വടകര :ചെറുകിട ജലസേചന ജലവിഭവ വകുപ്പിന് കീഴിലുള്ള ഒഞ്ചിയം പഞ്ചായത്തിലെ മാടക്കര തോട് ഭിത്തി കെട്ടി സംരക്ഷണം, ഏറാമല പഞ്ചായത്തിലെ ഓലപ്പുഴ പെരുമ്പുഴക്കര തോട് നവീകരണം എന്നീ പ്രവർത്തികൾക്ക് ഭരണാനുമതി ലഭിച്ചതായി കെ.കെ.രമ എം.എൽ.എ അറിയിച്ചു. 2024 വർഷത്തെ ബജറ്റ് നിർദ്ദേശമായി സർക്കാരിൽ സമർപ്പിച്ച പദ്ധതികൾക്കാണ് ഇപ്പോൾ ഭരണാനുമതിയായിരിക്കുന്നത്. യഥാക്രമം 75ലക്ഷം, 50ലക്ഷം രൂപ വീതമാണ് അനുവദിക്കപ്പെട്ട തുക.&nbsp;
മണ്ഡലത്തിൽ ഉൾനാടൻ ജലസ്രോതസ്സുകളുടെയും കനാലുകളുടെയും നവീകരണത്തിന് ഊന്നൽ നൽകിയാണ് കഴിഞ്ഞ വർഷത്തെ ബജറ്റ് നിർദ്ദേശങ്ങൾ ക്രമീകരിച്ചിരുന്നത്. ജലക്ഷാമത്തിനുള്ള പരിഹാരത്തിനും ജല സ്രോതസുകളുടെ മലിനീകരണം ഇല്ലാതാക്കുമെന്നുമുള്ള പ്രകടനപത്രികയിലെ വാഗ്ദാനം പൂർത്തീകരിക്കുക എന്ന ലക്ഷ്യത്തോടെയാണ് കഴിഞ്ഞ ബജറ്റിലും ഈ ബജറ്റിലും നവീകരിക്കപ്പെടേണ്ട തോടുകളുടെയും കനാലുകളുടെയും വിശദവിവരങ്ങൾ ബജറ്റ് നിർദേശമായി നൽകിയത്. നേരത്തെ നിർദ്ദേശിച്ചിരുന്ന ഒ.വി.സിതോട്, എൻ.സി കനാൽ, കല്ലറക്കൽ തോട്, കാപ്പുഴക്കൽ തോട് തുടങ്ങിയവയുടെ പ്രവൃത്തികൾ വിവിധ ഘട്ടങ്ങളിലാണ്. ഈ ബജറ്റിൽ ലഭിച്ച നവീകരണ പ്രവർത്തികളും ഭരണാനുമതി ആയതോടെ തുടർ നടപടികൾ ത്വരിതപ്പെടുത്തുമെന്നും എം.എൽ.എ പറഞ്ഞു.

ഉൾനാടൻ ജലസ്രോതസ്സുകളുടെയും കനാലുകളുടെയും നവീകരണം; വിവിധ പ്രവർത്തികൾക്ക് ഭരണാനുമതിയായതായി കെ.കെ.രമ എം.എൽ.എ

Vadakara

വടകര: ഗ്രാമീണ റോഡുകളുടെ പുനരുദ്ധാരണത്തിനായി വടകര നിയോജകമണ്ഡലത്തിൽ 4.36 കോടി രൂപയുടെ പ്രവൃത്തികൾക്ക് ഭരണാനുമതിയായതായി കെ.കെ രമ എം.എൽ.എ അറിയിച്ചു. 2024-25 വർഷത്തെ സംസ്ഥാന ബജറ്റിൽ വകയിരുത്തിയ 1000 കോടിരൂപയുടെ പ്രവൃത്തികളിൽ ആണ് എം.എൽ.എ നിർദ്ദേശിച്ച 20 ഓളം റോഡുകൾക്കായി 4.36 കോടി അനുവദിച്ചു കിട്ടിയത്. തദ്ദേശ സ്വയംഭരണ സ്ഥാപനങ്ങളുടെ ഉടമസ്ഥതയിലുള്ള റോഡുകളുടെ നിർമ്മാണ നവീകരണ പ്രവൃത്തികളാണ് ഇത് വഴി സാധ്യമാകാൻ പോകുന്നത്. വൈകാതെ തന്നെ മറ്റു സാങ്കേതിക നടപടികൾ ത്വരിതപ്പെടുത്തി പ്രവൃത്തി ആരംഭിക്കുന്നതിനുള്ള നടപടികൾ സ്വീകരിക്കും എന്നും എം.എൽ.എ അറിയിച്ചു.

ഗ്രാമീണ റോഡുകളുടെ പുനരുദ്ധാരണത്തിനായി 4.36 കോടി രൂപയുടെ പ്രവൃത്തികൾ; കെ കെ രമ

വടകര: പി വി അൻവർ എം എൽ എയുടെ അറസ്റ്റിൽ പ്രതികരണവുമായി ആർ എം പി ഐ നേതാവ് കെ കെ രമ എം എൽ എ. മുഖ്യമന്ത്രി പിണറായി വിജയൻ കേരളം കണ്ട ഏറ്റവും വലിയ ഭീരുവായ ഭരണാധികാരിയാണെന്ന് അവർ ഫേസ്ബുക്കിൽ കുറിച്ചു.
രമയുടെ കുറിപ്പിലേക്ക്.....
പിണറായി വിജയൻ, താങ്കൾ കേരളം കണ്ട ഏറ്റവും ഭീരുവായ ഭരണാധികാരിയാണ്!! താങ്കളുടെ ഭീരുത്വത്തിന്റെ അടയാളയമാണ് പിവി.അൻവർ എം.എൽ.എയുടെ കാരാഗ്രഹവാസം!!..
ജനാധിപത്യ ഇടങ്ങളെ ഇല്ലാതാക്കി എതിർശബ്ദങ്ങളെ അടിച്ചമർത്തുന്നത് ഭീരുക്കളായ ഭരണാധികാരികളുടെ രീതിയാണ്. പൊതുമുതൽ നശിപ്പിച്ചെന്ന കുറ്റം ചാർത്തി ഒരു ജനപ്രതിനിധിയെ പാതിരാത്രിയിൽ വീടുവളഞ്ഞ് അറസ്റ്റു ചെയ്തിരിക്കുന്നു. മിസ്റ്റർ പിണറായി വിജയൻ താങ്കൾ കേരളം കണ്ട ഏറ്റവും വലിയ ഭീരുവായ ഭരണാധികാരിയാണെന്ന് പറയാതിരിക്കാൻ വയ്യ.
ആശയം കൊണ്ട് എതിരിട്ടവരെ ആയുധം കൊണ്ട് നേരിട്ട ഭീരുക്കളായ ഭരണാധിപൻമാരെ ചരിത്രത്തിൽ ഉടനീളം കാണാം. അധികാരമെന്നത് ആയുസു മുഴുവൻ കയ്യിലുണ്ടാവുമെന്നു കരുതിയ വിഡ്ഢികളായിരുന്നവർ..
ചരിത്രം പിന്നാമ്പുറത്തേക്ക് തള്ളിയവർ!!..
ഭരണകൂടം എന്നും മുഖ്യധാരയ്ക്ക് വെളിയിൽ നിർത്തിയ ആദിവാസി സമൂഹത്തിലെ ഒരു യുവാവാണ് കാട്ടാനയുടെ അക്രമത്തിൽ ഇല്ലാതായത്. പത്തു മണിക്കൂറിനുമേലെയാണ് ആ മൃതദേഹം ഇവിടുത്തെ അധികാരികളുടെ അനാസ്ഥയ്ക്കിരയായി ആശുപത്രിയിൽ കിടത്തിയത്. എന്നിട്ടും ഇതിനെതിരെ ഒരു ജനപ്രതിനിധി ശബ്ദിക്കേണ്ട എന്നാണോ? എന്താണ് ഈ അറസ്റ്റിലൂടെ നിങ്ങൾ മുന്നോട്ടു വെക്കുന്ന ഇടതുപക്ഷ രാഷ്ട്രീയ സന്ദേശം?&nbsp;
മണിയെന്ന ആദിവാസി യുവാവിന്റെ നീതിക്കുവേണ്ടി പ്രതിഷേധിച്ച പി.വി അൻവർ എം.എൽ.എയെ പാതിരാത്രി വീടുവളഞ്ഞു വലിയ പോലീസ് സന്നാഹത്തോടെ അറസ്റ്റു ചെയ്ത് ജയിലിലടച്ച ദിവസം തന്നെയാണ് പെരിയയിലെ രണ്ടു ചെറുപ്പക്കാരെ ക്രൂരമായി വെട്ടിക്കൊന്നതിന് കോടതി ശിക്ഷിച്ച കൊടും ക്രിമിനലുകളെ ആശ്ലേഷിച്ചും ഹസ്തദാനം നൽകിയും ഇൻക്വിലാബ് വിളികളോടെ സി.പി.എം സംസ്ഥാന സമിതിയംഗം പി.ജയരാജൻ അടക്കമുള്ളവർ ജയിലിനു മുന്നിൽ സ്വീകരിച്ചത്. ഈ രണ്ടു കാഴ്ചയും ഒരേ ദിവസം കണ്ട കേരളമാണിത്. ആ കേരള ജനതയെ നോക്കി&nbsp;
ജനകീയമെന്നോ ജനാധിപത്യമെന്നോ ഉള്ള വാക്കുകൾ ഇനി നിങ്ങൾ ഉച്ചരിക്കരുത്. നിസഹായരായ ജനതയുടെ മേൽ സിംഹാസനമിട്ട് പുച്ഛ ചിരിയോടെ വാണരുളുകയാണ് നിങ്ങൾ!!.. നിങ്ങളുടെ അഹന്തയ്ക്കും കൊല വാളുകൾക്കും ഇരയായവരുടെ ബന്ധുക്കൾ കോടതി വരാന്തകളിൽ നീതിക്കായി കൈ നീട്ടിയിരിക്കുമ്പോൾ അധികാരപ്രമത്തതയിൽ നിങ്ങളവരെ വേട്ടയാടുകയാണ്.
ജനങ്ങൾക്കു വേണ്ടി ശബ്ദമുയർത്തിയ ജനപ്രതിനിധിയെയാണ് ജയിലറയ്ക്കുള്ളിൽ അടച്ചിരിക്കുന്നത്.&nbsp;
കാലം ഒരു കണക്കും തീർക്കാതെ പോയിട്ടില്ല!!.&nbsp;
ഓർക്കണം, ഓർത്താൽ നന്ന്..
കെ.കെ രമ

പിണറായി വിജയൻ, താങ്കൾ കേരളം കണ്ട ഏറ്റവും ഭീരുവായ ഭരണാധികാരിയാണ്!!; പി വി അൻവറിന്റെ അറസ്റ്റിൽ കെ കെ രമ

വടകര: കാസർകോട് പെരിയയിൽ യൂത്ത് കോൺഗ്രസ് പ്രവർത്തകരായ ശരത് ലാലും കൃപേഷും കൊല്ലപ്പെട്ട കേസിലെ കോടതി വിധിയിൽ പ്രതികരണവുമായി ആർ എം പി ഐ നേതാവ് കെ കെ രമ എം എൽ എ. സിപിഎമ്മിന്റെ എല്ലാ വാദങ്ങളും കള്ളമെന്ന് ഇതോടെ തെളിയിക്കപ്പെട്ടിരിക്കുകയാണെന്ന് അവർ പറഞ്ഞു.
എം എൽ എ യുടെ കുറിപ്പ് 
പെരിയ ഇരട്ടക്കൊലക്കേസ് കോടതിവിധി: സി.പി.എം മസ്‌തിഷ്കത്തിനു വീണ്ടുമേറ്റ കനത്ത പ്രഹരം. ഭരണകൂട ഭീകരതയ്ക്കെതിരായ ജനാധിപത്യത്തിന്റെ വിജയം. സർക്കാർ രാജിവെച്ച് ജനവിധി തേടണം. കാസർകോട് പെരിയയിൽ യൂത്ത് കോൺഗ്രസ് പ്രവർത്തകരായ ശരത് ലാലും കൃപേഷും കൊല്ലപ്പെട്ട കേസിൽ ഉദുമ മുൻ എം.എൽ.എ. കെ.വി. കുഞ്ഞിരാമനും മുൻ ലോക്കൽ സെക്രട്ടറി രാഘവൻ വെളുത്തോളിയുമടക്കമുള്ളവർ കുറ്റക്കാരാണെന്ന് കോടതി കണ്ടെത്തിയിരിക്കുകയാണ്. സിപിഎമ്മിന്റെ എല്ലാ വാദങ്ങളും കള്ളമെന്ന് ഇതോടെ തെളിയിക്കപ്പെട്ടിരിക്കുന്നു.
ഇതൊരു സാധാരണ കേസ് ആയിരുന്നില്ല. ഭരണം ഉണ്ടെന്ന ഹുങ്കുകൊണ്ട് ആസൂത്രണം ചെയ്തു നടപ്പാക്കിയ കൊലപാതകമാണ്. എല്ലാ കൊലക്കേസുകളിലും സർക്കാരാണ് വാദി. കൊല്ലപ്പെട്ടവരുടെ കുടുംബത്തിന് സമാശ്വാസവും കരുത്തും പകരേണ്ടതും അവർക്കുവേണ്ടി നിയമ യുദ്ധം നടത്താനുമുള്ള ബാധ്യത സർക്കാരിലുണ്ട്. എന്നാൽ എൽഡിഎഫ് സർക്കാർ അത് നിർവഹിച്ചില്ല എന്ന് മാത്രമല്ല, സിബിഐ അന്വേഷണം നടത്തണമെന്ന കുടുംബത്തിന്റെ ആവശ്യം സുപ്രീംകോടതി വരെ ചോദ്യം ചെയ്തതും അതിനുവേണ്ടി പൊതു ഖജനാവിൽ നിന്ന് കോടികൾ മുടക്കിയ നിയമ യുദ്ധത്തിലേക്ക് കുടുംബത്തെ തള്ളി വിട്ടതും സർക്കാരാണ്. അങ്ങനെ സർക്കാരിന് കൂടി പരോക്ഷ പങ്കാളിത്തമുള്ള കുറ്റകൃത്യമായി മാറി ഈ ദാരുണസംഭവം. അതുകൊണ്ടുതന്നെ ഈ കോടതി വിധി വാസ്തവത്തിൽ സർക്കാരിനെതിരായ കോടതി വിധി കൂടിയാണ്. സംരക്ഷണം നൽകേണ്ട പൗരന്മാരെ തന്നെ ഇല്ലായ്മ ചെയ്യുന്ന ഭരണകൂട ഭീകരതക്കെതിരായ ജനാധിപത്യത്തിന്റെ വിജയമാണ് ഈ കോടതിവിധി. ഭരണഘടന മൂല്യങ്ങളോട് എന്തെങ്കിലും ധാർമിക ബാധ്യതയുണ്ടെങ്കിൽ സർക്കാർ രാജിവച്ചൊഴിഞ്ഞു ജനവിധി തേടണം.&nbsp;
രാഷ്ട്രീയ വിയോജിപ്പുകളെ വെട്ടിയരിഞ്ഞും കൊലപ്പെടുത്തിയും ഇല്ലാതാക്കാമെന്ന വ്യാമോഹങ്ങൾക്കെതിരായ ജനാധിപത്യബോധത്തിലേക്ക് സംഘടിത പ്രസ്ഥാനങ്ങളെ നയിക്കാൻ ഈ കോടതി വിധി ഒരു പ്രേരണശക്തിയാവട്ടെ.&nbsp;
അകാലത്തിൽ പൊലിഞ്ഞ, ഇനിയുമേറെക്കാലം നാടിന് നന്മകൾ പകർന്നു ജീവിക്കേണ്ടിയിരുന്ന ശരത്ത് ലാലിനും കൃപേഷിനും ഒരിക്കൽക്കൂടി ഹൃദയാഞ്ജലികൾ..

പെരിയ ഇരട്ടക്കൊലക്കേസ്; കോടതിവിധി സി.പി.എം മസ്‌തിഷ്കത്തിന് വീണ്ടുമേറ്റ കനത്ത പ്രഹരമെന്ന് കെ കെ രമ എം എൽ എ

വടകര: പുതുപ്പണത്തെ പ്രീമെട്രിക് ഹോസ്റ്റലിന്റെ പുതിയ കെട്ടിടത്തിന്റെ നിർമ്മാണം ഉടൻ ആരംഭിക്കുമെന്ന് കെ. കെ രമ എംഎൽഎ. ഡിസംബർ 20ന് വൈകുന്നേരം നാലുമണിക്ക് പട്ടികജാതി പട്ടികവർഗ്ഗ ക്ഷേമ വകുപ്പ് മന്ത്രി ഒ ആർ കേളു തറക്കല്ലിടൽ കർമ്മം നിർവഹിക്കും. ഇതിനായുള്ള സ്വാഗതസംഘം രൂപീകരണ യോഗം ഉദ്ഘാടനം ചെയ്ത് സംസാരിക്കുകയായിരുന്നു എം.എൽ.എ. ഏറെ നാളത്തെ പരിശ്രമത്തിനൊടുവിൽ ആണ് സമൂഹത്തിലെ ഏറ്റവും അടിസ്ഥാന വിഭാഗത്തിലുള്ള കുട്ടികളുടെ പഠനത്തിന് സഹായകമാകും വിധം പ്രീമെട്രിക് ഹോസ്റ്റലിനായുള്ള പുതിയ കെട്ടിടം എന്ന ആശയം പ്രാവർത്തികമാകാൻ പോകുന്നത്. നേരത്തെ പാലോളിപാലത്തുണ്ടായിരുന്ന തകർന്നുവീഴാറായ കെട്ടിടത്തിൽ ആയിരുന്നു ഹോസ്റ്റൽ പ്രവർത്തിച്ചുവന്നിരുന്നത്. അപകടാവസ്ഥയിലുള്ള കെട്ടിടത്തിൽ യാതൊരു അടിസ്ഥാന സൗകര്യവുമില്ലാതെ വലിയ പ്രയാസം അനുഭവിച്ചിരുന്ന കുട്ടികൾക്ക് പുതിയ കെട്ടിടം വരുന്നത് ഏറെ ആശ്വാസകരമാകും.
&nbsp;ഇറിഗേഷൻ ഡിപ്പാർട്ട്മെന്റ് ഉടമസ്ഥതയിലുള്ള ഭൂമി പുതിയ കെട്ടിടം നിർമ്മിക്കുന്നതിനായി കൈമാറി കിട്ടാനുള്ള നടപടികൾ പൂർത്തിയാക്കിയതിനുശേഷമാണ് പദ്ധതി നടത്തിപ്പിനായുള്ള ഇടപെടലുകൾ ത്വരിതപ്പെട്ടത്. 4.82 കോടി രൂപയുടെ പദ്ധതിയിൽ മൂന്നു നിലയുള്ള കെട്ടിടമാണ് വിഭാവനം ചെയ്യുന്നത്. ഊരാളുങ്കൽ ലേബർ സൊസൈറ്റി ആണ് പദ്ധതിയുടെ നടത്തിപ്പ് ഏറ്റെടുത്തിരിക്കുന്നത്. തറക്കല്ലിടൽ കർമ്മം പൂർത്തിയായ ഉടൻ തന്നെ കെട്ടിട നിർമ്മാണം ആരംഭിക്കുമെന്നും ഒരു വർഷത്തിനിടയിൽ പുതിയ പ്രീമെട്രിക് ഹോസ്റ്റൽ എന്ന സ്വപ്നം യാഥാർത്ഥ്യമാക്കാൻ കഴിയും എന്നാണ് പ്രതീക്ഷ എന്നും എംഎൽഎ പറഞ്ഞു. ഇപ്പോൾ ജെ.എൻ.എം സ്കൂളിനോട് ചേർന്നുള്ള വാടക കെട്ടിടത്തിലാണ് ഹോസ്റ്റൽ പ്രവർത്തിച്ചു വരുന്നത്.
യോഗത്തിൽ വാർഡ് കൗൺസിലർ പി കെ സിന്ധു അധ്യക്ഷത വഹിച്ചു. സബ് കളക്ടർ ആയുഷ് ഗോയൽ മുഖ്യാഥിതിയായി. നഗരസഭ സ്റ്റാന്റിംഗ് കമ്മറ്റി അധ്യക്ഷരായ കെ പി സജീവ് കുമാർ, സിന്ധു പ്രേമൻ, വാർഡ് കൗൺസിലർമാരായ പ്രീതി എം, ബാജേഷ്, ഹരിദാസൻ, രാഷ്ട്രീയ പാർട്ടി പ്രതിനിധികളായ സി പി ചന്ദ്രൻ, ഇ. കെ വത്സരാജ്, സുധീഷ്, എ. കെ പ്രദീപ് എന്നിവർ സംസാരിച്ചു. നഗരസഭ ചെയർപെഴ്‌സൻ കെ.പി ബിന്ദു ചെയർമാനും ടി.ഡി.ഒ ശ്രീജ കുമാരി കൺവീനറുമായ സ്വാഗതസംഘം രൂപീകരിച്ചു.

പുതുപ്പണം പ്രീമെട്രിക് ഹോസ്റ്റലിന്റെ പുതിയ കെട്ടിട നിർമ്മാണം ഉടൻ ആരംഭിക്കും; കെ കെ രമ എം എൽ എ

അഴിയൂർ: പഞ്ചായത്തിലെ പതിനേഴാം വാർഡിൽ എം എൽ എ യുടെ പ്രാദേശിക വികസന ഫണ്ട് ഉപയോഗിച്ച് നിർമ്മിച്ച പാലക്കൂൽ കോൺക്രീറ്റ് റോഡും, മുൻഷി - എരിക്കിൽ കോൺക്രീറ്റ് റോഡും കെ.കെ.രമ എം എൽ എ ഉദ്ഘാടനം ചെയ്തു. പഞ്ചായത്ത് പ്രസിഡണ്ട് ആയിഷ ഉമ്മർ അധ്യക്ഷത വഹിച്ചു. ആശംസകളർപ്പിച്ചുകൊണ്ട് വിവിധ രാഷ്ട്രീയ പാർട്ടി നേതാക്കളായ യു.എ.ഹീം, ഇ.ടി. അയ്യുബ് , മുബാസ് കല്ലേരി, വി.പി.അനിൽകുമാർ , ടി.സി.എച്ച് അബൂബക്കർ ഹാജി, ഇസ്മായിൽ പി.പി., ജലീൽ ടി.സി.എച്ച് എന്നിവർ സംസാരിച്ചു.
വികസന സമിതി കൺവീനർ കെ.പി. ഫർസൽ സ്വാഗതവും വികസനസമിതി അംഗം അഹമ്മദ് കൽപ്പക നന്ദിയും പറഞ്ഞു. അബ്ദുള്ള ഹാജി തൻഹീം, സഫീർ പുല്ലമ്പി, മഹമ്മൂദ് ഫനാർ, ഷാനിസ് മൂസ, സനീദ്ഏ.വി, അഷ്റഫ് പി.പി, ജബ്ബാർ നെല്ലോളി, സുബൈർ പാലക്കൂൽ, നസീർ അജ്മാൻ,മനീഷ , ഷീജ അശോകൻ, സംഗീത്, സുകുമാരൻ, അശോകൻ പാലക്കൂൽ,ലസിമ, സൈനുദ്ദീൻ സി.എച്ച്, ഐസം, സഫ്‌വാൻ, റഹീസ് കെ പി, റഹീസ് എ പി എന്നിവർ നേതൃത്വം നൽകി.

രണ്ട് റോഡുകൾ നാടിന് സമർപ്പിച്ച് എം എൽ എ

മണിയൂർ: സംസ്ഥാന സ്കൂളിൽ കായികമേളയിലെ സബ് ജൂനിയർ ഹൈ ജമ്പ് സ്വർണ്ണ മെഡൽ ജേതാവ് ഗുരുപ്രീത്, പ്ലസ് ടു പരീക്ഷയിൽ എല്ലാ വിഷയത്തിലും A+ നേടിയ അനുനന്ദ അശോകൻ എന്നിവരെ കരുവഞ്ചേരി വാർഡ് കോൺഗ്രസ്‌ കമ്മിറ്റി അനുമോദിച്ചു. കെ കെ രമ എം എൽ എ ഉദ്ഘാടനം ചെയ്ത ചടങ്ങിൽ പി സി ഷീബ, ചന്ദ്രൻ മൂഴിക്കൽ, ഹമീദ്, ശ്രീധരൻ കുനിയിൽ, ബാബു മുതുവീട്ടിൽ, ഷാജി, മജീദ് തുടങ്ങിയവർ സംസാരിച്ചു.

വിജയികളെ അനുമോദിച്ചു

വടകര: അഴിയൂർ പൂഴിത്തല മൽസ്യ ഷെഡിന്റെ നിർമ്മാണത്തിന് ഒന്നരക്കോടി രൂപയുടെ പ്രവൃത്തിക്ക് ഭരണാനുമതിയായതായി കെ.കെ.രമ എം.എൽ.എ അറിയിച്ചു. 2022 വർഷത്തെ സംസ്ഥാന ബജറ്റ് നിർദേശത്തിൽ മണ്ഡലത്തിലെ പ്രധാന ആവശ്യങ്ങളിൽ ഒന്നായി ഈ പ്രവൃത്തിയാണ് കാണിച്ചിരുന്നത്. തുടർന്നാണ് ഇപ്പോൾ ഭരണാനുമതി ലഭിച്ചത്. കടലിനെ ആശ്രയിച്ചു ദൈനം ദിന ജീവിതം നയിക്കുന്ന നിരവധി സാധാരണമനുഷ്യരുടെ വലിയ പ്രശ്നത്തിന് ഇതോടെ പരിഹാരമാകുമെന്നും എം.എൽ.എ പറഞ്ഞു. കടലിൽ പോകുന്നവർക്ക് വല നെയ്യുന്നതിനും നെയ്തവല സുരക്ഷിതമായി സൂക്ഷിക്കുന്നതിനും അഴിയൂർ പൂഴിത്തലമേഖലയിൽ ഒരു സുരക്ഷിത കേന്ദ്രമില്ല എന്നത് വലിയ പ്രയാസമായി തുടരുകയാണ്.&nbsp;
ലക്ഷക്കണക്കിന് രൂപ വിലവരുന്ന മൽസ്യ ബന്ധന ഉപകരണങ്ങൾ സുരക്ഷിതമായി സൂക്ഷിക്കാൻ കഴിയും വിധം ലോക്കർ റൂമോടുകൂടിയ മൽസ്യ ഷെഡ്ഡാണ് പദ്ധതിയിലൂടെ വിഭാവനം ചെയ്യുന്നത്. കടൽ തീരത്തുള്ള റവന്യു പുറമ്പോക്ക് ഭൂമി ഇതിനായി ലഭ്യമാക്കുന്നതിനും തുടർന്ന് പദ്ധതിയുടെ ഭരണാനുമതി നേടിയെടുക്കുന്നതിനും നിരന്തരമായ ഇടപെടൽ വേണ്ടിവന്നതായും എം.എൽ.എ പറഞ്ഞു. തുടർ നടപടികൾ പൂർത്തിയാക്കി വളരെ വേഗം തന്നെ പ്രവൃത്തി ആരംഭിക്കുന്നതിനുള്ള നടപടികൾ ത്വരിതപ്പെടുത്തുമെന്നും എം.എൽ.എ അറിയിച്ചു.

പൂഴിത്തല മൽസ്യ ഷെഡ് നിർമ്മാണം; ഒന്നരക്കോടി രൂപയുടെ പ്രവൃത്തിക്ക് ഭരണാനുമതിയായതായി കെ.കെ.രമ എം.എൽ.എ

വടകര: ജെ.ടി റോഡിലെ വെള്ളക്കെട്ട് പരിഹരിക്കാനായി റോഡ് ഉയർത്തി നവീകരിക്കുന്ന പ്രവൃത്തി അടുത്തയാഴ്ച തുടങ്ങുമെന്ന് കെ.കെ രമ എം എൽ എ അറിയിച്ചു. കഴിഞ്ഞ ദിവസം വടകര ഗസ്റ്റ് ഹൗസിൽ നടന്ന അവലോകന യോഗത്തിൽ പൊതുമരാമത്ത് വകുപ്പ് എഞ്ചിനീയർ ഇക്കാര്യത്തിൽ ഉറപ്പു നൽകിയതായി എം.എൽ.എ പറഞ്ഞു. 20 ലക്ഷമാണ് എസ്റ്റിമേറ്റ്. മഴക്കാലത്ത് വലിയ തോതിൽ വെള്ളം കയറുന്ന ഇവിടെ വാഹനയാത്രയ്ക്കും കാൽനടയാത്രക്കാർക്കും ഏറെ ബുദ്ധിമുട്ട് ഉണ്ടാവുന്നതാണ്. റോഡിൻ്റെ ഓരോ വശങ്ങളിലായാണ് കൾവെർട്ട് പ്രവൃത്തി നടക്കുക. അതിനാൽ ഗതാഗത നിയന്ത്രണം ഏർപ്പെടുത്തേണ്ടി വരുമെന്നും പൊതുമരാമത്ത് വകുപ്പ് അറിയിച്ചതായി എം.എൽ.എ പറഞ്ഞു.

ജെ.ടി റോഡിലെ വെള്ളക്കെട്ടിന് പരിഹാരം; റോഡുപണി ഒരാഴ്ചയ്ക്കകമെന്ന് എം എൽ എ

വടകര: വള്ളിക്കാട് മുതൽ നാദാപുരം വരെയുള്ള പ്രധാന ടൗണുകളിൽ റോഡിനു ഇരുവശവും ഹാൻഡ് റെയിലും നടപ്പാതയിൽ ഇന്റെർലോക്ക് സ്ഥാപിക്കുന്നതുമായ പ്രവൃത്തി ഉടൻ ആരംഭിക്കുമെന്ന് കെ.കെ രമ എം.എൽ.എ. വടകര മണ്ഡലത്തിലെ പി.ഡബ്ല്യൂ.ഡി പ്രവൃത്തികളെ സംബന്ധിച്ചുള്ള അവലോകനയോഗത്തിനു ശേഷം നൽകിയ വാർത്താകുറിപ്പിലാണ് എം.എൽ.എ ഈ വിവരം അറിയിച്ചത്. വള്ളിക്കാട് ടൗൺ റോഡിനു ഇരുവശവും 200 മീറ്റർ, വെള്ളിക്കുളങ്ങര 320 മീറ്റർ, ഓർക്കാട്ടേരി 700 മീറ്റർ, എടച്ചേരി 550 മീറ്റർ, തലായി 300 മീറ്റർ, പുറമേരി 180 മീറ്റർ, നാദാപുരം 700 മീറ്റർ എന്നിങ്ങനെയാണ് പ്രവൃത്തികൾ നടക്കുക.&nbsp;
മേൽ പറഞ്ഞ മുഴവൻ നഗരങ്ങളിലെയും റോഡിനു ഇരുവശവും ഹാൻഡ് റെയിലും ഇന്റർലോക്കും സ്ഥാപിച്ചു സൗന്ദര്യവൽക്കരിക്കുന്ന പ്രവൃത്തിയാണ് ഇപ്പോൾ ആരംഭിക്കാൻ പോകുന്നത്. നേരത്തെ പൂർത്തിയായ കൈനാട്ടി മുതൽ പക്രന്തളം വരെയുള്ള റോഡ് വിപുലീകരണ പദ്ധതിയുടെ ഭാഗമായി നടക്കേണ്ടിയിരുന്ന പ്രവൃത്തിയായിരുന്നു ഇത്. എന്നാൽ പലതരം സാങ്കേതിക തടസ്സങ്ങളിൽ പെട്ട് പദ്ധതി നിശ്ചലമായ അവസ്ഥയായിരുന്നു. നിരന്തരമായ ഇടപെടലുകളുടെയും പരിശ്രമങ്ങളുടെയും ഫലമായി ഇപ്പോൾ പദ്ധതി സാക്ഷാത്കരിക്കപ്പെടാൻ പോവുകയാണെന്നും ഇതിനായുള്ള ടെണ്ടർ നടപടികൾ പൂർത്തിയായതായും എം.എൽ.എ അറിയിച്ചു.

വള്ളിക്കാട് മുതൽ നാദാപുരം വരെ പ്രധാന ടൗണുകളിൽ ഹാൻഡ് റെയിലും ഇന്റെർലോക്കും സ്ഥാപിക്കുന്ന പ്രവൃത്തി ഉടൻ ആരംഭിക്കും; കെ.കെ രമ എം.എൽ.എ

വടകര: മൊബൈൽ ഫോണുകളുടെ അതിപ്രസരമുള്ള പുതിയ കാലത്ത് കുട്ടികളിൽ വായനാശീലം വളർത്തിയെടുക്കാനുള്ള പ്രത്യേക ഇടപെടലുകൾ നടത്താൻ എല്ലാവരും ശ്രദ്ധിക്കണമെന്ന് കെ.കെ രമ എം.എൽ.എ. 2023-24 വർഷത്തെ എം എൽ എ യുടെ പ്രത്യേക വികസന ഫണ്ടിൽ നിന്നും വടകര മണ്ഡലത്തിലെ വിദ്യാലയങ്ങളിലെ ലൈബ്രറിയിലേക്കും, വായനശാലകളിലേക്കുമായി വാങ്ങിയ പുസ്തകങ്ങളുടെ വിതരണോദ്‌ഘാടനം നിർവഹിച്ച് സംസാരിക്കുകയായിരുന്നു അവർ. പാഠ്യവിഷയങ്ങളിൽ മാത്രം ഒതുങ്ങാതെ കൂടുതൽ പുസ്തകങ്ങളെ വായിക്കാനും അറിയാനും സ്കൂളുകളിൽ തന്നെ കുട്ടികൾക്ക് അവസരങ്ങൾ രൂപപ്പെടണം. ഇതിനു സഹായകമാവുംവിധം സ്കൂൾ ലൈബ്രറികളെ പരീഷ്കരിക്കുക എന്ന ലക്ഷ്യത്തോടെയാണ് മണ്ഡലത്തിലെ വിദ്യാലയങ്ങളിലെ ലൈബ്രറികളിലേക്ക് എംഎൽഎ ഫണ്ട് ഉപയോഗിച്ച് പുസ്തകങ്ങൾ വാങ്ങി നൽകാൻ ഉദ്ദേശിച്ചത്. കുട്ടികളിലെ സർഗ്ഗാത്മകത വളർത്തിയെടുക്കുന്നതിന് എല്ലാവരുടെയും ഒറ്റക്കെട്ടായ ഇടപെടൽ ആവശ്യമാണെന്നും എംഎൽഎ പറഞ്ഞു.
ഓർക്കാട്ടേരി നോർത്ത് യു.പി സ്കൂളിൽ വച്ചു നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് ടി.പി മിനിക അധ്യക്ഷത വഹിച്ചു. ഹെഡ് ടീച്ചർ അജിത.പി.പി സ്വാഗതം പറഞ്ഞു. പി.ടി.എ പ്രസിഡന്റ് പ്രജിത്ത് സ്നേഹശ്രീ, ജയൻ, ബിന്ദു, വിനോദ് എന്നിവർ സംസാരിച്ചു. വിവിധ സ്‌കൂളുകളുടെയും വായന ശാലകളുടെയും പ്രതിനിധികൾ എം.എൽ.എയിൽ നിന്നും പുസ്തകങ്ങൾ ഏറ്റുവാങ്ങി.

കുട്ടികളിൽ വായനശീലം വളർത്തിയെടുക്കാൻ പ്രത്യേക ശ്രദ്ധ ചെലുത്തണം; കെ.കെ രമ എം.എൽ.എ

വടകര: ദേശീയപാത വികസനത്തിന്റെ ഭാഗമായി പാലയാട്ട് നടയിൽ പടിഞ്ഞാറ് ഭാഗത്ത് 10 മീറ്ററോളം താഴ്ചയിൽ ചെങ്കുത്തായി മണ്ണ് എടുത്തു മാറ്റിയത് കാരണം വീട്ടിലേക്കുള്ള വഴി നഷ്ടപ്പെട്ടു കഷ്ടത അനുഭവിക്കുന്ന പുതുപ്പണം നടക്കുതാഴ വില്ലേജിലെ റിസേർവേ നമ്പർ 210/4 സി 1 ൽ പെട്ട തയ്യുള്ളതിൽ നാരായണനെയും കുടുംബത്തെയും കെ കെ രമ എംഎൽഎ സന്ദർശിച്ചു. പ്രായമായതിനാൽ കിടപ്പുരോഗിയായ നാരായണനും കുടുംബവും ഏറെ പ്രയാസത്തിലാണ്.
കുറെ നാളുകളായി ഉത്തരവാദിത്തപ്പെട്ട അധികാരികളെയും നാഷണൽ ഹൈവേ അതോറിറ്റിയെയും കേന്ദ്ര ഗവൺമെന്റിനെയും നിരന്തരം സമീപിച്ചിട്ടും പ്രശ്നത്തിന് ഇതുവരെ പരിഹാരമായില്ലെന്ന് എംഎൽഎ പറഞ്ഞു. കിടപ്പുരോഗിയായ നാരായണന് ഹോസ്പിറ്റൽ പോകണമെങ്കിൽ 200 മീറ്ററിൽ അധികം ദൂരം കസേരയിൽ ചുമന്നു കൊണ്ടുപോകേണ്ട അവസ്ഥയാണ്. തൊട്ടടുത്ത വീട്ടുകാരുടെ മുറ്റത്തുകൂടെയാണ് ഇപ്പോൾ ഇവർ സഞ്ചരിക്കുന്നത്. വഴിയില്ലാതെ ഒറ്റപ്പെട്ടു കിടക്കുന്ന നാരായണന്റെയും കുടുംബത്തിന്റെയും ദുരവസ്ഥ അവസാനിപ്പിക്കാൻ നാഷണൽ ഹൈവേ അതോറിറ്റിയുടെ അടിയന്തര ഇടപെടൽ ഉണ്ടാവണം. ഇതു സംബന്ധിച്ച വിശദാംശങ്ങൾ ഉത്തരവാദിത്തപ്പെട്ട അധികാരികളുമായി സംസാരിച്ചതായും, തൊട്ടടുത്ത ദിവസം തന്നെ സംഭവസ്ഥലം പരിശോധിച്ചു ആവശ്യമായ നടപടികൾ അറിയിക്കാമെന്ന് ഉദ്യോഗസ്ഥർ ഉറപ്പു നൽകിയതായും എം.എൽ.എ പറഞ്ഞു. പുതുപ്പണം സമരസമിതി കോഡിനേറ്റർ ഇ.കെ വത്സരാജും ഒപ്പമുണ്ടായിരുന്നു.

ദേശീയ പാത വികസനം; പുതുപ്പണത്ത് ഒറ്റപ്പെട്ടുപോയ കുടുംബത്തെ സന്ദർശിച്ച് കെ കെ രമ എംഎൽഎ

വടകര : കണ്ണൂർ എ ഡി എം നവീൻ ബാബുവിൻ്റെ മരണത്തിലെ ദുരൂഹത നീക്കേണ്ടത് സമൂഹത്തിൻ്റെ ആവശ്യമാണെന്ന് കെ കെ രമ എം എൽ എ. അദ്ദേഹത്തിൻ്റെ മരണത്തിനു ശേഷം ഓരോ മണിക്കൂറിലും വെളിച്ചത്തു വന്നു കൊണ്ടിരിക്കുന്ന കാര്യങ്ങൾ ഒരു വലിയ ഗൂഢാലോചന ഇക്കാര്യത്തിലുണ്ടെന്ന് വ്യക്തമാക്കുന്നതാണ്. അധികാരവും പണവും മാനുഷിക മൂല്യങ്ങൾക്കും മീതെ വട്ടമിട്ട് ഒരു ജീവൻ ഇല്ലാതാക്കിയിരിക്കുകയാണ്. ജില്ലാ പഞ്ചായത്ത് പ്രസിഡൻ്റ് സ്ഥാനത്ത് പി.പി ദിവ്യ ഒരു നിമിഷം പോലും ഇരിക്കാൻ യോഗ്യയല്ല, പൊലീസ് വെരിഫിക്കേഷൻ കിട്ടാത്ത ഒരു സ്ഥലത്ത് പെട്രോൾ പമ്പ് നിർമിക്കാൻ സ്വാധീനം ചെലുത്തിയത് സ്വജനപക്ഷപാതമല്ലാതെ മറ്റെന്താണ്? ദിവ്യയുടെ ഭർത്താവും പെട്രോൾ പമ്പ് ഉടമയും ഒരേ സ്ഥാപനത്തിൽ ജോലി ചെയ്യുന്നവരാണ്.&nbsp;
നടപടികൾ പൂർത്തിയാക്കാതെ പമ്പിന് എൻ.ഓ.സി നൽകാൻ സമ്മർദ്ദം ചെലുത്താൻ ജില്ലാ പഞ്ചായത്ത് പ്രസിഡൻ്റിന് ഉണ്ടായ പ്രത്യേക താൽപര്യം എന്താണെന്ന് വ്യക്തമാക്കണം. പി.പി ദിവ്യയുടെ ഭർത്താവും പമ്പ് ഉടമയും ജോലി ചെയ്യുന്ന പരിയാരം മെഡിക്കൽ കോളജിൽ തന്നെ എഡിഎമ്മിൻ്റെ പോസ്റ്റ്മോർട്ടം നടത്തിയതും ദുരൂഹമാണ്. പമ്പുടമയും പി.പി ദിവ്യയും ഉന്നയിച്ച അഴിമതി ആരോപണം പോലും സംശയത്തിൻ്റെ നിഴലിലാണ്. ജനപ്രതിനിധിയെന്ന നിലയിൽ തൻ്റെ അധികാരം ദുർവിനിയോഗം ചെയ്യുകയാണ് ദിവ്യ ചെയ്തിരിക്കുന്നത്. അതുകൊണ്ട് എത്രയും പെട്ടെന്ന് ദിവ്യ ജില്ലാ പഞ്ചായത്ത്‌ പ്രസിഡന്റ് സ്ഥാനം രാജിവെക്കാൻ തയ്യാറാവണം. ആത്മഹത്യ പ്രേരണകുറ്റം ചുമത്തി ദിവ്യക്കെതിരെ കേസ് എടുക്കാൻ ആഭ്യന്തര വകുപ്പ് തയ്യാറാവണം എന്നും എം എൽ എ പറഞ്ഞു.

എ ഡി എമ്മിൻ്റെ മരണത്തിൽ സമഗ്ര അന്വേഷണം നടക്കണം; ജനപ്രതിനിധിയായി തുടരാൻ ദിവ്യയ്ക്ക് ഒരവകാശവുമില്ലെന്നും കെ. കെ രമ

വടകര: കെ.കെ രമ എം.എൽ.എയുടെ പ്രത്യേക വികസന ഫണ്ടിൽ നിന്നും മണ്ഡലത്തിലെ വില്ലേജ് ഓഫീസുകൾക്ക് അനുവദിച്ച ലാപ്ടോപ്പുകളും ഡസ്ക്ടോപ്പ് കമ്പ്യൂട്ടറുകളും കൈമാറി. ഏഴ് ലക്ഷം രൂപയുടെ ഉപകരണങ്ങളാണ് അനുവദിച്ചത്. വടകര താലൂക്ക് ഓഫിസിൽ നടന്ന ചടങ്ങിൽ കെ.കെ രമ എം.എൽ.എ വിതരണം നിർവഹിച്ചു. തഹസിൽദാർ ഡി.രഞ്ജിത്ത് അധ്യക്ഷനായി. ഡപ്യൂട്ടി തഹസിൽദാർ ഇ.കെ ഷാജി, വടകര വില്ലേജ് ഓഫിസർ വി.കെ രതീശൻ, നടക്കുതാഴ വില്ലേജ് ഓഫിസർ അബ്ദുൾ സലാം എന്നിവർ സംസാരിച്ചു.

വില്ലേജ് ഓഫിസുകൾക്ക് കമ്പ്യൂട്ടറുകൾ വിതരണം ചെയ്തു

വടകര: സംസ്ഥാനത്ത് പ്രത്യേകിച്ച് കോഴിക്കോട് വടകര മേഖലകളിൽ ഹെപ്പിറ്റൈറ്റിസ് ബി രോഗം പടരുന്ന സാഹചര്യത്തിൽ പ്രതിരോധ വാക്സിനേഷൻ മരുന്നുകളുടെ ദൗർലഭ്യം പരിഹരിക്കണമെന്നാവശ്യപ്പെട്ട് കെ.കെ രമ എം.എൽ.എ ആരോഗ്യമന്ത്രി വീണാ ജോർജിന് കത്തുനൽകി. ഇതുകൂടാതെ നഴ്സിങ് മേഖല പോലെ ആരോഗ്യ പ്രവർത്തന മേഖലകളിൽ പഠനത്തിനു മുന്നോടിയായി അഡ്മിഷൻ നേടുന്ന കുട്ടികൾക്ക് നിർബന്ധമായും വാക്സിൻ എടുക്കേണ്ടതുണ്ട്. വാക്സിൻ്റെ ദൗർലഭ്യം കാരണം വിദ്യാർത്ഥികൾക്ക് ഈ കോഴ്സുകളിലേക്ക് പ്രവേശനം നേടാൻ കഴിയാത്ത അവസ്ഥയാണ്. ഇവരുടെ പഠനം അനിശ്ചിതാവസ്ഥയിലാകുന്ന അവസ്ഥയ്ക്ക് പരിഹാരം കാണണം. കൂടാതെ രോഗം പടരുന്ന സാഹചര്യത്തിൽ സമൂഹത്തിലുണ്ടായിട്ടുള്ള ആശങ്കയ്ക്ക് പരിഹാരം കാണണമെന്നും കത്തിൽ ആവശ്യപ്പെട്ടു.

ഹെപ്പിറ്റൈറ്റിസ് ബി വാക്സിനേഷൻ ലഭ്യത ഉറപ്പു വരുത്തണം; കെ.കെ രമ എം.എൽ.എ ആരോഗ്യമന്ത്രിക്ക് കത്തയച്ചു

വടകര: ദേശീയപാത നിർമാണ പ്രവർത്തനത്തിൽ യാത്രക്കാരും കച്ചവട സ്ഥാപനങ്ങളും അനുഭവിക്കുന്ന ബുദ്ധിമുട്ടുകൾക്ക് പരിഹാരം കാണാൻ കെ.കെ രമ എം.എൽ.എ നിർമാണ കമ്പനി ഉദ്യോഗസ്ഥരും ദേശീയപാത അതോറിറ്റി അധികൃതരുമായി ചർച്ച നടത്തി. വടകര ടൗൺ മേഖലയിലെ സർവീസ് റോഡുകൾ ഒരാഴ്ചക്കകം ഗതാഗത യോഗ്യമാക്കാമെന്ന് ഉദ്യോഗസ്ഥർ ഉറപ്പു നൽകി. പാതയിലെ പൊടിശല്യത്തിന് പരിഹാരമായി പണി നടക്കുമ്പോൾ വെള്ളം തളിക്കാമെന്നും ഉറപ്പ് ലഭിച്ചതായി എം.എൽ.എ അറിയിച്ചു. വടകര ടൗൺ മേഖലയിൽ ദേശീയപാത സർവീസ് റോഡുപണി പൂർത്തിയാവാത്തതും പൊടിപടലം മൂലം യാത്രക്കാർക്കും കച്ചവടക്കാർക്കും ഉണ്ടാകുന്ന ബുദ്ധിമുട്ടുകൾ സംബന്ധിച്ച പരാതികൾ എം.എൽ.എയ്ക്ക് ലഭിച്ച സാഹചര്യത്തിലാണ് ചർച്ച നടത്തിയത്.

ദേശീയപാത; വടകരയിലെ പ്രശ്ന പരിഹാരത്തിനായി എം.എൽ.എയുടെ ഇടപെടൽ

വടകര: ചലച്ചിത്ര അക്കാദമി ചെയർമാൻ സ്ഥാനത്ത് നിന്നും രഞ്ജിത്തിനെ മാറ്റിനിർത്താൻ വൈകുന്ന ഓരോ നിമിഷവും അപമാനിക്കപ്പെടുന്നത് ഭരണാധികാരികൾ മാത്രമല്ല, നികുതിപ്പണം നൽകിയും വരിനിന്ന് വോട്ട് ചെയ്തും ഈ നാട് ഇങ്ങനെ നിലനിർത്തുന്ന കേരളീയർ ഓരോരുത്തരുമാണെന്ന് കെ കെ രമ എം എൽ എ. സാമാന്യ ബുദ്ധിയുള്ള മനുഷ്യർ ഒരിക്കലും പറയാൻ പാടില്ലാത്ത വാക്കുകളാണ് സാംസ്കാരിക മന്ത്രി സജി ചെറിയാൻ്റെ ഈ വിഷയത്തിലെ പ്രതികരണം.&nbsp;
"പരാതികൾ ഉണ്ടായാലേ കേസ് എടുക്കാനാവൂ " എന്ന മുഖ്യമന്ത്രിയുടെ പ്രതികരണത്തിലെ ഭരണഘടനാവിരുദ്ധതയും ജനാധിപത്യവിരുദ്ധതയും തിരിച്ചറിയപ്പെടേണ്ടതുണ്ട്. ഹേമ കമ്മറ്റിക്ക് മുമ്പാകെ നടത്തിയ വെളിപ്പെടുത്തലുകൾക്ക് ഒരു വിലയുമില്ല എന്നാണോ മുഖ്യമന്ത്രി തന്നെ പറയുന്നത് ? ഭരണകൂടം ഏർപ്പെടുത്തിയ ഒരു കമ്മറ്റിക്ക് മുമ്പാകെ നടത്തിയ അതിജീവിതകളായ സ്ത്രീകൾ ഒരിക്കൽ കൂടി വിചാരണകളിലൂടെയും വിശദീകരണങ്ങളിലൂടെയും കടന്നു പോവണം എന്നത് എന്ത് ക്രൂരതയാണ് ?&nbsp;
ആ പ്രതികരണത്തിനേറ്റ ആദ്യത്തെ അടിയാണ് ഈ സർക്കാർ ചലച്ചിത്ര അക്കാദമി ചെയർമാൻ സ്ഥാനത്ത് പ്രതിഷ്ഠിച്ച രഞ്ജിത്തിനെതിരെ ബംഗാളി അഭിനേത്രിയായ ശ്രീലേഖ മിത്ര നടത്തിയ വെളിപ്പെടുത്തൽ. നിസ്സഹായരായ ഇരകൾക്കും താരമൂല്യമുള്ള വേട്ടക്കാർക്കുമിടയിൽ ഒരു മധ്യസ്ഥത്തിന്റെ കോൺക്ലേവ് രൂപീകരിക്കാൻ കഴിയുമെന്ന് ആരെങ്കിലും വ്യാമോഹിക്കുന്നുണ്ടെങ്കിൽ ഉജ്ജ്വല പ്രക്ഷോഭങ്ങളാണ് അവരെ കാത്തിരിക്കുന്നത്. ചലച്ചിത്ര അക്കാദമി ചെയർമാൻ സ്ഥാനത്ത് നിന്നും രഞ്ജിത്തിനെ നീക്കം ചെയ്യുക. നിരുത്തരവാദപരമായ പ്രസ്താവന പിൻവലിച്ച് സജി ചെറിയാൻ മാപ്പു പറയുക. ഹേമ കമ്മറ്റി റിപ്പോർട്ടിന്മേലുള്ള നിഷേധാത്മക സമീപനങ്ങൾ സർക്കാർ തിരുത്തുക എന്നിവയും കെ കെ രമ ആവശ്യപ്പെട്ടു.&nbsp;

ചലച്ചിത്ര അക്കാദമി ചെയർമാൻ സ്ഥാനത്ത് നിന്നും രഞ്ജിത്തിനെ മാറ്റിനിർത്തണം; മന്ത്രി സജി ചെറിയാൻ മാപ്പ് പറയണമെന്നും കെ കെ രമ

വടകര: കടൽക്ഷോഭം രൂക്ഷമായ താഴെ അങ്ങാടി മുകച്ചേരിഭാഗത്ത് കടൽഭിത്തി പുനരുദ്ധാരണത്തിനായി 2.54 കോടിയുടെ പദ്ധതിക്ക് ഭരണാനുമതി ലഭിച്ചതായി കെ.കെ രമ എം.എൽ.എ അറിയിച്ചു. കടൽക്ഷോഭമുണ്ടാകുമ്പോൾ വടകര മേഖലയിൽ ഏറെ ദുരിതത്തിലാകുന്ന പ്രദേശമാണിത്. നേരത്തെയുണ്ടായ കടൽഭിത്തി തകർന്ന നിലയിലാണ് ഇവിടെ. കഴിഞ്ഞ കടൽക്ഷോഭ കാലത്ത് തന്നെ ഇറിഗേഷൻ വകുപ്പിന് ഇതു സംബന്ധിച്ച വിശദമായ റിപ്പോർട്ട് നൽകിയിരുന്നു. ഇതിലാണ് ഇപ്പോൾ ഭരണാനുമതിയായിരിക്കുന്നത്. സാങ്കേതിക അനുമതി ലഭിച്ചാൽ ടെണ്ടർ നടപടികളടക്കം പൂർത്തിയാക്കി പദ്ധതി എത്രയും വേഗം നടപ്പാക്കാനാവുമെന്നാണ് പ്രതീക്ഷിക്കുന്നതെന്ന് എം.എൽ.എ അറിയിച്ചു.

മുകച്ചേരിഭാഗം കടൽഭിത്തി പുനരുദ്ധാരണത്തിന് 2.54 കോടിയുടെ പദ്ധതിക്ക് ഭരണാനുമതിയായാതായി കെ. കെ രമ എം.എൽ.എ

വടകര: പട്ടിക വർഗ പ്രീമെട്രിക് ഹോസ്റ്റലിന് പുതിയ കെട്ടിടം പണിയാനുള്ള പദ്ധതിക്ക് സാങ്കേതിക അനുമതി ലഭിച്ചതായി കെ.കെ രമ എംഎൽഎ അറിയിച്ചു. വൈകാതെ തന്നെ ടെൻഡർ നടപടികൾ പൂർത്തീകരിച്ച് കെട്ടിട നിർമാണം ആരംഭിക്കാനാകുമെന്നാണ് പ്രതീക്ഷയെന്നും എം.എൽ.എ പറഞ്ഞു. ഹോസ്റ്റൽ നിർമാണത്തിനായി പട്ടികവർഗ ക്ഷേമ വകുപ്പ് 4.82 കോടി അനുവദിച്ചിരുന്നു.
സമൂഹത്തിലെ അടിസ്ഥാന വിഭാഗത്തിൽ പെട്ട വിദ്യാർത്ഥികൾക്ക് താമസിച്ചു പഠിക്കാനാണ് ഇത്തരം ഹോസ്റ്റലുകൾ പ്രവർത്തിക്കുന്നത്. എന്നാൽ കാലങ്ങളായി വലിയ അവഗണന നേരിടുകയാണ് ഈ വിഭാഗമത്രയും. ഇതിന്റെ നേർക്കാഴ്ചയായിരുന്നു വടകര പുതുപ്പണത്തെ നിലവിലുള്ള കുട്ടികളുടെ ഹോസ്റ്റൽ. ഇറിഗേഷൻ വകുപ്പിന്റെ ഉടമസ്ഥതയിലുള്ള ഭൂമിയിൽ പൊട്ടിപ്പൊളിഞ്ഞു വീഴാറായ പഴഞ്ചൻ കെട്ടിടത്തിലാണ് ഈ കാലമത്രയും ഹോസ്റ്റൽ പ്രവർത്തിച്ചു വന്നത്. യാതൊരുവിധ അടിസ്ഥാന സൗകര്യവുമില്ലാത്ത ഹോസ്റ്റലിലെ കുട്ടികളുടെ ജീവിതം ഏറെ ദുരിതപൂർണമാണ്.&nbsp;
ഇറിഗേഷൻ വകുപ്പിൽ നിന്നും സ്ഥലം കൈമാറിക്കിട്ടാത്തതാണ് കെട്ടിടനവീകരണത്തിനു ഇതുവരെ തടസ്സമായി നിന്നത്. ഇത്തരം സാങ്കേതിക പ്രശ്നങ്ങളെല്ലാം പരിഹരിച്ച് പുതിയ കെട്ടിടം എന്ന സ്വപ്നം യാഥാർത്ഥ്യമാകാൻ പോവുകയാണ്. നാടിന്റെ വിവിധഭാഗങ്ങളിൽ നിന്നായി മുപ്പതോളം കുട്ടികൾ ഇപ്പോൾ ഹോസ്റ്റലിൽ താമസിച്ചു പഠിക്കുന്നുണ്ട്. ഇവരിൽ കൂടുതൽ പേരും പുതുപ്പണം ജെ.എൻ.എം സ്‌കൂളിൽ പഠിക്കുന്ന വിദ്യാർത്ഥികളാണ്. കെട്ടിട നിർമ്മാണം പൂർത്തിയാവുന്നതോടെ ഇവരുടെ വലിയ പ്രശ്നങ്ങൾക്ക് പരിഹരമാകുമെന്നും എം എൽ എ പറഞ്ഞു.

വടകര പ്രീമെട്രിക് ഹോസ്റ്റൽ സാങ്കേതിക അനുമതിയായി; ടെണ്ടർ നടപടികൾ ഉടൻ ആരംഭിക്കുമെന്ന് കെ.കെ രമ എം.എൽ.എ

നാദാപുരം: ഉരുള്‍പൊട്ടലുണ്ടായ വിലങ്ങാടിന് പ്രത്യേക പാക്കേജ് അനുവദിച്ച് അടിയന്തിരമായി പുനരധിവാസ പ്രവര്‍ത്തനങ്ങള്‍ നടത്തണമെന്ന് കെ.കെ രമ എം.എല്‍.എ ആവശ്യപ്പെട്ടു. ഉരുള്‍പൊട്ടലുണ്ടായ സ്ഥലങ്ങളും, ദുരിതാശ്വാസ ക്യാമ്പുകളും എം.എല്‍.എയും സംഘവും സന്ദര്‍ശിച്ചു. വീടുകളും കൃഷിഭൂമിയുമടക്കം ഏക്കറുകണക്കിന് മേഖലയാണ് ഉരുള്‍പൊട്ടലില്‍ നശിച്ചത്. ജീവിതത്തില്‍ സ്വരൂപിച്ചതെല്ലാം ഒറ്റരാത്രികൊണ്ട് ഇല്ലാതായ ഞെട്ടലിലാണ് വിലങ്ങാട്ടെ ജനങ്ങള്‍. ജനങ്ങളുടെ ജാഗ്രത ഒന്നുകൊണ്ടുമാത്രമാണ് ആളപായം കുറഞ്ഞത്. വയനാടിനെ നടുക്കിയ ദുരന്തത്തിന്റെ നേര്‍പതിപ്പുതന്നെയാണ് ഇവിടെയും കാണാനായത്.&nbsp;
മറ്റുള്ളവരുടെ ജീവന്‍രക്ഷിക്കാനുള്ള ശ്രമത്തിനിടെ മരണപ്പെട്ട മാത്യുവിന്റെ വീടും കെ.കെ രമ സന്ദര്‍ശിച്ചു. സര്‍ക്കാര്‍ സംവിധാനങ്ങള്‍ ഏകോപിപ്പിച്ചുകൊണ്ട് പുനരധിവാസത്തിന് പ്രത്യേക കര്‍മപദ്ധതിയുണ്ടാക്കണമെന്നും ദുരിതബാധിതരുടെ ബാങ്ക് വായ്പകളടക്കം പാക്കേജിൽ ഉൾപ്പെടുത്തണമെന്നുംഅവര്‍ കൂട്ടിച്ചേര്‍ത്തു. സിംഫണി ഒഞ്ചിയം ദുരിതാശ്വാസ ക്യാമ്പുകളിലേക്കായി സമാഹരിച്ച അവശ്യവസ്തുക്കളുടെ കൈമാറ്റവും വാണിമേൽ പഞ്ചായത്ത് ഓഫീസിൽ വച്ചു എം.എൽ.എ നിർവഹിച്ചു. വാണിമേൽ ഗ്രാമപഞ്ചായത്ത്‌ പ്രസിഡണ്ട്‌ പി.സുരയ്യ, വൈസ് പ്രസിഡണ്ട്‌ സെൽമ രാജു, ഒഞ്ചിയം പഞ്ചായത്ത്‌ പ്രസിഡന്റ് പി. ശ്രീജിത്ത്‌, ആർ.എം.പി.ഐ ജില്ലാ സെക്രട്ടറി കെ.ചന്ദ്രൻ, നേതാക്കളയാ ടി. കെ സിബി, സി.ബാലൻ, പൊക്കൻ, ഷാജി എന്നിവർ ഒപ്പമുണ്ടായിരുന്നു.

വിലങ്ങാട് പ്രത്യേക പാക്കേജ് പ്രഖ്യാപിച്ച് പുനരധിവാസ നടപടികൾ ഉടൻ ആരംഭിക്കണം; കെ.കെ രമ എം.എൽ.എ

Nadapuram

അഴിയൂർ: ഗ്രാമ പഞ്ചായത്ത് 16 ആം വാർഡിൽ സ്ഥിതി ചെയ്യുന്ന കശുവണ്ടി വികസന കോർപ്പറേഷൻ പഴയ യാർഡിൻ്റെ ചുറ്റുമതിൽ രണ്ടാമതും തകർന്ന സ്ഥലം കെകെ രമ എംഎൽഎ സന്ദർശിച്ചു. പ്രദേശവാസികൾക്കും വഴിയാത്രക്കാർക്കും ഭീഷണിയായും മാലിന്യ നിക്ഷേപ കേന്ദ്രമായും ഇഴജന്തുക്കളുടെയും വന്യജീവികളുടെയും വിഹാര കേന്ദ്രവുമായി മാറിയ മൂന്നര ഏക്കർ ഭൂമി ചുറ്റുമതിൽ കെട്ടി സംരക്ഷിക്കാനും, ജനോപകാരപ്രദമായ പദ്ധതികൾക്ക് വേണ്ടി ഉപയോഗപ്പെടുത്തും വിധം അടിയന്തിര നടപടി സ്വീകരിക്കുവാനും വകുപ്പ് മന്ത്രിയെ കാണുമെന്നും, ചുറ്റുമതിൽ നിർമ്മാണത്തിന് എസ്റ്റിമേറ്റ് തയ്യാറാക്കിയതായി കോർപ്പറേഷൻ അധികൃതർ അറിയിച്ചതായും എംഎൽഎ പറഞ്ഞു. കഴിഞ്ഞ ദിവസം രാത്രിയാണ് യാർഡിൻ്റെ വടക്ക് ഭാഗത്തെ മതിൽ തകർന്ന് വീണത്. വിദ്യാർത്ഥികൾ അടക്കം നിരന്തരം യാത്ര ചെയ്യുന്ന വഴിയിലാണ് മതിൽ തകർന്ന് വീണത്. രാത്രിയായതിനാലാണ് വൻ അപകടം ഒഴിവായത്. കഴിഞ്ഞ മാസം കനത്ത മഴയത്തും പടിഞ്ഞാറ് ഭാഗത്തെ മതിൽ തകർന്ന് വീണിരുന്നു. ചുറ്റുമതിലിന്റെ അപകട ഭീഷണി നിലനിൽക്കുന്ന ഉയർന്ന ഭാഗങ്ങൾ അടിയന്തരമായി പൊളിച്ചു മാറ്റാൻ പഞ്ചായത്ത് അധികൃതരോട് എംഎൽഎ നിർദ്ദേശിച്ചു.&nbsp;
കഴിഞ്ഞ സംസ്ഥാന ബജറ്റിൽ നാളികേര സംസ്കരണ കേന്ദ്രം സ്ഥാപിക്കാനായി എംഎൽഎയുടെ ആവശ്യപ്രകാരം സംസ്ഥാന സർക്കാർ പ്രാഥമിക ഫണ്ട് വകയിരുത്തിയിരുന്നു. എന്നാൽ ഭൂമി വിട്ടു കിട്ടാത്തത് കാരണം തുടർനടപടികൾ ഉണ്ടായിട്ടില്ല. കശുവണ്ടി വികസന കോർപ്പറേഷൻ പഴയ യാർഡ് പൊതുജനങ്ങൾക്ക് ഉപകാരപ്രദമാകും വിധം വിനിയോഗിക്കുന്നതിന് ആവശ്യമായ അടിയന്തിര ഇടപെടലുകൾ നടത്തുമെന്ന് എംഎൽഎ അറിയിച്ചു. ഗ്രാമപഞ്ചായത്ത് പ്രസിഡണ്ട് ആയിഷ ഉമ്മർ, വടകര ബ്ലോക്ക് പഞ്ചായത്ത് മെമ്പർ കോട്ടയിൽ രാധാകൃഷ്ണൻ, മുസ്ലിം ലീഗ് അഴിയൂർ പഞ്ചായത്ത്‌ പ്രസിഡന്റ് യു എ റഹീം, രാജൻ, കെ ബാബുരാജ്, കെ പി അനിൽകുമാർ, ശ്രീജിത്ത് കെ കെ, ടി സി രാമചന്ദ്രൻ, അശോകൻ കളത്തിൽ എന്നിവർ സംബന്ധിച്ചു. പൊതുജനങ്ങളുടെ ജീവന് ഭീഷണിയായി നിൽക്കുന്ന ചുറ്റുമതിലിൻ്റെ ഉയർന്ന ഭാഗങ്ങൾ പ്രസിഡണ്ടിൻ്റെ പ്രത്യേക അടിയന്തിര ദുരന്തനിവാരണ ഫണ്ടുപയോഗിച്ച് പൊളിച്ച് മാറ്റുമെന്ന് അഴിയൂർ ഗ്രാമപഞ്ചായത്ത് പ്രസിഡണ്ട് ആയിഷ ഉമ്മർ അറിയിച്ചു.

കശുവണ്ടി വികസന കോർപ്പറേഷൻ്റെ യാർഡ് മതിൽ തകർന്ന സ്ഥലം കെ കെ രമ എംഎൽഎ സന്ദർശിച്ചു

കോഴിക്കോട്: ജില്ലയിൽ ആവശ്യമായ പ്ലസ് വൺ സീറ്റുകൾ ഉറപ്പാക്കാൻ കൂടുതൽ ബാച്ചുകൾ അനുവദിക്കണമെന്ന് ആവശ്യപ്പെട്ട് ഡോ.എം.കെ മുനീർ എം.എൽ.എ നടത്തുന്ന സത്യഗ്രഹ സമരത്തിന് ഐക്യദാർഢ്യവുമായി കെ.കെ രമ എം.എൽ.എ. കഴിഞ്ഞ കുറേ വർഷങ്ങളായി ഹയർ സെക്കൻഡറി മേഖലയിൽ നിലനിൽക്കുന്ന ആശങ്കകൾ പരിഹരിക്കണമെന്ന വിദ്യാർഥികളുടെയും പൊതുജനങ്ങളുടെയും ആവശ്യത്തിനോട് സർക്കാർ മുഖം തിരിഞ്ഞ് നിൽക്കുകയാണ്. ഇതിനെതിരെയുള്ള ഡോ.എം.കെ മുനീറിൻ്റെ സഹനസമരത്തിന് എല്ലാ പിന്തുണയും നൽകുമെന്ന് അവർ വ്യക്തമാക്കി. നിയമസഭയിലടക്കം ഈ വിഷയം ഉന്നയിച്ചിട്ടും സർക്കാർ ഉദാസീന നിലപാടാണ് എടുക്കുന്നത്. എം.എൽ.എയുടെ ആരോഗ്യസ്ഥിതി കണക്കിലെടുത്ത് സർക്കാർ അടിയന്തിരമായി പ്രശ്ന പരിഹാരം കണ്ടെത്തണം. വരും തലമുറയുടെ ഭാവി പ്രശ്നം എന്ന നിലയ്ക്ക് കക്ഷിരാഷ്ട്രീയ ഭേദമന്യേ എല്ലാവരും സമരത്തെ പിന്തുണക്കണമെന്നും കെ.കെ രമ വ്യക്തമാക്കി.

എം.കെ മുനീർ എം.എൽ.എയുടെ സത്യഗ്രഹ സമരപന്തൽ കെ.കെ രമ എം.എൽ.എ സന്ദർശിച്ചു

Kozhikode

വടകര: പുരസ്കാര വേദിയിൽ നടൻ ആസിഫ് അലി നേരിട്ട അപമാനത്തിൽ രമേശ് നാരായണനെ വിമർശിച്ചും ആസിഫലിയെ അഭിനന്ദിച്ചും കെകെ രമ എം.എൽ.എ. രമേശ് നാരായണൻ നേരിട്ട അവഗണനയ്ക്ക് ഇരയാവേണ്ടത് ആസിഫ് അലി എന്ന യുവനടനായിരുന്നില്ല എന്ന് അദ്ദേഹം തിരിച്ചറിയണമെന്നും കെ.കെ. രമ എം.എൽ.എ. ഫേസ്ബുക്കിൽ കുറിച്ചു.
ഫേസ്ബുക്ക് പോസ്റ്റ്:
എം.ടി. വാസുദേവൻ നായരുടെ കഥകളുടെ ആന്തോളജി സിനിമയായ മനോരഥങ്ങളുടെ ട്രെയിലർ ലോഞ്ചിൽ പ്രസിദ്ധ സംഗീതജ്ഞൻ രമേഷ് നാരായണന് ഉപഹാരം നൽകാനായി എത്തിയ ചലച്ചിത്രതാരം ആസിഫ് അലിയോട് രമേശ് കാണിച്ച പ്രതികരണം ഒരുകാരണവശാലും ഉണ്ടാകാൻ പാടില്ലാത്ത ഒന്നാണ്. കലയും സംസ്കാരവും സാഹിത്യവും എല്ലാം മനുഷ്യ നന്മകളുടെയും ഐക്യത്തിന്റെയും സ്നേഹത്തിന്റെയും ബാക്കിപത്രവും വിളംബരവുമാവേണ്ടതാണ്.
ചരിത്രത്തിന്റെ ദുർഘടസന്ധികളിൽ മനുഷ്യസങ്കടങ്ങളിൽ മരുന്നാവുകയും അതിജീവനത്തിൽ കരുത്താവുകയും ആനന്ദങ്ങളിൽ കൂട്ടിയിരിക്കുകയും ചെയ്തവയാണ് കലയും സാഹിത്യവുമെല്ലാം. എന്നാൽ അടിസ്ഥാനപരമായി ഫ്യൂഡലായ ആരാധനകളുടെയും അടിമനോഭാവങ്ങളുടെയും ആഘോഷങ്ങൾ ഇപ്പോഴും കലാരംഗത്ത് കാണാം. അതിന്റെ തുടർച്ചയിലാണ് തനിക്ക് പോരാത്തവനാണ് ആസിഫ് അലി എന്ന് രമേശ് നാരായാണന് തോന്നിയിട്ടുണ്ടാവുക.
ആധുനിക ജനാധിപത്യമൂല്യങ്ങൾ കലയുടെ മണ്ഡലത്തിൽ കൂടി സമരം ചെയ്ത് സ്ഥാപിച്ചാലല്ലാതെ ഇത്തരം നീതികേടുകൾ അവസാനിക്കുകയില്ല. ഈ വിഷയത്തിലെ പോസിറ്റീവായ ഒരു കാര്യം അത്തരം ഒരു സംവാദ സാധ്യത അത് തുറന്നു എന്നതാണ്. അതുകൊണ്ട് കൂടെയാണ് രമേശ് നാരായണൻ ആസിഫിനോട് മാപ്പ് പറയാൻ തയ്യാറായത്. ആ വേദിയിൽ താൻ നേരിട്ട അവഗണനയെക്കുറിച്ച് രമേഷും പറയുന്നത് കേട്ടു. അതും തിരുത്തപ്പെടേണ്ടതാണ്. പക്ഷേ അതിൻ്റെ ഇരയാവേണ്ടത് ആസിഫ് അലി എന്ന യുവനടനായിരുന്നില്ല എന്ന് രമേശ് തിരിച്ചറിയണം. അവഹേളനം നേരിട്ട സന്ദർഭത്തിലും സമചിത്തത കൈവെടിയാതിരുന്ന ആസിഫ് അഭിനന്ദനമർഹിക്കുന്നു. ആസിഫ് അലിക്ക് അഭിവാദ്യങ്ങൾ.
കെ.കെ രമ

തനിക്ക് പോരാത്തവനാണ് ആസിഫ് അലി എന്ന് രമേശ് നാരായാണന് തോന്നിയിട്ടുണ്ടാവും; വിമർശിച്ച് കെ കെ രമ

വടകര: മണ്ഡലത്തിലെ ചോറോട് പഞ്ചായത്ത് പരിധിയിലെ കല്ലറക്കല്‍ തോട് നവീകരണത്തിന് ഒന്നരക്കോടി രൂപയുടെ ഭരണാനുമതിയായതായി കെ.കെ രമ എം.എല്‍.എ അറിയിച്ചു. 2022-23 ബജറ്റില്‍ കല്ലറക്കല്‍ തോടിന്റെ നവീകരണത്തിന് തുക വകയിരുത്തിയിരുന്നു. ചോറോട് പഞ്ചായത്തിലെ പ്രധാന തോടായ കല്ലറക്കല്‍ തോട് പാര്‍ശ്വഭിത്തി കെട്ടി നവീകരിച്ച് ഫുട്പാത്ത് നിര്‍മിക്കാനുള്ള പദ്ധതിക്കായി നിരന്തരം സര്‍ക്കാരില്‍ സമ്മര്‍ദം ചെലുത്തിയിരുന്നു. ഇതിന്റെ ഫലമായാണ് ബജറ്റില്‍ പദ്ധതി ഉള്‍പെടുത്താന്‍ കഴിഞ്ഞത്. കഴിഞ്ഞ ബജറ്റില്‍ അടങ്കല്‍ തുകയുടെ 20 ശതമാനം തുകയായ 30 ലക്ഷം വകയിരുത്തിയിരുന്നു. പദ്ധതി യാഥാര്‍ത്ഥ്യമാകുന്നതോടെ തോടിന്റെ മലിനീകരണ പ്രശ്‌നങ്ങള്‍ അടക്കം പരിഹരിക്കാനാകുമെന്നും എം.എല്‍.എ പ്രത്യാശ പ്രകടിപ്പിച്ചു.

കല്ലറക്കല്‍ തോട് നവീകരണത്തിന് ഒന്നരക്കോടിയുടെ ഭരാണാനുമതി

വടകര: കെ.കെ രമ എം.എല്‍.എയുടെ സമഗ്ര വിദ്യാഭ്യാസ പദ്ധതിയായ വൈബിന്റെ ആഭിമുഖ്യത്തില്‍ വടകര നിയോജകമണ്ഡലത്തിലെ എസ്.എസ്.എല്‍.സി, പ്ലസ്ടു പരീക്ഷകളില്‍ മുഴുവന്‍ വിഷയങ്ങളിലും എപ്ലസ് നേടിയ വിദ്യാര്‍ത്ഥികളെ അനുമോദിക്കുന്ന പരിപാടിയായ വിജയാരവം ഞായറാഴ്ച രാവിലെ 9മണിക്ക് വടകര ടൗണ്‍ഹാളില്‍ നടക്കും. വിജയാരവത്തിന്റെ ഉദ്ഘാടനവും നൂറുമേനി നേടിയ സ്‌കൂളുകള്‍ക്കുള്ള വൈബിന്റെ അനുമോദനവും ഷാഫി പറമ്പില്‍ എം.പി നിര്‍വഹിക്കും.&nbsp;
ഡോ.ശശികുമാര്‍ പുറമേരി കുട്ടികള്‍ക്കുള്ള ബോധവത്കരണ ക്ലാസ് നടത്തും. വൈബ് അക്കാദമിക് കൗണ്‍സില്‍ ചെയര്‍മാന്‍ കെ.ടി മോഹന്‍ദാസ് അധ്യക്ഷനാകും. ജനപ്രതിനിധികൾ, ജില്ലയിലെ വിവിധ വിദ്യാഭ്യാസ ഓഫീസർമാർ പരിപാടിയിൽ പങ്കെടുക്കും. വിജയാരവത്തിന്റെ ഒരുക്കങ്ങള്‍ പൂര്‍ത്തിയായതായി വൈബ് സംഘാടകര്‍ അറിയിച്ചു.

വൈബ് വിജയാരവം ഞായറഴ്ച വടകര ടൗണ്‍ഹാളില്‍

തിരുവനന്തപുരം: ടി.പി.ചന്ദ്രശേഖരൻ വധക്കേസ് പ്രതികളെ പുറത്തുവിട്ടില്ലെങ്കില്‍ കേസിലെ ഗൂഢാലോചന സംബന്ധിച്ച കാര്യങ്ങള്‍ പുറത്തുവരുമെന്ന പേടിയാണ് സിപിഎമ്മിനും സര്‍ക്കാരിനുമെന്നു കെ.കെ.രമ. ഹൈക്കോടതി വിധി കാറ്റില്‍പ്പറത്തിയുള്ള നീക്കമാണു സര്‍ക്കാര്‍ നടത്തുന്നതെന്നും രമ കുറ്റപ്പെടുത്തി.
‘‘സിപിഎം സംസ്ഥാന നേതൃത്വം ജയിലിലാകുന്ന കാര്യങ്ങളാണിതെന്നു ഭരണകര്‍ത്താക്കള്‍ക്ക് അറിയാം. വേറെ ഏതെങ്കിലും പ്രതികള്‍ക്ക് ഇത്രത്തോളം സൗകര്യം ജയിലില്‍ കിട്ടുന്നുണ്ടോ? പ്രതികള്‍ക്കു വേണ്ടി കെ.രാധാകൃഷ്ണന്‍ സബ്മിഷന്‍ അവതരിപ്പിച്ചു. കോടിയേരി ബാലകൃഷ്ണന്‍ ജയിലില്‍ പോയി അവരെ കണ്ടു. എംഎല്‍എമാരുടെ സംഘം ജയിലില്‍ പോയി. പ്രതികളുടെ മേല്‍ ഒരു തരി മണ്ണു വീണാല്‍ എങ്ങനെയാണു സിപിഎമ്മിനു നോവുന്നത്?
പ്രതികളെ ഇവര്‍ എത്രമാത്രം ഭയക്കുന്നുവെന്നതിന്റെ തെളിവാണിത്. ആ ഭയം കൊണ്ടാണ് ഇന്ന് അടിയന്തരപ്രമേയം അവതരിപ്പിക്കാന്‍ അനുമതി നല്‍കാതിരുന്നത്. മുഖ്യമന്ത്രി പിണറായി വിജയന്റെ മുഖത്തുനോക്കി ചോദിക്കാനുള്ള ഒരുപാടു ചോദ്യങ്ങളുണ്ട്. അതിനെയൊക്കെ സര്‍ക്കാരും മുഖ്യമന്ത്രിയും ഭയക്കുന്നു. അതുകൊണ്ടാണു മുഖ്യമന്ത്രി പറയാതെ സ്പീക്കര്‍ പറഞ്ഞത്. ഇതു സഭയോടുള്ള അവഹേളനമാണ്. വിഷയത്തില്‍ ഗവര്‍ണറെ കാണും.
ഹൈക്കോടതി വിധി കാറ്റില്‍പ്പറത്തിയുള്ള നീക്കമാണു സര്‍ക്കാര്‍ നടത്തുന്നത്. തിരഞ്ഞെടുപ്പ് പെരുമാറ്റച്ചട്ടം നിലനില്‍ക്കുന്ന അവസരത്തിലാണു കത്തു നല്‍കിയതുള്‍പ്പെടെയുള്ള നടപടികള്‍ ധൃതിപിടിച്ച് എടുത്തിരിക്കുന്നത്. ആരുമറിയാതെ ഈ പ്രതികളെ പുറത്തുവിടാനുള്ള വലിയ ഗൂഢാലോചനയാണ് നടന്നത്. കേരളം മുഴുവന്‍ വെറുത്ത ക്രിമിനലുകളെ പ്രീതിപ്പെടുത്താനും സന്തോഷിപ്പിക്കാനുമാണു സര്‍ക്കാര്‍ ഈ തീരുമാനം എടുത്തത്. ഞങ്ങള്‍ നിങ്ങളുടെ കൂടെയുണ്ടെന്നു പ്രതികളെ ഓര്‍മിപ്പിക്കാനാണു ശ്രമം. ഇത്തവണ ആരും ശ്രദ്ധിച്ചില്ലെങ്കില്‍ അടുത്ത ഘട്ടത്തില്‍ കൂടുതല്‍ പ്രതികളെ പട്ടികയില്‍ ഉള്‍പ്പെടുത്തുമായിരുന്നു’’– രമ പറഞ്ഞു.

‘ടി.പി വധക്കേസ് പ്രതികളെ സിപിഎമ്മിനു ഭയം; നടന്നത് വലിയ ഗൂഢാലോചനയെന്നും കെ കെ രമ

കണ്ണൂർ: ടി.പി ചന്ദ്രശേഖരൻ വധക്കേസ് പ്രതികൾക്ക് ശിക്ഷയിൽ ഇളവു നൽകാൻ സംസ്ഥാന സർക്കാർ നീക്കം. മുന്നോടിയായി കണ്ണൂർ ജയിൽ സൂപ്രണ്ട് സിറ്റി പോലീസ് കമ്മീഷണറോട് റിപ്പോർട്ട് തേടി കത്തുനൽകി. കണ്ണൂർ ജയിൽ സൂപ്രണ്ട് പോലീസിന് കൈമാറിയ ഉത്തരവിന്റെ പകർപ്പ് മുഹമ്മദ് ഷാഫി, അണ്ണൻ സിജിത്ത്, ടി.കെ.രജീഷ് എന്നീ പ്രതികൾക്ക് ഇളവുനൽകാനാണ് ശ്രമം. മുഹമ്മദ് ഷാഫി, അണ്ണൻ സിജിത്ത്, ടി.കെ.രജീഷ് എന്നിവർ ഉൾപ്പടെ വിവിധ കേസുകളിലെ 56 പ്രതികൾക്ക് ശിക്ഷാ ഇളവ് നൽകുന്നതിന്റെ ഭാ​ഗമായാണ് സർക്കാർ നിർദേശത്തെ തുടർന്ന് റിപ്പോർട്ട് തേടിയിരിക്കുന്നത്. കേസിലെ ഇരകളുടെ ബന്ധുക്കൾ, പ്രതികളുടെ അയൽവാസികളും ബന്ധുക്കളും എന്നിവരോട് സംസാരിച്ചശേഷം റിപ്പോർട്ട് തയ്യാറാക്കി നൽകാനാണ് ആവശ്യപ്പെട്ടിരിക്കുന്നത്. ശിക്ഷായിളവ് തേടി ടിപി കേസ് പ്രതികൾ ഒരുമാസം മുൻപ് ഹൈക്കോടതിയെ സമീപിച്ചിരുന്നു. എന്നാൽ ആവശ്യം തള്ളി.
അതെ സമയം പ്രതികൾക്ക് ശിക്ഷാ ഇളവ് നൽകാനുള്ള സർക്കാർ തീരുമാനം അങ്ങേയറ്റം പ്രതിഷേധാർഹമെന്ന് കെ.കെ രമ പറഞ്ഞു. 'പ്രതികൾക്ക് ഒരു കാരണവശാലും ശിക്ഷായിളവ് കൊടുക്കാൻ പാടില്ല എന്നുള്ളത് ഹൈക്കോടതിയുടെ വിധിയിൽ വളരെ വ്യക്തമായിട്ടുണ്ട്. പ്രതികളുടെ ശിക്ഷ കോടതി ഇരട്ടിയായി വർധിപ്പിക്കുകയും ഇരട്ട ജീവപര്യന്തം ആക്കുകയും ചെയ്തിട്ടുണ്ട്. ഹൈക്കോടതിയുടെ ശക്തമായ വിധി ഉണ്ടായിട്ടുപോലും അതിനെയെല്ലാം മാറികടന്നുകൊണ്ടുള്ള ഒരു തീരുമാനമാണ് ഇപ്പോൾ ഉണ്ടായിട്ടുള്ളത്. ഇത് ഹൈക്കോടതിയോടുള്ള വെല്ലുവിളിയും കോടതി അലക്ഷ്യവുമാണ്. ഇവരുടെ പേര് ശിക്ഷായിളവ് നൽകുന്നവരുടെ ലിസ്റ്റിൽപോലും ഉണ്ടാവാൻ പാടില്ലാത്തതാണ്. ശക്തമായ കോടതി വിധി ഉണ്ടായിട്ടുപോലും ഇതാണ് സർക്കാറിന്റെ നീക്കമെങ്കിൽ അതിനെ രാഷ്ട്രീയപരമായും നിയമപരമായും നേരിടാനാണ് തീരുമാനം. കോടതിയേയും ഗവർണറെയും സമീപിക്കും', കെ.കെ രമ വ്യക്തമാക്കി.

ടി.പി കേസ് പ്രതികള്‍ക്ക് ശിക്ഷായിളവ് നല്‍കാന്‍ നീക്കം; കമ്മീഷണറോട് റിപ്പോർട്ട് തേടി

വടകര: കെ.കെ രമ എം.എല്‍.എയുടെ സമഗ്ര വിദ്യാഭ്യാസ പദ്ധതിയായ വൈബിന്റെ ആഭിമുഖ്യത്തില്‍ വടകര നിയോജകമണ്ഡലത്തിലെ എസ്.എസ്.എല്‍.സി, പ്ലസ്ടു പരീക്ഷകളില്‍ മുഴുവന്‍ വിഷയങ്ങളിലുും എപ്ലസ് നേടിയ വിദ്യാര്‍ത്ഥികളെ അനുമോദിക്കുന്ന പരിപാടിയായ വിജയാരവം ജൂൺ 30ന് രാവിലെ 9മണിക്ക് വടകര ടൗണ്‍ഹാളില്‍ നടക്കും. വിജയാരവത്തിന്റെ ഉദ്ഘാടനവും നൂറുമേനി നേടിയ സ്‌കൂളുകള്‍ക്കുള്ള വൈബിന്റെ അനുമോദനവും നിയുക്ത എം.പി ഷാഫി പറമ്പില്‍ നിര്‍വഹിക്കും. ഡോ.ശശികുമാര്‍ പുറമേരി കുട്ടികള്‍ക്കുള്ള ബോധവത്കരണ ക്ലാസ് നടത്തും. വൈബ് അക്കാദമിക് കൗണ്‍സില്‍ ചെയര്‍മാന്‍ കെ.ടി മോഹന്‍ദാസ് അധ്യക്ഷനാകും.&nbsp;
ജനപ്രതിനിധികൾ, ജില്ലയിലെ വിവിധ വിദ്യാഭ്യാസ ഓഫീസർമാർ പരിപാടിയിൽ പങ്കെടുക്കും. വിജയാരവത്തിന്റെ ഒരുക്കങ്ങള്‍ പൂര്‍ത്തിയായതായി വൈബ് സംഘാടകര്‍ അറിയിച്ചു. വടകര നിയോജക മണ്ഡലത്തില്‍ താമസിക്കുകയും മണ്ഡലത്തിനു പുറത്തെ സ്‌കൂളുകളില്‍ പഠിച്ച് മുഴുവന്‍ വിഷയങ്ങളിലും എപ്ലസ് നേടിയ എസ്.എസ്.എല്‍.സി, പ്ലസ്ടു, വോക്കേഷണൽ ഹയർ സെക്കണ്ടറി വിദ്യാര്‍ഥികളെയും ചടങ്ങില്‍ അനുമോദിക്കും. മണ്ഡലത്തിൽ താമസിച്ചു പുറത്തുള്ള വിദ്യാലയങ്ങളിൽ പഠിച്ച വിദ്യാർത്ഥികൾ തങ്ങളുടെ ഫോട്ടോ അടക്കം ബയോഡാറ്റ 9188857597 എന്ന നമ്പരില്‍ വാട്‌സ് ആപ്പ് അയക്കുക.

വൈബ് വിജയാരവം ഷാഫി പറമ്പിൽ ഉദ്ഘാടനം ചെയ്യും

കോഴിക്കോട്: സി.പി.എമ്മിനെതിരെ രൂക്ഷ വിമർശനവുമായി ആർ.എം.പി.ഐ നേതാവും വടകര എം.എൽ.എയുമായ കെ.കെ. രമ. കേരളത്തെ അരാഷ്ട്രീയവൽകരിക്കുകയാണ് സി.പി.എം ചെയ്തതെന്നും വ്യാജ പ്രചരണങ്ങളിലേക്കും വർഗീയതയിലേക്കും ഒരു പാർട്ടി എത്തുന്ന ഏറ്റവും അധപതിച്ച രാഷ്ട്രീയത്തിൽ സി.പി.എമ്മിൽ എത്തിച്ചേർന്നുവെന്നും കെ.കെ. രമ പറഞ്ഞു. ഇടത് ഉണ്ടെങ്കിലേ ഇന്ത്യയുള്ളൂവെന്നാണ് സി.പി.എം പറയുന്നത്. കേരളം മാറ്റിനിർത്തിയാൽ ഇന്ത്യയിൽ എവിടെയാണ് ഇടത് ഉള്ളത്. ഇടത് ഇത്തരത്തിലാകാൻ കാരണം ആരാണ്. ആരാണ് ഇടതിനെ ഇങ്ങനെയാക്കിയ മാറ്റിയതെന്ന ചോദ്യത്തിനും ഉത്തരം പറയണം. സി.പി.എം നേതാക്കളുടെ പ്രവർത്തനമാണ് ഇടതിനെ ഇത്തരത്തിലാക്കിയതെന്നും രമ ചൂണ്ടിക്കാട്ടി.
കേരളത്തിലെ ഇടത് എന്താണ് ചെയ്തത്. സംസ്ഥാനത്ത് കഴിഞ്ഞ ഏഴ് വർഷമായി ഭരിക്കുന്ന ഇടതുപക്ഷം എന്ന് അവകാശപ്പെടുന്ന സർക്കാറിനെ കൊണ്ട് ഇവിടത്തെ സാധാരണക്കാർക്ക് എന്ത് പ്രയോജനമാണ് ഉണ്ടായത്. സാധാരണയിൽ സാധാരണക്കാരായ മനുഷ്യന്‍റെ ജീവിത നിലവാരം ഉയർത്തുകയും അവർക്ക് വേണ്ടി സംസാരിക്കുകയുമാണ് ഇടത് സർക്കാർ ചെയ്യേണ്ടത്. എവിടെയാണ് ഇന്ന് സാധാരണക്കാരന്‍റെ ജീവിതം ഉയരുന്ന സാഹചര്യമുള്ളത്. കിട്ടികൊണ്ടിരിക്കുന്ന ആനുകൂല്യങ്ങൾ പോലും ഇല്ലാതായ സാഹചര്യം സംസ്ഥാനത്ത് എങ്ങനെയാണ് എത്തിച്ചേർന്നത്. അഴിമതി, ധൂർത്ത്, വഴിവിട്ട പ്രവർത്തനങ്ങൾ അടക്കം നേതാക്കന്മാർ അവരുടെ കീശ വീർപ്പിക്കുക എന്നതിലപ്പുറം എന്ത് രാഷ്ട്രീയമാണുള്ളത്. സ്വന്തം കുടുംബത്തിലേക്ക് രാഷ്ട്രീയം പോവുകയും അവരിലേക്ക് ഒതുക്കിതീർക്കുകയും ചെയ്യുകയല്ലാതെ എന്താണുള്ളത്.
നിപ്പയെയും കോവിഡിനെയും കുറിച്ചുള്ള രാഷ്ട്രീയം മാത്രമാണ് വടകരയിൽ എൽ.ഡി.എഫ് പറഞ്ഞത്. മറ്റേതെങ്കിലും രാഷ്ട്രീയത്തെ കുറിച്ചോ സർക്കാർ നയത്തെ കുറിച്ചോ ജനങ്ങൾക്ക് വേണ്ടി ഇത് ചെയ്തെന്ന് പറയാനോ സാധിച്ചിട്ടില്ല. വർഗ രാഷ്ട്രീയമാണ് മുന്നോട്ടുവെക്കുന്നതെന്ന് സി.പി.എം പറയുന്നു. കേരളത്തെ അരാഷ്ട്രീയവൽകരിക്കുകയാണ് സി.പി.എം ചെയ്തത്. വ്യാജ പ്രചരണങ്ങളിലേക്കും വർഗീയതയിലേക്കും ഒരു പാർട്ടി എത്തുന്ന ഏറ്റവും അധപതിച്ച രാഷ്ട്രീയത്തിൽ സി.പി.എമ്മിൽ എത്തിച്ചേർന്നത്. വർഗീയ, ജാതി രാഷ്ട്രീയം പറയുക, ജാതിയുടെ പേരിൽ ആളുകളെ സമീപിച്ച് വോട്ട് ചോദിക്കുക. ജാതിയുടെ അടിസ്ഥാനത്തിൽ വലിയ വിഭാഗീയത ഉണ്ടാക്കാനുള്ള ശ്രമമാണ് മലബാറിൽ നടത്തിയതെന്നും ഇത് ഗൗരവമായി കാണണമെന്നും കെ.കെ. രമ പറഞ്ഞു.
ടി.പിയുടെ രാഷ്ട്രീയം എല്ലാ കാലത്തും കത്തിനിൽക്കും. ആ രാഷ്ട്രീയം തന്നെയാണ് ഈ തെരഞ്ഞെടുപ്പിലും ചർച്ച ചെയ്തത്. സ്ത്രീകളാണ് വടകരയിൽ ഏറ്റവും കൂടുതൽ വോട്ട് ചെയ്തത്. അക്രമരാഷ്ട്രീയം അവസാനിക്കണമെന്ന സ്ത്രീകളുടെ മനസിന്‍റെ തീരുമാനമാണ് ഈ തെരഞ്ഞെടുപ്പിൽ കാണാനായത്. ചന്ദ്രശേഖരന്‍റെ ഒരു മുറിവ് വടകരയിലെ ഓരോ സാധാരണക്കാരുടെയും നന്മയുള്ള മുഴുവൻ മനുഷ്യരുടെയും മനസിൽ വലിയ ആഘാതമാണ്. കാലം എത്ര മായ്ച്ചാലും അത് മാറില്ലെന്ന് വിചാരിക്കുന്നു. അത്രയും ക്രൂരമായ കാര്യം ചെയ്ത പാർട്ടിയാണ് സി.പി.എം എന്നും കെ.കെ. രമ ചാനൽ അഭിമുഖത്തിൽ വ്യക്തമാക്കി.

കേരളം മാറ്റിനിർത്തിയാൽ ഇന്ത്യയിൽ എവിടെയാണ് ഇടത് ഉള്ളത്? ടി.പിയുടെ രാഷ്ട്രീയം എല്ലാ കാലത്തും കത്തിനിൽക്കും; കെ.കെ. രമ

വടകര: ലോക്സഭാ തിരഞ്ഞെടുപ്പുമായി ബന്ധപ്പെട്ട് വടകരയിൽ ഉയർന്നുവന്ന വർഗീയ പരാമർശങ്ങളും ചർച്ചകളുമായി ബന്ധപ്പെട്ട് കുറിപ്പുമായി ആർ എം പി നേതാവും എം എൽ എയുമായ കെ കെ രമ. രണ്ട് ക്യാമ്പയിനുകളിലൂടെയാണ് തങ്ങളുടെ എതിർ സ്ഥാനാർത്ഥിയെയും യുഡിഎഫിനെയും കടന്നാക്രമിക്കാൻ സിപിഎം ശ്രമിച്ചത്. അതിലൊന്ന് ഇനിയും തെളിയിക്കാൻ സാധിക്കാത്ത പോൺ കഥയാണ് . യാതൊരു ഉത്തരവാദിത്വവുമില്ലാതെ ഈ കഥയുടെ ഭാരവും ബാധ്യതയും സ്ഥാനാർത്ഥി തന്നെ നേരിട്ട് എതിർ സ്ഥാനാർഥിയുടെ തലയിൽ കെട്ടിവെക്കുന്ന കാഴ്ച നാം കണ്ടു. രണ്ടാമത്തേതാണ് വർഗീയ വ്യാഖ്യാനം. തെരഞ്ഞെടുപ്പ് പ്രവർത്തനത്തിലെ മുസ്ലിം ലീഗിന്റെയും മുസ്ലിം ചെറുപ്പക്കാരുടെയും ഊർജ്ജസ്വലമായ സാന്നിധ്യവും ഷാഫി എന്ന പേരുമാണ് സിപിഎമ്മിനെ വിറളി പിടിപ്പിക്കുന്നതെങ്കിൽ പിന്നെ നിങ്ങളിൽ നിന്ന് വർഗീയവാദിയിലേക്ക് ഒരിഞ്ച് ദൂരം പോലും ബാക്കിയില്ലെന്ന് സ്വയം മനസ്സിലാക്കുന്നത് നന്നായിരിക്കുമെന്നും കുറിപ്പിൽ പറയുന്നു.&nbsp;
കുറിപ്പിലേക്ക് ...
വടകരയിലെ തെരഞ്ഞെടുപ്പിനെ അഭിമുഖീകരിക്കവേ,&nbsp;
ഷാഫി പറമ്പിലിന്റെ സ്ഥാനാർത്ഥിത്വത്തിന് സാമുദായിക നിറം നൽകി വ്യാഖ്യാനിച്ച സിപിഎം പ്രചാരണത്തിന്റെ അവസാന ലാപ്പിൽ അദ്ദേഹത്തിന്റെ മതനിരപേക്ഷ ജീവിതത്തിനുമേൽ കടുത്ത വർഗീയ ചാപ്പ തന്നെ കുത്തുന്ന കാഴ്ചയും നാം കണ്ടു. തെരഞ്ഞെടുപ്പ് തന്ത്രം എന്നുള്ള നിലയിൽ തെരഞ്ഞെടുപ്പ് കഴിഞ്ഞാൽ അവർ അത് നിർത്തുമെന്നാണ് എല്ലാവരും കരുതിയത്. എന്നാൽ തങ്ങളുടെ പരാജയം മുൻകൂട്ടി കാണുന്ന സിപിഎം ആ പരാജയത്തെയും വർഗീയ വ്യാഖ്യാനം നൽകി രക്ഷപ്പെടാനുള്ള ശ്രമത്തിലാണ്. പക്ഷേ അതിൽ നാടിന്റെ ഭാവിയിലെ സ്വൈര്യജീവിതത്തിനു മേൽ കോരിയിടാൻ പോകുന്ന തീക്കനലുകളെക്കുറിച്ച് ആ പാർട്ടിയിലെ പരിണിതപ്രജ്ഞരായ നേതാക്കൾക്ക് പോലും ഒരാശങ്കയുമില്ല എന്നത് അങ്ങേയറ്റം ഭയാനകമായ ഒരു കാര്യമാണ്.&nbsp;
രണ്ട് ക്യാമ്പയിനുകളിലൂടെയാണ് തങ്ങളുടെ എതിർ സ്ഥാനാർത്ഥിയെയും യുഡിഎഫിനെയും കടന്നാക്രമിക്കാൻ സിപിഎം ശ്രമിച്ചത്. അതിലൊന്ന് ഇനിയും തെളിയിക്കാൻ സാധിക്കാത്ത പോൺ കഥയാണ് . യാതൊരു ഉത്തരവാദിത്വവുമില്ലാതെ ഈ കഥയുടെ ഭാരവും ബാധ്യതയും സ്ഥാനാർത്ഥി തന്നെ നേരിട്ട് എതിർ സ്ഥാനാർഥിയുടെ തലയിൽ കെട്ടിവെക്കുന്ന കാഴ്ച നാം കണ്ടു.&nbsp;
എന്നാൽ എൽ.ഡി.എഫ് സ്ഥാനാർത്ഥിയുടെ വാക്കുകൾ വിശ്വാസത്തിലെടുത്തുകൊണ്ട് തുറന്ന അന്വേഷണത്തെ സ്വാഗതം ചെയ്യുകയായിരുന്നു യുഡിഎഫും ആർ.എം.പി.ഐയും.
രണ്ടാമത്തേതാണ് ഈ വർഗീയ വ്യാഖ്യാനം. തെരഞ്ഞെടുപ്പ് പ്രവർത്തനത്തിലെ മുസ്ലിം ലീഗിന്റെയും മുസ്ലിം ചെറുപ്പക്കാരുടെയും ഊർജ്ജസ്വലമായ സാന്നിധ്യവും ഷാഫി എന്ന പേരുമാണ് സിപിഎമ്മിനെ വിറളി പിടിപ്പിക്കുന്നതെങ്കിൽ പിന്നെ നിങ്ങളിൽ നിന്ന് വർഗീയവാദിയിലേക്ക് ഒരിഞ്ച് ദൂരം പോലും ബാക്കിയില്ലെന്ന് സ്വയം മനസ്സിലാക്കുന്നത് നന്നായിരിക്കും.&nbsp;
രണ്ടു തവണ മുല്ലപ്പള്ളി രാമചന്ദ്രനും കഴിഞ്ഞതവണ കെ മുരളീധരനും വടകരയിൽ മത്സരിക്കാൻ എത്തുമ്പോൾ അവരെ നെഞ്ചേറ്റെടുക്കാനും വിജയിപ്പിക്കാനും മുന്നണിയിൽ തന്നെയുണ്ടായിരുന്നു മുസ്ലിം ലീഗ്. മണ്ഡലത്തിലെ തെരഞ്ഞെടുപ്പ് പ്രവർത്തനങ്ങളിൽ നിറസാന്നിധ്യമായിരുന്നു മുസ്ലിം ലീഗ്. യുഡിഎഫിലെ പ്രബലമായ ഒരു ഘടകകക്ഷിയും മലബാറിന്റെ രാഷ്ട്രീയ മണ്ഡലത്തിലെ നിറസാന്നിധ്യവുമായ മുസ്ലിം ലീഗിൻറെ തെരഞ്ഞെടുപ്പ് പ്രവർത്തനത്തിലെ സാന്നിധ്യം ഷാഫി എന്ന പേരുകാരന് വേണ്ടിയാകുമ്പോൾ അത് മുസ്ലിം തീവ്രവാദവും വർഗീയതയും ആണെന്ന് വ്യാഖ്യാനിച്ച് നിങ്ങൾക്ക് സായൂജ്യമടയാം എന്നല്ലാതെ നിങ്ങളുടെ മറ്റെല്ലാ കുടിലതന്ത്രങ്ങളെയും പോലെ വടകര അത് തള്ളിക്കളയുക തന്നെ ചെയ്യും.&nbsp;
കാരണം നിങ്ങൾക്ക് ഒരു ചരിത്രമുണ്ടല്ലോ? ടി പി ചന്ദ്രശേഖരനെ വെട്ടിക്കൊല്ലാൻ കൊട്ടേഷൻ സംഘത്തെ അയച്ച നിങ്ങൾ ഇന്നോവയുടെ മുകളിൽ മാഷാ അള്ളാ എന്ന സ്റ്റിക്കർ എഴുതി ഒട്ടിച്ചു. മുസ്ലിം തീവ്രവാദി ആക്രമണം ആണെന്ന് കൈരളി ചാനൽ ഫ്ലാഷ് ന്യൂസ് നൽകി. വിദ്യാഭ്യാസവും സംസ്കാരവും പാരമ്പര്യത്തിലെ മതേതര ബോധവും കൊണ്ട് ഈ നാട് മറക്കാൻ ശ്രമിക്കുന്ന വർഗീയ ധ്രുവീകരണത്തിന്റെ ഉണങ്ങിയ മുറിവുകളിൽ നിന്നും ചോര വാർന്ന് ടിപി ചന്ദ്രശേഖരന്റെ പേരിൽ ഒരു വർഗീയ കലാപം നാട്ടിൽ രൂപം കൊള്ളുന്നതും അതുവഴി നിങ്ങളുടെ കൊട്ടേഷൻ സംഘത്തെ രക്ഷിച്ചെടുത്തു ചന്ദ്രശേഖരന്റെ ചോരക്കറ നിങ്ങളുടെ നേതൃത്വത്തിൻ്റെ കയ്യിൽ നിന്ന് കഴുകിക്കളയാം എന്നുമായിരുന്നു നിങ്ങളുടെ കണക്കുകൂട്ടൽ. ആ കുടിലതന്ത്രത്തിന്റെ പുതുക്കിയ പതിപ്പാണിതെന്ന് എല്ലാവർക്കും മനസ്സിലാകുന്നുണ്ട്.&nbsp;
സിപിഎം അനുകൂലികളായ സാംസ്കാരിക പ്രവർത്തകരും നവമാധ്യമ എഴുത്തുകാരും ഈ ആശയം വെച്ച് എത്ര പെട്ടെന്നാണ് ആശങ്കാസാഹിത്യവുമായി രംഗത്തെത്തിയത്?&nbsp;
പക്ഷേ നാട് കത്തിച്ചു കളയാൻ ശേഷിയുള്ള ഒരു കുടിലതയും ഈ നാട് വെച്ച് വാഴിക്കില്ല. തെരഞ്ഞെടുപ്പിലെ ജയവും തോൽവിയും ജനം തീരുമാനിച്ചു കഴിഞ്ഞു. പക്ഷേ വർഗീയതയുടെ മുൻപിൽ വടകര തോൽക്കില്ല. വടകരയുടെ പ്രബുദ്ധ ജനതയ്ക്ക് മുമ്പിൽ വർഗീയത ജയിക്കുകയുമില്ല.

"തെരഞ്ഞെടുപ്പിൽ ആരും ജയിക്കട്ടെ..ജയിക്കരുത് വടകരയിൽ വർഗീയത"; കുറിപ്പുമായി കെ കെ രമ എം എൽ എ

വടകര: കോവിഡ് പ്രതിരോധത്തിന്റെ ഭാഗമായി എംഎൽഎ ഫണ്ടും കിഫ്ബിഫണ്ടും ഉപയോഗിച്ച് നിർമ്മാണം പൂർത്തീകരിച്ച വടകര മണ്ഡലത്തിലെ ഓർക്കാട്ടേരി കമ്മ്യൂണിറ്റി ഹെൽത്ത് സെന്ററിലെ ഐസൊലോഷൻ വാർഡ് ഉദ്ഘാടനം കഴിഞ്ഞു മാസങ്ങൾക്കുള്ളിൽ തകർന്ന് വീഴാൻ തുടങ്ങിയിരിക്കുകയാണ്. ഉദ്ഘാടനം കഴിഞ്ഞ് പ്രവർത്തനയോഗ്യമാകുന്നതിന് മുമ്പ് തന്നെ കെട്ടിടം തകർച്ച ഭീഷണി നേരിടുന്നത് നിർമ്മാണത്തിൽ ഉണ്ടായ കെടുകാര്യസ്ഥതയും അഴിമതിയും മൂലമാണെന്ന് കെ കെ രമ എംഎൽഎ ആരോപിച്ചു. എംഎൽഎ ഫണ്ടും കിഫ്ബി ഫണ്ടും ഉപയോഗിച്ച് 1.62 ലക്ഷം രൂപ മുടക്കിയാണ് ഐസൊലേഷൻ വാർഡ് നിർമ്മിച്ചത്. സംസ്ഥാന സർക്കാർ നേരിട്ടാണ് സംസ്ഥാനത്തുടനീളം നടന്ന ഐസൊലേഷൻ വാർഡുകളുടെ നിർമ്മാണത്തിന് മേൽനോട്ടം വഹിച്ചത്. പ്രവർത്തി നിർവഹണ ഏജൻസിയെയും കരാറുകാരെയും കണ്ടെത്തിയത് സർക്കാർ നേരിട്ടാണ്. തൃശ്ശൂർ ആസ്ഥാനമായിട്ടുള്ള ഡിസ്ട്രിക്ട് ലേബർ കോൺട്രാക്ട് കോപ്പറേറ്റീവ് സൊസൈറ്റിയെ ആണ് സർക്കാർ നിർമ്മാണ ചുമതല നേരിട്ട് ഏൽപ്പിച്ചത്. അതുകൊണ്ടുതന്നെ നിർമ്മാണ കരാറിലെ അവ്യക്തതയും സുതാര്യമില്ലായ്മയും നേരത്തെ തന്നെ ചർച്ചയായിരുന്നു.
ഗുണ നിലവാരം കുറഞ്ഞ മെറ്റീരിയലുകളും പഴയ ടൈലുകളും ഉപയോഗിച്ചാണ് നിർമ്മാണം നടത്തിയതെന്ന ആരോപണവും നേരത്തെ ഉയർന്നിരുന്നു. ഇതു സംബന്ധിച്ച വിശദാംശങ്ങൾ സാങ്കേതിക വിഭാഗം അടിയന്തരമായി പരിശോധിക്കുകയും, കുറ്റക്കാർക്കെതിരെ കർശന നടപടി സ്വീകരിക്കുകയും വേണം. കോവിഡ് പ്രതിരോധം എന്ന പേരിൽ ഓരോ എംഎൽഎമാരുടെ ഫണ്ടിൽ നിന്നും നാലു കോടിരൂപ തിരിച്ചെടുത്ത സർക്കാർ, ഇതിൽ ചെറിയ ശതമാനം മാത്രമാണ് അതത് മണ്ഡലങ്ങളിലെ പ്രവർത്തനങ്ങൾക്കായി വിലയിരുത്തിയത്. ഇതിൽ തന്നെ വലിയ അഴിമതി നടന്നു എന്നത് ഒരിക്കലും അംഗീകരിക്കാൻ കഴിയാത്ത കാര്യമാണ്. ഒരു മഹാമാരിയെ മറയാക്കി വലിയ കൊള്ള നടന്നു എന്ന ആരോപണങ്ങളുടെ ഒടുവിലത്തെ ഉദാഹരണമാവുകയാണ് ഐസൊലേഷൻ വാർഡ് നിർമ്മാണമെന്നും എംഎൽഎ കുറ്റപ്പെടുത്തി. സംസ്ഥാനത്തുടനീളം നടന്ന ഈ നിർമ്മാണ സംബന്ധിച്ച് സമഗ്ര അന്വേഷണം നടത്തി. കുറ്റക്കാരെ നിയമത്തിനു മുൻപിൽ കൊണ്ടുവരാൻ സർക്കാർ തയ്യാറാവണം. തകർച്ച ഭീഷണി നേരിടുന്ന ഐസൊലേഷൻ വാർഡ് സന്ദർശിച്ചതിനു ശേഷം മാധ്യമങ്ങളോട് സംസാരിക്കുകയായിരുന്നു അവർ. വടകര ബ്ലോക്ക് പഞ്ചായത്ത് അംഗം എ.കെ ഗോപാലൻ ഏറാമല ഗ്രാമപഞ്ചയത്ത് ആരോഗ്യ സ്ഥിരം സമതി ചെയർ പേഴ്സൺ ജസീല വി.കെ.എച്ച് എം സി അംഗം എ.കെ. ബാബു എന്നിവർ എംഎൽഎക്ക് ഒപ്പമുണ്ടായിരുന്നു.

ഓർക്കാട്ടേരി സി എച്ച് സിയിലെ ഐസൊലേഷൻ വാർഡിന്റെ മേൽക്കൂര തകർന്നു വീണു; നിർമ്മാണത്തിൽ അഴിമതിയെന്ന് കെ.കെ രമ എം.എൽ.എ

വടകര: ലോകസഭാ തിരഞ്ഞെടുപ്പുമായി ബന്ധപ്പെട്ട് ഈ മാസം പതിനേഴാം തീയതി യുഡിഎഫ് പാർലമെന്റ് മണ്ഡലം തിരഞ്ഞെടുപ്പ് കമ്മിറ്റി ഓഫീസിൽ താനും എംഎൽഎ ഉമാ തോമസും ചേർന്നു വിളിച്ചു ചേർത്ത പത്രസമ്മേളനത്തിൽ ഉന്നയിച്ച കാര്യങ്ങൾക്ക് തീർത്തും ഘടകവിരുദ്ധമായി പത്രസമ്മേളനത്തിന്റെ വീഡിയോ എഡിറ്റ് ചെയ്തു വ്യാപകമായി പ്രചരിപ്പിക്കുന്നതിനെതിരെ കെ.കെ രമ എം.എൽ.എ വടകര റൂറൽ എസ്.പി പരാതി നൽകി. ഇത് ജനങ്ങളിൽ വ്യാപകമായി തെറ്റിദ്ധാരണ ഉളവാക്കാനും, വ്യക്തിപരമായും രാഷ്ട്രീയമായും തന്നെ അപമാനിക്കാനും വേണ്ടിയാണ് ചെയ്തിരിക്കുന്നത്. തിരഞ്ഞെടുപ്പുമായി ബന്ധപ്പെട്ട് യുഡിഎഫ് സ്ഥാനാർത്ഥിയായ ഷാഫി പറമ്പിലിനു നേരെ എൽഡിഎഫ് സ്ഥാനാർഥി ഉന്നയിക്കുന്ന അടിസ്ഥാനരഹിതമായ ആരോപണങ്ങളെ സംബന്ധിച്ച വസ്തുതകൾ ജനങ്ങളെ ബോധ്യപ്പെടുത്താൻ വേണ്ടിയായിരുന്നു പത്രസമ്മേളനം വിളിച്ചു ചേർത്തത്. ഷാഫി പറമ്പിലിന്റെ നേതൃത്വത്തിൽ തനിക്കെതിരായി വ്യാപകമായ സൈബർ ആക്രമണം നടക്കുകയാണ് എന്ന നിലയിൽ ആയിരുന്നു എൽഡിഎഫ് സ്ഥാനാർത്ഥിയുടെ ആരോപണം.&nbsp;
തനിക്കെതിരെ അശ്ലീലം കലർന്ന വ്യാജ വീഡിയോ നിർമ്മിക്കുകയും ഇത് സോഷ്യൽ മീഡിയ വഴി യുഡിഎഫ് സ്ഥാനാർത്ഥിയുടെയും യുഡിഎഫ് നേതൃത്വത്തിന്റെയും അറിവോടുകൂടി പ്രചരിപ്പിക്കുന്നു എന്ന നിലയിലുള്ള എൽഡിഎഫ് സ്ഥാനാർത്ഥിയുടെ തെറ്റായ ആരോപണങ്ങളെ തുറന്നുകാട്ടുകയായിരുന്നു ആ പത്രസമ്മേളനത്തിൽ. എന്നാൽ ആ പത്രസമ്മേളനത്തിന്റെ വീഡിയോ ദൃശ്യങ്ങൾ തങ്ങൾക്കാവശ്യമുള്ള വിധം മുറിച്ചു എഡിറ്റ് ചെയ്ത് "ഷാഫി പറമ്പിലിനെ തള്ളി കെ.കെ. രമ" എന്ന നിലയിലാണ് വീഡിയോ തയ്യാറാക്കിയത്. ഇത് സോഷ്യൽ മീഡിയവഴി വ്യാപകമായി സിപിഎം സൈബർ സംഘങ്ങൾ പ്രചരിപ്പിക്കുകയിരുന്നു. ആരോപണങ്ങൾ ശരിയാണ് എന്ന് ഞാനും ഉമ തോമസ് എംഎൽഎയും അംഗീകരിക്കുകയാണ് എന്ന വിധമുള്ള വീഡിയോയാണ് വ്യാപകമായി പ്രചരിപ്പിച്ചു കൊണ്ടിരിക്കുന്നത്.&nbsp;
സിപിഐഎം നിയന്ത്രണത്തിലുള്ള ഫേസ്ബുക്ക് ഇൻസ്റ്റഗ്രാം പ്രൊഫൈലുകൾ വഴിയും വിവിധങ്ങളായ വാട്സ്ആപ്പ് ഗ്രൂപ്പുകൾ വഴിയുമാണ് ഈ വ്യാജ സന്ദേശം പ്രചരിച്ചു കൊണ്ടിരിക്കുന്നത്. ഇതു സംബന്ധിച്ച് സമഗ്രമായ അന്വേഷണം നടത്തി വീഡിയോ ഇത്തരത്തിൽ എഡിറ്റ് ചെയ്ത സംഘങ്ങളെയും അത് പ്രചരിപ്പിക്കാൻ നേതൃത്വം കൊടുത്ത സൈബർ പ്രൊഫൈൽ ഉടമകളെയും നിയമത്തിനു മുന്നിൽ കൊണ്ടുവരണമെന്ന് പരാതിയിൽ ആവശ്യപെട്ടു.യു ഡി എഫ് - ആർ എം പി ഐ നേതാക്കളായ പാറക്കൽ അബ്ദുള്ള, ഐ. മൂസ, എൻ. വേണു എന്നിവർ ഒപ്പമുണ്ടായിരുന്നു.

വ്യാജ വീഡിയോ പ്രചാരണം; കെ.കെ.രമ എം.എൽ.എ റൂറൽ എസ് പിക്ക് പരാതി നൽകി

കുറ്റ്യാടി: വടകര മണ്ഡലത്തിലെ യു ഡി എഫ് സ്ഥാനാർഥി ഷാഫി പറമ്പിലിനും യു ഡി എഫിന്റെ വനിതനേതാക്കൾക്കും എതിരെ സി പി എം നടത്തുന്ന നീചമായ പ്രചാരണങ്ങൾക്ക് എതിരെ ശക്തമായ നടപടി സ്വീകരിക്കണമെന്ന് കെ കെ രമ എം എൽ എ ആവശ്യപ്പെട്ടു. ഇടതു സൈബർ പ്രചാർണം സകല മര്യാദകളും ലംഘിക്കുകയാണ്.&nbsp;
വ്യാജ വീഡിയോകൾ നിർമിച്ചും പൊതുമണ്ഡലത്തിൽ അസഭ്യം പറഞ്ഞും അവർ വിലസുകയാണ്. അവർക്കെതിരെ നൽകുന്ന പരാതികൾ പോലീസ് പരിഗണിക്കുന്നേ ഇല്ല. ഇവർക്കെതിരെ വിധിയെഴുതാൻ ഈ തെരഞ്ഞെടുപ്പിനെ ഉപയോഗിക്കണമെന്നും കെകെ രമ ആവശ്യപ്പെട്ടു. കുറ്റ്യാടി പഞ്ചായത്ത്‌ 79ആം ബൂത്ത്‌ യു ഡി എഫ് കുടുംബസംഗമം ഉദ്ഘാടനം ചെയ്തു സംസാരിക്കുക ആയിരുന്നു അവർ.&nbsp;
സി വി മൊയ്‌തു അധ്യക്ഷം വഹിച്ചു. തിരുവള്ളൂർ പഞ്ചായത്ത്‌ പ്രസിഡന്റ്‌ സബിത മണക്കുനി, വി പി മൊയ്‌തു, എ കെ വിജീഷ്, എ സി മജീദ്, കെ പി മജീദ്, പി പി ആലിക്കുട്ടി, ടി എം അമ്മദ്, കെ സി നൗഷാദ്, പി സുബൈർ, സന്ധ്യ കരണ്ടോട്, എസ് ജെ സജീവ് കുമാർ തുടങ്ങിയവർ സംസാരിച്ചു.

സൈബർ കുറ്റകൃത്യങ്ങൾക്ക എതിരെ നടപടി വേണം: കെ കെ രമ. എം എൽ എ

Kuttiadi

കുറ്റ്യാടി: സി.പി.എം ചോരക്കളി അവസാനിപ്പിക്കണമെന്ന് കെ.കെ.രമ എം.എൽ.എ പറഞ്ഞു. ബോംബുകൾ നിർമ്മിച്ച് എതിരാളികളെ വകവരുത്താനുള്ള ശ്രമമാണ് നടക്കുന്നത്. ബോംബ് നിർമാണം സി.പി.എം നേതാക്കൾ അറിഞ്ഞു കൊണ്ടാണ് നടക്കുന്നതെന്നും തിരഞ്ഞെടുപ്പ് കാലത്ത് കലാപമുണ്ടാക്കാനുള്ള ആസൂത്രിത നീക്കമാണ് നടക്കുന്നതെന്നും നാട്ടിൽ സമാധാനം സൃഷ്ട്ടിക്കാൻ യു.ഡി.എഫിനെ വിജയിപ്പിക്കണമെന്നും അവർ പറഞ്ഞു.&nbsp;
വടകര ലോക്സഭ മണ്ഡലം യു.ഡി.എഫ് സ്ഥാനാർത്ഥി ഷാഫി പറമ്പിലിൻ്റെ തിരഞ്ഞെടുപ്പ് പ്രചരണാർത്ഥം നരിക്കൂട്ടുംചാലിൽ യു.ഡി.എഫ്.കമ്മിറ്റി സംഘടിപ്പിച്ച കുടുംബ സംഗമം ഉദ്ഘാടനം ചെയ്യുകയായിരുന്നു അവർ. സിദ്ധാർത്ഥ് നരിക്കൂട്ടുംചാൽ അധ്യക്ഷനായി. വേളം പഞ്ചായത്ത് പ്രസിഡൻ്റ് നയീമ കുളമുള്ളതിൽ, പ്രമോദ് കക്കട്ടിൽ, വി.പി.മൊയ്തു, പി.കെ.സുരേഷ്‌, ശ്രീജേഷ് ഊരത്ത്, എം.കെ.അബ്ദുറഹ്മാൻ, എസ്.ജെ.സജീവ് കുമാർ, ടി.കെ, കുട്ട്യാലി, ടി. സുരേഷ് ബാബു, പി.പി.ദിനേശൻ, എൻ.സി. കുമാരൻ, കെ.പി.മജീദ്, മംഗലശ്ശേരി ബാലകൃഷ്ണൻ, എം.സി.സതീശൻ, ലീബ സുനിൽ തുടങ്ങിയവർ സംസാരിച്ചു.

സി.പി.എം ചോരക്കളി അവസാനിപ്പിക്കണം: കെ കെ രമ

വടകര: കൊല്ലപ്പെട്ട വെറ്ററിനറി സര്‍വകലാശാലാ വിദ്യാര്‍ഥി സിദ്ധാര്‍ഥിന്റെ അമ്മയുടെ കണ്ണുനീരിനുള്ള പ്രതികാരം കൂടിയായിരിക്കും ഈ തെരഞ്ഞെടുപ്പെന്ന് കെ.കെ രമ എംഎഎല്‍. ജനമനസുകളെ വെട്ടിമുറിക്കുന്ന കേന്ദ്രഭരണത്തിനൊപ്പം ഓരോ സാധാരണക്കാരന്റെയും ജീവിതം ദു:സഹമാക്കിയ സംസ്ഥാന സര്‍ക്കാരിന് എതിരായ വിധിയെഴുത്തായിരിക്കും തെരഞ്ഞെടുപ്പെന്നും അവര്‍ പറഞ്ഞു. യുഡിഎഫ് സ്ഥാനാര്‍ഥി ഷാഫി പറമ്പിലിന്റെ നാമനിര്‍ദേശ പത്രിക സമര്‍പ്പണത്തിന് മുന്നോടിയായുള്ള മഹിളാ കൂട്ടായ്മയില്‍ സംസാരിക്കുകയായിരുന്നു കെ.കെ രമ.
കൊലപാതക രാഷ്ട്രീയം, അക്രമ രാഷ്ട്രീയം എന്നിവയ്‌ക്കെതിരെ അമ്മമാരുടെ പ്രതികരണമാക്കി ഈ തെരഞ്ഞെടുപ്പിനെ നമ്മള്‍ മാറ്റും. അക്രമ രാഷ്ട്രീയത്തിന്റെ ഇരകളായ സഹോദരിമാരുടെ കണ്ണുനീരിന് നമ്മള്‍ പ്രതികാരം ചെയ്യും. ദു:സഹമായ വിലക്കയറ്റമാണ് നാട്ടില്‍ ഉണ്ടായിരിക്കുന്നത്. ഇതിനെതിരായ വിധിയെഴുത്താക്കി ഈ തെരഞ്ഞെടുപ്പിനെ മാറ്റും. വടകരയിലെ സ്ത്രീകള്‍ ഈ തെരഞ്ഞെടുപ്പിനെ ഏറ്റെടുക്കുകയാണെന്നും കെ.കെ രമ പറഞ്ഞു.
വനിതാ ലീഗ് ജില്ലാ പ്രസിഡന്റ് ആമിന അധ്യക്ഷയായിരുന്നു. സുഹറ മമ്പാട്, അച്ചു ഉമ്മന്‍, കുത്സു, ഡോ. ഹരിപ്രിയ, ത്രേസ്യാമ്മ മാത്യു, മിനിക, സന്ധ്യ കരണ്ടോട്, ഗീത മോഹനന്‍ തുടങ്ങിയവര്‍ സംസാരിച്ചു.

സിദ്ധാര്‍ഥിന്റെ അമ്മയുടെ കണ്ണുനീരിന് തിരഞ്ഞെടുപ്പിലൂടെ പ്രതികാരം ചെയ്യും ; കെ.കെ രമ എംഎല്‍എ

മാഹി: ചൊക്ലി പഞ്ചായത്ത് യു ഡി എഫ് കൺവെൻഷനും ഓഫീസ് ഉദ്ഘാടനവും കെ കെ രമ എം എൽ എ നിർവ്വഹിച്ചു. അഡ്വ സിജി അരുൺ അധ്യക്ഷത വഹിച്ച യോഗത്തിൽ പി കെ യൂസഫ് സ്വാഗതവും ഷാജി എം ചൊക്ലി നന്ദിയും രേഖപ്പെടുത്തി. അഡ്വ കെ ഷുഹൈബ്, കെ എം പവിത്രൻ, അഡ്വ കെ എ ലത്തീഫ്, അബൂട്ടി ഹാജി, വി സി പ്രസാദ്, ഷാനിദ് മേക്കുന്ന്, എം ഉദയൻ, എം പി പ്രമോദ്, കെ കുഞ്ഞിമൂസ, ദീപ സുരേന്ദ്രൻ ,ഷെറിൻ ചൊക്ലി, ടി പി വസന്ത എന്നിവർ സംസാരിച്ചു.&nbsp;

യു ഡി എഫ് കൺവെൻഷനും ഓഫീസ് ഉദ്ഘാടനവും

Mahe

വടകര: ചന്ദ്രശേഖരൻ വധക്കേസിലെ പ്രതിയായ കുഞ്ഞനന്തനെ പുണ്യാളനായും, കുരിശേറിയവനായും, പാവങ്ങളുടെ പടത്തലവനായും ചിത്രീകരിച്ച കെ.കെ ശൈലജയുടെ നിലപാടിനെതിരെയുള്ള ശക്തമായ വിധിയെഴുത്തായിരിക്കും വടകരയിൽ നടക്കാൻ പോകുന്നതെന്ന് കെ.കെ. രമ എം.എൽ.എ അഭിപ്രായപ്പെട്ടു.
അമ്മമാർക്ക് മക്കളെയും, ഭാര്യമാർക്ക് ഭർത്താവിനെയും, സഹോദരിമാർക്ക് സഹോദരനെയും എന്നു വരെ കാണാമെന്ന് സി.പി.എം തീരുമാനിക്കുന്ന സാഹചര്യത്തിനെതിരെയുള്ള ഒരു സമൂഹത്തിന്റെ വിധിയെഴുത്ത് കൂടിയായിരിക്കും ഇതെ ന്നും അവർ കൂട്ടിച്ചേർത്തു. യു.ഡി.എഫ് സ്ഥാനാർത്ഥി ഷാഫി പറമ്പി ലിന്റെ തെരഞ്ഞെടുപ്പ് വിജയത്തിനായി വടകരയിൽ ചേർന്ന യുഡിഎഫ് വനിതാ കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അവർ. ചടങ്ങിൽ ആമിന അധ്യക്ഷത വഹിച്ചു. എൻ. വേണു, കെ. ബാലനാരായണൻ, ഐ.മൂസ, ഗൗരി പുതിയടുത്ത്, പി. കുൽസു, നിജേഷ് അരവിന്ദ്, സന്ധ്യ കര ണ്ടോട്, ഗീതാ മോഹൻ എന്നിവർ സംസാരിച്ചു.&nbsp;&nbsp;

ശൈലജയുടെ നിലപാടിനെതിരെയുള്ള വിധിയെഴുത്താവണം വടകരയിലെന്ന് കെ കെ രമ

വടകര: അറക്കിലാട് കുഴിച്ചാല്‍ തോട് പാര്‍ശ്വഭിത്തികെട്ടി സംരക്ഷിക്കുന്ന പദ്ധതിക്ക് സര്‍ക്കാര്‍ ഭരണാനുമതി ലഭിച്ചതായി കെ.കെ രമ എം.എല്‍.എ അറിയിച്ചു. ഈ ബജറ്റില്‍ പദ്ധതിക്കായി 15 ലക്ഷം രൂപ വകയിരുത്തിയിരുന്നു. തുടര്‍ന്ന് പദ്ധതിപൂര്‍ത്തിയാക്കാന്‍ ആവശ്യമായ 75 ലക്ഷത്തിന്റെ പദ്ധതിരേഖ സമര്‍പ്പിച്ചു. ഇതിനാണ് ജലവിഭവവകുപ്പ് ഇപ്പോള്‍ ഭരണാനുമതി നല്‍കിയിട്ടുള്ളത്. അറക്കിലാട് പ്രദേശത്തെ ജനങ്ങളുടെ ഏറെനാളായുള്ള ആവശ്യമായിരുന്നു തോടിന്റെ സംരക്ഷണം. വൈകാതെ സാങ്കേതിക അനുമതി ലഭിച്ച് ടെണ്ടര്‍നടപടിയിലേക്ക് പോകുമെന്ന് എം.എല്‍.എ പറഞ്ഞു.

അറക്കിലാട് കുഴിച്ചാല്‍ തോട് സംരക്ഷണത്തിന് 75 ലക്ഷത്തിന്റെ ഭരണാനുമതി; കെ കെ രമ എം.എല്‍.എ

വടകര: പ്രത്യേക പരിഗണന അർഹിക്കുന്ന വിദ്യാർത്ഥികൾക്ക് അർഹമായ സഹായങ്ങൾ ഉറപ്പാക്കി സമൂഹത്തിൻ്റെ മുഖ്യധാരയിലേക്ക് എത്തിക്കണമെന്ന് കെ.കെ രമ എം.എൽ.എ പറഞ്ഞു. സംസാരശ്രവണ വൈകല്യമുള്ള കുട്ടികൾക്ക് ആശ്രയമായ വടകര റോട്ടറി ബധിര വിദ്യാലയത്തിൻ്റെ 31 -ാം വാർഷികാഘോഷം ഉദ്ഘാടനം ചെയ്യുകയായിരുന്നു എം.എൽ.എ.
ശ്രവണ വൈകല്യമുള്ള കുട്ടികളെ കണ്ടെത്തി എൽ.കെ.ജി മുതൽ സാധാരണ സിലബിൽ ക്ലാസ് നൽകി വരുന്ന യു.പി സ്കൂളാണിത്. സ്കൂൾ മാനേജർ ഡോ. കെ. എം. അബ്ദുല്ല അധ്യക്ഷതവഹിച്ചു. എച്ച്.എം.എം മിനി റിപ്പോർട്ട് അവതരിപ്പിച്ചു. മുനിസിപ്പൽ ചെയർപെഴ്സൺ കെ.പി ബിന്ദു, കൗൺസിലർ ടി.വി ഹരിദാസൻ , ഡോ. കെ.എം സലീം, ഡോ. എ.കെ രാജൻ, പി.പി രാജൻ, വി അഞ്ജുഷ എന്നിവർ പ്രസംഗിച്ചു.

പ്രത്യേക പരിഗണന അർഹിക്കുന്നവർക്ക് സഹായങ്ങൾ ഉറപ്പ് വരുത്തണം; കെ.കെ രമ എം.എൽ. എ

വടകര: വടകരയിലെ തീരദേശ മേഖലയിലെ കാലങ്ങളായുള്ള ആവശ്യത്തിന് പരിഹാരമാകുന്നു. കഴിഞ്ഞ കടൽക്ഷോഭത്തിൽ തകർന്നടിഞ്ഞ കടൽഭിത്തിയുടെ പുനർ നിർമ്മാണത്തിന് 2.54 കോടിരൂപ അനുവദിച്ചു കിട്ടിയതായി കെ.കെ.രമ എം.എൽ.എ പറഞ്ഞു. വടകര മുനിസിപ്പാലിറ്റിയിലെ മുകച്ചേരി ഭാഗം കടൽഭിത്തി സിപി സ്റ്റോൺ 2065 നു തെക്കു ഭാഗത്തു 60 മീറ്റർ വടക്കോട്ടും, സിപി സ്റ്റോൺ 2064 നു തെക്ക് 67 മീറ്റർ മുതൽ വടക്കോട്ടുമായി തകർന്നു കിടക്കുന്ന കടൽഭിത്തിയുടെ പുനർനിർമ്മാണത്തിനാണ് ജലവിഭവ വകുപ്പിന്റെ അനുമതി ലഭിച്ചതെന്നും എം.എൽ.എ പറഞ്ഞു. ഏറ്റവും ദുരിതപൂർണ്ണവും, ഭയപ്പാടോടും കൂടെ ജീവിക്കുന്ന ജനവിഭാഗമാണ് തീരദേശമേഖലയിൽ ഉള്ളത്. വർഷകാലങ്ങളിൽ പലകുടുംബങ്ങളും ഇവിടെ നിന്നും വീടൊഴിഞ്ഞു പോകേണ്ടിവരുന്ന അവസ്ഥയാണ് ഉണ്ടാവാറുള്ളത്.&nbsp;
എം.എൽ.എ ആയി ചുമതല ഏറ്റെടുത്ത നാളുകൾ മുതൽ ഏറ്റവും കൂടുതൽ ഊന്നൽ നൽകിയതും ഇടപെട്ടതും ഈ മേഖലയിലെ പ്രശ്നങ്ങൾക്ക് പരിഹാരം കാണുന്നതിനായിരുന്നു. വിവിധ ഘട്ടങ്ങളിലായി ചെറുതും വലുതുമായ തുകകൾ കടൽഭിത്തിയുടെ പുനർ നിർമ്മാനത്തിനായി നേടിയെടുക്കാൻ കഴിഞ്ഞിട്ടുണ്ട്. കൊയിലാണ്ടി വളപ്പ് ഭാഗത്തുള്ള പ്രവർത്തികൾ നേരത്തെ തന്നെ ആരംഭിച്ചതാണ്. കുരിയാടി മേഖലയിലും തുക നേടിയെടുക്കാൻ കഴിഞ്ഞിരുന്നു. മുകച്ചേരിഭാഗത്തെ പ്രവൃത്തികൂടെ പൂർത്തീകരിക്കപ്പെടുന്നതോടെ വലിയ പരിധിവരെ ഈ മേഖലയിലെ പ്രശ്നങ്ങൾക്ക് പരിഹാരമാകുമെന്നും എം.എൽ.എ പറഞ്ഞു. സാങ്കേതിക നടപടികൾ പൂർത്തിയാക്കി വൈകാതെ തന്നെ പ്രവൃത്തി ആരംഭിക്കാനുള്ള നടപടികൾ ത്വരിതപ്പെടുത്താൻ ബന്ധപ്പെട്ട വകുപ്പിന് നിർദ്ദേശം നൽകിയതായും എം.എൽ.എ പറഞ്ഞു.

വടകര തീരദേശ മേഖലയിലെ തകർന്ന കടൽഭിത്തി നിർമ്മിക്കാൻ 2.54 കോടിരൂപ അനുമതിയായി; കെ.കെ.രമ എം.എൽ.എ

കോഴിക്കോട്: കോൺഗ്രസ് നേതാവ് കെ. മുരളീധരന്‍റെ തൃശ്ശൂരിലെ സ്ഥാനാര്‍ഥിത്വം പത്മജ വേണുഗോപാലിന്‍റെ രാഷ്ട്രീയ വഞ്ചനക്കുള്ള മറുപടിയെന്ന് ആർ.എം.പി.ഐ നേതാവ് കെ.കെ. രമ എം.എൽ.എ. ബി.ജെ.പി ജയിക്കാതിരിക്കാന്‍ നല്ല മാറ്റമാണിതെന്നും കെ.കെ. രമ വ്യക്തമാക്കി. വടകരയില്‍ സ്ഥാനാര്‍ഥി മാറിയാല്‍ വലിയ മാറ്റമുണ്ടാകില്ല. അ‍‍ഞ്ച് വര്‍ഷം വടകരയെ സജീവമായി മുന്നോട്ടു നയിച്ച വ്യക്തിയാണ് കെ. മുരളീധരന്‍. കരുണാകരന്‍റെ തട്ടകത്തില്‍ നല്ല മത്സരമായിരിക്കുമെന്നും കെ.കെ. രമ ചൂണ്ടിക്കാട്ടി.
പത്മജ ചെയ്ത ഏറ്റവും വലിയ രാഷ്ട്രീയ വഞ്ചനയാണ് ബി.ജെ.പിയിലേക്കുള്ള ചുവടുമാറ്റം. കരുണാകരന്‍റെ മകള്‍ ബി.ജെ.പിയിലേക്ക് എന്നത് നമുക്കൊന്നും ഉള്‍ക്കൊള്ളാന്‍ പറ്റാത്തതാണ്. ബി.ജെ.പിയിലേക്ക് കോണ്‍ഗ്രസ് നേതാക്കള്‍ പോകുമ്പോള്‍ സന്തോഷിക്കുന്നവരാണ് സി.പി.എം നേതാക്കളെന്നും കെ.കെ. രമ കുറ്റപ്പെടുത്തി.

വടകരയില്‍ സ്ഥാനാര്‍ഥി മാറിയാല്‍ വലിയ മാറ്റമുണ്ടാകില്ല; പത്മജയുടെ രാഷ്ട്രീയ വഞ്ചനക്കുള്ള മറുപടി; കെ.കെ. രമ

വടകര: മണ്ഡലത്തിലെ വിദ്യാലയങ്ങളുടെ വികസനത്തിനായി ഒരു കോടി തൊണ്ണൂറ്റി അഞ്ചു ലക്ഷം രൂപയുടെ പദ്ധതികൾ ഭരണാനുമതിയായതായി കെ.കെ രമ എം.എൽ.എ. ഒഞ്ചിയം ഗവ യു.പി സ്‌കൂൾ, വടകര പുത്തൂർ ഗവ ഹയർസെക്കൻഡറി സ്‌കൂൾ, കെ.കെ.എം ഗവ വൊക്കേഷണൽ ഹയർസെക്കൻഡറി സ്‌കൂൾ ഓർക്കാട്ടേരി എന്നീ സ്‌കൂളുകളുടെ അടിസ്ഥാന സൗകര്യ വികസനത്തിനായാണ് തുക അനുവദിച്ചു കിട്ടിയതെന്ന്‌ എം.എൽ.എ അറിയിച്ചു. സ്കൂള്‍ സന്ദര്‍ശന വേളകളിൽ സ്കൂളിന്റെ സുഗമമായ പ്രവര്‍ത്തനത്തിനും വികസനത്തിനും അനിവാര്യമാണെന്നുകണ്ട ഇനങ്ങൾ ഉള്‍പ്പെടുത്തി 2023 - 24 വർഷത്തെ പ്ലാൻ ഫണ്ടിൽ ഈ മൂന്ന് സ്‌കൂളുകളുടെയും വികസനത്തിനായി തുക അനുവദിക്കണമെന്നാവശ്യപ്പെട്ട് പൊതുവിദ്യാഭ്യാസ മന്ത്രിക്ക് കത്ത് നല്‍കിയിരുന്നു. തുടര്‍ന്ന് പൊതുമരാമത്ത് വകുപ്പിനോടാവശ്യപ്പെട്ടതു പ്രകാരം തയാറാക്കിയ എസ്റ്റിമേറ്റിന്റെ അടിസ്ഥാനത്തിലാണ് ഇപ്പോൾ ഭരണാനുമതിയായിരിക്കുന്നത്. ഒഞ്ചിയം ഗവ:യു.പി സ്‌കൂൾ - 1 കോടി, വടകര പുത്തൂർ ഗവ ഹയർസെക്കൻഡറി സ്‌കൂൾ - 45.10 ലക്ഷം, കെ.കെ.എം ഗവ വൊക്കേഷണൽ ഹയർസെക്കൻഡറി സ്‌കൂൾ ഓർക്കാട്ടേരി - 50 ലക്ഷം എന്നിങ്ങനെയാണ് തുക അനുവദിച്ചത്.&nbsp;
വര്‍ഷങ്ങളുടെ പാരമ്പര്യമുള്ള ഒഞ്ചിയം ഗവ.യു.പി സ്കൂള്‍ വടകര മണ്ഡലത്തിലെ ഏക ഗവ യു.പി സ്‌കൂളാണ്. ഇവിടെ കൂടുതൽ കുട്ടികൾക്ക് പഠിക്കാൻ കഴിയും വിധം വികസിപ്പിക്കുന്നതിന്റെ ഭാഗമായി കൂടുതൽ ക്ലാസ് റൂമുകൾ, ടോയ്‌ലറ്റുകൾ, വോളിബോൾ കോർട്ട്, കോംപ്പൗണ്ട് വാൾ, ഗേറ്റ് എന്നിവ നിർമ്മിക്കുന്നതിനാണു ഇപ്പോൾ ഒരു കോടി രൂപയുടെ ഭരണാനുമതി ലഭിച്ചിരിക്കുന്നത്. ഓർക്കാട്ടേരി കെ.എം ഗവ വൊക്കേഷണൽ ഹയർസെക്കണ്ടറി സ്‌കൂളില്‍ ക്ലാസ് മുറികളും ഓഡിറ്റോറിയവും നിർമിക്കുന്നതിനും പുത്തൂർ ഹയർ സെക്കണ്ടറി സ്കൂളിൽ പുതിയ കെട്ടിടം നിർമിക്കന്നതിനുമാണ് ഇപ്പോള്‍ ഭരണാനുമതി ലഭിച്ചിരിക്കുന്നതെന്നു എം.എൽ.എ അറിയിച്ചു. എത്രയും വേഗം ആര്‍ക്കിടക്ചറല്‍ ഡ്രോയിംഗും സ്ട്രക്ചറല്‍ ഡ്രോയിംഗും തയ്യാറാക്കി സാങ്കേതികാനുമതി ലഭ്യമാക്കുന്നതിനുള്ള നടപടി സ്വീകരിക്കുന്നതിന് പൊതുമരാമത്തു വകുപ്പിനോട് ആവശ്യപ്പെട്ടിട്ടുണ്ടെന്നും. തുടർന്നുള്ള സാങ്കേതിക നടപടികൾ പൂർത്തീകരിച്ചു വൈകാതെ തന്നെ പ്രവൃത്തി ആരംഭിക്കുന്നതിനുള്ള നടപടികൾ സ്വീകരിക്കുമെന്നും എം.എൽ.എ അറിയിച്ചു.

മണ്ഡലത്തിലെ വിദ്യാലയങ്ങളുടെ വികസനത്തിനായി ഒരു കോടി തൊണ്ണൂറ്റി അഞ്ചു ലക്ഷം രൂപയുടെ പദ്ധതികൾക്ക് ഭരണാനുമതിയായി; കെ.കെ രമ എം.എൽ.എ

കോഴിക്കോട്: പൂക്കോട് വെറ്റിനറി കോളജിൽ റാഗിങ്ങിനിരയായി മരണപ്പെട്ട സിദ്ധാർത്ഥിൻ്റെ വീട് സന്ദർശിച്ച് കെ കെ രമ എം എൽ എ. വാളയാറിൽ കൊലചെയ്യപ്പെട്ട കുരുന്നുകളുടെ അമ്മയും അവർക്ക് ഒപ്പമുണ്ടായിരുന്നു. 'ഒരു വീട് ആകെയാണ് മരിച്ചുപോയതെന്ന് തോന്നി. ആശ്വാസ വാക്കുകളൊക്കെയും നിഷ്ഫലമായി പോകുന്ന നിസ്സഹായത. എന്തെല്ലാം പ്രതീക്ഷകളോടെയാണ് ആ കുഞ്ഞിനെ കുടുംബം കലാലയത്തിലേക്ക് അയച്ചിട്ടുണ്ടാവുക? എന്ത് പ്രായശ്ചിത്തം ചെയ്താലാണ് കേരളത്തിന് ആ കുഞ്ഞിനോടും കുടുംബത്തോടും നീതിപുലർത്താനാവുക? ഒരു ഖാപ്പ് പഞ്ചായത്തിനെയോ നാട്ടുകൂട്ടവിചാരണയെ ഓർമിപ്പിക്കുന്ന വിധം മൂന്നുനാൾ നീണ്ട വിചാരണയും ആൾക്കൂട്ട മർദ്ദനവും.&nbsp;
ദാഹിച്ച വെള്ളം പോലും ലഭിക്കാതെ പ്രാണൻ പിടഞ്ഞുനിന്ന മൂന്ന് നാളുകൾ. ഓർക്കുംതോറും ചോരയുറഞ്ഞു പോകുന്ന ക്രൂരത. അതിനേക്കാൾ ഭയാനകമാണ് ഈ ദാരുണ സംഭവം കണ്ടില്ലെന്ന് നടിക്കുകയോ അതിന് വളച്ചുകെട്ടി ന്യായം ചമക്കാൻ ശ്രമിക്കുകയോ ചെയ്യുന്ന രാഷ്ട്രീയ സാംസ്കാരിക നായകന്മാർ. നീതിയുക്തവും ശക്തവുമായ അന്വേഷണവും മാതൃകാപരമായ ശിക്ഷാനടപടിയും കൊണ്ടല്ലാതെ കേരളത്തിൻ്റെ താണ തല അല്പമൊന്ന് ഉയർത്താനാവില്ല. അതിനാവശ്യമായ ശക്തമായ സമര സമ്മർദ്ദങ്ങൾ ഉയർന്നു വന്നേ പറ്റൂ' എന്ന് കെ കെ രമ പറഞ്ഞു.

'ഒരു വീട് ആകെയാണ് മരിച്ചുപോയതെന്ന് തോന്നി'; സിദ്ധാർത്ഥിൻ്റെ വീട് സന്ദർശിച്ച് കെ കെ രമ എം എൽ എ

കൊയിലാണ്ടി: സിപിഎം കൊയിലാണ്ടി സെൻട്രൽ ലോക്കൽ കമ്മറ്റി സെക്രട്ടറി പി വി സത്യനാഥനെ അരുംകൊല ചെയ്തിട്ട് ആറ് ദിവസം കഴിഞ്ഞിട്ടും സംഭവത്തിലെ ദുരൂഹത അകറ്റാനോ എന്താണ് സംഭവിച്ചത് എന്ന് കണ്ടുപിടിക്കാനോ പോലീസിന് ഇത് വരെ സാധിച്ചിട്ടില്ലെന്ന് കെ കെ രമ എം എൽ എ പറഞ്ഞു. സത്യനാഥൻ്റെ വീടുസന്ദർശിച്ച ശേഷം മാധ്യമ പ്രവർത്തകരോട് സംസാരിക്കുകയായിരുന്നു അവർ. തെളിവുകൾ നഷ്ടപ്പെടുന്നതിന് മുമ്പ് പോലീസ് അന്വേഷണം ത്വരിതപ്പെടുത്തേണ്ടതുണ്ട്. കൊല നടന്ന് ആറാം ദിവസമാണ് പ്രതിയെ കസ്റ്റഡിയിൽ വാങ്ങാൻ പോലീസ് തയാറായത്. ‘പ്രതി പോലീസ് സ്റ്റേഷനിൽ ഹാജരായി. ഇനി കൂടുതൽ കാര്യങ്ങൾ അന്വേഷിക്കേണ്ടതില്ല’ എന്നൊരു മനോഭാവത്തിലാണ് പോലീസ്’ നടപടികൾ ഇഴഞ്ഞുനീങ്ങുന്നത്. ഭരണകക്ഷിയുടെ പ്രധാനപ്പെട്ട ഒരു നേതാവ് കൊല ചെയ്യപ്പെട്ടിട്ട് അന്വേഷണം എന്ത് കൊണ്ടിത്ര ലാഘവത്തിൽ നടക്കുന്നു എന്നത് ദുരൂഹമാണ്.
തൻ്റെ വീട്ടിന് മുമ്പിലൂടെ നിത്യേന നടന്നു പോകുന്ന ഒരാളെ കൊല ചെയ്യുന്നതിന് ജനനിബിഡമായ ഉത്സവപ്പറമ്പ് തന്നെ പ്രതി എന്തുകൊണ്ട് തിരഞ്ഞെടുത്തു എന്നത് ദുരൂഹമാണ്. കൊല ചെയ്യുപ്പെട്ടയാളും കൊലയാളിയും ഒരേ പാർട്ടിയുടെ പ്രവർത്തകരാണ് എന്നത് ഈ ദുരൂഹത വർദ്ധിപ്പിക്കുന്നുണ്ട്. ജനനിബിഡമായ ഉത്സവപ്പറമ്പിൽ കുടുംബാംഗങ്ങളോടൊപ്പം കഴിയുകയായിരുന്ന സത്യനാഥനെ ആരുടേയും ശ്രദ്ധയിൽപ്പെടാതെ, ഒച്ചയനക്കങ്ങളില്ലാതെ, ഒരു പിടച്ചിൽ പോലുമില്ലാതെ, നിമിഷ നേരം കൊണ്ട് കഴുത്തു മുറിച്ച് കൊലപ്പെടുത്താൻ, തികഞ്ഞ പരിശീലനം സിദ്ധിച്ച ഒരു പ്രൊഫഷണൽ കൊലയാളിക്ക് മാത്രമേ കഴിയൂ എന്നത് വ്യക്തമാണ്.
ഇതിൽ നിന്ന് ഒരു കാര്യം വ്യക്തമാണ്. പ്രതി ജീവിതത്തിലാദ്യമായി ചെയ്ത ഒരു കുറ്റകൃത്യമല്ലിത്. പെട്ടന്നുണ്ടായ ഒരു വികാരത്താൽ നടത്തിയ കൊലയുമല്ല. അതുകൊണ്ടുതന്നെ ഇയാളുടെ മുൻകാല ചെയ്തികൾ പഴുതുകളില്ലാതെ അന്വേഷിച്ച് പുറത്തു കൊണ്ടുവരേണ്ടതുണ്ട്. പ്രത്യേകിച്ച് സി പി എം എന്ന പാർട്ടി, അവരുടെ ക്രിമിനൽ പ്രവർത്തനങ്ങൾക്ക് ദീർഘകാലമായി ഉപയോഗിക്കുന്ന ഒരാൾ എന്ന നിലയിൽ ഇത്തരം ഒരന്വേഷണം പരമ പ്രധാനമാണ്. ജില്ലക്കകത്തും അയൽ ജില്ലകളിലുമുള്ള ക്രിമിനൽ സംഘങ്ങൾക്ക് പ്രതിയുമായുള്ള ബന്ധവും അന്വേഷിക്കേണ്ടതുണ്ട്. സംസ്ഥാന ഭരണകക്ഷി നേതാവിനെ കൊല ചെയ്തിട്ടും പോലീസിൻ്റെ ഭാഗത്തുനിന്നുണ്ടാവുന്ന മെല്ലെപ്പോക്ക് ജനങ്ങൾ ക്കിടയിൽ പലതരം സംശയങ്ങൾക്കിടയാക്കിയിട്ടുണ്ടെന്ന് രമ പറഞ്ഞു. വീട്ടിലെത്തിയ എം എൽ എ സത്യനാഥൻ്റെ ഭാര്യയേയും മക്കളേയും ആശ്വസിപ്പിച്ചു. കുടുംബാംഗങ്ങളോടും നാട്ടുകാരോടും വിവരങ്ങൾ ആരാഞ്ഞു. സത്യം പുറത്തു കൊണ്ടുവരുന്നതിന് എല്ലാ പിന്തുണയും വാഗ്ധാനം ചെയ്തു.

പി വി സത്യനാഥന്റെ മരണത്തിലെ ദുരൂഹത അകറ്റണം; വീട് സന്ദർശിച്ച് കെ കെ രമ എം എൽ എ

Koyilandy

കൊച്ചി: ടിപി ചന്ദ്രശേഖരൻ വധകേസിൽ പ്രതികള്‍ക്ക് ജീവപര്യന്തമടക്കമുള്ള ശിക്ഷ വിധിച്ച ഹൈക്കോടതി ഉത്തരവിന്‍റെ കൂടുതൽ വിവരങ്ങൾ പുറത്ത്. പ്രതികൾക്ക് ജയിൽ ശിക്ഷയ്ക്കൊപ്പം ഹൈക്കോടതി കനത്ത പിഴയും ചുമത്തിയിട്ടുണ്ട്. ടി പിയുടെ ഭാര്യ കെ കെ രമക്കും മകനും പ്രതികൾ പിഴ നൽകണമെന്നാണ് കോടതി വിധിച്ചത്. കെ കെ രമയ്ക്ക് ഏഴര ലക്ഷം രൂപയും മകന് അഞ്ച് ലക്ഷം രൂപയും പിഴയായി പ്രതികൾ നൽകണം. ഇരുവർക്കുമായി മൊത്തം പന്ത്രണ്ടര ലക്ഷം രൂപയാണ് പ്രതികൾ നൽകേണ്ടത്.

ടി പി കേസ് പ്രതികൾക്ക് കനത്ത പിഴയും; കെ കെ രമക്ക് 7.5 ലക്ഷം രൂപയും, മകന് 5 ലക്ഷവും നൽകണം

Kerala

കൊച്ചി: ടിപി ചന്ദ്രശേഖരന്‍റെ കൊലപാതക കേസിലെ ഹൈക്കോടതി വിധി സ്വാഗതം ചെയ്യുന്നുവെന്ന് എംഎൽഎയും ചന്ദ്രശേഖരന്റെ ഭാര്യയുമായ കെ.കെ.രമ. മുഴുവൻ പ്രതികളും നിയമത്തിന്റെ മുന്നിൽ വന്നിട്ടില്ല. ​ഗൂഢാലോചന ഇനിയും പുറത്ത് വരാനുണ്ട്. നിയമ പോരാട്ടം തുടരുമെന്നും മേൽക്കോടതികളെ സമീപിക്കുമെന്നും കെകെ രമ മാധ്യമങ്ങളോട് പറഞ്ഞു. മറ്റു കാര്യങ്ങൾ പിന്നീട് തീരുമാനിക്കുമെന്നും കെകെ രമ കൂട്ടിച്ചേ‍ർത്തു. കേസിൽ പ്രതികള്‍ക്ക് ഹൈക്കോടതി വധശിക്ഷ നൽകിയില്ല. കേസിലെ ഒന്ന് മുതല്‍ അഞ്ച് വരെയുള്ള പ്രതികള്‍ക്കും ഏഴാം പ്രതിക്കും ഇരട്ട ജീവപര്യന്തം തടവും ഒരു ലക്ഷം രൂപ പിഴയുമാണ് ഹൈക്കോടതി വിധിച്ചിരിക്കുന്നത്.&nbsp;
ഒന്ന് മുതല്‍ അഞ്ചുവരെയുള്ള പ്രതികളായ എംസി അനൂപ്, മനോജ് കുമാര്‍ (കിര്‍മാണി മനോജ്), എന്‍കെ സുനില്‍ കുമാര്‍ (കൊടി സുനി), ടികെ രജീഷ്, എംകെ മുഹമ്മദ് ഷാഫി എന്നിവരുടെയും ഏഴാം പ്രതിയായ കെ ഷിനോജ് എന്നിവരുടെ ശിക്ഷയാണ് ഹൈക്കോടതി ഉയര്‍ത്തിയത്. ഇവര്‍ക്കെതിരെ കൊലപാതക കുറ്റത്തിന് പുറമെ ഗൂഡാലോചന കുറ്റം കൂടി ചുമത്തിയാണ് ഹൈക്കോടതി ഇരട്ട ജീവപര്യന്തമായി ഉയര്‍ത്തിയത്. ഇവര്‍ക്കെതിരെ വിചാരണ കോടതി കൊലപാതകത്തിന് മാത്രമാണ് ശിക്ഷിച്ചിരുന്നത്. അങ്ങേയറ്റം പ്രാകൃതമായ കൊലപാതകമാണെങ്കിലും പ്രതികള്‍ക്ക് വധശിക്ഷ നല്‍കുന്നില്ലെന്ന് വ്യക്തമാക്കികൊണ്ടാണ് കോടതി ഉത്തരവ്.&nbsp;

'ഹൈക്കോടതി വിധി സ്വാഗതം ചെയ്യുന്നു, ഗൂഢാലോചന ഇനിയും പുറത്ത് വരാനുണ്ട്; നിയമ പോരാട്ടം തുടരുമെന്ന്' കെകെ രമ

കൊച്ചി: ടി.പി ചന്ദ്രശേഖരന്‍ കേസിലെ പ്രതികള്‍ക്ക് പുറത്തുവരാനാകാത്ത തരത്തിലുള്ള ശിക്ഷയാണ് നല്‍കേണ്ടതെന്ന് ഭാര്യയും ആർ എം പി ഐ നേതാവുമായ കെ.കെ. രമ എം എൽ എ. ആരുടേയും ജീവന്‍ എടുക്കണമെന്ന് ആഗ്രഹമില്ല. പ്രതികളെ പുറത്തുവിട്ടവര്‍ക്ക് നേരെ അന്വേഷണം പോകാത്തതില്‍ വേദനയുണ്ടെന്നും ശിക്ഷാവിധി പ്രഖ്യാപിക്കുന്നത് മുൻപ് കെ.കെ. രമ കൊച്ചിയില്‍ പറഞ്ഞു.
ഒരു മനുഷ്യനും മരണപ്പെട്ടുകൂടാ എന്നതാണ് എന്റെ നിലപാട്. പരമാവധി ശിക്ഷ ഒരു ജീവൻ എടുത്തുകൊണ്ടാവണമെന്ന് എനിക്ക് ആ​ഗ്രഹമില്ല. എന്നാൽ, ജയിലിൽ നിന്ന് പുറത്തുവരാനാകാത്ത, പരോൾ ലഭിക്കാതെയുള്ള ശിക്ഷ അവർക്ക് ലഭ്യമാകണമെന്നാണ് ഞാൻ ആ​ഗ്രഹിക്കുന്നത്. ജയിലിനുള്ളിൽ അവർ ജീവിതകാലം മുഴുവൻ കഴിയണം. ഇനി ഒരു മനുഷ്യനും ഇതുപോലെ കൊലചെയ്യപ്പെടരുത്, കെ.കെ. രമ പറഞ്ഞു.
2012 മേയ് നാലിനാണ് ആര്‍.എം.പി. സ്ഥാപക നേതാവ് ടി.പി. ചന്ദ്രശേഖരനെ വടകര വള്ളിക്കോടുവെച്ച് അക്രമി സംഘം ബോംബെറിഞ്ഞു വീഴ്ത്തിയ ശേഷം വെട്ടിക്കൊലപ്പെടുത്തിയത്. സിപിഎമ്മില്‍നിന്ന് വിട്ടുപോയി സ്വന്തമായി പാര്‍ട്ടിയുണ്ടാക്കിയ ചന്ദ്രശേഖരനോടുള്ള പകവീട്ടുന്നതിന് സി.പി.എമ്മുകാരായ പ്രതികള്‍ കൊലപ്പെടുത്തി എന്നാണ് കേസ്.

ഇനി ഒരു മനുഷ്യനും ഇതുപോലെ കൊലചെയ്യപ്പെടരുത്, പ്രതികൾക്ക് പുറത്തുവരാനാകരുത്; കെ.കെ രമ

കൊച്ചി: കൊല്ലപ്പെട്ട ആര്‍.എം.പി. നേതാവ് ടി.പി. ചന്ദ്രശേഖരനും അമ്മയുണ്ടായിരുന്നെന്നും അവര്‍ ഹൃദയംപൊട്ടിയാണ് മരിച്ചതെന്നും കെ.കെ. രമ എം.എല്‍.എ. ടി.പി. ചന്ദ്രശേഖരന്‍ വധക്കേസിലെ പ്രതികള്‍ക്ക് പരമാവധി ശിക്ഷ നല്‍കണമെന്നാവശ്യപ്പെട്ട് കെ.കെ. രമ സമര്‍പ്പിച്ച ഹര്‍ജിയില്‍ പ്രതികളുടെ ഹൈക്കോടതിയിലെ വാദങ്ങളോട് പ്രതികരിക്കുകയായിരുന്നു അവര്‍. വധശിക്ഷ വിധിക്കാതിരിക്കാന്‍ എന്തെങ്കിലും ബോധിപ്പിക്കാനുണ്ടോയെന്ന കോടതിയുടെ ചോദ്യത്തോട് വീട്ടില്‍ പ്രായമായ അമ്മ മാത്രമേ ഉള്ളൂ എന്നായിരുന്നു കിര്‍മാണി മനോജിന്റെ വാദം.
'ഏറ്റവും മൃഗീയവും ക്രൂരവുമായ കൊലപാതകമാണിത്. അപൂര്‍വ്വമായ കൊലപാതകം. അത് കോടതിക്ക് ബോധ്യമായിട്ടുണ്ട്. അതിനനുസരിച്ചുള്ള ശിക്ഷ കൊടുക്കുമെന്നാണ് പ്രതീക്ഷിക്കുന്നത്. ക്യാപിറ്റല്‍ പണിഷ്‌മെന്റാണ് ആഗ്രഹിച്ചത്. ഇത്തരം കാര്യങ്ങളൊക്കെ കോടതി വിശദമായി പരിശോധിക്കുന്നുണ്ട്', രമ പറഞ്ഞു.
വിവാഹം കഴിച്ച് ഭാര്യയുണ്ട്, മക്കളുണ്ട്, കുടുംബത്തോടൊപ്പം പുറത്ത് താമസിക്കണം എന്നൊക്കെയാണ് പ്രതികള്‍ കോടതിയില്‍ പറഞ്ഞത്. പാലിയേറ്റീവ് പ്രവര്‍ത്തനം നടത്തണമെന്ന് പറഞ്ഞയാളുണ്ട്. അമ്മ ഒറ്റയ്ക്കാണ് എന്ന് പറഞ്ഞയാളുണ്ട്. അങ്ങനെ വിവിധ കാരണങ്ങളാണ് പ്രതികള്‍ കോടതിയില്‍ പറഞ്ഞത്. സ്വാഭാവികമായും അവര്‍ക്ക് അവരുടെ വാദങ്ങള്‍ ഉന്നയിക്കാമെന്നും കെ.കെ. രമ വ്യക്തമാക്കി.
'ചന്ദ്രശേഖരന് അമ്മയുണ്ടായിരുന്നു. ഹൃദയം പൊട്ടിയാണവര്‍ മരിച്ചത്. അവിടെ ഇരിക്കുമ്പോള്‍ എന്റെ മനസ്സ്‌ ആ അമ്മയുടെ അടുത്തായായിരുന്നു. പ്രായമായ അമ്മയെ ശ്രുശ്രൂഷിക്കേണ്ടത് അവരുടെ ആവശ്യമാണ്. അതിലൊന്നും നമുക്ക് അഭിപ്രായവ്യത്യാസമില്ല. പക്ഷേ അങ്ങനെ ചെയ്യുന്ന ആളുകള്‍ മറ്റുള്ളവരുടെ കുടുംബമുണ്ടെന്നുള്ളതും അമ്മയുണ്ടെന്നുള്ളതും ഓര്‍ത്തില്ല. അനുഭാവപൂര്‍വ്വമായ വിധിയുണ്ടാവുമെന്നാണ് പ്രതീക്ഷിക്കുന്നത്', അവര്‍ കൂട്ടിച്ചേര്‍ത്തു.
2012 മേയ് നാലിനാണ് ആര്‍.എം.പി. സ്ഥാപക നേതാവ് ടി.പി. ചന്ദ്രശേഖരനെ വടകര വള്ളിക്കാട് വെച്ച് അക്രമി സംഘം ബോംബെറിഞ്ഞു വീഴ്ത്തിയ ശേഷം വെട്ടിക്കൊലപ്പെടുത്തിയത്. സിപിഎമ്മില്‍നിന്ന് വിട്ടുപോയി സ്വന്തമായി പാര്‍ട്ടിയുണ്ടാക്കിയ ചന്ദ്രശേഖരനോട് പകവീട്ടുന്നതിന് സി.പി.എമ്മുകാരായ പ്രതികള്‍ കൊലപ്പെടുത്തി എന്നാണ് കേസ്.

ചന്ദ്രശേഖരനും അമ്മയുണ്ടായിരുന്നു, ഹൃദയംപൊട്ടിയാണവർ മരിച്ചത്; പ്രതികളുടെ വാദങ്ങളിൽ പ്രതികരിച്ച് കെ.കെ. രമ

കൊച്ചി: ആർ.എം.പി. നേതാവ് ടി.പി ചന്ദ്രശേഖരൻ വധക്കേസിലെ ശിക്ഷാവിധി ചൊവ്വാഴ്ച. ഒന്നുമുതൽ എട്ടുവരെ പ്രതികളായ എം.സി. അനൂപ്, കിർമാണി മനോജ്, കൊടി സുനി, ടി.കെ. രജീഷ്, മുഹമ്മദ് ഷാഫി, അണ്ണൻ സിജിത്ത്, കെ. ഷിനോജ്, കെ.സി. രാമചന്ദ്രൻ, 11-ാം പ്രതി ട്രൗസർ മനോജ് എന്നിവരുടെ ശിക്ഷ വർധിപ്പിക്കണമെന്ന ഹർജിയിലാണ് നാളെ വിധി. ജസ്റ്റിസ് എ.കെ. ജയശങ്കരൻ നമ്പ്യാരും ജസ്റ്റിസ് കൗസർ എടപ്പഗത്തും അടങ്ങിയ ബെഞ്ചിന്റേതാണ് തീരുമാനം.
പ്രതികൾക്ക് പരാമാവധി ശിക്ഷ നൽകണമെന്നായിരുന്നു കെ.കെ. രമ സമർപ്പിച്ച അപ്പീലിലെ ആവശ്യം. കുറ്റക്കാരാണെന്ന് കണ്ടെത്തിയ പ്രതികളെ തിങ്കളാഴ്ച രാവിലെ പത്തോടെയാണ് കോടതിയിലെത്തിച്ചത്. പത്താംപ്രതി സി.പി.എം. ഒഞ്ചിയം ഏരിയാകമ്മിറ്റി അംഗമായിരുന്ന കെ.കെ കൃഷ്ണനും കോടതിയിലെത്തി. അതേസമയം, പന്ത്രണ്ടാം പ്രതിയായ കുന്നോത്തുപറമ്പ് ലോക്കൽകമ്മിറ്റി അംഗമായിരുന്ന ജ്യോതിബാബു ആ​രോ​ഗ്യപ്രശ്നങ്ങൾ ചൂണ്ടിക്കാട്ടി ആശുപത്രിയിൽ നിന്ന് ഓൺലൈനിലാണ് ഹാജരായത്.
ശിക്ഷ സംബന്ധിച്ച് വിശദമായ കാര്യങ്ങൾ കോടതി പ്രതികളോട് ചോദിച്ചറിഞ്ഞു. പ്രതികൾ ജയിലിൽചെയ്ത ജോലി, മാനസികാരോഗ്യത്തെ സംബന്ധിച്ച റിപ്പോർട്ട്, പ്രൊബേഷൻ ഓഫീസറുടെ റിപ്പോർട്ട് എന്നിവയും കോടതി പരിശോധിച്ചിരുന്നു. ഈ മൂന്ന് റിപ്പോർട്ടുകളും പഠിക്കാനുള്ള പ്രതിഭാ​ഗത്തിന്റെ ആവശ്യം പരിഗണിച്ചാണ് ശിക്ഷാവിധി മാറ്റിയത്. തങ്ങൾ നിരപരാധികളാണെന്ന് പ്രതികൾ കോടതിയെ ബോധിപ്പിച്ചു. വധശിക്ഷ വിധിക്കാതിരിക്കാൻ എന്തെങ്കിലും ബോധിപ്പിക്കാനുണ്ടോയെന്ന് ഒന്നാം പ്രതി എം.സി അനൂപിനോട് കോടതി ചോദിച്ചു. കേസുമായി ഒരു ബന്ധവും ഇല്ലെന്ന് കൊടി സുനി അറിയിച്ചു. വീട്ടിൽ പ്രായമായ അമ്മ മാത്രമേ ഉള്ളൂ എന്നായിരുന്നു കിർമാണി മനോജിന്റെ വാദം. അസുഖമുള്ളതിനാൽ ശിക്ഷയിൽ നിന്ന് ഒഴിവാക്കണമെന്ന് ജ്യോതിബാബുവും ആവശ്യപ്പെട്ടു.
ദിവസങ്ങൾക്ക് മുമ്പാണ് ടി.പി. ചന്ദ്രശേഖരനെ കൊലപ്പെടുത്തിയ കേസിലെ 12 പ്രതികൾ കുറ്റക്കാരാണെന്നു കണ്ടെത്തി വിചാരണക്കോടതി വിധിച്ച ശിക്ഷ ഹൈക്കോടതി ശരിവെച്ചത്. വെറുതേവിട്ട പത്താംപ്രതി കെ.കെ. കൃഷ്ണൻ, ജ്യോതി ബാബു എന്നിവർ ഗൂഢാലോചനാക്കേസിൽ പ്രതികളാണെന്നും കണ്ടെത്തി. 2012 മേയ് നാലിനാണ് ആർ.എം.പി. സ്ഥാപക നേതാവ് ടി.പി. ചന്ദ്രശേഖരനെ വടകര വള്ളിക്കോട് വെച്ച് അക്രമി സംഘം ബോംബെറിഞ്ഞു വീഴ്ത്തിയ ശേഷം വെട്ടിക്കൊലപ്പെടുത്തിയത്. സിപിഎമ്മിൽനിന്ന് വിട്ടുപോയി സ്വന്തമായി പാർട്ടിയുണ്ടാക്കിയ ചന്ദ്രശേഖരനോട് പകവീട്ടുന്നതിന് സി.പി.എമ്മുകാരായ പ്രതികൾ കൊലപ്പെടുത്തി എന്നാണ് കേസ്.

ടി.പി ചന്ദ്രശേഖരൻ വധക്കേസിലെ നിർണായക ശിക്ഷാവിധി ചൊവ്വാഴ്ച

വടകര: മണ്ഡലത്തിലെ പാക്കയിൽ, നടോൽ, താഴെ അങ്ങാടി ഭാഗങ്ങളിലെ ജനങ്ങൾ കാലങ്ങളായി അനുഭവിച്ചുകൊണ്ടിരിക്കുന്ന വലിയ ദുരിതത്തിന് പരിഹാരമാകും വിധം ഒവിസി തോട് നവീകരണം യാഥാർഥ്യമാകുന്നു. തോടിന്റെ പുനരുദ്ധാരണ പ്രവൃത്തിക്കായി 2022 - 23 വർഷത്തെ ബജറ്റ് ഫണ്ടിൽ അനുവദിച്ച ഒരു കോടി എഴുപത് ലക്ഷം രൂപയുടെ പ്രവൃത്തി ഉദ്‌ഘാടനം കെ.കെ രമ എം.എൽ.എയുടെ അധ്യക്ഷതയിൽ ജലവിഭവ വകുപ്പ് മന്ത്രി റോഷി അഗസ്റ്റിൻ ഓൺലൈനായി നിർവഹിച്ചു. കേരളത്തിലുടനീളം സുലഭമായ ശുദ്ധ ജലലഭ്യത ഉണ്ടെന്ന ബോധം എപ്പോഴും നമ്മെ നയിച്ചിരുന്നു. എന്നാൽ ഇപ്പോൾ ഉൾനാടൻ ജലസ്രോതസ്സുകൾ മലിനമാക്കപ്പെടുകയും നികത്തപ്പെടുകയുമൊക്കെ ചെയ്തതിന്റെ ഭാഗമായി കുടിവെള്ള ക്ഷാമം ഉണ്ടാകാൻ സാധ്യതയുണ്ടെന്നുള്ള വസ്തുതയാണ് നമുക്ക് മുന്പിലുള്ളത്. ഇതുമുൻകൂട്ടി കണ്ട് ഉൾനാടൻ ജലസ്രോതസ്സുകളുടെ സംരക്ഷണം ഉറപ്പുവരുത്തുക എന്നതാണ് സർക്കാരിന്റെ പ്രധാന അജണ്ടയെന്നും ഇതിനായി ജലവിഭവ വകുപ്പ് വിവിധ പദ്ധതികൾ ആവിഷ്കരിച്ചു വരികയാണെന്നും മന്ത്രി പറഞ്ഞു.&nbsp;
ഒ.വി.സി തോട് നവീകരണത്തിന്റെ ആവശ്യകത തെരഞ്ഞെടുപ്പ് സമയത്തുള്ള സന്ദർശനവേളയിൽ തന്നെ നാട്ടുകാർ ശ്രദ്ധയിൽപ്പെടുത്തിയതാണ്. ഇതു സംബന്ധിച്ച് 2018ൽ സമർപ്പിച്ചിരുന്ന പദ്ധതിരേഖ പരിഗണന ലഭിക്കാതെ കിടക്കുകയായിരുന്നു. ഈ ദുരവസ്ഥ നേരിൽ കണ്ടു മനസിലാക്കിയതിനു ശേഷം കഴിഞ്ഞ വർഷത്തെ ബജറ്റ് നിർദേശങ്ങളിൽ പ്രധാന ഇനമായി ഒവിസി തോട് നവീകരണം നിർദ്ദേശിക്കുകയും ധനമന്ത്രിയെ നേരിൽ കണ്ടു ഇതിനായി 1.70 കോടി രൂപ ബജറ്റിൽ ഉൾപ്പെടുത്തുകയുമായിരുന്നു എന്ന് കെ.കെ.രമ എം.എൽ.എ പറഞ്ഞു. വരുന്ന വർഷകാലത്തിനു മുൻപ് തന്നെ പ്രവൃത്തി പൂർത്തികരിക്കുന്നതിനായി കരാറുകാരായ ഊരാളുങ്കൽ സൊസൈറ്റിക്കും നിർവഹണം നടത്തുന്ന മൈനർ ഇറിഗേഷൻ വകുപ്പിനും നിർദ്ദേശം നൽകിയതായും അവർ കൂട്ടിച്ചേർത്തു.&nbsp;&nbsp;
നഗരസഭാ ചെയർപേഴ്സൺ കെ.പി ബിന്ദു ,കൗൺസിലർമാരായ സജീവ് കുമാർ.പി, എം.ബിജു, റൈഹാനത്ത് പി, നിസാബി വി.വി, പൊതുപ്രവർത്തകരായ ബിജു.കെ.എൻ, രമേശൻ ടി .കെ, വേണുഗോപാൽ.വി, ജലാൽ പി.കെ, സഹദേവൻ.കെ, വി.പി.ചന്ദ്രൻ, കെ.പ്രകാശൻ, സി.കുമാരൻ, പി.സോമശേഖരൻ, എം.വി അബ്ദുല്ല, രതീശൻ എന്നിവർ സംസാരിച്ചു. മൈനർ ഇറിഗേഷൻ എക്സികുട്ടീവ് എഞ്ചിനീയർ സത്യൻ.കെ.കെ റിപ്പോർട്ട് അവതരിപ്പിച്ചു. അസി.എക്സികുട്ടീവ് എഞ്ചിനീയർ ഹാബി.സി.എച്ച് നന്ദി പറഞ്ഞു.

നീണ്ട നാളത്തെ കാത്തിരിപ്പ്; ഒവിസി തോട് നവീകരണം യാഥാർഥ്യമാകുന്നു, പ്രവൃത്തി ഉദ്‌ഘാടനം ചെയ്തു

വടകര: പുളിഞ്ഞോളി സീനിയർ ബേസിക്ക് സ്കൂളിന് വടകര എം.എൽ.എ.കെ.കെ രമയുടെ എസ്.ഡി.ഫണ്ടിൽ നിന്നും അനുവദിച്ച സ്മാർട്ട് ക്ലാസ് റൂം ഉപകരണങ്ങളുടെ ഉദ്ഘാടനം എം.എൽ.എ നിർവ്വഹിച്ചു. പി.ടി.എ പ്രസിഡണ്ട് കെ.അഖില അദ്ധ്യക്ഷത വഹിച്ചു. പുളിഞ്ഞോളി.എസ്.ബി.സ്കുളിൽ നിന്നും യു.എസ്. എസ്.നേടിയ കെ.വി ഫസലിനെ ചടങ്ങിൽ അനുമോദിച്ചു. ഹെഡ്മിസ്ട്രസ് പി. പ്രിയംവദ സ്വാഗതം പറഞ്ഞു. ബാലകൃഷ്ണൻ പി.പി, സ്കൂൾ മാനേജർ പറമ്പത്ത് കുഞ്ഞിരാമൻ, എം.സി ഇബ്രാഹീം ,പവിത്രൻ, വി.കെ പ്രേമൻ, കെ.വിജയൻ എം.പി.അബ്ദുൽ ഗഫൂർ എന്നിവർ സംസാരിച്ചു.

സ്മാർട്ട് ക്ലാസ്റൂം ഉദ്ഘാടനം ചെയ്തു

കോഴിക്കോട്: ടി.പി.ചന്ദ്രശേഖരൻ വധക്കേസിൽ ഗൂഢാലോചന നടത്തിയ ഉന്നത നേതാക്കൾക്കെതിരെ സുപ്രീം കോടതിയിൽ അപ്പീൽ നൽകുമെന്ന് ആർഎംപി (ഐ) സംസ്ഥാന സെക്രട്ടറി എൻ.വേണു. ടിപി കേസിലെ പ്രതികളുടെ ശിക്ഷ ശരിവയ്ക്കുകയും ഗൂഢാലോചനയിൽ പങ്കാളികളായ 2 പേർക്ക് ശിക്ഷ വിധിക്കുകയും ചെയ്ത ഹൈക്കോടതി വിധി സിപിഎമ്മിന്റെ ഫാഷിസ്റ്റ് നേതൃത്വത്തിനു പാഠമാണ്. ഒരു നീതിമാന്റെ രക്തവും ഇനി തെരുവിൽ വീഴരുതെന്ന സന്ദേശം ഉയർത്തിപ്പിടിക്കുന്ന കോടതി വിധിയെ പാർട്ടി സ്വാഗതം ചെയ്യുന്നു.
സിപിഎം നടത്തിയ രാഷ്ട്രീയ കൊലപാതകമാണെന്നും ഉന്നതനേതൃത്വം ഗൂഢാലോചന നടത്തിയാണു ചന്ദ്രശേഖരനെ കൊന്നതെന്നും തെളിഞ്ഞിരിക്കുകയാണ്. അതു ഏറ്റുപറഞ്ഞു സിപിഎം നേതൃത്വം മാപ്പു പറയണം. പി.മോഹനൻ അടക്കം ശിക്ഷയിൽനിന്ന് ഒഴിവായെങ്കിലും തിരശ്ശീലയ്ക്കു പിന്നിൽ മറഞ്ഞു നിൽക്കുന്നവരെക്കൂടി കേരളീയ സമൂഹത്തിനു മുന്നിൽ കൊണ്ടുവരണം. അതിനായി സുപ്രീം കോടതിയിൽ അപ്പീൽ നൽകും. പച്ചപ്പാവമാണെന്നു മുഖ്യമന്ത്രി പിണറായി വിജയൻ പറഞ്ഞ കുഞ്ഞനന്തനും ഉൾപ്പെട്ടുവെന്നു വിധിയിലൂടെ വ്യക്തമായി. ഗൂഢാലോചന സിബിഐ അന്വേഷിക്കണം എന്നാവശ്യപ്പെട്ട് നൽകിയ ഹർജി ഹൈക്കോടതിയിലുണ്ട്. ‌‌
സർക്കാരിന്റെ തടസ്സവാദം മൂലമാണു നീണ്ടുപോകുന്നത്. അക്കാര്യത്തിലും തീരുമാനം വരുമെന്നാണ് കരുതുന്നത്. പൊലീസ് അന്വേഷണം ശരിയായ ദിശയിലായിരുന്നുവെന്നു ശരിവയ്ക്കുന്നതാണ് ഹൈക്കോടതി വിധി. ആർഎംപിയും തിരുവഞ്ചൂർ രാധാകൃഷ്ണനും ചേർന്ന് കെട്ടിച്ചമച്ച കേസാണിതെന്ന സിപിഎമ്മിന്റെ വാദം ഹൈക്കോടതി വിധിയോടെ പൊളിഞ്ഞു. ടിപി കേസിലെ പ്രോസിക്യൂട്ടറായിരുന്ന സി.കെ.ശ്രീധരനെ മറുകണ്ടം ചാടിച്ച് ഒപ്പം നിർത്തി കേസ് പൊളിക്കാൻ ശ്രമിച്ച സിപിഎമ്മിന്റെ മോഹമാണു തകർന്നില്ലാതായത്. ഹൈക്കോടതിയിലെ പ്രമുഖ അഭിഭാഷകരെ ലക്ഷങ്ങൾ നൽകി സിപിഎം നേതൃത്വം അണിനിരത്തിയിട്ടും ക്രിമിനലുകളെ രക്ഷിക്കാനായില്ല.
അഭിഭാഷകരായ പി.കുമാരൻകുട്ടിയും എസ്.രാജീവും സഫലും നടത്തിയ നിയമയുദ്ധം ഏറെ തിളക്കമുള്ളതും ചരിത്രത്തിലെന്നും ഉയർന്നു നിൽക്കുന്നതുമാണ്. എതിരഭിപ്രായം പറയുന്നവരെ കൊന്നുതള്ളി പണക്കൊഴുപ്പിന്റെ ഹുങ്കോടെ നീതിവ്യവസ്ഥയെ വിലയ്ക്കു വാങ്ങി കേരളം അടക്കി ഭരിക്കാമെന്ന പിണറായി വിജയന്റെ അഹങ്കാരത്തിനേറ്റ പ്രഹരമാണു വിധി. രാഷ്ട്രീയ എതിരാളികളെ ഉന്മൂലനം ചെയ്യുന്ന ഫാഷിസ്റ്റ് പ്രവണത പുരോഗമന സമൂഹത്തിന് ഒരിക്കലും അംഗീകരിക്കാനാവില്ലെന്നും വേണു പറഞ്ഞു.

പിണറായി വിജയന്റെ അഹങ്കാരത്തിനേറ്റ പ്രഹരമാണ് വിധി; ടിപി കേസിൽ സുപ്രീം കോടതിയിൽ അപ്പീൽ നൽകുമെന്ന് എൻ വേണു

വടകര: ഫിഷിംഗ് ഹാര്‍ബറുകളുടെ കുറവും നിലവിലെ ഫിഷിംഗ് ഹാര്‍ബറുകള്‍ നവീകരിക്കാത്തതിനാലും വടകരയിലെ മത്സ്യത്തൊഴിലാളികള്‍ അനുഭവിക്കേണ്ടി വരുന്ന ബുദ്ധിമുട്ടുകള്‍ പരിഹരിക്കുന്നതിനുള്ള നടപടികള്‍ വേണമെന്നാവശ്യപ്പെട്ട് കെ.കെ.രമ എം.എൽ.എ നിയമസഭയിൽ സബ്മിഷന്‍ അവതരിപ്പിച്ചു.
തിക്കോടി മുതൽ ധർമ്മടം വരെയുള്ള ഏകദേശം 5000 ത്തോളം വരുന്ന പരമ്പരാഗത മത്സ്യത്തൊഴിലാളികളും അനുബന്ധ തൊഴിലാളികളും ആയിരക്കണക്കിന് മറ്റു തൊഴിലാളികളും ഉപജീവനം നടത്തിവരുന്ന കേരളത്തിലെ പ്രധാനപ്പെട്ട മത്സ്യബന്ധന തുറമുഖങ്ങളിൽ ഒന്നാണ് ചോമ്പാൽ ഹാർബർ. എന്നാൽ ഇന്ന് പരാധീനതകളുടെ നടുവിൽ വിർപ്പുമുട്ടുകയാണ് ഈ ഹാർബർ. കാലങ്ങളായി ഇവിടെ യഥാസമയം മെയിൻറനൻസ് നടക്കുന്നില്ല.നാലുവർഷത്തോളം കാലമായി ട്രഡ്ജിങ് നടത്താത്തത് മൂലം ഇവിടെ തോണിമറിഞ്ഞുള്ള അപകടങ്ങൾ പതിവാണ്. മത്സ്യബന്ധനവലകളുള്‍പ്പടെ മറ്റു ഉപകരണങ്ങളുടെ അറ്റകുറ്റപ്പണികള്‍ നടത്തുവാനും സാധിക്കുന്നില്ലെന്നതും വലിയ പ്രശ്നമായി നിലനിൽക്കുന്നതാണ് എം.എൽ.എ സബ്മിഷനിലൂടെ ഉന്നയിച്ചു.
കടലിലും കടല്‍ത്തീരത്തും വച്ച് അപകടത്തിൽപ്പെടുന്നവർക്ക് പ്രഥമ ശുശ്രൂഷ നൽകാൻ ചോമ്പാൽ ഹാർബറിൽ പോലും ഒരു സംവിധാനവുമില്ല. ഹാർബറിൽ 24 മണിക്കൂറും പ്രവർത്തിക്കുന്ന ഒരു ആരോഗ്യ സബ്‌സെന്റർ സ്ഥാപിച്ച് മത്സ്യത്തൊഴിലാളിയുടെ ജീവൻ രക്ഷിക്കാൻ അടിയന്തര നടപടി ഉണ്ടാകണം.
ഈ തീരമേഖലയില്‍ ഉണ്ടാകാറുള്ള ക്രമസമാധാന പ്രശ്നങ്ങള്‍ പരിഹരിക്കുന്നതിനായി ശക്തമായ പോലീസ് എയ്ഡ് പോസ്റ്റ് സ്ഥാപിക്കണമെന്നത് കാലാകാലങ്ങളായുള്ള ആവശ്യമാണ്. അതിനും ഒരു പരിഹാരവും കാണാൻ ഈ കാലമത്രയും സാധിച്ചിട്ടില്ല. മത്സ്യ സംരക്ഷണത്തിനായി ഇവിടെ ഒരു ഐസ് പ്ലാൻറും മാലിന്യ നിർമ്മാർജ്ജനത്തിനായി ഒരു ബയോഗ്യാസ് പ്ലാൻറും സ്ഥാപിച്ചിട്ടുണ്ടെങ്കിലും ഇവ പ്രവർത്തനക്ഷമമല്ല. ഇവ ഉടന്‍ തന്നെ പ്രവർത്തനക്ഷമമാക്കണം.വാഹനങ്ങളുടെ പാർക്കിംഗ് സൗകര്യം, ഡീസൽ ബങ്ക്, ഇങ്ങനെ മേഖലയിലെ മത്സ്യത്തൊഴിലാളികള്‍ക്ക് അവരുടെ തൊഴില്‍ സുഗമമായി ചെയ്യുന്നതിനായി നിരവധി ആവശ്യങ്ങളാണ് ചോമ്പാല ഹാർബറിൽ ഉള്ളത്. ഇതിനെല്ലാം പരിഹാരം കാണാൻ കഴിയുംവിധമുള്ള അടിയന്തിര ഇടപെടൽ സർക്കാരിന്റെ ഭാഗത്തുനിന്നും ഉണ്ടാകണമെന്നും എം.എൽ.എ ആവശ്യപ്പെട്ടു.
വടകരയില്‍ മത്സ്യത്തൊഴിലാളികൾ തിങ്ങിപ്പാർക്കുന്ന മറ്റൊരു പ്രദേശമാണ് കുരിയാടി. കുരിയാടിയിൽ ഒരു മത്സ്യബന്ധന തുറമുഖം സ്ഥാപിക്കണമെന്നത് കാലങ്ങളായുള്ള ആവശ്യമാണ്. ഇവിടെ തുറമുഖം നിർമ്മിക്കുന്നതു സംബന്ധിച്ച പഠനം നടത്താൻ വേണ്ടി 2015-ല്‍ 59 ലക്ഷം രൂപ അനുവദിച്ചിരുന്നു. ഇതിൻറെ പഠനം നടന്നുവരികയാണെന്നും നിർത്തിവെക്കാൻ വേണ്ടി തീരുമാനിച്ചതായും കേള്‍ക്കുന്നുണ്ട്. ഈ കാര്യത്തിൽ വ്യക്തത വരേണ്ടതുണ്ട്. നിർത്തിവെക്കാനാണ് തീരുമാനിച്ചതെങ്കിൽ അത് പുന:പരിശോധിക്കാൻ സർക്കാർ തയ്യാറാകണമെന്നും പഠനം പൂര്‍ത്തിയാക്കി കുരിയാടിയില്‍ ഒരു മത്സ്യബന്ധന തുറമുഖം സ്ഥാപിക്കാനുള്ള അടിയന്തര നടപടികള്‍ സ്വീകരിക്കണമെന്നും എം.എൽ.എ ആവശ്യപ്പെട്ടു. നേരത്തെ വടകരയില്‍ നടന്ന തീരസദസിൽ ഇക്കാര്യങ്ങള്‍ വളരെ വിശദമായി തന്നെ മന്ത്രിയുടെ ശ്രദ്ധയില്‍ കൊണ്ടുവന്നിട്ടുള്ളതാണ്. എന്നിട്ടും യാതൊരു നടപടിയും ഈ വിഷയങ്ങളിൽ ഉണ്ടായില്ല എന്നതു ഖേദകരമാണ്. ഈ രണ്ടു ഹാര്‍ബറുകളുടെ കാര്യങ്ങളിലും സര്‍ക്കാരിന്റെ ഭാഗത്തു നിന്നും അടിയന്തര നടപടികള്‍ ഉണ്ടാകണം എന്ന് സബ്മിഷനിലൂടെ കെ.കെ.രമ നിയമസഭയിൽ ആവശ്യപ്പെട്ടു.

മണ്ഡലത്തിലെ ഫിഷിംഗ് ഹാര്‍ബറുകളുടെ നവീകരണവും നിര്‍മ്മാണവും; നിയമസഭയിൽ സബ്മിഷൻ അവതരിപ്പിച്ച് കെ.കെ.രമ

വടകര: സംസ്ഥാന ബജറ്റിൽ മണ്ഡലത്തിന് അർഹമായ പരിഗണന ലഭിച്ചില്ലെന്ന് കെ.കെ രമ എം.എൽ.എ. ബജറ്റിന് മുൻപ് നൽകിയ നിർദേശങ്ങളിൽ ആകെ അഞ്ചു കോടിയുടെ പദ്ധതികൾ മാത്രമാണ് അനുവദിച്ചത്. അഴിത്തല ബോട്ടുജെട്ടി അടക്കമുള്ള തീരദേശത്തെ നിർദേശങ്ങളും അടിസ്ഥാന സൗകര്യ വികസനവും പരിഗണിക്കാത്തത് പ്രതിഷേധാർഹമാണ്. ജലവിഭവ വകുപ്പിന് കീഴിലെ പദ്ധതികൾ മാത്രം അനുവദിച്ച് മറ്റുള്ളവയെ തഴഞ്ഞത് ശരിയായ നടപടിയല്ല. തൊട്ടടുത്ത മണ്ഡലങ്ങളിൽ പത്തും പതിനൊന്നും കോടി അനുവദിച്ചപ്പോൾ വെറും അഞ്ചു കോടിയിൽ വടകര മണ്ഡലത്തെ ഒതുക്കുകയായിരുന്നു. ബജറ്റ് ചർച്ചാ വേളയിൽ ഈ വിഷയം ഉന്നയിക്കുമെന്നും അർഹമായ പദ്ധതികൾ നേടിയെടുക്കാൻ പരിശ്രമിക്കുമെന്നും എം.എൽ.എ അറിയിച്ചു.

ബജറ്റ്; വടകര മണ്ഡലത്തിന് അർഹമായ പരിഗണന നൽകാത്തത് പ്രതിഷേധാർഹം

വടകര: കഴിഞ്ഞ ദിവസം അന്തരിച്ച വടകരയിലെ കർഷകത്തൊഴിലാളി പ്രസ്ഥാനത്തിൻറെ പ്രധാനപ്പെട്ട നേതാക്കളിൽ ഒരാളും സിപിഐഎം മുൻ ജില്ലാ കമ്മിറ്റി അംഗവുമായിരുന്ന ടി കെ കുഞ്ഞിരാമനെ അനുസ്മരിച്ച് കെ കെ രമ എം എ. എണ്ണമറ്റ സമര പോരാട്ടങ്ങൾക്ക് അദ്ദേഹം നേതൃത്വം നൽകിയിട്ടുണ്ട്. വിദ്യാർത്ഥി സമര കാലഘട്ടങ്ങളിൽ വടകരയിലെ വിദ്യാർത്ഥി നേതാക്കൾക്ക് അദ്ദേഹം പകർന്നു നൽകിയ പിന്തുണയും ധൈര്യവും ചെറുതായിരുന്നില്ല. യുവജന വിദ്യാർഥി രംഗത്ത് പ്രവർത്തിക്കുന്ന കാലഘട്ടം തൊട്ടേ ടി പി ചന്ദ്രശേഖരനുമായി ആഴത്തിലുള്ള ആത്മബന്ധം പുലർത്തിയിരുന്ന അദ്ദേഹം രാഷ്ട്രീയമായി വേർപിരിഞ്ഞിട്ടും ആത്മബന്ധത്തിൽ തെല്ലും കുറവ് വരുത്തിയിരുന്നില്ലെന്ന് കെ കെ രമ അനുസ്മരിച്ചു.
ആർ എം പി ഐ രൂപീകരിച്ചതിനുശേഷവും ഞങ്ങളോട് വ്യക്തിപരമായ അകൽച്ച കാണിക്കാതിരുന്ന അപൂർവം സിപിഎം നേതാക്കളിൽ ഒരാളായിരുന്നു ടികെ. വിദ്യാർത്ഥി സംഘടന പ്രവർത്തന കാലം തൊട്ടേ വളരെ അടുത്ത ബന്ധം ഉണ്ടായിരുന്ന ടി കെയുടെ ദേഹവിയോഗം വ്യക്തിപരമായി വലിയൊരു ദുഃഖമാണ്. അദ്ദേഹത്തിൻറെ കുടുംബാംഗങ്ങളുടെയും ബന്ധുക്കളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നുവെന്നും എം എൽ എ കുറിച്ചു.

വ്യക്തിപരമായ അകൽച്ച കാണിക്കാതിരുന്ന നേതാവ്; ടി കെ കുഞ്ഞിരാമനെ അനുസ്മരിച്ച് കെ കെ രമ

വടകര: ദേശീയപാത വികസനത്തിൽ മടപ്പള്ളിയിൽ അടിപ്പാത നിർമിക്കണമെന്നും നാദാപുരം റോഡിൽ അനുവദിച്ച അടിപ്പാത മടപ്പള്ളി ഹയർസെക്കൻഡറി സ്‌കൂൾ ജംഗ്ഷനിലേക്ക് മാറ്റണമെന്നും മുക്കാളിയിലെ നിലവിലുള്ള അടിപ്പാത സംരക്ഷിക്കുന്നവശ്യമായ നടപടി സ്വീകരിക്കണമെന്നും കെ.കെ രമ എം.എൽ.എ ആവശ്യപ്പെട്ടു. ഇതുസംബന്ധിച്ച് തിരുവനന്തപുരത്ത് ദേശീയപാത അതോറിറ്റി ഡിവിഷനൽ ജനറൽ മാനേജറായ അഭിഷേക് തോമസ് വർഗീസിനെ നേരിൽകണ്ട് നിവേദനം നൽകി. മടപ്പള്ളിയിൽ നേരത്തെതന്നെ അടിപ്പാതയ്ക്കായി എം.എൽ.എ വിവിധ അതോറിറ്റികളുമായി ബന്ധപ്പെട്ടിരുന്നു.&nbsp;&nbsp;
മടപ്പള്ളിയിൽ കോളജ് അടക്കമുള്ള സ്ഥലങ്ങളിലേക്ക് പോകുന്നവർക്കും വെള്ളികുളങ്ങര വഴി കുറ്റ്യാടിയിലേക്ക് പോകാനുള്ള എളുപ്പവഴിയുമാണ്. ഇവിടെ അടിപ്പാത അനുവദിക്കുകയാണെങ്കിൽ മലയോര മേഖലയിലുള്ളവർക്കടക്കം ദേശീയപാത വഴി കണ്ണൂർ, കോഴിക്കോട് ഭാഗത്തേക്കു പോകാൻ എളുപ്പമാകും. ഇതാണ് മടപ്പള്ളിയിൽ അടിപ്പാത നിർമിക്കണമെന്ന ആവശ്യം പ്രസക്തമാക്കുന്നത്. നാദാപുരം റോഡിൽ അനുവദിച്ച അടിപ്പാത സ്‌കൂൾ കുട്ടികൾക്ക് സൗകര്യമായ സ്‌കൂൾ ജങ്ഷൻ നിൽക്കുന്ന സ്ഥലത്തേക്കു മാറ്റണമെന്നും നിവേദനത്തിൽ ആവശ്യപ്പെട്ടു. ഇതുസംബന്ധിച്ച വിശദാംശങ്ങൾ മുൻനിർത്തി നാഷനൽ ഹൈവേ ചുമതലയുള്ള മെമ്പർ സെക്രട്ടറി വെങ്കിട് രമണയ്ക്ക് കത്തയച്ചതായും എം.എൽ.എ അറിയിച്ചു.

ദേശീയപാത വികസനം; മടപ്പള്ളിയിലെയും നാദാപുരം റോഡിലെയും അടിപ്പാതയ്ക്കായി കെ.കെ രമ എം.എൽ.എ നിവേദനം നൽകി

വടകര: റോട്ടറി ബധിര വിദ്യാലയത്തിന് 12 ലക്ഷം രൂപ അനുവദിച്ച് ഉത്തരവായതായി കെ. കെ. രമ എം. എൽ. എ. അറിയിച്ചു. എം എൽ എയുടെ പ്രത്യേക വികസന നിധിയിൽ നിന്നും 12 ലക്ഷം രൂപ അനുവദിച്ചു സർക്കാർ ഉത്തരവായെന്ന് അവർ അറിയിച്ചു. റോട്ടറി സ്കൂളിൽ നടന്ന വിദ്യാർത്ഥികളുടെയും രക്ഷിതാക്കളുടെയും അദ്ധ്യാപകരുടെയും പ്രേത്യേക സംഗമം ഉദ്ഘാടനം ചെയ്യുന്ന വേളയിലാണ് എം എൽ എ ഈ കാര്യം അറിയിച്ചത്. ഇപ്പോൾ യു പി തലം വരെയുള്ള സ്കൂളിനെ ഹൈ സ്കൂളായി ഉയർത്താൻ പരിശ്രമിക്കുമെന്നും എം എൽ എ പറഞ്ഞു. സംസ്ഥാന സ്പെഷ്യൽ സ്കൂൾ കലാമേളയിലും, പ്രവർത്തി പരിചയ മേളയിലും പങ്കെടുത്ത കുട്ടികളെയും, പിന്നിൽ പ്രവർത്തിച്ച അദ്ധ്യാപകരെയും ഉപഹാരം നൽകി എം എൽ എ അനുമോദിച്ചു. വിദ്യാർഥികൾ നിർമിച്ച ഉത്പന്നങ്ങളുടെ പ്രദർശനം മുൻസിപ്പൽ കൗൺസിലർ ടി. വി. ഹരിദാസൻ ഉദ്ഘാടനം ചെയ്തു. ചടങ്ങിൽ വടകര റോട്ടറി പ്രസിഡന്റ്‌ പി. എം. സലീം ആദ്യക്ഷം വഹിച്ചു. ഡോ. എ. കെ. രാജൻ, സ്കൂൾ മാനേജർ ഡോ. കെ. എം. അബ്ദുള്ള, റോട്ടറി സെക്രട്ടറി ഡോ. എം. നൗഷീദ് അനി, പ്രധാന അദ്ധ്യാപിക എം. മിനി, കമ്മ്യൂണിറ്റി സർവീസ് ചെയർമാൻ പി. പി. രാജൻ, പി. ടി. എ. പ്രസിഡന്റ്‌ വി. അഞ്ജുഷ, പി. സി. ബലറാം, കെ. ഹാഷിം, പി. കരുണാകരൻ, പി. കുഞ്ഞികണ്ണൻ എന്നിവർ പ്രസംഗിച്ചു.

റോട്ടറി ബധിര വിദ്യാലയത്തിന് 12 ലക്ഷം രൂപ അനുവദിച്ച് ഉത്തരവായെന്ന് കെ കെ രമ എം എൽ എ

വടകര : ഹോമിയോപ്പതി ചികിത്സ മേഖലക്ക് അർഹമായ പരിഗണന ലഭിക്കുന്നില്ലെന്നും, അത് ലഭിക്കുവാൻ വേണ്ടി ഹോമിയോപ്പതി സംഘടനകൾ നടത്തി വരുന്ന പോരാട്ടങ്ങളിൽ പൊതു ജനങ്ങളോടൊപ്പം താനും ഉണ്ടാകുമെന്നും കെ കെ രമ എം എൽ എ. സംസ്ഥാനത്ത് ഏറെക്കുറെ എല്ലാ താലൂക്ക് കേന്ദ്രങ്ങളിലും ഹോമിയോ ആശുപത്രികൾ ഉണ്ടായിരിക്കെ വടകര ടൗൺ കേന്ദ്രീകരിച്ചു ഹോമിയോ ഹോസ്പിറ്റൽ ഇല്ല എന്ന കാര്യം ബന്ധപ്പെട്ട അധികാരികളുടെ ശ്രദ്ധയിൽപെടുത്തിയിട്ടുണ്ടെന്നും അവർ പറഞ്ഞു. വടകര ക്രിസ്റ്റൽ സ്യൂട്ടിൽ നടന്ന വടകര താലൂക്ക് ഏകദിന ഹോമിയോപ്പതി ശില്പശാല ഉത്ഘാടനം ചെയ്ത് സംസാരിക്കുകയായിയുന്നു എം എൽ എ.&nbsp;
ദി ഇൻസ്റ്റിറ്റ്യൂഷൻ ഓഫ് ഹോമിയോപത്സ് കേരള വടകര യൂണിറ്റ് സംഘടിപ്പിച്ച ഏകദിന ശില്പ ശാലയിൽ ഡോ: എസ് ജി ബിജു (ചങ്ങനാശ്ശേരി ) ഐ. സി. യുവിൽ അഡ്മിറ്റ് ചെയ്ത രോഗികളെ ജീവിതത്തിലേക്ക് തിരികെ കൊണ്ടു വന്ന കേസുകളെ സംബന്ധിച്ച തെളിവുകളോട് കൂടിയുള്ള പ്രബന്ധം അവതരിപ്പിച്ചു. എമർജൻസി രോഗങ്ങളിൽ ഹോമിയോപ്പതി ചികിത്സയുടെ പ്രസക്തി സംബന്ധിച്ചു ഡോ റഹീസ് കെ മിൻഹാൻസ് പരിശീലനം നൽകി. ചെയർമാൻ ഡോ പി. പി ജമാൽ മുഹമ്മദ്‌ അദ്ധ്യക്ഷത വഹിച്ചു. ഐ. എച്ച്. കെ. സംസ്ഥാന പ്രസിഡന്റ്‌ ഡോ റജു കരീം മുഖ്യ പ്രഭാഷണം നടത്തി. ഡോ. റമീസ് റഹ്‌മാൻ, ഡോ. നിതുൻ ബാല നാരായണൻ ( തലശ്ശേരി ), ഡോ. കെ. സി. പ്രശോഭ് കുമാർ (ബാലുശ്ശേരി ), ഡോ ബബിനേഷ് ഭാസ്കർ (കോഴിക്കോട്), ഡോ അനിഷ പി. കെ (വടകര) എന്നിവർ സംസാരിച്ചു.

ഹോമിയോപ്പതി ചികിത്സയ്ക്ക് അർഹമായ പരിഗണന നൽകണം; കെ കെ രമ എം എൽ എ

ഒഞ്ചിയം : മുഖ്യമന്ത്രിയും മന്ത്രിമാരും നടത്തുന്ന നവകേരളയാത്ര കേരളം ചുറ്റിയടിക്കുന്ന ടൂറായി മാറിയെന്ന് കെ.കെ. രമ എം.എൽ.എ. പറഞ്ഞു. 26-ന് വടകര കോട്ടപ്പറമ്പിൽ നടത്തുന്ന കുറ്റവിചാരണസദസ്സ് വിജയിപ്പിക്കാനായി യു.ഡി.എഫ്., ആർ.എം.പി. മുന്നണി അഴിയൂർ പഞ്ചായത്ത് കമ്മിറ്റി നടത്തിയ കൺവെൻഷൻ ഉദ്ഘാടനംചെയ്യുകയായിരുന്നു എം.എൽ.എ. ചെയർമാൻ കെ. അൻവർഹാജി അധ്യക്ഷതവഹിച്ചു. കോട്ടയിൽ രാധാകൃഷ്ണൻ, പി. ബാബുരാജ്, ടി.സി. രാമചന്ദ്രൻ, പ്രദീപ് ചോമ്പാല, യു.എ. റഹീം, ശശിധരൻ തോട്ടത്തിൽ, കവിത അനിൽകുമാർ, വി.പി. പ്രകാശൻ, സി. സുഗതൻ, വി.കെ. അനിൽകുമാർ, കെ.പി. വിജയൻ, പി.കെ. കോയ, കെ.പി. രവീന്ദ്രൻ എന്നിവർ സംസാരിച്ചു.

നവകേരള യാത്ര കേരളം ചുറ്റിയടിക്കുന്ന ടൂറെന്ന് കെ.കെ. രമ

വടകര: കുറ്റ്യാടി ഇറിഗേഷൻ കനാലുകളുടെ പുനരുദ്ധാരണ പ്രവൃത്തികൾക്കായി 16കോടി രൂപയുടെ അടിയന്തിര പ്രവൃത്തികൾക്ക് എസ്റ്റിമേറ്റ് ആയതായും ഇതിനു ഭരണാനുമതി നേടിയെടുക്കാൻ സർക്കാരിൽ സമ്മർദം ചെലുത്തുമെന്നും കെ.കെ രമ എം.എൽ.എ അറിയിച്ചു. കനാലുകളുടെ അവസ്ഥ നേരിൽ കണ്ടു മനസിലാക്കാൻ ഇറിഗേഷൻ ഉദ്യോഗസ്ഥരുടെയും ജനപ്രതിനിധികളുടെയും സംഘം എം.എൽ.എയുടെ നേതൃത്വത്തിൽ മണ്ഡലത്തിലൂടെ കടന്നുപോകുന്ന കനാലുകൾ സന്ദർശിച്ചതിനു ശേഷം മാധ്യമ പ്രവർത്തകരോട് സംസാരിക്കുകയായിരുന്നു അവർ. വലിയ ജലക്ഷാമം അനുഭവിക്കുന്ന സമയങ്ങളിൽ കൃഷിയിടങ്ങളിലും കിണറുകളിലും വെള്ളമെത്തിക്കാൻ കഴിയുംവിധം ഉൾനാടുകളിലൂടെ കടന്നുപോകുന്ന കനാലുകളിൽ പലതും ഇപ്പോൾ പൂർണ അർത്ഥത്തിൽ പ്രവർത്തന ക്ഷമമല്ല. കുറ്റ്യാടി ജലസേചന പദ്ധതിയുടെ ഭാഗമായ 17 കിലോമീറ്ററിൽ പരം നീളമുള്ള അഴിയൂർ ബ്രാഞ്ച് കനാലും അതിനോട് അനുബന്ധമായ എട്ടോളം ഡിസ്ട്രിബ്യുട്ടറി കനാലുകളുമാണ് സംഘം സന്ദർശിച്ചത്. ഇതിൽ കാർത്തികപ്പള്ളിയിലൂടെ കടന്നുപോകുന്ന ഡിസ്ട്രിബ്യുട്ടറി കനാൽ, ഒഞ്ചിയം പഞ്ചായത്തിലൂടെ കടന്നുപോകുന്ന അഴിയൂർ ബ്രാഞ്ച് കനാൽ എന്നിവയുടെ അക്വഡേറ്റുകൾ അപകടാവസ്ഥയിലാണ്. കാലപ്പഴക്കത്താലും ചോർച്ച കാരണവും സിമന്റുകട്ടകൾ അടർന്നുവീഴുന്ന സ്ഥിതിയാണ് നിലവിലുള്ളത്. ഇത് പരിഹരിക്കുന്നതിനാവശ്യമായ അടിയന്തിര നടപടികൾ സ്വീകരിക്കാൻ വകുപ്പുതല ഉദ്യോഗസ്ഥരോട് നിർദേശിച്ചതായും എം.എൽ.എ പറഞ്ഞു. ഏറാമലയിൽ ഡിസ്ട്രിബ്യൂട്ടറി കനാൽ ചോർച്ചകാരണം വെള്ളം തുറന്നുവിടാൻ പറ്റാത്ത അവസ്ഥയാണ്.&nbsp;
ഇതിന്റെ പുനർനിർമാണത്തിനായി 3 കോടി രൂപയുടെ പ്രത്യേക പദ്ധതി ഇറിഗേഷൻ വകുപ്പ് തയാറാക്കിയിട്ടുണ്ട്. ഇതിനുള്ള സർക്കാർ അംഗീകാരം നേടിയെടുക്കുന്നതിനുള്ള ഇടപെടലുകളും ഊർജിതമാക്കും. കുറിഞ്ഞാലിയോട് കാർത്തികപ്പള്ളി ഭാഗത്തു ഭൂമിയെചൊല്ലി തർക്കം നിലനിൽക്കുന്നതിനാൽ പരസ്പരം ബന്ധപ്പെടുത്താൻ കഴിയാതെ ജലവിതരണം മുടങ്ങി കിടക്കുന്ന കനാൽ പരസ്പരം ബന്ധിപ്പിക്കുന്നതിനുള്ള നടപടികൾ സ്വീകരിക്കുമെന്നും എം.എൽ.എ പറഞ്ഞു. അഴിയൂർ പഞ്ചായത്തിൽ വർഷങ്ങൾക്ക് മുൻപെ അക്വയർ ചെയ്ത രണ്ട് കിലോമീറ്റർ ദൂരം ഇപ്പോഴും കനാൽ നിർമാണം പൂർത്തിയായിട്ടില്ല. വൈകാതെ തന്നെ ഇവിടെ കനാൽ നിർമാണം ആരംഭിക്കേണ്ടതുണ്ട്. ഇതിനുള്ള നടപടികൾ ആരംഭിക്കാൻ ഉദ്യോഗസ്ഥർക്ക് നിർദേശം നൽകിയതായും എം.എൽ.എ പറഞ്ഞു. ഡിസംബർ അവസാനത്തോടെ മണ്ഡലത്തിലെ കനാൽ ശുചീകരണ പ്രവർത്തനങ്ങൾ ആരംഭിക്കും. മുഴുവൻ തദ്ദേശ സ്വയംഭരണ സ്ഥാപനങ്ങളുടെയും, ജനപ്രതിനിധികളുടെയും, സന്നദ്ധ സംഘടനകളുടെയും ജനകീയ പങ്കാളിത്തത്തോടെ ഇത്തരം ശുചീകരണ പ്രവൃത്തികൾ നടത്താൻ എല്ലാവരും തയാറാവണമെന്നും എം.എൽ.എ അഭ്യർത്ഥിച്ചു. കുറ്റ്യാടി ഇറിഗേഷൻ എക്‌സിക്യൂട്ടീവ് എഞ്ചിനീയർ യു.കെ ഗിരീഷ്‌കുമാർ, എക്‌സിക്യുട്ടീവ് എഞ്ചിനീയർ അരവിന്ദാക്ഷൻ എന്നിവരുടെ നേതൃത്വത്തിലുള്ള ഉദ്യോഗസ്ഥരും വിവിധ ജനപ്രതിനിധികളും എം.എൽ.എയ്ക്ക് ഒപ്പമുണ്ടായിരുന്നു.

വടകര മണ്ഡലത്തിലെ കുറ്റ്യാടി ഇറിഗേഷൻ കനാലുകളുടെ പുനരുദ്ധാരണം;16 കോടിയുടെ അടിയന്തിര പ്രവൃത്തികൾക്ക് എസ്റ്റിമേറ്റ് ആയതായി എം.എൽ.എ

വടകര: നിയോജക മണ്ഡലത്തിലെ ഏറാമല പഞ്ചായത്തിലെ തിരുത്തിമുക്ക്, നാദാപുരം മണ്ഡലത്തിലെ എടച്ചേരി,കണ്ണൂർ ജില്ലയിലെ കിടഞ്ഞി എന്നീ ഭാഗങ്ങളെ ബന്ധിപ്പിക്കുന്ന തുരുത്തിമുക്ക് പാലത്തിൻ്റെ നിർമാണവുമായി ബന്ധപ്പെട്ട ഇൻവെസ്റ്റിഗേഷൻ നടപടികൾ പൂർത്തിയായതായി കെ.കെ രമ എം.എൽ.എ അറിയിച്ചു. പൊതുമരാമത്ത് ബ്രിഡ്ജസ് വിഭാഗം 4.4 ലക്ഷം രൂപ ചിലവഴിച്ചാണ് പാലം നിർമാണത്തിന്റെ ഇൻവെസ്റ്റിഗേഷൻ നടപടികൾ പൂർത്തിയാക്കിയത്. പാലത്തിന്റെ ഡിസൈനിങ് തയാറാക്കുന്നതിനായി ഇതുസംബന്ധിച്ച വിശദാംശങ്ങൾ തിരുവനന്തപുരത്തെ ഡൈസൈനിങ്‌ വിഭാഗത്തിൽ സമർപ്പിച്ചിട്ടുണ്ട്. ഡിസൈൻ പൂർത്തിയായ ശേഷം വിശദമായ എസ്റ്റിമേറ്റ് തയാറാക്കുകയും ഭരണാനുമതി ലഭ്യമാക്കുന്നതിനുള്ള തുടർനടപടികൾ കൈക്കൊള്ളുകയും വേണം. ആഭ്യന്തര ടൂറിസത്തിന് ഏറെ സാധ്യതയുള്ളതും, ഏറാമല നിവാസികളുടെ ചിരകാല സ്വപ്നവും ആണ് പദ്ധതി പൂർത്തീകരണത്തിലൂടെ സാധ്യമാകാൻ പോകുന്നത്. നാദാപുരം മണ്ഡലത്തിലെ എടച്ചേരിയും കൂത്തുപറമ്പ് മണ്ഡലത്തിലെ കിടഞ്ഞിയും ഏറാമല തുരുത്തിമുക്കും ബന്ധിപ്പിച്ചുകൊണ്ടുള്ള ഒരു പാലം എന്നത് ഇവിടുത്തെ ജനങ്ങളുടെ കാലങ്ങളായുള്ള ആവശ്യമാണ്. ഇംഗ്ലീഷ് അക്ഷരമാല ക്രമത്തിലെ 'വൈ' മോഡൽ പാലം എന്ന പ്രപ്പോസൽ നേരത്തെ തന്നെ സർക്കാരിന് മുൻപിലുണ്ടായിരുന്നു. പലകാരണങ്ങളാൽ ഇത് നിലച്ചുപോവുകയും എടച്ചേരിയേയും കിടഞ്ഞിയേയും മാത്രം ബന്ധിപ്പിക്കുന്ന നേർപാലമായി പദ്ധതി പരിമിതിപ്പെടുകയുമായിരുന്നു.
നോക്കിയാൽ കാണുന്ന മറുകരയിലേക്ക് റോഡ് മാർഗം പോകണമെങ്കിൽ കിലോമീറ്ററുകൾ ചുറ്റിസഞ്ചരിക്കേണ്ട അവസ്ഥയാണ്. അതിനാൽ ആളുകൾക്ക് ഇപ്പോഴും കടത്തുതോണിയാണ് ആശ്രയം. പ്രശ്‌നപരിഹാരത്തിന് നേരത്തെ പൊതുമരാമത്തു വകുപ്പ് മന്ത്രിയെ നേരിൽ കണ്ടുനിവേദനം നൽകുകയും, നിയമസഭയിൽ സബ്മിഷൻ ഉന്നയിക്കുകയും ചെയ്തിരുന്നു. ഈ സാമ്പത്തിക വർഷത്തെ ബജറ്റ് പ്രപ്പോസലിൽ മണ്ഡലത്തിന്റെ പ്രധാന ആവശ്യങ്ങളിലൊന്നായി ഇത് നിർദ്ദേശിക്കുകയും, ബജറ്റിൽ പാലത്തിനായി ടോക്കൺ എമൗണ്ട് വകയിരുത്തുകയും ചെയ്തിട്ടുണ്ട്. നടുതുരുത്തി, ഏറാമലകോട്ട, മാഹി-വളപട്ടണം ജലഗതാഗതപാത, ഇതോടനുബന്ധിച്ചുവരുന്ന ബോട്ട്‌ജെട്ടി, കരിയാട്, കിടഞ്ഞി ഭാഗങ്ങളിലെത്തുന്ന തീരദേശ ഹൈവേ എന്നിവ വടകര മണ്ഡലത്തിലെ ടൂറിസത്തിന്റെ അനന്തസാധ്യതകൾ തുറക്കുന്ന പദ്ധതികളായിരിക്കും. ഏറാമല തുരുത്തിമുക്കിനെ കൂടെ ബന്ധിപ്പിച്ചു പാലം വരുന്നതോടെ വലിയ ടൂറിസം സാധ്യതകളാണ് ഇവിടെ തുറക്കുന്നത്. ഇതുകൂടെ മുൻപിൽ കണ്ടുവേണം പാലം രൂപകൽപന ചെയ്യപ്പെടേണ്ടതെന്നു ഉദ്യോഗസ്ഥരോട് നിർദേശിച്ചിട്ടുള്ളതായും എം.എൽ.എ പറഞ്ഞു. വൈകാതെ തന്നെ എസ്റ്റിമേറ്റ് തയാറാക്കി സർക്കാരിൽ സമർപ്പിക്കുന്നതിനുള്ള അടിയന്തിര നടപടികൾ സ്വീകരിക്കുന്നതാണ്. ഏറെ വൈകാതെ തന്നെ തുരത്തിമുക്ക് പാലം എന്ന ആഗ്രഹം സഫലീകരിക്കപ്പെടും എന്ന് പ്രതീക്ഷിക്കാമെന്നും എം.എൽ.എ കൂട്ടിച്ചേർത്തു.

തുരുത്തിമുക്ക് പാലം; ഇൻവെസ്റ്റിഗേഷൻ നടപടികൾ പൂർത്തിയായതായി കെ.കെ രമ എം.എൽ.എ

വടകര: ക്ഷേമപെൻഷനുകൾ ലഭിക്കാതെയും, വിലക്കയറ്റം കൊണ്ടും ജീവിക്കാൻ ഗതിയില്ലാതെ സാധാരക്കാരൻ നട്ടംതിരിയുമ്പോൾ ധൂർത്തുയാത്ര നടത്തി ജനങ്ങളെ പരിഹസിക്കുകയാണ് പിണറായി സർക്കാർ ചെയ്യുന്നതെന്ന് കെ.കെ.രമ എം.എൽ.എ. സപ്ലൈകോയിൽ അവശ്യസാധനങ്ങൾ വിതരണം ചെയ്യുക, മുടങ്ങിയ ക്ഷേമപെൻഷനുകൾ ഉടൻ വിതരണം ചെയ്യുക, ജനങ്ങളെ ദുരിതത്തിലാഴ്ത്തുന്ന വിലക്കയറ്റം തടയുക എന്നീ ആവശ്യങ്ങൾ ഉന്നയിച്ചു അഖിലേന്ത്യാ ജനാധിപത്യ മഹിളാഫെഡറേഷൻ വടകര സപ്ലൈ ഓഫീസിലേക്ക് നടത്തിയ മാർച്ച് ഉദ്‌ഘാടനം ചെയ്തു സംസാരിക്കുകയായിരുന്നു അവർ. വരാനിരിക്കുന്ന തെരഞ്ഞെടുപ്പ് ലക്ഷ്യം വച്ച് ജനങ്ങളുടെ കണ്ണിൽ പൊടിയിടാൻ സർക്കാർ ചിലവിൽ കോടികൾ മുടക്കി ആഘോഷം നടത്തുകയാണ് സി.പി.എം. തൊഴിലാളി വർഗ്ഗപാർട്ടിയെന്ന് സ്വയം വിശേഷിപ്പിക്കുകയും പൂർണ്ണമായും വരേണ്യവർഗ്ഗത്തെ അഭിസംബോധന ചെയ്യുകയുമാണ് ഇവർ ചെയ്യുന്നത്. നവകേരള സദസ്സിന്റെ ഭാഗമായി എല്ലായിടത്തും മുഖ്യമന്ത്രി പൗരപ്രമുഖരുമായി ചായസൽക്കാരം നടത്തുകയാണ്. ആരാണ് ഈ പൗരപ്രമുഖർ എന്ന് സർക്കാർ വ്യക്തമാക്കണം. സമൂഹത്തിലെ അടിസ്ഥാന വർഗ്ഗത്തിന്റെ ആവശ്യങ്ങളെ കണ്ടില്ലെന്നു നടിക്കുകയും പണക്കാരും, കച്ചവടക്കാരും, വിദേശ വ്യവസായികളും, ഇതര സാമുദായിക ശക്തികളുമെല്ലാമടങ്ങുന്ന പൗരപ്രമുഖർ എന്ന പുതിയ വർഗ്ഗത്തെ സൃഷിടിക്കുകയും അവരുടെ പണത്തിന്റെ തണലിൽ വിഹരിക്കുകയുമാണ് സി.പി.എമ്മും സർക്കാരുമെന്നു രമ കുറ്റപ്പെടുത്തി.&nbsp;
ജനങ്ങളുടെ പ്രശ്നങ്ങൾ നേരിട്ട് മനസിലാക്കാനാണത്രെ മുഖ്യമന്ത്രിയും മറ്റുമന്ത്രിമാരും ചേർന്ന് കേരളത്തിലെ മണ്ഡലങ്ങൾ മുഴവൻ സഞ്ചരിക്കുന്നത്. കഴിഞ്ഞ ആറുമാസം മുൻപ് തീര സദസ്സ് എന്നപേരിലും, കരുതലും കൈത്താങ്ങും എന്നപേരിലുമൊക്കെ ലക്ഷങ്ങൾ ചിലവിട്ട് സർക്കാർ നടത്തിയ വിവിധ അദാലത്തുകളിൽ വന്ന പരാതികളിൽ ഏതെല്ലാം പ്രശ്നങ്ങൾക്ക് പരിഹാരം കാണാൻ കഴിഞ്ഞെന്നു സർക്കാർ ആദ്യം വ്യക്തമാക്കണം. എന്നിട്ടാവാം പുതിയ ഇത്തരം നാടകങ്ങളെന്നും അവർ പറഞ്ഞു. ജീവിത ദുരിതം കൊണ്ട് ഓരോ മനുഷ്യരും സ്വയം പ്രതിപക്ഷമായിക്കൊണ്ടിരിക്കുന്ന കാലമാണിതെന്നും, വലിയ ജനകീയ പ്രക്ഷോഭങ്ങളാണ് സർക്കാരിനെ കാത്തിരിക്കുന്നതെന്നും കെ.കെ.രമ കൂട്ടിചേർത്തു. അഖിലേന്ത്യാ ജനാധിപത്യ മഹിളാഫെഡറേഷൻ ഏരിയ സെക്രട്ടറി ഷീജ തട്ടോളി സ്വാഗതം പറഞ്ഞ ചടങ്ങിൽ ഏരിയ പ്രസിഡന്റ് ഗീതാമോഹൻ അധ്യക്ഷത വഹിച്ചു. ടി.പി.മിനിക, ടി.കെ.സിബി, ശരണ്യ വാഴയിൽ എന്നിവർ സംസാരിച്ചു. ടി.കെ അനിത, കെ ജാനു, രോഹിണി, പ്രസീന രാമചന്ദ്രൻ, സിന്ധു മണ്ടോടി എന്നിവർ നേതൃത്വം നൽകി.

സാധാരക്കാരൻ നട്ടം തിരിയുമ്പോൾ ധൂർത്ത് യാത്രനടത്തി സർക്കാർ ജനങ്ങളെ പരിഹസിക്കുന്നു; കെ.കെ.രമ എം.എൽ.എ

വടകര: അഖിലേന്ത്യാ സഹകരണ വാരാഘോഷത്തിന്റെ ജില്ലാതല സമാപനം വടകരയിൽ നടക്കുമ്പോൾ സ്ഥലം എം.എൽ.എയെ ഒഴിവാക്കിയത് രാഷ്ട്രീയ പകപോക്കലിന്റെ ഭാഗമാണെന്ന് ആർ.എം.പി.ഐ സംസ്ഥാന സെക്രട്ടറി എൻ. വേണു ആരോപിച്ചു. ഔദ്യേഗിക പരിപാടികളിൽ നിന്ന് പോലും ജനപ്രതിനിധിയെ മാറ്റി നിർത്തുന്നതിനെതിരേ ശക്തമായ ജനവികാരം ഉയർന്നുവരണമെന്നും വേണു ആവശ്യപ്പെട്ടു.

എം.എൽ.എയെ ഒഴിവാക്കിയത് രാഷ്ട്രീയ പകപോക്കലെന്ന് ആർ.എം.പി.ഐ

കക്കട്ടില്‍: കക്കട്ട് ടൗണില്‍ ഒരാള്‍ക്ക് വെട്ടേറ്റു. മധുകുന്ന് സ്വദേശി പുന്നൂ ക്കണ്ടി ഗംഗാധരനാണ് (65) വെട്ടേറ്റത്. കൈവേലി റോഡ് ജംഗ്ഷനടുത്ത് ബൈക്കിലെത്തിയ സംഘം വെട്ടിയതായാണ് പരാതി. സാരമായി പരിക്കേറ്റ ഗംഗാധരനെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. നാദാപുരം ഡിവൈഎസ്പി ചന്ദ്രന്റെ നേതൃത്വത്തില്‍ പോലീസ് സംഭവ സ്ഥലത്തെത്തി നടപടികൾ സ്വീകരിച്ചു.

കക്കട്ടില്‍ ഒരാള്‍ക്ക് വെട്ടേറ്റു

വടകര : 33 കുപ്പി മാഹി വിദേശമദ്യവുമായി യുവാവിനെ എക്സൈസ് ഉദ്യോഗസ്ഥർ പിടികൂടി. പയ്യന്നൂർ കരുതെക്കേൽ വീട്ടിൽ റിന്റോ ജോസഫി(38)നെയാണ് പിടികൂടിയത്. വടകര എക്സൈസ് സർക്കിൾ ഓഫീസിലെ അസിസ്റ്റന്റ് എക്സൈസ് ഇൻസ്പെക്ടർ (ഗ്രേഡ്) പ്രമോദ് പുളിക്കോലും സംഘവും നടത്തിയ പരിശോധനയിലാണ് മാഹി റെയിൽവേ സ്റ്റേഷനിലേക്ക് പോകുന്ന റോഡിൽ ഗവ. പ്രീമെട്രിക് ഹോസ്റ്റലിനു മുൻവശത്തുനിന്ന് ഇയാളെ പിടികൂടിയത്.&nbsp;
റിന്റോയുടെ അറസ്റ്റ് രേഖപ്പെടുത്തി. സംഘത്തിൽ പ്രിവന്റീവ് ഓഫീസർ ഗ്രേഡ് എൻ.എം. ഉനൈസ്, സി.ഇ.ഒ. സി.എം. സുരേഷ് കുമാർ, ഡ്രൈവർ ഇ.കെ. പ്രജീഷ് എന്നിവരും ഉണ്ടായിരുന്നു.

33 കുപ്പി വിദേശമദ്യവുമായി യുവാവ് വടകര എക്സൈസ് പിടിയിൽ

നാദാപുരം : അരൂരില്‍ എം.ഡി.എം.എയുമായി മൂന്ന് യുവാക്കളെ പോലീസ് അറസ്റ്റ് ചെയ്തു. പിടുപിടുപാഞ്ചാലില്‍ മുഹമ്മദലി(30),ചേലക്കാട് ചരളില്‍ അര്‍ഷാദ്(26),മൊകേരിയില്‍ വാടകക്ക് താമസിക്കുന്ന കല്ലാച്ചി കൊറ്റോത്താന്റവിടെ അന്‍വര്‍സാദത്ത്(30)എന്നിവരെയാണ് നാദാപുരം എസ്.ഐ വിഷ്ണുവും സംഘവും പിടികൂടിയത്.
ഇവര്‍ സഞ്ചരിച്ച കാറും പോലീസ് കസ്റ്റഡിയിലെടുത്തു.കഴിഞ്ഞ ദിവസം ബാംഗ്ലൂരില്‍ നിന്നെത്തച്ചതാണ് ലഹരി വസ്തുവെന്ന് പോലീസ് പറഞ്ഞു.ഇവരെ ഞായറാഴ്ച കോടതിയില്‍ ഹാജരാക്കും.

അരൂരില്‍ എം.ഡി.എ യുമായി മൂന്ന് പേർ അറസ്റ്റിൽ

അരൂരില്‍ എം.ഡി.എം.എയുമായി മൂന്ന് പേർ അറസ്റ്റിൽ

വടകര: എക്‌സൈസ് സര്‍ക്കിള്‍ ഓഫീസിലെ അസിസ്റ്റന്റ് എക്‌സൈസ് ഇന്‍സ്‌പെക്ടര്‍ (ഗ്രേഡ്) പ്രമോദ്പുളിക്കൂലും പാര്‍ട്ടിയും വില്ല്യാപ്പള്ളി, കുനിങ്ങാട് ഭാഗങ്ങളില്‍ നടത്തിയ പരിശോധനയില്‍ കഞ്ചാവുമായി യുവാവ് പിടിയിലായി. ആയഞ്ചേരി പറമ്പില്‍ ആക്കായി താഴെകുനിയില്‍ വീട്ടില്‍ അമലിനെയാണ് (27) അറസ്റ്റ് ചെയ്തത്.&nbsp;
ഇയാളില്‍ നിന്ന് 70 ഗ്രാം കഞ്ചാവ് പിടിച്ചെടുത്തു. കൈതകുണ്ട് എന്ന സ്ഥലത്ത് നിന്നാണ് ഇയാളെ പിടികൂടിയത്. പ്രിവന്റിവ് ഓഫീസര്‍ ഗ്രേഡ് സായിദാസ്.കെ.പി, ഷൈജു.പി.പി, സിവില്‍ എക് സൈസ് ഓഫീസര്‍ മുസ്ബിന്‍. ഇ.എം, സിഇഒ ഡ്രൈവര്‍ പ്രജീഷ്. ഇ കെ എന്നിവരും പരിശോധനയില്‍ പങ്കെടുത്തു.

വില്ല്യാപ്പള്ളി, കുനിങ്ങാട് ഭാഗങ്ങളില്‍ പരിശോധനയുമായി എക്‌സൈസ്; 70 ഗ്രാം കഞ്ചാവുമായി യുവാവ് പിടിയില്‍

നാദാപുരം: യുവതിയുടെ വീട്ടില്‍ അതിക്രമിച്ചു കയറി ഭീഷണിപ്പെടുത്തി എന്ന പരാതിയില്‍ പോലീസ് സിഐക്കെതിരെ കേസ്. നാദാപുരം കണ്‍ട്രോള്‍ റൂം സിഐ സ്മിതേഷിനെതിരെയാണ് വടകര പോലീസ് കേസെടുത്തത്. കത്രിക പോലുള്ള വസ്തു കാട്ടി കുത്തുമെന്ന് ഭീഷണിപ്പെടുത്തിയെന്നാണ് പരാതി. യുവതിയുടെ ബഹളം കേട്ട് രാത്രി അയല്‍ക്കാര്‍ ഓടിക്കൂടിയിരുന്നു.
വള്ളിക്കാട് സ്വദേശിനിയായ യുവതിയുടെ വീട്ടിലാണ് സംഭവം. വൈകിട്ട് മകളോടൊപ്പം പുറത്തു പോയ യുവതി രാത്രി എട്ടേമുക്കാലോടെ വീട്ടില്‍ തിരിച്ചെത്തിയപ്പോള്‍ പ്രതിയെ വീട്ടിനുള്ളല്‍ അതിക്രമിച്ച് കയറിയ നിലയില്‍ കാണുകയായിരുന്നെന്ന് പറയുന്നു. പിന്നാലെ കത്രിക പോലുള്ള മൂര്‍ച്ചയുള്ള സാധനം കാണിച്ച്കുത്തുമെന്ന് ഭീഷണി മുഴക്കിയെന്നും പറയുന്നു.&nbsp;
യുവതിയും മകളും ബഹളം വെച്ചതിനെ തുടര്‍ന്ന് നാട്ടുകാര്‍ ഓടിക്കൂടുകയും യുവതി വടകര പോലീസിനെ വിവരം അറിയിക്കുകയുമായിരുന്നു. തുടര്‍ന്ന് വടകര പോലീസെത്തി സിഐ സ്മിതേഷിനെ കസ്റ്റഡിയിലെടുക്കുകയായിരുന്നു. യുവതിയെ നേരത്തെ പരിചയമുള്ള പ്രതി പലപ്രാവശ്യം ഫോണ്‍ ചെയ്തതിനെ തുടര്‍ന്ന് പ്രതിയുടെ കോള്‍ ബ്ലോക്ക് ചെയ്തതിലുള്ള വിരോധമാണ് അതിക്രമത്തിന് കാരണമെന്ന് എഫ്‌ഐആറില്‍ പറയുന്നു. കസ്റ്റഡിയിലെടുത്ത പ്രതിയെ പിന്നീട് സ്റ്റേഷന്‍ ജാമ്യത്തില്‍ വിട്ടു.

വീട്ടില്‍ അതിക്രമിച്ച് കയറി യുവതിയെ ഭീഷണിപ്പെടുത്തിയതായി പരാതി; നാദാപുരത്ത് സിഐക്കെതിര കേസ്

മലപ്പുറം: സ്വകാര്യ ബസ് ജീവനക്കാരുടെ മർദനമേറ്റ ഓട്ടോ ഡ്രൈവർ ആശുപത്രിയിൽ കുഴഞ്ഞുവീണുമരിച്ചു. ഒതുക്കുങ്ങൽ സ്റ്റാൻഡിലെ ഡ്രൈവറായ മാണൂർ സ്വദേശി അബ്ദുൾ ലത്തീഫാണ് മരിച്ചത്. മർദനമേറ്റതിന് പിന്നാലെ ശാരീരിക പ്രശ്നങ്ങൾ ഉണ്ടായതിനെത്തുടർന്ന് സ്വയം ഓട്ടോ ഓടിച്ച് ആശുപത്രിയിൽ എത്തിയ ഉടൻ കുഴഞ്ഞുവീഴുകയായിരുന്നു എന്നാണ് റിപ്പോർട്ട്. ആശുപത്രിയിലുണ്ടായിരുന്ന നാട്ടുകാരനായ ഒരാളാണ് ലത്തീഫിനെ തിരിച്ചറിഞ്ഞത്. സംഭവുമായി ബന്ധപ്പെട്ട് മൂന്ന് ബസ് ജീവനക്കാരെയും ബസിനെയും പൊലീസ് കസ്റ്റഡിയിലെടുത്തിട്ടുണ്ട്. ഇന്ന് രാവിലെയായിരുന്നു സംഭവം.
വടക്കേമണ്ണയിലെ ബസ്‌സ്റ്റോപ്പിൽ നിന്ന് ആളെ കയറ്റിയതുമായി ബന്ധപ്പെട്ടാണ് ബസ് ജീവനക്കാർ ലത്തീഫിനെ മർദിച്ചത്. പിടിബി എന്ന സ്വകാര്യബസിന് മുന്നേ പോയ ലത്തീഫിന്റെ ഓട്ടോയിൽ ബസ്‌സ്റ്റോപ്പിനടുത്ത് റോഡുവക്കിലുണ്ടായിരുന്നു രണ്ട് സ്ത്രീകൾ കയറി. ഇതുകണ്ട ബസ് ജീവനക്കാർ ബസ് കുറുകെയിട്ട് ഓട്ടോ തടയുകയും ലത്തീഫിനെ മർദിക്കുകയുമായിരുന്നു.മർദ്ദനത്തെത്തുടർന്ന് ശാരീരിക പ്രശ്നങ്ങൾ ഉണ്ടായതിനാൽ സ്വയം ആശുപത്രിയിലേക്ക് പോകാൻ ലത്തീഫ് തീരുമാനിക്കുകയായിരുന്നു. ഡോക്ടറെ കണ്ടശേഷം പൊലീസ് സ്റ്റേഷനിലെത്തി പരാതി നൽകാനായിരുന്നു തീരുമാനം. എന്നാൽ ആശുപത്രിയിലെത്തിയ ഉടൻ കുഴഞ്ഞുവീഴുകയായിരുന്നു. ലത്തീഫിന്റെ കഴുത്തിലുൾപ്പെടെ പാടുകളുണ്ടെന്നാണ് ആശുപത്രിയിലുണ്ടായിരുന്ന ചിലർ പറയുന്നത്.&nbsp;
ലത്തീഫിന് മറ്റെന്തെങ്കിലും ആരോഗ്യപ്രശ്നങ്ങൾ ഉണ്ടോ എന്ന് വ്യക്തമല്ല. മൃതദേഹം മോർച്ചറിയിലേക്ക് മാറ്റി. പോസ്റ്റുമോർട്ടം റിപ്പോർട്ട് കിട്ടിയാലേ മരണകാരണം വ്യക്തമാകൂ എന്നാണ് പൊലീസ് പറയുന്നത്.&nbsp;

മലപ്പുറത്ത് ബസ് ജീവനക്കാരുടെ മർദനമേറ്റ ഓട്ടോഡ്രൈവർ ആശുപത്രിയിൽ കുഴഞ്ഞുവീണ് മരിച്ചു

കോഴിക്കോട്: വനിതാ ദിനത്തിൽ വനിതകൾക്ക് മാത്രമായി സ്പെഷ്യൽ ട്രിപ്പൊരുക്കി കെ.എസ്.ആർ.ടി.സി. നാളെ ശനിയാഴ്ച 200 രൂപക്ക് കോഴിക്കോട് നഗരം ചുറ്റിക്കാണാനുള്ള ട്രിപ്പാണ് ഒരുക്കിയിരിക്കുന്നത്.
കോഴിക്കോട് ബീച്ച്, കുറ്റിച്ചിറ പള്ളി, മാനാഞ്ചിറ സ്ക്വയർ, പ്ലാനിറ്റോറിയം, പഴശ്ശി മ്യൂസിയം, ഭട്ട് റോഡ് ബീച്ച്, കോതി ബീച്ച്, കണ്ണംപറമ്പ് ബീച്ച്, സൗത്ത് ബീച്ച്, വെള്ളയിൽ ബീച്ച്, വരയ്ക്കൽ ബീച്ച് തുടങ്ങിയ സ്ഥലങ്ങളാണ് ട്രിപ്പിലുൾപ്പെടുത്തിയിരിക്കുന്നത്.യാത്രക്ക് താൽപര്യമുള്ളവർ നേരത്തെ ബുക്ക് ചെയ്യണം. ഫോൺ: 9946 068 832, 7907 627 645

വനിതകൾക്ക് കോഴിക്കോട് ചുറ്റിക്കാണാം വെറും 200 രൂപക്ക്; കെ.എസ്.ആർ.ടി.സി സ്പെഷ്യൽ ട്രിപ്പ്

വടകര : എം.ഡി.എം.എ.യുമായി അറസ്റ്റിലായ യുവാവിനെ കൈയേറ്റം ചെയ്യുന്നത് തടയാൻ ശ്രമിക്കുന്നതിനിടെ പോലീസിന്റെ ഔദ്യോഗിക കൃത്യനിർവഹണം തടസ്സപ്പെടുത്തിയതിന് മൂന്നാളുടെ പേരിൽ വടകര പോലീസ് കേസെടുത്തു.
കണ്ടാലറിയാവുന്ന മൂന്നാളുടെ പേരിലാണ്‌ എസ്.ഐ. എം.കെ. രഞ്ജിത്തിന്റെ പരാതിയിൽ കേസെടുത്തത്. ചൊവ്വാഴ്ച നാരായണനഗരം പെട്രോൾ പമ്പിന്‌സമീപം എം.ഡി.എം.എ.യുമായി പിടിയിലായ യുവാവിന്റെ അറസ്റ്റ് നടപടികൾക്കിടെയാണ് ഇയാളുടെ നേരേ കൈയേറ്റം നടന്നത്. പോലീസ് ഇടപെട്ട് ഇത്‌ തടയുകയായിരുന്നു. ഇതിനിടെ പോലീസുമായും സംഘർഷമുണ്ടായി.

അറസ്റ്റിനിടെ കൈയേറ്റം; മൂന്നാളുടെ പേരിൽ വടകര പോലീസ് കേസെടുത്തു

ചോറോട്: പുനർ വിവാഹിതയല്ലെന്ന സർട്ടിഫിക്കറ്റിന് അപേക്ഷിച്ച യുവതിയോട് ജനപ്രതിനിധികളെ വിശ്വസിക്കാൻ കൊള്ളില്ലെന്ന് ചോറോട് വില്ലേജ് ഓഫിസർ പറഞ്ഞതിൽ പ്രതിഷേധം. ജനപ്രതിനിധികൾ പല ഭാഗത്തും നിൽക്കും അതിനാൽ അയൽക്കാരായ രണ്ട് പേരുടെ സാക്ഷ്യപത്രവുമായി വരണമെന്ന് നിർദ്ദേശിച്ച് മടക്കി അയക്കുകയായിരുന്നു. ലൈഫ് ഭവന പതിയിൽ വീട് അനുവദിക്കപ്പെട്ട വിധവയായ സ്ത്രീക്ക് പഞ്ചായത്തിൽ എഗ്രിമെന്റ് വെക്കുന്നതിനായ് സ്ഥലം രജിസ്റ്റർ ചെയ്യാൻ തണ്ടപ്പേരും നികുതി രസീറ്റിനും അപേക്ഷ നൽകിയപ്പോൾ പല കാരണങ്ങൾ പറഞ്ഞ് മടക്കി അയച്ചു. പഞ്ചായത്ത് അംഗം ഓഫീസിൽ എത്തിയപ്പോഴും പല കാരണങ്ങൾ നിരത്തുകയാണ്.&nbsp;
വിദ്യാർത്ഥികളും തൊഴിൽ അന്വേഷകരുമായ നിരവധി പേർ അപേക്ഷ നൽകിയിട്ട് ദിവസങ്ങളോളമായി കാത്തിരിക്കുകയാണ് എന്നും ജനപ്രതിനിധികൾ പറഞ്ഞു. പാവപ്പെട്ട ജനങ്ങളെ ബുദ്ധിമുട്ടിക്കുന്ന ജിവനക്കാരുടെ നടപടി അവസാനിപ്പിക്കാൻ നടപടിക്കായി ചോറോട് ഗ്രാമ പഞ്ചായ ആംഗം പ്രസാദ് വിലങ്ങിൽ മന്ത്രിമാർക്കും കളക്ടർക്കും പരാതി നൽകി. കഴിഞ്ഞ ദിവസം ചേർന്ന ചോറോട് ഗ്രാമ പഞ്ചായത്ത് ഭരണ സമിതി യോഗത്തിലും വിഷയത്തിൽ വിമർശനമുയർന്നിരുന്നു.

ജനപ്രതിനിധികളെ വിശ്വസിക്കാൻ കൊള്ളില്ലെന്ന പരാമർശം; ചോറോട് വില്ലേജ് ഓഫിസർക്കെതിരെ പരാതി

Search Results for: banana price