പാലക്കാട് സ്വദേശി നിപ ബാധിച്ച് മരിച്ച സാഹചര്യത്തിൽ പാലക്കാട്, മലപ്പുറം, കോഴിക്കോട്, കണ്ണൂർ, വയനാട്, തൃശ്ശൂർ ജില്ലകളിൽ ആരോ​ഗ്യവകുപ്പ് ജാ​ഗ്രതാനിർദേശം നൽകിയിരിക്കുകയാണ്. 2018 മുതൽ സംസ്ഥാനത്ത് നിപ റിപ്പോർട്ട് ചെയ്തിട്ടുണ്ടെങ്കിലും ഒരേസമയം ഒന്നിലേറെ പേർക്ക് നേരിട്ട് രോ​ഗംപിടിപെടുന്ന പ്രൈമറി കേസുകൾ ഇതാദ്യമായാണ് ഉണ്ടാകുന്നത്. ഈ സാഹചര്യത്തിൽ നിപ പ്രതിരോധത്തിൽ ശ്രദ്ധിക്കേണ്ട പ്രധാന കാര്യങ്ങൾ എന്തൊക്കെയാണെന്ന് പരിശോധിക്കാം.

• പക്ഷിമൃഗാദികളുടെ കടിയേറ്റതോ, പൊട്ടലോ, പോറലോ ഉള്ള പഴങ്ങൾ കഴിക്കരുത്. അവ കൈകൾകൊണ്ട് നേരിട്ട് എടുക്കരുത് അഥവാ എടുക്കേണ്ടിവന്നാൽ കൈകൾ സോപ്പും വെള്ളവും ഉപയോഗിച്ച് നന്നായി കഴുകണം.
• പഴങ്ങളും പച്ചക്കറികളും കഴിക്കുന്നതിനും മുറിക്കുന്നതിനും മുൻപ് വെള്ളത്തിൽ നന്നായി കഴുകണം.
• നിപ വൈറസ് വവ്വാലുകളിൽനിന്ന് പന്നികളിലേക്കും പന്നികളിൽനിന്ന് മനുഷ്യരിലേക്കും പടരാൻ സാധ്യതയുണ്ട്.
• തുമ്മുമ്പോഴും ചുമയ്ക്കുമ്പോഴും തൂവാല ഉപയോഗിച്ച് വായും മൂക്കും പൊത്തിപ്പിടിക്കുക. പൊതുസ്ഥലങ്ങളിൽ നിർബന്ധമായും മാസ്ക് ഉപയോഗിക്കുക.
• പനി, ശക്തമായ തലവേദന, ഛർദി, ക്ഷീണം, ബോധക്ഷയം, കാഴ്ചമങ്ങൽ, പേശിവേദന, മാനസികാവസ്ഥയിൽ മാറ്റം, പിച്ചും പേയും പറയുക, ശ്വാസതടസ്സം തുടങ്ങിയ രോഗലക്ഷണമുള്ളവർ ഉടൻ ഡോക്ടറെ സമീപിച്ച് ചികിത്സ തുടങ്ങണം.
• അനാവശ്യമായ ആശുപത്രി സന്ദർശനം, രോഗികളെ സന്ദർശിക്കൽ എന്നിവ ഒഴിവാക്കണം.
• രോഗപ്രതിരോധത്തിനായി ധാരാളം തിളപ്പിച്ചാറ്റിയ വെള്ളം കുടിക്കേണ്ടതാണ്. തുറന്നു വെച്ചതും പഴകിയതുമായ പഴങ്ങളും ഭക്ഷണപദാർഥങ്ങളും ഉപയോഗിക്കാതിരിക്കുക.
• വവ്വാലുകൾ കാണപ്പെടുന്ന തെങ്ങ്, പന എന്നിവയിൽനിന്ന് തുറന്ന കലങ്ങളിൽ ശേഖരിക്കുന്ന കള്ള് തുടങ്ങിയ പാനീയങ്ങൾ കുടിക്കരുത്.
• വാഴയില അകവും പുറവും വൃത്തിയായി കഴുകിയശേഷം മാത്രം ഉപയോഗിക്കുക.
• വളർത്തുമൃഗങ്ങളുടെ ശരീരസ്രവങ്ങൾ, വിസർജ്യവസ്തുക്കൾ എന്നിവയുടെ സമ്പർക്കമുണ്ടാകാതെ സൂക്ഷിക്കുക.
• കിണറുകളിലും കുടിവെള്ളത്തിന് ഉപയോഗിക്കുന്ന മറ്റു ജലസ്രോതസ്സുകളിലും പക്ഷികളുടെ കാഷ്ഠം, മൂത്രം, മറ്റു ശരീരസ്രവങ്ങൾ വീഴാതെ സൂക്ഷിക്കുക.
• വീടുകളിലേക്ക് ചാഞ്ഞു നിൽക്കുന്ന മരങ്ങളുടെ കൊമ്പുകൾ മുറിച്ചുമാറ്റുക.
• കിണറിനുള്ളിലെ പാഴ്ച്ചെടികൾ വെട്ടിമാറ്റുകയും മുകൾഭാഗം ഇഴയടുപ്പമുള്ള നെറ്റ് അടിച്ച് നേരിയ തുണി ഉപയോഗിച്ച് മൂടുകയും ചെയ്യുക.
• വീടും പരിസരം വൃത്തിയാക്കുമ്പോൾ കയ്യിലും കാലിലും മുറിവുണ്ടെങ്കിൽ മൂടി കെട്ടുക, അടിച്ചുവരുമ്പോൾ കൈകളിൽ ഗ്ലൗസ് ധരിക്കണം. വൃത്തിയാക്കലിനുശേഷം കൈകാലുകൾ സോപ്പിട്ടു കഴുകണം.
• ജനൽ, വാതിൽ, കിണർ എന്നിവ ഇഴയടുപ്പമുള്ള വലകൾ ഉപയോഗിച്ച് മൂടുക.
• വീടിനുമുകളിൽ വാട്ടർടാങ്ക് ഉണ്ടെങ്കിൽ മൂടിവയ്ക്കണം.
• ഭക്ഷണം പാചകം ചെയ്യുന്നതിനും കഴിക്കുന്നതിനു മുൻപും കൈകൾ സോപ്പ് ഉപയോഗിച്ച് വൃത്തിയാക്കുക. ഭക്ഷണപദാർഥങ്ങൾ മൂടിവെക്കുക.* 15 മുതൽ 20 മിനിറ്റ് വരെ തിളപ്പിച്ച വെള്ളം മാത്രം കുടിക്കാൻ ഉപയോഗിക്കുക.
• പഴങ്ങൾ, പച്ചക്കറികൾ എന്നിവ കഴുകി മാത്രം ഉപയോഗിക്കുക.