നാദാപുരം : സംസ്ഥാന പാതയിൽ അപകടകരമായി മത്സര ഓട്ടം നടത്തിയ രണ്ട് ബസുകൾ നാദാപുരം പോലീസ് കസ്റ്റഡിയിലെടുത്തു. ഡ്രൈവർമാർക്കെതിരെ കേസ്. തുണേരി സ്വദേശി ബാപ്പറത്ത് താഴെ കുനിയിൽ ബി. ടി.കെ. റെജിത്ത് (30 ) , കുറ്റ്യാടി കായക്കൊടി സ്വദേശി പള്ളിപ്പെരുമ്പടത്തിൽ ജയേഷ് ( 42 ) എന്നിവർക്കെതിരെയാണ് നാദാപുരം പോലീസ് കേസെടുത്തത്. വെള്ളിയാഴ്ച്ച ഉച്ചയ്ക്കാണ് കുറ്റ്യാടി നിന്ന് നാദാപുരം ഭാഗത്തേക്ക് സർവീസ് നടത്തുകയായിരുന്ന കെ എൽ 18 ഡബ്ല്യു 3251 നമ്പർ സോൾമേറ്റ് ബസ്സും , കെ എൽ 13 എ.കെ.6399 നമ്പർ ഹരേ റാം ബസ്സും മൽസര ഓട്ടം നടത്തിയത്. 

കല്ലാച്ചി മുതൽ നാദാപുരം സ്റ്റാൻ്റ് വരെ , ബസിലെ യാത്രക്കാർക്കും റോഡിലെ മറ്റ് വാഹനങ്ങൾക്കും അപകടം ഉണ്ടാക്കും വിധമാണ് ഇരു ഡ്രൈവർമാരും വാഹനം ഓടിച്ചത്. നാദാപുരം സ്റ്റാൻ്റിലെത്തിയ ഇരു ബസ്സിലെ ജീവനക്കാർ പരസ്പരം പോർവിളി നടത്തുകയും ചെയ്തു. സംഭവമറിഞ്ഞ് സ്ഥലത്തെത്തിയ പോലീസ് രണ്ട് ബസുകളും കസ്റ്റഡിയിലെടുക്കുകയും ഡ്രൈവർമാർക്കെതിരെ കേസ് എടുക്കുകയും ആയിരുന്നു.