മണിയൂർ: തിരുവോണ ദിനത്തിൽ കടവ് പ്രദേശത്ത് ഉണ്ടായ സംഘർഷവുമായി ബന്ധപ്പെട്ട കേസിൽ കരുവഞ്ചേരി നോർത്ത് എൽ.പി. സ്കൂൾ അധ്യാപകനും പൊതുപ്രവർത്തകനുമായ മുഹമ്മദ് ജവാദ് പി ഉൾപ്പെടെ ഉള്ളവർക്കെതിരെ നടപടിയെടുത്തത് രാഷ്ട്രീയ പ്രതികാരത്തിന്റെ ഭാഗമാണെന്ന് ആരോപിച്ച് യൂഡിവൈഎഫ് മണിയൂർ പഞ്ചായത്ത് കമ്മിറ്റി. സംഭവത്തിൽ സമഗ്രവും നിഷ്പക്ഷവുമായ അന്വേഷണം നടത്തി യഥാർഥ വസ്തുതകൾ പുറത്തുകൊണ്ടുവരണമെന്ന് കമ്മിറ്റി ആവശ്യപ്പെട്ടു.

തിരുവോണ ദിനത്തിൽ മദ്യലഹരിയിലെത്തിയ ഒരുപറ്റം ക്രിമിനലുകൾ പതിയാരക്കര മജയിൽ കടവ് പ്രദേശത്ത് പ്രശ്നമുണ്ടാക്കിയതിനെ തുടർന്ന് സാഹചര്യം നിയന്ത്രിക്കാനും പ്രശ്നം കൂടുതൽ വഷളാകുന്നത് തടയാനുമായി ഇടപെട്ട പ്രദേശത്തെ യുവാക്കളെ കള്ളക്കേസിൽ കുടുക്കുകയാണ്. എന്നാൽ സംഭവത്തിന്റെ യഥാർഥ പശ്ചാത്തലം മറച്ചുവെച്ച് യുവാക്കളെ ലഹരിയുമായി ബന്ധപ്പെടുത്തി പ്രചരിപ്പിക്കുകയും കേസിൽ കുടുക്കുകയും ചെയ്യാനുള്ള ശ്രമമാണ് നടക്കുന്നതെന്നും കമ്മിറ്റി ആരോപിച്ചു.

സംഭവസമയത്ത് ജവാദ് മാസ്റ്റർ ഉൾപ്പെടെയുള്ളവർ സംഭവസ്ഥലത്ത് ഉണ്ടായിരുന്നില്ല.ഇക്കാര്യം മൊബൈൽ ലൊക്കേഷൻ ഉൾപ്പെടെയുള്ള സാങ്കേതിക തെളിവുകൾ, സിസിടിവി ദൃശ്യങ്ങൾ, യാത്രാസംബന്ധമായ വിവരങ്ങൾ, സാക്ഷിമൊഴികൾ എന്നിവ പരിശോധിച്ച് സ്ഥിരീകരിക്കണമെന്നും അവർ ആവശ്യപ്പെട്ടു.

ജവാദ് മാസ്റ്ററെ കേസിൽ പ്രതിചേർത്തതിനു പിന്നിൽ രാഷ്ട്രീയ വൈരാഗ്യവും വ്യക്തിവിരോധവുമാണെന്ന സംശയമുണ്ടെന്നും കമ്മിറ്റി പ്രസ്താവനയിൽ പറഞ്ഞു. പൊതുപ്രവർത്തന രംഗത്ത് സജീവമായി ഇടപെടുകയും നാട്ടിലെ വിവിധ ആവശ്യങ്ങളിൽ സാധാരണക്കാർക്കൊപ്പം നിൽക്കുകയും ചെയ്യുന്ന ഒരാളെ അടിസ്ഥാനരഹിതമായ ആരോപണങ്ങളിലൂടെ പൊതുസമൂഹത്തിന് മുന്നിൽ അപമാനിക്കാനുള്ള ശ്രമം അംഗീകരിക്കാനാവില്ലെന്നും യൂഡിവൈഎഫ് വ്യക്തമാക്കി.

നാട്ടിൽ പ്രശ്നങ്ങളുണ്ടാകുമ്പോൾ പൊതുപ്രവർത്തകർ ഇടപെടുന്നത് സ്വാഭാവികമാണെന്നും, അനീതിക്കും ഗുണ്ടായിസത്തിനുമെതിരെ പ്രതികരിക്കുന്നവരെ കേസുകളിൽ കുടുക്കിയും വ്യാജപ്രചാരണങ്ങളിലൂടെ അപമാനിച്ചും ഭയപ്പെടുത്തി പിൻവലിക്കാമെന്ന ധാരണ ഉപേക്ഷിക്കണമെന്നും കമ്മിറ്റി ആവശ്യപ്പെട്ടു.

ഒരു കേസിൽ ആരോപണം ഉയർന്നതിന്റെ പേരിൽ മാത്രം ഒരാളെ കുറ്റവാളിയായി ചിത്രീകരിക്കുകയും അദ്ദേഹത്തിന്റെ സാമൂഹികവും തൊഴിൽപരവുമായ ജീവിതത്തെ ബാധിക്കുന്ന രീതിയിൽ പ്രചാരണം നടത്തുകയും ചെയ്യുന്നത് അവസാനിപ്പിക്കണമെന്നും പ്രസ്താവനയിൽ ആവശ്യപ്പെട്ടു. സംഭവസമയത്ത് മുഹമ്മദ് ജവാദ് പി ഉൾപ്പെടെയുള്ളവർ എവിടെയായിരുന്നു എന്നതുൾപ്പെടെയുള്ള എല്ലാ കാര്യങ്ങളും ശാസ്ത്രീയമായി പരിശോധിച്ച് യഥാർഥ സത്യാവസ്ഥ പൊതുസമൂഹത്തിന് മുന്നിൽ കൊണ്ടുവരണമെന്നും കമ്മിറ്റി ആവശ്യപ്പെട്ടു.

നിരപരാധികളെ രാഷ്ട്രീയ ലക്ഷ്യത്തോടെ വേട്ടയാടാനുള്ള ശ്രമമുണ്ടായാൽ അതിനെ രാഷ്ട്രീയമായും നിയമപരമായും ശക്തമായി നേരിടുമെന്നും യൂഡിവൈഎഫ് മണിയൂർ പഞ്ചായത്ത് കമ്മിറ്റി അറിയിച്ചു. 

മണിയൂരിന്റെ സാമൂഹിക സൗഹൃദവും സമാധാനാന്തരീക്ഷവും തകർക്കുന്ന രാഷ്ട്രീയ വൈരാഗ്യങ്ങളിൽ നിന്ന് ബന്ധപ്പെട്ടവർ പിന്തിരിയണമെന്നും സംഭവത്തിൽ നിഷ്പക്ഷ അന്വേഷണം നടത്തി മുഴുവൻ വസ്തുതകളും പുറത്തുകൊണ്ടുവരണമെന്നും യൂഡിവൈഎഫ് ആവശ്യപ്പെട്ടു.അതുൽബാബു,ടി.എം.കെ. നംഷിദ്, മുതുവീട്ടിൽ വിഷ്ണു, എന്നിവർ സംസാരിച്ചു.