മണിയൂർ: സി.പി.എം ജില്ലാ കമ്മിറ്റിയില്‍നിന്ന് പി.കെ. ദിവാകരനെ ഒഴിവാക്കിയതിനെതിരെ പ്രവര്‍ത്തകരുടെ പ്രതിഷേധം. മണിയൂര്‍ തുറശ്ശേരി മുക്കില്‍ നാല്‍പതോളം പേര്‍ പ്രതിഷേധ പ്രകടനം നടത്തി.
പാര്‍ട്ടിയില്‍ തോന്നിയപോലെ തീരുമാനമെടുക്കാമെന്ന് ആരും കരുതേണ്ടെന്ന് പ്രവര്‍ത്തകര്‍ മുദ്രാവാക്യം വിളിച്ചു. ഡി.വൈ.എഫ്.ഐ മുന്‍ ജില്ലാ പ്രസിഡന്റും വടകര ഏരിയ സെക്രട്ടറിയും ആയിരുന്നു പി.കെ ദിവാകരന്‍.
വടകരയില്‍ നടന്ന സി.പി.എം ജില്ലാ സമ്മേളനത്തിലാണ് പി.കെ ദിവാകരന്‍ ഉള്‍പ്പെടെ 11 പേരെ ഒഴിവാക്കുകയും 13 പേരെ പുതുതായി ഉള്‍പ്പെടുത്തുകയും ചെയ്തത്. ഇതിന് പിന്നാലെ സോഷ്യല്‍ മീഡിയയില്‍ ദിവാകരനെ അനുകൂലിച്ചും നേതൃത്വത്തെ വിമര്‍ശിച്ചും പോസ്റ്റുകള്‍ പ്രത്യക്ഷപ്പെട്ടിരുന്നു.
ദിവാകരനെ ജില്ലാ കമ്മിറ്റിയില്‍നിന്ന് ഒഴിവാക്കിയതിനൊപ്പം വടകര നഗരസഭാ അധ്യക്ഷ കെ.പി ബിന്ദുവിനെ ഉള്‍പ്പെടുത്തിയതും പ്രതിഷേധത്തിന് കാരണമായി.

ജില്ലാ കമ്മിറ്റിയില്‍നിന്ന് പി.കെ. ദിവാകരനെ ഒഴിവാക്കി; തുറശ്ശേരി മുക്കില്‍സിപിഎം പ്രവര്‍ത്തകരുടെ പ്രതിഷേധം

ജില്ലാ കമ്മിറ്റിയില്‍നിന്ന് പി.കെ. ദിവാകരനെ ഒഴിവാക്കി; തുറശ്ശേരി മുക്കില്‍ സിപിഎം പ്രവര്‍ത്തകരുടെ പ്രതിഷേധം

തിരുവനന്തപുരം: സെക്രട്ടറിയേറ്റ് പടിക്കൽ ദിവസങ്ങളായി തുടരുന്ന നിരാഹാര സമരം അവസാനിപ്പിച്ച് ആശാ വർക്കർമാ‌ർ. പ്രവർത്തകർക്ക് ഇളനീർ നൽകി കൊണ്ടാണ് നിരാഹാര സമരം അവസാനിപ്പിച്ചത്. രാപകൽ സമരത്തിന്റെ 81 -ാം ദിവസമായ ഇന്ന് വിവിധ തൊഴിലാളി സംഘടനകളും പിന്തുണയുമായി സമരവേദിയിൽ എത്തിയിട്ടുണ്ട്.&nbsp;
കാസർകോട് മുതൽ തിരുവനന്തപുരം വരെ മേയ് 5ന് തുടങ്ങി ജൂൺ 17ന് അവസാനിക്കുന്ന രാപകൽ സമരയാത്രയുടെ ഫ്ലാഗ് ഓഫ് ഉച്ചയ്ക്ക് 12 മണിക്ക് സമരപന്തലിൽ നടന്നു. പ്രമുഖ ഗാന്ധിയൻ ഡോ. എം പി മത്തായിയാണ് ഫ്ലാഗ് ഓഫ് കർമ്മം നിർവഹിച്ചത്.

നിരാഹാര സമരം അവസാനിപ്പിച്ച് ആശാ വർക്കർമാ‌ർ ;രാപകൽ സമരം തുടരും

Kerala

തിരുവനന്തപുരം: ഔദ്യോഗിക ജീവിതത്തില്‍നിന്ന് പടിയിറങ്ങിയ ശാരദാ മുരളീധരനെ പ്രകീര്‍ത്തിച്ച് മുഖ്യമന്ത്രി പിണറായി വിജയന്‍. ഉദ്യോഗസ്ഥ എന്നതിനപ്പുറം പുരോഗമന നിലപാടുകള്‍ ഉറക്കെപ്പറയാന്‍ ധീരത കാണിച്ച ശാരദ മുരളീധരന്റെ നിലപാട് മാതൃകാപരമാണെന്ന് മുഖ്യമന്ത്രി ഫെയ്‌സ്ബുക്ക് കുറിപ്പില്‍ പറഞ്ഞു. ശാരദ മുരളീധരനോടൊപ്പമുള്ള ചിത്രവും അദ്ദേഹം പോസ്റ്റില്‍ പങ്കുവെച്ചിട്ടുണ്ട്.
'സ്തുത്യര്‍ഹവും സുദീര്‍ഘവുമായ ഔദ്യോഗിക ജീവിതത്തിന് വിരാമം കുറിച്ച് ചീഫ് സെക്രട്ടറി സ്ഥാനത്തുനിന്നും ഡോക്ടര്‍ ശാരദാ മുരളീധരന്‍ ഇന്നലെ വിരമിച്ചു. ചീഫ് സെക്രട്ടറി പദവിയില്‍ അധികകാലം ഉണ്ടായിരുന്നില്ലെങ്കിലും കുറഞ്ഞ സമയത്തിനുള്ളില്‍ തന്നെ തന്റെ ഭരണമികവ് ഈ നാടിനെ ബോധ്യപ്പെടുത്താന്‍ ഡോ. ശാരദാ മുരളീധരനു സാധിച്ചു.
വയനാട് പുനരധിവാസം മുതല്‍ ലഹരി വിരുദ്ധ ക്യാമ്പയ്‌നുകള്‍ വരെ, ഓരോ പദ്ധതികളിലും പരിപാടികളിലും സര്‍ക്കാരിന്റെ നയങ്ങള്‍ സൂക്ഷ്മതയോടെ നടപ്പാക്കാന്‍ അവര്‍ ശ്രദ്ധിച്ചു. മികച്ച ഏകോപനവും മികച്ച നിര്‍വഹണവും അവരുടെ പ്രവര്‍ത്തന മുദ്രയായിരുന്നു.
ഉദ്യോഗസ്ഥ എന്ന നിലയ്ക്കപ്പുറം സാമൂഹികനീതികള്‍ക്കെതിരെ തന്റെ പുരോഗമന നിലപാടുകള്‍ ഉറക്കെപ്പറയാന്‍ ഡോ.ശാരദ കാണിച്ച സന്നദ്ധതയും ധീരതയും മാതൃകാപരമാണ്. സര്‍ക്കാര്‍ നയങ്ങള്‍ നടപ്പാക്കുന്നതിലെ ആത്മാര്‍ത്ഥത, കാര്യക്ഷമതയോടെയുള്ള കൃത്യനിര്‍വഹണം, ഭാവനാപൂര്‍ണമായ ആസൂത്രണം, സംസ്ഥാനത്തോടും ഇവിടുത്തെ ജനതയോടുമുള്ള അചഞ്ചലമായ കൂറ് എന്നിവയുടെ സമന്വയമാണ് ശാരദാ മുരളീധരന്റെ ഔദ്യോഗിക ജീവിതം. ഡോ. ശാരദ മുരളീധരന് കര്‍മ്മോത്സുകതയുടെയും സേവനത്തിന്റെയും ഒരു സജീവകാലം തുടര്‍ന്നും ഉണ്ടാവട്ടെ എന്ന് ഹൃദയപൂര്‍വ്വം ആശംസിക്കുന്നു' മുഖ്യമന്ത്രി കുറിച്ചു.

പുരോഗമന നിലപാടുകള്‍ ഉറക്കെപ്പറയാന്‍ കാണിച്ച ധീരത മാതൃകാപരം ;ശാരദാ മുരളീധരനെ പ്രകീര്‍ത്തിച്ച് മുഖ്യമന്ത്രി

കൊച്ചി: പുലിപ്പല്ല് കൈവശം വച്ച കേസിൽ ജാമ്യം ലഭിച്ചതിന് പിന്നാലെ പ്രതികരണവുമായി റാപ്പർ വേടൻ. തനിക്ക് വേണ്ടി പ്രാർത്ഥിച്ച എല്ലാവരോടും നന്ദിയുണ്ടെന്ന് ഹിരൺ ദാസ് മുരളി എന്ന വേടൻ പറഞ്ഞു. 'എന്നെ കേൾക്കുകയും കാണുകയും ചെയ്യുന്ന സഹോദരന്മാരോടാണ് പറയാനുള്ളത് പുകവലിയും മദ്യപാനവും വലിയ പ്രശ്‌നമാണ്. ചേട്ടനോട് ദയവായി ക്ഷമിക്കണം. നല്ലൊരു മനുഷ്യനാകാൻ പറ്റുമോ എന്ന് ഞാൻ നോക്കട്ടെ. പോയിവരാം മക്കളെ' വേടൻ പ്രതികരിച്ചു.
കേസ് കോടതിയുടെ കൈയിലിരിക്കുന്ന കാര്യമാണെന്നും ഇതെക്കുറിച്ച് ചോദ്യങ്ങൾക്ക് വേടൻ മറുപടി നൽകി.കേസുമായി വേടൻ സഹകരിക്കുന്നുണ്ട് എന്ന് വനംവകുപ്പ് കോടതിയെ അറിയിച്ചത് മുഖവിലയ്‌ക്കെടുത്താണ് നേരത്തെ വേടന്‌ ജാമ്യം അനുവദിച്ചത്.

'നല്ലൊരു മനുഷ്യനാകാൻ പറ്റുമോ എന്ന് ഞാൻ നോക്കട്ടെ';ജാമ്യം ലഭിച്ചതിന് പിന്നാലെ പ്രതികരണവുമായി വേടൻ

ന്യൂഡൽഹി: വാണിജ്യാവശ്യങ്ങൾക്കുള്ള പാചകവാതക സിലിണ്ടറിന്റെ വില കുറച്ചു. 15.50 രൂപയാണ് കുറച്ചത്. 19 കിലോയുടെ സിലിണ്ടറിന്റെ വിലയാണ് കുറഞ്ഞത്. അതേസമയം, ഗാർഹിക ആവശ്യത്തിനുള്ള പാചക വാതക സിലിണ്ടർ വിലയിൽ മാറ്റമുണ്ടായില്ല. പുതുക്കിയ വില ഇന്നുമുതൽ പ്രാബല്യത്തിൽ വരും.
ഏപ്രിലിൽ വാണിജ്യാവശ്യത്തിനുള്ള സിലിണ്ടറിന് 41 രൂപ കുറച്ചിരുന്നു. ഇതിന് പിന്നാലെയാണ് വിലയിൽ വീണ്ടും കുറവുണ്ടായത്. എന്നാൽ ഏപ്രിലിൽ ഗാർഹിക ആവശ്യത്തിനുള്ള സിലിണ്ടർ വില കൂട്ടിയിരുന്നു. ഏപ്രിൽ ഏഴിന് 14.2 കിലോ ഗ്യാസ് സിലിണ്ടർ വില 50 രൂപയാണ് കൂട്ടിയത്.പാചക വാതക വിലകള്‍ എല്ലാ മാസവും ഒന്നാം തീയതിയും 15-ാം തീയതിയുമാണ് പരിഷ്‌കരിക്കാറുള്ളത്.&nbsp;

പാചകവാതക സിലിണ്ടറിന്റെ വില 15 രൂപ കുറച്ചു

ന്യൂഡൽഹി: നിരവധി പാകിസ്ഥാൻ അഭിനേതാക്കളുടെ ഇൻസ്റ്റാഗ്രാം അക്കൗണ്ടുകൾ ഇന്ത്യയിൽ പ്രവർത്തനരഹിതമാക്കി. ഹാനിയ ആമിർ, മാഹിറ ഖാൻ എന്നിവരുൾപ്പെടെയുള്ളവരുടെ അക്കൗണ്ടുകളാണ് ഇന്ത്യയിൽ വിലക്കിയത്. ഹാനിയ ആമിറിൻ്റെ അക്കൗണ്ടാണ് ആദ്യമായി പ്രവർത്തനരഹിതമാക്കിയതിൽ ഒന്ന് എന്നാണ് റിപ്പോർട്ട്.
പഹൽഗാം ഭീകരാക്രമണത്തെ തുടർന്ന് ഇന്ത്യയും പാകിസ്ഥാനും തമ്മിൽ വർദ്ധിച്ചുവരുന്ന സംഘർഷങ്ങൾക്കിടയിലാണ് ഈ നടപടി. നിരോധിത പാകിസ്ഥാൻ ഭീകര സംഘടനയായ ലഷ്കർ-ഇ-തൊയ്ബയുടെ (LeT) ഉപവിഭാഗമായ ദി റെസിസ്റ്റൻസ് ഫോഴ്സിലെ (TRF) ഭീകരർ നടത്തിയ വെടിവെപ്പിൽ 26 പേരാണ് അന്ന് കൊല്ലപ്പെട്ടത്.
അലി സഫർ, സനം സയീദ്, ബിലാൽ അബ്ബാസ്, ഇഖ്‌റ അസീസ്, ഇമ്രാൻ അബ്ബാസ്, സജൽ അലി എന്നിവരാണ് ഇന്ത്യയിൽ ഇൻസ്റ്റാഗ്രാം അക്കൗണ്ടുകൾ പ്രവർത്തനരഹിതമാക്കപ്പെട്ട മറ്റ് പാകിസ്ഥാൻ താരങ്ങൾ. 'ഈ അക്കൗണ്ട് ഇന്ത്യയിൽ ലഭ്യമല്ല. ഉള്ളടക്കം നിയന്ത്രിക്കാനുള്ള നിയമപരമായ അഭ്യർത്ഥന ഞങ്ങൾ പാലിച്ചതിനാലാണ് ഇത്' എന്ന സന്ദേശമാണ് ഇന്ത്യയിൽനിന്ന് ഇവരുടെ പ്രൊഫൈൽ സന്ദർശിച്ചവർക്കെല്ലാം ലഭിച്ചത്. അതേസമയം ഫവാദ് ഖാൻ, വഹാജ് അലി തുടങ്ങിയ മറ്റ് ചില പാകിസ്ഥാൻ അഭിനേതാക്കളുടെ ഇൻസ്റ്റാഗ്രാം അക്കൗണ്ടുകൾ ഇന്ത്യയിൽ ഇപ്പോഴും ലഭ്യമാണ്.

പാക് നടീനടന്മാരുടെ ഇൻസ്റ്റ​ഗ്രാം അക്കൗണ്ടുകൾക്ക് ഇന്ത്യയിൽ വിലക്ക്