അഴിയൂർ: മുഴപ്പിലങ്ങാട് - അഴിയൂർ ബൈപ്പാസ് പാതയിൽ ചെങ്കല്ല് കയറ്റി പോകുകയായിരുന്ന മിനി ലോറിക്ക് തീപ്പിടിച്ചു. രാവിലെ 6.45 ഓടെയാണ് സംഭവം. തലശ്ശേരി ഭാഗത്ത് നിന്ന് വടകര ഭാഗത്തേക്ക് പോകുകയായിരുന്ന ലോറി അഴിയൂരിലെത്തിയപ്പോഴാണ് എഞ്ചിൻ കാബിനിൽ നിന്ന് പുക ഉയരുന്നത് ഡൈവറുടെ ശ്രദ്ധയിൽ പെട്ടത്. 

ഡ്രൈവർ സംഭവ സ്ഥലത്ത് തന്നെ ലോറി നിർത്തി ചാടി ഇറങ്ങി. മാഹി അഗ്നിശമന സേനയെ വിവരമറിയച്ചതിനെ തുടർന്ന് സ്റ്റേഷൻ ഓഫീസർ രതീഷ് കുമാറിൻ്റെ നേതൃത്വത്തിലെത്തിയ സംഘം തീ അണച്ചു. വടകരയിൽ നിന്നും അഗ്നിശമന സേനയുടെ രണ്ട് യുനിറ്റും എത്തിയിരുന്നു. ലോറിയുടെ എഞ്ചിൻ കാബിൻ പൂർണ്ണമായും കത്തി നശിച്ചു. കത്തിയ ലോറിയിലെ കല്ല് മറ്റൊരു ലോറിയിൽ കയറ്റി ഗതാഗതം സുഗമമാക്കി.