേദിയല്ല റോഡുകൾ എന്ന് ചൂണ്ടിക്കാട്ടിയാണ് പോലീസ് വീഡിയോ പങ്കുവച്ചിരിക്കുന്നത്. ഉത്തരവാദിത്വത്തോടെ വാഹനമോടിക്കണമെന്നും അധികൃതർ ഓർമിപ്പിച്ചു.
പോലീസും പങ്കുവെച്ചതോടെ വീഡിയോ സാമൂഹ്യമാധ്യമങ്ങളിൽ വൈറലായി. ഇതോടെ, നിരവധി പേർ അഭിപ്രായപ്രകടനവുമായി രം​ഗത്തെത്തി. വാഹനമോടിച്ച യുവാവിനെതിരേ മാത്രം എന്തുകൊണ്ട് നടപടിയെടുത്തുവെന്ന് ചിലർ ചോദിച്ചു. ഇരുവരും ശിക്ഷിക്കപ്പെടണമെന്നും നിരുത്തരവാദപരമായാണ് ഇരുവരും പെരുമാറിയതെന്നും പലരും ചൂണ്ടിക്കാണിക്കുന്നു.

യുവതിയെ മടിയിലിരുത്തി ബൈക്കിൽ അഭ്യാസം; യുവാവ് അറസ്റ്റിൽ

National

കൊയിലാണ്ടി: കേരളാ സീനിയർ സിറ്റിസൺ ഫോറം വീണ്ടും സജീവമാകുന്നു. ഉള്ള്യേരി പെൻഷൻ ഭവനിൽ ചേർന്ന ജില്ലാ കമ്മിറ്റി വിപുലമായ പരിപാടികൾ മുന്നോട്ട് വെക്കുകയും, വിശദമായ ചർച്ചകൾക്ക് വിധേയമാക്കുകയും ചെയ്തു. ക്ഷേമപെൻഷൻ കുടിശ്ശിക ഉടൻ വിതരണം ചെയ്യുക, സർക്കാർ രുപീകരിക്കന്ന വയോജന കൗൺസിലിൽ സീനിയർ സിറ്റിസൺ ഫോറം അംഗങ്ങളെ ഉൾപ്പെടുത്തുക എന്നീ ആവശ്യങ്ങളും മുന്നോട്ട് വെച്ചു. ഇ.കെ അബൂബക്കർ അധ്യക്ഷത വഹിച്ചു.&nbsp;
സോമൻ ചാലിൽ റിപ്പോർട്ട് അവതരിപ്പിച്ചു. കെ.പി.വിജയ, സ്റ്റേറ്റ് വൈസ് പ്രസിഡണ്ട് ബാലൻ കുറുപ്പ്, മുൻ സംസ്ഥാന സെക്രട്ടറി പൂതേരി ദാമോദരൻ നായർ, കെ.കെ.ഗോവിന്ദൻ, കുട്ടി, ആർ.പി.രവീന്ദ്രൻ, ഇബ്രാഹിം തിക്കോടി, രാജപ്പൻ എസ്.നായർ, പൊന്നാറത്ത് ബാലൻ, ടി.കെ.ബാലൻ, ഒ.കുഞ്ഞിരാമൻ, സി.അഹമ്മദ് കുട്ടി, ഒ.രാധാകൃഷ്ണൻ, യു.പി.കുഞ്ഞികൃഷ്ണൻ, ടി.ഇ.കൃഷ്ണൻ, ബാലൻ കോട്ടട, വി.ശിവദാസൻ, ചന്ദ്രൻ കരിപ്പാലി, ടി.എം.അഹമ്മദ്, എം.കുട്ടികൃഷ്ണൻ, ഗിരിജാ ഭായ്, ഭാസ്ക്കരൻ നമ്പ്യാർ എന്നിവർ പങ്കെടുത്തു.

സീനിയർ സിറ്റിസൺ ഫോറം ജില്ലാ കമ്മിറ്റി യോഗം ചേർന്നു

ആയഞ്ചേരി: മഴക്കാല പൂർവ്വ ശുചീകരണത്തിൻ്റെ ഭാഗമായി ആയഞ്ചേരി ഗ്രാമ പഞ്ചായത്ത് 12-ാം വാർഡ് ശുചിത്വ സമിതിയുടെ നേതൃത്വത്തിൽ അഞ്ച്‌ സ്ഥലങ്ങളിൽ പൊതു ഇടശുചീകരണം നടത്തി. കെ.വി പീടിക, മാക്കം മുക്ക് ബസ്സ് സ്റ്റോപ്പ്, കടമേരി എൽ പി സ്കൂൾ പരിസരം, ആയഞ്ചേരി തെരുവിൻ താഴ, കുറ്റിവയൽ എന്നിവിടങ്ങളിലാണ് ബഹുജന പങ്കാളിത്തത്തോടെ ശുചീകരിച്ചത്. പഞ്ചായത്ത് ആരോഗ്യ-വിദ്യഭ്യാസ സ്റ്റാൻ്റിഗ് കമ്മിറ്റി ചെയർമാൻ ടി.വി. കുഞ്ഞിരാമൻ ഉദ്ഘാടനം ചെയ്തു. ജൂനിയർ ഹെൽത്ത് ഇൻസ്പെക്ടർ ഇന്ദിര, കുടുബശ്രീ സി ഡി എസ്സ് അംഗം നിഷ പി , ആശാ വർക്കർ ചന്ദ്രി, ഹരിത കർമ്മസേനാഗം ഷിജ, തൊഴിലുറപ്പ് മേറ്റ്മാരായ ദിവ്യ സി.എം, വിജില പി.സി എന്നിവർ വിവിധ കേന്ദ്രങ്ങളിൽ നേതൃത്വം നൽകി.

പൊതു ഇടശുചീകരണം നടത്തി

വടകര: ഓർക്കാട്ടേരി ഗവൺമെൻ്റ് ഹൈസ്കൂളിലെ 1982 വർഷത്തെ എസ് എസ് എൽ സി പഠന ഗ്രൂപ്പായ സതീർത്ഥ്യർ- 82 സ്കൂളിലേക്ക് ആവശ്യമായ ആംപ്ളി ഫൈയർ കൈമാറി. സ്കൂളിൽ വച്ച് നടന്ന ചടങ്ങിൽ പ്രധാനാധ്യാപിക റീന ഏറ്റുവാങ്ങി. ചടങ്ങിൽ സതീർത്ഥ്യരായ പവിത്രരാജൻ കെ.കെ, സുനിൽകുമാർ കെ., രാജീവൻ കെ., എം.ആർ.വിജയൻ, രാധാകൃഷ്ണൻ ടി, അബ്ദുൾ ലത്തീഫ് , എം.ടി. ബാബു, സുശീല കെ., പ്രസന്നകുമാരി, എ.കെ.രതി, രമ, രാധ, ഗീത എന്നിവർ പങ്കെടുത്തു.

സ്കൂളിലേക്ക് ആംപ്ളി ഫൈയർ കൈമാറി

ദുബൈ: ഗൾഫ് സുപ്രഭാതം ദുബൈ എഡിഷന് പ്രൗഢ ഗംഭീര തുടക്കം. സുപ്രഭാതം ദശവാർഷികാഘോഷത്തോടനുബന്ധിച്ച് പ്രഖ്യാപിച്ച എട്ടാം എഡിഷൻ ദുബൈ അൽ ബറാഹയിലെ വിമൻസ് അസോസിയേഷൻ ഓഡിറ്റോറിയത്തിൽ സമസ്ത കേരള ജംഇയ്യത്തുൽ ഉലമ പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങൾ പ്രകാശനം ചെയ്തു. ഗൾഫ് സുപ്രഭാതം ചെയർമാൻ സൈനുൽ ആബിദ് സഫാരി അധ്യക്ഷനായി. ലുലു ഗ്രൂപ്പ് ചെയർമാനും മാനേജിങ് ഡയരക്ടറുമായ പത്മശ്രീ ഡോ. എം.എ യൂസഫലി ഓൺലൈനിൽ സന്ദേശം നൽകി. ഗൾഫ് സുപ്രഭാതം പ്രത്യേക പതിപ്പ് സമസ്ത ജനറൽ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാർ പ്രകാശനം ചെയ്തു.
ദുബൈയിലെ ഇന്ത്യയുടെ കോൺസുൽ ജനറൽ സതീഷ് കുമാർ ശിവൻ മുഖ്യപ്രഭാഷണം നടത്തി. ദുബൈ മീഡിയ പ്രിൻ്റിങ് ആൻഡ് ഡിസ്ട്രിബ്യൂഷൻ സി.ഇ.ഒ ഫൈസൽ അബ്ദുല്ലയും സന്ദേശം നൽകി. ഗൾഫ് സുപ്രഭാതം ഇ- പേപ്പർ ലോഞ്ചിങ് കേരള പൊതുമരാമത്ത്, ടൂറിസം മന്ത്രി പി.എ മുഹമ്മദ് റിയാസ് നിർവഹിച്ചു. കെ. മുരളീധരൻ എം.പി, സമസ്ത സെക്രട്ടറി എം.ടി അബ്ദുല്ല മുസ്‌ലിയാർ, ട്രഷറർ പി.പി ഉമർ മുസ്‌ലിയാർ കൊയ്യോട്, കേന്ദ്ര മുശാവറ അംഗം അബ്ദുസലാം ബാഖവി, സുപ്രഭാതം മാനേജിങ് ഡയരക്ടർ അബ്ദുൽ ഹമീദ് ഫൈസി അമ്പലക്കടവ് എന്നിവർ പ്രഭാഷണം നടത്തി.&nbsp;
ഗൾഫ് സുപ്രഭാതം ജനറൽ കൺവീനർ സയ്യിദ് അബ്ദുറഹ്മാൻ തങ്ങൾ, സമസ്ത വിദ്യാഭ്യാസ ബോർഡ് മാനേജർ കെ. മോയിൻകുട്ടി, ജംഇയ്യത്തുൽ മുഅല്ലിമീൻ പരീക്ഷാ ബോർഡ് സംസ്ഥാന ചെയർമാൻ കുടക് അബ്ദുറഹ്മാൻ മുസ്‌ലിയാർ, സുപ്രഭാതം സി.ഇ.ഒ മുസ്തഫ മുണ്ടുപാറ, റസിഡൻ്റ് എഡിറ്റർ സത്താർ പന്തലൂർ, എസ്.കെ.എസ്.എസ്.എഫ് യു.എ.ഇ പ്രസിഡൻ്റ് ഷുഐബ് തങ്ങൾ, പ്രവാസി സംഘടനാ പ്രതിനിധികളായ എസ്.എം ജാബിർ, ഷിജു ബഷീർ, ഗൾഫ് സുപ്രഭാതം വൈസ് ചെയർമാൻ ജലീൽ ഹാജി ഒറ്റപ്പാലം, കെ.എസ്. അലി തങ്ങൾ കുന്പോൽ എന്നിവർ സംസാരിച്ചു. 2014ൽ ആറ് എഡിഷനുകളോടെ പ്രവർത്തനമാരംഭിച്ച സുപ്രഭാതത്തിന് നിലവിൽ തിരുവനന്തപുരം, കൊച്ചി, തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ എന്നിവിടങ്ങളിലാണ് എഡിഷനുകളുള്ളത്.

ഗൾഫ് സുപ്രഭാതം ദുബൈ എഡിഷന് പ്രൗഢ ഗംഭീര തുടക്കം

Gulf

കൊച്ചി: പെരുമ്പാവൂരില്‍ നിയമവിദ്യാര്‍ഥിനിയെ ബലാത്സംഗംചെയ്ത് കൊലപ്പെടുത്തിയ കേസില്‍ പ്രതി അമീറുല്‍ ഇസ്ലാമിന് വധശിക്ഷ വിധിച്ചത് ഹൈക്കോടതി ശരിവെച്ചു. പ്രതിയുടെ വധശിക്ഷയ്ക്ക് അനുമതി തേടിയുള്ള പ്രോസിക്യൂഷന്റെ അപേക്ഷയിലാണ് ഹൈക്കോടതി ഡിവിഷന്‍ ബെഞ്ച് അനുകൂല വിധി പ്രസ്താവിച്ചത്. വധശിക്ഷ റദ്ദാക്കണമെന്ന പ്രതിയുടെ ഹര്‍ജിയും കോടതി പരിഗണിച്ചിരുന്നു. കൊച്ചിയിലെ വിചാരണക്കോടതിയാണ് നേരത്തെ അമിറുള്‍ ഇസ്ലാമിനെ വധശിക്ഷയ്ക്ക് വിധിച്ചത്. അപൂര്‍വങ്ങളില്‍ അത്യപൂര്‍വവും അതിക്രൂരവുമായ കൊലപാതകമെന്ന് വിലയിരുത്തിയാണ് എറണാകുളം പ്രിന്‍സിപ്പല്‍ സെഷന്‍സ് കോടതി പ്രതിക്ക് വധശിക്ഷ വിധിച്ചത്.
2016 ഏപ്രില്‍ 28-നായിരുന്നു നിയമവിദ്യാര്‍ഥിനിയെ ക്രൂരമായി കൊല്ലപ്പെട്ട നിലയില്‍ കണ്ടെത്തിയത്. വീടിനുള്ളില്‍ മരിച്ച നിലയില്‍ കണ്ടെത്തിയ യുവതി ലൈംഗിക പീഡനത്തിന് ഇരയായെന്നും ശരീരത്തില്‍ 38 മുറിവുകളുണ്ടെന്നും പോസ്റ്റുമോര്‍ട്ടം റിപ്പോര്‍ട്ടില്‍ നിന്ന് വ്യക്തമായി. പിന്നീട് നടത്തിയ അന്വേഷണത്തില്‍ ഏതാണ്ട് രണ്ടാഴ്ചയ്ക്ക് ശേഷം ജൂണ്‍ 16-നാണ് അസം സ്വദേശിയായ അമീറുല്‍ ഇസ്ലാമിനെ പോലീസ് അറസ്റ്റ് ചെയ്യുന്നത്. തുടര്‍ന്ന് മാസങ്ങള്‍ നീണ്ട വിചാരണയ്ക്കൊടുവിലാണ് അമീറുള്‍ ഇസ്ലാമിനെ കൊച്ചിയിലെ വിചാരണക്കോടതി വധശിക്ഷയ്ക്ക് വിധിച്ചത്. ഈ വിധിക്കെതിരെയാണ് അമീറുല്‍ ഇസ്ലാം ഹൈക്കോടതിയില്‍ അപ്പീല്‍ നല്‍കിയത്. താന്‍ നിരപരാധിയാണെന്നും തെളിവുകള്‍ പോലീസ് കെട്ടിച്ചമച്ചതാണെന്നും യുവതിയെ മുന്‍പരിചയമില്ലെന്നുമായിരുന്നു അമീറിന്റെ വാദം.
നിലവിലെ നിയമം അനുസരിച്ച് വിചാരണക്കോടതി വധശിക്ഷ വിധിച്ചാല്‍ അതിന് ഹൈക്കോടതിയുടെ അനുമതി ആവശ്യമാണ്. ഈ സാഹചര്യത്തിലാണ് പ്രോസിക്യൂഷന്‍ വധശിക്ഷയ്ക്ക് അനുമതി തേടി ഹൈക്കോടതിയില്‍ അപേക്ഷനല്‍കിയത്.

പെരുമ്പാവൂരിലെ നിയമവിദ്യാര്‍ഥിനിയുടെ കൊലപാതകം; പ്രതി അമീറുല്‍ ഇസ്ലാമിന് തൂക്കൂകയര്‍തന്നെ

പ്ലേയോഫിനായുള്ള അവസാന മൽത്സരത്തിൽ വില്ലനായി മഴ. രാജസ്ഥാൻ റോയൽസ്– കൊൽക്കത്ത നൈറ്റ് റൈഡേഴ്സ് മത്സരമാണ് മഴമൂലം ഉപേക്ഷിച്ചത്. മഴ കുറഞ്ഞ് രാത്രി 10.30ന് ടോസ് ഇട്ടെങ്കിലും വീണ്ടും മഴ കനത്തതോടെയാണ് മത്സരം ഉപേക്ഷിക്കാൻ തീരുമാനിച്ചത്. മത്സരം ഉപേക്ഷിച്ച് പോയന്റ് പങ്കുവെച്ചതോടെ നെറ്റ് റണ്‍റേറ്റില്‍ രാജസ്ഥാനെ മറികടന്ന് സണ്‍റൈസേഴ്‌സ് ഹൈദരാബാദ് രണ്ടാം സ്ഥാനത്തേക്ക് കടക്കുകയായിരുന്നു. ഇതോടെ ഒന്നാം ക്വാളിഫയറില്‍ കയറാനുള്ള രാജസ്ഥാന്റെ ആഗ്രഹത്തിന് വിരാമമായി. നിലവിൽ പോയിന്റ് ടേബിളിൽ മൂന്നാം സ്ഥാനത്തുള്ള രാജസ്ഥാൻ എലിമിനേറ്ററില്‍ റോയല്‍ ചലഞ്ചേഴ്‌സ് ബെംഗളൂരുവിനെ നേരിടും. ഒന്നാം ക്വാളിഫയറില്‍ കൊല്‍ക്കത്തയും ഹൈദരാബാദും ഏറ്റുമുട്ടും. അഹമ്മദാബാദ് നരേന്ദ്ര മോദി സ്റ്റേഡിയത്തിൽ മേയ് 21-ചൊവ്വാഴ്ചയാണ് ആദ്യ ക്വാളിഫയര്‍. പിന്നാലെ മേയ് 22-ന് എലിമിനേറ്ററും നടക്കും. മേയ് 24-ന് ചെന്നൈ എം എ ചിദംബരം സ്റ്റേഡിയത്തിൽ വച്ച് രണ്ടാം ക്വാളിഫയറും നടക്കും. മേയ് 26-നാണ് ഫൈനൽ.

രാജസ്ഥാന് വിനയായി മഴ

2024 വർഷത്തിൽ മലയാള സിനിമാ ഇൻഡസ്ട്രിയിൽ വീണ്ടുമൊരു സൂപ്പർഹിറ്റുകൂടി. വിപിൻ ദാസിന്റെ സംവിധാനത്തിൽ കല്യാണം മുഖ്യപ്രമേയമാക്കി ഒരുങ്ങിയ 'ഗുരുവായൂരമ്പല നടയില്‍' നിറഞ്ഞ സദസ്സിൽ പ്രദർശനം തുടരുകയാണ്. ബേസിൽ, പൃഥ്വിരാജ്, നിഖിലാ വിമൽ, അനശ്വര രാജൻ എന്നിവർ മുഖ്യ വേഷങ്ങളിലെത്തുന്ന സിനിമയ്ക്ക് ആദ്യ ദിനം തന്നെ പോസിറ്റീവ് അഭിപ്രായം നേടാനായതോടെ ചിത്രം ബോക്സ് ഓഫീസില്‍ കുതിക്കുന്ന കാഴ്ച്ചയാണ്. സിനിമ ഇതുവരെ ആഗോളതലത്തിൽ നേടിയത് 42 കോടിയോളം രൂപയാണ്. ഇപ്പോഴിതാ ചിത്രം മറ്റൊരു റെക്കോര്‍ഡ് കൂടി നേടിയിരിക്കുകയാണ്. മലയാളത്തില്‍ ഈ വര്‍ഷം ഒരു ദിവസം ഏറ്റവുമധികം ഹൗസ്‍ഫുള്‍ ഷോകള്‍ നേടിയ ചിത്രമായി മാറിയിരിക്കുകയാണ് ഗുരുവായൂരമ്പല നടയില്‍. ഞായറാഴ്ച മാത്രം ചിത്രത്തിന് 720 ല്‍ ഏറെ ഹൗസ്‍ഫുള്‍ ഷോകളാണ് ലഭിച്ചത്. ഇന്ത്യയിലെ മാത്രം കണക്കാണ് ഇത്. ഇതില്‍ 600 ഷോകളും കേരളത്തിലാണ്.

'ഗുരുവായൂരമ്പല നടയില്‍' കല്ല്യാണം കളറായി

ചോറോട്: കുടുംബശ്രീ മിഷൻ സംസ്ഥാനത്ത് എല്ലാ വാർഡുകളിലും ഏ.ഡി. എസുകളിൽ അയൽക്കൂട്ട അംഗങ്ങൾക്കായി ഒരുക്കുന്ന പദ്ധതി 'എന്നിടം' ചോറോട് ഗ്രാമ പഞ്ചായത്ത് പതിനൊന്നാം വാർഡിൽ ഹരിശ്രീ അങ്കണവാടിയിൽ ആരംഭിച്ചു. മുൻ ഗ്രാമ പഞ്ചായത്ത് വൈസ് പ്രസിഡണ്ട് കെ. കെ. തുളസി ഉദ്ഘാടനം ചെയ്തു. അയൽകൂട്ട അംഗങ്ങൾക്കായി മാസത്തിൽ ഒരു ദിവസം വായനയും ചർച്ചയും കലാ-കായിക അഭിരുചികൾ പ്രകടിപ്പിക്കുന്നതിനും പരിപോഷിപ്പിക്കുന്നതിനും വേണ്ടിയാണ് എന്നിടം പദ്ധതി.&nbsp;
ഏ ഡി എസ് പ്രസിഡണ്ട് ഗീത എം.ടി.കെ. അധ്യക്ഷത വഹിച്ചു. പഞ്ചായത്ത് അംഗം പ്രസാദ് വിലങ്ങിൽ ആശംസയർപ്പിച്ചു. ചോറോട് അയൂർവേദ ആശുപത്രി മെഡിക്കൽ ഓഫീസർ ഡോ മോഹൻദാസ്, ചോറോട് കുടുംബ ആരോഗ്യ കേന്ദ്രം ജെ.എച്ച് ഐ സുനിൽകുമാർ എന്നിവർ വിവിധ വിഷയങ്ങളിൽ ക്ലാസ്സെടുത്തു. സി. ഡി. എസ് അംഗം ലീബ പി.ടി.കെ സ്വാഗതവും ജയശ്രീ കെ.പി. നന്ദിയും പറഞ്ഞു. കലാപരിപാടികളും നടന്നു.

'എന്നിടം' ഉദ്ഘാടനം ചെയ്തു

വടകര: ലോക്സഭാ തെരഞ്ഞെടുപ്പുമായി ബന്ധപ്പെട്ട് വടകര മണ്ഡലത്തിൽ വർഗീയ ചേരിതിരിവുണ്ടാക്കിയ വ്യാജ ‘കാഫിർ’ സ്ക്രീൻ ഷോട്ടിന് പിന്നിൽ സി.പി.എം കോഴിക്കോട് ജില്ല സെക്രട്ടറി പി.മോഹനന്റെ മകനുൾപ്പെടുന്ന സംഘമെന്ന് റവല്യൂഷണറി യൂത്ത്. യു.ഡി.എഫ് സ്ഥാനാർഥിയായ ഷാഫി പറമ്പിലിനെതിരെ നടത്തിയ കാഫിർ വർഗീയ പ്രചരണമുൾപ്പെടെ സകല വർഗീയ-അശ്ശീല പ്രചരണങ്ങളുടെയും കുന്തമുന സ്വന്തം വീടിന്റെ ഉമ്മറത്തേക്ക് എത്താറായപ്പോഴാണ് ‘സർവകക്ഷി സമാധനയോഗം’ വിളിക്കാൻ പി. മോഹനൻ രംഗത്തെത്തിയതെന്നും റവല്യൂഷണറി യൂത്ത് പ്രസ്താവനയിൽ ആരോപിച്ചു.
‘വടകരയുടെ മതേതത രാഷ്ട്രീയ ബോധ്യത്തെ വർഗീയ-അശ്ലീല പ്രചരണം കൊണ്ട് വിലക്കെടുക്കാൻ കച്ചകെട്ടിയിറങ്ങിയ അഭിനവ മാർക്സ് മുത്തപ്പൻമാരെ ജനം ഉടുമുണ്ടുരിഞ്ഞ് തെരുവിൽ വിചാരണ ചെയ്യാൻ തുടങ്ങിയപ്പോൾ സി.പി.എം കോഴിക്കോട് ജില്ല സെക്രട്ടറി പി. മോഹനന്‍റെ മനസ്സിൽ ഒരു ഒന്നൊന്നര ബോംബ് പൊട്ടി..!! സകല വർഗീയ-അശ്ശീല പ്രചരണങ്ങളുടെയും കുന്തമുന സ്വന്തം വീടിന്‍റെ ഉമ്മറത്തേക്ക് എത്താറായപ്പോൾ 'സർവകക്ഷി സമാധനയോഗം' വിളിക്കാൻ വെമ്പൽ കൊള്ളുന്ന മോഹനന്‍റെ ചേതോവികാരം എന്താണെന്ന് വടകരയിലെ രാഷ്ട്രീയ പ്രബുദ്ധരായ ജനത്തിനറിയാം..!! സ്വന്തം മകനുൾപ്പെടുന്ന സൈബർ ക്രിമിനലുകളുടെ ബുദ്ധിയിൽ വിരിഞ്ഞ 'കാഫിർ' വർഗീയ വിഷം ഭാര്യ ഏറ്റെടുത്ത് സോഷ്യൽ മീഡിയ വഴി പ്രചരിപ്പിച്ചാൽ ജനം കണ്ണടച്ച് വിശ്വസിക്കുമെന്നും അതുവഴി ജനങ്ങളെ ഭിന്നിപ്പിച്ച് രാഷ്ട്രീയ ലാഭം കൊയ്യാമെന്നും കരുതി ദിവാസ്വപ്നം കണ്ടുറങ്ങിയ മോഹനന് വടകരയിലെ ജനതയെ ഇനിയും മനസ്സിലായിട്ടില്ല..!!’ -റവല്യൂഷണറി യൂത്തിന്‍റെ കുറിപ്പിൽ പറയുന്നു.
51 വെട്ടിനാൽ ചന്ദ്രശേഖരന്‍റെ രാഷ്ട്രീയത്തെ ഇല്ലാതാക്കാൻ നടത്തിയ അരുംകൊലയുടെ അതേ ക്രിമിനൽ ബുദ്ധി തന്നെയാണ് മോഹനന്‍റെ വടകര മോഹസഫലീകരണത്തിനായി സ്വന്തം കുടുംബം ഒന്നടങ്കം വടകരയിൽ അശ്ശീല-വർഗീയ വിഷം തുപ്പാൻ ഇറങ്ങിയതിലൂടെ വ്യക്തമാകുന്നതെന്ന് അരിയാഹാരം കഴിക്കുന്ന ആർക്കും മനസ്സിലാവുന്നതേയുള്ളൂവെന്നും റവല്യൂഷണറി യൂത്ത് കുറ്റപ്പെടുത്തി.
പി. മോഹനന്‍റെയും സി.പി.എമ്മിന്‍റെയും രാഷ്ട്രീയ കുബുദ്ധിക്ക് മുമ്പിൽ ആത്മാഭിമാനത്തോടെ മതേതരത്വം മുറുകെ പിടിച്ച് ജനാധിപത്യ പോരാട്ടത്തിന് നേതൃത്വം നൽകിയ ഒരു ജനതയെ ലീഗ്-യു.ഡി.എഫ് നേതൃത്വം പണയം വെക്കരുതെന്നും പോസ്റ്റിൽ പറയുന്നു.

‘കാഫിർ’ സ്ക്രീൻ ഷോട്ടിന് പിന്നിൽ പി മോഹനന്റെ മകനുൾപ്പെടുന്ന സംഘം; ആരോപണവുമായി റവല്യൂഷണറി യൂത്ത്

സ്വർണവിലയിൽ വൻ വർധനവ് തുടരുന്നു. പവന് ഒറ്റയടിക്ക് 400 രൂപയുടെ വര്‍ധനവാണ് രേഖപ്പെടുത്തിയത്. ഇതോടെ 55,120 രൂപയാണ് ഇന്നത്തെ പവൻ വില. ഇന്നലെ 54,720 ആയിരുന്നു. 6890 ആണ് ഇന്നത്തെ ഗ്രാം വില.
രാജ്യാന്തര വിലയിലുണ്ടായ മാറ്റത്തിന്‍റെ ചുവട് പിടിച്ചാണ് കേരള വിപണിയിലും വിലവർധിച്ചത്. കഴിഞ്ഞ മാര്‍ച്ച് 29ന് ആണ് ആദ്യമായി സ്വര്‍ണവില 50,000 കടന്നത്. പലിശ നിരക്ക് മാറ്റമില്ലാതെ തൽസ്ഥിതി തുടരുമെന്ന യു.എസ് ഫെഡറൽ റിസർവിന്റെ പണനയ പ്രഖ്യാപനമാണ് വിലക്കുതിപ്പിന് കാരണം. നിക്ഷേപകർ വലിയതോതിൽ സ്വർണത്തിൽ താൽപര്യം കാട്ടുന്നതും വിലവർധന കാരണമായിട്ടുണ്ട്. സുരക്ഷിത നിക്ഷേപമായി കണ്ട്, നിക്ഷേപകര്‍ ഡോളറില്‍ നിന്നും ബോണ്ടില്‍ നിന്നും നിക്ഷേപം പിന്‍വലിച്ച് സ്വര്‍ണത്തിലേക്ക് ഒഴുക്കുന്നതാണ് വില വര്‍ധനക്ക് പിന്നില്‍.

സ്വർണവില 55,000 കടന്നു

കൊച്ചി: പറവൂരിൽ വെച്ച് മുഖ്യമന്ത്രിയെ കരിങ്കൊടി കാണിച്ച കേസ് ഹൈക്കോടതി റദ്ദാക്കി. കരിങ്കൊടി കാണിച്ചാൽ അപമാനിക്കലാകില്ലെന്നു പറഞ്ഞ കോടതി ഉദ്യോ​ഗസ്ഥരുടെ ജോലി തടസ്സപ്പെടുത്തിയെന്ന കേസും റദ്ദാക്കി.
നിസ്സാര കാര്യങ്ങൾക്ക് കേസെടുക്കുന്ന പ്രവണത വർധിച്ചുവരുന്നതായി കോടതി നിരീക്ഷിച്ചു. പ്രതിഷേധങ്ങൾക്കിടെ ചെറിയ രീതിയിലുള്ള ബലപ്രയോ​ഗം സ്വാഭാവികമാണ്. ചെറിയ വിഷയങ്ങളിലെ നിയമനടപടികൾ ഒഴിവാക്കണമെന്നും കോടതി വ്യക്തമാക്കി.2017-ലാണ് സംഭവം. പറവൂരിൽ മുഖ്യമന്ത്രിക്കെതിരേ കോൺഗ്രസ് പ്രവർത്തകർ കരിങ്കൊടി കാണിച്ചു നടത്തിയ പ്രതിഷേധത്തിലാണ് പോലീസ് കേസെടുത്തത്. ഉദ്യോ​ഗസ്ഥരുടെ ജോലി തടസ്സപ്പെടുത്തിയെന്ന കുറ്റവും ഇവർക്കെതിരേ ചുമത്തിയിരുന്നു. ഈ കേസ് റദ്ദാക്കണമെന്ന് ആവശ്യപ്പെട്ടാണ് പ്രവർത്തകർ ഹൈക്കോടതിയെ സമീപിച്ചത്

മുഖ്യമന്ത്രിയെ കരിങ്കൊടി കാണിച്ച കേസ് ഹൈക്കോടതി റദ്ദാക്കി

മലപ്പുറം: ഭരണഘടനാവിരുദ്ധ പരാമര്‍ശവുമായി ബന്ധപ്പെട്ട കേസില്‍ ഹൈക്കോടതി പുനരന്വേഷണത്തിന് ഉത്തരവിട്ട സാഹചര്യത്തില്‍ അന്വേഷണം നടക്കുമ്പോള്‍ സജി ചെറിയാന്‍ മന്ത്രിയായിരിക്കുന്നത് ശരിയല്ലെന്ന് മുസ്‌ലിം ലീഗ് ദേശീയ സെക്രട്ടറി പി.കെ കുഞ്ഞാലിക്കുട്ടി.
മുമ്പ് അന്വേഷണം നടക്കുമ്പോള്‍ മന്ത്രിയായിരിക്കുന്നത് ശരിയല്ലെന്ന് പറഞ്ഞാണ് അദ്ദേഹം കഴിഞ്ഞ തവണ രാജിവെച്ചത്. സമാന സാഹചര്യമാണ് ഇപ്പോഴുള്ളത്. സാങ്കേതികമായി, അന്വേഷണം നടക്കുന്ന ഘട്ടത്തില്‍ അദ്ദേഹം മന്ത്രിയായിരിക്കാന്‍ പാടില്ല. സംസ്ഥാനത്തെ പോലീസ് കേസ് അന്വേഷിക്കുമ്പോള്‍, ആ അന്വേഷണം ഫലപ്രദമായി നടക്കണമെങ്കില്‍ അദ്ദേഹം മന്ത്രിസ്ഥാനത്തു നിന്ന് മാറി നില്‍ക്കുക എന്നതാണ് കീഴ്‌വഴക്കം. അതുകൊണ്ടുതന്നെ അദ്ദേഹം രാജിവെയ്ക്കുന്നതാകും ഉത്തമമെന്നും കുഞ്ഞാലിക്കുട്ടി പറഞ്ഞു.

സജി ചെറിയാന്‍ മന്ത്രിയായി തുടരുന്നത് ശരിയല്ല; രാജിവെക്കുന്നതാണ് ഉചിതമെന്ന് കുഞ്ഞാലിക്കുട്ടി

തിരുവനന്തപുരം: ഹൈക്കോടതിയുടെ ഉത്തരവ് പരിശോധിച്ച് നിയമപരമായ നടപടികളുമായി മുന്നോട്ടുപോകുമെന്ന് മന്ത്രി സജി ചെറിയാൻ. ധാർമികപരമായ ഒരു പ്രശ്നവുമില്ല. പോലീസ് അന്വേഷിച്ചു. കീഴ്‌ക്കോടതി ആ റിപ്പോർട്ടിനെ സാധൂകരിക്കുന്ന തീരുമാനമെടുത്തു. അതിന് ശേഷമാണ് സിബിഐ അന്വേഷണം ആവശ്യപ്പെട്ട് ഒരാൾ ഹൈക്കോടതിയെ സമീപിച്ചത്.
അന്വേഷണത്തെ സംബന്ധിച്ചാണ് കോടതി പറഞ്ഞിട്ടുള്ളത്. കോടതി അന്വേഷിക്കാൻ പറഞ്ഞിട്ടുള്ള ഭാ​ഗമേതാണോ അതിന്റെ അടിസ്ഥാനത്തിൽ അന്വേഷിക്കട്ടേ. മുമ്പ് ധാർമികതയുടെ പേരിൽ രാജിവെച്ചു. ആ ധാർമികതയുടെ ഉത്തരവാദിത്വം കഴിഞ്ഞു. അതിന് ശേഷം കോടതി വിധിയുടെ അടിസ്ഥാനത്തിൽ മന്ത്രിയായി വീണ്ടും സത്യപ്രതിജ്ഞ ചെയ്തു. താനിപ്പോഴും തന്റെ ജോലി ചെയ്തുകൊണ്ടിരിക്കുകയാണ്.
തന്റെ പ്രസം​ഗത്തിലെ പരാമർശങ്ങളെ കുറിച്ചുള്ള കണ്ടെത്തലുകളിലേക്ക് ഹൈക്കോടതി കടന്നിട്ടില്ല. ഒരു കോടതി പറഞ്ഞു ശരി. അടുത്ത കോടതി പറഞ്ഞു തെറ്റ്. ഇതിന്റെ മുകളിൽ കോടതി ഉണ്ട്. നിയമപരമായ കാര്യങ്ങൾ പരിശോധിച്ചതിന് ശേഷം മാത്രമേ ഒരു അഭിപ്രായം പറയാൻ സാധിക്കുകയുള്ളൂവെന്നും മന്ത്രി പറഞ്ഞു.

നിയമപരമായ നടപടികളുമായി മുന്നോട്ടുപോകും;രാജി വെക്കില്ലെന്ന് സജി ചെറിയാൻ

പെര്‍ത്ത്: ഓസ്‌ട്രേലിയയില്‍ ക്രിക്കറ്റ് മത്സരത്തിനിടെ മുഖത്ത് പന്തിടിച്ചതിനെത്തുടര്‍ന്ന് അംപയര്‍ക്ക് ഗുരുതര പരിക്ക്. പെര്‍ത്തില്‍ നടന്ന ആഭ്യന്തര മത്സരത്തിനിടെയാണ് സംഭവം. ടോണി ഡെ നൊബ്രെഗ എന്ന് പേരുള്ള അംപയര്‍ക്കാണ് പരിക്കേറ്റത്. മുഖത്ത് ഗുരുതര പരിക്കേറ്റ ഇദ്ദേഹത്തെ ആശുപത്രിയില്‍ പ്രവേശിപ്പിച്ചു. ബാറ്ററുടെ സ്‌ട്രെയ്റ്റ് ഡ്രൈവ് നൊബ്രെഗയുടെ മുഖത്ത് വന്നിടിക്കുകയായിരുന്നു.
ഓസ്‌ട്രേലിയന്‍ ആഭ്യന്തര മത്സരത്തില്‍ നോര്‍ത്ത് പെര്‍ത്തും വെംബ്ലി ഡിസ്ട്രിക്ട്‌സും തമ്മിലുള്ള മത്സരം നിയന്ത്രിച്ചുകൊണ്ടിരിക്കേയാണ് സംഭവം. മുഖത്തെ എല്ലുകള്‍ക്ക് പൊട്ടലില്ലെങ്കിലും ശസ്ത്രക്രിയയ്ക്ക് വിധേയനാക്കേണ്ടി വന്നേക്കാം എന്നാണ് റിപ്പോര്‍ട്ടുകള്‍. മുഖത്തിന്റെ ഒരു ഭാഗത്തിനും കണ്‍പോളകള്‍ക്കും പരിക്കേറ്റിട്ടുണ്ട്.

ക്രിക്കറ്റ് മത്സരത്തിനിടെ സ്‌ട്രെയ്റ്റ് ഡ്രൈവില്‍ പന്ത് മുഖത്തിടിച്ചു; അംപയര്‍ക്ക് ഗുരുതര പരിക്ക്

കൊച്ചി: ഭരണഘടന വിരുദ്ധ പരാമർശത്തിൽ മന്ത്രി സജി ചെറിയാന് തിരിച്ചടി. സജി ചെറിയാനെതിരേ കുറ്റം നിലനിൽക്കില്ലെന്ന പോലീസ് റിപ്പോർട്ടും ഈ റിപ്പോർട്ട് അം​ഗീകരിച്ച മജിസ്ട്രേറ്റ് റിപ്പോർട്ടും ഹൈക്കോടതി തള്ളി. കേസിൽ പുനരന്വേഷണത്തിനും ഹൈക്കോടതി ഉത്തരവിട്ടു. സംസ്ഥാന പോലീസ് മേധാവി ക്രൈംബ്രാഞ്ചിലെ വിശ്വാസ്യതയുള്ള ഉദ്യോ​ഗസ്ഥനെക്കൊണ്ട് അന്വേഷിപ്പിക്കണമെന്നും കോടതി വ്യക്തമാക്കി. കേസിന്റെ അന്വേഷണവുമായി ബന്ധപ്പെട്ട് വലിയ പാളിച്ചകളാണ് സംഭവിച്ചിട്ടുള്ളത്. കൃത്യമായ മൊഴി രേഖപ്പെടുത്തുകയോ വേണ്ടുന്ന തെളിവുകൾ ശേഖരിക്കുകയോ ചെയ്തില്ല. വേദിയിൽ ഉണ്ടായിരുന്നവരുടെ മൊഴികൾ മാത്രമാണ് അന്വേഷണ ഉദ്യോ​ഗസ്ഥൻ രേഖപ്പെടുത്തിയിട്ടുള്ളതെന്നും കോടതി ചൂണ്ടികാട്ടി.
ഡിജിപിയുടെ നേതൃത്വത്തിലായിരിക്കണം അന്വേഷണമെന്നും കോടതി നിർദേശിച്ചിട്ടുണ്ട്. ജസ്‌റ്റിസ് ബെച്ചു കുര്യൻ തോമസിന്റെ ബെഞ്ചാണ് കേസ് പരിഗണിച്ചത്.കേസിൽ ക്ലീൻചിറ്റ് നൽകിയ പൊലീസ് റിപ്പോർട്ട് പരിഗണിച്ച് സജി ചെറിയാനെ മജിസ്‌ട്രേറ്റ് കോടതി കുറ്റവിമുക്തനാക്കിയിരുന്നു. ഇതിനെ ചോദ്യം ചെയ്തും സി.ബി.ഐ അന്വേഷണമാവശ്യപ്പെട്ടും അഡ്വ. എം. ബൈജു നോയലാണ് ഹൈക്കോടതിയെ സമീപിച്ചത്.&nbsp;
നാഷണൽ ഓണർ ആക്ടിന്റെ 2003ലെ ഭേദഗതി പ്രകാരം, പ്രസംഗത്തിലെ ചില വാചകങ്ങൾ ഭരണഘടനയോടുള്ള അനാദരമായി കരുതാമെന്ന് കോടതി നേരത്തെ തന്നെ ചൂണ്ടിക്കാട്ടിയിരുന്നു.''ഇന്ത്യയിൽ ഏറ്റവുമധികം ജനങ്ങളെ കൊള്ളയടിക്കാൻ പറ്റിയ ഭരണഘടനയാണ് എഴുതിവച്ചിരിക്കുന്നത്. ജനാധിപത്യം, മതേതരത്വം, കുന്തവും കുടച്ചക്രവുമൊക്കെ അതിന്റെ മൂലയിലുണ്ട്'' എന്നീ പ്രയോഗങ്ങളാണ് സജി ചെറിയാൻ നടത്തിയത്. മന്ത്രിയുടെ ശബ്ദപരിശോധന നടത്താതെയും ചില സാക്ഷിമൊഴികൾ തള്ളിയുമാണ് പൊലീസ് നിഗമനമെന്ന് ഹർജിക്കാരൻ ആരോപണം കോടതി ശരിവച്ചു. ഹർജി നിലനിൽക്കുന്നതല്ലെന്നും ആരോപണങ്ങൾ ശരിയല്ലെന്നായിരുന്നു സർക്കാർ വാദം.2022 ജൂലായ് മൂന്നിന് സി.പി.എം മല്ലപ്പള്ളി ഏരിയാ കമ്മിറ്റിയുടെ പരിപാടിയിൽ സജി ചെറിയാൻ നടത്തിയ പ്രസംഗമാണ് കേസായത്. തുടർന്ന് അദ്ദേഹം രാജിവച്ചെങ്കിലും വിചാരണക്കോടതി കുറ്റവിമുക്തനാക്കിയതോടെ മന്ത്രി സ്ഥാനത്ത് തിരിച്ചെത്തി.

ഭരണഘടന വിരുദ്ധ പരാമർശം; മന്ത്രി സജി ചെറിയാന് തിരിച്ചടി, പുനരന്വേഷണത്തിന് ഹൈക്കോടതി ഉത്തരവ്

Search Results for: rahim