പുറമേരി: പുറമേരിയിൽ സ്‌കൂൾ ബസ് കടന്നുപോകുന്നതിനിടെ റോഡിൽ സ്‌ഫോടകവസ്തു പൊട്ടിത്തെറിച്ചു. പുറമേരി ക്ഷേത്രത്തിന് സമീപത്തെ റോഡിൽ ഇന്ന് രാവിലെ എട്ടേമുക്കാലോടെയാണ് സംഭവം. കുട്ടികളുമായി വന്ന ബസ് സ്‌ഫോടകവസ്തുവിന് മുകളിലൂടെ കയറി ഇറങ്ങിയ ഉടനാണ് പൊട്ടിത്തെറി ഉണ്ടായത്.

സ്‌ഫോടനത്തിന്റെ ആഘാതത്തിൽ ബസിന്റെ ടയറിന് സാരമായ കേടുപാടുകൾ സംഭവിച്ചു. റോഡിൽ വലിയ കുഴി രൂപപ്പെട്ടിട്ടുണ്ട്. വൻ ദുരന്തമാണ് ഒഴിവായത്. സംഭവത്തിന് പിന്നാലെ പൊലീസ് സ്ഥലത്തെത്തി പ്രാഥമിക പരിശോധനകൾ നടത്തി. സ്‌ഫോടനത്തിന്റെ തീവ്രതയും സ്‌ഫോടകവസ്തുവും ഏതാണെന്ന് കണ്ടെത്താൻ ഫോറൻസിക് വിദഗ്‌‌ദ്ധരും ബോംബ് സ്‌ക്വാഡും സ്ഥലത്തെത്തി പരിശോധന നടത്തി.