തിരുവനന്തപുരം: മന്ത്രി കെ.എം. ഷാജി സ്വകാര്യ വ്യക്തിയുടെ ഉടമസ്ഥതയിലുള്ള റേഞ്ച് റോവർ വാഹനം ഔദ്യോഗിക ആവശ്യത്തിന് ഉപയോഗിച്ചതിനെതിരെ മോട്ടോർ വാഹന കമ്മിഷണർക്ക് പരാതി. സെപ്റ്റംബർ 23ന് നൽകിയ പരാതിയിൽ ഇതുവരെ നടപടി ഉണ്ടായിട്ടില്ലെന്നാണ് ആരോപണം. സർക്കാർ ബോർഡും ചിഹ്നങ്ങളും പതിച്ച സ്വകാര്യ ആഡംബര വാഹനം ഔദ്യോഗിക ആവശ്യത്തിന് ഉപയോഗിച്ചത് മോട്ടോർ വാഹന നിയമങ്ങളുടെ ലംഘനമാണെന്ന് പരാതിയിൽ ചൂണ്ടിക്കാട്ടുന്നു.
1988ലെ മോട്ടോർ വെഹിക്കിൾ ആക്ടിലെ 39, 40, 41, 43, 52, 66 വകുപ്പുകളും 1989ലെ മോട്ടോർ വെഹിക്കിൾ റൂൾസിലെ 92 എ വകുപ്പും ലംഘിച്ചതിന് നടപടി സ്വീകരിക്കണമെന്നാണ് ആവശ്യം. ദേശീയ ചിഹ്നങ്ങളും പേരും ദുരുപയോഗം ചെയ്തതുമായി ബന്ധപ്പെട്ട നിയമപ്രകാരവും നടപടിയെടുക്കണമെന്നും പരാതിയിൽ ആവശ്യപ്പെടുന്നു.
ഭാരതീയ ന്യായ സംഹിതയിലെ 204, 205 വകുപ്പുകൾ പ്രകാരവും കുറ്റം ചെയ്തതായി പരാതിയിൽ ആരോപിക്കുന്നുണ്ട്. പരിശോധന നടത്തി നിയമലംഘനം കണ്ടെത്തിയാൽ വാഹനം പിടിച്ചെടുക്കണമെന്നും പരാതിക്കാരൻ ആവശ്യപ്പെട്ടു. ഹൈക്കോടതി അഭിഭാഷകനായ അതുൽ ടോമാണ് പരാതി നൽകിയത്. പരാതിയുടെ പകർപ്പ് കണ്ണൂർ ഇരിട്ടി ജോയിന്റ് ആർ.ടി.ഒയ്ക്കും കൈമാറിയിട്ടുണ്ട്.

കെ.എം. ഷാജിയുടെ റേഞ്ച് റോവർ ഉപയോഗം; മോട്ടോർ വാഹന കമ്മിഷണർക്ക് പരാതി

തിരുവനന്തപുരം : പഞ്ചാബിലെ ലവ്‌ലി പ്രൊഫഷണൽ യൂണിവേഴ്സിറ്റിയിൽ ഉണ്ടായ സംഭവങ്ങൾ അതീവ ഗൗരവത്തോടെ കാണണമെന്ന് പ്രതിപക്ഷ നേതാവ് പിണറായി വിജയൻ. ഒരു പെൺകുട്ടിക്ക് നേരെ ലൈംഗിക അതിക്രമം നടന്നുവെന്ന ആരോപണത്തെ തുടർന്നാണ് വിദ്യാർഥികൾ പ്രതിഷേധവുമായി രംഗത്തെത്തിയത്. എന്നാൽ സർവകലാശാലാ സ്ഥാപകനും ചാൻസലറുമായ ബിജെപി എംപി അശോക് കുമാർ മിത്തലും മാനേജ്മെന്റും പൊലീസിനെയും സംഘപരിവാർ പ്രവർത്തകരെയും ഉപയോഗിച്ച് പ്രതിഷേധം അടിച്ചമർത്താനാണ് ശ്രമിച്ചതെന്ന് പിണറായി വിജയൻ ആരോപിച്ചു.
സംഭവത്തിൽ ശക്തമായ പ്രതിഷേധം ഉയർന്നുവരണമെന്നും സമഗ്രവും സുതാര്യവുമായ അന്വേഷണത്തിലൂടെ നീതി ഉറപ്പാക്കണമെന്നും അദ്ദേഹം ആവശ്യപ്പെട്ടു. വിദ്യാർഥികൾ ഉന്നയിക്കുന്ന വിവിധ വിഷയങ്ങളിലും മാനേജ്മെന്റിന്റെ പങ്ക് സംബന്ധിച്ചും വിട്ടുവീഴ്ചയില്ലാത്ത അന്വേഷണം നടത്തണം. സംഘർഷത്തെ തുടർന്ന് 10 ദിവസത്തേക്ക് ക്ലാസുകൾ നിർത്തിവച്ച സാഹചര്യത്തിൽ സർവകലാശാലയിലെ 1500-ലധികം മലയാളി വിദ്യാർഥികളുടെ സുരക്ഷയും യാത്രാസൗകര്യവും ഉറപ്പാക്കണമെന്നും അദ്ദേഹം ആവശ്യപ്പെട്ടു.
ജലന്ധറിൽ നിന്ന് ഡൽഹിയിലേക്കും തുടർന്ന് കേരളത്തിലേക്കും വിദ്യാർഥികൾക്ക് സുരക്ഷിതമായി യാത്ര ചെയ്യാൻ കേന്ദ്ര-സംസ്ഥാന സർക്കാരുകൾ അടിയന്തരമായി ഇടപെടണം. ടിക്കറ്റ് ക്ഷാമം ഉണ്ടാകാൻ സാധ്യതയുള്ളതിനാൽ റെയിൽവേയുമായി ബന്ധപ്പെട്ട് പ്രത്യേക ട്രെയിനുകളോ അധിക കോച്ചുകളോ അനുവദിക്കുന്നതിന് നടപടി സ്വീകരിക്കണമെന്നും പിണറായി വിജയൻ ആവശ്യപ്പെട്ടു. വിദ്യാർഥികളുടെയും രക്ഷിതാക്കളുടെയും ആശങ്കകൾ അടിയന്തരമായി പരിഹരിക്കണമെന്നും അദ്ദേഹം പറഞ്ഞു

ലവ്‌ലി സർവകലാശാലയിലെ സംഘർഷം; മലയാളി വിദ്യാർഥികളുടെ സുരക്ഷ ഉറപ്പാക്കണമെന്ന് പ്രതിപക്ഷ നേതാവ് പിണറായി വിജയൻ

തിരുവനന്തപുരം: വലിയ രാഷ്ട്രീയ വിവാദങ്ങൾക്ക് വഴിവെച്ച നിയമസഭാ കയ്യാങ്കളി കേസിൽ 11 വർഷത്തിന് ശേഷം വിചാരണ നടപടികൾക്ക് തുടക്കമാകുന്നു. നവംബർ മൂന്നിന് തിരുവനന്തപുരം ചീഫ് ജുഡീഷ്യൽ മജിസ്‌ട്രേറ്റ് കോടതിയിലാണ് വിചാരണ ആരംഭിക്കുക. പ്രതികൾ നടത്തിയ നിയമപോരാട്ടങ്ങൾക്കൊടുവിലാണ് കേസ് ഇപ്പോൾ വിചാരണ ഘട്ടത്തിലെത്തുന്നത്.
2015 മാർച്ച് 13നാണ് കേസിനാസ്പദമായ സംഭവം നടന്നത്. അന്നത്തെ ധനമന്ത്രി കെ.എം. മാണി ബജറ്റ് അവതരിപ്പിക്കുന്നതിനിടെ പ്രതിപക്ഷ എംഎൽഎമാർ പ്രതിഷേധിച്ചതാണ് കേസിനിടയാക്കിയത്. നിയമസഭയിലെ പൊതുമുതൽ നശിപ്പിച്ചെന്നാരോപിച്ചാണ് പൊലീസ് കേസ് രജിസ്റ്റർ ചെയ്തത്.
ആദ്യഘട്ടത്തിൽ രണ്ട് സാക്ഷികളെയാണ് വിസ്തരിക്കുക. അന്നത്തെ നിയമസഭാ സെക്രട്ടറിയായിരുന്ന ശാരംഗധരനും സഭയിലെ ദൃശ്യങ്ങൾ പകർത്തിയ ഡിവിആർ കോപ്പി ചെയ്ത എൻജിനീയറുമാണ് ആദ്യ സാക്ഷികൾ. കേസിലെ പ്രധാന പ്രതികളിൽ വി. ശിവൻകുട്ടി, ഇ.പി. ജയരാജൻ, കെ.ടി. ജലീൽ, കെ. അജിത്, കെ. കുഞ്ഞഹമ്മദ്, സി.കെ. സദാശിവൻ എന്നിവരുണ്ട്.
കേസിൽ അഡ്വ. കെ. സന്തോഷ് കുമാറിനെ സ്പെഷ്യൽ പബ്ലിക് പ്രോസിക്യൂട്ടറായി നിയമിച്ചിട്ടുണ്ട്. വിചാരണ നടപടികൾ ആരംഭിക്കുന്നതോടെ വർഷങ്ങളായി തുടരുന്ന കേസിൽ കോടതി നടപടികൾ നിർണായക ഘട്ടത്തിലേക്ക് കടക്കുകയാണ്.

11 വർഷത്തിന് ശേഷം നിയമസഭാ കയ്യാങ്കളി കേസ് വിചാരണയിലേക്ക്; ആദ്യഘട്ടത്തിൽ രണ്ട് സാക്ഷികൾ

ഡൽഹി: ഡൽഹിയിൽ സ്ത്രീകൾക്കും പെൺകുട്ടികൾക്കും നേരെയുള്ള ലൈംഗികാതിക്രമ സംഭവങ്ങൾ വർധിക്കുന്നതിൽ ആശങ്ക രേഖപ്പെടുത്തി സുപ്രീംകോടതി സ്വമേധയാ കേസെടുത്തു. ജസ്റ്റിസുമാരായ ജെ.ബി. പർദിവാല, കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് വിഷയം പരിഗണിച്ചത്. സ്ത്രീകളുടെ സുരക്ഷ ഉറപ്പാക്കുന്നതിൽ നിയമപാലന സംവിധാനത്തിന്റെയും ഭരണകൂടത്തിന്റെയും വീഴ്ചകളാണ് ഇത്തരം സംഭവങ്ങൾ ചൂണ്ടിക്കാട്ടുന്നതെന്ന് കോടതി നിരീക്ഷിച്ചു.
ആസ്ഥ കുഞ്ജ് പാർക്കിൽ 17 വയസുകാരി കൂട്ടബലാത്സംഗത്തിനിരയായ സംഭവം, സ്വരൂപ് നഗറിൽ പ്രായപൂർത്തിയാകാത്ത പെൺകുട്ടി കൂട്ടബലാത്സംഗത്തിനിരയായ സംഭവം, ഗ്രേറ്റർ നോയിഡയിൽ നിന്ന് ഡൽഹിയിലേക്ക് സർവീസ് നടത്തിയ ബസിനുള്ളിൽ പെൺകുട്ടി ലൈംഗികാതിക്രമത്തിനിരയായ സംഭവം തുടങ്ങിയവ കോടതി പരിഗണിച്ചു. പാർക്കുകൾ, ബസുകൾ, മെട്രോ സ്റ്റേഷനുകൾ ഉൾപ്പെടെയുള്ള പൊതുസ്ഥലങ്ങൾ ഉയർന്ന അപകടസാധ്യതയുള്ള മേഖലകളായി മാറാൻ അനുവദിക്കാനാകില്ലെന്നും കോടതി വ്യക്തമാക്കി.
ഗ്രേറ്റർ നോയിഡയിൽ നിന്ന് ഡൽഹിയിലെ കാശ്മീരി ഗേറ്റിലേക്ക് ഏകദേശം 47 കിലോമീറ്റർ സഞ്ചരിച്ച ബസിനുള്ളിൽ പ്രായപൂർത്തിയാകാത്ത പെൺകുട്ടി ലൈംഗികാതിക്രമത്തിനിരയായ സംഭവത്തിലും കോടതി ആശങ്ക രേഖപ്പെടുത്തി. ബസ് നിരവധി പൊലീസ് ചെക്ക്‌പോസ്റ്റുകൾ കടന്നുപോയിട്ടും പരിശോധനയ്ക്ക് വിധേയമായില്ലെന്ന റിപ്പോർട്ടും കോടതി ചൂണ്ടിക്കാട്ടി. സംഭവം 2012ലെ നിർഭയ കേസിന്റെ ഓർമപ്പെടുത്തലാണെന്നും നിയമപാലന സംവിധാനത്തിൽ കാര്യമായ പുരോഗതി ഉണ്ടായിട്ടുണ്ടോ എന്ന് പരിശോധിക്കേണ്ട സമയമാണെന്നും കോടതി നിരീക്ഷിച്ചു.
കുറ്റകൃത്യങ്ങൾക്ക് ശേഷം ജനപ്രതിനിധികളും അധികാരികളും അനുശോചനവും പ്രസ്താവനകളും നടത്തുന്നത് മാത്രം മതിയാകില്ലെന്നും കോടതി വ്യക്തമാക്കി. കുറ്റകൃത്യങ്ങൾ തടയാനും പൊതുക്രമസമാധാനം ഉറപ്പാക്കാനും ദുർബല വിഭാഗങ്ങളെ സംരക്ഷിക്കാനും ഫലപ്രദമായ നടപടികൾ സ്വീകരിക്കണമെന്നും കോടതി നിർദേശിച്ചു.

ഡൽഹിയിൽ സ്ത്രീകൾക്കും പെൺകുട്ടികൾക്കും നേരെ അതിക്രമം; സ്വമേധയാ കേസെടുത്ത് സുപ്രീംകോടതി

National

ന്യൂഡൽഹി : 2,000 രൂപയ്ക്ക് മുകളിലുള്ള യുപിഐ ഇടപാടുകൾക്ക് മർച്ചന്റ് ഡിസ്കൗണ്ട് റേറ്റ് (എംഡിആർ) ഏർപ്പെടുത്താനുള്ള കേന്ദ്ര തീരുമാനത്തിനെതിരായ ഹർജിയിൽ ഇടക്കാല സ്റ്റേ നൽകാതെ സുപ്രീംകോടതി. അതേസമയം, ചാർജ് ഏർപ്പെടുത്തുന്നതിനുള്ള നിയമപരവും ഭരണപരവുമായ അടിസ്ഥാനമെന്തെന്ന് കേന്ദ്രസർക്കാരിനോടും റിസർവ് ബാങ്കിനോടും എൻപിസിഐയോടും കോടതി വിശദീകരണം തേടി. നാല് ആഴ്ചയ്ക്കകം മറുപടി നൽകാനും നിർദേശിച്ചു.
എംഡിആർ നികുതിയോ ഫീസോ അല്ലെന്ന കേന്ദ്രത്തിന്റെ വാദത്തോട് പ്രതികരിച്ച ജസ്റ്റിസ് ജോയ്മല്യ ബാഗ്ചി, വ്യാപാരിക്ക് ലഭിക്കുന്ന തുകയിൽ നിന്ന് തുക ഈടാക്കുന്നതിനുള്ള നിയമപരവും ഭരണപരവുമായ അടിസ്ഥാനമെന്തെന്നും ഏത് സേവനത്തിനാണ് തുക ഈടാക്കുന്നതെന്നും ചോദിച്ചു.
2,000 രൂപയ്ക്ക് മുകളിലുള്ള പേയ്മെന്റുകൾക്ക് എംഡിആർ ഏർപ്പെടുത്താനാണ് കേന്ദ്രത്തിന്റെ പുതിയ നീക്കം. നിലവിലെ നിർദേശപ്രകാരം വ്യക്തിയിൽ നിന്ന് വ്യക്തിയിലേക്കുള്ള യുപിഐ ഇടപാടുകൾ തുകയെത്രയായാലും സൗജന്യമായി തുടരും. വ്യാപാരികൾക്കുള്ള 2,000 രൂപ വരെയുള്ള യുപിഐ പേയ്മെന്റുകളും ചെറുകിട വ്യാപാരികൾക്ക് ലഭിക്കുന്ന ചില ഇടപാടുകളും സീറോ എംഡിആർ പരിധിയിൽ തുടരും.2,000 രൂപയ്ക്ക് മുകളിലുള്ള വ്യാപാരി ഇടപാടുകൾക്ക് സാധാരണ 0.4 ശതമാനമാണ് എംഡിആർ. പുതിയ നിരക്ക് ഒക്ടോബർ 15 മുതൽ പ്രാബല്യത്തിൽ വരുമെന്ന് കേന്ദ്രം കോടതിയെ അറിയിച്ചു.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് ഹർജി പരിഗണിച്ചത്.

യുപിഐ ഇടപാടുകൾക്ക് എംഡിആർ; കേന്ദ്ര തീരുമാനത്തിൽ സുപ്രീംകോടതി സ്റ്റേ ഇല്ല

തിരുവനന്തപുരം : വിവാഹ വിപണിക്ക് നേരിയ ആശ്വാസമായി സംസ്ഥാനത്ത് സ്വർണവിലയിൽ വീണ്ടും ഇടിവ്. ഇന്ന് പവന് 1840 രൂപയാണ് കുറഞ്ഞത്. ഇതോടെ ഒരു പവൻ സ്വർണത്തിന്റെ വില 1,11,960 രൂപയിൽ നിന്ന് 1,10,120 രൂപയായി. തുടർച്ചയായ രണ്ടാം ദിവസമാണ് സ്വർണവില കുറയുന്നത്. ഗ്രാമിന് 230 രൂപ കുറഞ്ഞ് 13,765 രൂപയായി.
ആഗസ്ത് ഏഴിനാണ് അവസാനമായി സ്വർണവില 1,10,000 രൂപയ്ക്ക് താഴെയെത്തിയത്. സെപ്റ്റംബറിൽ രേഖപ്പെടുത്തിയ ഏറ്റവും കുറഞ്ഞ വിലയും ഇതുതന്നെയാണ്. 24 കാരറ്റ് സ്വർണത്തിന് പവന് 1,20,136 രൂപയും ഗ്രാമിന് 15,017 രൂപയുമാണ് വില. 18 കാരറ്റിന് പവന് 90,104 രൂപയും ഗ്രാമിന് 11,263 രൂപയുമാണ്.
അന്താരാഷ്ട്ര വിപണിയിലെ ചലനങ്ങളാണ് സംസ്ഥാനത്തെ സ്വർണവിലയിലും ഏറ്റക്കുറച്ചിലുകൾക്ക് പ്രധാന കാരണം. ഡോളർ-രൂപ വിനിമയ നിരക്ക്, ഇറക്കുമതി തീരുവ, ക്രൂഡ് ഓയിൽ വില, ആഭ്യന്തര ഓഹരി വിപണിയിലെ മാറ്റങ്ങൾ തുടങ്ങിയ ഘടകങ്ങളും സ്വർണവിലയെ സ്വാധീനിക്കും.
പ്രാദേശികമായി പ്രവർത്തിക്കുന്ന ഗോൾഡ് അസോസിയേഷനുകളാണ് സംസ്ഥാനത്ത് സ്വർണവില നിശ്ചയിക്കുന്നത്. എന്നാൽ ആഗോള വിപണിയിലെ ചെറിയ മാറ്റങ്ങൾ പോലും ആഭ്യന്തര സ്വർണവിലയിൽ പ്രതിഫലിക്കാറുണ്ട്.

സ്വർണവിലയിൽ വീണ്ടും ഇടിവ്; പവന് 1840 രൂപ കുറഞ്ഞു

അമ്പലപ്പുഴ: കള്ളക്കടൽ പ്രതിഭാസത്തെ തുടർന്ന് അപ്രതീക്ഷിതമായി കടൽ കയറിയതോടെ ആലപ്പുഴ ജില്ലയിലെ തീരപ്രദേശങ്ങളിൽ ആശങ്ക. ഇന്നലെ വൈകിട്ടോടെ പുറക്കാട് മേഖലയിൽ ശക്തമായ തിരമാലകളാണ് അനുഭവപ്പെട്ടത്. കടൽക്ഷോഭത്തിൽപ്പെട്ട മത്സ്യത്തൊഴിലാളികൾ വള്ളങ്ങൾ സുരക്ഷിതമായി കരയ്ക്കടുപ്പിച്ച് രക്ഷപ്പെട്ടു.
തോട്ടപ്പള്ളി, പുറക്കാട്, ആനന്ദേശ്വരം, പറവൂർ, ഗലീലിയ, തുമ്പോളി തുടങ്ങിയ തീരപ്രദേശങ്ങളിൽ നിന്ന് മത്സ്യബന്ധനത്തിന് പോയ വള്ളങ്ങളാണ് അപ്രതീക്ഷിതമായി ഉയർന്ന ശക്തമായ തിരമാലകളിൽപ്പെട്ടത്. കൂറ്റൻ തിരമാലകൾ ഉയരുന്നത് ശ്രദ്ധയിൽപ്പെട്ടതോടെ വള്ളങ്ങൾ ഉടൻ കരയ്ക്കടുപ്പിക്കുകയായിരുന്നുവെന്ന് മത്സ്യത്തൊഴിലാളികൾ പറഞ്ഞു.
കള്ളക്കടൽ പ്രതിഭാസം സംബന്ധിച്ച് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിരുന്നെങ്കിലും ഇത് അവഗണിച്ചാണ് ചിലർ മത്സ്യബന്ധനത്തിന് പോയതെന്നാണ് വിവരം.
അതേസമയം, മുന്നറിയിപ്പ് നിലനിന്നിട്ടും തോട്ടപ്പള്ളി തീരദേശ പൊലീസ് ആവശ്യമായ സുരക്ഷാ നടപടികൾ സ്വീകരിച്ചില്ലെന്ന് മത്സ്യത്തൊഴിലാളി സംഘടനകൾ ആരോപിച്ചു. തീരദേശ മേഖലയെക്കുറിച്ച് മതിയായ പരിചയമില്ലാത്ത ചില ഉദ്യോഗസ്ഥർ ചുമതലയേറ്റതോടെ കടലിൽ പോകുന്ന തൊഴിലാളികൾക്ക് അടിയന്തര സാഹചര്യങ്ങളിൽ ആവശ്യമായ സഹായം ലഭിക്കുന്നില്ലെന്നും സംഘടനകൾ പരാതിപ്പെട്ടു.

കള്ളക്കടൽ പ്രതിഭാസം; ആലപ്പുഴ തീരത്ത് കൂറ്റൻ തിരമാലകൾ, മത്സ്യത്തൊഴിലാളികൾ വള്ളങ്ങൾ കരയ്ക്കടുപ്പിച്ചു

കൊച്ചി: താരസംഘടനയായ ‘അമ്മ’യിലെ തർക്കങ്ങളുമായി ബന്ധപ്പെട്ട പരാതികളിൽ പരിഹാസവുമായി ഹൈക്കോടതി. സംഘടനയുമായി ബന്ധപ്പെട്ട കേസുകൾ പരിഗണിക്കാൻ പ്രത്യേക കോടതി തന്നെ വേണ്ടിവരുമല്ലോ എന്നായിരുന്നു കോടതിയുടെ ചോദ്യം. സാധാരണക്കാരുടെ നിരവധി പ്രശ്‌നങ്ങൾ പരിഗണിക്കാനുള്ളപ്പോഴാണ് ഇത്തരം വിഷയങ്ങൾ തീർക്കാൻ സമയം ചെലവഴിക്കേണ്ടിവരുന്നതെന്നും കോടതി നിരീക്ഷിച്ചു.
തനിക്കെതിരായ കേസ് റദ്ദാക്കണമെന്നാവശ്യപ്പെട്ട് നടി ലക്ഷ്മിപ്രിയ നൽകിയ ഹർജി പരിഗണിക്കവെയാണ് ഹൈക്കോടതിയുടെ പരാമർശം. ഹർജിയിൽ സർക്കാരിന് കോടതി നോട്ടീസ് അയച്ചു. മൂന്നാഴ്ചയ്ക്ക് ശേഷം കേസ് വീണ്ടും പരിഗണിക്കും. കോടതി നിർദേശപ്രകാരം പൊലീസ് രജിസ്റ്റർ ചെയ്ത എഫ്.ഐ.ആർ റദ്ദാക്കണമെന്നാണ് ലക്ഷ്മിപ്രിയയുടെ ആവശ്യം.
സാമൂഹികമാധ്യമത്തിലൂടെ അപമാനിച്ചെന്ന പരാതിയിൽ പാലാരിവട്ടം പൊലീസ് കഴിഞ്ഞ ദിവസമാണ് ലക്ഷ്മിപ്രിയക്കെതിരെ കേസെടുത്തത്.
നടി അൻസിബ നൽകിയ സ്വകാര്യ അന്യായത്തെ തുടർന്നായിരുന്നു കോടതി നടപടി. ലക്ഷ്മിപ്രിയ വ്യക്തിഹത്യ നടത്തിയെന്നും സ്ത്രീത്വത്തെ അപമാനിക്കുന്ന തരത്തിലുള്ള പരാമർശങ്ങൾ നടത്തിയെന്നും ആരോപിച്ചാണ് അൻസിബ പൊലീസിനെ സമീപിച്ചത്. പരാതിയിൽ പൊലീസ് കേസെടുക്കാതിരുന്നതിനെ തുടർന്ന് അൻസിബ മജിസ്‌ട്രേറ്റ് കോടതിയെയും പിന്നീട് ഹൈക്കോടതിയെയും സമീപിക്കുകയായിരുന്നു.
പരാതി വീണ്ടും പരിശോധിക്കാൻ ഹൈക്കോടതി കീഴ്‌ക്കോടതിക്ക് നിർദേശം നൽകി. താരസംഘടനയായ ‘അമ്മ’യിലെ തർക്കങ്ങൾക്കിടെയാണ് അൻസിബയും ലക്ഷ്മിപ്രിയയും തമ്മിലുള്ള പ്രശ്‌നം പുറത്തുവന്നത്.

‘അമ്മ’യിലെ തർക്കങ്ങൾ; പരാതികളിൽ ഹൈക്കോടതിയുടെ പരിഹാസ പരാമർശം

&nbsp;റാഞ്ചി: ജാർഖണ്ഡിൽ സ്കൂൾ പ്രിൻസിപ്പലിന് നേരെ ആക്രമണം. ഖുന്തിയിലുള്ള സെന്റ് മൈക്കിൾസ് ചർച്ചുമായി ബന്ധപ്പെട്ട ആർസി ബോയ്സ് മിഡിൽ സ്കൂൾ പ്രിൻസിപ്പൽ ഫാദർ ബെനഡിക്ട് ബാർലയെ ആക്രമിച്ച സംഭവത്തിൽ മൂന്ന് പ്രായപൂർത്തിയാകാത്ത കുട്ടികളെ പൊലീസ് കസ്റ്റഡിയിലെടുത്തു. നാലാമത്തെ പ്രതിക്കായി തിരച്ചിൽ തുടരുകയാണ്.പിടിയിലായവർ 13, 14, 15 വയസ്സുള്ളവരാണ്. നാലുപേരും ഈ സ്കൂളിൽനിന്ന് ഏഴാം ക്ലാസ് പഠനം പൂർത്തിയാക്കിയവരും നേരത്തെ സ്കൂൾ ഹോസ്റ്റലിൽ താമസിച്ചിരുന്നവരുമാണ്. പ്രാദേശിക മേളയിൽ പങ്കെടുക്കാൻ പണം കണ്ടെത്തുന്നതിനായാണ് നാല് മുൻ വിദ്യാർഥികൾ സ്കൂളിൽ അതിക്രമിച്ച് കയറിയത്.
ഒക്ടോബർ 20ന് രാത്രി 8.30ഓടെയാണ് ഇവർ സ്കൂളിലെത്തിയത്. മോഷണം നടത്തുന്നതിനിടെ പ്രിൻസിപ്പൽ ഫാദർ ബെനഡിക്ട് ബാർലയെ കണ്ടതോടെ പിടിക്കപ്പെടുമെന്ന ഭയത്തിൽ പ്രതികളിലൊരാൾ ആയുധം ഉപയോഗിച്ച് അദ്ദേഹത്തിന്റെ നെറ്റിയിലും കണ്ണിന് സമീപവും ആക്രമിക്കുകയായിരുന്നു.
പ്രതികളുടെ മൊഴിയുടെ അടിസ്ഥാനത്തിൽ സ്കൂളിൽനിന്ന് മോഷ്ടിച്ച 85,747 രൂപയും മൊബൈൽ ഫോണുകളും മോഷ്ടിച്ച പണം ഉപയോഗിച്ച് വാങ്ങിയ സാധനങ്ങളും പൊലീസ് കണ്ടെത്തി. പണത്തിന്റെ ഒരു ഭാഗം വനമേഖലയിൽ കുഴിച്ചിട്ട നിലയിലായിരുന്നു.ഗുരുതരമായി പരിക്കേറ്റ് അബോധാവസ്ഥയിലായ ഫാദർ ബെനഡിക്ട് ബാർലയെ അടുത്ത ദിവസം രാവിലെയാണ് കണ്ടെത്തിയത്. തുടർന്ന് റാഞ്ചിയിലെ ആശുപത്രിയിൽ പ്രവേശിപ്പിച്ച അദ്ദേഹത്തിന് ചികിത്സ തുടരുകയാണ്.

മേളയ്ക്ക് പണം കണ്ടെത്താൻ സ്കൂളിൽ മോഷണം; പ്രിൻസിപ്പലിന് നേരെ ആക്രമണം, മൂന്ന് പേർ കസ്റ്റഡിയിൽ

പ്രയാഗ്‌രാജ്: സ്കൂൾ വാനിൽ നിന്ന് ഇറങ്ങി ബാഗെടുക്കുന്നതിനിടെ വാഹനം പിന്നോട്ടെടുത്തപ്പോൾ എട്ടുവയസ്സുകാരി വാനിനും വീടിന്റെ മതിലിനുമിടയിൽപ്പെട്ട് മരിച്ചു. ഉത്തർപ്രദേശിലെ പ്രയാഗ്‌രാജിലാണ് ദാരുണ സംഭവം. ഡൽഹി പബ്ലിക് സ്കൂളിലെ മൂന്നാം ക്ലാസ് വിദ്യാർഥിനിയായ തസ്വാനി ഉദയാൻഷി പാഠക്കാണ് മരിച്ചത്.വ്യാഴാഴ്ച ഉച്ചയോടെയാണ് അപകടം. കുട്ടിയെ വീട്ടിലെത്തിച്ച സ്കൂൾ വാനിൽ നിന്ന് ഇറങ്ങിയ തസ്വാനി ബാഗെടുക്കാനായി വാഹനത്തിന്റെ പിന്നിലേക്ക് നീങ്ങി. ഇതിനിടെ കുട്ടി സുരക്ഷിതമായ അകലത്തിലേക്ക് മാറിയെന്ന് ഉറപ്പാക്കാതെ ഡ്രൈവർ വാഹനം പിന്നോട്ടെടുത്തെന്നാണ് റിപ്പോർട്ട്. വാനിനും വീടിന്റെ അതിർത്തിമതിലിനുമിടയിൽപ്പെട്ട കുട്ടിക്ക് ഗുരുതരമായി പരിക്കേറ്റു. അപകടം പ്രദേശത്തെ സിസിടിവി ക്യാമറയിൽ പതിഞ്ഞിട്ടുണ്ട്.
കുട്ടികളുടെ നിലവിളി കേട്ട് വീട്ടുകാരും നാട്ടുകാരും ഓടിയെത്തി വാഹനത്തിനടിയിൽപ്പെട്ട കുട്ടിയെ പുറത്തെടുത്തു. ഉടൻ സമീപത്തെ ആശുപത്രിയിൽ എത്തിച്ചെങ്കിലും മരണം സംഭവിച്ചതായി ഡോക്ടർമാർ സ്ഥിരീകരിച്ചു.അപകടത്തിന് പിന്നാലെ സ്ഥലത്തുനിന്ന് രക്ഷപ്പെടാൻ ശ്രമിച്ച ഡ്രൈവറെ നാട്ടുകാരും വഴിയാത്രക്കാരും ചേർന്ന് പിടികൂടി പൊലീസിൽ ഏൽപ്പിച്ചു. സ്ഥലത്തെത്തിയ പൊലീസ് ഡ്രൈവറെ കസ്റ്റഡിയിലെടുക്കുകയും വാൻ പിടിച്ചെടുക്കുകയും ചെയ്തു. വാനിലുണ്ടായിരുന്ന മറ്റ് വിദ്യാർഥികളെ മറ്റൊരു വാഹനത്തിൽ വീടുകളിലെത്തിച്ചു.
വാഹനവും ഡ്രൈവറും കസ്റ്റഡിയിലാണെന്നും സംഭവത്തിൽ കൂടുതൽ അന്വേഷണം നടക്കുകയാണെന്നും യമുനാനഗർ ഡെപ്യൂട്ടി പൊലീസ് കമ്മീഷണർ വിവേക് ചന്ദ്ര യാദവ് അറിയിച്ചു.മനീഷ് പാഠക്കിന്റെയും ആരതി ദുബെയുടെയും ഏക മകളാണ് തസ്വാനി. കുടുംബം ആദ്യം മിർസാപുർ ജില്ലയിൽ നിന്നുള്ളവരാണ്. ഡൽഹിയിലെ സ്വകാര്യ കമ്പനിയിൽ ജോലി ചെയ്യുന്ന മനീഷിന്റെ മകൾ മുത്തച്ഛൻ സുരേന്ദ്ര പാഠക്കിനും മുത്തശ്ശി കടംബിനി പാഠക്കിനുമൊപ്പമായിരുന്നു താമസം. ഗോരഖ്പുരിലെ സർക്കാർ പ്രൈമറി സ്കൂളിൽ അധ്യാപികയാണ് അമ്മ ആരതി ദുബെ.

സ്കൂൾ വാനിനും മതിലിനുമിടയിൽപ്പെട്ട് എട്ടുവയസ്സുകാരിക്ക് ദാരുണാന്ത്യം

വർക്കല: വർക്കല നഗരത്തിൽ 17കാരനെ പൊലീസ് ക്രൂരമായി മർദിച്ചതായി പരാതി. പൊലീസ് അതിക്രമത്തിനിരയായ വർക്കല ചാരുവിള സ്വദേശിയായ യുവാവിന്റെ കാലിന്റെ എല്ല് പൊട്ടി. വർക്കല എസ്‌ഐയും സംഘവുമാണ് മർദിച്ചതെന്നാണ് പരാതി. സ്റ്റേഷനിൽവെച്ച് രക്തം ഛർദിച്ച കൗമാരക്കാരനെ ഭീഷണിപ്പെടുത്തി പരാതിയില്ലെന്ന് എഴുതി വാങ്ങിയതായും കുടുംബം ആരോപിക്കുന്നു. ശരീരമാസകലം ഗുരുതര പരിക്കുകളോടെ കൗമാരക്കാരനെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
വർക്കല ആയുർവേദ ആശുപത്രിക്കടുത്തുള്ള മാസാ മന്തി എന്ന കടയിലെ തൊഴിലാളിയാണ് 17കാരൻ. കഴിഞ്ഞ ദിവസം രാത്രിയുണ്ടായ അടിപിടി കേസുമായി ബന്ധപ്പെട്ട് ഇതേ ഹോട്ടലിലെ മറ്റൊരു തൊഴിലാളിയെ അന്വേഷിച്ചെത്തിയതായിരുന്നു പൊലീസ്. ഇയാളെ കിട്ടാതായതോടെ അവിടെയുണ്ടായിരുന്ന 17കാരനെ മർദിക്കുകയായിരുന്നുവെന്നാണ് പരാതി.ഷൂ ഉപയോഗിച്ച് കാലിൽ ചവിട്ടുകയും കഴുത്തിൽ മുട്ടുകൈ കൊണ്ട് ഇടിക്കുകയും ചെയ്തതായി കൗമാരക്കാരൻ പറഞ്ഞു. മറ്റൊരു പൊലീസുകാരൻ വണ്ടിയിലേക്ക് എടുത്തെറിഞ്ഞതായും ആരോപണമുണ്ട്. ബിപിയുടെ ബുദ്ധിമുട്ടും സോഡിയം കുറഞ്ഞുപോകുന്ന അവസ്ഥയുമുണ്ടെന്നും തനിക്ക് 17 വയസ് മാത്രമാണെന്നും പറഞ്ഞപ്പോൾ ഒരു പൊലീസുകാരൻ കരണത്തടിച്ചതായും കൗമാരക്കാരൻ പറഞ്ഞു. കഴുത്തിനും സാരമായ പരിക്കേറ്റിട്ടുണ്ട്. ശരീരമാസകലം മർദനമേറ്റ പാടുകളുണ്ട്. സ്റ്റേഷനിൽ എത്തിച്ചപ്പോഴാണ് രക്തം ഛർദിച്ചതെന്നും പറയുന്നു. തുടർന്ന് മാതാപിതാക്കൾ എത്തിയാണ് 17കാരനെ ആശുപത്രിയിലെത്തിച്ചത്.
കഴിഞ്ഞ ദിവസത്തെ അടിപിടി കേസിൽ ഒന്നാം പ്രതിയാക്കുമെന്നും മാതാപിതാക്കളെയും പ്രതി ചേർക്കുമെന്നും പൊലീസ് ഭീഷണിപ്പെടുത്തിയതായും കൗമാരക്കാരൻ പറഞ്ഞു. ദേഹോപദ്രവം ചെയ്തിട്ടില്ലെന്നും പരാതിയില്ലെന്നും ഭീഷണിപ്പെടുത്തി എഴുതി വാങ്ങിയതായും ആരോപണമുണ്ട്. അതേസമയം, സംഭവത്തിന്റെ സിസിടിവി ദൃശ്യങ്ങൾ പുറത്തുവിട്ടിട്ടില്ല.വർക്കല ചാരുവിള സ്വദേശിയാണെങ്കിലും നിലവിൽ അമ്മയ്ക്കൊപ്പം ചെമ്മരുതിയിൽ വാടകയ്ക്കാണ് താമസം. 20 ദിവസം മുൻപാണ് ഹോട്ടലിൽ ജോലിക്ക് കയറിയത്. കുടുംബത്തിന്റെ സാമ്പത്തിക പരാധീനതകൾ കാരണം പഠനം ഉപേക്ഷിച്ചതാണ്.സംഭവത്തിൽ വർക്കല സിഎച്ച്ഒ ഉൾപ്പെടെ നാല് പൊലീസുകാർക്കെതിരെ വർക്കല ഡിവൈഎസ്പിക്കും ചൈൽഡ് ലൈനിനും കുടുംബം പരാതി നൽകി.

7കാരനെ പൊലീസ് മർദിച്ചതായി പരാതി; കാലിന്ടെ എല്ലുപൊട്ടി

ബംഗളൂരു: മലയാളി യുവാവിനെ താമസസ്ഥലത്ത് മരിച്ച നിലയിൽ കണ്ടെത്തി. കണ്ണൂർ പെരിങ്ങത്തൂർ പുല്ലൂക്കര ചാത്തു വൈദ്യർ നിലയം വീട്ടിൽ കെ.എം. സുഹാസന്‍റെ മകൻ സ്വരൂപ് (27) ആണ് മരിച്ചത്.
രണ്ട് വർഷത്തോളമായി കോറമംഗലയിൽ പലചരക്ക് കടയിൽ ജോലിചെയ്തു വരികയായിരുന്നു സ്വരൂപ്. വെള്ളിയാഴ്ച രാവിലെ കട തുറന്ന ശേഷം താമസസ്ഥലത്തേക്ക് മടങ്ങിയ സ്വരൂപ് ഏറെ നേരം കഴിഞ്ഞും തിരികെ എത്താതിരുന്നതിനെത്തുടർന്ന് നടത്തിയ പരിശോധനയിലാണ് മരിച്ച നിലയിൽ കണ്ടെത്തിയത്. തുടർന്ന് പൊലീസിൽ വിവരം അറിയിച്ചു.
പൊലീസ് ഇൻക്വസ്റ്റ് നടപടികൾ പൂർത്തിയാക്കി. സെന്‍റ് ജോൺസ് ആശുപത്രിയിലെ പോസ്റ്റ്‌മോർട്ടത്തിന് ശേഷം മൃതദേഹം നാട്ടിലേക്ക് കൊണ്ടുപോകും.

മലയാളി യുവാവ് ബംഗളൂരുവിൽ മരിച്ച നിലയിൽ

മാഹി: ദേശീയപാത തലശ്ശേരി–മാഹി ബൈപാസ് റോഡിൽ ലോറിയിടിച്ച് സ്കൂട്ടർ യാത്രികൻ മരിച്ചു. കോടിയേരി കൃഷ്ണ നിവാസിൽ മനോജ് കുമാർ (59) ആണ് മരിച്ചത്.
ഈസ്റ്റ് പള്ളൂർ സർവിസ് റോഡിലാണ് അപകടം. ജിയോ പെട്രോൾ പമ്പിന് സമീപം ഇന്ന് രാവിലെ മനോജ് കുമാർ സഞ്ചരിച്ച സ്കൂട്ടറിൽ ലോറി ഇടിക്കുകയായിരുന്നു.

മാഹി ബൈപാസിൽ സ്കൂട്ടർ ലോറിയിലിടിച്ച് അപകടം; യാത്രികൻ മരിച്ചു

Mahe

നാദാപുരം: ഗവണ്‍മെന്റ് ആശുപത്രിയില്‍ ചികിത്സാ പിഴവെന്ന് പരാതി. ഡെന്റല്‍ ഒപിയില്‍ ചികിത്സ തേടിയ പതിനൊന്നുകാരന്റെ കേടായ പല്ലിന് പകരം എടുത്തത് മറ്റൊരു പല്ലാണെന്നാണ് പരാതി. വാണിമേല്‍ തോട്ടത്തില്‍ സജിത്തിന്റെ മകന്‍ ശ്രീ ഹര്‍ഷിന് കഴിഞ്ഞ ശനിയാഴ്ച്ച പല്ല് വേദനയെ തുടര്‍ന്ന് നാദാപുരം ഗവ. ആശുപത്രിയില്‍ ചികിത്സ തേടുകയായിരുന്നു. അന്ന് മരുന്ന് കൊടുത്ത് വ്യാഴാഴ്ച പല്ല് നീക്കാനെത്തുകയും ഇഞ്ചക്ഷന്‍ നല്‍കി പല്ല് എടുക്കുകയുമായിരുന്നു.&nbsp;

അര മണിക്കൂറിന് ശേഷം കോട്ടണ്‍ (പഞ്ഞി) എടുത്ത് മാറ്റി തണുത്ത വെള്ളം കൊടുക്കാന്‍ നിര്‍ദേശിച്ചതനുസരിച്ച് വീട്ടിലേക്ക് മടങ്ങുന്ന വഴി മാതാവ് ജ്യുസ് വാങ്ങി നല്‍കുകയും ചെയ്തു. തുടര്‍ന്ന് മാതാവ് പല്ല് എടുത്തു മാറ്റിയത്നോക്കിയപ്പോഴാണ് വലത് ഭാഗത്തെ കേടായ പല്ല് നീക്കാതെ തൊട്ടടുത്ത പല്ല് എടുത്ത് മാറ്റിയത് ശ്രദ്ധയില്‍ പെട്ടത്. ഉടന്‍ തന്നെ കുട്ടിയെയും കൊണ്ട് ആശുപത്രിയിലെത്തി ഡോക്ടറോട് കാര്യം പറഞ്ഞപ്പോള്‍ രണ്ടും എടുത്ത് മാറ്റേണ്ടതാണെന്നാണ് ഡോക്ടര്‍ പറഞ്ഞതെന്ന് മാതാവ് പറഞ്ഞു. വിഷയത്തിൽ വീട്ടമ്മ ആശുപത്രി സൂപ്രണ്ടിനും നാദാപുരം പോലീസിലും പരാതി നല്‍കി.

നാദാപുരം ഗവണ്‍മെന്റ്  ആശുപത്രിയില്‍ ചികിത്സാ പിഴവ്; പതിനൊന്നുകാരന്റെ പല്ല് മാറിയെടുത്തെന്ന് പരാതി