കോഴിക്കോട്: കനത്ത മഴയിൽ കൂരാച്ചുണ്ട് കരിയാത്തൻപാറയിൽ ഉരുൾപൊട്ടൽ. ഇരുപത്തെട്ടാംമൈൽ സ്വദേശി മുജീബിന്റെ കോഴിഫാം തകർന്നു. കഴിഞ്ഞ ദിവസം രാത്രി ഏഴ് മണിയോടെയായിരുന്നു മണ്ണിടിച്ചിലുണ്ടായത്. മണ്ണിടിഞ്ഞ് മീറ്ററുകളോളം താഴേക്ക് വരികയും വ്യാപകമായ കൃഷിനാശം ഉണ്ടാവുകയും ചെയ്തു. നിലവില്‍ പ്രദേശത്തെ വീടുകള്‍ക്ക് ഭീഷണിയുണ്ട്.

'മണ്ണിടിച്ചിൽ കണ്ടപ്പോൾ വീടടക്കം പോകുന്ന നിലയിലായിരുന്നു. മണ്ണിടിഞ്ഞ് ഫാമിന്റെ മുകളിൽ അടിഞ്ഞുകൂടുകയായിരുന്നു. ഫാമിൽ അധികം കോഴികൾ ഉണ്ടായിരുന്നില്ല. എന്നാൽ, 1500-ഓളം കൂടുകൾ ഉണ്ടായിരുന്നു. അത് ഉരുൾപൊട്ടലിൽ നഷ്ടപ്പെട്ടു. ഇരുന്നൂറോളം കവുങ്ങുകളും നശിച്ചു. ഇനി ഒന്നിനും പറ്റാത്ത അവസ്ഥയിലാണ് പറമ്പ്', കോഴിഫാം ഉടമ മുജീബ് പറഞ്ഞു.