ഹൈദരാബാദ്: കാറിനുള്ളിൽ അബദ്ധത്തില്‍ കുടുങ്ങിയ രണ്ട് പെണ്‍കുട്ടികള്‍ ശ്വാസം മുട്ടി മരിച്ചു. തെലങ്കാനയിലെ രംഗറെഡ്ഡിയിലാണ് സംഭവം. നാലു വയസ്സുകാരിയായ അഭിനയശ്രി, അഞ്ചു വയസ്സുകാരിയായ തന്മയിശ്രി എന്നിവരാണ് മരിച്ചത്. ഇരുവരും ബന്ധുക്കളാണ്. ഇവര്‍ തങ്ങളുടെ മുത്തശ്ശിയുടെ വീട്ടിലേക്ക് വന്നതായിരുന്നു. മാതാപിതാക്കളും ബന്ധുക്കളും വീടനകത്തായിരുന്നു.കുട്ടികള്‍ പുറത്തേക്കും കളിക്കാനിറങ്ങി.

കളിച്ചുകൊണ്ടിരിക്കെ ഇവര്‍വീട്ടില്‍ പാര്‍ക്ക് ചെയ്തിരുന്ന കാറില്‍ കയറുകയായിരുന്നു. ഇത് മാതാപിതാക്കളുടെയും ബന്ധുക്കളുടെയും ശ്രദ്ധയില്‍പ്പെട്ടിരുന്നില്ല. തിങ്കളാഴ്ച ഉച്ചയ്ക്ക് 12 മണിയോടെയാണ് ഇവര്‍ കാറിനുള്ളില്‍ അകപ്പെട്ടത്. കുറച്ച് സമയത്തിന് ശേഷം കുട്ടികളെ കാണാതായതോടെ തിരച്ചില്‍ നടത്തുകയായിരുന്നു. ഒടുവില്‍ കാറില്‍ ബോധരഹിതരമായി കുട്ടികളെ കണ്ടെത്തി. ഉടന്‍ തന്നെ കാറിന്റെ ഡോര്‍ തുറന്ന് കുട്ടികളെ പ്രദേശത്തെ ഒരു ആശുപത്രിയിലെത്തിച്ചെങ്കിലും അപ്പോഴേക്കും മരിച്ചിരുന്നതായി സ്ഥിരീകരിച്ചു.